ཨ་ནཱ་ཧ་ཛ་རེ་ཡི་མངོན་འདོད་གྲུབ།

ཕྱི་ཚེས་ ༢༧ ཉིན་རྒྱ་གར་གྲོས་ཚོགས་ནང་ཨ་ནཱ་ཧ་ཛ་རེའི་དགོས་འདུན་ལྟར་ཁྲིམས་གཞི་གཏན་འབེབ་བྱ་རྒྱུར་མང་མོས་བྱུང་སྟེ། ཚེས་ ༢༨ ཞོགས་པར་ཁོང་གིས་ཟས་བཅད་ངོ་རྒོལ་མཚམས་འཇོག་བྱས་ཡོད།

ཟླ་འདིའི་ཕྱི་ཚེས་ ༢༧ ཉིན་མི་མང་འཐུས་མིའི་གྲོས་ཚོགས་(Lok Sabha)དང་གཞུང་འཛིན་མངའ་སྡེ་འཐུས་མིའི་གྲོས་ཚོགས་(Rajya Sabha)གཉིས་ཀྱིས་ཨ་ནཱ་ཧ་ཛ་རེའི་ལྐོག་ཟ་རུལ་སུངས་འགོག་ཐབས་ཀྱི་ཁྲིམས་གཞི་གསར་བཟོ་བྱ་རྒྱུར་མང་མོས་བྱུང་སྟབས། གཟའ་ཉི་མའི་ཞོགས་པ་ཆུ་ཚོད་ ༡༠ དང་སྐར་མ་ ༢༠ ཐོག་རམ་ལེ་ལཱ་ཐང་ཆེན་(Ramlila ground)དུ་སྤེལ་བཞིན་པའི་ཉིན་བཅུ་གཉིས་རིང་གི་ཨ་ནཱ་ཧ་ཛ་རེའི་ཟས་བཅད་ངོ་རྒོལ་གྱི་ལས་འགུལ་མཚམས་འཇོག་བྱས་ཡོད། ལས་འགུལ་མཚམས་བཞག་འཕྲད་ཁོང་གིས་ “དགོས་འདུན་ལྟར་བཅོས་སྒྱུར་ཆ་ཚང་མངོན་འགྱུར་མ་བྱུང་པར་དུ་མཚམས་འཇོག་བྱ་རྒྱུ་མིན” ཞེས་རྒྱབ་སྐྱོར་མང་ཚོགས་ཚོར་བརྗོད་འདུག

འདི་ལོའི་ཕྱི་ཟླ་ ༤ པའི་ནང་ཨ་ནཱ་ཧ་ཛ་རེ་ཡི་སྣེ་ཁྲིད་འོག་མི་མང་སྟོག་ཕྲག་མང་པོས་རྒྱ་གར་གཞུང་གི་དཔོན་རིགས་ཁྲོད་ལྐོག་ཟ་རུལ་སུངས་ཤུགས་ཆེན་པོ་འབྱུང་བཞིན་པ་འགོག་ཆེད་ཁྲིམས་གཞི་གསར་པ་གཏན་འབེབ་བྱ་རྒྱུའི་དགོས་འདུན་འོག་ཟས་བཅད་ངོ་རྒོལ་བྱས་ཡོད་ཅིང་། མཐར་རྒྱ་གར་གཞུང་གིས་ཁོང་ཚོའི་དགོས་འདུན་གཞིར་བཞག་ཁྲིམས་གཞི་གསར་བཟོ་བྱ་རྒྱུའི་ཁས་ལེན་བྱས་ཡོད་ཀྱང་། ཉེ་ཆར་རྒྱ་གར་གྲོས་ཚོགས་ནང་ལྐོག་ཟ་རུལ་སུངས་འགོག་ཐབས་ཀྱི་གྲོས་ཆོད་ཅིག་བྱུང་ཡོད་ཀྱང་། ཐག་གཅོད་དེར་ཨ་ནཱ་ཧ་ཛ་རེ་དང་ཆོས་དཔོན་རམ་ཌེ་ཝུ་( Ramdev) གཉིས་གཙོས་པའི་ལས་འགུལ་པ་ཚོའི་དགོས་འདུན་ཟིན་བྲིས་ལྟར་བྱུང་མེད་པ་དང་། ལྷག་པར་དུ་སྲིད་བློན་དང་ཆེས་མཐོའི་ཁྲིམས་ཞིབ་ཁང་གི་ཁྲིམས་དཔོན་སོགས་གནད་ཡོད་དཔོན་རིགས་ཁག་ཅིག་ལ་དོགས་གཞི་བྱུང་ཚེ་ཁྲིམས་བཤེར་བྱ་ཆོག་པའི་རིགས་ཁ་གསལ་བཟོས་མེད་སྟབས། ཟླ་འདིའི་ཕྱི་ ༡༦ ཉིན་བསྐྱར་དུ་ཨ་ནཱ་ཧ་ཛ་རེ་དང་ཁོང་གི་རྒྱབ་སྐྱོར་པ་ཚོས་མུ་མཐུད་ཟས་བཅད་ངོ་རྒོལ་བྱས་ཡོད་པ་རེད།

རིམ་གཞིན་ལས་འགུལ་འདིར་རྒྱབ་སྐྱོར་པ་ཤུགས་ཆེ་རུ་ཕྱིན་ཏེ། རྒྱ་གར་རྒྱལ་ཡོངས་ལ་ཁྱབ་ཡོད་པ་མ་ཟད་ཕྱི་རྒྱལ་ཁག་ཏུ་ཡོད་པའི་རྒྱ་གར་བ་ཚོས་ཀྱང་ཨ་ནཱ་ཧ་ཛ་རེ་ལ་རྒྱབ་སྐྱོར་ཡོད་པའི་རྣམ་འགྱུར་ཤུགས་ཆེན་པོ་བསྟན་ཡོད་སྟབས། རྒྱ་གར་གཞུང་གིས་གྲོས་ཚོགས་ཀྱི་ཐག་གཅོད་དེར་བསྐྱར་དུ་བགྲོ་གླེང་བྱ་དགོས་བྱུང་ཡོད་ལ། ཟླ་འདིའི་ཕྱི་ཚེས་ ༢༢ ཉིན་རྒྱ་གར་གྱི་སྲིད་བློན་མན་མོ་ཧན་སིན་མཆོག་གིས། དངོས་སུ་ཨ་ནཱ་ཧ་ཛ་རེ་ལགས་ལ་ཕྱག་ཡིག་ཅིག་ཕུལ་ཏེ།  ཁོང་གི་དགོས་འདུན་ཟིན་བྲིས་ལྟར་གཞུང་གིས་ཇན་ལཱོཀ་པལ་ཁྲིམས་གཞིར་(Lokpal Bill) བགྲོ་གླེང་བྱེད་མགོ་བརྩམས་ཡོད་ཀྱང་། ཁྲིམས་གཞི་འདི་ཚུད་པའི་བཅོས་སྒྱུར་བྱ་དགོས་པའི་གནད་དོན་ཁག་ལ་བསྐྱར་ཞིབ་བྱ་རྒྱུའི་ཁས་ལེན་དང་། ཁོང་གི་འཕྲོད་བསྟེན་ལ་དོ་ཁུར་བྱ་རྒྱུ་དང་ཟས་བཅད་ངོ་རྒོལ་མཚམས་འཇོགས་བྱ་དགོས་པའི་འབོད་སྐུལ་ཞུས་འདུག

ཐེངས་འདིར་སྐབས་སྔོན་མའི་གྲོས་ཚོགས་ནང་ཁ་གསལ་ཐག་གཅོད་མ་བྱུང་པའི་ཇན་ལོཀ་པལ་ཁྲིམས་གཞིའི་དོན་ཚན་གལ་ཆེ་ཤོས་ཁག་ལ་མང་མོས་བྱུང་ཡོད་པ་ནི། རྒྱ་གར་དབུས་གཞུང་དང་མངའ་སྡེ་གཞུང་སོ་སོར་མི་མང་གི་འཐུས་མི་ལས་གྲུབ་པའི་ལྐོག་ཟ་ཞིབ་བཤེར་ལས་ཁང་འཛུགས་རྒྱུ་དང་། དབུས་དང་མངའ་སྡེ་གཞུང་གི་ཞིབ་བཤེར་( Jan Lokpal and Lokayuktas) ཁྲིམས་ཡིག་གི་ཁྱབ་ཁོངས་འོག་དབུས་ས་གཉིས་ཀྱིོ་གཞུང་ཞབས་ལས་བྱེད་ཡོངས་རྫོགས་ཚུད་དགོས་པ། དེ་བཞིན་གཞུང་གི་ལྷན་ཁང་ཚང་མའི་ནང་མི་མང་བདེ་སྡུག་སྙན་ཞུ་འབྱོར་རིགས་དུས་ལྟར་ཐག་གཅོད་ཡོང་ཆེད་ཡུལ་མིའི་བཅའ་ཁྲིམས་ཚན་པ་ཞིག་དགོས་རྒྱུ་བཅས་ཡིན་འདུག

ཨ་ནཱ་ཧ་ཛ་རེ་ཡི་དགོས་འདིན་ལ་གྲོས་ཚོགས་ནས་མང་མོས་བྱུང་རྗེས། རང་ལོ་ ༧༤ སོན་པའི་མི་རྒན་ཁོང་གིས་ཐེངས་འདིའི་རྒྱལ་ཁ་ནི་རྒྱ་གར་མི་མང་གི་རྒྱལ་ཁ་དང་། འཚེ་མེད་ཞི་བའི་ལས་འགུལ་གྱི་རྒྱལ་ཁ། ཐེངས་འདིའི་ལས་འགུལ་ཁྲོད་རྒྱབ་སྐྱོར་དང་མཉམ་ཞུགས་བྱེད་མཁན་ཚོའི་རྒྱལ་ཁ་ཞིག་ཡིན་ཚུལ་དང་། དེ་བཞིན་ཁོང་གིས་རྗེས་ཕྱོགས་རྒྱ་གར་གྱི་འོས་བསྡུའི་ལམ་ལུགས་དང་ཤེས་ཡོན་སྲིད་ཇུས་བཅོས་སྒྱུར། ཞིང་ལས་དང་ངལ་རྩོལ་མི་མང་གི་འཕེལ་རྒྱས་བཅས་ཀྱི་གནད་དོན་ཐད་མུ་མཐུད་ལས་འགུལ་སྤེལ་འཆར་ཡོད་པའི་ཁྱབ་བསྒྲགས་ཀྱང་བྱས་འདུག

ཕྱི་ཚེས་ ༡༦ ཉིན་ཟས་བཅད་ངོ་རྒོལ་མགོ་འཛུགས་སྐབས་གྲོང་ཁྱེར་ཉེན་རྟོག་པས་ཁོང་ཚོ་འཛིན་བཟུང་གིས་ཊེ་ཧར་བཙོན་ཁང་(Tihar Jail) དུ་བཀག་ཉར་བྱས་ཡོད་ཀྱང་། མི་མང་སྟོང་ཕྲག་མང་པོས་གཞུང་གི་བྱ་སྤྱོད་དེར་ངོ་རྒོལ་སྐད་འབོད་ཀྱི་ལས་འགུལ་ཤུགས་ཆེར་བྱུང་སྟབས། ཨ་ནཱ་ཧ་ཛ་རེ་ཀློད་གྲོལ་གཏོང་རྒྱུའི་ཐག་གཅོད་བྱུང་ཡོད་ཀྱང་། ཨ་ནཱ་ཧ་ཛ་རེ་ཡིས་ཁོང་ཚོར་ཆ་རྐྱེན་གང་ཡང་མེད་པའི་ཐོག་ཟས་བཅད་ངོ་རྒོལ་བྱེད་དུ་མ་བཅུག་ཚེ་བཙོན་ཁང་ནས་ཕྱིར་ཐོན་རྒྱུ་མིན་ཞེས་བཙོན་ཁང་ནས་ཕྱིར་མ་ཐོན་པར་མུ་མཐུད་ཟས་བཅད་ངོ་རྒོལ་བྱས་ཡོད་པ་དང་། ཕྱི་ཚེས་ ༡༩ ཉིན་བཙོན་ཁང་ནས་ཕྱིར་ཐོན་རྗེས་ལྡི་ལི་གསར་པའི་རམ་ལེ་ལཱ་ཐང་ཆེན་(Ramlila ground) དུ་བསྡད་དེ་དུས་ཚོད་ངེས་མེད་དུ་ཟས་བཅད་ངོ་རྒོལ་གྱིས་ཟླ་འདིའི་ཕྱི་ཚེས་ ༢༨ བར་ཟས་བཅད་ངོ་རྒོལ་གནང་ཡོད་པ་རེད།

གསར་འགོད་པ། བནྡེ་སྐྱབས།