ད་ལྟའི་ཆར་འགན་ལེན་པ་བཙལ་ཏེ་རྒྱ་གཞུང་གིས་དངོས་སུ་ཀློད་གྲོལ་གཏོང་རྒྱུར་བསྒུག་ཡོད་སྟབས། སྐད་ཆ་བཤད་བདེ་བོ་མི་འདུག་ཟེར།
ཁ་སང་ཕྱི་ཚེས་ ༢༢ ཉིན་གྱི་དགོང་མོའི་ཆུ་ཚོད་ ༡༢ ཙམ་ལ་རྒྱ་ནག་གི་སྒྱུ་རྩལ་བ་ཨེ་ཝེ་ཝེ་ལགས་ཀློད་གྲོལ་བཏང་ཡོད་འདུག སྐབས་དེར་གསར་འགོད་པ་མང་པོ་ཁོ་ཚང་གི་སྒོ་ཁར་འཚང་སྟེ་བཅར་འདྲི་བྱས་ཡོད་ནའང་། ཁོང་གིས་གསར་འགོད་པའི་བཅར་འདྲི་དང་ལེན་བྱས་མི་འདུག ཨེ་ཕའེ་གསར་ཁང་གིས་གནས་ཚུལ་སྤེལ་བ་ལྟར་ན། ཨེ་ཝེ་ཝེ་ལགས་ཁོང་གི་ཨ་མ་དང་ཆུང་མ་གཉིས་ཀྱིས་གཡས་གཡོན་ནས་སྐྱོར་ཏེ་ཁྱིམ་ལ་ཕྱིན་ཡོད་པ་དང་། ཕྱི་ཚུལ་ལ་བལྟས་ན་ཁོང་གི་གཟུགས་པོའི་གནས་སྟངས་སྐྱོ་བོ་ཆགས་ཡོད་ཚུལ་བརྗོད་འདུག ཕྱི་ཚེས་ ༢༣ ཉིན་གྱི་ཞོགས་པར་ཨེ་ཝེ་ཝེ་ལགས་ཀྱིས་འཁྱུག་ཙམ་རིང་གསར་འགོད་པ་བཅུ་གྲངས་ཤིག་ལ་ཐུག་འཕྲད་བྱས་ཡོད་པ་དང་། སྐབས་དེར་ཁོས་ད་ལྟའི་བར་རྒྱལ་སྤྱིའི་གསར་ལམ་ཁག་གིས་དོ་སྣང་གནང་བར་བཀའ་དྲིན་ཞུས་ཡོད་པར་མ་ཟད། ད་ཆར་ཁོས་འགན་ལེན་པ་བཙལ་ཏེ་རྒྱ་གཞུང་གིས་དངོས་སུ་ཀློད་གྲོལ་གཏོང་རྒྱུར་བསྒུག་ཡོད་སྟབས། སྐད་ཆ་བཤད་བདེ་བོ་མི་འདུག་ཅེས་བརྗོད་ཡོད་པ་རེད།
སྒྱུ་རྩལ་བ་ཨེ་ཝེ་ཝེ་ལགས་ཕྱི་ཟླ་ ༤ ཚེས་ ༣ ཉིན་པེ་ཅིན་གནམ་ཐང་དུ་རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་བྱས་རྗེས། ཁྲིམས་འགལ་ཐོག་ཟླ་ ༢ ལྷག་རིང་བཀག་སྐྱིལ་བྱས་པའི་དུས་ཡུན་ནང་། ཨ་རི་དང་ཨོ་སི་ཊོ་ལི་ཡ། དབྱིན་ཡུལ། ཧྥ་རན་སི། འཇར་མན་སོགས་གཙོས་པའི་འཛམ་གླིང་རྒྱལ་ཁབ་མང་པོའི་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་རྒྱ་གཞུང་ལ་སྐྱོན་བརྗོད་དང་། ད་ལྟའི་བར་མཚམས་མ་ཆད་པར་ཨེ་ཝེ་ཝེ་ལགས་ཀློད་གྲོལ་དགོས་པའི་གནོན་ཤུགས་སྤྲད་ཡོད་པ་རེད། ཁོང་ཀློད་གྲོལ་མ་ཐོབ་པའི་སྔ་ཉིན་ཏེ་ཕྱི་ཚེས་ ༢༡ ཉིན་ཨོ་སི་ཊོ་ལི་ཡའི་སྒྱུ་རྩལ་བ་ ༧༠ ལྷག་གིས་ཁོང་ཀློད་གྲོལ་དགོས་པའི་རྒྱབ་སྐྱོར་གྱི་ལས་འགུལ་ཞིག་སྤེལ་ཏེ། ཨེ་ཝེ་ཝེ་ཀློད་གྲོལ་ཡོང་ཐབས་ཀྱི་སྙན་ཞུའི་སྟེང་འཛམ་གླིང་ས་ཕྱོགས་སོ་སོའི་མི་མང་ཁྲི་ ༡༤ ལྷག་གིས་མཚན་རྟགས་བཀོད་ཡོད་པ་ཡོངས་ཁྱབ་གསལ་བསྒྲགས་གནང་ཡོད་པ་མ་ཟད། ཉིན་དེར་ཀློག་བརྙན་འཁྲབ་ཁྲིད་པ་གྲགས་ཅན་ཇེན་ཁམ་ཕོན་དང་མིང་གྲགས་ཅན་གྱི་རྩོམ་པ་པོ་ཌེ་ཝེ་ཌི་མའེ་ལོ་ཧྥུ་གཉིས་ཀྱིས་ཀྱང་སྙན་ཞུའི་སྟེང་མཚན་རྟགས་བཀོད་ཡོད་འདུག
གཞན་ཡང་། ཕྱི་ཟླ་ ༤ ཚེས་ ༣ ནས་ ༡༠ བར་ཨེ་ཝེ་ཝེ་ལགས་ཀྱི་གཟའ་ཟླ་ལུའུ་ཆིན་གྱི་མིང་ཐོག་ཏུ་ཡོད་པའི་རིག་གནས་དར་སྤེལ་ཚད་ཡོད་བཟོ་གྲྭའི་སྒྱུ་རྩལ་ཇུས་འགོད་པ་ལིག་ཀྲིན་ཀང་དང་། དངུལ་གཉེར་ཧའོ་མེན་ཧྥུན། དང་བླངས་ལས་ཞབས་པ་ཝུན་ཐའོ། བཟོ་གྲྭའི་རླངས་འཁོར་ཁ་ལོ་བ་ཀྲང་ཀུང་སུང་བཅས་སྔ་རྗེས་བཙན་འཁྲིད་ཀྱིས་གར་སོང་ཆ་མེད་དུ་གྱུར་ཡོད་ལ། ཕྱི་ཟླ་ ༤ ཚེས་ ༡༥ ཉིན་བཟོ་གྲྭའི་ཁྲིམས་འགན་འཐུས་ཚབ་པ་ལུའུ་ཆིན་གྱིས། རྒྱ་གཞུང་ཉེན་རྟོག་པས་ཁྲིམས་འགལ་ཐོག་བཟོ་གྲྭའི་ལས་མི་དཀྱུས་མ་རྣམས་བཙན་ཁྲིད་བྱས་པ་རྣམས་གང་དུ་ཡོད་མེད་གསལ་ཁ་འདོན་དགོས་པའི་ཞུ་གཏུགས་བྱས་ཡོད་ནའང་། ད་ལྟའི་བར་ཉེན་རྟོག་པའི་ཕྱོགས་ནས་བརྡ་ལན་གང་ཡང་སྤྲད་མེད་པ་རེད།
གསར་འགོད་པ། ཚེ་རིང་རྒྱལ།
རྒྱ་ནག་གི་རྒྱུ་རྩལ་བ་གྲགས་ཅན་མི་ཤེས་ལྡན་པའི་ཨེ་ཝེ་ཝེ་ལགས། རྒྱ་དམར་ཀླ་ཀློའི་གདུག་རྩུབ་སྤེལ་སའི་མུན་དོང་ར་བ་ནས་ཀློད་གྲོལ་ཐོབ་དགའ་བསུ་ཞུ།
ཨེ་ཝེ་ཝེའི་བདེན་པ་ལ་རྒྱབ་སྐྱོར་དང་མཐོང་ཆེན་བྱས་པ་བཞིན་ད་ལྟའི་ཆར་མདོ་སྨད་ཀིར་ཏི་དགོན་པའི་གྲྭ་ཕུན་ཚོགས་གཙོས་པའི་འགྲོ་བ་མི་ལ་ཐོབ་ཐང་དགོས་པའི་ཁམས་དཀར་མཛེས་ཕྱོགས་ཀྱི་སྔ་རྗེས་ཀྱི་གྲྭ་བཙུན་སྐྱ་གསུམ་འགྲོ་བ་མི་ཡིན་པ་ལ་མི་འདྲ་བའི་རྒྱུ་མཚན་གཏན་ནས་མེད་པར་བརྟེན་རྒྱ་དམར་པོའི་གཞུང་གིས་ཇེ་དམ་དང་ཇེ་བརྡུང་ངམ་ཇེ་ནག་ཏུ་འགྲོ་བ་འདི་ལ་ཁོང་ཚོས་རྒྱབ་སྐྱོར་གྱི་རྒྱ་དམར་ལ་གནོན་ཤུགས་སྤྲོད་མི་ཐུབ་པ་གང་ཡིན་ནམ? སྲིན་པོའི་སྒོ་ཁར་ལ་ཡང་ཡིད་གཉིས་མེད་པའི་འབོད་སྒྲ་སྒྲོག་པ་རང་རང་གི་མངོན་འདོད་བཤད་པ་ཡོངས་རྫོགས་འགྲོ་ས་བཙོན་ཁང་དང་ལྕགས་སྒྲོག་ལས་མེད་པ་ཤེས་བཞིན་དུ་མངོན་སུམ་འཛེམས་མེད་ཀྱི་བྱ་འདི་ཚོ་ནི་རྒྱ་མཚོ་ནང་རྡོ་གཡུག་པ་ནང་བཞིན་ཉམས་ཆུང་བོད་མིའི་ལས་དབང་འདི་ལ་འགྲོ་བ་མི་ཡི་ཐོབ་ཐང་འཚོགས་པ་དེ་ཚོ་གཉིད་ལས་ནི་སད་འདུག་ཀྱང་འདི་ཚོ་ལ་ཡ་ལན་ཅུང་ཟད་ཙམ་ཞིག་མེད་པར་ད་དུང་ཡང་དེ་ཙམ་གཉིད་ལས་མ་སད་པ་མིན་ནམ། ? གང་ལྟར་བོད་ཀྱི་སྡུག་བསྔལ་འདི་སུ་ལ་བརྗོད་དགོས་ཀྱི་རེད་ངུ་ན་མཆི་མ་ཁྲག་དང་བཤད་ན་ཡོད་ཚད་ཁྲིམ་འགལ་ལས་ལམ་འགག་མེད་པ་འདི་ཆོས་ལུགས་པས་བཤད་པའི་རྣམ་སྨིན་ཞེས་པ་དེ་ཡིན་ནམ་གང་ལྟར་བདེན་དོན་ལ་ཉམས་ཞིབ་བྱ་རོག་དགོས་པའི་འབོད་བསྐུལ་ཡང་ཡང་ཞུ་གི་ཡོད།།
ཨེ་ཝེ་ཝེ་ཟེར་དུས་རྒྱ་མིས་འཇུ་མ་ཚར་བར་གསར་པོ་ཞིག་ཤེས་ཀྱི་མེད་མོད།དེ་རྗེས་དོ་སྣང་བྱས་པ་བརྒྱུད་རླབས་ཆེན་གྱི་སྒྱུ་རྩལ་པ་ཞིག་དང་དྲང་བདེན་སྐྱོང་བའི་མི་སྣ་གལ་ཆེན་ཞིག་ཡིན་པ་རྟོགས་པས།བློ་ཕམས་བྱུང་། ད་ལྟ་དུས་བབ་དྲ་བ་ཁ་ཕྱེས་མ་ཐག་གོང་གི་གསར་འགྱུར་འདི་མཐོང་བས་རང་དབར་མེད་པར་དེ་རིང་གསར་འགྱུར་ཡག་པོ་ཞིག་འདག་ཅེས་ཁ་ནས་ཐལ་སོང་ངོ་།།
རྒྱ་ནག་དམར་གཞུང་གི་ཨེ་ཝེ་ཝེ་མི་ཀློད་ཐབ་མེད་ཆགས་པ་ལས་བཟོད་སྒོམ་བྱས་པ་ཞིག་མིན་པ་གསལ་བོ་རེད། རྒྱུ་རྩལ་བ་བདུན་བཅུ་ཞིག་གི་ཁོང་ཀློད་དགོས་པའི་སྤྱར་ཡིག་བཀྲམས་པ་སོགས་ཀྱི་དབང་གི་ཁོང་ཀློད་གྲོལ་ཐོབ་ཡོད། དེ་ནི་དྲང་བདེན་ལ་དགའ་བའི་མི་གཅིག་ཡིན་དུས་ངེས་པར་ཀློད་དགོས་པ་ཞིག་ཆགས་ཡོད་པ་རེད་འཚམས་འདྲི་ཡོད་ལ་དགའ་བསུ་ཡོད།
སྐུ་ཞབས་ཨེ་ལགས་ཀློད་གྲོལ་ཐོབ་པ་སྟབས་ཡག་པོ་རེད། རྗེས་ཕྱོགས་གཟབ་གཟབ་གནང་རོགས། གོ་སྐབས་ཡག་ཤོས་བྱུང་ན་ཕྱི་ལ་ཐོན་རྒྱུ་དེ་རེད།