དེང་རབས་པར་རིས་འགྲེམས་སྟོན།

གནས་ཚུལ་བཏང་འབྱོར་བྱུང་བ་ལྟར་ན། ཕྱི་ཟླ་དྲུག་པའི་ཚེས་ ༣༠ ཉིན་ཡུ་རོབ་ཧོ་ལན་ཌའི་གྲོང་ཁྱེར་ཨམ་ས་རྡར་ཊམ་ནང་བོད་པའི་སྒྱུ་རྩལ་པ་སྐོར་ཞིག་གིས་༼ ནང་གི་མཐོང་སྣང་ ༽ ཞེས་པའི་པར་རིས་འགྲེམས་སྟོན་གྱི་མཛད་སྒོ་ཞིག་ཚོགས་འདུག

འགྲེམས་སྟོན་དེར་ལྷ་སར་རྟེན་གཞི་བྱས་པའི་༼ དགེ་འདུན་ཆོས་འཕེལ་སྒྱུ་རྩལ་ཚོགས་པ ༽ཡི་ཚེ་དབང་བཀྲ་ཤིས་དང་ངག་མཁྱེན་སོགས་ཚོགས་མི་ ༧ དང་། དེ་བཞིན། ན་གཞོན་སྙན་ངག་པ་དང་གློག་བརྙན་ཕབ་སྐྲུན་པ་ལྗང་བུའམ་ལྕེ་ནག་ཚང་རྡོ་རྗེ་ཚེ་རིང་བཅས་ཁྱོན་སྒྱུ་རྩལ་པ་བརྒྱད་ཀྱི་བརྩམས་ཆོས་ ༣༠ ཙམ་འགྲེམས་སྟོན་བྱས་ཡོད་པ་དང་། བོད་རིགས་གཞས་མ་རྣམ་རྒྱལ་ལྷ་མོ་དང་སྙན་ངག་པ་ལྗང་བུ། འགྲེམས་སྟོན་གོ་སྒྲིག་གནང་མཁན་གྲས་འདུས་བྱུང་ཕུན་ཚོགས་ཚེ་རིང་སོགས་དབུ་འབྱེད་མཛད་སྒོར་ཞུགས་ཡོད་འདུག

འགྲེམས་སྟོན་འདི་ཕྱི་ཟླ་བརྒྱད་པའི་ཚེས་ ༢༧ བར་སྤེལ་འཆར་ཡོད་ཅིང་། བོད་དབྱིན་སྐད་གཉིས་ཤན་སྦྱར་གྱི་དཀར་ཆག་བཟོས་འདུག གོ་སྒྲིག་པས་ངོ་སྤྲོད་གནང་བ་ལྟར་ན། ཐེངས་འདིའི་འགྲེམས་སྟོན་དེ་ནི། ལོ་རྒྱུས་ཀྱི་སྣེ་མོར་འཁྲི་བའི་བོད་ཀྱི་དེང་རབས་པར་རིས་སྒྱུ་རྩལ་དེ་རྒྱུན་འཛིན་དང་གོང་སྤེལ་ཆེད། བོད་པའི་སྒྱུ་རྩལ་པ་ཚོས་སྲོལ་རྒྱུན་གྱི་རྩི་བཅུད་ལ་རྒྱབ་བརྟེན་བཅོལ་ཞིང་དེང་དུས་ཀྱི་ཚན་རྩལ་བེད་སྤྱོད་བཏང་སྟེ་རང་ཉིད་ཀྱི་ངོ་བོ་དང་ཁོར་ཡུག སྤྱི་ཚོགས། དེ་བཞིན་ཉིན་རེའི་འཚོ་བར་ལྟ་བའི་འཆར་སྣང་དང་། མཐོང་ཚུལ་རྣམས་པར་རིས་སྒྱུ་རྩལ་གྱི་ལམ་ནས་མངོན་པར་བྱས་པ་ཞིག་ཡིན་ལ། འགྲེམས་སྟོན་འདི་རིགས་ཧོ་ལན་ཌི་ལ་སྤེལ་པ་ནི་ད་རེས་ཐེངས་དང་པོ་ཆགས་ཡོད་རེད། ཅེས་བརྗོད་འདུག

 འགྲེམས་སྟོན་དེ་ནི་ཇར་མན་བོད་ཀྱི་ཁང་པ་དང་འོ་མའི་དཀར་ལམ་འགྲེམས་སྟོན་ཁང་། བོད་ཀྱི་ཤེས་རིག་མཚམས་སྦྱོར་ཐེབས་རྩ་བཅས་ཀྱིས་མཉམ་འབྲེལ་ཐོག་གནང་བ་ཞིག་ཡིན་འདུག