བོད་མིར་དམངས་གཙོའི་སྲིད་གཞུང་ཚད་ལྡན་ཞིག་ཡོང་ཆེད་ངོས་རང་ཆབ་སྲིད་ཀྱི་དབུ་ཁྲིད་ལས་རྒན་ཡོལ་ཆ་ཚང་ཞུས་ཡོད། ད་ཆར་རྒྱ་ནག་དམར་ཤོག་དབུ་ཁྲིད་ཚོས་ཀྱང་མི་ལོ་ ༦༠ ཙམ་ཕྱིན་པའི་ཆབ་སྲིད་འཛིན་སྐྱོང་ལས་རྒན་ཡོལ་ཞུ་རྒྱུའི་དུས་ལ་བབས་ཡོད། ཅེས་༧གོང་ས་མཆོག་གིས་གསུངས་ཡོད།
ཉིན་འདི་འགར་༧གོང་ས་མཆོག་གིས་ཨོ་སི་ཊོ་ལི་ཡར་ཆོས་ཕྱོགས་ཀྱི་མཛད་འཕྲིན་ཁག་སྐྱོང་བཞིན་ཡོད་པ་ལྟར། ཕྱི་ཚེས་ ༡༢ ཉིན་༧གོང་ས་མཆོག་གིས་ཨོ་སི་ཊོ་ལི་ཡར་གནས་སྡོད་བོད་པ་དང་སོག་པོ། འབྲུག་པ་བཅས་ལ་བཀའ་སློབ་གནང་དོན། ད་ལྟ་ང་ཚོས་ནང་ཆོས་ལ་དད་པ་བྱས་པ་ཙམ་གྱིས་མི་ཆོག་པར་སློབ་སྦྱོང་བྱས་ཏེ་ནང་ཆོས་ཀྱི་གོ་དོན་ཆ་ཚང་ཤེས་པའི་ཐོག དུས་རབས་ ༢༡ པའི་ནང་པ་ཞིག་བྱ་ཐུབ་དགོས་པ་རེད། འདིར་ཡོད་པའི་བོད་པ་ཚོས་ཁྱེད་ཚོ་བཙན་བྱོལ་དུ་འབྱོར་དགོས་དོན་གང་ཡིན་ཤེས་དགོས་པ་རེད། ཁྱེད་ཚོ་འདིར་ཡོང་དོན་ནི། རང་གི་ལུང་པར་རང་བྱུང་གོད་ཆག་གམ་བོད་པ་ནང་ཁུལ་མ་འཆམ་པར་འཁྲུག་པ་ཤོར་ནས་ཡོང་བ་ཞིག་མིན་པར། ཕྱི་ཕྱོགས་ནས་གཞན་གྱིས་བཙན་འཛུལ་བྱས་པའི་རྐྱེན་གྱིས་བཙན་བྱོལ་དུ་ཡོང་དགོས་བྱུང་བ་ཞིག་རེད། དེ་ཡིན་དུས། ང་ཚོས་རང་གི་ཕ་མེས་ནས་ཡོད་པའི་བོད་ཀྱི་སྐད་ཡིག་དང་ནང་ཆོས། རིག་གཞུང་དེ་དང་འབྲེལ་བའི་ཐུན་མིན་ལེགས་བྱང་ཕྱུག་པོ་གཅེས་འཛིན་བྱ་རྒྱུ་ཧ་ཅང་གལ་ཆེན་ཡིན་ཞིང་། དེ་ནི་ང་ཚོར་འཁྲི་བའི་འགན་ཞིག་ཀྱང་ཆགས་ཡོད། ཅེས་གསུངས་འདུག
བོད་མིའི་སྒྲིག་འཛུགས་ཀྱི་འཛིན་སྐྱོང་འགན་དབང་རྩིས་སྤྲོད་གནང་དོན་སྐོར་ལ། ངོས་ཀྱིས་བོད་མིའི་ཆབ་སྲིད་ཀྱི་འཛིན་སྐྱོང་འགན་དབང་མི་མང་གིས་འོས་འདེམས་བྱས་པའི་མགོ་ཁྲིད་ཚོར་རྩིས་སྤྲོད་བྱས་པ་དེར། མང་ཚོགས་ཀྱི་ངོས་ནས་སེམས་འཚབ་བྱ་དགོས་དོན་གང་ཡང་ཡོད་པ་མ་རེད། ངོས་ནས་དེ་ལྟར་ཐག་གཅོད་བྱེད་དོན། མ་འོངས་པའི་བོད་མིའི་མདུན་ལམ་ཆེད་བསམ་བློ་བཏང་བ་ཞིག་ཡིན་པ་ལས། བོད་ཀྱི་རྩ་དོན་འདོར་རྒྱུའི་བསམ་བློ་བཏང་བ་རྩ་བ་ནས་མིན། ཞེས་གསུངས་འདུག
ཡུལ་དེའི་བོད་རྒྱ་མཛའ་འབྲེལ་ཚོགས་པའི་གོ་སྒྲིག་འོག ༧གོང་ས་མཆོག་གིས་ཡུལ་དེར་གནས་སྡོད་རྒྱ་རིགས་དམངས་གཙོ་དོན་གཉེར་བ་ཚོར་གསུངས་དོན། རྒྱ་བོད་མི་རིགས་གཉིས་ལ་མི་ལོ་ ༡༠༠༠ ལྷག་གི་དུས་ཡུན་རིང་པོའི་ལོ་རྒྱུས་ཀྱི་འབྲེལ་བ་ཡོད་པ་དང་། ནང་ཆོས་ལ་ཆ་བཞག་ནའང་། བོད་དུ་ནང་ཆོས་མ་དར་བའི་ལོ་བརྒྱ་ཕྲག་དུ་མའི་གོང་རྒྱ་ནག་ཏུ་ནང་ཆོས་དར་ཡོད་པ་རེད། དེའི་སྟབས་ཀྱིས། རྒྱ་རིགས་ཚོ་བཅོམ་ལྡན་འདས་ཀྱི་དགེ་ཕྲུག་རྒན་པ་ཆགས་ཡོད་ལ། ང་ཚོ་བོད་པ་དགེ་ཕྲུག་གཞོན་པ་ཆགས་ཡོད། ཅེས་གསུངས་འདུག
བོད་རྒྱའི་གནད་དོན་སྐོར་ལ། ཆབ་སྲིད་ཀྱི་ཐོག་ནས་བཤད་ན། ང་ཚོ་ཕྱོགས་གཉིས་ཀའི་ངོས་ནས་གྲོས་མོལ་དང་གཉིས་སྨན་གྱི་ཐབས་ལམ་ཐོག་དཀའ་ངལ་སེལ་དགོས་པ་རེད། ང་ཚོས་རྒྱ་ནག་དང་ཁ་བྲལ་གྱི་རང་བཙན་རྩོད་ཀྱི་མེད་པར་བོད་མི་ཚོར་མིང་དོན་མཚུངས་པའི་རང་སྐྱོང་གནས་བབ་ཅིག་འཐོབ་འབད་བྱེད་བཞིན་ཡོད། བོད་མིའི་དམངས་གཙོའི་སྲིད་གཞུང་ཚད་ལྡན་ཞིག་ཡོང་ཆེད་ངོས་རང་ཆབ་སྲིད་ཀྱི་དབུ་ཁྲིད་ལས་རྒན་ཡོལ་ཆ་ཚང་ཞུས་ཡོད། ད་ཆར་རྒྱ་ནག་དམར་ཤོག་དབུ་ཁྲིད་ཚོས་ཀྱང་མི་ལོ་ ༦༠ ཙམ་ཕྱིན་པའི་ཆབ་སྲིད་འཛིན་སྐྱོང་ལས་རྒན་ཡོལ་ཞུ་རྒྱུའི་དུས་ལ་བབས་ཡོད། རྒྱ་ནག་ནི་རྒྱལ་ཁབ་ཆེན་པོ་ཞིག་ཡིན་པའི་རྐྱེན་གྱིས་ཡུལ་དེར་དམངས་གཙོའི་བཅོས་བསྒྱུར་ཉིན་གཅིག་གཉིས་རིང་ཡོང་ཐུབ་པ་ཞིག་མིན་པས། དམངས་གཙོའི་འགྲོ་སྟངས་ཐོག་ག་ལེར་གོམ་པ་སྤོ་རྒྱུ་ཧ་ཅང་གལ་ཆེན་ཡིན་ལ། གོམ་པ་དང་པོ་སྤོ་བར་གཞུང་གི་འཛིན་སྐྱོང་ལམ་ལུགས་ཕྱི་གསལ་ནང་གསལ་བཟོ་དགོས་པ་དང་། དེ་ནས་གསར་འགོད་རང་དབང་སྤྲད་ཐོག དམངས་གཙོའི་བཅོས་བསྒྱུར་གཏོང་ཐུབ་ན་དགེ་མཚན་ཆེན་པོ་ཡོང་གི་རེད། ཅེས་གསུངས་འདུག
ཕྱི་ཚེས་ ༡༤ ཉིན་༧གོང་ས་མཆོག་ཨོ་སི་ཊོ་ལི་ཡའི་གྲོས་ཚོགས་ནང་ཆིབས་སྒྱུར་སྐྱོང་སྐབས། ཨོ་སི་ཊོ་ལི་ཡའི་ཕྱོགས་འགལ་ཚོགས་པའི་མགོ་ཁྲིད་ཊོ་ནེ་ཨེ་བྷོ་ཊི་(Tony Abbott) ལགས་ཀྱིས་གཙོས་གནད་ཡོད་མགོ་ཁྲིད་ཁག་གཅིག་གིས་ཕེབས་བསུ་གཟབ་རྒྱས་ཞུས་ཡོད་ཅིང་། ཨོ་སི་ཊོ་ལི་ཡ་རྒྱལ་ཡོངས་ཚོགས་པའི་མགོ་ཁྲིད་ཝ་རེན་ཊརུ་སི་ (Warren Truss) ལགས་དང་། ལྗང་ཁུ་ཚོགས་པའི་མགོ་ཁྲིད་བྷོབ་བྷ་རོན་(Bob Brown) ལགས། ཤེས་ཡོན་བློན་ཆེན་པི་ཊར་གྷ་རེ་ཊི་ (Peter Gerrett) ལགས་བཅས་དང་ལྷན་མཇལ་འཕྲད་གནང་ཡོད་པ་མ་ཟད། ༸གོང་ས་མཆོག་གིས་ཨོ་སི་ཊོ་ལི་ཡའི་གྲོས་ཚོགས་སུ་གསར་འགོད་པ་ཚོར་བཀའ་སློབ་ཕེབས་དོན། ངོས་རང་ཁུལ་འདིར་ཡོང་རྒྱུའི་དམིགས་ཡུལ་གཙོ་བོ་དེ་འགྲོ་བ་མིའི་རིན་ཐང་གོང་འཕེལ་གཏོང་རྒྱུ་དང་ཆོས་ལུགས་མཐུན་སྒྲིལ་ཆེད་ཡོང་བ་ཡིན། འདི་ག་ཨོ་སི་ཊོ་ལི་ཡའི་སྲིད་བློན་མཆོག་ལ་གལ་ཏེ་ཆོས་འབྲེལ་གྱི་ལས་དོན་ཞུ་ དགོས་རིགས་ཡོད་ཚེ་ངོས་དང་ཐུག་ན་ཕན་ཐོགས་ཡོད་ཀྱང་། ད་རེབ་ཆོས་འབྲེལ་ཕུལ་དགོས་མེད་པར་བརྟེན་དམིགས་བསལ་མཇལ་འཕྲད་ཞུ་དགོས་དོན་མེད་ཅེས་གསུངས་འདུག ཉིན་རྒྱབ་༧གོང་ས་མཆོག་གིས་གྲོང་འཁྱེར་དེ་གའི་ཚོགས་ཁང་ཆེན་པོ་ཞིག་ཏུ་༼ ལའི་བླ་མ་མཆོག་དང་ལྷན་དུ་བདེ་སྐྱིད་དང་སྲོག འཚོ་གནས། བརྩེ་བ། བཟོད་བསྲན་བཅས་ལ་བགྲོ་གླེང་༽ (A Conversation with His Holiness the Dalai Lama on Happiness, Life & Living Love and Forgiveness ) ཞེས་པའི་བརྗོད་གཞིའི་ཐོག་མང་ཚོགས་དང་ལྷན་བགྲོ་གླེང་གནང་ཡོད་འདུག
དེ་བཞིན་ཐེངས་འདིའི་ཀེན་བྷེ་རིའི་ཆིབས་སྒྱུར་སྐབས་ས་གནས་དེ་གའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ངོས་ནས་སྣེ་ལེན་གཟབ་རྒྱས་ཞུས་ཡོད་པ་མ་ཟད། ངལ་རྩོལ་ཚོགས་པའི་འཐུས་མི་མེ་ཁིལ་ཌེན་བྷེ་ (Michael Danby) ལགས་ཀྱིས་གསུངས་དོན། དེ་སྔའི་སྲིད་བློན་ཀེ་ཝེན་རུ་ཌི་ (Kevin Rudd) མཆོག་གིས་ཐེངས་འདིར་༸གོང་ས་མཆོག་དང་མཇལ་འཕྲད་མ་གནང་བར་བློ་ཕམ་ཡོད། གང་ཡིན་ཞེ་ན་ཁོང་དེ་སྔ་ཨོ་སི་ཊོ་ལི་ཡའི་སྲིད་བློན་སྐབས་རྒྱ་གཞུང་གི་བཙན་དབང་འོག་དཀའ་སྡུག་མྱོང་བཞིན་པའི་བོད་མི་ཚོའི་ཆེད་གདུང་སེམས་མཉམ་སྐྱེ་ཞུ་མཁན་ཞིག་ཡིན། ཞེས་སོགས་བརྗོད་འདུག
གསར་འགོད་པ། དཔལ་ལྡན།
དམར་ཤོག་གི་དབུ་འཁྲིད་ཚོས་རྒན་ཡོལ་ཞུ་རན་ཡོད། དམངས་གཙོ་དར་རན་སོང་། རྒན་ཡོལ་ཕྱིས་ན་བློ་འགྱོད་ཡང་ངེས། མིང་ངན་འཁྱེར་ནས་སྡོད་པ་ལས། ད་འཚམས་བཞག་ན་ཡག་བགྱིད་མ་རེད་པེ། དམར་པོའི་སྤོ་ལགས་རྨོ་ལགས་ཚོ། རྒན་གསོ་ཁང་ལ་མ་ཎི་གདོན་སྟངས་སྦྱོངས་དང་། ད་ལྟའི་གཏམ་ངན་སུལ་སྲུངས་ཀྱི་མི་ཚེ་ལས་དྲག་ག་ཡོང་ངེས་ལགས།
མི་དམངས་ཉིན་རེའི་ཚགས་པར་གྱི་གླེང་བརྗོད་གསར་བའི་རིགས་ལ་བརྟག་ན་མཐོ་ས་ནས་སྨྲ་བརྗོད་རང་དབང་གི་སྒོ་འབྱེད་ཐབས་ཤིག་མཐོང་ཐུབ། ཡིད་བཞིན་ནོར་བུ་མཆོག་གི་ཕྱི་ནང་མེད་པའི་ཀུན་ཕན་གྱི་མཛད་པ་འདི་རིགས་ཀྱིས་རྒྱ་ནག་གི་མཐོ་རིམ་མི་སྣ་མི་ཉུང་བ་ཞིག་ལ་ཡང་བློ་སྐྱེད་གསར་བ་འབྱུང་ངེས། མཛད་པ་འདི་ཀུན་ནི་ངེས་དོན་གྱི་དྲང་བདེན་དང་བྱམས་བརྩེ། ཀུན་ཕན་གྱི་དན་རྟགས་ཡིན་པས། འཛམ་གླིང་མི་དམངས་ཀྱིས་སྔར་ལྷག་གིས་ཁོང་ལ་གདེང་འཇོག་དང་ཡིད་ཆེས། རྒྱབ་སྐྱོར་བཅས་གནང་རྒྱུར་རེ་བ་ཧ་ཅང་ཆེ། དེ་བས་བདག་སེམས་ཧ་ཅང་དགའ།