ངས་བཙན་བྱོལ་བོད་མིའི་མཐོ་རིམ་སློབ་མ་འགའ་མཐོང་བྱུང་།

རླབས་ཆེན་རྒྱ་མི་རིགས་ཀྱི་སློབ་གསོ་ལ་ང་ཚོས་མིག་དཔེ་ལྟ་དགོས་ཀྱི་འདུག༼ སློབ་གསར་གནས་ལེན་སྤྲོ་ཚོགས་ལ་བསྐྱོད་པའི་ཟིན་ཐོ ༽

འབོ་ར་ཤེས་རབ།  ( ཤེས་རབ་དགའ་ཚལ་སློབ་གླིང་།)        ལྡི་ལི་ནས།

     འདི་ནས་བརྩིས་པའི་མི་ལོ་བརྒྱ་ཐམ་པའི་ཡར་སྔོན་ཏེ་ཟླ་ ༢ ཚེས་ ༡༢ ཉིན་རྒྱ་ནག་གི་རླབས་ཆེ་བའི་དབུ་ཁྲིད་སུན་ཀྲུང་ཧྲན་གྱིས་“མི་སེར་དོན་གསུམ་གྱི་རིང་ལུགས།”(མི་རིགས་རིང་ལུགས་དང་།  མི་སེར་མངའ་དབང་རིང་ལུགས།   མི་སེར་འཚོ་གནས་རིང་ལུགས།) ལ་བརྟེན་ནས་རྒྱ་ནག་གི་ལོ་རྒྱུས་ཐོིག་ཆེས་ཐོག་མའི་གསར་བརྗེ་སྟེ་“ལྕགས་ཕག་ལོའི་གསར་བརྗེ།” ཞེས་པས་མན་ཇུ་གོང་མ་ཁྲི་ལས་ཕབ་ཅིང་།   ལོ་ངོ་སྟོང་ཕྲག་རིང་གི་རྒྱ་ནག་གོང་མའི་ལམ་ལུགས་ཡོངས་རྫོགས་མགོ་རྟིང་བསླགས།    དུས་དེ་ནས་བཟུང་རྒྱ་ནག་ཏུ་བསམ་བློའི་དཔལ་ཡོན་གྱི་ཁོ་ལག་རྒྱས་ཏེ་ད་བར་དུ་དུས་རབས་གཅིག་ཏག་ཏག་འདས་ཤིང་།    བསམ་བློའི་ཉེར་ལེན་དེ་ལ་བརྟེན་ནས་རྒྱ་ནག་གི་ཤེས་ཡོན་མི་སྣ་གཙོས་སློབ་ཆེན་སློབ་མ་དང་།   ཐ་ན་སློབ་འབྲིང་སློབ་མ་ཚུན་ཆད་དུ་མི་རིགས་རིང་ལུགས་ཀྱི་ལྟ་བ་ཤུགས་ཆེ་ཞིང་།   རང་གི་ཆེ་མཐོང་ལ་གོང་བཀུར་དང་གདེངས་འཇོག་བྱེད་པ་ནི་ཡོངས་གྲགས་ཡིན། རང་རེ་བོད་ནང་དུ་ཡང་འདི་དང་གཙོ་བོ་རྒྱ་ནག་གི་“ལྔ་བཞིའི་ལས་འགུལ”གྱི་ཤུགས་རྐྱེན་འོག་ལོ་རབས་བརྒྱད་ཅུ་བ་ནས་བཟུང་བོད་ཀྱི་མཐོ་རིམ་སློབ་མ་གཙོས་ཞིང་འབྲོག་གི་སློབ་འབྲིང་བ་ཚུན་ཆད་ནས།   ང་བོད་མི་རིགས་དང་།   གངས་ཅན་པ་ཡིན་ཞེས་མི་རིགས་རིང་ལུགས་ཀྱི་ལྟ་བ་ཤུགས་ཆེ་རུ་འགྲོ་བཞིན་པ་ནི་ཀུན་གྱིས་མཐོང་གསལ་ལྟར་ཡིན།   

རྒྱ་ནག་གི་ལོ་རྒྱུས་རང་བཞིན་ཅན་གྱི་བསམ་བློའི་འཕེལ་རིམ་འདིའི་སྟེང་ནས་རང་རེ་བཙན་བྱོལ་སྤྱི་ཚོགས་སུ་རགས་ལྟ་ཞིག་བྱས་ན།   རང་ཅག་གི་བསམ་བློར་མུ་གེ་ཐེབས་ཤིང་རྒྱ་ནག་ལྟ་བུའི་མི་རིགས་རིང་ལུགས་པ་ཞིག་བསྐྱེད་སྲིང་བྱེད་པའི་བསམ་བློའི་སློབ་གསོ་ནི།   ད་དུང་རང་ཅག་རྒྱ་ནག་ལས་དུས་རབས་གཅིག་གི་རྗེས་ལུས་ཐེབས་ཡོད་པ་གསལ་བོར་ཤེས་ཐུབ།   ང་ཚོར་༸གོང་ས་མཆོག་གིོས་དམངས་གཙོ་གསོལ་རས་གནངས་པའི་མི་ལོ་ལྔ་བཅུའི་དུས་ཡུན་ནང་།   བཙན་བྱོལ་དུ་ཡིག་རྨོངས་སེལ་བ་ཙམ་ལས་བསམ་བློ་བ་དང་ཤེས་ལྡན་མི་སྣས་དབུལ་བ་ནི་༸གོང་ས་མཆོག་གིས་ཐུགས་སྐྱོ་བོའི་ངང་ནས་མི་ལོ་སུམ་ཅུ་ཐམ་པས་འཐུས་ཤོར་ཕྱིན་འདུག    ཅེས་གསུང་སྐད་ཤོར་བར་ཁག་ཅི་ལ་ཡོད་དེ།  ཟླ་འདིའི་ཚེས་ ༢༠ སྟེ་གཟའ་ཉི་མའི་དགོང་མོར་འདི་ག་ལྡི་ལི་བོད་ཁྱིམ་དུ་དགོང་ཚོགས་ཤིག་ཡོད་པར་འགན་བདག་གིས་ང་ཚོ་མཉམ་ཞུགས་ཆོག་མིན་གྱི་ཆོག་མཆན་ཞུས་རྗེས།   ཆུ་ཚོད་ ༨ དང་ཕྱེད་ཀའི་ཐོག་ང་ཚོ་ལྡི་ལི་བོད་ཁྱིམ་དུ་ཕྱིན་པ་ཡིན།  ངའི་སེམས་སུ་དགོང་ཚོགས་དེ་ནི་བགྲོ་གླེང་ཞིག་གམ་ཡང་ན་ཆབ་སྲིད་དང་འབྲེལ་བའི་གཏམ་རྒྱུད་འཁྲབ་སྟོན་ཞིག་ལས།   དབྱིན་ཡིག་ཐོག་བྲིས་པའི་ཕྱི་ལོ་ ༢༠༡༡ ལོའི་སློབ་གསར་སྣེ་ལེན་སྤྲོ་ཚོགས་(Happy Fresher’s Day 2011) ཞེས་པ་མཐོང་རག་བར་དུ་གཞས་སྣ་དང་ཞབས་བྲོའི་དགོང་ཚོགས་ཤིག་ཡིན་པ་བློ་ཡུལ་དུ་མ་ཤར།

རྒྱ་གར་རང་བཙན་དུས་ཆེན་ཉིན་མོ་སྟེ་ཕ་ཡུལ་བོད་དུ།    ཁམས་རྟའུ་རྒྱལ་གཅེས་དཔའ་བོ་གྲྭ་ཚེ་དབང་ནོར་བུ་ལགས་ཀྱིས་ལས་ངན་མི་རིགས་འདིའི་རང་དབང་དང་བདེ་སྐྱིད་ཆེད་དུ་རང་ལུས་མེ་རུ་བསྒྲོན་ཏེ་འཇིག་རྟེན་མི་ཡུལ་དང་ཁ་བྲལ་ནས་བདུན་གཅིག་ཀྱང་ཕྱིན་མེད།   དུས་ཚོད་འདི་འདྲ་ཞིག་གི་སྐབས་སུ་བོད་ཀྱི་སློབ་ཆེན་ཞིག་གི་ངོས་ནས་བཤད་ན་གཞས་དང་ཞབས་བྲོའི་དགོང་ཚོགས་ཤིག་གོ་སྒྲིག་བྱས་པ་ནི་ཞབས་འདྲེན་དང་ནོར་འཁྲུལ་ཚབས་ཆེན་ཞིག་ཏུ་ངོས་འཛིན་བྱེད་པ་ལས་འོས་མེད་ཀྱང་།   ཡིད་སྐྱོ་བ་ནི་ཚོགས་ཁང་གི་གྲལ་མཐའ་རུ་ཕོན་ཆེ་ཞིང་སྤྱོད་པ་ངན་པའི་མཐོ་རིམ་སློབ་མའི་སྐོར་ཚོགས་རེད།  དགོང་ཚོགས་དེའི་མགོ་ནས་མཇུག་བར་དུ་རྣ་ལ་གཟན་པའི་སྐད་ཅོར་ཚོད་མེད་དང་ཤུ་སྒྲ་འཐེན་རྐྱང་རྐྱང་ལས། མགོ་འཛིན་པའི་སྐད་ཆ་དང་དེ་མིན་གཞས་ཚིག་སོགས་ཅི་ཡང་མི་གོ  མི་ཞིག་ཡིན་ཕྱིན་དེ་མ་ཐག་ཏུ་ཧ་གོ་བ་ནིོ་ཁོ་ཚོར་མིས་གཏམ་བཤད་བྱེད་པའི་སྐབས་སུ་ཁ་ཁུ་སིམ་པོར་གནས་དགོས་པའི་ཤེས་བྱ་ཆུང་ཆུང་ཆུང་ཆུང་བོ་དེ་ཡང་མེད་པ་དང་།   འདིའི་སྟེང་ང་ཚོས་ཤེས་ཐུབ་པ་ཞིག་ནི་ཁོ་ཚོས་དཔེ་སྟོན་སློབ་གྲྭའི་ཕྲུ་གུ་ཆུང་ཆུང་དེ་ཚོའི་ས་ནས་སློབ་སྦྱོང་མང་པོ་ཞིག་བྱེད་རྒྱུ་ཡོད་པ་དེ་རེད།  ངའི་སེམས་སུ་མི་ལོར་ཉི་ཤུར་བཙོན་དུ་བསྡད་པའི་ཉེས་ཅན་གྱི་བཙོན་པ་སྐོར་ཞིག་གློ་བུར་དུ་བཙོན་གྲོལ་ཞིག་ཐོབ་ན་འདི་འདྲའི་ཁ་ཕྱོགས་མེད་པའི་ཚོར་བ་རྣོན་པོ་རེ་ཨེ་ཡོད་སྙམ་བཞིན་གྲལ་མཐའ་ནས་ཐོན་ཏེ་གར་སྟེགས་མཁྲིས་ཀྱི་ཟུར་སྒོ་ནས་མར་སློབ་མའི་ཕྱོགས་སུ་བལྟས་པ་ན།   དེའི་ཉེ་ས་རུ་དབྱིན་ཇི་རྨོ་མོ་གཉིས་མདུན་གྲལ་དུ་དགེ་ལས་འཛིན་སྐྱོང་རྣམས་དང་མཉམ་དུ་བསྡད་འདུག   རྨོ་མོ་གཅིག་དེས་རྒྱབ་ལོགས་སུ་བལྟ་ཙམ་བལྟ་ཙམ་བྱས་ཏེ་མགོ་བོ་གཡུག་བཞིན་མི་འདོད་པའི་བརྡ་ཞིག་བསྟན་པ་དེས་ངའི་སྙིང་ལ་ཟུག་གཟེར་ཞིག་བསླངས་པ་དང་མཉམ་དུ།   ཨ་ཁ་འདི་སློབ་གྲྭ་འདིའི་སྦྱིན་ཞིག་མིན་ནམ་སྙམ་པའི་དོགས་པ་ཞིག་གིས་སློབ་གྲྭ་འདི་དང་ཐད་ཀར་འབྲེལ་མེད་ཕྱི་མི་ང་ཡང་ངོ་གནོངས་དགོས་པ་ཞིག་བྱུང་།    

མ་གཞི་མི་གཞི་བོར་ཞིང་རང་ཉིད་ལ་རྩིས་མཐོང་མེད་པའི་མི་ལ་མཚོན་ན་འདི་ལྟ་བུ་ནི་རྒྱུན་ལྡན་ཞིག་ཡིན་མོད།    འོན་ཀྱང་མཐོ་རིམ་སློབ་གྲྭའི་མིང་འཁུར་བའི་སློབ་གྲྭ་འདི་རུ་རང་ཉིད་ཀྱི་རྩིས་མཐོང་བོར་ཞིང་གོ་རྟོགས་མེད་པའི་གྲངས་འབོར་མང་ཕྱིར་ཡིད་མུག་ས་དང་ངུ་བྲོ་བ་ནི་འདི་ཉིད་རེད།  འདི་འདྲའི་རིགས་ལ་ཀྲུང་གོའི་དེང་རབས་བུད་མེད་རྩོམ་པ་པོ་ཞོའོ་རྨིན་གྱིས་སྡོམ་ཚིག་འདི་འདྲ་ཞིག་བརྒྱབས་ཡོད་དེ།    “མི་བུ་སྒེར་གྱི་རྩིས་ཐང་སྣང་མེད་དུ་འཇོག་པའི་མི་རིགས་ལ་ཐུན་མོང་གི་རྩིས་ཐང་ཟེར་རྒྱུ་ཞིག་མེད།  དེ་བཞིན་དུ།  རང་ཉིད་ལ་གཙང་བཤེར་གཏན་ནས་མི་བྱེད་ཅིང་།  ལྡབ་ལྡིབ་ཀྱི་ཚིག་འཁྲིའི་རང་ཉེས་འགེབས་ཐབས་ཀྱིས།   འགྱོད་བཤགས་ལྷུར་མི་ལེན་པའི་མི་རིགས་ཤིག་ལ་རྩིས་ཐང་ཟེར་རྒྱུ་ཞིག་མེད་དོ།།”   ཞེས་པས་རེ་བ་མེད་པར་ཐག་བཅད་འདུག

དེ་ལས་ཀྱང་སྐྱི་གཡའ་བ་ཞིག་ནི་དགོང་ཚོགས་དེའི་མཇུག་ཏུ་སློབ་བུ་རུས་རྐང་ཅན་སྐོར་ཞིག་གིས་རྒྱལ་གཅེས་དཔའ་བོ་ཚེ་དབང་ནོར་བུ་ལགས་ཀྱི་ཆེད་དུ་མར་མེ་ཁྲོམ་སྐོར་གྱི་གོ་སྒྲིག་ཅིག་ཡོད་པ་གསལ་བསྒྲགས་བྱས་པར།   མེ་ནང་མར་ཁུ་བླུགས་པ་བཞིན་ཚ་ཚ་འུར་འུར་གྱི་སྐད་ཅོར་ཤུགས་ཆེ་རུ་སོང་ཞིང་།    ངེད་ཅག་གིས་ཐུན་མོང་དུ་གོ་བའི་འུར་སྒྲ་ཞིག་ནི།   “ག་རེ།  ཁ་ཚུམས།”  ཞེས་པ་འདི་རེད།   རྒྱ་ནག་གི་བསམ་བློ་བ་སུན་ཀྲུང་ཧྲན་གྱིས་འདི་འདྲ་ཞིག་གསུངས་ཡོད་དེ།  “ཀྲུང་གོའི་མི་སེར་རྣམས་དབུལ་དྲགས་པས་རྒྱུ་འབྱོར་བ་རྒྱས་པར་རེ་ལྟོས་ཆེན་པོ་འཆའ་བ་ལས་དམངས་གཙོ་དང་རང་དབང་ལ་རེ་ལྟོས་ཆེར་མི་བྱེད།    དེའི་སྟབས་ཀྱིས་སྐྱེ་བོ་ཤེས་ལྡན་ཁ་ཤས་ཀྱིས་དམངས་གཙོ་དང་རང་དབང་འཐོབ་ཕྱིར་གཅེས་སྲོག་འབེན་ལ་བཞག་ཀྱང་།     མི་སེར་རྣམས་གྱིས་སྣང་དོགས་ཙམ་ཡང་མི་བྱེད།   དམངས་གཙོ་དང་རང་དབང་ཐོབ་རུང་ཁོ་ཚོ་དགའ་རྒྱུ་མེད་ལ།   དམངས་གཙོ་དང་རང་དབང་མ་ཐོབ་རུང་སྡུག་རྒྱུའང་མེད་དོ།།  དེ་ལས།  སུ་ཞིག་གིས་ནོར་ལོངས་སྤྱོད་ཀྱིས་བློ་བཀུག་སྟེ།   ཡུལ་གྱི་གཤེད་མ་གཞོམ་ལ་ས་ཞིང་བགོ་ཟེར་ཚེ།   མི་སེར་རྣམས་དེ་མ་ཐག་བརྒྱ་ཁ་གཅིག་མཐུན་ཡོང་ངེས། ”  ཞེས་པའི་མི་ལོ་བརྒྱའི་ཡར་སྔོན་ཀྱི་སྐད་ཆ་འདི་ད་ལྟའི་ཁོ་ཚོའི་གནས་སྟངས་འདི་ལ་ཁ་བསྒྱུར་ཞིག་གྱིས་དང་།   ཡང་སྙིང་ཁྱེད་ཀྱིས་ཅི་ཞིག་མཐོང་ཡོང་།     

ཀྱེ་ཀྱེ།  གངས་ཅན་པ།   ཁྱེད་ཅག་གི་མིག་མདུན་ནས་འདི་འདྲའི་སྐྱུག་བྲོ་བའི་བྱ་སྤྱོད་སྤེལ་ན་བཟོད་སྒོམ་བྱེད་ཐུབ་བམ།   བཟང་བོའི་གྲལ་དམའ་ཞིང་།    ངན་པའི་དཔངས་མཐོ་བའི་དངོས་ཡོད་གནས་ཚུལ་འདིར་ཁོ་བོས་བཟོད་སྒོམ་བྱེད་ཐུབ་མ་སོང་།   སྤྱིར་བཏང་ཁོ་བོར་ཆ་རྒྱུས་ཡོད་པ་ཞིག་ནི་༸སྐྱབས་མགོན་ཡིད་བཞིན་ནོར་བུས་སྐུ་ངལ་ལ་མ་འཛེམས་པར་དགུང་ལོ་བགྲེས་པོའི་གནས་སྐབས་འདི་འདྲ་ཞིག་ལ་སྤྱི་བམ་དུ་བཤད་པའི་བོད་མིའི་ཡ་རབས་བཟང་སྤྱོད་འདི་རྒྱུན་གནས་ཡོང་བའི་ཆེད་དུ་༢༠༠༧ ལོ་ནས་བཟུང་སློབ་ཕྲུག་ཚོར་ནང་ཆོས་ངོ་སྤྲོད་གནང་གི་ཡོད་ཀྱང་།     འདིའི་སྐབས་བོད་ཁྱིམ་སློབ་གྲྭ་ཁག་གི་སློབ་མ་ཕལ་མོ་ཆེས་དོ་སྣང་ཙམ་ཡང་མི་བྱེད་པར་གཉིད་ཁུག་པ་དང་འུར་རྒྱག་པ།    ༸གོང་ས་མཆོག་གིས་ནང་ཆོས་ངོ་སྤྲོད་གནང་རྗེས་དགེ་བཤེས་ཚོ་དང་ལྷན་དུ་བགྲོ་གླེང་བྱེད་སྐབས་སུ་འདི་ག་ལྡི་ལི་བོད་ཁྱིམ་ནང་བཞིན་སྐད་ཅོར་དང་འུར་སྒྲ་ཆེ་བ་བཅས་ཀྱིས་ལོ་རེ་རེ་རེ་རེར་དགེ་བཤེས་ཚོས་སྐད་ཤོར་གྱི་ཡོད་པ་དགེ་བཤེས་རྣམ་པ་ཚོར་དྲིས་དང་གསལ་ཐང་ཐང་ཡིན།   དེར་བརྟེན་༸གོང་ས་མཆོག་རང་ཉིད་ནས་ནང་ཆོས་ངོ་སྤྲོད་གནང་རྒྱུ་དེ་ཁ་མིན་དོན་གྱིས་ཁོང་གི་སྐུ་ངལ་འཕར་མ་ཞིག་ཡིན་པ་ང་རང་ལོ་བཞིར་མཉམ་ཞུགས་བྱས་པའི་ཉམས་མྱོང་ལས་བཤད་ཀྱི་ཡོད།

ད་ལོའི་ནང་ཆོས་ངོ་སྤྲོད་སྐབས་སུ་ཨ་མ་རྗེ་བཙུན་པད་མ་ཡང་མཉམ་ཞུགས་ཀྱིས་ངེད་ཅག་ཤེས་རབ་དགའ་ཚལ་གླིང་གི་སློབ་ཕྲུག་ཚོའི་འཁྲིས་སུ་བཞུགས་འདུག    ཉིན་གཉིས་པར་མོས་གསུང་རྒྱུར་“ཁྱེད་ཅག་གིས་ཁ་ཁུ་སིམ་པོའི་ངང་ནས་དོ་སྣང་ཡག་པོ་ཞེ་དྲགས་བྱས་སོང་།   དཔེ་མི་སྲིད་པའི་ཡག་པོ་འདུག”   ཅེས་པའི་ཆོ་ལོ་འདི་སྤྱིར་བཏང་ངེད་ཅག་ལ་འབབ་མིན་མི་ཤེས་ཀྱང་བོད་ཁྱིམ་ཚོ་དང་བསྡུར་ན་ཨ་མ་ལགས་ཀྱིས་ཀྱང་གསུང་རིན་ཡོད་པ་ཞིག་རེད།   གནས་ཚུལ་འདི་དག་གི་ཐོག་ནས་ཁོ་བོས་བོད་ཁྱིམ་སློབ་གྲྭ་ཡོངས་རྫོགས་ལེབ་ལེབ་བྱས་པ་མིན་པ་དང་།  ཤེས་དགོས་པ་ཞིག་ནི་དུང་ཞེན་གྱི་དབང་དུ་མ་སོང་བར་བློ་གཟུ་བོར་གནས་པའི་དཔྱོད་ལྡན་པ་ཚོས་བོད་ཁྱིམ་གྱི་སློབ་གསོ་སྤྲོད་སྟངས་ལ་བསམ་བློ་གཏོང་དགོས་པ་དེ་རེད།  ཤེས་རིག་ལ་ཁག་དཀྲི་ས་མེད་དེ།   (ཕྲུ་གུའི་ནང་མིས་སློབ་ཡོན་སྤྲོད་པ་ལས་གཞན།)བོད་ཁྱིམ་སློབ་གྲྭ་ཁག་གི་འགྲོ་སོང་ཡོངས་རྫོགས་བོད་ཁྱིམ་འཛིན་སྐྱོང་གི་ངོས་ནས་གཏོང་གི་ཡོད་ཕྱིར།  ཤེས་རིག་གིས་ཐད་ཀར་གཏིང་འཛིན་བྱེད་མི་ཐུབ་པ་དང་བྱེད་ཀྱང་ཁར་མི་ཉན་པ་ནི་ངྷ་སའི་རི་གྲོང་ཡོངས་ལ་ས་ཁྱབ་རྡོ་ཁྱབ་ཏུ་སོང་ཡོད།     

ང་ལ་ད་ལྟ་ནས་སེམས་ཁྲལ་ཞིག་ཡོད་པ་ནི། རང་རེའི་སྲིད་སྐྱོང་བ་བློ་བཟང་སེང་གེ་མཆོག་གིས་ལོ་སྔོན་མར།    འབྱུང་འགྱུར་ལོ་ལྔའི་ནང་དུ་རིགས་གཅིག་རྐང་འཛིན་པ་ཁྲི་ཡི་སྐད་ཆ་བཤད་པ་དེ་རེད།   སློབ་གསོའི་ཁ་ཕྱོགས་ཤིག་བསྒྱུར་ན་མ་གཏོགས་གནས་སྟངས་འདི་འདྲ་ཞིག་གི་འོག་ནས་རིགས་གཅིག་རྐང་འཛིན་པ་ཁྲི་ཕར་ཞོགས་སྟོང་གི་སྐད་ཆ་བཤད་ན་ཡང་ནམ་ལངས་ཉི་ཤར་རེད་འདུག     དེར་བརྟེན་རང་ཅག་གིས་བསམ་བློའི་སློབ་གསོའི་ཐོག་ནས་རླབས་ཆེན་རྒྱ་མི་རིགས་ལ་དཔེ་བལྟས་ཏེ་ཨམ་གཙིགས་ཤིག་བསྡམ་རྒྱུ་ལས།   རྒྱ་ནག་གཞུང་གི་ཐལ་དྲགས་པའི་སྲིད་ཇུས་རྒྱུ་མཚན་དུ་བྱས་ནས་རླབས་ཆེན་མི་རིགས་དེའི་དུས་རབས་གཅིག་རིང་གི་མི་བསྐྱེད་སྲིང་བྱེད་པའི་སློབ་གསོའམ།   མི་རིགས་རིང་ལུགས་པ་ཞིག་བསྐྱེད་སྲིང་བྱེད་པའི་སློབ་གསོའི་ཐོག་ནས་ལེགས་ཆ་ལེན་མ་ཐུབ་ན་གྱོང་ཉིས་བརྩེགས་ཡིན་པ་ལས།   རྒྱལ་གཅེས་དཔའ་བོའི་དོན་དུ་མར་མེ་ཁྲོམ་སྐོར་གྱི་གསལ་བསྒྲགས་བྱས་པར “ག་རེ།    ཁ་ཚུམས།”  ཟེར་མཁན་གྱི་རང་ཉིད་ངོ་མི་ཤེས་པའི་མི་འདི་ལྟ་བུའི་རིགས་དང་།   འདི་ལྟ་བུ་བསྐྱེད་བྱེད་ཀྱི་ཕ་མའི་སློབ་གསོ་དང།   སློབ་གྲྭའི་སློབ་གསོ།   ཁོར་ཡུག་བཅས་ལ།  རང་ཅག་གིས་ཁ་ནང་དུ་ཕྱོགས་ཏེ་བཅོས་སྒྱུར་དང་སྐྱོན་བརྗོད་བྱེད་རྒྱུ་ལས།  ནམ་རྒྱུན་རྒྱ་ནག་ཕར་རྒྱུགས་( China China China, Out Out Out)  ཟེར་བ་ལྟ་བུའི་ཕན་པ་འབྱུང་རྒྱུ་དཀའ་ཚོད་དུ་གདའ་འོ།།