གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཞེ་བཞི།

འཆི་བ་ལ་སྒུག་པའི་རྒན་མོ་ལོ་ལོན་གཉིས་དང་ཐུག་འཕྲད་བྱེད་དུ་བཅར། གཉིས་ཀ་མཛའ་མོའི་ཉེ་འབྲེལ་ཡིན། ངས་འདི་ནས་འཆི་བ་ལ་སྒུག་པའི་མི་ཟེར་དོན་ནི། འཇིག་རྟེན་ཡོངས་གྲགས་ནས་བཤད་ན། ལོ་ལོན་ནས་ལོ་བརྒྱད་བཅུ་ཟིན་དུས་སུ། ལ་ཁའི་ཉི་མ་ཞེས་འབོད་སྲོལ་ཡོད་པ་དེ་ཡི་སྟབས་ཀྱི་བཏགས་པ་ལས། ང་ཚོ་ལ་འཆི་བ་མེད་ཟེར་བའི་དོན་མིན། ང་ཚོ་ཡང་སྐྱེ་ནས་བཟུང་འཆི་བ་འགོ་བཙུགས་པ་ནི་སུས་ཀྱང་ཤེས་པ་ཞིག་ཡིན་མོད། ལོ་ནམ་ཚོད་ཀྱི་བཤད་ན་གཞོན་དུས་སུ་འཆི་བ་ནི་ཉུང་དུ་གྲགས་པས་ཡིན། འོན་ཀྱང་། འཆི་བ་ལ་གཏན་འཁེལ་ཞིག་ག་ལ་ཡོད། ཆུང་དང་ཆེ། གཞོན་དང་རྒན། དར་དང་རྒས་ཀྱི་ས་མཚམས་ཤིག་གང་ན་ཡོད།

འཆི་བ་སྒུག་པའི་མི་ཞེས་བཤད་མ་ཐག དངོས་ནས་ང་རང་གིས་བཤད་ནོར་ཞིག་ཐེབས་པ་མིན་འགྲོ་སྙམ་ཞོར་དུ། རྒན་མོ་ལོ་ལོན་གཉིས་ལ་ཐུག་འཕྲད་བྱེད་དུ་སོང་ཡུལ་ཡང་མི་འདྲ་བ་ཡིན། གཅིག་ནི་ལོ་༨༥དང་། གཞན་དེ་ནི་ལོ་༩༤ཡིན། གཅིག་བྱས་ན་ངས་འདི་ལྟར་འཆི་བ་ལ་སྒུག་བཞིན་པའི་ལོ་ལོན་གཉིས་ཞེས་བཤད་པ་དེར་རྒྱུ་མཚན་མེད་པ་ཞིག་ཀྱང་མིན། རྒན་མོ་གཉིས་ཀྱི་གནས་སྟངས་དང་འཚོ་ལུགས་གཏན་ནས་མི་འདྲ། ལོ་༨༥ལ་སོན་པའི་རྨོ་རྨོ་དེ་ནི་ངའི་མཛའ་མོའི་རྨོ་རྨོ་ཡིན། གཞན་དེ་ནི་མོ་རང་གི་ཨ་ནེ་ཞིག་རེད།

ལོ་ན་༨༥ལ་སོན་པའི་མོ་རང་གི་རྨོ་རྨོ་ནི་གཅིག་བུར་བསྡད་ཡོད་ལ། ཁོང་ཚོས་བཤད་ན་ཁོ་མོ་དེ་ལྟར་འདུག་རྒྱུར་དགའ་བོ་ཡོད་ཟེར། ངས་བསམ་པའི་ནང་དུ་དངོས་ནས་དེ་འདྲའི་སྟབས་བདེ་བོ་ཞིག་མ་བྱུང་། བོད་མི་ཞིག་གི་ངོས་ནས་བཤད་ན་རང་གི་ཕ་མ་རྒས་དུས་སུ་བུ་ཕྲུག་དག་གིས་གཉོར་སྐྱོང་བྱེད་པ་ཡིན་ལ། གཉོར་སྐྱོང་བྱེད་སྟངས་དེ་ཡང་ཕ་མ་རྒན་རྒོན་ཆགས་དུས་བུ་ཕྲུག་གི་མཉམ་དུ་ཡོད་པ་མ་ཟད། དེ་དག་ལ་སྲུ་ཞུ་གང་ལེགས་བྱས་ནས་ཟས་སྤྲོད་པ་སོགས་དགོས་ངེས་ཀྱི་མཐུན་རྐྱེན་ཡོངས་སུ་བྱེད་པ་དེར་ཕ་མ་ལ་སྲུ་ཞུ་སྒྲུབ་མཁན་གྱི་སྲོལ་དུ་ཡོད་པས་ཡིན། ཡིན་ཡང་།འདི་ནི་ཕྱི་རྒྱལ་གྱི་མི་ཚང་མས་བྱེད་སྲོལ་ཞིག་ཡིན་མིན་ལ་ང་རང་གསལ་ཆ་ཆེར་མེད། ངས་དེ་རིང་རང་གི་མིག་མདུན་དུ་ཡོད་པ་དེ་དག་བཤད་ཀྱི་ཡོད། རྨོ་རྨོ་ཁོང་ནི་སྐད་རིགས་བཞི་ཤེས་མཁན་ཞིག་ཡིན་པ་དང་། དུས་རྒྱུན་དུ་ཁྱིམ་རྒྱུད་ཀྱི་ཟིན་ཐོ་འབྲི་བར་ཧ་ཅང་དགའ་མཁན་ཞིག་རེད།

རྨོ་རྨོ་ཁོང་གི་མཚན་ལ་རོ་སུ་ཟེར་བ་དང་། ཁོང་གིས་བྲིས་པའི་ཟིན་ཐོ་དག་ནི་མི་སྡུག་རུས་མེད་མཁན་ཞིག་ལ་མཚོན་ན་ཀློག་པར་ཡང་དངོས་ནས་དཀའ་ངལ་འཕྲད་ངེས་རེད་འདུག  རྨོ་རྨོ་ཁོང་གིས་ཁང་ཆུང་ནང་དུ་དེབ་དང་འབྲི་ཤོག་གི་བཀང་ནས་བསྡད་འདུག ཁོ་མོས་དཔར་བསྐྲུན་བྱས་ཟིན་པའི་དེབ་གཅིག་གཉིས་ཤིག་ང་རང་ལ་བསྟན་བྱུང་། དེབ་དེ་དག་མི་ཡོངས་གྲགས་ཀྱི་ཆེད་དུ་དཔར་བསྐྲུན་བྱས་པ་ཞིག་མ་རེད། ཁོ་མོས་རང་གི་ཁྱིམ་རྒྱུད་ཀྱི་མི་ལ་དྲན་རྟེན་དུ་བཞག་པ་ཞིག་རེད་འདུག དེ་ལྟར་ཁོ་མོ་གཅིག་བུའི་དེབ་དང་ཤོག་སྨྱུག་གི་ཁྲོད་དུ་མི་ཚེ་ཡི་མཐའ་མཇུག་བསྐྱེལ་བཞིན་ཡོད་ཀི ཁོ་མོས་བྲིས་ཚར་བའི་དེབ་ནི་བརྒྱ་ཕྲག་ཁ་ཤས་ཤིག་འདུག་ན་ཡང་། དེ་ཡི་ཁྲོད་ནས་སྐད་ཡིག་གཞན་དག་ལ་དཔར་བསྐྲུན་བྱས་པ་ཡང་རེ་ཟུང་ཞིག་འདུག ཁོ་མོས་ང་ལ་གསུང་རྒྱུར། མོ་རང་ནི་དུས་རྒྱུན་དུ་ཟིན་བྲིས་འབྲི་བར་ཧ་ཅང་དགའ་བོ་ཡོད། དེ་ནི་མོ་རང་གི་མི་གཞན་དག་དང་མཉམ་དུ་གླེང་མོལ་བྱེད་པ་དང་གཅིག་རེད་ཟེར། ད་དུང་། མོས་མིའི་སེམས་ནང་དུ་གཙང་གྲྭ་བྱེད་དགོས་པ་གལ་ཆེན་པོ་ཡིན། ཕྱི་ཚུལ་གྱི་གཙང་གྲྭ་ནི་གལ་མི་ཆེ་ཟེར་བཞིན་རྐང་ལག་འདར་ཞོར་དང་དབུགས་མགྱོགས་པོ་ལེན་གྱི་འདུག སྐབས་དེར་ངས་འཇིག་རྟེན་འདིར་ཁེར་རྐྱང་གི་འཚོ་ལུགས་གསར་བ་ཞིག་མཐོང་བྱུང་ལ། སློབ་སྤྱོང་ལ་དགའ་བའི་ཨ་མ་རྒན་མོ་ལོ་ན་ཆེས་བགྲེས་པའི་མོ་རང་མཐོང་ནས། སེམས་ནང་དུ་བུ་དང་བུ་ཕྲུག་ཟེར་བ་འདི་ཡོད་མེད་ཀྱི་ཁྱད་པར་གང་ལ་བརྟེན་ནས་བཞག་ན་འོས་པ་ཡིན་ནམ་བསམ་བྱུང་།

ལོ་ན་༩༤ལ་སོན་པའི་མཛའ་མོའི་ཨ་ནེ་ཁོང་ལ། ལྟ་སྐྱོང་བྱེད་མཁན་གྱི་ཤར་ཕྱོགས་ཧྲེས་ལས་ཕེན་ནས་ཡིན་པའི་བུད་མེད་ཅིག་ཡོད། ཨ་ནེ་ཁོང་གི་མིང་ལ་ཀྲ་མ་རས་ཟེར་གྱི་འདུག ལྟ་སྐྱོང་བྱེད་མཁན་གྱི་བུད་མེད་དེ་ནི་ཁོ་མོའི་མཉམ་དུ་ལོ་ངོ་བཞི་ཙམ་སོང་འདུག་ལ། ནང་གི་ཨ་མ་ལྟ་བུ་ཞིག་ཆགས་འདུག མགྲོན་པོ་སུ་ཡོང་ལ་སྣེ་ལེན་དང་ཁོ་མོ་ལ་བརྡ་ལན་སོགས་སྤྲོད་ཀྱི་ཡོད་ཀི ཨ་ནེ་ཀྲ་མ་རས་ནི་ཆུང་དུས་སུ་གར་སྟེགས་རྒྱུད་ནས་འཁྲབ་སྟོན་བྱེད་མཁན་གྱི་འཁྲབ་སྟོན་མ་ཞིག་རེད་འདུག དེ་ཡི་སྟབས་ཀྱི་ཁོ་མོས་བསགས་པའི་དངུལ་སྒོར་དེ་དག་གིས་ཚེ་མཇུག་རང་ཉིད་ཀྱི་མགྲོན་ཁང་གི་གླས་རིན་དང་། ཞབས་ཞུ་མའི་གླ་ཆ་སོགས་འདང་ངེས་ཡིན་པ་མ་ཟད། ད་དུང་། སྒོར་མོ་མི་ཉུང་བ་ཞིག་དངུལ་ཁང་དུ་ཡང་ཡོད་རབས་འདུག ༡༩།༩།༠༨

འདི་ལྟར་ཉི་མ་འདི་དག་གི་རིང་དུ། ཁོ་མོའི་ཉེ་འབྲེལ་དང་གྲོགས་དང་གྲོགས་མོ་སོགས་ལ་ཐུག་འཕྲད་བྱས་པ་དང་། མཚོ་འགྲམ་ཞིག་ནས་ཉི་མ་ཁ་ཤས་ཤིག་བསྐྱལ་བ་དངོས་ནས་སྐྱིད་པོ་བྱུང་། མཚོ་འགྲམ་ནི་ཧ་ཅང་གི་མཛེས་སྡུག་ལྡན་པ་ཞིག་དང་ཡིད་དུ་འོང་བ་ཞིག་རེད། དུས་ཚོད་འགྲོ་བ་ནི་ཧ་ཅང་མགྱོགས། མཚོ་འགྲམ་དེ་ནས་གུར་ཕུབ་བསྡད་པ་དང་ཟས་ནང་ནས་འཁུར་འོང་བ་དང་ལམ་འགྲམ་དུ་ཉོས་པ་སོགས་འདྲ་མིན་ཡོད། ཕྱིར་ཁོ་མོའི་མ་རྒན་གྱི་ནང་དུ་སླེབས་དུས་དངོས་ནས་ཐང་ཆད་འདུག ལས་མེད་དུ་ཐང་ཆད་འདུག ནང་དུ་སླེབས་མ་ཐག ཟས་ཐོའི་ཕྱོགས་ཀྱི་རེའུ་མིག་ཞིག་གློག་ཀླད་ནས་མགྱོགས་པོ་བཤུས་དེ་ཉལ་འདོད་ཀྱང་། མོ་རང་གིས་གྲོགས་པོ་ཞིག་ལ་ཁ་པར་ནང་ནས་ཁ་བརྡ་འདྲ་མིན་ཞིག་བྱས་ནས་ཆུ་ཚོད་གཅིག་ལྷག་ཕར་འགྲོ་ཚུར་འགྲོ་བྱེད་ཞོར་བར་མཚམས་རེར་དགད་མོ་དགོད་པ་སོགས་ཀྱིས་དུས་ཚོད་བསྐྱལ་སྐབས། ང་རང་ལ་བྱེད་རྒྱུ་གང་ཡང་མེད་པར་ཁོ་མོ་ལ་སྒུག་འདུག་རྒྱུ་ལས་གང་ཡང་མི་འདུག ༢༡།༩།༠༨

དེ་རིང་ནི་དམིགས་བསལ་གྱི་ཉིན་མོ་ཞིག་ཡིན། ང་རང་རྒྱལ་ཁབ་འདིར་སླེབས་ནས་ངས་བོད་ཟས་ཀྱི་འཛིན་གྲྭ་ཞིག་འགོ་འཛུགས་བྱས་པ་ཡིན། འཛིན་གྲྭ་དང་པོ་འདི་ནི་རིན་མེད་དུ་བསྡུ་བཞིན་ཡོད། དེ་ནི་མོ་རང་གི་གྲོགས་དང་གྲོགས་མོ་ཁ་ཤས་ཤིག་ལ་བསླབས་པ་ཡིན། ཁོང་ཚོ་ཚང་མ་དངོས་ནས་ཤ་མོག་མོག་ཞིམ་པོ་འདུག་ཞེས་བཤད་པ་དང་ང་རང་ལ་རོགས་རམ་བྱེད་ཕྱོགས་ཀྱི་ཁ་ཡག་ཡང་མང་བོ་ཞིག་བཤད་སོང་།

དངོས་ནས་ཁ་ཚ་དགོས་གཏུགས་ཀྱིས་རོགས་རམ་བྱེད་མཁན་དེ་ནི་མོ་རང་གི་ཕ་མ་རེད། མོ་རང་གི་ཕ་རྒན་གྱིས་ཟས་ཐོའི་བརྡ་ཁྱབ་དང་ཁ་བྱང་སོགས་ཀྱི་སྤྱིན་བདག་གནང་བ་མ་ཟད། ངེད་གཉིས་ལ་ནང་དུ་འཁུར་རོགས་ཟེར་ནས་ཤིང་ཏོག་དང་ཟས་རིགས་མི་ཉུང་བ་ཞིག་ཉོས་སོང་། ད་དུང་། ཉིན་གོང་གི་ཟ་མ་ཡང་ཟ་ཁང་སྐད་གྲགས་ཡོད་པ་ཞིག་དུ་ཁྲིད། ངའི་རེ་བ་ལ་སང་ཉིན་ནས་དངུལ་ཅུང་ཙམ་འཚོལ་ཐུབ་པའི་རེ་བ་བྱས། ང་རང་ལ་ཕྱི་ལོག་ནས་ལས་ཀ་བྱེད་ཆོག་པའི་ཆོག་མཆན་མེད་སྟབས། ནང་ནས་ལས་ཀ་ཞིག་འགོ་འཛུགས་བྱས་པ་ཡིན། དེ་རིང་ཁོ་མོའི་ཕ་རྒན་གྱིས་ངེད་གཉིས་ལ་བཏང་བའི་སྒོར་མོ་དེ་དག་ལ་ཕྱིར་འདང་ཞིག་བརྒྱབས་དུས། སྒྲོ་ལོར་ཉིས་བརྒྱ་ཞིག་བཏང་འདུག ད་དུང་། ང་ཚོ་ཁ་ཁར་དུས་སུ་ཁོ་རང་གིས་ང་རང་ལ་གཞུག་ཕྱོགས་གང་ཐུབ་ཅི་ཐུབ་ཀྱིས་རོགས་པ་བྱེད་ངེས་ཡིན་གསུངས།

སྐད་ཆ་དེ་དག་ནི་ང་རང་ལ་མཚོན་ན་དངོས་ནས་རྣ་ལ་སྙན་པ་དང་དངོས་ནས་འཁོ་བ་ཞིག་ཀྱང་ཆགས་ཡོད་ལ། ཁོང་གིས་ང་ལ་ཕྱི་རྒྱལ་ཁག་དུ་ཁ་པར་གཏོང་ཆོག་པའི་ཁ་པར་གཏོང་བྱེད་ཀྱི་ཤོག་བྱུང་ཞིག་ཀྱང་ཉོས་འདུག ཁ་པར་གཏོང་བྱེད་ཀྱི་ཤོག་བྱང་དེ་རྒྱུད་ནས་རང་ཉིད་ཀྱི་ཉེ་འབྲེལ་དང་རོགས་པ་ཚོ་ལ་འཚམ་འདྲི་བྱེད་ཐུབ་ངེས་སྙམ་ནས་དགའ་སོང་།  ༢༢།༩།༠༨

མུ་འགོད།