གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། རེ་བཞི།

གཞན་ཡུལ་ནས་ལོ་ཟླ་ནི་འདོད་མིན་ལ་མ་བལྟས་པར། ལས་ཀའི་བྲེལ་བ་དང་དུས་ཚོད་ཀྱི་འདེད་ཤུགས་བཅས་ཀྱི་ཁྲོད་ནས་ཉི་མ་ཤར་ནུབ་ཀྱི་གྲངས་ཀ་བརྩིས་དེ་འགྲོ་བཞིན་ཡོད་པའི་ང་དང་རིགས་མཐུན་གྱི་སྤུན་ཟླ་སུ་ཡིན་ཡང་། ང་དང་འདྲ་བར་རང་གི་ཕ་ཡུལ་དང་ཕ་སྐད། ཕུ་ནུ་མིང་སྲིང་དག་དུས་རྒྱུན་དྲན་ཞོར་དུ། ཕྱི་རོལ་མི་ཡུལ་གྲོང་ན་འདུར་བཞིན་ཡོད་ངེས་རེད། ངས་ཀྱང་འདུར་སྟངས་ཤིག་གི་སྔ་གཞུག་འདི་ནས་ད་ནི་ལས་ཀ་ཡང་མགྲོན་ཁང་ཆེན་པོ་འདིའི་ནང་ནས་གཏན་འཇག་བཟོས་པའི་ས་རྟགས་བརྒྱབས་དེ་ཉིན་མ་མང་བོ་ཞིག་སོང་ཟིན་པ་མ་ཟད། ང་རང་ནི་ཐབ་ཚང་ནང་གི་མ་བྱན་ཆེན་མོ་ཆགས་ཡོད། གླ་ཆ་ཡང་ཤིས་ཀར་བདུན་སྟོང་ཙམ་ཐོབ་ཀྱི་ཡོད།

ལས་དབང་གིས་གནང་བའི་མཛའ་མོའི་གྲོད་པའི་ནང་གི་བྱིས་པ་དེ་ཡང་། བུ་དང་བུ་མོ་གང་ཡིན་མཇུག་འབྲས་ཀྱང་གོ  མཛའ་མོའི་གྲོད་ཁོག་དུ་བྱིས་པ་འཁོར་ནས་ཟླ་ངོ་དྲུག་བདུན་ཞིག་འགྲོ་བཞིན་ཡོད་དུས། སྤྲུམ་མ་ཞིག་ལ་ལས་ཀ་གཏན་འཇག་རེག་པར་དཀའ་ངལ་ཡོད་པ་དང་ཕྱོགས་ངོས་གཞན་ནས་ངས་ཀྱང་མོ་རང་གི་ལས་ཀ་མ་བྱས་ན་འགྲིག་པར་ཡང་ཡང་བཤད་པ་ལྟར། མོས་ཀྱང་ནང་དུ་བསྡད་པ་དང་མཚམས་རེར་རླངས་འཁོར་རྙིང་ཀོག་དེ་བཏང་ནས་མཚོ་འགྲམ་དུ་སོང་ནས་ངོ་ཤེས་ཕོ་མོ་ཚོའི་མཉམ་དུ་ཉི་མ་གཏོང་བཞིན་ཡོད།

ང་ནི་ཞོགས་པ་སྔ་བོ་ལས་ཀ་འགྲོ་མི་དགོས་ཀྱང་། ཉིན་གོང་ཆུ་ཚོད་གསུམ་པ་ནས་སོང་ནས་ཟ་མ་གང་གྲྭ་སྒྲིག་བྱེད་དགོས་པ་དེ་དག་ལྷོད་ལྷོད་ཀྱིས་གྲྭ་སྒྲིག་བཟོས་ན་འགྲིག་གི་ཡོད། ཟ་ཁང་འདི་ནི་མགྲོན་ཁང་ནང་དུ་ཡོད་ལ། མགྲོན་པོ་མང་ཤོས་ཤིག་མགྲོན་ཁང་དུ་བསྡོད་མཁན་མ་ཡིན་པར། ཕྱི་ནས་ཆེད་དུ་ཐེ་ལན་གྲའི་ཟ་མ་ཟ་རུ་ཡོང་མཁན་ཡིན། ཟ་ཁང་སྒོ་ཕྱེ་བའི་དུས་ཚོད་ཏག་ཏག་ཆུ་ཚོད་བདུན་པ་ནས་མཚན་མོའི་ཆུ་ཚོད་བཅུ་གཅིག་བར་དུ་ཡིན། བཅུ་གཅིག་ཏག་ཏན་ལ་སྒོ་རྒྱག་གི་ཡོད། རང་ཉིད་ཀྱིས་ཀྱང་དུས་ཚོད་ལྟར་ཐག་བཅད་ནས་སྒོ་བརྒྱབས་ན་འགྲིག་གི་ཡོད། ཐབ་ཚང་ནང་གི་རང་གི་དཔོན་པོ་རང་ཡིན་ལ། མ་གཡོག་ཐེ་ལན་གྲའི་བུད་མེད་གཅིག སྡེར་མ་དང་སྣོད་སོགས་གཙང་དཀྲུ་བྱེད་མཁན་གྱི་མྱི་རིགས་ནག་པོ་གཅིག ཟ་ཁང་ནང་གི་ཞབས་ཞུ་མ། ཨེས་སུ་རལ་གྱི་བུད་མེད་ལོ་ཆུང་སྙིང་རྗེ་མོ་གསུམ། ད་དུང་། ཐེ་ལན་གྲའི་བུད་མེད་གཟུགས་པོ་ཆུང་ཆུང་སྙིང་རྗེ་མོ་ཞིག་བཅས་ཡིན། ཁོང་ཚོས་ཚང་མས་ང་རང་ལ་མ་བྱན་ཆེན་མོ་ཟེར་ནས་འབོད་ཀྱི་ཡོད།

ཐབ་ཚང་ནང་གི་ཆ་རྐྱེན་ནི་དངོས་ནས་ཧ་ལས་པའི་ཡག་པོ་ཡོད་ཀི  ཟ་འཐུང་གང་དགོས་རང་གི་འདོད་པ་ཡིན། འཐུང་ཆུ་ཡང་གཙང་ཆབ་འགྱིག་དམ་ནང་གི་ཆུ་རྐྱང་རྐྱང་འཐུང་གི་ཡོད་ལ། མངར་ཆུའི་རིགས་གཞན་དག་གང་དགོས་པ་དག་ཐོབ་ཀྱི་ཡོད། ང་ཚོ་ནི་མགྲོན་ཁང་འདིའི་ནང་གི་ལས་ཀ་བ་རང་དབང་ཆེ་ཤོས་ཀྱི་གྲངས་ཤིག་ཆགས་ནས་ཡོད། རྒྱབ་ན་དུས་རྒྱུན་དུ་འདེད་ཤུགས་གཏོང་མཁན་གྱི་འགན་འཛིན་དེ་འདྲ་གང་ཡང་མེད། མགྲོན་ཁང་ཆེན་མོ་འདི་ལ་འགན་འཛིན་ཆེན་མོ་བཞི་ལྔ་ཞིག་ཡོད་པའི་ནང་ནས། ང་ཚོའི་འགན་འཛིན་དེ་ནི་དགའ་མིན་དགའ་སྡུག་ཧ་ཅང་ཆེ་བའི་མི་ཞིག་ཡིན་ན་ཡང་། དུས་རྒྱུན་ཐབ་ཚང་དང་ཟ་ཁང་དུ་ཡོང་ནས་བསྡོད་ཀྱི་མེད་པར། འཚིག་ཇ་འཐུང་ས་ཞིག་ཡོད་པ་དེ་ནས་བསྡོད་ཀྱི་ཡོད་པ་དང་དེ་ཁུལ་གྱི་ལས་མི་དག་ལ་བཀོད་པ་བྱས་ནས་བསྡད་ཡོད།

ཉི་མ་རེ་རེ་བཞིན་གོན་པ་ཡང་གཙང་མ་བརྗེ་བོ་རྒྱགས་ཀྱི་ཡོད་ལ། ལས་ཀ་ཚར་བ་དང་གོན་པ་གཙང་དཀྲུ་ཁང་དུ་བཞག དེ་ནས་རང་གི་ཨང་གྲངས་༧༡༢༣གློག་གི་ཐོ་འགོད་བྱེད་སའི་ནང་དུ་བཅུགས། རྗེས་སུ་རང་གི་ལག་པ་གཡས་པ་གློག་གི་ཕབ་བཤུ་བྱེད་སའི་སྟེང་དུ་བཞག་ན་ད་གཟོད། ཉིན་གཅིག་གི་དུས་ཚོད་ཚང་མ་རང་གི་མིང་ཐོག་དུ་ཐོན་གྱི་ཡོད་པ་རེད་འདུག ལས་ཀ་བྱེད་ས་ནས་རང་ཉིད་གང་དུ་བསྡོད་པ་དེ་ཡི་བར་དུ་སྤྱི་སྤྱོད་རླངས་འཁོར་ཡོད་ལ། དུས་ཚོད་གཅིག་རེ་ཡི་ནང་དུ་ཐེངས་རེ་འགྲོ་འོང་བྱེད་ཀྱི་འདུག ང་རང་གི་ལས་ཀ་བྱེད་སའི་ཁོར་ཡུག་དེ་ཡི་ཡར་མར་གྱི་མགྲོན་ཁང་བརྫིག་པོ་དག་གི་ལས་མི་དག་གི་ཆེད་དུ་ཡིན་པ་ལས། སྐུ་མགྲོན་གཞན་ནང་དུ་མི་འཇོག  སྤྱི་སྤྱོད་རླངས་འཁོར་དེ་ཡི་ནང་དུ་འཛུལ་བ་ལ་མགྲོན་ཁང་ནས་རང་ཉིད་ལ་སྤྲད་པའི་འཛིན་བྱང་ཞིག་ཡོད། འཛིན་བྱང་དེ་ཡི་སྟེང་དུ་ཟླ་ཚེས་ཕབ་འདུག

ང་རང་གི་ལས་ཀ་ནི་གཏན་འཇག་ཆགས་པ་དང་མཛའ་མོ་ངེད་གཉིས་ཀྱི་ཁང་བ་ཞིག་ཀྱང་གླས། ཁང་གླ་དང་གློག་རིན་ཚང་མ་སྡོམ་ན། ཟླ་གཅིག་གི་རིང་དུ་ཤིས་དཀར་སུམ་སྟོང་ཙམ་གྱི་འགྲོ་སོང་འདུག ངས་གཟའ་མཇུག་མ་གཏོགས་ནང་དུ་ཟ་མ་ཟ་དགོས་ཀྱི་མེད། ཟ་ཁང་ནས་ཟོས་ནས་འོང་གི་ཡོད། ཟས་སོང་གི་འགྲོ་སོང་ཞིག་ཡོད་པ་དེ་ནི་ཁོ་མོ་གཅིག་བུ་ཡིན་ཟེར་ན་ཆོག་པ་ལྟ་བུ་ཡིན། ཟ་ཁང་ནས་ང་རང་ལ་མགྲོན་པོ་དག་གི་ཟུར་དངུལ་ལག་སྐྱེས་སུ་སྤྲོད་པ་དེ་ཡི་ནང་ནས་ང་རང་ལ་ཡང་ཞབས་ཞུ་མ་དག་གིས་ང་རང་ལ་ཡང་སྤྲོད་དགོས་པར་འགན་འཛིན་ལྷན་ཚོགས་ཀྱིས་བཤད་པ་ལྟར། སྤྲད་དེ་འོང་དུས། ང་རང་གི་ཐ་མག་ཡག་ཤོས་ཤིག་འཐེན་པའི་འགྲོ་སོང་གི་མི་ཚད་པ་ཞིག་དེ་ནས་ཡོང་གི་ཡོད། གང་ལྟར། ཟླ་ངོ་གཅིག་ཚར་བ་དང་ང་རང་གི་གླ་ཆ་ཡི། ངེད་གཉིས་སྐབས་རེར་གནམ་གྲྭའི་ནང་དུ་བསྡད་ནས་མོ་རང་གི་མ་རྒན་དང་ཉེ་འབྲེལ་དག་ལ་ཐུག་འཕྲད་བྱེད་དུ་འགྲོ་བ་སོགས་བྱེད་ཀྱི་ཡོད་དུས། ངེད་གཉིས་ཀྱི་འགྲོ་སོང་ནི་ཟླ་ངོ་གཅིག་ལ་ཤིས་ཀར་བདུན་སྟོང་འགྲོ་བཞིན་འདུག

ངས་ཟླ་ངོ་རེ་རེ་བཞིན་ཚར་ནས་འོང་དུས། ངེད་གཉིས་ཀྱི་སྒོར་མོ་ཅི་ཡང་གསོག་ཐུབ་ཀྱི་མེད་པ་གསལ་བོ་ཤེས་སོང་། ཁོ་མོས་ཀྱང་ང་རང་གི་གླ་ཆ་སྤར་བར་བཤད་དགོས་པར་ཡང་ཡང་བཤད། ངས་ཀྱང་རང་ཉིད་ནི་ལས་ཀ་བྱས་ནས་ཟླ་ངོ་ཁ་ཤས་ལས་འགྲོ་བཞིན་མེད་དུས། བཤད་ན་བདེ་བོ་མེད་རབས་བཤད་ནས་རེ་ཞིག་རིང་ངས་རང་གི་གླ་ཆ་སྤར་བའི་སྐོར་གྱི་སྐད་ཆ་གང་ཡང་མ་བཤད་པར་བཞག་པ་ཡིན། ཁོང་ཚོས་དེང་ཐོག་ང་རང་ལ་ལས་རོགས་མ་བྱན་གཞན་ཞིག་ཐེ་ལན་གྲི་ནས་ཁྲིད་ཡོང་གི་ཡོད་ཟེར་ནས་བཤད་ན་ཡང་། ཐེ་ལན་གྲིའི་མ་བྱན་ར་བས་ལགས་སོང་ནས་ཟླ་ངོ་ལྔ་དྲུག་ཞིག་སོང་ཟིན་མོད། ད་དུང་། ཐབ་ཚང་ནང་གི་མ་བྱན་ཆེན་མོ་ནི་ང་རང་ལས་གཞན་མེད་པར། ཁོང་ཚོས་ང་རང་གི་ལག་པར་ཟ་ཁང་གི་ལྡེ་མིག་དང་འཁྱག་སྒམ་ཆེན་པོ་དེ་ཡི་ནང་གི་སྔོ་ཚལ་དང་ཤིང་ཏོག་རིགས་གང་འཁོ་བ་ཡོད་ཚད་ངས་རེའུ་མིག་ཡོད་པ་དེ་ཡི་ནང་དུ་རྟགས་བརྒྱབས་དེ་སྤྲོད་དགོས་ཀྱི་ཡོད། ངས་ཁོང་ཚོའི་ཡི་གེ་མི་ཤེས་དུས། ཤོག་བུ་དེ་ནང་དུ་འཁུར་ཡོང་ནས་མཛའ་མོ་ལ་དབྱིན་ཡིག་ལ་སྒྱུར་དུ་བཅུགས། དབྱིན་ཡིག་ནས་བོད་ཡིག་ལ་སྒྱུར། ད་གཟོད་ཤོག་བུ་གཅིག་གི་སྒང་དུ་ཁོ་མོ་ཁོང་ཚོའི་ཡི་གེ་འབྲི་རུ་བཅུགས་པ་དེ་ཡི་འགྲམ་དུ། ངས་བོད་ཡིག་གི་མིང་བྲིས། ཤོག་བུ་དེ་དག་ཚར་གྲབས་ཡོད་དུས་སུ་ལས་ཁུངས་ཨ་མར་སོང་ནས་སུམ་བཅུ་བཞི་བཅུ་དཔར་ལོག་བརྒྱབས་དེ་འཇོག་གི་ཡོད།

འདི་ལྟར་ཨེས་ལ་གྲི་ཡི་འཚོ་བ་བསྐྱེལ་བཞིན་ཡོད། གཟའ་མཇུག་མང་ཤོས་སུ་མཚོ་འགྲམ་དུ་སོང་ནས་ཆུ་རྐྱལ་བྱེད་པ་དང་མཛའ་མོའི་གྲོགས་དང་གྲོགས་མོ་དག་ལ་ཐུག་འཕྲད་བྱེད་པ། སྐབས་རེར་མོ་རང་གི་གྲོགས་མོ་ཡག་ཤོས་ཝན་ཚང་གི་ནང་དུ་གཟའ་པ་སངས་ཀྱི་དགོང་ཟས་ཟ་རུ་འགྲོ་བཞིན་ཡོད། ཉི་མ་རེ་རེ་བཞིན་འདས་ནས་སོང་། ཟླ་བ་རེ་རེ་བཞིན་ཆས་དེ་སོང་། མཛའ་མོའི་གྲོད་ཁོག་ཡང་ཆེ་རུ་འགྲོ་བཞིན་ཡོད། གྲོད་ཁོག་ནང་གི་བུ་མོ་ཆུང་ཆུང་དེས་ཀྱང་། འཇིག་རྟེན་འདི་ལ་ཡོང་བར་གྲྭ་སྒྲིག་བྱེད་ཀྱིན་པའི་སྒང་རེད། མཚམས་རེར་གྲོད་ཁོག་ནས་འཕག་འཚག་བྱེད་ཀྱིན་པའི་སྐབས་སུ་མཛའ་མོས་ངའི་ལག་འགོ་ནས་འཐེན་གྱིན་ཁོ་མོའི་གྲོད་ཁོག་སྟེང་དུ་བཞག་ནས་བལྟ་རུ་འཇུག

མུ་འགོད།