གཟའ་ཕུར་བའི་ཉིན་བོད་རང་སྐྱོང་ལྗོངས་ཀྱི་དམར་ཤོག་རྒྱུན་ལས་དྲུང་ཆེ་རུ་ཁྲིན་ཆོན་ཀོ་གསར་དུ་སྐོ་འཇོག་བྱས་ཡོད་པར་མ་ཟད། ཉིན་དེར་ནན་ཧེ་དང་ཡུན་ནན་ཞིང་ཆེན་གྱི་དམར་ཤོག་རྒྱུན་ལས་དྲུང་ཆེ་གཉིས་ཀྱང་གསར་སྐོ་བྱས་འདུག
ཟླ་ ༨ ཚེས་ ༢༥ ཉིན་གྱི་ཕྱི་དྲོ་བོད་རང་སྐྱོང་ལྗོངས་ཀྱི་མཐོ་རིམ་དཔོན་རིགས་ལས་བྱེད་ཚོགས་འདུ་བསྡུས་ཏེ། ཚོགས་ཐོག་ཏུ་རྒྱ་གཞུང་དབུས་རྩ་འཛུགས་སྡེ་ཁག་གི་མགོ་གཙོ་གཞོན་པ་ཀྲང་ཅིས་ནན་གྱིས་རྒྱ་ནག་དབུས་དམར་ཤོག་གཞུང་གི་ཚབ་བྱས་ཏེ། དེ་སྔའི་རྒྱ་ནག་ཧེ་པེ་ཞིང་ཆེན་གྱི་མངའ་སྡེ་བློན་ཆེན་ཁྲིན་ཆོན་ཀོ་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་རུ་བསྐོ་འཇོག་བྱས་པ་ཁྱབ་བསྒྲགས་བྱས་འདུག གཞན་ཡང་། ཉིན་དེར་ནན་ཧེ་དང་ཡུན་ནན་ཞིང་ཆེན་གཉིས་ཀྱི་ཆེས་མཐོའི་མགོ་ཁྲིད་ཀྱང་དུས་མཉམ་དུ་གསར་བསྐོ་བྱས་འདུག ཐེངས་འདིའི་བོད་རང་སྐྱོང་ལྗོངས་ཀྱི་ཆེས་མཐོའི་མགོ་ཁྲིད་གསར་བསྐོ་དེ་ནི། ཕྱི་ལོ་ ༢༠༠༨ ལོར་བོད་ནང་གཞི་རྒྱ་ཆེ་བའི་ཞི་བའི་ངོ་རྒོལ་བྱུང་བའི་རྗེས་སུ། ཆེས་མཐོའི་མགོ་ཁྲིད་འཕོ་འགྱུར་བཏང་པ་ཐོག་མ་ཆགས་ཡོད། ཀྲང་ཅིན་ལི་ཡིས་བོད་རང་སྐྱོང་ལྗོངས་ཀྱི་ཆེས་མཐོའི་མགོ་ཁྲིད་བྱས་པའི་ལོ་ ༥ དུས་ཡུན་རིང་། བོད་ཐོག་འཛིན་པའི་སྲིད་ཇུས་སྔར་བས་དམ་དྲག་ཤུགས་ཆེ་རུ་ཕྱིན་པར་མ་ཟད། ༸གོང་ས་མཆོག་གཙོས་བཙན་བོད་མིའི་སྤྱི་ཚོགས་ལའང་ཁ་རྡུང་དྲག་པོ་བཏང་ཡོད་སྟབས། ཐེངས་འདིའི་མགོ་ཁྲིད་འཕོ་འགྱུར་ཐད་རྒྱལ་སྤྱིའི་སྤྱི་ཚོགས་ནང་དོ་སྣང་ཆེན་པོ་སླེབས་བཞིན་ཡོད་འདུག
བོད་རང་སྐྱོང་ལྗོངས་ཀྱི་ཆེས་མཐོའི་མགོ་ཁྲིད་འཕོ་འགྱུར་གྱི་ཚོགས་ཐོག་ཏུ། རྒྱ་གཞུང་དབུས་རྩ་འཛུགས་སྡེ་ཁག་གི་མགོ་གཙོ་གཞོན་པ་ཀྲང་ཅིས་ནན་གྱིས། ཐེངས་འདིའི་མགོ་ཁྲིད་འཕོ་འགྱུར་ནི་རྒྱ་ནག་དབུས་གཞུང་གིས་སྤྱི་ཡོངས་ཀྱི་ལས་ཀའི་དགོས་མཁོ་དང་། བོད་རང་སྐྱོང་ལྗོངས་ཀྱི་མགོ་ཁྲིད་ཚན་ཁག་འཛུགས་སྐྱོང་ཐད་ཞིབ་འཇུག་བྱས་ཏེ་གཏན་འབེབས་བྱས་པ་ཞིག་ཡིན་སྐོར་དང་། བོད་རང་སྐྱོང་ལྗོངས་ཀྱི་རིམ་པ་སོ་སོའི་མགོ་ཁྲིད་ལས་བྱེད་ཚོས་རང་རྟོགས་ཀྱི་སྒོ་ནས་སྒྲིག་ཁྲིམས་བརྩི་སྲུང་བྱས་ཏེ་རྒྱ་ནག་དབུས་གཞུང་གི་དམིགས་གཞི་ལྟར། ཆེས་མཐོའི་མགོ་ཁྲིད་འཕོ་འགྱུར་སྐབས་བརྟན་ལྷིང་ངང་ལས་དོན་རྩིས་སྤྲོད་རྩིས་ལེན་ཡོང་ཐུབ་པ་བྱ་དགོས་པ་ནན་བརྗོད་བྱས་འདུག གསར་དུ་བསྐོ་འཇོག་བྱས་པའི་ཁྲིན་ཆོན་ཀོ་ཡིས་ཀྱང་ལས་ཁུར་གཏམ་བཤད་སྐབས། ཁོ་རང་བོད་རང་སྐྱོང་ལྗོངས་ཀྱི་མགོ་ཁྲིད་དུ་བསྐོས་པ་དེ་ནི་རྒྱ་ནག་དབུས་གཞུང་གིས་རང་ཉིད་ལ་གོ་སྐབས་སྤྲད་པ་ཞིག་དང་། ཁོའི་ནུས་པར་ཚོད་བགམ་བྱས་པ་ཞིག་ཡིན་ཚུལ་དང་། ཁོས་མ་འོངས་པར་ཆབ་སྲིད་དང་བསམ་བློ། བྱ་སྤྱོད་གང་ཅིའི་ཐད་ནས་ཧུའུ་ཅིན་ཐའོ་ཡིས་སྣེ་ཁྲིད་པའི་རྒྱ་ནག་དབུས་གཞུང་དང་གཅིག་མཐུན་གྱི་ལངས་ཕྱོགས་རྒྱུན་འཛིན་བྱ་རྒྱུ་ཡིན་སྐོར་བརྗོད་འདུག
བོད་རང་སྐྱོང་ལྗོངས་ཀྱི་ཆེས་མཐོའི་མགོ་ཁྲིད་ལ་འཕོ་འགྱུར་བྱུང་བ་དེས་བོད་ནང་གི་གནས་སྟངས་ཐད་འགྱུར་བ་འབྱུང་མིན་ཐད། པེ་ཅིན་གྱི་མི་རིགས་གནད་དོན་ཉམས་ཞིབ་པ་ཅང་ཐའོ་ཡུང་གིས་བརྗོད་དོན། མི་རིགས་སྲིད་ཇུས་ནི་རྒྱ་ནག་དབུས་གཞུང་གིས་གཏན་འབེབས་བྱེད་བཞིན་ཡོད་ལ། བོད་རང་སྐྱོང་ལྗོངས་ཀྱི་དམར་ཤོག་རྒྱུན་ལས་དྲུང་ཆེ་ནི་སྲིད་ཇུས་དེ་ལག་བསྟར་བྱེད་མཁན་ཙམ་ཡིན་སྟབས། རྩ་བའི་མགོ་ཁྲིད་འཕོ་འགྱུར་བྱུང་བ་ཙམ་གྱིས་གཞི་རྩའི་སྲིད་ཇུས་ལ་འགྱུར་ལྡོག་གང་ཡང་འགྲོ་མི་སྲིད་པ་ཞིག་རེད། ཡིན་ནའང་། མགོ་ཁྲིད་མི་སྒེར་སོ་སོའི་སྲིད་སྐྱོང་སྟངས་དང་བྱ་སྤྱོད་འཁྱེར་སྟངས་ཐད་ནས་ཁྱད་པར་ཕྲན་བུ་འབྱུང་སྲིད་པ་རེད། ཅེས་བརྗོད་ཡོད་པ་རེད། ཡིན་ནའང་། ཉེ་སྔོན་བོད་རང་སྐྱོང་ལྗོངས་བཙུགས་ནས་ལོ་ ༦༠ འཁོར་བ་ཞེས་པའི་མཛད་སྒོའི་ཐོག་ཏུ། ཞིས་ཅིན་ཕེན་གྱིས་མཐའ་གཅིག་ཏུ་ཁ་བྲལ་བར་ཁ་གཏད་གཅོགས་དགོས་སྐོར་བསྒྲགས་ཏེ། རྒྱ་གཞུང་གིས་བོད་ཐོག་འཛིན་པའི་དམ་དྲག་སྲིད་ཇུས་མུ་མཐུན་རྒྱུན་སྐྱོང་བྱ་རྒྱུ་ཡིན་པའི་རྣམ་འགྱུར་ཡང་བསྟན་ཡོད་པ་རེད།
ཁྲིན་ཆོན་ཀོ་ནི་རྒྱ་ནག་ཧི་ནན་ཞིང་ཆེན་པེན་ཡུས་ཀྱི་མི་ཡིན་པ་དང་ད་ལྟ་ལོ་ ༥༦ ཡིན་འདུག ཁོ་ནི་དམག་མིའི་རྒྱབ་ལྗོངས་ཅན་གྱི་མི་ཞིག་ཡིན་པ་དང་། དེ་སྔོན་ཧི་ནན་ཞིང་དང་ཧི་པེ་ཞིང་ཆེན་གཉིས་སུ་རིམ་པར་མངའ་སྡེ་བློན་ཆེན་གྱི་འགན་ཁུར་མྱོང་ཡོད་པ་རེད། ད་ལྟའི་སྲིད་བློན་གཞོན་པ་ལི་ཁི་ཆང་གིས་ཕྱི་ལོ་ ༡༩༩༨ ལོར་ཧི་ནན་ཞིང་གྱི་མངའ་སྡེ་བློན་ཆེན་གྱི་འགན་འཁུར་སྐབས། ཁྲིན་ཆོན་ཀོ་མངའ་སྡེ་བློན་ཆེན་གཞོན་པ་ཡིན་པ་དང་ཁོ་གཉིས་བར་འབྲེལ་བ་དམ་ཟབ་བྱུང་ཡོད་པ་རེད། དེ་བཞིན་བོད་དུ་རྒྱུན་རིང་མཐོ་རིམ་དཔོན་རིགས་ཀྱི་ལས་འགན་ཁུར་མྱོང་ཡོད་པའི་ཧུའུ་ཅིན་ཐའོ་དང་ཧུའུ་ཁྲོན་ཧྭ་བཅས་ལའང་འབྲེལ་བ་ཤུགས་ཆེན་པོ་ཡོད་འདུག
རྒྱ་གཞུང་གིས་བོད་རང་སྐྱོང་ལྗོངས་ཟེར་བ་བཙུགས་ནས་ལོ་ ༦༠ འདས་ཡོད་པ་དང་། ད་ལྟའི་བར་བོད་རང་སྐྱོང་ལྗོངས་ཀྱི་ཆེས་མཐོའི་དམར་ཤོག་དྲུང་ཆེ་ ༡༡ བརྗེ་སྤོར་བྱས་ཡོད་ལ། ད་ལྟའི་རྒྱ་ནག་གིས་སྲིད་འཛིན་ཧུའུ་ཅིན་ཐོ་ཡང་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེར་བསྡད་མྱོང་ཡོད། དྲུང་ཆེ་དེ་དག་རིམ་པའི་ཁྲོད་བོད་རིགས་གཅིག་ཀྱང་བསྐོ་འཇོག་བྱས་མྱོང་མེད།
གསར་འགོད་པ། ཚེ་རིང་རྒྱལ།
བོད་ནང་ལ་ཡང་རྒྱ་རྒན་ཟ་འདྲེ་གཅིག་གི་མང་རུ་སོང་བ་རེད། བོད་དོན་ཆེད་ཟ་འདྲེ་དེར་རེ་བ་འཛིན་རྒྱུ་ཡོད་པ་མ་རེད། དེ་ལས་བོད་པ་ཚོའི་གོ་སྐབས་ལ་སྒུག་དགོས།
ཅི་བཤད་མི་གཙོ་ཅི་བྱེད་གཙོ།
དམངས་གཙོའི་ཏང་ཡོན་ངོ་མ་རེ།
ཡོད་ཀྱང་ཡོད་ལ་ཕན་ཡང་ཕན།
གང་ལྟར་ཞི་བའི་འབྲེལ་མོལ་ལས།
སྟོབས་གཞན་བདག་ལ་མེད་པས་སོ།
མཆན་བཏབ་རྗེས་ཡར་འཇུག་ཐང་མང་བྱེད་དགོས་ཀྱི་འདུག་འདི་དུས་བབ་ལས་ཁུང་གི་འཐུས་ཤོར་གྱི་རྣམ་པ་ཞིག་མངོན་གྱི་མེད་དམ་
ཁྲིན་ཆོན་ཀོ་ལ་རེ་བ་བྱེད་ས་མེད་པ་ཁོས་ལས་ཁུར་གཏམ་བཤད་སྐབས་སུ་ཁོ་རང་བོད་རང་སྐྱོང་ལྗོངས་ཀྱི་མགོ་ཁྲིད་དུ་བསྐོས་པ་དེ་ནི་རྒྱ་ནག་དབུས་གཞུང་གིས་རང་ཉིད་ལ་གོ་སྐབས་སྤྲད་པ་ཞིག་དང་། ཁོའི་ནུས་པར་ཚོད་བགམ་བྱས་པ་ཞིག་ཡིན་ཚུལ་དང་། ཁོས་མ་འོངས་པར་ཆབ་སྲིད་དང་བསམ་བློ། བྱ་སྤྱོད་གང་ཅིའི་ཐད་ནས་ཧུའུ་ཅིན་ཐའོ་ཡིས་སྣེ་ཁྲིད་པའི་རྒྱ་ནག་དབུས་གཞུང་དང་གཅིག་མཐུན་གྱི་ལངས་ཕྱོགས་རྒྱུན་འཛིན་བྱ་རྒྱུ་ཡིན་སྐོར་བརྗོད་འདུག་པ་འདི་ལས་གསལ་རྟོགས་ཐུབ་པ་ཞིག་རེད།
ཁྲིན་ཆོན་ཀོ་ལགས་ཀྱིས་བདེན་རྫུན་གོ་མི་ལྡོག་པར་བོད་དོན་ཐད་ལ་དངོས་ཐོག་བདེན་འཚོལ་རང་གནང་རྒྱུར་རེ་སྐུལ་ཞུ།