བོད་ནས་གསར་དུ་འབྱོར་མཁན་ཞིག་གིས་ཁོ་རང་གི་མཐོང་ཐོས་མྱོང་གསུམ་དང་འབྲེལ་ཏེ། དེང་སྐབས་རྒྱ་གཞུང་གིས་འཆར་གཞི་ལྡན་པའི་ཐོག རྒྱ་རིགས་མང་པོ་ཞིག་བོད་ནང་གནས་སྤོར་བྱེད་ཀྱི་ཡོད་པ་དང་། དགོན་སྡེ་མང་པོ་ཞིག་ལ་དངོས་ཤུགས་བརྒྱུད་གསུམ་ནས་གནོན་ཤུགས་སྤྲད་དེ་གྲྭ་རྒྱུན་གྱིས་སྟོང་བཞིན་ཡོད་སྐོར་བརྗོད་སོང་།
བོད་ནང་གི་ད་ལྟའི་གནས་ཚུལ་སྐོར་ལ་རྒྱུས་ལོན་ཡོང་ཆེད། ཕྱི་ཚེས་ ༢༤ ཉིན་འདི་ག་གསར་འགོད་པ་དྷ་སའི་རི་འདབས་ཀྱི་བཙན་བྱོལ་བོད་མིའི་དབུས་སྣེ་ལེན་ཁང་དུ་བསྐྱོད་སྐབས། ཉེ་ཆར་བོད་ནས་གསར་དུ་སྐྱབས་བཅོལ་ལ་འབྱོར་མཁན་མི་གྲངས་ ༣༨ འདུག ཕ་ཡུལ་རྫ་ཆུ་ཁ་ནས་ཡིན་པའི་གྲྭ་བློ་བཟང་ལགས་ནི། དེ་སྔོན་རྒྱ་གཞུང་གིས་གདན་ས་གསུམ་ནས་མདོ་སྟོད་སྨད་ཁུལ་གྱི་གྲྭ་བཙུན་ཡོངས་རྫོགས་ཕྱིར་ཕུད་བཏང་བའི་གྲས་ཀྱི་གཅིག་རེད་འདུག ཁོང་གིས་བརྗོད་པ་ལྟར་ན། དེང་སྐབས་བོད་ནང་དུ་གྲྭ་པ་མང་པོར་སློབ་གཉེར་གྱི་གོ་སྐབས་མ་རག་པའི་དཀའ་ངལ་འཕྲད་ཡོད་པ་དང༌། དེ་བཞིན། རྒྱ་གཞུང་གིས་ལྷ་ས་ཁུལ་དུ་གནས་སྡོད་མདོ་སྟོད་སྨད་ཀྱི་བོད་མི་ཚོ་ཕྱིར་ཕུད་དང༌། ལྷ་སའི་ཡུལ་མི་རྣམས་ཀྱང་གྲོང་ཁྱེར་གྱི་མཐའ་འདབས་ལ་གནས་སྤོར་བྱེད་འཇུག་གི་ཡོད་འདུག
གྲྭ་བློ་བཟང་ལགས་ཀྱིས་རང་ཉིད་ལ་སློབ་གཉེར་གོ་སྐབས་མ་རག་པའི་དཀའ་ངལ་སྐོར་བརྗོད་དོན། མ་གཞི་གྲྭ་བ་ཞིག་ལ་མཚོན་ན་ཆོས་སློབ་གཉེར་བྱ་རྒྱུ་དེ་ལས་འགན་གཙོ་བོ་ཆགས་ཡོད་པ་རེད། ཡིན་ནའང༌། སོ་སོའི་ཕ་ཡུལ་དུ་ཆོས་སློབ་གཉེར་བྱ་སའི་དགོན་སྡེ་བཤད་གྲྭ་ཆེན་པོ་མེད་པ་དང༌། ༢༠༠༨ ལོ་ནས་བཟུང་རྒྱ་གཞུང་གིས་གདན་ས་གསུམ་གཙོས་དགོན་སྡེ་བཤད་གྲྭ་ཆེ་ཁག་ནང་ཕྱོགས་མཐའ་ནས་ཡོང་བའི་གྲྭ་བཙུན་སློབ་གཉེར་བ་ཉར་མི་ཆོག་པའི་བཀག་རྒྱ་བཟོས་ཡོད་སྟབས། འདས་པའི་ལོ་ ༤ ཙམ་གྱི་རིང་སློབ་གཉེར་གྱི་གོ་སྐབས་མ་རག་པར་ཁྱིམ་དུ་སྡོད་དགོས་བྱུང་སོང༌། དཀའ་ངལ་འདི་ང་གཅིག་པུ་ཙམ་ལ་འཕྲད་པ་ཞིག་མ་ཡིན་པར། ས་བྱི་ཞི་རྒོལ་ཆེན་མོའི་རྗེས་སུ་གདན་ས་ཁག་ནས་ཕྱིར་ཕུད་བཏང་བའི་མདོ་སྟོད་སྨད་ཀྱི་གྲྭ་བཙུན་སློབ་གཉེར་བ་ཕལ་ཆེ་བར་གཅིག་མཚུངས་ཡིན། ཞེས་བརྗོད་སོང༌།
བོད་མི་རྒྱ་མིའི་བྲན་གཡོག་རེད།
ཁོང་གིས་མུ་མཐུད་བོད་མི་ཚོ་རྒྱ་མིའི་བྲན་གཡོག་ཏུ་འགྱུར་བཞིན་པའི་སྐོར་བརྗོད་རྒྱུར། ཉེ་སྔོན་རྒྱ་ནག་གསར་ལམ་ཁག་ཏུ་གནས་ཚུལ་སྤེལ་པ་ལྟར་ན། རྒྱ་གཞུང་གིས་ལོ་ལྔ་ཚན་བཅུ་གཉིས་པའི་འཆར་གཞི་ལྟར། རྒྱ་ནག་ལེའོ་ཉིན་ཞིང་ཆེན་གྱིས་ཁ་གཏད་རོགས་དངུལ་རྒྱ་སྒོར་དུང་ཕྱིར་ ༢།༡ གི་འགྲོ་གྲོན་བཏང་སྟེ། མ་འོངས་པའི་ལོ་གསུམ་ནང་ནག་ཆུ་རྫོང་དུ་སྡོད་ཁང་ཐོག་བརྩེགས་ཅན་ ༡༢༠༠ བརྒྱབ་སྟེ། ལེའོ་ཉིན་འཛུགས་སྐྲུན་ས་ཁུལ་ཞེས་པ་ཞིག་གསར་འཛུགས་བྱ་འཆར་ཡོད་འདུག རྒྱ་གཞུང་གིས་ལས་གཞི་དེ་དག་ནི་བོད་མི་ཚོར་རོགས་སྐྱོར་བྱས་པ་ཞིག་ཡིན་ཚུལ་བརྗོད་ཀྱིན་ཡོད་མོད། དོན་དངོས་ཐོག་ནག་ཆུ་ས་ཁུལ་དུ་གྲོང་ཁྱེར་འཛུགས་སྐྲུན་བྱས་ཏེ་རྒྱ་མི་མང་པོ་གནས་སྤོར་དང༌། ཞིང་འབྲོག་ཁུལ་གྱི་བོད་རིགས་རྣམས་རྒྱ་རིགས་ཁྲོད་མཉམ་བསྲེས་བྱས་ཏེ་བོད་མིའི་རིག་གནས་ཀྱི་ངོ་བོ་རྩ་མེད་བཟོ་ཆེད་ཡིན་འདུག གྲྭ་བློ་བཟང་ལགས་ཉེ་སྔོན་ནག་ཆུ་ས་ཁུལ་དུ་ཞོར་ལས་ལ་ཕྱིན་སྐབས་ས་གནས་ས་ཐོག་ནས་མཐོང་ཐོས་ལྟར་ན། ད་སྐབས་ནག་ཆུ་ས་ཁུལ་དུ་གཞི་རྒྱ་ཆེ་བའི་འཛུགས་སྐྲུན་མང་པོ་བྱེད་བཞིན་ཡོད་པ་དང༌། ལས་གཞི་དེ་དག་གི་མགོ་དཔོན་ཚང་མ་རྒྱ་རིགས་རྐྱང་པ་ཡིན་པར་མ་ཟད། ཁོ་ཚོའི་ལག་འོག་ཏུ་ལས་ཀ་པ་རྣམས་ལའང་རྒྱ་བོད་མི་རིགས་ཀྱི་དབྱེ་བ་བཀར་ཏེ། རྒྱ་རིགས་རྣམས་ལ་ས་ཐིག་རྒྱག་པ་དང་དངོས་པོ་ཆུང་ངུ་ཡར་སྐྱེལ་མར་ལེན་གྱི་ལས་ཀ་ཙག་ཙིག་རིགས་བཀོད་སྒྲིག་དང༌། བོད་མི་རྣམས་ལ་ས་རྐོ་རྡོ་སློག་དང༌། དངོས་པོ་ལྕི་མོའི་རིགས་སྐྱེལ་འདྲེན་བྱེད་པར་ལས་བགོ་བྱེད་ཀྱིན་པར་མ་ཟད། ལས་ཕོགས་སྤྲོད་སྐབས་རྒྱ་རིགས་ཚོར་ཉིན་རེར་རྒྱ་སྒོར་ ༡༦༠ དང༌། བོད་མི་ཚོར་སྐྱེས་པ་རེར་རྒྱ་སྒོར་ ༨༠ དང་བུད་མེད་རེར་རྒྱ་སྒོར་ ༦༠ མ་གཏོགས་སྤྲོད་ཀྱིན་མེད་པ་རེད། གྲྭ་བློ་བཟང་ལགས་ཀྱིས་སྐབས་དེའི་དངོས་མཐོང་གནས་ཚུལ་ཞིག་དཔེར་མཚོན་དུ་དྲངས་དོན། ཉིན་ཞིག་བོད་མི་རྒད་པོ་ལོ་བདུན་ཅུར་ཉེ་བ་ཞིག་གིས་དངོས་པོ་ལྕི་མོ་དོ་བོ་གསུམ་སྐྱེལ་འདྲེན་བྱས་པའི་གླ་ཆར་རྒྱ་སྒོར་ ༡ མ་གཏོགས་སྤྲད་མ་སོང་ལ། ད་དུང་རྒད་པོའི་ཐོག་ལ་རྣམ་འགྱུར་ངན་པ་དང་མཐོང་ཆུང་གི་སྐད་ཆའང་བཤད་སོང༌། ད་སྐབས་བོད་མི་རྣམས་རང་གི་ས་ཐོག་ནས་རྒྱ་མིའི་བྲན་གཡོག་ཏུ་གྱུར་འདུག ཅེས་བརྗོད་སོང༌།
བོད་མི་རང་ས་ནས་ཕྱིར་ཕུད།
གྲྭ་བློ་བཟང་ལགས་ཀྱིས་ལྷ་ས་བརྒྱུད་རྒྱ་གར་དུ་བྲོས་བྱོལ་ཡོང་སྐབས། ལྷ་ས་གྲོང་ཁྱེར་གྱི་བོད་མིའི་གནས་སྟངས་རིགས་ཤེས་རྟོགས་བྱུང་དོན་ལྟར་ན། དེང་སྐབས་ལྷ་ས་ཁུལ་དུ་དམག་མིས་དམ་དྲག་ཤུགས་ཆེན་པོ་བྱས་ཏེ་ཇོ་ཁང་གི་མཆོད་མཇལ་དུས་ཡུན་ཡང་ཇེ་ཐུང་དུ་བཏང་ཡོད་པ་དང༌། ཕོ་བྲང་པོ་ཏ་ལའི་ནང་དུའང་མཆོད་མཇལ་བྱ་སའི་ལྷ་ཁང་རེ་གཉིས་ཤིག་མ་གཏོགས་གཞན་ཕལ་ཆེ་བ་སྒོ་བརྒྱབ་ཡོད་འདུག ད་སྐབས་བོད་མི་ཚོ་ཕོ་བྲང་པོ་ཏ་ལར་མཆོད་མཇལ་དུ་བསྐྱོད་སྐབས་འཛིན་བྱང་ཉོ་དགོས་པར་མ་ཟད། རྒྱ་ནག་ཉེན་རྟོག་པས་མདོ་སྟོད་སྨད་ཀྱི་བོད་མི་རྣམས་ལྷ་སའི་ཁུལ་ནས་ཕྱིར་ཕུད་གཏོང་ཆེད། དུས་རྒྱུན་ཁ་གཡར་ས་སྣ་ཚོགས་བཙལ་ཏེ་སུན་གཙེར་དང་ཆད་པ་སོགས་བཅད་དེ་འདུག་མི་བདེ་བ་བཟོ་བཞིན་ཡོད་འདུག གྲྭ་བློ་བཟང་ལགས་ཀྱིས་རང་གིས་ལྷ་སར་དངོས་སུ་མཐོང་བའི་གནས་ཚུལ་ཞིག་བརྗོད་དོན། ཉིན་ཞིག་རྒྱ་ནག་ཉེན་རྟོག་པས་མདོ་སྨད་ནས་ཡིན་པའི་གཞོན་སྐྱེས་ཤིག་སྲང་ལམ་དུ་བཀག་སྟེ་ཞིབ་བཤེར་བྱེད་སྐབས། གཞོན་སྐྱེས་དེར་ལྷ་སར་བསྡད་ཆོག་པའི་ཁྲིམས་མཐུན་ཡིག་ཆ་ཚང་ཡོད་ནའང༌། ཁ་གཡར་ས་སྣ་ཚོགས་བཙལ་མཐར་ལག་ཁྱེར་ཁ་པར་ནང་གི་བོད་གཞས་ཤིག་ལ་ཆབ་སྲིད་ཀྱི་གནད་དོན་ཡོད་པའི་ཉེས་འདོགས་བྱས་ཏེ་རྒྱ་སྒོར་ ༥༠༠ ཆད་པ་བཅད་སོང་ཟེར། དེ་བཞིན་ལྷ་ས་ཁུལ་གྱི་ས་སྐྱེས་རྡོ་སྐྱེས་ཀྱི་བོད་མི་རྣམས་ལ་གྲོང་ཁྱེར་མཐའ་འདབས་ནས་ཁང་ས་ཉིས་ལྡབ་སྤྲོད་རྒྱུ་ཡིན་སྐོར་བརྗོད་ནས། ཇོ་ཁང་དང་ར་མོ་ཆེ་སོགས་ལྷ་ས་གྲོང་དབུས་ཀྱི་བོད་མི་འདུས་སྡོད་ཁང་ཁྱིམ་རྣམས་རྒྱ་གཞུང་ལ་བཙོང་དུ་བཅུག་སྟེ། བོད་མི་རྣམས་ལྷ་ས་གྲོང་ཁྱེར་གྱི་མཐའ་འདབས་ས་ཁུལ་དུ་གནས་སྤོར་དུ་འཇུག་གིན་འདུག་ཟེར།
སྒྲུབ་གནས་སྟོང་བར་ལུས་འདུག
གྲོང་ཁྱེར་ལྷ་སའི་ཉེ་འདབས་སྟག་རྩེ་རྫོང་ཁོངས་སུ་ཡོད་པའི་བྲག་གཡེར་པ་ནི་ལོ་ངོ་ཆིག་སྟོང་སུམ་བརྒྱ་ལྷག་ཙམ་གྱི་ལོ་རྒྱུས་ལྡན་པ་དང༌། གནས་དེར་སློབ་དཔོན་པདྨ་འབྱུང་གནས་དང༌། ཇོ་བོ་རྗེ་ཨ་ཏི་ཤའི་གཙོས་པའི་དམ་པ་མང་པོ་བཞུགས་མྱོང་བ་མ་ཟད། སྐུ་གསུང་ཐུགས་རྟེན་མང་པོ་ཡོད་པའི་ནང་པའི་སྒྲུབ་གནས་རྩ་ཆེན་ཞིག་ཆགས་ཡོད། བྲག་ཡེར་བ་དགོན་པའི་ནང་དེ་སྔོན་གྲྭ་བ་ ༡༠༠ ཡོད་འདུག ཡིན་ནའང༌། ཉེ་སྔོན་གྲྭ་བློ་བཟང་ལགས་སྒྲུབ་གནས་དེར་མཆོད་མཇལ་དུ་ཕྱིན་སྐབས་མཐོང་ཐོས་བྱུང་བ་ལྟར་ན། ལྷ་ཁང་རེའི་ནང་གད་དར་བྱེད་མཁན་གྲྭ་བ་རེ་རེ་མ་གཏོགས་ཧ་ལམ་མཐོང་རྒྱུ་མེད་པའི་གནས་སྟངས་ཆགས་ཡོད་འདུག གྲྭ་བློ་བཟང་ལགས་ཀྱིས་བརྗོད་པ་ལྟར་ན། ཁོ་རང་བྲག་གཡེར་བར་གནས་མཇལ་སྐབས་དགོན་པའི་ཉེ་འཁྲིས་སུ་སྒྲུབ་སྦྱོང་བྱེད་བཞིན་པའི་གྲྭ་རྒན་པ་ཞིག་དང་གླེང་མོལ་བྱུང་སྐབས། དབུ་སྐྲ་དཀར་པོར་གྱུར་ཡོད་པའི་གྲྭ་རྒན་པ་དེས་མིག་ལ་མཆི་མ་འཁོར་བཞིན། ད་སྐབས་དགོན་པའི་ནང་ཆོས་ཉམས་ལེན་བྱེད་མཁན་གྱི་གྲྭ་བ་རྣམ་དག་ཚང་མ་རྒྱ་གཞུང་གིས་བཙན་གྱིས་ཕྱིར་ཕུད་རྗེས། དེའི་ཤུལ་དུ་སྡོམ་ཁྲིམས་དང་སྤྱོད་པ་མི་གཙང་པའི་གྲྭ་ ༣༠ ཙམ་བཞག་ཡོད་པ་དང༌། ད་ལྟ་དགོན་པའི་ཆོ་ག་ཕྱག་ལེན་ཡོད་ཚད་ཉམས་ཏེ་ཤུལ་མེད་དུ་གྱུར་ཡོད་སྐོར་བརྗོད་བྱུང་ཟེར།
ཕྱི་ལོ་ ༢༠༠༨ ལོར་བོད་ས་སྟོད་སྨད་བར་གསུམ་དུ་ས་བྱི་ཞི་རྒོལ་ཆེན་མོ་བྱུང་བའི་རྗེས། རྒྱ་གཞུང་གིས་བོད་ཁུལ་ཡོངས་ལ་སྔར་བས་དྲག་གནོན་བྱེད་བཞིན་པར་མ་ཟད། བོད་ལ་རོགས་སྐྱོར་ཆེད་ཡོང་བ་ཡིན་པར་ཁ་གཡར་ཏེ་རྒྱ་རིགས་མང་པོ་བོད་ནང་གནས་སྤོར་བྱེད་ཤུགས་ཆེ་རུ་གཏོང་བཞིན་ཡོད།
གསར་འགོད་པ། ཚེ་རིང་རྒྱལ།
བཙན་བྱོལ་བ་ཚོ། ད་ང་ཚོའི་ཕྱི་ཕྱོགས་ནས། གམ་བགྲོད་དང་། མར་མེ་ཁྲོམ་སྐོར། ཟས་བཅད་ངོ་རྒོལ་སོགས་བྱེད་པའི་དུས་དེ་རྫོགས་བའི་དུས་ལ་སླེབས་སོང་།
ད་ང་ཚོ་ཡར་ལངས། ང་ཚོ་རང་ཡུལ་དུ་ལོག་འགྲོ། སུ་ཞིག་གིས་བཀག་ན་ཡང་། རྡོ་དང་། དབྱུག་པ། གྲི་དང་། མེ་མདའ་གང་གི་རྒྱབ་ན་ཡང་། ཕ་ཟད་བུ་ལ་ཐུག། བུ་ཟད་མ་ལ་ཐུག་ཀྱང་རུང་། ང་ཚོ་སོ་སོའི་རང་ཡུལ་དུ་ལོག། ད་དུང་གཞུང་འབེྲལ་མ་ཡིན་པའི་ཚོགས་པ་ཚོ། ཁྱེད་ཚོའི་ནམ་རྒྱུན་གསར་འགོད་གསལ་བསྒྲགས་རྫུབ་པོ་གང་འདྲ་ཞིག་སྤེལ་གི་ཡོད། བོད་མི་ས་ཡ་དྲུག་གི་ཆེད་དུ་ཡིན་ཚུལ་བརྗོད་ཀྱི་ཨེ་ཡོད། ད་ཁྱེད་ཚོ་དངོས་གནས་བོད་མི་ས་ཡ་དྲུག་གི་ཆེད་དུ་ཡིན་ན། རང་ཡུལ་ལ་འགྲོ་བསྐྱོད་ཀྱི་མགོ་འཛུགས་བྱས་དང་། ང་ཚོ་ཡང་སླེབས་གི་ཡིན།