རྒྱ་ནག་གིས་ལྕཊ་རི་རིང་མོ་བརྒལ་ཏེ་བཙན་འཛུལ་བྱས་པ་རེད།

དོ་ནུབ་གངས་སྐྱིད་དུ་རྒྱ་གར་གནད་ཡོད་མི་སྣ་ཁག་ཅིག་དང་ས་གནས་ཡུལ་མི། དེ་བཞིན། བཙན་བྱོལ་བོད་པའི་བཀའ་བློན་ཁྲི་པ་མཆོག་དང་བོད་པ་སྐོར་ཞིག་བཅས་ཀྱིས་བོད་དོན་ཐོག་བགྲོ་གླེང་གནང་སྟེ། བོད་ནི་ལོ་རྒྱུས་ཐོག་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། བོད་དང་རྒྱ་གར་གཉིས་བར་གྱི་མཛའ་འབྲེལ་རྒྱུན་གནས་ཡོང་རྒྱུ་གལ་ཆེན་ཡིན་སྐོར་གསུངས་སོང་།

དེ་རིང་ཕྱི་དྲོའི་ཆུ་ཚོད་དྲུག་དང་ཕྱེད་ཀའི་སྟེང་གངས་སྐྱིད་སྤྱི་ཐབ་ཐོག་ཁང་དུ། རྒྱ་གར་ཧི་མ་ལ་ཡའི་ཁྱིམ་ཚང་ཞེས་པའི་གོ་སྒྲིག་འོག ༼ རྒྱ་གར་དང་རྒྱ་ནག བོད། ༽ ཅེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་ཚོགས་ཤོང་ལ། སྐུ་མགྲོན་གཙོ་བོར་རྒྱ་གར་རྒྱལ་ཡོངས་སྤྱི་ཚོགས་ཞབས་ཞུ་ཚོགས་པ་ ( RSS ) ཡི་ཚོགས་གཞོན་ཨེན་ཌི་རེ་ཤི་ཁའུ་མཱར་( Indreshi Kumar )མཆོག་དང་། བཙན་བྱོལ་བོད་གཞུང་གི་བཀའ་བློན་ཁྲི་པ་བློ་བཟང་སེང་གེ་མཆོག་རྣམ་གཉིས་གདན་འདྲེན་ཞུས་འདུག གཞན། ཧི་མ་ཅལ་མངའ་སྡེའི་འཕྲོད་བསྟེན་བློན་ཆེན་རཱ་ཇིབ་བྷེན་ཌལ་( Rajeev Bindal ) མཆོག་དང་སྤྱི་ཚོགས་ཞབས་ཞུ་ཚོགས་པའི་བྱང་ཤར་འབྲེལ་མཐུད་པ། ཧི་མ་ཅལ་མངའ་སྡེ་དང་ཀཱང་ར་རྫོང་འོག་གི་ཚོགས་པ་ཁག་གི་སྐུ་ཚབ་དང་ཡུལ་མི། བཙན་བྱོལ་བོད་གཞུང་གི་དྲུང་ཆེ་རྣམ་པ་དང་། བཞུགས་སྒར་ཁུལ་གྱི་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ་བཅས་མཉམ་ཞུགས་གནང་སོང་།  

 སྐུ་མགྲོན་གཙོ་བོ་ཨེན་ཌི་རེ་ཤི་ཁའུ་མཱར་མཆོག་གིས་གཏམ་བཤད་གནང་བའི་ནང་། བོད་ནི་ལོ་རྒྱུས་ཐོག་ཁྲིམས་མཐུན་རང་བཙན་ཡོད་པའི་རྒྱལ་ཁབ་ཅིག་ཡིན་པ་དང་། ད་ཆར་རྒྱ་ནག་གཞུང་གིས་བོད་རྒྱ་ནག་གི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་ཟེར་གྱི་ཡོད་པ་དེ། སྤྱི་དམངས་ཀྱི་འདོད་འདུན་ལ་བརྩི་བཀུར་མ་བྱས་པ་ཞིག་དང་ཁུངས་འཁྱོལ་ཐབས་མེད་པའི་ཆབ་སྲིད་ཧམ་བཤད་ཁོ་ན་ཡིན་ཚུལ། བོད་རྒྱ་ནག་གི་ཁོངས་གཏོགས་ཡིན་པའི་བཤད་སྟངས་ཤིག་འཛམ་གླིང་ལོ་རྒྱུས་ཡིག་ཚང་གང་དུ་ཡང་མེད་པ་དང་། ཕྱོགས་སུ་མ་ལྷུང་བའི་རྒྱལ་སྤྱིའི་མཁས་དབང་དང་ཆབ་སྲིད་དཔྱད་བརྗོད་པ་སུས་ཀྱང་བཤད་མྱོང་མེད་པས། བོད་རྒྱ་ནག་གི་ཆ་ཤས་ཡིན་ཟེར་བའི་ཚིག་བརྗོད་དེ་ལ་བསམ་བློ་ཞིབ་ཏུ་བཏང་ན། ད་ཆར་བོད་ལ “ རྒྱ ” ་དང་བོད་མི་ལ་ “ རྒྱ་མི ” ཟེར་བ་ལས་བོད་དང་བོད་མི་ཞེས་འབོད་མཁན་ཞིག་ཡོང་ཐབས་མེད། ད་ལྟ་འཛམ་གླིང་ཐོག་བོད་ཟེར་པ་ཞིག་དང་། བོད་མི་ཟེར་བ་ཞིག་ཡོད་པ་དེ་རྒྱ་ནག་དང་ཐ་དད་ཡིན་པ་གསལ་སྟོན་བྱེད་ཀྱི་ཡོད་སྐོར་བཅས་བརྗོད་བྱུང་།

 ཡང་ཁོང་གིས་མུ་མཐུད་དུ ” རྒྱ་ནག ” ཟེར་བ་དང ” རྒྱ་མི ” ཟེར་བ་འདི་ཁ་བཤད་དོན་ལ་མི་གནས་མཁན་ཞིག་དང་མི་ཆོས་ཀུན་སྤྱོད་མི་བརྩི་མཁན་ཞིག་ཡིན་པའི་དཔེ་མཚོན་དུ། རྒྱ་ནག་ལྕགས་རི་རིང་མོ་དེ་རྒྱ་གར་བས་བཟོས་པ་ཞིག་མིན་ལ། བོད་པས་བཟོས་པ་ཞིག་ཀྱང་མིན་པར་རྒྱ་ནག་ཁོ་རང་ཚོས་བཟོས་ཏེ། རྒྱ་ནག་གི་རྒྱལ་མཚམས་མཚོན་བྱེད་ཅིག་དང་རྒྱལ་ཁོངས་སྲུང་སྐྱོབ་ཆེད་བཟོས་པ་ཞིག་ཡིན་ཟེར་གྱི་ཡོད་པ་དང་། འཛམ་གླིང་ཐོག་དེ་ལ་ཆེ་མཐོང་གོང་བཀུར་ཐོབ་ཀྱི་ཡོད་ཀྱང་། རྒྱ་མི་ཁོ་རང་ཚོས་ཁོ་རང་ཚོའི་ལོ་རྒྱུས་རྡོག་རོལ་དུ་བཏང་སྟེ་ལྕགས་རི་རིང་མོར་ཆེ་མཐོང་སྤྲོད་ཀྱི་མེད་པར། གོ་སྐབས་དང་བསྟུན་ཏེ་ལྕགས་རི་རིང་མོ་ལས་བརྒལ་ཏེ་མི་རིགས་གཞན་ལ་བཙན་གནོན་དང་རྒྱལ་ཁབ་གཞན་ལ་བཙན་འཛུལ་བྱས་པ་ཞིག་ཡིན་སྐོར་བརྗོད་བྱུང་།  

ཡང་ཁོང་གིས་ཉེ་ལམ་༧གོང་ས་མཆོག་གིས་ཆབ་སྲིད་ཀྱི་སྐུ་དབང་བཀའ་བློན་ཁྲི་པར་བསྩལ་པ་དེ་ལ་བསྔགས་བརྗོད་དང་འབྲེལ་ཏེ་བརྗོད་དོན། “ དེ་སྔོན་༧གོང་ས་མཆོག་གིས་ཆབ་སྲིད་ཀྱི་ཐུགས་འགན་བཞག་མ་ཐག ངས་༧གོང་ས་ཏཱ་ལའི་བླ་མ་མཆོག་ལ་རྟེན་འབྲེལ་ཞུས་ཏེ། ཐེངས་འདིར་སྐུ་ཉིད་ཐུགས་ཐག་གཅོད་སྟངས་དེ་ཧ་ཅང་རླབས་ཆེན་གཟི་བརྗིད་ལྡན་པ་ཞིག་རེད། སྤྱིར་འཛམ་གླིང་ནང་ཁྱེད་ཉིད་ལ་བརྩི་བཀུར་སྙན་གྲགས་ཆེན་པོ་ཡོད་པའི་སྒང་ལ། ཐེངས་འདིའི་མཛད་པ་དེས་སྔར་བས་དད་གུས་ཆེ་རུ་འགྲོ་ངེས་རེད། གང་ཡིན་ཟེར་ན་དེ་སྔོན་སྐུ་ཉིད་ཀྱིས་ཆོས་ཕྱོགས་ཀྱི་ལས་དོན་བསྒྲུབས་ཀྱང་། ལུང་པར་རང་བཙན་མེད་པའི་ཆབ་སྲིད་དབུ་ཁྲིད་ཅིག་ཡིན་པའི་ཆ་ནས་མི་མང་པོ་ཞིག་གིས་རང་བཞིན་གྱིས་ཆབ་སྲིད་དང་འབྲེལ་བ་ཡོད་པ་ཞིག་ལ་མཐོང་གི་ཡོད། ད་ནི་ཞལ་ནས་གང་གསུངས་པ་དང་ལག་ནས་གང་ལས་པ་ཡོངས་རྫོགས་བོད་པའི་ཡུལ་མི་དཀྱུས་མ་ཞིག་གི་བཤད་སྤྱོད་ལ་ངོས་ལེན་མི་བྱེད་ཐབས་མེད་ཆགས་ཡོད། ཅེས་བཀོད་ཡོད་པ་དེ་ལ་༧གོང་ས་ཏཱ་ལའི་བླ་མ་མཆོག་གིས་དགའ་མོས་ཆེན་པོ་གནང་སྟེ། ཁོང་ལ་སྤྱིར་བསྟོད་བསྔགས་བྱེད་མཁན་མང་པོ་བྱུང་ཡོད་མོད། ཁྱེད་ཀྱི་སྐད་ཆ་འདི་དག་གིས་ང་ལ་དགའ་སྤོབས་ཆེན་པོ་སྐྱེ་རུ་བཅུག་སོང་གསུངས་བྱུང ” ཅེས་བརྗོད་བྱུང་།    

 དེའི་རྗེས་ཧི་མ་ཅལ་འཕྲོད་བསྟེན་བློན་ཆེན་མཆོག་གིས་བོད་དང་རྒྱ་གར་གཉིས་ཆོས་དང་རིག་གཞུང་ཐོག་འདས་པའི་ལོ་ངོ་སྟོང་ཕྲག་གཉིས་ལྷག་རིང་གི་མཛའ་འབྲེལ་ལོ་རྒྱུས་ཡོད་པའི་རྒྱལ་ཁབ་གཉིས་ཆགས་ཡོད་པ་དང་། གནའ་སྔ་མོ་བོད་ནང་རང་དབང་དང་། བདེ་སྐྱིད་ལྡན་པའི་སྐབས་སུ་བོད་དང་རྒྱ་གར་གཉིས་ལ་ས་མཚམས་མེད་པར་ཁྱིམ་ཚང་གཅིག་གི་ངོ་བོར་བསྡད་ཡོད་པ། རྒྱ་ནག་གིས་བོད་ས་བཙན་བཟུང་བྱས་རྗེས་རྒྱ་གར་གྱི་ས་མཚམས་ཁག་མང་པོ་ཞིག་ལ་ཡང་བདེ་སྐྱིད་མེད་པ་བཟོས་ཡོད་སྐོར་བརྗོད་དེ། མ་འོངས་པར་བོད་དང་རྒྱ་གར་གཉིས་ཀྱི་མཛའ་འབྲེལ་བརྟན་པོར་གནས་དགོས་པ་དང་། ལྷག་པར་དུ་ཧི་མ་ལ་ཡའི་རི་རྒྱུད་དང་བོད་མིའི་བར་གྱི་འབྲེལ་བ་གཏིང་ཇེ་ཟབ་ཏུ་བཏང་སྟེ། བོད་དང་རྒྱ་གར་གཉིས་མ་འོངས་ལོ་ངོ་སྟོང་ཕྲག་མང་པོའི་རིང་གཅིག་གྲོགས་གཅིག་བརྟེན་ཀྱིས་ཁྱིམ་མཚེས་རྒྱལ་ཁབ་ཡག་ཤོས་གཉིས་ཀྱི་ངོ་བོར་གནས་གལ་ཆེ་ཚུལ་ནན་གྱིས་གསུངས་སོང་། དེ་བཞིན། བཀའ་བློན་ཁྲི་པ་བློ་བཟང་སེང་གེ་མཆོག་གིས་ཀྱང་ཉེ་ལམ་༧གོང་ས་མཆོག་གིས་གཞུང་ས་དགའ་ལྡན་ཕོ་བྲང་གི་ཁྲིམས་མཐུན་སྲིད་དབང་ཁོང་ལ་བརྒྱུད་སྤྲོད་གནང་བའི་གོ་རིམ་དང་། འདས་པའི་ལོ་ངོ་ལྔ་བཅུའི་རིང་བཙན་བྱོལ་བོད་མི་ཆིག་འབུམ་ལྷག་ལ་རྒྱ་གར་གཞུང་དམངས་ཀྱིས་ལྟོ་གོས་གནས་མལ་གྱི་མཐུན་འགྱུར་གནང་བ་མ་ཟད། བོད་པའི་ཆོས་དང་རིག་གཞུང་རྒྱུན་འཛིན་དང་། ལྷག་པར་དུ་བོད་པའི་ཆབ་སྲིད་ཐོག་ལངས་ཕྱོགས་བརྟན་པོ་བཟུང་སྟེ་རྒྱབ་སྐྱོར་གནང་བར་ཐུགས་རྗེས་ཆེ་ཞུས་པ་དང་འབྲེལ་མ་འོངས་པར་ཡང་འབྲེལ་བ་རྒྱུན་གནས་ཡོང་རྒྱུར་རེ་སྐུལ་གནང་སོང་། 

༼ ཧི་མ་ལ་ཡའི་ཁྱིམ་ཚང་ ༽ ཞེས་པའི་ཚོགས་པ་དེ་ཕྱི་ལོ་ ༢༠༠༠ ལོར་བཙུགས་པ་ཞིག་ཡིན་ཞིང་། ཚོགས་པ་འདིའི་དམིགས་ཡུལ་གཙོ་བོ་བོད་པའི་ཆབ་སྲིད་ཐོག་རྒྱབ་སྐྱོར་དང་། ཧི་མ་ལ་ཡའི་རི་རྒྱུད་ཀྱི་དཀའ་ངལ་རིགས་སེལ་ཐབས་སུ་ལས་དོན་བྱེད་མཁན་ཞིག་ཡིན་འདུག ཚོགས་པ་འདིས་ལོ་ལྟར་བོད་དོན་ཐོག་ལས་འགུལ་སྣ་ཚོགས་སྤེལ་གྱི་ཡོད་འདུག་ལ། ལོ་རེར་བོད་པའི་ཆབ་སྲིད་ཐོག་ཚོགས་འདུ་ཆེན་པོ་ཐེངས་གཉིས་རེར་འཚོགས་བཞིན་ཡོད་འདུག