ཀང་ར་རྫོང་གྲོང་སྡེ་ལས་ཁུངས་ཀྱིས་བཞུགས་སྒར་ངྷ་རམ་ས་ལའི་སྲང་ལམ་རྒྱ་ཆེ་རུ་བཏང་སྟེ་ལམ་འགྲམ་དུ་གློག་སྡོང་འཛུགས་རྒྱུ་དང་། སྲང་ལམ་དུ་མོ་ཊའི་རིགས་གཅིག་ཀྱང་བཏང་མི་ཆོག་པར་བཟོ་རྒྱུའི་འཆར་གཞི་ཡོད་ཚུལ་བཤད་དེ་མེག་ལོར་སྲང་ལམ་གཡས་གཡོན་གྱི་བོད་མིའི་ཁྲོམ་ས་ཆ་ཚང་བསྡུ་རུ་བཅུག་འདུག
ཟླ་འདིའི་ཕྱི་ཚེས་ ༡༦ ཉིན་གྱི་ཞོགས་པར་ཧི་མ་ཅལ་མངའ་སྡེའི་ཁྱབ་ཁོངས་སུ་ཡོད་པའི་ཀང་ར་རྫོང་གྲོང་སྡེ་ལས་ཁུངས་ MUNICIPAL CONCIL ཀྱིས་ལས་བྱེད་མི་སྣ་དང་ཉེན་རྟོག་དམག་མི་བཅས་མི་སྣ་ ༡༥ ལྷག་དངོས་སུ་ཡོང་སྟེ། བཞུགས་སྒར་ངྷ་རམ་ས་ལའི་གཙུག་ལག་ཁང་དང་བྷག་སུ། རྗོ་གྷེ་བྷ་རྰ། ཁྲོམ་རྭའི་དཀྱིལ་ལམ་བཅས་ས་གནས་བཞི་ཡི་སྲང་ལམ་གཡས་གཡོན་དུ་བཀྲམས་ཡོད་པའི་བོད་པའི་ཁྲོམ་ས་ ༡༦༠ ལྷག་བསྡུ་རུ་བཅུག་ཡོད།
ཁྲོམ་སའི་སྐྱིད་སྡུག་ཚོགས་གཙོ་བློ་བཟང་བདེ་དབྱངས་ལགས་ཀྱིས་བཤད་པ་ལྟར་ན། གནས་སྟངས་འདི་ནི་འདས་པའི་མི་ལོ་ ༥༠ ལྷག་གི་རིང་བོད་མི་ཚོ་བཙན་བྱོལ་བ་ཚོར་འཕྲད་དང་འཕྲད་བཞིན་པ་ཡིན་ཞིང་། མཚམས་རེར་ས་གནས་དཔོན་རིགས་ཀྱི་འཕོ་འགྱུར་དང་མཚམས་རེར་གཞུང་གི་གནད་ཡོད་མི་སྣས་བཀོད་མངགས་སོགས་ལ་བརྟེན་ནས་འབྱུང་གི་ཡོད་སྟབས། ཁྲོམ་ས་ལ་བརྟེན་ནས་འཚོ་བ་རོལ་མཁན་གྱི་བོད་མི་ཚོར་མཚོན་ན་དུས་ནམ་ཡང་བག་ཕེབས་ཀྱི་ཚོང་ལས་གཉེར་བའི་དུས་ཤིག་མེད་པར། རྟག་ཏུ་དངངས་སྐྲག་དང་འཇིགས་སྣང་ཁྲོད་འཚོ་ཐབས་བཙལ་གྱིན་ཡོད་པ་དང་། ཁྲོམ་ས་བསྡུ་རུབ་ཀྱི་དཀའ་ངལ་དེ་ནི་བཙན་བྱོལ་བོད་མི་མང་པོ་ཞིག་གི་འཚོ་གནས་དང་འབྲེལ་བའི་དཀའ་ངལ་ཞིག་ཆགས་ཡོད་འདུག
ཁེ་ཉིན་གྱི་གནས་སྟངས་དེ་ནི། ཉེ་ཆར་ཀང་རྫོང་གི་རྫོང་དཔོན་གྱིས་ས་གནས་དཔོན་རིགས་ཐེངས་མང་བསྡུ་སྐོང་གིས། མ་འོངས་པར་ངྷ་རམ་ས་ལ་རྒྱ་གར་རྒྱལ་ཡོངས་ཀྱི་ཡུལ་སྐོར་བསྟི་གནས་སུ་བསྒྱུར་ཆེད་སྲང་ལམ་གཡས་གཡོན་གཙང་བཟོ་བྱས་ཏེ། མེག་ལོར་ཁྲོམ་དཀྱིལ་ནས་མོ་ཊའི་རིགས་གཅིག་ཀྱང་བཏང་མི་ཆོག་པར་བཟོ་རྒྱུའི་ལས་འཆར་ལ་བརྟེན་ནས་ལག་བསྟར་བྱས་པ་ཞིག་ཡིན་འདུག་ལ། དེའི་ཐད་བོད་མིའི་ཁྲོམ་སའི་སྐྱིད་སྡུག་གི་ངོས་ནས་ཐེངས་མང་པོར་གྲོང་སྡེ་ལས་ཁུངས་དང་འཛིན་སྐྱོང་བཀའ་ཤག བོད་མི་མང་སྤྱི་འཐུས་ལྷན་ཚོགས། བདེ་སྲུང་དང་ནང་སྲིད་ལས་ཁུངས་བཅས་ལ་སྙན་ཞུའི་ལམ་ནས་དཀའ་ངལ་སེལ་ཐབས་ཀྱི་རེ་སྐུལ་ཡང་ཡང་ཞུས་ཡོད་པར་མ་ཟད། ཁྲོམ་སའི་སྐྱིད་སྡུག་གི་མི་སྣ་དང་སྤྱི་འཐུས་རྒྱུན་ལསམཉམ་རུབ་ཐོག་སྲང་ལམ་གཙང་བཟོ་བྱས་རྗེས། བོད་མི་ཚོར་མུ་མཐུད་ལམ་འགྲམ་ནས་ཁྲོམ་ས་ཉར་ཆོག་པའི་རེ་སྐུལ་བྱས་མཐར། རྫོང་དཔོན་གྱི་ངོས་ནས་སྲང་ལམ་གསར་བཟོའི་ལས་འཆར་གྲུབ་རྗེས་བོད་པ་ཚོར་ཁྲོམ་རྭའི་ས་ཆ་ཞིག་སྤྲོད་རྒྱུ་ཡིན་པའི་སྐད་ཆ་བྱུང་འདུག་སྟབས། བོད་མི་ཚོའི་ངོས་ནས་གཟའ་ཟླ་བ་དང་མིག་དམར་གང་རུང་ལ་རྫོང་དཔོན་གྱི་གམ་དུ་བཅར་ཏེ་གནས་ཚུལ་གསལ་བོ་ཞིག་འདྲི་རྒྱུ་དང་། དེ་ཡང་གཙོ་བོ། རྫོང་དཔོན་གྱིས་སྔོན་མའི་སྐད་ཆ་ལྟར་བོད་མི་ཚོར་ཁྲོམ་ས་གསར་བ་གོ་སྒྲིག་བྱ་རྒྱུའི་རེ་བ་བྱེད་ཀྱིན་ཡོད་འདུག
ཐེངས་འདིའི་ཁྲོམ་སྟེགས་བསྡུ་རུབ་ཀྱི་སྐོར་ལ་ཁྲོམ་སྟོན་མཁན་བསྟན་པ་ཆོས་འཕེལ་ལགས་ཀྱིས་བརྗོད་དོན། ཁྲོམ་སྟེགས་བསྡུ་རུབ་བྱེད་བཞིན་པ་འདི་རྒྱུན་ལྡན་ལྟ་བུ་ཞིག་རེད། ང་ཚོར་འདིའི་ཐད་ལ་ལས་རྒྱུ་གང་ཡང་ཡོད་པ་མ་རེད། གང་ཡིན་ཞེ་ན། ས་འདི་རྒྱ་གར་གྱི་ས་ཡིན་སྟབས། ང་ཚོར་ས་ལག་མཐིལ་ཙམ་ལ་བདག་རྒྱག་པའི་དབང་ཆ་ཡོད་པ་མ་རེད། ཡིན་ནའང་། ད་ལྟ་སྲང་ལམ་དུ་ཁྲོམས་སྟེགས་ལ་བརྟེན་ནས་འཚོ་བ་རོལ་མཁན་མང་ཆེ་བ་བོད་ནས་གསར་དུ་འབྱོར་མཁན་དང་ཕྱིར་ལོག་ཐབས་མེད་པའི་རིགས་མང་པོ་ཞིག་ཡོད་པ་རེད། ང་ཚོ་ཚང་མ་ཁང་པ་དང་མ་རྩ་ཡོད་མཁན་མིན་པར་༸གོང་ས་མཆོག་སྐུ་འཚོ་བཞུགས་ཀྱི་རིང་འདིར་བཙན་བྱོལ་ནང་རང་གི་ཁྱིམ་ཚང་གི་ཟས་གོས་གནས་མལ་གྱི་དཀའ་ངལ་སེལ་ཐབས་བཙལ་གྱིན་ཡོད་སྟབས། མ་འོངས་པར་བོད་མིའི་སྒྲིག་འཛུགས་ཀྱི་ངོས་ནས་ཀྱང་རོགས་རམ་བྱ་རྒྱུ་གལ་ཆེན་པོ་རེད་ལ། རྒྱ་གར་གཞུང་གི་ངོས་ནས་ཀྱང་དགོངས་པ་བཞེས་རྒྱུ་གལ་ཆེན་པོ་རེད་བསམ་གྱི་འདུག ང་ལ་མཚོན་ན་ལོ་ ༡༢ ལྷག་གི་རིང་ནང་མི་ ༤ དང་ཕྲུ་གུའི་སློབ་ཡོན་སོགས་ཁྲོམས་སྟེགས་ལས་གཞན་ཡོངས་ཁུངས་ཅི་ཡང་མེད། ད་དུང་བོད་མི་མང་པོ་ཞིག་གིས་རང་ལ་མ་རྩ་མེད་པར་བུ་ལོན་བླངས་ཏེ་ཚོང་རྒྱག་གི་ཡོད་པ་རེད། ཅེས་བརྗོད་བྱུང་།
ཡང་ཚེ་རིང་སྒྲོལ་མ་ལགས་སུ་དྲིས་པར། ང་ལ་མཚོན་ན་ཁྲོམ་སྟེགས་བཟུང་སྟེ་ལོ་ ༡༥ ལྷག་འགྲོ་བཞིན་ཡོད། ད་ལྟའི་བར་སློབ་ཆེན་འགྲིམས་བཞིན་པའི་ཕྲུ་གུ་གསུམ་དང་གཞན་འཛིན་རིམ་བདུན་པ་འགྲིམས་བཞིན་པའི་ཕྲུ་གུ་གཅིག་བཅས་ཀྱིས་སློབ་ཡོན་གྱི་ཁ་སྣོན་དང་ང་རང་གི་འཚོ་རྟེན་ཆ་ཚང་འདི་ལ་བརྟེན་ཡོད། ཉེ་ཆར་ཁྲོམ་ས་རེ་རེའི་སྒོར་ ༣༠༠༠ ལྷག་བསྡུ་རུབ་བྱས་ཏེ་གྲོང་སྡེ་ལས་ཁུངས་ལ་རྩིས་སྤྲོད་བྱས་རྗེས་སེམས་བདེ་བོ་བྱུང་ཡང་། དེ་རིང་ཡང་བསྐྱར་ཁྲོམ་སྟེགས་བསྡུ་དགོས་བྱུང་བ་རེད། གལ་སྲིད། མ་འོངས་པར་ཁོང་ཚོའི་ཁྲོམ་སྟོན་མ་བཅུག་པ་ཡིན་ན་དཀའ་ངལ་ཀྱི་རེད། ད་ལྟའི་ཆར་ཕྲུ་གུའི་སློབ་ཡོན་སྤྲོད་ཆེད་གཞན་ལ་བུ་ལོན་ཡང་གཡར་ཡོད། ཅེས་བརྗོད་བྱུང་།
དགེ་འདུན་ལགས་ཀྱིས། ང་ལ་མཚོན་ན་ནང་མི་ཁྲོམ་སྟེགས་ལོ་ ༤ རིང་ང་ཚོ་ནང་མི་ ༤ ཡི་འཚོ་བ་འདི་ཁོ་ནར་བརྟེན་ཡོད། གལ་སྲིད། འདི་མཚམས་བཞག་པ་ཡིན་ན། ང་དང་ང་ལྟ་བུའི་ཤེས་འཇོན་མེད་པའི་མི་མང་པོ་ཞིག་ལ་དཀའ་ངལ་འཕྲད་རྒྱུ་ཡིན་པ་དངོས་ཡོད་རེད། ད་ལྟའི་ཆར་ང་ཚོས་བཀའ་ཤག་དང་སྤྱི་འཐུས། ནང་སྲིད། བདེ་སྲུང་ལས་ཁུངས་བཅས་ལ་སྙན་ཞུ་རིམ་པར་ཕུལ་ཡང་། སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན་གཉིས་དང་རྒྱུན་ལས་རྣམ་པས་རོགས་རམ་བྱས་པ་ལས། ནང་སྲིད་ལས་ཁུངས་ལྟ་བུར་མཚོན་ན་ཕག་ཉལ་ཉལ་རེད། མ་འཇོན་པའི་ཐད་ལ་མང་ཚོགས་ལ་འཁང་ར་མེད་ཀྱང་། འཕག་འཚག་མ་བརྒྱབ་པར་བསྡད་པ་ཡིན་ན་མང་ཚོགས་ལ་འཁང་ར་ཡོད་པ་རེད། དེའི་ཐད་ལ་གཞུང་གི་འབྲེལ་ཡོད་མི་སྣ་ཚོས་མི་མང་གི་བདེ་སྡུག་ལ་སེམས་འཁུར་བྱ་རྒྱུ་གལ་ཆེན་པོོ་རེད། ཅེས་བརྗོད་བྱུང་།
༤༽བསོད་ནམས་དབྱངས་ཅན་ལགས་ཀྱིས། ཁོང་ཚོས་གང་འདྲ་བྱས་ཀྱང་ང་ཚོར་བཤད་ས་གཅིག་ཀྱང་ཡོད་མ་རེད། གང་ཡིན་ཞེ་ན། འདི་ཁོ་རང་ཚོའི་རྒྱལ་ཁབ་དང་ས་ཆ་རེད། ད་ལྟའི་བར་ཁོང་ཚོས་མི་འགྲོ་སའི་གཞུང་ལམ་གུ་དོག་པོར་བཟོས་ཡོད་ཚུལ་བཤད་དེ་ནམ་རྒྱུན་ཁྲོམ་ས་བསྡུ་གསོག་བྱེད་ཀྱིན་ཡོད་པ་དེ་ང་ཚོའི་ལས་རེད། ང་རང་ལ་མཚོན་ན་འདས་པའི་ལོ་ ༣༠ རིང་ཁྲོམ་སྟེགས་ལ་བརྟེན་ནས་ང་དང་ངའི་སྤུན་གྱི་ཕྲུ་གུ་གསུམ་དང་ང་ཚོ་ཚང་མས་འཚོ་རྟེན་བཙལ་ཏེ་རང་ཁ་རང་གསོ་བྱེད་ཀྱིན་ཡོད། ད་དུང་ང་དང་ང་ལྟ་བུ་མང་པོ་ཞིག་གི་འདི་ལ་བརྟེན་ཡོད་པ་རེད། གལ་ཆེ་ཤོས་འབྲེལ་ཡོད་ཚང་མས་དོ་སྣང་དང་རོགས་སྐྱོར་བྱས་ཏེ་བོད་པ་རང་ལ་ཁྲོམ་ས་ཞིག་རེག་ཐུབ་ན་དཀའ་ངལ་མང་པོ་ཞིག་སེལ་ཐུབ་ཀྱི་རེད་བསམ་གྱི་ཡོད། ཅེས་བརྗོད་བྱུང་།
བོད་གཞུང་ནང་སྲིད་ལས་ཀྱི་དྲུང་ཆེ་དངོས་གྲུབ་རྡོ་རྗེ་ལགས་སུ་གཞུང་ངོས་ནས་ད་ལྟའི་བར་མཐུན་འགྱུར་རོགས་རོམ་གང་འདྲ་ཞིག་གནང་ཡོད་མེད་དང་མ་འོངས་པར་གང་འདྲ་བྱ་འཆར་ཡོད་སྐོར་དྲིས་པར། ཁོང་གིས། གཞུང་ངོས་ནས་བཞུགས་སྒར་བདེ་དོན་ལས་ཁུངས་བརྒྱུད་དེ་གཞུང་གི་མཐུན་འགྱུར་གནང་ཐུབ་པའི་ཚད་གཞི་ལྟར་དཀའ་ངལ་སེལ་ཐབས་བྱས་པ་རེད་ལ། མ་འོངས་པར་ཡང་གཞུང་གི་རྒྱབ་གཉེར་དང་མཐུན་འགྱུར་གང་ཐུབ་གནང་གི་རེད། གཙོ་བོ། དོ་བདག་སོ་སོའི་ངོས་ནས་ནམ་ཁྲོམ་སྟོན་སྐབས་སྐད་ཆ་བཤད་སྟངས་དང་རང་ཉིད་ཀྱི་བྱ་སྤྱོད་ལ་གཟབ་ནན་བྱ་རྒྱུ་གལ་ཆེན་ཆགས་འདུག འདས་པའི་དུས་སུ་ས་ཆ་སྤྲོད་རྒྱུའི་བཀའ་མོལ་བྱུང་ཡང་བོད་མི་ཚོས་ཁས་ལེན་བྱས་མེད་པའི་བཤད་ཚུལ་ཡོད་པ་རེད། གལ་སྲིད། མ་འོངས་པར་རྒྱ་གར་གཞུང་གིས་ཁྲོམ་ས་ཞིག་སྤྲད་པ་ཡིན་ན། ས་ཆའི་ལེགས་ཉེས་ལ་མ་ལྟོས་པར་ཚུར་བླངས་ཏེ་རང་ནུས་ཀྱི་ཚོང་གི་ཁོར་ཡུག་བསྐྲུན་རྒྱུ་གལ་ཆེན་རེད། ཅེས་གསུངས་བྱུང་།
ནམ་རྒྱུན་བཞུགས་སྒར་ཁུལ་ཏུ་ཚོང་ལས་ཙག་ཙིག་ལ་བརྟེན་ནས་འཚོ་བ་རོལ་མཁན་མང་ཆེ་བ་བོད་ནས་གསར་དུ་འབྱོར་མཁན་གྱི་རིགས་ཡིན་པ་དང་། ད་ལྟའི་བར་བོད་མི་དེ་དག་གིས་མ་རྩ་ཧ་ཅང་ཆུང་བའི་ཅ་དངོས་རིགས་འདྲ་མིན་ལམ་གྱི་གཡས་གཡོན་དུ་བཤམས་ཏེ་བཙོང་བ་དང་མཉམ་དུ། རྒྱ་གར་གཞུང་ལ་ཉིན་རེར་ཧིན་སྒོར་ ༡༠ ཡི་དཔྱ་ཁྲལ་འབུལ་གྱིན་ཡོད་པར་མ་ཟད། སྐབས་རེར་གློ་བུར་དུ་རྒྱ་གར་གྲོང་སྡེ་ལས་ཁུངས་ཀྱིས་ཅ་དངོས་འཕྲོག་པ་ཡིན་ན། ཧིན་སྒོར་ ༡༥༠༠ ནས་ ༡༨༠༠ ལྷག་སྤྲད་དེ་ཕྱིར་ལེན་ཐབས་བྱེད་ཀྱིན་ཡོད་འདུག་ལ། དངུལ་མ་སྤྲད་ཚེ་འཕྲོག་ཟིན་པའི་ཅ་དངོས་ཚང་མ་གད་སྙིགས་ནང་གཡུག་གྱིན་པ་སོགས་བོད་མི་ཚོར་དཀའ་ངལ་རབ་དང་རིམ་པ་འཕྲད་ཀྱིན་ཡོད་འདུག
གསར་འགོད་པ། དོན་གོ
བཙན་བྱོལ་སྒྲིག་འཛུགས་གིས་ནམ་ཡང་ཡང་ང་བའི་བོད་མི་ཚོས་བདེ་སྡུག་མཁྱེན་གྱི་མ་རེད་ལ་རེ་བ་མ་བྱས་ན་ཡག་ཤོས་རེད། ཁོ་ཚོས་གཞན་ཕཪ་བཞོག་ཐ་ན་རྒྱབ་གཉེར་ཆུང་ཆུང་ཞིག་ལའང་སྒོར་བཅུ་སྤྲོད་དགོས་པའི་སྒང་ལ་གཤེད་གཤེད་ཚ་བ་རྙོག་དྲྭ་ཚ་བ་དངོས་གནས་ངའི་མི་ཚེའི་ནང་ལ་ཆེས་བློ་ཕམ་ཤོས་དེ་རང་གི་མི་རིགས་གཅིག་པ། བདེན་དོན་རྩོད་མཁན་གཅིག་པ། སྐྱིད་སྡུག་གཅིག་གི་ཐོག་མཉམ་རོལ་བྱེད་ཀྱིན་པའི་སྲིད་ཞུ་ཚོས་ཉམ་ཆུང་མི་མང་རྣམས་ལ་ཐུབ་ཚོད་གཏོང་སྟངས་དེ་ཡིན།
ད་ཉམ་ཆུང་གི་ཚོང་པ་ཉི་ཚེ་བ་འདི་དག་ཁྲིམས་ཐོག་ནས་བསྲུང་རན་པ་རེད། རྒྱ་གར་ཆེས་མཐོའི་ཁྲིམས་ཁང་ནས་འཛིན་སྐྱོང་གི་ལས་དོན་ལ་ཁ་གཡར་ནས་ལམ་ཟུར་དུ་ཁྲོམ་འདོན་མཁན་གྱི་ཚོང་པ་ཉི་ཚེ་བ་ཚོའི་ཁེ་དབང་འཕྲོག་མི་ཆོག་པའི་ཁྲིམས་སུ་བཅས་པ་དེའི་ནུས་པ་བེད་སྤྱོད་བྱ་བའི་དུས་ལ་བསླེབས་པ་རེད། བདེ་སྲུང་གཙོ་བོར་བྱས་པའི་གཞུང་དང་གཞུང་འབྲེལ་མ་ཡིན་པའི་ཚོགས་པ། ལྷག་པར་དུ་བོད་པ་ཁྲིམས་ཐོག་ལ་ཆེད་ལས་བྱེད་མཁན་དག་གིས་ཁོང་ཚོའི་ཁེ་དབང་སྲུང་སྐྱོབ་བྱེད་པར་ཕྱག་ལས་གནང་རན་པ་རེད།
ནུབ་ཕྱོགས་རྒྱལ་ཁབ་དག་དུ་ཡོད་པའི་བོད་མི་དག་གིས་དངུལ་བསྡུས་ཏེ་བོད་མི་ཉམས་ཐག་དག་ལ་རོགས་རམ་བྱེད་དགོས་ཀྱི་འདུག
བློ་བཟང་སངྒེས་འཆར་གཞི་དེ་ལྟར་ཡིན་ཟེར་བ་དེ་དོན་ལ་ཁེལ་ཐུབ་པའི་རེ་བ་ཡོད།
བོད་གཞུང་གི་ཐབས་ལམ་གང་འདྲ་ཞིག་གི་སྒོ་ནས་ཡིན་ན་ཁོང་ཚོ་ལ་ངེས་པར་རོགས་པ་ཞིག་བྱེད་རྒྱུ་གལ་ཆེན་རེད། ཉེར་སྔོན་དཔལ་ལྡན་རྒྱལ་གྱི་ཁོང་ཚོ་ལ་དྲི་བ་གང་འདྲ་བཏང་འདུག་འཚོ་བ་ལ་ཐུགས་ཡོད་ཚུལ་བརྗོད་པ་ལ་གཟིགས་དང་ངོ་མ་འདི་ཚོ་ལ་རོགས་པ་ཞིག་བྱེད་གལ་ཆེན་རེད། བོད་ཀྱི་མིང་ཐོག་ནས་ཁྲོམས་ས་ཞིག་བཙལ་དགོས་ན་གང་ལྟར་བོད་ཀྱི་ཁོང་ཚོ་བདག་པོ་རྒྱག་རྒྱུ་གལ་ཆེན་རེད།
མི་དཀྱུས་མའི་འཚོ་བའི་སྐོར་གྱི་དཀའ་ངལ་གནས་ཚུལ་འདི་འདྲ་སྤེལ་པ་ཡག་པོ་འདུགཐུགས་རྗེ་ཆེ་ཞུས་པ་ཡིན།མ་མཐུད་དུ་རྒྱ་ཆེར་མང་ཚོགས་ལ་ཕན་པའི་གསར་འགོད་རྒྱུན་སྐྱོང་གནང་པར་རྗེས་སུ་ཡི་རངས་ཕུལ་པ་ལགས
ཨོ་་་ད་རྒྱ་གར་གྱིས་ཀྱང་བོད་པ་ཚོ་ག་ལེས་ག་ལེས་ཕྱིར་འབུལ་གཏང་ངས་རེད་
གསར་འགོད་པ་དོན་གོ་ལགས། གནས་ཚུལ་འདིར་རྒྱུས་ལོན་ཆེད་དཀའ་ལས་མང་པོ་བརྒྱབ་འདུག འདི་ཆེ་ས་ནས་བོད་བསྟན་པ་ཆབ་སྲིད་ཀྱི་དོན་དང་། ཆུང་ས་ནས་ངེད་ཀློག་པོ་པོ་དག་གི་ཆེད་དུ་ཡིན་པ་ཤེས་ཀྱི་ཡོད། ཐུགས་རྗེ་ཆེ།