ཤེས་བྱ་བཀླགས་པའི་ཚོར་སྣང་སྐྱེན་པོ།

རིགས་སློབ།    ངག་རྣམ།

        གཞུང་འབྲེལ་ཤེས་བྱ་དུས་དེབ་ནི་ངས་ནམ་རྒྱུན་ཀློག་རྒྱུར་སྤྲོ་སྣང་ཆེ་བའི་གནས་འཕྲིན་གལ་ཆེན་ཞིག་ཡིན། ཤེས་བྱ་ཚགས་པར་གྱིས་ད་བར་༸གོང་ས་མཆོག་གི་མཛད་འཕྲིན་དང་འབྲེལ་བའི་རྒྱུན་ཤེས་མང་པོ་ཞིག་རྟོགས་བྱེད་པའི་ཐབས་ལམ་བསྐྲུན་བྱུང་། ངས་འདིར་ཉེ་ཆར་ཕྱི་ཟླ་བདུན་པའི་ནང་བྱུང་བའི་གནས་ཚུལ་ཁག་ཅིག་ཚགས་ཤོག་དང་དུས་དེབ་ཀྱི་གྲོགས་པོ་ཚོར་ཤོད་འདོད་སྐྱེས།  དེང་སང་སྤྱོད་ཤུགས་ཆེ་བའི་ངོ་དེབ་དང་འཕྲུལ་སྒྲ་སོགས་ཀྱི་ནང་ནས་༸གོང་ས་མཆོག་གི་གསུང་གི་བདུད་རྩི་འཐུང་མི་ཁྲི་ཁྲག་ཡོད་པ་འདི་ཁོ་ནས། ༸གོང་ས་མཆོག་གི་ཕྱི་རྒྱལ་གྱི་མཛད་པའི་ཆ་ཤས་ཙམ་ཡང་ད་ལྟ་འཛམ་གླིང་གི་སྤྱི་ཚོགས་ཧྲིལ་པོས་དགའ་ཞེན་དང་བོད་མི་ཚོས་ཁ་བཀྱག་སྟེ་སྤོབས་པ་བྱེད་པའི་གནས་ཚུལ་ཤ་སྟག་ཡིན་ཡང་། ངས་འདིར་རང་ཉིད་ལ་མྱོང་ཚོར་ཅུང་ཟབ་མོ་བྱུང་བའི་གནས་ཚུལ་རེ་གཉིས་ཟིན་བྲིས་སུ་འགོད་འདོད་བྱུང་།   ཡང་ན་རྩོམ་ཡིག་འདིས་༸གོང་ས་མཆོག་གིས་མི་ལོ་དྲུག་ཅུའི་རིང་བོད་པའི་ཆབ་སྲིད་ཀྱི་གནས་སྟངས་ཡ་ང་བ་དང་འཇིགས་སྐྲག་ཆེ་བའི་སྐབས་ལས་ཡོངས་སུ་བསྒྲལ་ཏེ། ད་ཆ་ཐུགས་སྤོབས་ཆེན་པོའི་ངང་ནས་ཆབ་སྲིད་ཀྱི་ཐུགས་འགན་ཧྲིལ་པོ་སྲིད་སྐྱོང་མཆོག་ལ་གནང་བའི་བོད་ཀྱི་ལོ་རྒྱུས་ཀྱི་དུས་མཚམས་གསར་པ་འདིར་ཕུལ་བའི་བཀའ་དྲིན་རྗེས་དྲན་མཚོན་པར་བྱས་ཀྱང་ཆོག

གོད་ཆག་འཕོག་མི་ཚོའི་མིག་ཆུ་དང་ལྷན་དུ།

ཐོག་མར་འདི་ལོའི་ཕྱི་ཟླ་དྲུག་པ་ཙམ་ལ་༸གོང་ས་མཆོག་གིས་ནེའུ་ཛེ་ལན་ཌིར་ས་ཡོམ་གྱི་གོད་ཆག་ཕོག་པའི་མི་མང་ལ་ཐུགས་གསོ་གནང་བར་ཕེབས་ཤིང་། ཁྱེད་ཀྱིས་བྱས་ན་སྐབས་དེར་བཀའ་སློབ་ཅི་ཞིག་གནང་ཡོད་སྙམ་གྱི་འདུག  རྐྱེན་ངན་དེ་འདྲ་བྱུང་བ་ཡིན་ནའང་སེམས་སྡུག་བྱས་ཏེ་མ་བསྡད་པར། སྙིང་སྟོབས་བསྐྱེད་དེ་སེམས་སྡུག་ལས་རྒྱལ་ཐབས་ཀྱིས་གོམ་པ་མདུན་སྤོས་ཐོག་མི་ཚེ་བསྐྱལ་ཐབས་བྱེད་རྒྱུ་ཙམ་མ་ཟད། སྙིང་སྟོབས་དང་ཆོད་སེམས་འཕར་མ་ཞིག་བསྐྱེད་དེ་རྐྱེན་ངན་གྲོགས་སུ་འགྱུར་ཐབས་བྱ་རྒྱུ་ཧ་ཅང་གལ་ཆེན་པོ་ཆགས་ཡོད་ཅེས་སོགས་ཀྱི་བྱམས་བརྩེའི་བཀའ་སློབ་བསྩལ་བ་དེས་ཁུལ་དེའི་མི་མང་ལ་སེམས་འགུལ་ཚད་མེད་ཐེབས། གཅིག་བྱས་ན་མཚམས་འདིར་ཀློག་མཁན་མང་པོ་ཞིག་གི་སེམས་ནང་རྐྱེན་ངན་དེ་འདྲ་བྱུང་བ་ནི་ང་རང་ཚོའི་སྔོན་མའི་ལས་ཡིན་ཚུལ་མ་གསུངས་པ་གང་ཡིན་ནམ་སྙམ་སྲིད། འོན་ཏེ་འདི་ནི་གོད་ཆག་འཕོག་མི་ཚོའི་ཡིད་ཀྱི་འདོད་པ་དང་མཐུན་པའི་སེམས་གསོ་གནང་ཐབས་ཤིག་མ་རེད་དམ།  

                                                           ཕངས་མེད་ཀྱི་སྦྱིན་པ།

༸གོང་ས་མཆོག་གི་ནམ་རྒྱུན་ཆོས་འབྲེལ་གྱི་འབུལ་རྟེན་གཏན་ནས་མི་བཞེས་པ་ཡོངས་གྲགས་ཡིན་པ་དང་། དེ་ལས་ལྡོག་སྟེ་ཕྱི་ནང་གི་ཉམ་ཐག་རོགས་སྐྱོར་ཚོགས་པ་མང་པོར་དངུལ་གྱི་ཞལ་འདེབས་ཕོན་ཆེན་གནང་གི་ཡོད་པ་ལྟར།   ད་རེས་ཀྱང་ཨོ་སི་ཊོ་ལི་ཡའི་རོགས་ཚོགས་ཤིག་ལ་ཨ་སྒོར་འབུམ་གཅིག་གི་ཞལ་འདེབས་གནང་འདུག  ངས་གནས་ཚུལ་འདི་ཀློག་དུས་དངུལ་དངོས་དང་དབང་འཛིན་གྱི་ལམ་ངན་ཁོ་ན་སྲུང་ནས་སྡོད་པའི་ད་ལྟའི་འཛམ་གླིང་གི་དཔོན་ངན་རིང་ལུགས་ཀྱི་མཇུག་མ་སྐྱོང་བཞིན་པ་དག་ལ་མཆིལ་ཞགས་འཕེན་འདོད་ལ།  གནས་ཚང་རྒྱལ་ཁབ་ཀྱི་ལྐོག་ཟ་རིང་ལུགས་པ་དག་གི་བྱེད་སྟངས་ལའང་དབུགས་རིང་ཞིག་མ་བཏང་ཀ་མེད་བྱུང་། མཚམས་འདིར་སླེབས་དུས་ངས་ས་སྐྱ་ལེགས་བཤད་ཀྱི་ཚིག་འདི་འདྲ་ཞིག་དྲན་སོང་། སྦྱིན་ལ་རྟག་ཏུ་སེམས་སྤྲོ་བ།། དེ་ཡི་གྲགས་པ་རླུང་བཞིན་ལྡང་།།

ཁོར་ཡུག་གི་དཀྱེལ་ཆེའི་དགོངས་པ།

ཁོར་ཡུག་གི་གནད་དོན་ཐད་ནས་བཤད་ནའང་འདི་ལྟར་རྟེན་ཅིང་འབྲེལ་བའི་ལྟ་གྲུབ་ཐོག་ནས་ཁ་ཞེ་གཉིས་མེད་ཐོག་ནན་བཤད་གནང་མཁན་མི་སྣ་ཉུང་ཉུང་ལས་མེད། ད་རེས་ཨོ་སི་ཊོ་ལི་ཡའི་(Herald)ཞེས་པའི་བརྒྱུད་ལམ་དུའང་‘’དེ་སྔ་ཡིན་ན་སོ་སོའི་རྒྱལ་ཁབ་ཀྱི་ཁེ་ཕན་གཙིགས་ཆེ་ཤོས་སུ་འཛིན་སྲོལ་ཡོད་པ་དེ་འགྲིགས་ཡོད་པའི་གནས་སྟངས་ཤིག་ཡོད་ཀྱང་། ད་ལྟའི་དུས་འདིར་རྒྱལ་ཁབ་ཚང་མ་ཕན་ཚན་རྟེན་དགོས་པའི་གནས་སྟངས་ཤིག་ཆགས་པ་དེ་དངོས་ཡོད་གནས་ཚུལ་ཞིག་རེད་’’ཅེས་དང་། དེ་བཞིན་ཡུལ་དེར་ཡོད་པའི་རྒྱ་བོད་ཀྱི་ལྷན་ཚོགས་ཤིག་ཏུ་རྒྱ་ནག་ལ་འཛམ་གླིང་རྒྱལ་སྤྱིའི་ཁྲིམས་ཀྱི་གནས་ཚད་ལོངས་པའི་ཁྲིམས་ཡིག་དགོས་ཀྱི་འདུག ད་ལྟ་གུང་བྲན་ཏང་གི་ཁྲིམས་རེད། ང་ཚོས་ཤུགས་རྒྱག་དགོས། དམངས་གཙོའི་ལམ་དུ་ག་ལེར་བྱས་ནས་འགྲོ་དགོས་ཞེས་གསུངས། ཁོང་གིས་དུས་རྒྱུན་ནང་པའི་ཐུན་མོང་མིན་པའི་རྟེན་འབྱུང་གི་ལྟ་བས་ད་ལྟའི་འཛམ་གླིང་གི་ཁོར་ཡུག་དང་དཔལ་འབྱོར་སོགས་ལའང་དངོས་སུ་ཕན་ཐོགས་པའི་སྐོར་གསུང་གི་ཡོད་པ་འདི་ཡང་དོན་དངོས་ཀྱི་གནས་ཚུལ་འདིས་ར་འཕྲོད་ཀྱི་འདུག 

རྒྱ་རིགས་ཀྱི་མིག་གསར་པ།

ཁོང་ཚོས་འགྱུར་ལྡོག་གསར་པ་ཞིག་གི་ཁྲོད་ནས་ཏཱ་ལའི་བཞིན་རས་ལ་ཅེར་དུས་སེམས་ནང་ནས་འགོག་མེད་དུ་འཆར་འོང་བའི་དོན་སྤྱི་ཞིག་ཡོད་པ་ནི། རྒྱ་གཞུང་གི་ཆབ་སྲིད་དྲིལ་བསྒྲགས་འོག་གི་ཏཱ་ལའི་བླ་མ་དེ་དོན་ལ་སུ་ཡིན་ནམ་གང་དུ་ཡོད་ཅེས་པའི་དྲི་བ་དེ་རེད། འདི་ནི་ཁོང་ཚོར་མཚོན་ན་མཇལ་འཕྲད་ཁྲོད་ཀྱི་ཚོར་སྣང་ཟབ་ཤོས་འབྱུང་བའི་གནས་ཚུལ་ཞིག་ཡིན། བྱམས་བརྩེའི་མངའ་བདག་ཆེན་མོ་གང་གིས་རང་ཉིད་ཀྱིས་རྒྱུ་མཚན་ཐོག་ནས་གཟིགས་པ་དང་ཉམས་བཞེས་མཛད་པའི་གནད་དོན་གསལ་བཤད་དང་གསེད་དཀྲོལ་གནང་བ་ལས། འབྲེལ་མེད་དང་མ་ནུས་པའི་སྟོང་བཤད་ནམ་ཡང་མི་གསུང་བའི་རྟགས་སུ་ད་ལྟའི་རྒྱལ་སྤྱིའི་སྤྱི་ཚོགས་ཀྱི་མངོན་བསྟོད་དང་ཚད་མཐོའི་ངོས་འཛིན་འདི་འཐོབ་པ་བཞིན། རྒྱ་མི་རིགས་ཀྱི་ཕྱོགས་ནས་ཀྱང་ད་ལྟའི་ཆར་དོན་དངོས་དེ་མངོན་སུམ་དུ་མཐོང་བའི་ཉེར་ལེན་ལས་༸གོང་ས་མཆོག་གི་བཀའ་སློབ་དངོས་སུ་ཐོས་ཐབས་དང་འཛུམ་དམུལ་དམུལ་གྱི་ཞལ་རས་དེ་མཇལ་ཐབས་ཀྱི་སྦྱོར་བ་དེ་ཚ་ཚ་འུར་འུར་ངང་རྩོམ་བཞིན་འདུག ད་རེས་ཨོ་སི་ཊོ་ལི་ཡ་ལ་ཡང་རྒྱ་རིགས་དང་མཇལ་འཕྲད་གནང་སྟེ། རྒྱ་ནག་གཞུང་གི་སྐྱུག་བྲོ་བའི་བྱེད་ཐབས་གསལ་བཤད་དང་། ཉིས་སྟོང་བརྒྱད་ལོར་ཡུ་རོབ་སོགས་སུ་ཕེབས་དུས་ཀྱང་རྒྱ་རིགས་ངོ་རྒོལ་བྱེད་མཁན་རེ་གཉིས་བྱུང་བ་དག་ཀྱང་རྒྱ་ནག་གཞུང་ཚབ་ཀྱིས་གོ་སྒྲིག་བྱས་ཡོད་ཚུལ་སོགས་ཀྱི་གནས་ཚུལ་གསུངས་པ་འདིས་རྒྱ་རིགས་དེ་དག་གིས་རྒྱ་གཞུང་ལ་གོ་རྟོགས་གསར་པ་ཞིག་རྙེད་པར་གོར་མ་ཆག  དེ་བཞིན་རྒྱ་རིགས་ཤིག་གིས་ད་ཆ་༸གོང་ས་མཆོག་གིས་སྲིད་དབང་སྲིད་སྐྱོང་ལ་གནང་བ་འདིས་མ་འོངས་པར་བོད་མིའི་ཆབ་སྲིད་ཀྱི་ལམ་བུར་འགྱུར་བ་འགྲོ་སྲིད་སྐོར་ཞུས་པར་༸གོང་ས་མཆོག་གིས་བཙན་བྱོལ་བོད་མི་མང་ཤོས་ཀྱིས་དེ་ལ་རྒྱབ་སྐྱོར་བྱེད་ཀྱི་ཡོད་པ་མ་ཟད། བོད་ནང་གི་བོད་མི་ཤེས་ཡོན་ཅན་མང་ཆེ་བས་ཀྱང་རྒྱབ་སྐྱོར་བྱེད་ཀྱི་ཡོད་སྟབས། ངོས་ཀྱི་བསམ་པར་འགྱུར་བ་འགྲོ་ཡི་རེད་བསམ་གྱི་མེད།’’ ཅེས་གསུངས་པ་དང་། དབུ་མའི་ལམ་ལ་དད་ཞེན་མིན་པར་སློབ་སྦྱོང་གི་ཐོག་ནས་རྒྱུས་ལོན་བྱ་དགོས་པའི་བསླབ་བྱ་དང་། ལར་ནས་དབུ་མའི་ལམ་ནི་ཡུན་རིང་བསམ་གཞིག་གཏིང་ཟབ་བྱས་པའི་ཐབས་ལམ་ཞིག་དང་། མིའི་ལྷན་སྐྱེས་ཀྱི་མངོན་འདོད་ལས་ཡོངས་སུ་བརྒལ་བའམ། རྒྱལ་ཕམ་གྱི་སྲིད་དོན་འཐབ་རྩོད་ཅིག་ལས་འདས་པ་སྟེ། མདོར་ན་འདི་ནི་ད་ལྟའི་མི་རྣམས་ཀྱིས་མངོན་པར་རྒྱུག་སའི་རང་རྒྱལ་གཞན་ཕམ་གྱི་རྩ་འཛིན་མེད་པའི་ལྟ་གྲུབ་ཅིག་ཡིན་པས། ཧོབ་སྟེ་བལྟས་ནས་འདི་ནི་ཙི་ཙིས་ཞི་ལའི་མདུན་དུ་མགོ་འདོགས་པའི་རྣམ་འགྱུར་སྟོན་པ་ལྟ་བུར་མཐོང་སྲིད་མོད། ངས་ནི་དེ་ལྟར་གཏན་ནས་མིན་པར་འདི་ནི་སྤྱང་གྲུང་ལྡན་པའི་ཙི་ཙིས་མཐར་ཨ་ཁུ་ཞི་ལ་འགྱོད་པའི་གླིང་ཁར་བསྐྱལ་བ་ལྟ་བུའི་གློག་བརྙན་གྱི་དངོས་དོན་ཉིད་དུ་མཐོང་།  དཔེར་ན་ཉེ་ཆར་བྱུང་བའི་རླབས་ཆེའི་འགྱུར་ལྡོག་དེས་ཀྱང་ཨ་ཁུ་ཞི་ལར་རྣ་རྒྱུགས་ཚ་ཐག་ཆོད་ཅིག་ཕོག་མ་སོང་ངམ།

རྒྱ་ནག་གི་དམངས་གཙོ།

དེ་བཞིན་དམངས་གཙོའི་ཐོག་ནས་ཀྱང་འདི་ལྟར་རྒྱ་གར་ལ་ཡོད་པའི་ང་ཚོའི་བོད་མིའི་སྒྲིག་འཛུགས་དེ་མིང་དོན་མཚུངས་པའི་དམངས་གཙོ་ཚད་ལྡན་ཆགས་ཡོད། མ་འོངས་པར་རྒྱ་ནག་གུང་བྲན་ཏང་ལ་བསམ་འཆར་སྤྲོད་ཐུབ་པའི་སྤོབས་པ་ཡོད་མཁན་ཞིག་ཆགསཡོད། ང་ཚོའི་སྒྲིག་འཛུགས་དེ་ཆུང་ཆུང་ཞིག་ཡིན་ཡང་བསམ་པ་རྣམ་དག་གིས་དམངས་གཙོའི་ཐོག་འགྲོ་བཞིན་ཡོད།  ཅེས་པ་འདིས་རེ་བ་གསར་པ་ཞིག་མཐོང་བ་ནི། ཉིན་ཞིག་རྒྱ་ནག་ནང་སྔར་བྱུང་མྱོང་མེད་པའི་སྤྱི་ཚོགས་ཀྱི་དམངས་གཙོའི་འོས་ལངས་འགོག་ཐབས་མེད་པ་ཞིག་བྱུང་སྟེ། གུང་བྲན་འཐོར་ཞིག་དང་རྒྱའི་མི་རིགས་བསམ་བློ་གསར་པ་དང་མཐོང་རྒྱ་ཅན་ཚང་མས་དམངས་གཙོར་བསྐྱོད་རྒྱུའི་གོ་རྟོགས་སད་ནས། བོད་མིས་རྒྱ་གར་ནང་སྦྱོང་བརྡར་ཡུན་རིང་བྱས་པའི་དམངས་གཙོའི་ལམ་བཟང་འདི་དཔེ་མཚོན་དུ་ལེན་རྒྱུའི་དུས་བབ་ཅིག་འོང་རྒྱུའི་དགོངས་པ་བཞེས་མི་འདུག་གམ། ད་ལྟ་ནས་རྒྱའི་ཤེས་ཡོན་ཅན་མང་པོས་ངྷ་སར་དངོས་སུ་སྐུ་བཅར་བྱས་ཏེ། རྒྱ་ནག་གི་དམངས་གཙོའི་མགོ་འཁྲིད་དེ་༸གོང་ས་མཆོག་བསྐྱང་རྒྱུའི་རེ་སྐུལ་ཞུ་བཞིན་ཡོད། འདིས་ང་ཚོར་དྲན་སྐུལ་ཞིག་གཏོང་བ་ནི་སྤྱི་འཐུས་ཀྱི་སྒྲོམ་གཞིའི་ནང་མི་མཐོང་རྒྱ་ཅན་དང་། ཤེས་ཡོན་ཅན། གུ་ཡངས་ཅན། བཟོད་བསྲན་ཅན་དེ་འདྲ་མང་ཙམ་དགོས་པ་དང་། བཙན་བྱོལ་སྤྱི་ཚོགས་ཀྱི་ཁྱོན་ཡོངས་ཀྱི་ཤེས་ཚད་གོང་མཐོར་གཏོང་དགོས་པ་དེ་རེད་སྙམ།

ངོ་མཚར་གྱི་ལེའུ་གསར་པ།

ཚན་རིག་དང་ནང་པའི་ལྟ་གྲུབ་དབར་བགྲོ་གླེང་གནང་རྒྱུ་དེ་ནི་༸གོང་ས་མཆོག་གི་ཆེས་སྤྲོ་སྣང་ལྡན་པའི་བྱ་གཞག་ཅིག་ཡིན་ཏེ། སྙན་གྲགས་ཅན་གྱི་དངོས་ཁམས་རིག་པ་བ་ཨཡེན་སེཊན་གྱིས་གལ་ཏེ་ཚན་རིག་གི་ཐོག་ནས་རང་ཉིད་ཀྱི་འཚོ་ཐབས་འཚོལ་རྙེད་མ་བྱས་ན། ཚན་རིག་ནི་ངོ་མཚར་ཅན་ཞིག་རེད་(Science is a wonderful thing if one does not have to earn one’s living at it.)ཅེས་སྡོམ་ཚིག་བརྒྱབ་པ་ལྟར། གལ་ཏེ་ཚན་རིག་གིས་གོ་ལ་ཧྲིལ་པོའི་བདེ་སྐྱིད་སེམས་གཏིང་དུ་ཉར་ཏེ། གསར་རྙེད་དང་ཞིབ་འཇུག་གི་གོམ་པ་སྤོས་ན་ནི། ཚན་རིག་ལ་འཇིག་རྟེན་ཐོག་རླབས་ཆེའི་ཞབས་འདེགས་སྒྲུབ་པའི་སྟོབས་ཤུགས་ཡོད་པ་དེ། ༸གོང་ས་མཆོག་གིས་སྐུ་ན་ཕྲ་སྐབས་ཕོ་བྲང་པོ་ཏཱར་འཛམ་གླིང་དམག་ཆེན་གཉིས་པའི་སྐོར་གྱི་དབྱིན་ཇིའི་དཔེ་དེབ་གཟིགས་པའི་སྐབས་ནས་མཁྱེན་ཚར་ཡོད། དེར་བརྟེན་དུས་རབས་སྔོན་མའི་ལོ་རབས་བརྒྱད་ཅུ་ཙམ་ནས་༸གོང་ས་མཆོག་ཉིད་ཀྱིས་ད་ལྟའི་ཚན་རིག་གིས་བློ་སྒོ་གསར་པ་ཞིག་དང་། འགན་འཁྲི་གསར་པ་ཞིག་གི་ཐོག་ནས་འཇིག་རྟེན་གྱི་བདེ་སྐྱིད་འཚོལ་དགོས་པའི་ལེའུ་གསར་པ་ཞིག་འགོ་འཛུགས་མཛད། དེ་ཡང་ཁོང་གིས་རྡུལ་ཕྲན་གཅིག་ཁོ་ནའི་སྟེང་གི་འཇིག་རྟེན་ཞེས་པའི་ནང་འདི་ལྟར་གསལ་པོར་བཤད་ན།  ད་རེས་ཁུལ་དེར་ཡང་འདི་ལྟར་’’འོན་ཀྱང་ལྟ་གྲུབ་རྒྱ་ཆེ་ཆུང་དང་གཏིང་ཟབ་ལུགས་ལ་བལྟས་ན་ནང་པ་རྒྱ་ཆེ་བར་བརྟེན་ཚན་རིག་པ་ཚོས་འབྲེལ་བ་བྱེད་བཞིན་ཡོད། སྤྱི་ཡོངས་ཀྱི་ཚན་རིག་པས་ཆོས་ཞེས་བརྗོད་སྐབས་ཐག་རིང་པོར་སྡོད་ཀྱི་ཡོད་ཀྱང་ནང་པའི་ཆོས་ཞེས་བརྗོད་སྐབས་དེ་རིང་ཁ་སང་དམིགས་བསལ་བརྩི་བཞིན་འདུག’’ཅེས་དང་། རྒྱུ་མཚན་དེའི་ཕྱིར་ནང་པའི་ཆོས་འདི་རྒྱུ་མཚན་དང་ཚན་རིག་མཉམ་དུ་འགྲོ་ཐུབ་མཁན་གྱི་ཆོས་ཤིག་ཡིན་བསམ་པར་བྱས་ནས་སློབ་སྦྱོང་བྱ་དགོས་པའི་ནན་བཤད་གནང་བ་འདི་དག་གིས་ག་རེ་སྟོན་གྱི་འདུག་ཅེ་ན། འཛམ་གླིང་གི་ཆོས་ལུགས་ཕལ་མོ་ཆེས་ཆོས་ལུགས་ཀྱི་ངོ་བོ་དང་གོ་དོན་ཧྲིལ་པོ་ཡིད་ཆེས་ཀྱིས་རྫོགས་པར་བྱེད་པ་དང་། ཆོས་ལུགས་ག་གེ་མོར་ལྟ་གྲུབ་དང་རྒྱུ་མཚན་གྱི་རྨང་གཞི་འཚོལ་ཐབས་བྱེད་པ་འདི་ནི་དོན་ལ་རྒྱལ་ཁབ་དང་མི་རིགས་དེའི་ཆོས་ལུགས་རྩ་གཏོར་གཏོང་བའི་ཐབས་ཤེས་སུ་བརྩི་བའི་བག་ཆགས་ཤིག་སེམས་གཏིང་དུ་མངོན་གསལ་མེད་པའི་ཐོག་ནས་གནས་ཡོད་པ་གསལ་པོ་རེད།  

འོན་ཀྱང་བོད་ཀྱི་ནང་ཆོས་ནི་ར་བ་དེ་ལས་བརྒལ་ཏེ་ཆོས་མེད་རིང་ལུགས་ཚོའི་ཡིད་ཀྱི་དབང་པོར་ཡང་འགུལ་སྐྱོད་གཏོང་བའི་རིག་རྩལ་གྱི་ཤེས་བྱ་སྐྲུན་གྱི་ཡོད། མདོར་ན་དེང་སང་གི་ཤར་ནུབ་གཉིས་ཀའི་ལྟ་གྲུབ་སྨྲ་བ་དང་། ཤེས་ཡོན་ཅན་དེ་ཚོས་བོད་ཀྱི་ནང་ཆོས་ནི་ཆོས་ལུགས་ཤིག་མ་རེད། དེ་ནི་སེམས་ཀྱི་ཚན་རིག་ཅིག་རེད་ཅེས་སྡོམ་རྒྱག་གི་ཡོད་པ་འདི་རེད།  ངས་ཆོས་ལུགས་ཀྱི་རྨང་གཞིའི་ལྟ་གྲུབ་ཀྱི་ཁྱབ་ཁོངས་ནང་ཡིད་ཆེས་དང་དད་པ་གཏན་ནས་མི་དགོས་པའི་འདུ་ཤེས་ཕྱོགས་རེ་བ་དེ་འདྲ་འཛིན་མི་འདོད་པར། དད་པ་དང་ཡིད་ཆེས་ཙམ་ལས་སྤྲོས་པའི་གཞི་ལམ་འབྲས་བུའི་རྣམ་གཞག་གིས་བཅིངས་པའི་ཆོས་ལུགས་དེར། ང་ཚོའི་ངོས་ནས་ཀྱང་ཡང་དག་པའི་ལྟ་ཚུལ་དང་འགྲེལ་བཤད་རྒྱག་སྟངས་ཀྱང་མི་འདྲ་བ་ཞིག་འཚོལ་ཐབས་མི་བྱེད་པ་འདི་ཕངས་པོར་མཐོང་།  ང་ཚོས་གོ་སྐབས་འདི་དམ་འཛིན་མི་བྱེད་པའི་ངན་གོམས་ཤིག་སྤྱི་ཚོགས་སུ་ཁྱབ་པ་འདི་ཁོ་ནས།  ཆོས་ལ་སྐྱོན་བརྗོད་ཡིན་ཁུལ་གྱི་དཔེ་དེབ་འགའ་མཐོང་བ་དང་རི་བོང་ཅལ་འདྲོགས་ཀྱི་ངང་ཚུལ་འཛིན་པ་འདི་འབྱུང་བཞིན་ཡོད། འདིའི་ཐོག་ལའང་ད་རེས་ནན་བཤད་འདི་འདྲ་ཞིག་གནང་འདུག  དེང་སང་བོད་རིགས་ནང་ནས་ཆོས་ལ་སྐྱོན་བརྗོད་བྱས་པའི་དེབ་བོད་ནང་འབྲི་མཁན་དེ་འདྲ་ཁ་ཤས་ངོས་ཀྱིས་མཐོང་བྱུང་།  དེ་ལྟར་སྐྱོན་བརྗོད་བྱེད་པར་སྔོན་ལ་སངས་རྒྱས་པའི་ཆོས་ཆ་ཚང་ཤེས་པའི་ཐོག་ནས་སྐྱོན་བརྗོད་བྱས་ན་འགྲོ་སྟངས་ཤིག་རེད། སྔོན་ལ་སངས་རྒྱས་པའི་ཆོས་མ་ཤེས་པར་ནང་ཆོས་རོབ་ཙམ་ཞིག་གོ་བ་དང་། རྒྱ་མི་གུང་བྲན་གྱིས་ཆོས་ལ་སྐྱོན་བརྗོད་བྱས་པ་དེ་ནས་ཏོག་ཙམ་ཞིག་བླངས་ཏེ་ཡིད་ཆེས་བྱས་ནས་འགྲོ་བཞིན་འདུག་པས་དེ་བྱབ་ཆུང་རེད།   ཅེས་གསུངས་ཡོད།།