ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚན་པའི་གོ་སྒྲིག་འོག ཁ་སང་ཕྱི་ཚེས་ ༡༣ ཉིན་གྱི་ཞོགས་པའི་ཆུ་ཚོད་ ༩།༣༠ སྟེང་། ཨ་རིའི་གྲོས་ཚོགས་གོང་མའི་རཱོ་སིལ་ལས་ཁུངས་ (Russell Senate Office Building)ཞེས་པར་༼༧གོང་ས་མཆོག་གིས་བོད་ཀྱི་སྲིད་དབང་རྩིས་སྤྲོད་གནང་བ་དེས་བོད་ཀྱི་གནད་དོན་ལ་འགྱུར་བ་འགྲོ་མིན་དང་བོད་རྒྱ་འབྲེལ་མོལ་རྒྱུན་འཁྱོངས་ཐུབ་མིན་༽ཞེས་པའི་བརྗོད་གཞིའི་ཐོག་བགྲོ་གླེང་ཞིག་ཚོགས་ཡོད་འདུག
ཚོགས་འདུ་དེར་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་དང་། བོད་སོག་ནང་པའི་རིག་གཞུང་གཅེས་སྐྱོང་ཁང་འགན་འཛིན་ནམ་སྐུ་འབུམ་དགོན་པའི་དགོན་བདག་ཨཀྱ་རིན་པོ་ཆེ། ཝེ་ཇི་ནི་ཡ་གཙུག་ལག་སློབ་གྲྭའི་ཆོས་ལུགས་ཚན་པའི་དགེ་རྒན་ཆེན་མོ་སྐུ་ཞབས་ཌེ་ཝི་ཌི་གར་མ་ནོ་ (Prof.David Germano) ། དེ་བཞིན། ཆབ་སྲིད་བཙོན་ཟུར་ངག་དབང་གསང་གྲོལ་བཅས་ཀྱིས་གཏམ་བཤད་གནང་ཡོད་འདུག
ཨ་རིའི་གྲོས་ཚོགས་རྒྱ་ནག་ལས་དོན་ཚན་པ་ནི། རྒྱ་ནག་གི་འགྲོ་བ་མིའི་ཐོབ་ཐང་དང་ཆབ་སྲིད་བཙོན་པའི་ལོ་རྒྱུས་ཡིག་ཆ་མཁོ་སྒྲུབ་བྱེད་མཁན་གྱི་ཚོགས་པ་ཞིག་ཡིན་ཞིང་། ད་བར་ཚོགས་པ་འདིས་རྒྱ་གཞུང་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་གསལ་བའི་ཐོབ་ཐང་ཁག་རྩིས་མེད་རྡོག་རོལ་དུ་བཏང་སྟེ། མི་མང་གང་བྱུང་འཛིན་བཟུང་བྱས་པ་རྣམས་ཨ་རིའི་སྲིད་འཛིན་དང་གྲོས་ཚོགས་སུ་འབུལ་བཞིན་ཡོད་འདུག
དཔལ་ལྡན་གྱིས་བསྡུ་སྒྲིག་བྱས།
