རྒྱ་ནག་གཞུང་གིས་རྟའུ་ཉ་མཚོ་དགོན་པའི་དགེ་འདུན་པ་གསུམ་ནག་ཉེས་ཅི་ཡིན་གསལ་ཁ་མེད་པའི་ཐོག་འཛིན་བཟུང་བྱས་ཡོད་པར་མ་ཟད། ད་ལྟའི་ཆར་ཡང་རྟའུ་རྫོང་གི་སྐྱ་སེར་གཉིས་ལ་དམ་དྲག་ཤུགས་ཆེན་བྱེད་ཀྱིན་ཡོད་འདུག
ཕྱི་ཚེས་ ༡༥ ཉིན་ཁམས་རྟའུ་ཉ་མཚོ་དགོན་པའི་གྲྭ་ཚེ་དབང་ནོར་བུ་ལགས་ཀྱིས་བོད་མི་རིགས་ཀྱི་བདེན་དོན་ཆེད་དུ་རང་ལུས་མེར་བསྲེག་བཏང་སྟེ་འདས་གྲོངས་སུ་ཕྱིན་རྗེས། ཕྱི་ཚེས་ ༢༠ ནས་ ༢༡ ཉིན་གཉིས་རིང་དགོན་པའི་སློབ་གྲྭའི་འགན་བཞེས་མཁན་གྲྭ་རྒྱལ་མཚན་ལགས་ནག་ཉེས་ཅི་ཡིན་གསལ་ཁ་མེད་པར་ཁྲིན་ཏུའུ་གྲོང་ཁྱེར་ནས་འཛིན་བཟུང་བྱས་ཡོད་པ་དང་། གཞན་གྲྭ་ནོར་བུ་དང་གཞན་གཅིག་བཅས་གྲྭ་བ་གཉིས་ཀྱང་ནག་ཉེས་ཅི་ཡིན་གསལ་ཁ་མེད་པར་འཛིན་བཟུང་བྱས་ཡོད་པར་མ་ཟད། ཕྱི་ཚེས་ ༡༨ ནས་བཟུང་དགོན་པ་དང་བོད་མི་འདུས་སྡོད་ཀྱི་ས་གནས་ཁག་ཏུ་དམག་མི་སྟོང་ཕྲག་མང་པོ་འགྲེམས་འཇོག་གིས་དགོན་གྲོང་གཉིས་ཀྱི་འགྲུལ་བཞུད་ལ་བཀག་སྡོམ་དང་། དཀར་མཛེས་བོད་རིགས་རང་སྐྱོལ་ཁུལ་གྱི་ཧྲུའུ་ཅི་ལི་ཏའོ་ཕིན་དགོན་པར་ཡོང་སྟེ་གྲྭ་བ་ཚོར། “ དགོན་པའི་གྲྭ་བ་ཚོ་ཡག་པོ་མ་བསྡད་ཚེ་དགོན་པ་སྒོ་བརྒྱབ་ཏེ་ཆོས་ལུགས་ཀྱི་བྱེད་སྒོ་ཐ་དག་བཀག་སྡོམ་བྱ་རྒྱུ་ཡིན།” ཞེས་འཇིགས་སྐུལ། རྫོང་གི་འབྲེལ་ཡོད་ལས་བྱེད་མི་སྣ་ཁག་ཅིག་དགོན་པར་ཡོང་སྟེ་དགོན་པའི་གནད་ཡོད་མི་སྣ་ཚོར་འདྲི་གཅོད་བྱས་ཏེ་དམ་དྲག་བྱས་ཡོད། ད་ལྟའི་ཆར་ཡང་རྟའུ་རྫོང་གཙོས་ཉེ་འཁོར་གྲོང་སྡེ་ཁག་ནང་ཁ་པར་དང་བརྒྱུད་ལམ་བཀག་ཏེ་འབྲེལ་བ་བྱ་མི་ཐུབ་པ་བཟོས་ཡོད་འདུག་ལ། བོད་མི་གཅིག་ཀྱང་དགོན་པར་མངགས་གཏོང་བྱེད་ཀྱིན་མེད་པའི་གནས་སྟངས་ཆགས་ཡོད་འདུག
གནས་ཚུལ་འདིའི་ཐད་ཁ་སང་ཕྱི་ཚེས་ ༢༢ ཉིན་འཇར་མན་གྱི་གྲོང་ཁྱེར་ཊོ་ཆི་ལན་ཌིའི་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་བོད་མི་དང་བོད་དོན་རྒྱབ་སྐྱོར་བ་ ༥༠ ལྷག་གིས་ས་གནས་རྒྱ་ནག་གཞུང་ཚབ་ཀྱི་མདུན་ཐང་དུ་མར་མེ་ཁྲོམ་སྐོར་གྱི་ལས་འགུལ་སྤེལ་ཡོད་པར་མ་ཟད། དབྱིན་ཇིའི་རྒྱལ་ས་ལོན་ཊོན་དུ་ཡོད་པའི་བོད་རང་བཙན་སློབ་ཕྲུག་ཚོགས་པ་དང་ས་གནས་གཞོན་ནུ་བཅས་གཞུང་འབྲེལ་མིན་པའི་ཚོགས་པ་ཁག་གིས་ཀྱང་རྟའུ་ཉ་མཚོ་དགོན་གྲོང་གཉིས་ཀྱི་དམ་དྲག་མགྱོགས་མྱུར་མཚམས་འཇོག་བྱ་དགོས་པའི་འབོད་སྐུལ་གནང་ཡོད་འདུག
ཕྱི་ཚེས་ ༡༦ ཉིན་ནས་བཟུང་བཞུགས་སྒར་དུ་གཞུང་འབྲེལ་མིན་པའི་ཚོགས་པ་ཁག་ཅིག་མཉམ་རུབ་ཐོག་རྒྱ་གཞུང་གིས་རྟའུ་ཉ་མཚོ་དགོན་པར་དམ་དྲག་གང་མགྱོགས་མཚམས་འཇོག་བྱ་དགོས་པའི་ལས་འགུལ་སྤེལ་ཡོད་ལ། ཕྱི་ཚེས་ ༢༠ ཉིན་བཞུགས་སྒར་ཉེ་འཁྲིས་དཔལ་ལྡན་རྒྱུད་སྟོད་གྲྭ་ཚང་དུ་རྒྱལ་བ་ཀརྨ་པ་མཆོག་དབུ་བཞུགས་ཐོག་དགེ་འདུན་འདུས་མང་ ༣༠༠ ལྷག་གིས་བོད་རྒྱལ་ཁབ་དང་མི་རིགས་ཀྱི་དོན་དུ་སྐུ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་རྣམས་དང་། ཡང་སྒོས་གྲྭ་ཚེ་དབང་ནོར་བུ་དམ་པ་ཁོང་ལ་ཐུགས་སྨོན་གསོལ་འདེབས་དང་། རྟེན་གཙོ་ཇོ་བོ་མི་བསྐྱོད་རྡོ་རྗེའི་དྲུང་དུ་སྙན་ཤལ་ནང་མཛོད་དང་། ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ། དགེ་འདུན་རེར་སྐུ་འགྱེད་སྒོར་ ༢༠ རེར་ཕུལ་ཏེ་མཆོད་འབུལ་སྨོན་ལམ་རྒྱ་ཆེན་ཞིག་ཚོགས་ཡོད། ཕྱི་ཚེས་ ༢༡ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བཞུགས་སྒར་གྱི་གཞུང་འབྲེལ་མིན་པའི་ཚོགས་པ་ ༡༡ ལྷག་གིས་༸དཔལ་རྒྱལ་བ་ཀརྨ་པ་མཆོག་དབུ་བཞུགས་ཐོག་བསྔོ་སྨོན་མཆོད་འབུལ་དང་བདུན་ཚིགས་དང་པོ་སྲུང་གཙི་བྱས་ཡོད།
གྲྭ་ཚེ་དབང་ནོར་བུ་ལགས་འདས་གྲོངས་སུ་ཕྱིན་སྟེ་བདུན་ཕྲག་གཅིག་གི་དུས་ཚིགས་ཐད་བཞུགས་སྒར་ཁོ་ན་མིན་པར། རྒྱ་གར་ལྷོ་ཕྱོགས་མོན་གྷོ་ས་གནས་དགའ་ལྡན་བྱང་རྩེ་ཐོས་བསམ་ནོར་གླིང་དང་སེ་ར་ཐེག་ཆེན་ཆོས་གླིང། སྦེལ་ཀོབ་ས་གནས་གཞོན་ནུ་དང་བུད་མེད། རྒྱ་གར་ལྷོ་ཕྱོགས་མོན་གྷོ་དགའ་ལྡན་བྱང་རྩེ་གླིང་སློབ་གྲྭའི་ཧི་མ་ལ་ཡའི་རི་རྒྱུད་ནས་ཡོང་བའི་སློབ་ཕྲུག་བཅས་ཀྱི་བསྔོ་བ་སྨོན་ལམ་དང་བདུན་ཚིགས་དང་པོ་སྲུང་གཙི་བྱས་ཡོད་པ་དང་། ལྡི་ལི་ས་གནས་གཞོན་ནུ་དང་ས་གནས་བུད་མེད། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་གོ་སྒྲིག་འོག་མར་མེ་ཁྲོམ་སྐོར་དང་། ཕྱི་ཚེས་ ༡༦ ཉིན་ནས་བཟུང་ལྡི་ལི་བསམ་ཡས་གླིང་དུ་ཡོད་པའི་དགོན་པ་གཉིས་ཀྱི་མདུན་ཐང་དུ་མི་མང་འདུ་འཛོམས་ཐོག་མཆོད་འབུལ་སྨོན་ལམ་དང་བདུན་ཚིགས་སྲུང་བརྩི་བྱས་ཡོད་ལ། གཞན་ཡང་། ཐའེ་ཝན་བོད་ཀྱི་སྐུ་ཚབ་དོན་གཅོད་ཁང་དང་ཐའེ་ཝན་བོད་རིགས་ཚོགས་པས་གོ་སྒྲིག་འོག་༸སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་དབུས་བླ་སྤྲུལ་དགེ་བཤེས། ཐེ་ཝན་དུ་གནས་སྡོད་བོད་མི། བོད་དོན་ལ་རྒྱབ་སྐྱོར་བ་བཅས་ཀྱིས་ཐུགས་སྨོན་དང་གནང་ཡོད་པ་མ་ཟད། ཨ་རི་དང་ཧྤ་རན་སི། འཇར་མན། དབྱིན་ལན། སུད་སི། སྤེལ་རྗེམ། བཅས་འཛམ་གླིང་ཡུལ་གྲུ་གང་སར་ཡོད་པའི་བོད་མི་ཚོས་གྲྭ་ཚེ་དབང་ནོར་བུ་ལགས་ཀྱིས་བློས་གཏོང་ལ་གདུང་སེམས་མཉམ་སྐྱེད་ཀྱི་ལས་འགུལ་རབ་དང་རིམ་པ་སྤེལ་ཡོད།
གསར་འགོད་པ། དོན་གོ
ཁོང་རྣམ་པའི་བྱས་རྗེས་སྙིང་ལ་རྡོ་ལ་རི་མོ་ལྟར་བཅངས་ནས། ང་ཚོ་གསོན་ལུས་བོད་མི་ཚོས་ཞལ་འདོན་དང་། མཆོད་འབུལ། ཐུགས་སྨོན་བརྒྱ་གང་ཅི་གནང་རོགས།
ང་ཚོས་ཁོང་ཚོར་ཕན་པའི་ལས་ཀ་སྒྲུབ་ཐུབ་པ་གཅིག་པོ་དེ་འདི་རང་ཡིན། འདི་ཡང་ང་ཚོས་མ་བྱས་ན། བོད་པའི་སྐྱེ་བ་ལེན་པའི་གོ་མ་ཆོད། བོད་རིགས་སྤུན་ཟླ་ཡིན་པའི་དགོས་དོན་མ་གྲུབ།
ཁོང་གི་མི་ལུས་རིན་པོ་ཆེ་མྱུར་ཏུ་ཐོབས་པའི་སྨོན་ལམ། སྐྱེ་བ་ཀུན་ཏུ་ཡང་དག་བླ་མ་དང་། འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། ས་དང་ལམ་གྱི་ཡོན་ཏན་རབ་རྫོགས་ནས། རྡོ་རྗེ་འཆང་གི་གོ་འཕངས་མྱུར་ཐོབས་ཤོག
རྒྱ་ནག་དམར་གཞུང་གི་བཙན་དབང་ལ་མྱུར་དུ་སྐྱོབ་དགོས་པ་ཧ་ཀྱང་གལ་ཆེན་རེད། དམ་པ་ཁོང་སྐུ་གཤེགས་པ་ནས་བཟུང་ད་དུང་མུ་མཐུད་དྲག་གནོན་དང་འཛིན་བཟུང་བྱེད་ཀྱི་ཡིན་པ་རང་བཞིན་རེད། ཉེ་སྔོན་རྔ་བ་ཀིརྟིའི་དགོན་པ་ནང་ཕུན་ཚོགས་ལགས་ཀྱི་སྐུ་ལུས་མེ་བསྲེགས་གནང་ནས་བཟུང་ད་བར་གནད་སྟངས་གང་འདྲ་ཞིག་བྱུང་ཡོད་པ་ཤེས་གསལ་རེད། ཡིན་ཡང་ད་དུང་མུ་མཐུད་ད་བཟོད་སྲན་བྱས་ནས་བོད་མི་རིགས་ཀྱི་རང་བཞིན་མ་བླག་པ་བྱེད་གལ་ཆེན་པོ་རེད་དྲན་སོང་ཐུགས་རྗེ་ཆེ། རྟེའུའི་མི་མང་རྣམས་རྒྱལ་གྱུར་ཅིག་དགེ་འདུན་པ་གསུམ་མྱུར་དུ་བཙན་ལས་ཐར་བའི་རེ་བ་ཡོད།
རང་ཉིད་རྟའུ་ལུང་པ་དང་སྤེལ་ཀོབ་གཞིས་ཆགས་སུ་རྒྱུས་ཡོད་མི་སྣ་ཞིག་ཡིན་པའི་ཆ་ནས་འདིར་ཡོད་པའི་གནས་ཚུལ་ར་འགའ་ཁ་གསལ་དུ་གཏོང་ཆོག་པར་ཞུ།
ཚེས་ ༢༡ ཉིན་འཛིན་བཟུང་བྱས་པའི་རྒྱལ་མཚན་ནི་རྟའུ་ཉ་ལུ་ཞབ་གྲོང་སྡེ་ནས་རེད་འདུག་ལ། ཁོང་རྒྱ་ནག་ཁྲེན་ཏུ་རུ་ཉེ་འབྲེལ་ནད་པ་ཞིག་གི་ནད་གཡོག་ཏུ་ཡོད་སྐབས་བཟུང་ཡོད་འདུག
གཞན་ནོར་བུ་ཟེར་བ་ནི་རྟའུ་ལུ་ལུ་གྲོང་སྡེ་ནས་ཡིན་པ་དང་རྒྱ་ནག་ཁྲེན་ཏུ་ནས་ཡར་གཡག་ལ་ཡོང་སའི་སུ་ཡང་ས་གནས་ན་ཚེས་ ༢༢ ཉིན་བཟུང་ཡོད་འདུག
དེ་བཞིན་གཞན་གཅིག་གི་མིང་ཤེས་རྟོགས་མི་འདུག་མོད་རྟའུ་ནས་ཡར་བྲག་འགོ་ཕྱོགས་སུ་འགྲོ་སའི་ཁང་གསར་ཕྱོགས་ནས་ཡིན་པ་དང་ཚེས་ ༡༩ ཉིན་བཟུང་ཡོད་འདུག
གཞན་དེང་སྐབས་ཉ་མཚོ་དགོན་མཐའ་འཁོར་དུ་དམག་གིས་བསྐོར་ཡོད་པ་དེ་རེ་ཞིག་ཕྱིར་འཐེན་བྱས་འདུག་ནའང་། རྫོང་རང་གི་ལམ་ཆེན་ཁག་ཏུ་དམག་སྐྱེལ་རླངས་འཁོར་དང་། འཐབ་འཁོར་tank་མང་པོ་འགྲོ་བསྐྱོད་ཀྱིས་དམ་དྲག་སྔར་བཞིན་འདུག
དེ་བཞིན་སློབ་གྲྭ་ཁག་ཀྱང་ད་དུང་བདུན་ཕྲག་གཅིག་གི་རིང་ལ་སྒོ་རྒྱག་རྒྱུ་རེད་འདུག
གཞན་གྲྭ་ཚེ་དབང་ནོར་བུ་ལགས་ཀྱིས་སྐུ་ལུས་མེ་རུ་སྤར་ནས་བདུན་གཅིག་གི་དུས་ཚིག་ཐད། སྦེལ་ཀོབ་ཁུལ་ཀྱི་ས་གནས་གཞོན་ནུ་བུད་མེད་ཀྱིས་སྔོ་སྨོན་དང་ལས་འགུལ་ཡང་སྤེལ་མ་སོང་། འོན་ཀྱང་། སྐུ་ཞབས་འཇིག་བྲལ་བསྟན་འཛིན་དང་བཀྲ་ཤིས་གཉིས་ནས་ས་གནས་བཞོན་ནུ་དང་བུད་མེད། དབུས་གང་ལྗོངས་རང་བདེན་རྩོད་ལེན་མཐུན་ཚོགས། ས་གནས་བོད་རྒྱལ་ཡོང་མང་གཙོ་ཚོགས་པའི་ཚོགས་གཙོ་བཅས་གདན་ཞུས་ཀྱིས། “འདས་པའིལོ་རྒྱུས་ནང་བོད་དོན་དུ་སྲོག་མེ་རུ་སྤར་ནས་སྐུ་གྲོངས་བའི་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་དང་། རྒྱལ་གཅེས་དཔའ་བོ་ཕུན་ཚོགས། རྒྱལ་གཅེས་དཔའ་བོ་ཚེ་དབང་ནོར་བུ་བཅས་ཀྱིས་སྐུ་སྲོག་མེ་རུ་སྤར་བའི་དགོས་འདུན་དང་སྐད་འབོད། སྐབས་དེ་དག་གི་བོད་ཕྱི་ནང་གི་གནས་སྟངས།” ཅེས་པའི་བརྗོད་གཞིའི་ཐོག་བགྲོ་གླེང་ཞིག་བྱས་སོང་མོད། ས་གནས་གཞོན་ནུའི་ཚོགས་གཙོ་རྡོ་གླིང་དུ་གཞོན་ནུའི་ཚོགས་ཆེན་དུ་ཕྱིན་འདུག ཚོགས་གཞོན་གྱིས་ཁོ་རང་གི་ནང་ལ་སྒེར་ཀྱི་ཞབས་བསྟན་བྱེད་ཀྱིན་ཡོད་སྟབས་བགྲོ་གླེང་ཐོག་གཞོན་ནུའི་འཐུས་མི་ཞིག་བཏང་འདུག བུད་མེད་དང་མང་གཙོ་ཚོགས་པའི་ཚོགས་གཙོ་ཕེབས་འདུག དབུས་གངས་ལྗོངས་ནས་རྒྱུན་ལས་ཞིག་ཕེབ་འདུག
གཞན་བདུན་ཚིག་དང་པོར་སྤེལ་ཀོབ་ཁུལ་དུ་མོན་གྷོ་ནས་རྟའུའི་གྲྭ་པ་གཉིས་ཀྱིས་སེ་རར་སོགས་སུ་སྔོ་སྨོན་སྐྱབས་འཇུག་སོང་།
ཆོད་སེམས་དང་ལ་རྒྱ་རི་རབ་ལས་མཐོ། རྒྱ་མཚོ་ལས་ཟབ་པའི་འདས་པོ་མཆོག་ལ་ཁ་ཙམ་མིན་པར་བོད་རྒྱལ་ཁབ་འདི་ཉིད་ཀྱི་བདེ་དོན་དུ་གཅེས་པའི་ལུས་སྲོག་ལེགས་སྐྱེས་སུ་ཕུལ་གང་ཉིད། སླར་ཡང་བོད་གངས་ཅན་པའི་ཞིང་དུ་མཐོ་རིས་ཀྱི་ཡོན་ཏན་བདུན་དང་ལྡན་པའི་མི་ལུས་རིན་པོ་ཆེ་མྱུར་དུ་ཐོབ་པའི་དབྱིང་ན་བཞུགས་པའི་རྒྱལ་བ་སྲས་དང་བཅས་པས་དཔང་པོ་མཛད་དུ་གསོལ། ངན་སོང་སྡུག་བསྔལ་མི་མྱོང་ཞིང་། །དཀའ་བ་སྤྱད་པ་མེད་པ་ཡིས། །ལྷ་བས་ལྷག་པའི་ལུས་ཐོབ་ནས། །དེ་ཉིད་སངས་རྒྱས་མྱུར་ཐོབ་ཤོག
དོན་ཁོ་ལགས། འདི་བཞིན་སྤེལ་གནང་བ་ཐུགས་རྗེ་ཆེ།