ཟླ་འདིའི་ཕྱི་ཚེས་ ༤ ཉིན་ཨ་རིའི་གསང་བའི་ཉེན་རྟོག་པས་རྒྱ་རིགས་བུད་མེད་ཅིག་གིས་ཨ་རིར་གནས་སྡོད་བྱེད་བཞིན་པའི་ཐའེ་ཝན་གྱི་སྲིད་འཛིན་ལེ་ཆིན་ཏི་ཡི་བུ་དང་བུའི་ནང་མི་རྣམས་ལ་གསང་ཉུལ་བྱས་པའི་དོགས་གཞིའི་འོག་ནས་འཛིན་བཟུང་བྱས་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཕྱི་ཚེས་ ༤ ཉིན་རྒྱ་རིགས་བུད་མེད་ཝན་ཡེན་ཀྲང་ཟེར་བ་ལོ་སི་ཨན་ཇིལ་སི་རྒྱལ་སྤྱིའི་གནམ་ཐང་ནས་ཕྱིར་རྒྱ་ནག་ཏུ་ལོག་རྩིས་བྱེད་སྐབས། ཨ་རིའི་གསང་བའི་ཉེན་རྟོག་པས་འཛིན་བཟུང་བྱས་ཡོད་ཅིང་། ཨ་རིའི་ཁྲིམས་འཛིན་ལས་ཁུངས་ཀྱིས། ཝན་ཡེན་ཀྲང་གིས་ཐའེ་ཝན་གྱི་མགོ་ཁྲིད་མི་སྣའི་ནང་མི་བུ་ཕྲུག་དང་སྤུན་མཆེད། ཁོ་ཚོའི་སྡོད་གནས་དང་ཁང་པ། རླངས་འཁོར་གྱི་རྟགས་སོགས་ལ་གསང་ཉུལ་བྱས་ཏེ། རྒྱ་ནག་ལ་གནས་ཚུལ་མཁོ་སྤྲོད་བྱེད་བཞིན་ཡོད་པས། རྒྱ་ནག་གིས་གནས་ཚུལ་དེ་དག་བེད་སྤྱད་ནས་མ་འོངས་པར་གནད་འགག་ཆེ་བའི་འཐབ་འཁྲུག་གང་རུང་གི་སྐབས་སུ་ཐའེ་ཝན་སྲིད་འཛིན་ལ་ཚོད་འཛིན་བྱེད་སྲིད་པ་རེད་ཅེས་བརྗོད་འདུག
ཨ་རིའི་གསང་བའི་ཉེན་རྟོག་ལས་ཁུངས་ཀྱི་གནས་ཚུལ་ལྟར་ན། རྒྱ་རིགས་བུད་མེད་ཝན་ཡེན་ཀྲང་ཟེར་བས་རོགས་པ་ཞིག་ཁྲིད་ནས་ཕྱི་ལོ་ ༢༠༢༥ ལོར་རྒྱ་ནག་གི་བཀོད་འདོམས་འོག་ཨ་རིའི་གྲོང་ཁྱེར་སེ་ཡ་ཊལ་དུ་བསྐྱོད་དེ། ཐའེ་ཝན་སྲིད་འཛིན་གྱི་བུ་ལེ་ཏིན་ཡོ་ (Lai Ting-yu)དང་ནང་མི། ཁོ་ཚོའི་ཁང་པ་དང་རླངས་འཁོར་ཨང་རྟགས་སོགས་པར་དང་བརྙན་དུ་བླངས་ནས་རྒྱ་ནག་ལ་བསྐུར་ཡོད་འདུག
ཐའེ་ཝན་སྲིད་འཛིན་ལས་ཁུངས་ཀྱིས། ཧ་ཅང་ཐལ་ཆ་ཆེ་བའི་བྱ་སྤྱོད་དེས་འགྲོ་བ་མིའི་ཐོབ་ཐང་དང་རྒྱལ་ཁབ་གཞན་གྱི་མངའ་ཁོངས་བདག་དབང་ལ་ཁྱད་གསོད་བྱས་ཡོད་པས། ཐའེ་ཝན་རྒྱལ་ཁབ་ཀྱིས་བྱ་སྤྱོད་དེར་སྐྱོན་བརྗོད་དྲག་པོ་བྱེད་བཞིན་ཡོད། ཅེས་བརྗོད་འདུག་པ་མ་ཟད། དེ་ནི་རྒྱལ་མཚམས་ལས་བརྒལ་བའི་དྲག་གནོན་བྱ་སྤྱོད་ཅིག་ཡིན་པས། ཨ་རིའི་གཞུང་གིས་ཐའེ་ཝན་གྱི་མི་མང་སྲུང་སྐྱོབ་བྱས་པར་བཀའ་དྲིན་ཆེ་ཞུ་རྒྱུ་ཡིན་ཞེས་བརྗོད་འདུག
ཕྱི་ཟླ་ ༩ ཚེས་ ༢༤ ནས་ ༢༦ བར་ཨ་རྒྱ་གཉིས་ཀྱི་མགོ་ཁྲིད་ཐུག་འཕྲད་བྱས་ཏེ་ཡུན་རིང་འགོར་མེད་པའི་སྐབས་འདིར། ཨ་རིས་རྒྱ་ནག་གི་གསང་ཉུལ་བའི་དོགས་ཡོད་ཝན་ཡེན་ཀྲང་འཛིན་བཟུང་བྱས་པ་དེས། ཨ་རྒྱ་གཉིས་བར་ཐའེ་ཝན་གྱི་གནད་དོན་ཐོག་རྩོད་རྙོག་གསར་པ་བསྐྲུན་ཡོད་ཅིང་། ཉེ་ལམ་ཊོམ་ཕུ་དང་ཞི་ཅིན་ཕིན་གྱི་ཐུག་འཕྲད་སྐབས། ཞི་ཅིན་ཕིན་གྱིས་ཨ་རིས་རྒྱ་ནག་གཅིག་གི་སྲིད་ཇུས་ལངས་ཕྱོགས་རྒྱུན་སྐྱོང་དང་ཐའེ་ཝན་རང་བཙན་ལ་ངོ་རྒོལ་བྱེད་དགོས་པའི་སྐུལ་མ་བྱས་ཡོད་འདུག
ཐའེ་པེ་དུས་བབ་ཀྱིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གི་གསང་ཉུལ་བ་ ༥༠༠༠༠ ནས་ ༡༠༠༠༠༠ ཡིས་ཐའེ་ཝན་ནང་རྒྱ་ནག་གི་གསང་བའི་ལས་དོན་སྒྲུབ་བཞིན་ཡོད་པ་དང་། རྒྱ་ནག་ནང་ཐའེ་ཝན་གྱི་ལས་དོན་ཐོག་གསང་བའི་ལས་དོན་སྒྲུབ་མཁན་མི་གྲངས་ ༡༨༠༠༠ ཡོད་ཅིང་། རྒྱ་ནག་གིས་འཕྲུལ་རིག་འཕེལ་རྒྱས་ཀྱི་བྱེད་ཐབས་དང་། ཚོང་ལས་དང་དཔལ་འབྱོར་གྱི་གནོད་ཤུགས། སེམས་ཁམས་དང་དངོས་སུ་འཇིགས་སྐུལ་གཏོང་བ་སོགས་ཐབས་ཤེས་ཡོད་རྒུ་རྩལ་སྤྲུགས་བཏོན་ནས་ཐའེ་ཝན་གཞུང་མང་གཉིས་ལ་ཤུགས་རྐྱེན་སྤྲད་དང་སྤྲོད་མུས་ཡིན་འདུག་ལ། རྒྱ་ནག་གིས་ཐའེ་ཝན་ལ་གསང་ཉུལ་གྱི་ཐོག་ནས་སིམ་འཛུལ་བྱེད་བཞིན་པ་ནི་ཐའེ་ཝན་ཁོ་ནའི་དཀའ་ངལ་ཙམ་མིན་པར་འཛམ་གླིང་རྒྱལ་ཁབ་ཡོངས་ལ་ཉེན་བརྡ་ཞིག་ཡིན་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
