གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཞེ་གཉིས།

དེ་ནས་ང་རང་སོང་ནས་གནམ་ཐང་གི་ལས་བྱེད་ཅིག་ལ་སྐད་ཆ་དྲིས་དུས། ཁ་ཆེ་བ་དེ་ཡིས་དབྱིན་སྐད་ཡག་པོ་ཞིག་མི་ཤེས་པ་མ་ཟད། ཤེས་པ་དེ་ཡང་ང་རང་ལ་འཕྱ་དམོད་བྱེད་པའི་ཆེད་དུ་བེད་སྤྱོད་བཏང་བ་ལྟ་བུ་ཞིག་བཤད་ཀྱི་འདུག ཁོས་ཁྱེད་རང་གི་ལག་དེབ་འདི་ག་རེ་རེད། ཁྱེད་རང་ལ་རྒྱལ་ཁབ་འདིའི་ཐོངས་ཆེན་མི་འདུག་ཟེར་ནས་ཁྲེལ་གཏམ་བཤད། དེ་དུས་ངས་ང་རང་ལ་གནམ་ཐང་འདི་རྒྱུད་དེ་འགྲོ་ཆོག་པའི་གནམ་གྲུའི་འཛིན་བྱང་ཡོད་པ་འདི་རེད་ཅེས་རང་གི་གནམ་གྲུའི་འཛིན་བྱང་ཁོ་ལ་བསྟན་དུས། ཁོས་ཅི་མི་སྙམ་པའི་ངང་དུ། ཁྱེད་རང་ལ་མགྲོན་ཁང་མི་འདུག ཕར་ཕྱོགས་ཀྱི་སྒོ་འགྲམ་དེ་ནས་སྒུག་བསྡོད་དང་། ཕྱི་དྲོ་ཁྱེད་རང་གི་གནམ་གྲུར་འགྲོ་བའི་གློ་སྒོ་དེ་རེད་ཟེར། དེ་ནས་ང་རང་ལ་ཡང་ཐབས་ཤེས་གཞན་མེད་པའི་སྐད་ཆ་མང་བོ་ཞིག་བཤད་ཚེ། ཕན་ཐོག་མེད་པ་ཤེས་སོང་ལ། གོ་ཐོས་སུ་ལག་དེབ་སེར་པོ་འཁུར་ནས་གཞན་ཡུལ་དུ་འགྲོ་མཁན་ཞིག་ལ་རྒྱལ་ཁབ་གཞན་རྒྱུད་དེ་རྒྱལ་ཁབ་གཞན་ལ་འགྲོ་མཁན་ཞིག་གནམ་ཐང་ནས་ཕྱིར་རྒྱ་གར་དུ་བཏང་བའི་སྐོར་དེ་ཡང་དྲན་སོང་།

ང་རང་ཕྱིར་རྒྱ་གར་དུ་མི་གཏོང་བ་ཤེས་ཀྱང་། ཕར་བཤད་ན་དང་དུ་མི་ལེན་པའི་ལས་བྱེད་དེ་ཡི་རྣམ་འགྱུར་དང་བཤད་སྟངས་ལ་ངས་རྩད་རྒྱགས་འདོད་མེད་པ་དང་རྩད་བརྒྱབས་ནས་གྲུབ་འབྲས་གཞན་གང་ཡང་མེད་པ་ལྟ་བུ་ཞིག་མཐོང་ནས་གནམ་ཐང་དེ་ནས་སྒུག་རྒྱུར་སེམས་ཐག་བཅད་ནས་རྐུབ་སྟེགས་ཤིག་གི་སྟེང་དུ་བསྡད་ནས་ཤོག་སྨྱུག་གཉིས་ཕྱི་རུ་བཏོན།

ལྡི་ལུ་ནས་ང་རང་གི་གནམ་གྲུའི་འཛིན་བྱང་ཉོ་དུས་སུ་ང་རང་ལ་ངལ་གསོ་སའི་མགྲོན་ཁང་དང་ཟ་མ་བཅས་ཡོད་པ་གཏོགས་ཡོད་ཀྱང་། འདི་ནས་མགྲོན་ཁང་ལ་སྣེ་ལེན་བྱེད་མཁན་མ་རེག་སྟབས། གནས་ལུགས་ཞུ་སའི་མི་གཅིག་གྱང་མེད་ཀི ཞོགས་པ་གནམ་གྲུའི་ནང་ནས་ཞོགས་ཟས་ཤིག་སྤྲད་པ་དེ་ལས་ཉིན་བཀང་བོར་ཁ་ནང་དུ་ཆུ་ཐིགས་པ་འགའ་མ་གཏོགས་མེད། ཕོ་བ་ཞེ་དྲགས་ལྟོགས་པའི་ཚོར་བ་དམིགས་བསལ་གང་ཡང་བྱུང་མ་སོང་མོད། དངོས་ནས་ངལ་གསོ་སའི་མགྲོན་ཁང་དེ་རེག་ན་ཅི་མ་ཧུད་སྙམ་ཞོར། ཁ་སྐམ་པོའི་ངང་དུ་སྤུས་དག་པའི་གནམ་ཐང་ཆུང་ཆུང་དེ་ནས་ཆུ་ཚོད་ཀྱི་ཐག་སྒྲ་ལ་ཉན་ནས་ས་རུབ་པར་མི་སྒུག་ཐབས་མེད་གྱུར།

གཉིད་བཀང་བོར་འགྱིག་གི་རྐུབ་སྟེགས་དེ་ནས་གཉིད་མ་སད་ཀྱིས་བསྐྱལ། ས་རུབ་ཁར་སྒོ་སྲུང་བ་གཅིག་གིས་ང་རང་སྒོ་རྟགས་ཨང་གྲངས་བདུན་པར་འགྲོ་དགོས་པར་བཤད། སྒོ་རྟགས་ཨང་གྲངས་བདུན་པར་ཡོང་ནས་སྒུག་དུས་སུ་་མི་མང་བོ་ཞིག་གི་འཚིག་ཇ་འཐུང་ས་སྙིང་རྗེ་བོ་ཞིག་ཡོད་པ་དེར་འཚིག་ཇ་འཐུང་ནས་ལྷོད་ལྷོད་དུ་བསྡོད་པ་འཐུང་དུས། རང་ཉིད་ནི་འཚིག་ཇ་འཐུང་བར་དགའ་བའི་མི་ཞིག་ཡིན་སྟབས། འཚིག་ཇ་ཕོར་བཀང་ཉོ་བྱེད་ཀྱི་ཨ་སྒོར་ཁ་ཤས་ཤིག་ཡོད་ན་ངས་ཀྱང་དེ་ལྟར་ལྷོད་ལྷོད་བྱེད་ཆོག་གི་རེད་མོད། གང་ལྟར། རང་ཉིད་ལ་གང་ཡང་མེད། འཚིག་ཇ་འཐུང་མཁན། ཞོར་ཟས་ཟ་མཁན། དེ་དག་རེ་རེ་བཞིན་མཐོང་ནས་འོང་དུས་དངོས་ནས་སྐོམ་སྣང་དང་ལྟོགས་སྣང་གཉིས་ཀ་གཅིག་གྱུར་དུ་བྱུང་།

༩།༩།༠༨རྒྱ་གར་གྱི་ཞོགས་པའི་ཆུ་ཚོད་དང་པོ་ཡོལ་ཙམ་དང་ཨེས་སུ་རལ་གྱི་ནམ་དཀྱིལ་ཆུ་ཚོད་ཆུ་གཅིག་མ་ཟིན་ཙམ་ལ། ང་རང་ཨེས་སུ་རལ་གྱི་གནམ་ཐང་དུ་འབྱོར། ང་རང་གནམ་ཐང་གི་ནང་ལོག་ནས་གནམ་ཐང་ཕྱི་ལ་མ་བུད་གོང་དུ། ལག་ཁྱེར་ཞིབ་གཤེར་བྱེད་མཁན་གྱིས་ལག་དེབ་སེར་པོ་བསྟན་ན་ཡང་། ཁྱེད་རང་གི་ལག་ཁྱེར་འཁུར་ཤོག་ཟེར། ངས་ང་རང་གི་ལག་ཁྱེར་འདི་རེད་ཅེས་བཤད་དུས། ལག་ཁྱེར་ལྟ་མཁན་གྱི་བུད་མེད་དེས་ཁ་པར་བརྒྱབས་སོང་། ཕོ་གསར་ཞིག་འབྱོར་ནས་ང་རང་གི་ལག་ཁྱེར་གྱི་ཕྱི་བསྐྱོད་ཆོག་པའི་ཨེས་སུ་རལ་གྱི་ཐམ་ག་ཚད་ལྡན་སྤྱར་ཡོད་པའི་ཡི་གེ་མཐོང་ནས་འགྲིག་གི་འདུག་ཟེར་ནས་བུད་མེད་དེ་ལ་བཤད་སོང་། དེ་ནས་བུད་མེད་དེས་ཕར་ཕྱོགས་སུ་སོང་ཆོག་པའི་ཐམ་ག་ངའི་ལག་དེབ་སེར་པོའི་སྟེང་དུ་བརྒྱབས།

ང་རང་ནི་གནམ་ཐང་གི་སྐུ་མགྲོན་གཞན་དག་དང་འདྲ་བར་རང་གི་ཅ་དངོས་བླངས་དེ། སྒོ་ཆེན་དེ་ནས་ཕྱི་ལ་བུད་མ་ཐག གངས་དཀར་ལྷ་མཚོའི་ཚ་མོ་རྒ་ལེས་ཡ་ང་རང་བསུ་རུ་སླེབས་འདུག ཁོ་མོ་ངས་སྔོན་ཆད་རྒྱ་གར་དུ་ཟླ་བ་ཁ་ཤས་སྔོན་དུ་ཐུག་མྱོང་བ་ཡིན་དུས། ང་རང་གི་སྣང་བ་ལ་རང་གི་གྲོགས་པོ་རྙིང་བ་ཞིག་རང་ཉིད་གནམ་ཐང་དུ་བསུ་རུ་ཡོང་བ་ཞིག་ཤར་ནས། ཁོ་མོའི་གམ་དུ་སོང་། ཁོ་མོས་ང་རང་གི་སྐེ་རུ་འཐམ་ནས་འགྲམ་པ་གཉིས་ལ་འོ་ཞིག་བྱས་པ་དང་། ཨེས་སུ་རལ་དུ་ཕེབས་པར་དགའ་བསུ་ཞུ་ཟེར། ཁོ་མོ་ནི་སྤྱིར་བཏང་གི་བུད་མེད་དང་མི་འདྲ་བ་ཞིག་ཡིན། བུད་མེད་ཀྱི་བུད་མེད་ལ་འཁྲིག་སྲེད་ཀྱི་འཚོ་བ་རོལ་མཁན་གྱི་གྲངས་དེ་རེད། འོན་ཀྱང་། ང་རང་ལ་ཁོ་མོ་ལ་དམིགས་བསལ་གྱིས་བུད་མེད་སྤྱི་དང་མི་འདྲ་བའི་ཚོར་བ་གང་ཡང་མ་བྱུང་།

ངེད་གཉིས་ཀྱིས་ང་རང་གི་ཅ་ལག་ཚང་མ་མོ་རང་གི་རླངས་འཁོར་དུ་བཞག་ནས། གནམ་ཐང་དུ་ངའི་མཛའ་མོ་སླེབས་པར་སྒུག་ནས་ཁ་བརྡ་འདྲ་མིན་ཞིག་བྱེད་ཞོར་དུ་ཐ་མག་རེ་འཐེན་པ་དང་། འཚིག་ཇ་འཐུང་བ། ཁོ་མོས་ང་ལ་ཉོས་པའི་མངར་ཟས་ཟོས་དེ་བསྡད་རིང་། ཆུ་ཚོད་གཉིས་ལྷག་ཇི་ལྟར་སོང་བ་ཡང་མ་ཤེས། བར་སྐབས་དེ་འདྲ་ཞིག་ལ་གངས་དཀར་ལྷ་མཚོ་འབྱོར་སོང་། ཁོ་མོས་ང་རང་གི་གནམ་ཐང་ནས་མྱང་བའི་སྐོར་ཐོས་ནས་མིག་ཆུ་ཐོར་ཞོར། གནམ་གྲྭའི་ལས་ཁུངས་དེར་ཁ་པར་བརྒྱབས་ནས་སྒོར་མོ་ཕྱིར་ལོག་བྱེད་དུ་འཇུག་གི་ཡིན་ཟེར། ངས་སྐྱོན་མེད་ཚུལ་བཤད་ནས་ང་ཚོ་གནམ་ཐང་ནས་ལམ་དུ་བུད།

ལམ་བར་དུ་མཛའ་མོའི་གྲོགས་མོ་ཡག་ཤོས་སྒྲ་ཝུ་ན་ཟེར་བའི་བུད་མེད་ཅིག་གི་ནང་དུ་སོང་ནས་ཕན་ཚུན་ལ་འཚམ་འདྲི་དང་ངོ་སྤྲོད་རེ་བྱས་ནས་ཅུང་ཙམ་རིང་དེ་ནས་བསྡད། ང་ཚོ་འགྲོ་ཡུལ་ནི་མོ་རང་གི་ཨ་མའི་ནང་ཡིན། གནམ་ཐང་ནས་མོ་རང་གི་ཨ་མའི་ནང་བར་དུ་ཆུ་ཚོད་གཅིག་མ་ཟིན་ཙམ་ཞིག་རླངས་འཁོར་དུ་འགྲོ་དགོས་བྱུང་། མོ་རང་གི་ཨ་མའི་ནང་དུ་སླེབས་དུས་སྐྱ་རེངས་གསལ་འདུག ཁོ་མོའི་མ་རྒན་ཡང་ངས་རྒྱ་གར་ནས་མཇལ་མྱོང་ཡོད་དུས། མོ་རང་གིས་ང་ཚོ་ལ་འཚམ་འདྲི་གནངས། རྒ་ལས་ཡ་ཅུང་ཐང་ཆད་འདུག་ཟེར་ནས་ངལ་གསོ་རུ་འགྲོ་སོང་།

ངེད་གསུམ་གྱིས་ཞོགས་ཇ་གྲྭ་རྒྱས་པོ་ཞིག་འཐུང་། དེ་ནི་ང་རང་གི་མི་ཚེ་ནང་དུ་ཁྱིམ་ཚང་ཞིག་ནས་ཞོགས་ཇས་གྲྭ་རྒྱས་ཤོས་དེ་ཡིན་ཟེར་ན་ཆོག དངོས་ནས་ཧ་ལས་པའི་གྲྭ་རྒྱས་པོ་ཞིག་བཤམས་འདུག ཞོགས་ཟས་ཀྱི་རྗེས་ནས་ཅུང་མ་འགོར་བར་མོ་རང་གི་མ་རྒན་ནི་ལས་ཀར་བུད་ཐལ། ང་རང་གི་གཟུགས་པོ་ཞིག་དཀྲུས་ནས་ཅུང་ཙམ་ཉལ་བ་ཡིན། ཕྱི་དྲོ་རྒ་ལས་ཡ་ངེད་གསུམ་མོ་རང་གི་རླངས་འཁོར་དུ་བསྡད་ནས་ཟ་ཁང་ཞིག་དུ་སོང་ནས་ཟ་མ་ཞིག་མཉམ་དུ་ཟོས་རྗེས། རྒ་ལས་ཡ་མོ་རང་རང་ཉིད་ཀྱི་བསྡོད་ས་ཀྲེ་ལེས་བས་གྲོང་ཁྱེར་དུ་ཆས། ངེད་གཉིས་ཀྱིས་མོ་རང་གི་ཨ་ཅེ་དང་མོ་རང་གི་ཚ་མོ་གཉིས་ངེད་གཉིས་ལ་ཐུག་དུ་ཡོང་བར་སྒུག ༡༠།༩།༠༨

དེ་རིང་ནི་རྒྱལ་ཁབ་འདིར་སླེབས་ནས་ཉིན་གཉིས་པ་ཡིན། ཁོ་མོ་དང་ལྷན་དུ་ནང་ལ་གཙང་མ་ཞིག་བཟོས་པ་དང་གློག་བརྙན་ལ་བལྟས་ནས་བསྡད། ཕྱི་དྲོ་མོ་རང་གི་གྲོགས་མོ་ཡག་ཤོས་སྒྲ་ཝུ་ན་དང་ཝན་གཉིས་ངེད་གཉིས་བསུ་རུ་ཡོང་ནས་སྒྲ་ཝུ་ན་ཡི་ནང་དུ་སོང་ནས་དགོང་ཟས་ཟ་རྒྱུ་བྱས། སྒྲ་ཝུ་ན་མོ་རྐྱང་ཡིན། ཝན་ནི་བཟའ་ཚང་བྱས་དེ་ལོ་མང་བོ་ཞིག་སོང་ཡོད། བུ་མོ་གཉིས་ཀྱི་ཨ་མ་ཡིན། མོ་རང་ཡང་སྔོན་ཆད་ངས་རྒྱ་གར་རྡ་ས་མེག་ལོར་ནས་འཕྲད་མྱོང་། མོ་རང་ངའི་མཛའ་མོའི་མི་ཚེ་ནང་གི་གྲོགས་མོ་ཡག་ཤོས་ཤིག་རེད། སྐད་ཆ་ཆེས་མང་བོ་ཞིག་ཁོ་མོས་ཝན་ལ་གསང་བ་བྱེད་ཀྱི་མེད་རབས་བཤད་ཀྱི་ཡོད།

དགོང་ཟས་དེར་སྒྲ་ཝུ་ན་ཡི་གྲོགས་དང་གྲོགས་མོ་ཁ་ཤས་ཤིག་འདུག་ལ། སྐད་ཆ་འདྲ་མིན་སོགས་བཤད་ནས་ཆུ་ཚོད་བཅུ་གཉིས་བར་དུ་ལུས། སྒྲ་ཝུ་ན་ཡིས་ཝན་དང་ངེད་གསུམ་ཕྱིར་མཛའ་མོའི་མ་རྒན་ནང་དུ་མོ་རང་གི་རླངས་འཁོར་བསྐྱལ། ༡༡།༩།༠༨

ང་རང་ཡར་བླངས་དུས་ཁོང་ཚོ་ཚང་མ་ཡར་བླངས་ཚར་འདུག མཛའ་མོས་ང་རང་ལ་འཚིག་ཇ་ཞིག་བཟོས་འདུག་པ་དེ་འཐུང་ནས། ཝན་དང་ང་ཚོ་གསུམ་ཨེས་སུ་རལ་གྱི་ཐོངས་ཆེན་ཞུ་སའི་ལས་ཁུངས་ཤིག་དུ་བཅར་ནས། ང་རང་གི་ཐོངས་ཆེན་ལག་ཁྱེར་གྱི་བསྡོད་ཡུན་རིང་དུ་གཏོང་ཆོག་པའི་ཐད་དུ་སྐད་ཆ་དྲིས་དུས། ང་ཚོས་འཁྱེར་ནས་སོང་བའི་ཡིག་ཆའི་སྟེང་དུ་རྒྱ་གར་གཞུང་གིས་ཐམ་ག་རེ་ཟུང་ཞིག་དགོས་རབས་བཤད་དེ་ང་ཚོ་ཕྱིར་བཏང་སྐབས། ངའི་མཛའ་མོ་ངུ་བཞིན་འདུག་པ་ལས་བྱེད་བུད་མེད་དེ་ཡི་མཐོང་ནས། མ་ངུ་། མ་ངུ་། བྱ་བ་ཚང་མ་འགྲིག་འགྲོ་ངེས་རེད་བཤད་སོང་།

ཝན་དང་ངེད་གསུམ་ཟ་ཁང་བརྫིག་པོ་ཞིག་གི་ནང་དུ་ཞོགས་ཟས་ཟ་རུ་སོང་། ཁོར་ཡུག་ནི་ཧ་ཅང་མཛེས་པ་དང་ཕར་བལྟས་ན་རྡོ་བརྩིགས་ཀྱི་སྣང་བརྙན་དེ་ཡི་མིའི་རིགས་ཀྱི་ངལ་རྩོལ་ལ་བརྟེན་ནས་གྲུབ་པའི་ཨེས་སུ་རལ་མི་རིགས་ཀྱི་རྩ་ཆེ་བར་བརྩི་བའི་བརྩིགས་པ་དེ་ཡི་བརྩིག་གྱང་མཐོང་ཐུབ་ལ། རྡོ་བརྩིགས་དེ་ལ་ལོ་ངོ་ཉིས་སྟོང་ལྷག་གི་ལོ་རྒྱུས་ཡོད་རབས་བཤད།

ཉིན་རྒྱབ་དུ་མཛའ་མོའི་ཕ་རྒན་དང་ཐུག་འཕྲད་ཀྱི་དུས་ཚོད་བཟོས་པ་ལྟར། ང་ཚོས་ཁ་བརྡ་འདྲ་མིན་སྣ་ཚོགས་ཤིག་བྱས། ཁོང་གིས་རྒྱ་བོད་ཀྱི་དཀའ་ངལ་སེལ་བའི་ཐད་དུ་ར་ཤི་ཡ་དང་ཨ་རི་གཉིས་ཀྱི་དམག་འཐབ་བྱེད་གྲབས་བྱེད་པའི་སྐབས་སུ། ཨ་རིའི་བྱིས་པ་ཞིག་གིས་ཨ་རི་ནས་ར་ཤི་ཡའི་སྲིད་འཛིན་ལ་ཡི་གེ་ཐུང་ཐུང་ཞིག་སྐུར་བའི་ནང་དུ་། ར་ཤི་ཡའི་སྲིད་འཛིན་ལགས། ཁྱེད་ཀྱིས་ང་ཚོ་ཅིའི་ཕྱིར་གསོད་དགོས་པ་རེད་དམ་ཞེས་བྲིས་ཡོད་པ། ར་ཤི་ཡ་སྲིད་འཛིན་གྱི་ལག་པར་འབྱོར་ནས། བྱིས་པ་དེ་ར་ཤི་ཡ་རྒྱལ་ཁབ་དུ་མགྲོན་འབོད་བྱས་ནས་མཐར་དམག་མི་རྒྱགས་པར་ཁས་བླངས་པ་རེད། ཁྱེད་ཀྱིས་ཀྱང་ཐབས་ཤེས་གསར་བ་ཞིག་བེད་སྤྱད་དེ་རྒྱ་བོད་གཉིས་ཀྱི་གནད་དོན་ཐད་དུ་སྐད་ཆ་བཤད་ཆོག་གི་རེད་ཅེས་གསུངས་བྱུང་།

དགོང་མོ་ཕྱིར་མོ་རང་གི་ཨ་མའི་ནང་དུ་ཕྱིར་ལོག་ནས་ངས་ཁོང་ཚོ་ལ་བོད་ཀྱི་ཟ་མ་བཟོས་པ་ཡིན། མོག་མོག ཤ་མེད་འཐེན་ཐུག་བརྔོས་མ། གྲང་ཚལ། ཤིང་ཏོག ཤིང་ཏོག་ཁུ་རིགས་འདྲ་མིན། འཚིག་ཇ། ནུབ་ཚལ་གྱི་རྗེས་སུ་རྒྱ་གར་ནས་འཁུར་འོང་བའི་དགེ་འདུན་ཆོས་འཕེལ་ཞེས་པའི་འོད་སྡེར་གསར་བ་དེར་བལྟས། ༡༢།༩།༠༨

མུ་འགོད།