བོད་ནང་གི་གཞོན་སྐྱེས་རྩོམ་པ་པོ་ཞིག་གིས་འདས་པའི་ལོ་གསུམ་རིང་བོད་ས་སྟོད་སྨད་བར་གསུམ་ལ་ཞིབ་འཇུག་བྱས་ཏེ། ས་བྱི་ཞི་རྒོལ་ཆེན་མོ་དང་འབྲེལ་བའི་གནས་ཚུལ་བསྡུ་སྒྲིག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་ཆེན་ཐེངས་བཅུ་དྲུག་པའི་ཐོག་སྙན་ཞུ་རུ་ཕུལ་ཡོད་འདུག
ཕྱི་ཚེས་ ༢༠ ཉིན་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གིས་བོད་ནང་གི་རྩོམ་པ་པོ་དྷི་ལྷ་ལྡན་ལགས་ཀྱི་༼ཚེ་སྲོག་གི་བསྐྲུན་པའི་སྐད་ཆ་༽ཞེས་པའི་དཔེ་དེབ་བསྐྱར་དཔར་དབུ་འབྱེད་གནང་ཡོད། མཛད་སྒོའི་སྐུ་མགྲོན་གཙོ་བོ་བཀའ་ཟུར་རིན་ཆེན་མཁའ་འགྲོ་ལགས་ཆེད་ཕེབས་གནང་འདུག་ལ། གཞན། བོད་ཀྱི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་འགྲུབ་ལྷ་དར་ལགས་དང་། རྩོམ་པ་པོ་ངྷི་ལྷ་ལྡན་ལགས་དང་འབྲེལ་བ་ཡོད་པའི་ཆབ་སྲིད་བཙོན་བསྟན་པ་དར་རྒྱས་ལགས། ལྟེ་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་བཅས་ཀྱིས་གཏམ་བཤད་གནང་སོང་།
༼ཚེ་སྲོག་གི་བསྐྲུན་པའི་སྐད་ཆ་༽ཞེས་པའི་དཔེ་དེབ་འདི་ནི། ཕ་ཡུལ་མགོ་ལོག་ནས་ཡིན་པའི་རྩོམ་པ་པོ་དྷི་ལྷ་ལྷན་ལགས་ཀྱིས་ལོ་གསུམ་རིང་བོད་ས་སྟོད་སྨད་བར་གསུམ་དུ་ཉུལ་ཞིབ་གནང་སྟེ། ༢༠༠༨ ལོའི་ས་བྱི་ཞི་རྒོལ་ཆེན་མོའི་འབྱུང་རྐྱེན་དང་བརྒྱུད་རིམ། ད་ལྟའི་གནས་སྟངས་བཅས་གསལ་བོར་བྲིས་ཏེ། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆེན་ཐེངས་ ༡༦ སྟེང་ལ་སྙན་ཞུ་རུ་ཕུལ་བ་ཞིག་ཡིན་པ་དང་། དེབ་འདི་བོད་ནང་དུ་ ༢༠༡༠ ལོར་པར་བསྐྲུན་ཐེངས་དང་པོ་དང་། ༢༠༡༡ ལོར་པར་བསྐྲུན་ཐེངས་གཉིས་པ་བཅས་གནང་རྗེས། ས་བྱི་ཞི་རྒོལ་ཆེན་མོ་བྱུང་ནས་ལོ་གསུམ་འཁོར་བའི་དུས་དྲན་གྱི་སྐབས་དང་བསྟུན་ནས་སྔ་རྗེས་པར་ཐེངས་གཉིས་ཀྱི་དཔེ་དེབ་རྣམས་མཉམ་གཅིག་ཏུ་འགྲེམས་སྤེལ་བྱས་ཡོད་འདུག
མཛད་སྒོའི་ཐོག་མར་ལྟེ་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་ཀྱིས་བོད་ནང་གི་སྤྱི་ཡོངས་གནས་སྟངས་ངོ་སྤྲོད་གནང་དོན། ཚང་མས་ཤེས་གསལ་ལྟར་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཧ་ཅང་གཉན་འཕྲང་ཅན་དུ་གྱུར་ཏེ། བོད་མི་རྣམས་ཞེད་སྣང་དང་དངངས་སྐྲག་འོག་གནས་ཡོད། ལྷག་པར་དུ་ས་བྱི་ཞི་རྒོལ་གྱི་རྗེས་ནས་རྒྱ་གཞུང་གིས་བོད་པའི་རིག་གཞུང་དང་ཆོས་ལུགས། སྐད་ཡིག་ནི་ཁ་བྲལ་གྱི་གཞི་རྩར་བརྩིས་ཏེ་ ༢༠༠༨ ལོ་ནས་བཟུང་བོད་ནང་གི་རྩོམ་པ་པོ་དང་དྲ་རྒྱའི་སྟེང་གནས་ཚུལ་སྤེལ་མཁན་མི་ ༦༠ ལྷག་འཛིན་བཟུང་བྱས་མང་ཆེ་བ་གཞོན་སྐྱེས་རེད། བོད་ནང་གི་རྩོམ་པ་པོ་དང་གཞས་པ་ཚོས་རྒྱལ་སྤྱིའི་ཁྲིམས་ལུགས་དང་རྒྱ་ནག་གི་རྩ་ཁྲིམས་གཞིར་བཟུང་ཐོབ་ཐང་བེད་སྤྱོད་གཏོང་གི་ཡོད་ཀྱང་། རྒྱ་གཞུང་གིས་ཁ་བྲལ་བར་ཉེས་འཛུགས་ཀྱིས་ཁྲིམས་ཆད་གཅོད་ཀྱི་ཡོད་པ་དེ་རྒྱལ་སྤྱིའི་ཁྲིམས་ལུགས་དང་རྒྱ་གཞུང་རང་གི་རྩ་ཁྲིམས་ལའང་འགལ་ཡོད་པ་རེད། ཅེས་བརྗོད་སོང་།
དེ་རྗེས་ཆབ་སྲིད་བཙོན་ཟུར་བསྟན་པ་དར་རྒྱས་ལགས་ཀྱིས། དེབ་འདིའི་རྩོམ་པ་པོའི་འཚར་ལོངས་ཀྱི་བརྒྱུད་རིམ་སྐོར་ངོ་སྤྲོད་དོན། ༼ཚེ་སྲོག་གི་བསྐྲུན་པའི་སྐད་ཆ༽ཞེས་པའི་དེབ་འདིའི་རྩོམ་པ་པོ་དྷི་ལྷ་ལྡན་ལགས་ ༡༩༨༠ ལོར་མགོ་ལོག་པདྨ་རྫོང་དུ་སྐྱེས་ཤིང་། ཁོང་ནི་ཕ་དབང་ཆེན་དང་མ་གྲོགས་པོ་གཉིས་ལ་བུ་ཕྲུག་དྲུག་ཡོད་པའི་ནང་གི་ཆུང་ཤོས་དེ་རེད། ལོ་ ༡༡ ནས་ས་གནས་སྡེ་དགོན་དུ་ཞུགས་ཏེ་སློབ་གཉེར་ཐོག་མར་གནང་མགོ་བརྩམས་ཤིང་། ལོ་ ༡༥ སྟེང་གསེར་རྟ་བླ་རུང་ལྔ་དགོན་ཏུ་ཐུན་མོང་རིག་གནས་ཐོག་སློབ་གཉེར་གནང་བ་རེད། སྐབས་དེ་འདྲ་ཞིག་ནས་མཁས་པའི་སྙན་གྲགས་རྒྱས་ཏེ་སྡེ་སྣོད་འཛིན་པའི་མཚན་ཐོབ་ཅིང་། དགོན་པའི་ནང་དཔེ་འཁྲིད་གནང་བ་རེད། རང་ལོ་ ༢༨ སྟེང་ལྷ་ས་འབྲས་སྤུངས་དགོན་པར་ཞུགས་ཏེ་གཞུང་ཆེན་ལ་སློབ་གཉེར་གནང་ཡོད་ཀྱང་རྒྱུ་རྐྱེན་སྣ་ནང་ཞིག་གིས་ཕྱིར་ཕ་ཡུལ་དུ་ལོག་དགོས་བྱུང་འདུག ཕྱི་ལོ་ ༢༠༠༨ ལོར་༼འགན་འཁྲིའི་འདུ་ཤེས༽ ཞེས་པའི་དེབ་དང་། དེ་རྗེས་ ༼ཚེ་སྲོག་གི་བསྐྲུནཔའི་སྐད་ཆ༽ ཞེས་པའི་དེབ་འདི་གཉིས་སྔ་རྗེས་བརྩམས་འདུག་ལ། ཁོང་གིས་དེབ་འདི་པར་བསྐྲུན་གྱི་དམིགས་ཡུལ་གཙོ་བོ་ནི། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་ཆེན་ཐེངས་ ༡༦ པའི་ཐོག་ལ་སྙན་ཞུ་རུ་ཕུལ་བ་ཞིག་རེད། ཅེས་བརྗོད་སོང་།
བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་གྲུབ་ལྷ་དར་ལགས་ཀྱིས་དཔེ་དེབ་ཀྱི་བརྗོད་གཞི་དང་འབྲེལ་བའི་ཐོག་ནས་བོད་ནང་གི་རྩོམ་པ་པོ་རྣམས་ཀྱི་སྙིང་སྟོབས་གླེང་དོན། བོད་ནང་གི་རྩོམ་པ་པོའི་སྙིང་སྟོབས་གླེང་བ་ལ་དུས་རབས་ཀྱི་ཆ་ནས་དུམ་མཚམས་གསུམ་དུ་དབྱེ་དགོས་པར་མཐོང་། དུས་མཚམས་གསུམ་སོ་སོའི་ནང་གི་གཞིས་ལུས་སྤུན་ཟླ་ཚོའི་འཐབ་རྩོད་ཀྱི་བྱུང་རབས་འཁོད་པའམ། ཡང་ན་དུས་མཚམས་དེའི་ནང་བྱུང་བའི་རིན་ཐང་ཅན་གྱི་དཔེ་དེབ་རྣམས་དཔེ་མཚོན་ཙམ་ཞུས་ན། དུས་མཚམས་དང་པོ། ཕྱི་ལོ ༡༩༤༩ ནས་ ༡༩༨༧ བར་གྱི་ ༼ ཡིག་འབྲུ་ཁྲི་བདུན་གྱི་སྙན་ཞུ༽དང་། ༼ཁྲག་དང་མིག་ཆུའི་རྣམ་ཐར༽ ༼ནགས་ཚང་ཞི་ལིས་སྐྱིད་སྡུག༽ སོགས་དང་། དུས་མཚམས་གཉིས་པ། ཕྱི་ལོ་ ༡༩༨༧ ནས་ ༢༠༠༨ བར་གྱི་ ༼ལོ་རྒྱུས་ལྷད་མེད་གཡུ་ལོའི་དངུལ་ཐིག༽དང་། ༼བདག་གི་རེ་སྨོན༽ ༼ལྷང་འཇགས་མེད་པའི་ཧི་མ་ལ་ཡ༽ སོགས་རེད། དུས་མཚམས་གསུམ་པ། ཕྱི་ལོ་ ༢༠༠༨ ནས་ད་བར་གྱི་ ༼༢༠༠༨ ལོའི་ཤར་དུང་རི༽ དང་། ༼བཙན་པོའི་སྙིང་སྟོབས༽ ༼གནམ་ས་གོ་འབྱེད༽ ༼ཁྲག་ཡིག༽ དེ་བཞིན་དེ་རིང་འདིར་དབུ་འབྱེད་གནང་བཞིན་པའི ༼ ཚེ་སྲོག་གི་བསྐྲུན་པའི་སྐད་ཆ ༽སོགས་ཆགས་ཡོད། དེབ་དེ་དག་ནང་དུ་གཞིས་ལུས་བོད་མི་སྤྱི་དང་ལྷག་པར་མདོ་དབུས་ཁམས་ཀྱི་འདས་སོང་སྤུན་ཟླ་ཁྲི་ཚོ་མང་པོས། ལོ་དྲུག་ཅུའི་རིང་རྒྱ་གཞུང་གི་བཙན་གནོན་འོག་ཏུ་མྱངས་པའི་དཀའ་སྡུག་དང་༧གོང་ས་མཆོག་ལ་འཆིང་བའི་བླ་ན་མེད་པའི་དད་གུས། བོད་རང་བཙན་གྱི་རེ་བའི་ཁ་ཆེམས་བཅས་གསལ་བོར་བཀོད་ཡོད་པ་རེད། དེ་རིང་སྐབས་སུ་བབ་པའི་རྩོམ་པ་པོ་དྷི་ལྷ་ལྡན་ལགས་ལ་མཚོན་ནའང་། བོད་མི་རིགས་དང་རྒྱལ་ཁབ་ཀྱི་བདེ་དོན་ཆེད་ཚེ་སྲོག་གཏའ་མར་བཞག་སྟེ་ཡོངས་སུ་བློས་གཏོང་བྱེད་ཐུབ་མཁན་གྱི་རྒྱལ་གཅེས་པ་ཞིག་ཡིན་པ་དེ། ཁོང་གི་དཔེ་དེབ་ནང་གསལ་བོ་མཐོང་ཐུབ་ཀྱིན་འདུག ཅེས་དང་།
ཡང་ཁོང་གིས་མུ་མཐུད་དུ་བརྗོད་དོན། འདས་པའི་ལོ་ངོ་ ༥༠ བརྒྱུད་རིམ་ལ་ཕྱིར་མིག་ཅིག་བལྟས་ན། བོད་ནང་གི་རྩོམ་པ་པོ་དང་གཞས་པ། རི་མོ་འབྲི་མཁན་ཚང་མས་མདོ་དབུས་ཁམས་གྱི་སྤུན་ཟླ་ཚང་མ་ལས་དབང་གཅིག་ཡིན་པ་ངོ་ཤེས་པའི་ཐོག་ནས་རྡོག་རྩ་ཆིག་སྒྲིལ་གྱི་ནུས་པ་མཉམ་དུ་སྤུངས་བཞིན་འདུག ང་རང་བཙན་བྱལ་ནང་ལོ་ ༡༤ ལ་འཚོ་བ་སྐྱེལ་བའི་ཉམས་མྱོང་ལ་གཞིགས་ན། བཙན་བྱོལ་ནང་གི་མཐོ་རིམ་མི་སྣ་དང་ཤེས་ཡོན་པའི་ནང་ཕྱོགས་འཐེན་གྱི་བསམ་བློ་ཕྲན་བུ་གནས་ཡོད་པའི་ཚོར་སྣང་བྱུང་། བོད་ནང་གི་ཤེས་ལྡན་པ་དེ་ཚོ་རྡོག་རྩ་གཅིག་སྒྲིལ་ཡོང་བའི་རྒྱུ་རྐྱེན་གཙོ་བོ་གཅིག་དེ་རྒྱ་དམར་གྱི་དྲག་གནོན་ལ་མཉམ་རུབ་ཀྱིས་གདོང་ལེན་བྱེད་པའི་སེམས་ཤུགས་བརྟན་པ་དང་། གཉིས་ནས་མདོ་དབུས་ཁམས་གསུམ་གྱི་མཁས་པ་རྒན་རབས་པ་ཚོའི་མཐུན་ལམ་རྡོག་རྩ་གཅིག་སྒྲིལ་གྱི་བག་ཆགས་བཟང་བོ་ལས་བྱུང་བ་ཞིག་རེད། བཙན་བྱོལ་ནང་དེ་འདྲ་ཡོང་ཐུབ་ཀྱི་མེད་པ་དེ་གཅིག་ནས་ཉིན་རེའི་འཚོ་བའི་ནང་དགྲ་བོའི་བཙན་གནོན་མེད་པ་དང་། གཉིས་ནས་མི་རབས་རྒན་པ་ཚོས་སྒེར་འཁོན་ཕྱོགས་འཐེན་བྱས་པའི་དབང་གིས་མི་རབས་ཕྱི་མ་དག་ཀྱང་ལོག་ལམ་དུ་འཁྲིད་པ་རེད། ད་ནི་མི་རབས་གསར་བ་ཚོས་རིག་པ་བསྒྲིམ་སྟེ་གོམ་པ་གསར་བ་རྒྱག་རྒྱུའི་དུས་ལ་བབ་ཡོད། ཅེས་བརྗོད་སོང་།
མཇུག་མཐར་སྐུ་མགྲོན་གཙོ་བོ་བཀའ་ཟུར་རིན་ཆེན་མཁའ་འགྲོ་ལགས་ཀྱིས་བརྗོད་དོན། ང་རང་བོད་མིའི་སྤྱི་ཚོགས་ནང་གི་མི་རྒན་པ་ཞིག་ཡིན་པའི་ཆ་ནས། ད་ལྟ་བོད་ཕྱི་ནང་གཉིས་སུ་ཡོད་པའི་སློབ་སྦྱོང་ཡོད་མཁན་དང་འཛམ་བུ་གླིང་གི་གནས་སྟངས་ཤེས་མཁན་ཚང་མས་ནུས་ཤུགས་གཅིག་ཏུ་སྒྲིལ་བ་ཡིན་ན། ང་ཚོར་སུ་ཞིག་གིས་ཀྱང་བརླག་འཁེལ་བ་མ་རེད་བསམ་པའི་ཡིད་ཆེས་བརྒྱ་ཆ་བརྒྱ་ཡོད། འདས་པའི་ནོར་འཁྲུལ་གང་ཡོད་པ་དེ་ཡོ་བསྲང་བྱས་ཏེ་མ་འོངས་པར་བོད་ཟེར་དུས་གཅིག་ཡིན་པའི་བསམ་བློ་གཏོང་དགོས་པ་དེ་གལ་ཆེན་པོ་རེད། ལག་པ་གཡས་པའི་བལྟས་ན་གཡོན་པས་འཁྲིད་ཀྱིན་འདུག་བསམ་པ་དང་། གཡོན་པས་བལྟས་ན་གཡས་པས་འཁྲིད་ཀྱིན་འདུག་བསམ་པའི་མགོ་སྐོར་དེའི་འོག་ཚུད་བསྡད་དེ། ད་བར་འཐུས་ཤོར་ཞེ་དྲག་ཕྱིན་པ་ཧ་གོ་བ་ཞིག་རེད། དེ་བས་ཚང་མས་གོམ་པ་མཉམ་སྤོ་གནང་དགོས་པ་གལ་ཆེན་པོ་རེད། རྒན་པ་ཚོས་རྒན་པ་ཡིན་ཟེར་ནས་ཕར་ཅིག་བསྡད། གཞོན་པ་ཚོས་གཞོན་པ་ཡིན་ཟེར་ནས་ཚུར་ཅིག་བསྡད་པ་ཡིན་ན། འགྲོ་བ་མིའི་འགྲོ་ལུགས་ཀྱི་ཆ་ནས་ཀྱང་འགྲིག་གི་ཡོད་པ་མ་རེད། མི་ཚང་ཞིག་ལ་མཚོན་ནའང་། ཕ་མ་དང་བུ་ཕྲུག བུ་ཕྲུག་གི་བུ་ཕྲུག་བཅས་ཚང་མ་མཉམ་རུབ་ཀྱི་ཐོག་ནས་རིམ་པས་ཕེབས་དགོས་པ་རེད། རྒན་པས་ཆུང་བར་བྱམས་སྐྱོང་དང་ཆུང་བས་རྒན་པར་གུས་བརྩི་གནང་སྟེ། དེའང་འཁྲབ་སྟོན་ལྟ་བུ་མ་ཡིན་པར་ལྷག་བསམ་རྣམ་དག་གིས་རྩ་དོན་ལ་ཕན་པ་ཞིག་བྱ་རྒྱུ་དང་། ལྷག་པར་དུ་ང་ཚོ་ནི་རྒྱལ་ཁབ་བརླག་ཟིན་པའི་མི་རིགས་ཁོ་ན་ཙམ་མ་ཡིན་པར་གནའ་བོའི་རིག་གཞུང་ཕྱུག་པོ་དང་ཆོས་ལུགས་བཟང་པོ་ཡོད་བསྡད་པའི་མི་རིགས་ཤིག་ཡིན་སྟབས། འདྲ་འདྲའི་ནང་ནས་མ་འདྲ་བ་ཞིག་འཐོན་ཐུབ་པ་གནང་དགོས་པ་རེད། ཅེས་བརྗོད་སོང་།
གསར་འགོད་པ། ཚེ་རིང་རྒྱལ།
བོད་ནང་གི་རྩོམ་པ་པོ་རྣམས་ཀྱི་སྙིང་སྟོབས་ཀྱི་ང་ཚོ་བོད་མདོ་དབུ་ཁམས་གསུམ་ཚང་མ་སད་ཡོད་པ་མ་ཡིན་ནམ་རང་སྲོག་འབེན་དུ་བཞག་ནས་རྩོམ་པ་པོ་གང་མང་ཞིག་དང་གཞས་པ་མང་པོ་ཞིག་གི་མི་རིགས་ཀྱི་སྣེ་འཁྲིད་ནས་འདི་དང་འདི་ལྟ་བུའི་ལས་འགུལ་གང་མང་ཞིག་གནང་པའི་བྱས་རྗེས་ཀྱི་ང་ཚོ་ད་སད་བཞིན་འདུག་ངོ་མ་རིན་ཐང་ཆེ་སྤྱིར་རྒྱལ་ཁབ་གང་ཞིག་ཡིན་རུང་གཙོ་བོ་ཤེས་ཡོན་པའི་སྣེ་འཁྲིད་དགོས་པ་བཞིན་རིན་ཐང་ཅད་ཀྱི་བྱས་རྗེས་བཞག་འདུག་དེ་རིང་སངས་ཉིན་ཉོན་དང་ཁམས་དཀར་མཛེས་སུ་བོད་མི་དཔའ་བོ་མང་པོ་ཞིག་གི་རང་སྲོག་བློས་བཏང་ནས་སྐད་འབོད་གནང་པ་སོགས་རིན་ཐང་ཆེན་པོ་རེད་ཁྱེད་ཚོ་བྱ་བ་ལམ་འགྲོ་ཡོང་པ་དང་རྒྱ་ནག་དམར་ཕྱོགས་དྲག་དབུང་ནས་མྱུར་ཏུ་ཐར་བའི་སྨོན་འདུན་ཞུ་བོད་རྒྱལ་ལོ་དཔའ་རྒོད་ཚོ་རྒྱལ་ལོ།
བཙན་པོ་དང་། མཁས་མཛངས་གཉིས་ལྡན་གྱི་བོད་མགོ་ནག་གི་རྒྱུད་པ་རྒྱལ་ལོ།། དུས་དང་གནས་སྐབས་ཀྱི་བྱུང་བ་གང་ཞིག་འཛམ་གླིང་གི་སྟེང་གནས་དགོས་ན། ངེས་པར་དུ་རྟོགས་པའི་ལང་ཚོ་རྒྱས་དགོས་ཤིང་། སྙིང་སྟོབས་ཀྱི་ཁོ་ལག་ཡོངས་སུ་རྫོགས་དགོས། ངྷི་ལྷ་ལྡན་ལགས་ལ་རྗེས་སུ་ཡི་རང་དང་། ཅི་བསམ་འགྲུབ་པའི་སྨོན་འདུན་ཞུ།།
ཐུགས་རྗེ་ཆེ་བཀའ་ཟུར་རིན་ཆེན་མཁའ་འགྲོ་ལགས་དང་དོན་གྲུབ་ལྷ་དར་རྣམ་གཉིས་ནས་དངོས་གནས་སྐད་ཆ་གནད་ལ་ཁེལ་བ་རེ་གསུང་འདུག་པས་
སེམས་ཡོད་ཀྱི་བོད་མི་སྤུན་ཟླ་རྣམས་ཀྱིས་ཉམས་ལེན་བྱེད་ངེས་རེད།
འོན་ཀྱང་འུ་ཚང་གི་གླད་རུལ་འགའ་རེས་ད་དུང་ཡང་ཤེས་བཞུན་ཏུ་
ཞེན་ཁོག་གི་ཚེ་གཡོག་བྱེད་ངེས་རེད་འོན་ཀྱང་ཤུགས་སྐྱོན་གནང་ན་འུ་ཚང་ཡར་ཇེ་དར་རེད་ཡིན་ད།།