ལོ་གཉིས་དང་ཟླ་བཅུ་གཅིག་གོང་དུ།
དེ་རིང་ནི་ཉིས་སྟོང་བརྒྱད། སྤྱི་ཟླ་བརྒྱད་པའི་ཚེས་དྲུག་ཡིན། ང་རང་ས་མཐའ་སུ་འབོད་པའི་བོད་མི་དག་གི་ཡིད་སྨོན་བྱེད་ས་དང་། སྨོན་ལམ་འདེབས་ཡུལ། གནའ་སྔ་མོ་འཕགས་པའི་ཡུལ་དུ་འབོད་པའི་གནས། ང་རང་རྒྱ་གར་དུ་སླེབས་ནས་མི་ལོ་བཅུ་བཞི་སོང་ཡོད། དེ་ཡི་རིང་དུ་བོད་མི་བྱེས་པ་སྤྱི་མཚུངས་ལྟར། སློབ་གྲྭ གྲྭ་ས་སོགས་འགྲིམ་མྱོང་ལ། ལས་རིགས་སྣ་མང་ཞིག་ལ་ཡང་ཞུགས་མྱོང་། ད་དུང་རང་ཉིད་ཆེས་དགའ་སའི་བུད་མེད་ཅིག་གི་ཆེད་དུ་ཡོད་ཚད་བློས་གཏོང་ཡང་བྱས། ཆེས་མཐའ་མཇུག་དུ་ང་རང་ལ་རན་པའི་གནས་གང་ཡང་མེད་པར་མི་ལོ་བཅུ་བཞི་བསྐྱལ་བ་མ་ཟད། རྒྱུ་དང་ངོ་གསོ་གང་ཡང་མེད་པའི་ལམ་ཕྲན་ཞིག་ནས་རང་འཇག་ལུས་པ་རེད།
འདི་ལྟར་ངས་བསམ་བློ་མང་བོ་ཞིག་བཏང་རྗེས་སུ། ད་ནི་རང་ཉིད་ཀྱི་མི་ཚེ་འདི། རང་དོན་མེད་ཀྱང་། ནང་མི་དང་ཉེ་རིང་། གྲོགས་དང་གྲོགས་པོ་དག་ལ་ཕན་རེ་ཐོག་པའི་ཆེད་དུ། མི་ཚེ་འདི་ཉིད་འགྱུར་བ་ཞིག་གཏོང་འོས་པ་དང་དུས་སུ་ཡང་འབབ་འདུག་པར་སྙམ། དེས་ན་དེ་ནི་རྒྱ་གར་གྱི་སྒོར་མོ་གསོག་ནས་ཁ་མི་གསོས་པ་མ་ཟད། གསོག་སྟངས་ཀྱང་དེ་འདྲའི་སྟབས་བདེ་བོ་ཞིག་མིན་ལ། མི་དག་གིས་མིག་ལམ་ནས་མཐོང་ཆུང་གསེད་དགོས་པ་སྔར་བཞིན་ཡིན་ངེས། དེ་ལས་མི་ཚང་མས་ཕྱི་རྒྱལ་འབོད་པའི་ཡུལ་གྲུ་གང་རིང་ཞིག་ལ་འགྲོ་དགོས་པ་རེད་འདུག རོགས་པ་མང་ཤོས་ཤིག་ནི། ད་ནི་ཕྱི་རྒྱལ་གང་རུང་དུ་སོང་ཟིན་པ་མ་ཟད། མི་ཉུང་བ་ཞིག་རང་ཡུལ་དུ་ལོག་པ་རེད།
ད་ནི་རང་ཉིད་རི་སྒང་འདི་ན་ལུས་པའི་ཁྱི་རྐྱང་ལྡོམ་པོ་ཞིག་དང་འདྲ་བར་དེ་རིང་བར་ཟ་ཁང་ཞིག་གི་མ་བྱན་བྱས་ནས་བསྡད་ཡོད་པ་རེད། འདི་ནི་གནས་སྐབས་རིང་དུ་མ་འགྲིག་པ་མེད་ཀྱང་། མུ་མཐུད་དུ་འདི་ལྟར་སོང་བ་ཡིན་ན། ཟླ་ངོ་གཅིག་ལ་ཧིན་སྒོར་གཅིག་སྟོང་ལྔ་བརྒྱ་མ་གཏོགས་མེད། དེ་ཡིས་རང་གི་ཐ་མག་ཡང་ཉོ་ཐུབ་ཀྱི་མི་འདུག་ན། རང་གི་ནུ་མོ་ལྷ་མོ་སྐྱིད་ཀྱི་མ་འོངས་པའི་སློབ་ཆེན་དག་འགྲིམ་དུས་སུ་དངུལ་སྒོར་དགོས་ངེས་ཡིན་དུས། དེ་དག་ངས་གང་ནས་གསོག ད་ནི་རང་ཉིད་གང་དུ་ལྷུང་ན་ལྷུང་དུ་བཅུགས། ང་རང་ནི་སྤྱིར་བཏང་བ་ཡིན། འགྲོ་བ་སྤྱི་མཚུངས་ལྟར། ཡིན་ཡང་། ཉིན་མ་ཁ་ཤས་ཀྱི་སྔོན་ནས་བཟུང་། ངས་ལས་མཚམས་བཞག་པ་ཡིན།
ང་རང་གི་མ་འོངས་པའི་ཚེ་གྲོགས་དུ་གྱུར་སྲིད་པའི་བུད་མེད་ཕྱི་རྒྱལ་བ་ཁོ་མོ་དང་བོད་མིང་དུ་གངས་དཀར་ལྷ་མཚོ་ཡིས་རེ་འདོད་ལྟར། ཉིན་མ་རེ་རེ་བཞིན་ཁོ་མོ་དང་འགྲོགས་ནས་ཡར་འགྲོ་མར་འགྲོ་བྱས། ས་ཁུལ་འདི་ནི་རྒྱ་གར་བྱང་ཕྱོགས་རྡ་རམ་ས་ལའི་རི་སྟེང་མེག་ལོར་དུ་འབོད་པ་དེ་འཁེལ་ཡོད། འདི་ནས་བཟུང་། ང་རང་ལ་དངུལ་སྐར་བཀང་ཡང་ཡོང་ས་མེད། ལས་ཀ་མེད། ཡོད་ཚད་ཁོ་མོའི་དངུལ་ལ་བསྟེན་ནས་ང་རང་ཕྱི་རྒྱལ་དུ་འགྲོ་བའི་ཕྱོགས་སུ་རེ་བ་དང་རེ་བའི་ཕྱོགས་སུ་ཁོ་མོའི་རང་གི་ཕ་མ་གཉིས་ལ་མགྲོན་ཤོག་སྐུར་བར་རེ་བ་བྱས་ཡོད་པ་མ་ཟད། ང་རང་ལ་ཕྱི་བསྐྱོད་ལག་ཁྱེར་རེག་པར་འབད་འབུངས་བྱེད་པའི་དུས་ཡིན།
དངོས་ནས་བཤད་ན་རང་ཉིད་ནི་ཕྱི་རྒྱལ་ལ་འགྲོ་བར་དེ་འདྲའི་དགའ་བོ་ཡོད་མཁན་གྱི་གྲངས་ཤིག་མིན་ལ། རང་ཉིད་ལ་ཕྱི་རྒྱལ་དུ་འགྲོ་བའི་གོ་སྐབས་རེ་ཟུང་ཞིག་རེག་མྱོང་ན་ཡང་དེ་དག་ལ་དང་ལེན་བྱས་མེད། ད་ནི་བསམ་བློ་ལ་འགྱུར་བ་མི་གཏོང་ཐབས་མེད་དུ་གྱུར་བ་མ་ཟད། ཕྱི་རྒྱལ་ལ་འགྲོ་བར་ཐབས་ལམ་འདི་རྒྱུད་པ་ལས། རང་ཉིད་ལ་དངུལ་སྔ་འདེད་གཏོང་མཁན་གྱི་གྲོགས་པོ་ཕྱུག་པོ་མེད་ལ། ཕྱི་རྒྱལ་ན་རང་ཉིད་ལ་མགྲོན་འབོད་བྱེད་མཁན་གྱི་ཉེ་རིང་མེད། དེ་ཡིན་དུས་འདོད་པ་ཡོད་མེད་ལ་མ་བལྟས་པར། ཕྱི་རྒྱལ་གྱི་བུད་མེད། གངས་དཀར་ལྷ་མཚོ་ལ་བསྟེན་ནས་ལུས་པོ་འདོམ་བཀང་འདི་གཞན་ཡུལ་གང་ཞིག་དུ་བསྐྱེལ་ཐབས་བྱེད་རྒྱུ་དེ་ཁོ་ན་ད་ལྟའི་རང་ཉིད་ཀྱི་ཐབས་ལམ་ཆགས་ཡོད་པ་ཡིན།
ངེད་གཉིས་ངོ་ཤེས་ནས་ཟླ་ངོ་བཞི་སོང་ཡོད། དེའི་རིང་དུ་ཕན་ཚུན་ལ་སྐད་ཆ་མང་བོ་མང་བོ་ཞིག་བཤད། ལྷག་པར་དུ་ང་རང་ལ་ཡོང་འབབ་ཀྱི་དངུལ་མེད་སྟབས། གཞན་བསྟེན་ཁོ་ན་བྱེད་ཀྱིན་འགྲོ་བཞིན་ཡོད་དུས། ང་རང་གིས་སང་ཉིན་མང་བོ་ཞིག་ལ་རེ་བ་བྱེད་འདོད་མེད་པར། དེ་རིང་གི་གོ་སྐབས་ཤིག་རང་ཉིད་ལ་རེག་ན་འདོད་ཀྱི་ཡོད། ཉི་མ་འདིའི་བར་དུ་ཁོ་མོ་ང་རང་ལ་མི་བཟང་རྒྱུ་མེད། ཁོ་མོའི་ང་རང་གི་ཁ་ནང་གི་སོ་གསུམ་གསར་བཟོ་བྱས་པ་དེར་ཧིན་སྒོར་ཁྲི་གསུམ་ལྷག་གི་འགྲོ་སོང་བཏང་། གལ་སྲིད་ངས་ཟ་ཁང་དེ་ནས་ལས་ཀ་བྱས་ནས་རང་གི་ཁ་ནང་གི་སོ་གསུམ་དེ་བརྗེ་བོ་རྒྱགས་དགོས་བྱུང་ན། ལོ་གཉིས་རིང་དུ་སྒོར་མོ་གཅིག་ཀྱང་མ་སྟོར་བར་གསོག་ཐུབ་པ་ཡིན་ཚེ། ད་གཟོད་ང་རང་གི་ཁ་ནང་དུ་སོ་གསར་བ་དེ་དག་བཟོ་ཐུབ་ངེས་རེད། ངའི་རེ་བ་ལ་ཁོ་མོ་ནམ་ཡིན་ཡང་། འདི་ལྟར་མ་འོངས་འཚོ་བའི་ནང་དུ་ང་ལ་བྱམས་པའི་བུད་མེད་དེ་ཆགས་རྒྱུར་རེ་བ་ཡོད།
ཉིན་ལྟར་རང་ཉིད་ལ་དངུལ་སྐར་བཀང་མེད་པར་གངས་མཚོའི་རྣམ་འགྱུར་དང་བསྟུན་ནས་ཉི་མ་ཆོད་ཐབས་བྱས་པ་ཡིན། ད་ནི་རང་ཉིད་ཀྱི་འཚོ་བ་ཙམ་ཡང་འགོ་མི་ཐོན་པ་ལྟ་བའི་ངང་ནས་ཁོ་མོའི་ཅི་ཞིག་ཐག་གཅོད་བྱེད་རྒྱུའི་སང་ཉིན་ལ་སྒུག་དུས་སུ། ངས་བོད་མི་དག་གི་གསལ་ལེ་རྒྱལ་དུ་འབོད་པའི་འཚོ་བ་དེ་ཡི་འགོ་བཟུང་ཡོད་པ་ཁས་ལེན་མི་བྱེད་ཐུ་མེད་རེད། ང་ནི་གསལ་ལེ་རྒྱལ་ཟེར་བའི་མི་དེ་ཡི་གྲངས་དུ་ཡོད། ག་ལེར་གནས་ཚུལ་བཟང་ངན་ཅི་བྱུང་དེ་ནི་བལྟ་རྒྱུ་དང་ཡོང་རྒྱུར་བསྡད་ཡོད་སྟབས། མི་ཚེ་གཞན་འོག་གི་རྒྱལ་ཁབ་ཞིག་དུ་བསྐྱེལ་ཐུབ་མིན་དེ་ཡང་ཉི་མ་ཁ་ཤས་ཀྱི་རྗེས་སུ་རེད།
མུ་འགོད།
