མཇལ་ཁའི་རིན་འབབ་དང་ཚོགས་གཙོའི་གསལ་བཤད།

ཉེ་ཆར་༧གོང་ས་མཆོག་ཡུ་རོབ་རྒྱལ་ཁབ་ཁག་ལྔའི་ནང་ཆིབས་བསྒྱུར་བསྐྱངས་པ་དང་བསྟུན་ཏེ། འཇར་མན་བོད་རིགས་ཚོགས་པའི་གསོལ་འདེབས་ཞུས་དོན་ལྟར། ཟླ་འདིའི་ཕྱི་ཚེས་ ༢༤ ཉིན་འཇར་འཁོད་བོད་རིགས་ ༣༠༠ ཙམ་ལ་( HOTEL NASSAUER HOF )ཞེས་པའི་མགྲོན་ཁང་དུ་མཇལ་ཁ་གནང་ཡོད་ལ། སྐབས་དེར་འཇར་མན་བོད་རིགས་ཚོགས་པས་མཇལ་བཅར་བ་རྣམས་ལ་ཡུ་སྒོར་ ༡༠ རེ་ཡི་འཛིན་བྱང་བཙོང་ཡོད། འཛིན་བྱང་བཙོང་མཁན་བུད་མེད་ཅིག་གིས་དངུལ་དེ་ཚོགས་ཁང་གི་གླ་ཆ་ཡིན་ཚུལ་དང་། ཡུལ་སྒོར་བཅུ་དེ་མ་སྤྲད་ན་ནང་དུ་གཏོང་རྒྱུ་མིན་ཚུལ་བརྗོད་དེ། མཇལ་ཁ་ཞུ་མཁན་ཞིག་དང་བོད་རིགས་ཚོགས་པའི་ཚོགས་གཙོ་ལེགས་བཤད་བར་ཁ་རྩོད་ཤོར་ཡོད་པའི་གནས་ཚུལ་ཟླ་འདིའི་ཕྱི་ཚེས་ ༢༥ ཉིན་བོད་ཀྱི་དུས་བབ་དྲ་བར་བཀོད་ཡོད།

རྙོག་གླེང་དེའི་ཐད་འཇར་མན་བོད་རིགས་ཚོགས་པའི་མཚན་ཐོག་ནས་གསལ་བཤད་ཅིག་གནང་འདུག་ལ། དེ་དང་མཉམ་དུ་ཉེ་ལམ་ཚོགས་ཁང་དེའི་སྐོར་ལ་སུད་སིའི་སྐུ་ཚབ་དོན་གཅོད་དང་ཡིག་འབྲེལ་བྱུང་བའི་ངོ་བཤུས་ཀྱང་སྤེལ་འདུག ཉེ་ལམ་ཕྱི་ཟླ་ ༨ ཚེས་ ༡༦ ཉིན་འཇར་མན་བོད་རིགས་ཚོགས་པས་སུད་སི་སྐུ་ཚབ་དོན་གཅོད་མཆོག་ལ་ཡིག་འབྲེལ་ཞིག་བྱུང་བའི་ནང་། “ ཉེ་ལམ་འདི་ག་བོད་རིགས་ཚོགས་པས་དོན་གཅོད་བརྒྱུད་༧གོང་ས་མཆོག་ལ་དམིགས་བསལ་མཇལ་ཁ་ཞུས་པ་བཞིན། འདི་ཟླའི་ཚེས་ ༢༤ ཉིན་མཇལ་ཁ་གནང་གཏན་འཁེལ་བ་དེ་ལྟར་ཡང་། མཇལ་ཁ་གནང་སའི་ཚོགས་ཁང་དེར་གཡར་རིན་སྤྲོད་དགོན་མིན་དང་། གལ་སྲིད་ཁང་གླའི་ཐད་འདི་ག་བོད་རིགས་ཚོགས་པ་ནས་ཐུགས་ཕན་སོས་པ་དེ་འདྲ་འདུག་ན། ང་ཚོས་རོགས་གང་ཐུབ་བྱ་འཆར་ཡོད ” ཅེས་བཀོད་འདུག་པའི་ལན་དུ། ཉིན་དེ་རང་ལ་སུད་སི་སྐུ་ཚབ་དོན་གཅོད་མཆོག་ནས་ “བོད་རིགས་ཚོགས་པ་ནས་ཚོགས་ཁང་གཡར་གླའི་ཐད་ཐུགས་ཕན་སོས་ན་རོགས་ཕན་གནང་གི་ཡིན་གསུངས་པར་ཐུགས་རྗེ་ཆེ་ཞུ་རྒྱུ། རྩ་བའི་ཚོགས་ཁང་གཡར་གླ་ཡུ་སྒོར་ ༡༥༠༠ ཙམ་གནས་ཀྱི་འདུག་ཀྱང་། བོད་རིགས་ཚོགས་པ་ནས་ཞུ་མི་དགོས་པ་བྱུང་སོང་” ཞེས་ལན་ཕེབས་འདུག

བོད་རིགས་ཚོགས་པའི་གསལ་བཤད་དོན་ཚན་གསུམ་ཡོད་པ་དག་ལས་དོན་ཚན་དང་པོའི་ནང་། འཇར་མན་བོད་རིགས་ཚོགས་པ་ཕྱི་ལོ་ ༡༩༧༩ ཟླ་ ༡༢ ཚེས་ ༢༩ ཉིན་བཙུགས་ཚུན་དུ་བོད་དོན་ཐོག་གྲུབ་འབྲས་མངོན་གསལ་བླངས་པའི་སྐོར་དང་། ལས་འགུལ་རབ་དང་རིམ་པ་སྤེལ་ཏེ་བོད་པའི་སྤྱི་ཚོགས་ཁྱོན་ཡོངས་ནས་བསྔགས་བརྗོད་ཐོབ་ཡོད་སྐོར་བཀོད་འདུག དོན་ཚན་གཉིས་པར། “ ས་གནས་གསར་འགོད་པའི་གནས་ཚུལ་དེ་ལོང་བས་རི་མོ་བྲིས་པ་བཞིན་ལག་པར་ཐོག་ཚད་ཚང་མར་ཚོན་ཁྲ་བྱུགས་འདུག གང་ཡིན་ཟེར་ན། ཐོག་མར་མཇལ་ཁ་དགོས་པའི་ཡར་ཞུ་བྱེད་མཁན་བོད་རིགས་ཚོགས་པ་ཡིན་པ་དང་། བོད་ཚོགས་ཀྱིས་མཇལ་ཁ་ཞུས་པ་ཡིན་སྟབས། མཇལ་ཁ་གནང་ཡུལ་གྱི་ཚོགས་ཁང་རིན་འབབ་ཀྱང་སྤྲོད་ཐུབ་དགོས་པ་ཞིག་ཡིན་པས། མི་མང་ས་གནས་ཡུ་སྒོར་བཅུ་རེ་བསྡུས་ཏེ་ཚོགས་སྒེར་གཉིས་ལ་ཁེ་གྱོང་གང་ཡང་མི་ཡོང་ཐབས་བྱས་པ་རེད་ལ། ཕྱོགས་གཞན་ནས་ང་ཚོས་ཡིག་ཐོག་ནས་དོན་གཅོད་ཁང་ལ་ཚོགས་ཁང་རིན་པ་སྤྲོད་འདོད་ཡོད་པའི་བརྡ་ལན་གསལ་བོ་ཞུས་པར་ཟུར་གསལ་ལྟར་ཡིན ” ཞེས་བཀོད་འདུག དེ་དང་མཉམ་དུ་བོད་རིགས་ཚོགས་པའི་༧གོང་ས་མཆོག་གི་མཇལ་ཁ་དངུལ་ལ་བརྗེ་འདོད་མེད་ཅིང་མཇལ་ཁ་ཞུས་པ་དེ་དངུལ་བཟོད་ཆེད་ཀྱང་མིན་པར། མཇལ་ཁའི་སྐབས་སུ་ཞལ་འདེབས་བྱུང་བ་དེ་དག་སྐྱབས་བཅོལ་པ་ལས་ཀ་དང་ཡིག་ཆ་མེད་མཁན་ཚོར་ལམ་གྲོན་དུ་འབུལ་བཞིན་ཡོད་པ། དེའི་ལྷག་མ་རྣམས་བོད་ཚོགས་ཀྱི་མ་དངུལ་ནང་གཏོང་འཆར་ཡོད་ཚུལ་སོགས་བཀོད་འདུག

དོན་ཚན་གསུམ་པར། “ སྤྱིར་ང་ཚོས་སྨྲ་བརྗོད་རང་དབང་དེ་གལ་ཆེར་བརྩི་དགོས་པ་སྨྲས་མེད་རེད་ལ། དེ་ལས་ཀྱང་གནས་ཚུལ་གསར་པ་ཇི་ཞིག་ཐོན་ན་དེར་ཡམ་རྒྱུག་མི་བྱེད་པར། དོན་ངོ་མ་དེ་འཚོལ་ཆེད་བརྟག་དཔྱད་བཏང་། གཞི་ནས་བསམ་ཚུལ་དེ་ཕྱོགས་གཉིས་ཀྱི་འདོད་ཕྱོགས་གང་ལ་འགྲོ་མིན་ལ་མ་ལྟོས་པར་རང་གི་ལྟ་ཕྱོགས་དེ་ཕྱིར་བསྒྲགས་བྱས་ན། བསམ་ཚུལ་སྤེལ་བ་པོ་རང་ཉིད་མི་ཚད་ལྡན་རེད་ལ་སྤྱི་ཚོགས་བརྟན་བརླིང་དང་མི་མང་གི་མཐུན་སྒྲིལ་ལའང་ཕན་རླབས་འཐོན་པ་རེད། ཕྱོགས་གཞན་ནས་ང་ཚོའི་སྤྱི་ཚོགས་ནང་གནས་ཚུལ་འབྲི་མཁན་ལ་སྤྱི་ཚོགས་ཀྱི་ཤེས་བྱ་རང་རྐྱ་འཕེར་བའི་དཔྱོད་ཤེས་དང་། གསར་འགོད་ཀྱི་གནས་ཚད་མ་ལོངས་པའི་རྐྱེན་བྱས་ཏེ། དོན་མེད་ངང་སྤྱི་ཚོགས་ནང་རྙོག་ཟིང་སློང་གི་ཡོད་པ་རེད། ཕ་རོལ་དགྲ་ཕྱོགས་ནས་དེ་གོ་སྐབས་ལ་བཟུང་སྟེ་སྐབས་རེར་ང་ཚོར་གནོད་སྐྱོན་ཆེན་པོ་བཟོ་ཐུབ་ཀྱི་ཡོད་པ་རེད། དེས་ན་དོན་ཚན་གསུམ་གྱི་ལམ་ནས་གསལ་བཤད་ཞུས་པ་འདི་འབྲི་མཁན་ལ་ལན་བརྒྱབ་པ་ཞིག་མིན་པར། རྒྱ་ཆེའི་མང་ཚོགས་ལ་དྲན་སྐུལ་དང་སྤྱི་ཚོགས་མཐུན་འབྲེལ་གྱིས་མདོ་དོན་ང་ཚོ་དམིགས་ཡུལ་གཅིག་གི་ཐོག་བསླེབ་ཐུབ་ཐབས་ཀྱི་ཆེད་དུ་ཡིན ” ཞེས་བཀོད་འདུག

གསར་འགོད་པས་ཁ་པར་བརྒྱུད་འཇར་མན་བོད་རིགས་ཚོགས་པའི་ཚོགས་གཞོན་བསོད་ནམས་ལགས་སུ། ཐེངས་འདིའི་༧གོང་ས་མཆོག་གི་མཇལ་ཁའི་སྐབས་ཡུ་སྒོར་ ༡༠ ཡི་འཛིན་བྱང་བཙོང་བ་དེ་འཇར་མན་བོད་རིགས་ཚོགས་པའི་གྲོས་དོན་ཡིན་མིན་བཅར་འདྲི་ཞུས་སྐབས་ཁོང་གིས། “ དགོངས་དག དེའི་སྐོར་ངས་ཁྱོན་ནས་ཧ་གོ་མ་སོང་། ང་སྐབས་དེར་མཇལ་ཁར་ཡང་བཅར་ཐུབ་མ་སོང་། ཡིན་ནའང་དེ་བོད་རིགས་ཚོགས་པས་གྲོས་བསྡུར་བྱས་པ་དེ་འདྲ་མ་རེད། མཇལ་ཁའི་སྐབས་དངུལ་ལེན་མིན་ཚོགས་གཙོས་ང་ལ་ཁྱོན་ནས་དྲིས་མ་སོང་། ཡིན་ནའང་ངས་ཁོང་ལ་སྐད་ཆ་དྲིས་ན་འགྲིག་གི་རེད ”  ཅེས་བརྗོད་བྱུང་།  

མཇལ་ཁའི་ཉིན་ཚོགས་གཙོ་མཆོག་ལ་ཁ་རྩོད་རྒྱག་མཁན་ཝེ་སི་བྷ་ཌན་ (Wiesbaden ) གྱི་མགོན་པོ་ཞུ་བར། ཉིན་དེར་ཡུ་སྒོར་བཅུ་སྤྲོད་འདོད་མེད་པར་ཚོགས་གཙོར་ཁ་རྩོད་རྒྱག་དོན་སྐོར་དྲིས་པར། “ ཉིན་དེར་མཇལ་ཁར་ཡོང་སྐབས་ཤེས་རབ་ཟེར་བའི་སྐྱེས་དམན་དེས་འཛིན་བྱང་ཞིག་འཚོང་གི་འདུག དེ་ག་རེ་རེད་ཅེས་དྲིས་པར། ཚོགས་ཁང་གི་གླ་ཆ་རེད། དངུལ་མ་བླངས་ན་ཚོགས་ཁང་གི་གླ་ཆ་སུས་སྤྲོད་རྒྱུ་ཡིན། ཞེས་བཀའ་བཀྱོན་འདྲ་ཞིག་བཏང་ཡོང་གི་འདུག ངས་མོ་རང་ལ་ཁྱེད་རང་སུ་ཡིན། ཁྱོད་ལ་འཛིན་བྱང་བཙོང་དུ་འཇུག་མཁན་སུ་རེད་ཅེས་དྲིས་པར། འདི་ང་ཚོའི་བོད་རིགས་ཚོགས་པས་འཚོང་བཞིན་ཡོད་ཟེར། སྐབས་དེར་ང་ཅུང་ཁོང་ཁྲོ་ལངས་བྱུང་། ༧སྐྱབས་མགོན་རིན་པོ་ཆེ་ས་ཆ་འདིར་ཕེབས་ནས་ཉིན་གསུམ་འགྲོ་བཞིན་ཡོད་ཀྱང་། བོད་རིགས་ཚོགས་པའི་མི་ཡིན་ཟེར་ནས་ཡོང་མཁན་མི་རྡོག་གཅིག་མཐོང་ཡ་མི་འདུག ཕེབས་བསུ་དང་མཇལ་ཁའི་ཉིན་རྒྱལ་གླུ་གཏོང་བ་ཚང་མ་ས་གནས་ཚོགས་ཆུང་གིས་གྲ་སྒྲིག་བྱས་པ་རེད། མཇལ་ཁ་དངོས་གཞིའི་སྐབས་ཤིག་ལ་ཚོགས་ཁང་གི་རིན་ཡིན་མདོག་མདོག་དང་། ཁ་ཤས་ཀྱིས་ཞལ་འདེབས་ཡིན་མདོག་མདོག་གིས་དངུལ་བསྡུས་པ་དེ་མང་ཚོགས་ལྐུག་པར་བརྩིས་པ་རེད། ” ཅེས་བརྗོད་བྱུང་།  

ཉིན་དེར་མཇལ་ཁའི་འཛིན་བྱང་བཙོང་རོགས་སངས་རྒྱས་ལགས་སུ། མཇལ་ཁའི་ཉིན་མི་ཁ་ཤས་ཀྱིས་ཚོགས་ཁང་གི་རིན་ཡིན་ཚུལ་དང་། ཡང་ཁ་ཤས་ཀྱིས་ཞལ་འདེབས་ཡིན་སྐོར་བཤད་ཀྱི་ཡོད་པ་དེ་གང་འདྲ་ཡིན་མིན་དྲིས་པར། “ དུས་བབ་ཐོག་གི་གསར་འགྱུར་དེ་མཐོང་སོང་། དེ་གནས་ཚུལ་རྫུན་མ་གང་ཡང་མ་རེད། དུས་བབ་ནང་བཀོད་པ་དེ་ག་རང་རེད། ཞོགས་པ་དེར་ཚོགས་གཙོ་མཆོག་གིས་བུ་མོ་ཤེས་རབ་དང་ངེད་གཉིས་ལ། འཛིན་བྱང་བཙོང་རྒྱུ་དང་ཐོ་འགོད་ཐད་རོགས་པ་བྱོས་ཟེར། དང་པོར་ཧྥ་རན་སི་ནས་ཡོང་མཁན་བོད་པ་ ༨ བསླེབས་སོང་། ཁོ་ཚོས་སྒོར་མོ་བཅུ་དེ་ག་རེ་རེད་ཅེས་དྲིས་པའི་ལན་དུ་ལེགས་བཤད་ཀྱིས་ཞལ་འདེབས་རེད་ཟེར། ཡང་བུ་མོ་ཤེས་རབ་ཀྱིས་སྒོར་མོ་དེ་ཚོགས་ཁང་གི་གླ་ཆ་རེད་ཟེར་ནས་འཛིན་བྱང་འཚོང་བཞིན་འདུག སྐབས་དེར་དོན་གཅོད་ཀྱི་ལས་བྱེད་ཅིག་ཕེབས་ཏེ། ཁྱོད་ཚོའི་སྒོར་མོ་དེ་ག་རེ་རེད། ཁ་སང་སྔོན་མ་ནས་ཨེ་མེལ་བརྒྱུད་ཚོགས་ཁང་ལ་རིན་སྤྲོད་མ་དགོས་པ་གསལ་བོར་བཀོད་ཡོད། ཁྱོད་ཚོས་འཛིན་བྱང་བཙོང་བ་དེ་ཁྱོན་ནས་ཡག་པོ་མ་རེད། མཇལ་ཁར་དངུལ་ལེན་གྱི་འདུག་ལབ་གི་རེད། ཁྱོད་ཚོའི་བོད་རིགས་ཚོགས་པའི་དངུལ་ཡིན་ན་ངས་ཧ་གོ་ཡི་མེད་ཟེར ” ཅེས་བརྗོད་བྱུང་།

དེ་རིང་ཁ་པར་བརྒྱུད་སུད་སིའི་སྐུ་ཚབ་དོན་གཅོད་ཆོས་སྐྱབས་པ་ཚེ་བརྟན་བསམ་འགྲུབ་མཆོག་ལ་བཅར་འདྲི་ཞུས་པར་ཁོང་གིས། ” ཐེངས་འདིར་ཚོགས་ཁང་གི་གླ་ཆའི་མིང་ཐོག་ནས་དངུལ་བླངས་པ་དེ་འགྲིག་གི་ཡོད་པ་མ་རེད། ཚེས་ ༢༤ ཉིན་རྙོག་གླེང་བྱུང་ཡུལ་ནས་ཀྱང་ངས་འགྲེལ་བཤད་གསལ་བོ་ཞུས་པ་ཡིན། ཟླ་འདིའི་ཕྱི་ཚེས་ ༡༦ ཉིན་དོན་གཅོད་ཁང་དང་བོད་རིགས་ཚོགས་པ་གཉིས་བར་ཡིག་འབྲེལ་གྱི་ལམ་ནས་ཚོགས་ཁང་ལ་གླ་ཆ་དགོས་ཀྱི་མེད་པ་གསལ་བོ་ཆགས་ཡོད་པ་རེད། ཕྱོགས་གཞན་ཞིག་ནས་ཚོགས་གཙོར་ཐུགས་ཁག་ཡོད་པ་མ་རེད། ཚོགས་པ་སྒྲིག་འཛུགས་ཤིག་ནས་སྤྱི་བའི་ལས་དོན་བྱ་རྒྱུ་དེ་ལས་བསླ་མོ་ཞིག་རྩ་བ་ནས་མ་རེད། ནམ་རྒྱུན་འཇར་མན་ནང་གི་བོད་མི་ཚོ་མཉམ་དུ་འཛོམ་རྒྱུ་དཀའ་ལས་ཁག་པོ་ཡིན་དུས། གཅིག་བྱས་ན་ཐེངས་འདིའི་གོ་སྐབས་བཟུང་སྟེ་ཚོགས་པར་ཞལ་འདེབས་ཕྲན་བུ་བསྡུ་ཐུབ་ན་བསམ་པ་དེ་འདྲ་ཡིན་རྒྱུ་རེད ” ཅེས་བཀའ་ལན་གནང་བྱུང་། 

ས་གནས་གསར་འགོད་པ། ནམ་མཁའ་བསྟན་འཛིན།