སྐབས་བཅོ་ལྔ་པའི་སྤྱི་འཐུས་རྣམ་པ་ཆ་བགོས་ཀྱིས་རྒྱ་བལ་འབྲུག་གསུམ་དུ་ཡོད་པའི་བོད་མིའི་གཞིས་ཆགས་ཁག་དང་ཁ་འཐོར་བོད་མིའི་བཞུགས་ཡུལ་ཁག་ཏུ་འཚམས་གཟིགས་སུ་བསྐྱོད་པ་ལྟར། འདི་གའི་གསར་ཁང་གིས་ས་གནས་མི་འདྲ་བའི་ནང་ཕྱིན་པའི་སྤྱི་འཐུས་ཁག་ཅིག་ལ་གཞིས་ཆགས་བོད་མིའི་གནས་སྟངས་དང་དཀའ་ངལ་སྐོར་ལ་བཅར་འདྲི་བྱས་ཡོད།
རྒྱ་གར་ལྷོ་ཕྱོགས་སྦེལ་ཀོབ་སོགས་སུ་འཚམས་གཟིགས་སུ་ཕེབས་མཁན་དབུས་གཙང་སྤྱི་འཐུས་ཤར་གླིང་བསྟན་འཛིན་ཟླ་སྒྲོན་ལགས་སུ་བཅར་འདྲི་ཞུར་པར་ཁོང་གིས། “ ཐེངས་འདིར་ང་དང་སྤྱི་འཐུས་ཚུལ་ཁྲིམས་བསྟན་འཛིན་གཉིས་ལྷོ་ཕྱོགས་སྦེལ་ཀོབ་བདེ་སྐྱིད་སླར་གསོ་དང་ལུགས་ཟུང་བསམ་འགྲུབ་གླིང་། མེལ་སོར། བྷེང་ལོར། མེན་ལོར་བཅས་ཀྱི་བོད་མིའི་གཞིས་ཆགས་ཁག་དང་སློབ་གྲྭ། དགོན་སྡེ་སོགས་སུ་སྐོར་སྐྱོད་བྱས་པ་ཡིན། ངེད་གཉིས་ཀྱི་ལས་དོན་གཙོ་བོ་དབུས་བོད་མིའི་སྒྲིག་འཛུགས་ཀྱི་བཅའ་ཁྲིམས་དང་བཙན་བྱོལ་བོད་གཞུང་གི་མཚན་བྱང་བརྗེ་བསྒྱུར་གནང་སྟངས། ༧གོང་ས་མཆོག་གི་ཆབ་སྲིད་ཐུགས་འགན་མི་མང་གིས་བདམས་པའི་བཀའ་བློན་ཁྲི་པར་རྩིས་སྤྲོད་གནང་བའི་རྗེས་ཀྱི་གནས་སྟངས། རྒྱལ་སྤྱི་དང་རྒྱ་ནག་གི་ཆབ་སྲིད་ཀྱི་འགྱུར་འགྲོས་བཅས་དོན་ཚན་ ༦ གི་ཐོག་ས་གནས་མི་མང་ལ་འགྲེལ་བཤད་རྒྱག་ཏུ་ཕྱིན་པ་རེད། ཡིན་ནའང་། ཐེངས་འདིའི་སྐོར་སྐྱོད་རིང་གི་མཐོང་ཐོས་ཙམ་ཞུས་ན། སྤྱིར་བཏང་སྦེལ་ཀོབ་གཞིས་ཆགས་དེ་དཔལ་འབྱོར་གྱི་གནས་སྟངས་ཡག་པོ་ཡོད་པ་ཡོངས་གྲགས་རེད། འོན་ཀྱང་། སྦེལ་ཀོབ་གཞིས་ཆགས་ལ་མཚོན་ན། ད་ལྟའི་བར་ཆོལ་ཁ་གསུམ་རྡོག་རྩ་ཆིག་སྒྲིལ་བྱ་མ་ཐུབ་པའི་དབང་གིས་ས་གནས་འཐུས་ཚོགས་འཛུགས་ཐུབ་ཀྱི་མི་འདུག དེ་དཀའ་ངལ་ཆེ་ཤོས་རེད། གནས་ཚུལ་དེ་ས་གནས་མི་མང་ལ་དྲིས་སྐབས་དབུས་གཙང་གི་མི་ཚོས་མདོ་སྟོད་སྨད་གཉིས་ཀྱིས་མཉམ་རུབ་བྱེད་ཀྱི་མི་འདུག་ཟེར་ཞིང་། མདོ་སྟོད་སྨད་ཀྱི་མིས་ས་གནས་གྲོས་ཚོགས་དེ་འོས་བསྡུའི་ལམ་ནས་བདམས་པ་ཡིན་ན། དབུས་གཙང་ལ་མི་འབོར་མང་བས་གྲོས་ཚོགས་འཐུས་མི་ཚང་མ་དབུས་གཙང་གི་མི་ཆགས་ཏེ་མདོ་སྟོད་སྨད་གཉིས་ཀྱི་མི་མང་གི་མངོན་འདོད་འགྲུབ་དཀའ་མོ་ཡིན་ཚུལ་བརྗོད་བྱུང་། ལས་དོན་འདིའི་ཐོག་ད་བར་ཐབས་ལམ་འདྲ་མིན་གནང་ཡང་གྲུབ་འབྲས་ཐོན་མེད་སྟབས། ས་གནས་གཞིས་མགོའི་ངོས་ནས་ཕྱི་ཟླ་ ༡༠ བའི་ནང་༸གོང་ས་མཆོག་ཆིབས་བསྒྱུར་སྐབས་དང་བསྟུན་ཏེ། དཀའ་ངལ་དེ་སེལ་ཐབས་ལ་གྲ་སྒྲིག་ཞུ་བཞིན་འདུག ང་རང་གི་ངོས་ནད་དེ་ནི་དཀའ་ངལ་ཆེ་ཤོས་ཤིག་དང་། ཕུགས་ཀྱི་རྩ་དོན་ལ་གནོད་གཞི་ཞིག་ཏུ་མཐོང་སོང་། ས་གནས་གྲོས་ཚོགས་མེད་པ་དེས་མི་མང་གི་ཟ་བཏུང་དང་འཚོ་བར་དམགས་བསལ་དཀའ་ངལ་མེད་ཀྱང་། རྒྱ་ནག་དང་འཐབ་རྩོད་བྱེད་མཁན་ཞིག་གི་ངོས་ནས་བཤད་ན། ས་གནས་དེ་དག་ནང་ཁ་ནས་རྡོག་རྩ་ཆིག་སྒྲིལ་ཟེར་གྱི་ཡོད་པ་ལས་དོན་ལ་ཆོལ་ཁའི་འཐེན་འཁྱེར་འོག་ལས་དོན་འཐུས་ཤོར་དུ་འགྲོ་བཞིན་འདུག དེ་བཞིན། རང་བདེན་ཚོགས་ཆུང་ལ་མཚོན་ནའང་། མི་མང་གི་འོས་བསྡུའི་ལམ་ནས་འདེམས་ཐོན་བྱ་དགོས་ཀྱང་། ད་ལྟའི་ཆར་མི་རེ་ཟུང་ཞིག་མ་གཏོགས་ཕྱག་ལས་གནང་ཤེས་མཁན་མེད་པའི་དཀའ་ངལ་ཞིག་འཕྲད་ཀྱི་འདུག དཀའ་ངལ་དེ་ཡང་གཙོ་བོ་ཆོལ་ཁ་ཆོས་ལུགས་ཀྱི་འཐེན་འཁྱེར་ཆགས་འདུག ” ཅེས་བརྗོད་བྱུང་།
ཡང་ཁོང་མོར་སློབ་གྲྭ་ཁག་གི་སྐོར་དྲིས་སྐབས། “ ཐེངས་འདིར་མཐོ་སློབ་ཁག་དང་བོད་ཁྱིམ། གཏན་སློབ་ཁག་བཅས་ལ་གཏམ་བཤད་བགྲོ་གླེང་བྱས་པ་ཡིན། སློབ་སྦྱོང་གི་མཐུན་རྐྱེན་དང་སློབ་མའི་ཤེས་ཡོན་གནས་ཚད་སྔར་ལས་ཡར་རྒྱས་ཕྱིན་འདུག་ལ། བོད་དོན་ཐོག་དོ་སྣང་དང་བོད་ཡིག་བོད་སྐད་ཐད་ལའང་སྔར་ལས་དོ་སྣང་ཆེ་རུ་ཕྱིན་འདུག སྤྱིར་ས་གནས་དེ་ཁུལ་དུ་སྐྱོ་བོ་ཉམ་ཐག་དང་དཀའ་ངལ་ཆེན་པོ་ཡོད་པ་དེ་འདྲ་མཐོང་མ་སོང་། ས་ཞིང་དང་ཆུ་སོགས་ཀྱི་མཐུན་རྐྱེན་ཡག་པོ་ཡོད་སྟབས། སྲོལ་རྒྱུན་ཞིང་ལས་གཙོ་བྱས་པའི་ཟ་འབྲུ་དང་སྔོ་ཚོད་སོགས་ཀྱི་ཐོན་སྐྱེད་ཡག་པོ་ཡོད་ས་རེད། མ་འོངས་པར་གཞུང་ངོས་ནས་མཐུན་རྐྱེན་བསྐྲུན་ཐུབ་པ་ཡིན་ན། སྦེལ་ཀོབ་དེ་བཙན་བྱོལ་བོད་མིའི་དཔལ་འབྱོར་གྱི་ལྟེ་གནས་ལྟ་བུ་ཞིག་ཆགས་ཐུབ་རྒྱུར་རེ་བ་ཆེན་པོ་འདུག ” ཅེས་བརྗོད་བྱུང་།
བལ་ཡུལ་གནས་སྡོད་བོད་མིའི་གཞིས་ཆགས་ཁང་ནང་འཚམས་གཟིགས་སུ་ཕེབས་མཁན་མདོ་སྟོད་སྤྱི་འཐུས་འཇམ་དབྱངས་བཟོད་པ་ལགས་སུ་བཅར་འདྲི་བྱས་པར་ཁོང་གིས། “ ཐེངས་འདིར་ང་དང་སྤྱི་འཐུས་འཇུ་ཆེན་དཀོན་མཆོག ཆོས་སྐྱོང་དབང་ཕྱུགས་བཅས་མི་གསུམ་ཟླ་གཅིག་ལྷག་རིང་བལ་ཡུལ་གྱི་གློ་སྒྲིག་བྱམས་པ་གླིང་དང་དཔལ་འབྱོར་གླིང་། བཀྲ་ཤིས་སྒང་། བཀྲ་ཤིས་དཔལ་འཁྱིལ། སྤོག་ར་བཀྲ་ཤིས་གླིང་། བལ་ཡུལ་རྒྱལ་ས། འཇོ་ལཱ་ཁེ་བསམ་གྲུབ་གླིང་། འཕགས་ཤིང་། མཆོད་རྟེན། འཇོར་པ་ཀྲི། མཐའ་མཚམས་ཤར་ཁུམ་བཅས་སུ་བསྐྱོད་པ་ཡིན། བལ་ཡུལ་གཞུང་གི་ཆབ་སྲིད་བརྟན་པོ་མེད་སྟབས་བལ་ཡུལ་ས་གནས་ཁ་ཤས་ཀྱི་བོད་མི་ཚོར་དཀའ་ངལ་ཆེན་པོ་འཕྲད་ཀྱི་འདུག བལ་ཡུལ་ནང་གི་བོད་པ་སྐྱབས་བཅོལ་བ་ཐུན་མོང་ལ་དཀའ་ངལ་ཞིག་ཡོད་པ་ནི། བལ་ཡུལ་གཞུང་གིས་བོད་མི་ཚོར་སྐྱབས་བཅོལ་ལག་འཁྱེར་སྤྲོད་ཀྱི་མེད་པ་དེ་རེད། གནས་སྟངས་འདིིའི་འོག་ནས་མཐོ་སློབ་ཐོན་པའི་བོད་པའི་གཞོན་སྐྱེས་མང་པོ་ཞིག་ལ་ལས་ཀ་འཚོལ་རྒྱུར་དཀའ་ངལ་ཆེན་པོ་འཕྲད་ཀྱི་འདུག ༢༠༠༨ ལོ་ནས་བཟུང་བལ་ཡུལ་གཞུང་གིས་བོད་མི་ཚོར་དམིགས་བསལ་དམ་དྲག་བྱས་ཏེ་ཆབ་སྲིད་དང་འབྲེལ་བའི་ལས་འགུལ་དང་། གཞུང་འབྲེལ་གྱི་མཛད་སྒོའི་རིགས་རྩ་བ་ནས་བཀག་སྡོམ་བྱས་འདུག དུས་ཚིགས་དེ་དག་ནང་བལ་ཡུལ་ཉེན་རྟོག་པས་བོད་མི་མང་པོ་འཛིན་བཟུང་དང་གཅར་རྡུང་ཚད་མེད་བྱེད་ཀྱི་ཡོད་ས་རེད། དེ་བཞིན་འཕགས་ཤིང་དང་མཆོད་རྟེན་མཐའ་ཁོར། རྒྱལ་ས་སོགས་ཀྱི་བོད་མི་ཚོང་ལས་གཉེར་མཁན་ཚོར་ཡང་གནོན་ཤུགས་དང་འཇིགས་སྐྲག་སྣ་ཚོགས་ཡོང་གི་འདུག ” ཅེས་བརྗོད་བྱུང་།
གསར་འགོད་པས་ཁོང་ལ་བལ་ཡུལ་ཁུལ་དུ་བོད་མ་ཉམ་ཐག་དེ་འདྲ་ཡོད་མེད་དྲིས་པར། “ ད་ལྟའི་བར་བོད་མིའི་སྒྲིག་འཛུགས་ཀྱི་ངོས་ནས་བལ་ཡུལ་ནང་གི་བོད་མི་ཉམ་ཐག་ཚོར་སྐྱོབ་གསོའི་རོགས་དངུལ་སྤྲོད་ཀྱི་ཡོད་ས་རེད། སྤོག་ར་གཞིས་ཆགས་ལྟ་བུར་མཚོན་ན། གཞིས་གྲོང་རེ་གཉིས་མ་གཏོགས་མང་ཆེ་བའི་འཚོ་བའི་གནས་སྟངས་སྐྱོ་བོ་རེད་ལ། ལྷག་པར་དུ་བྱམས་པ་གླིང་གཞས་ཆགས་ལ་མཚོན་ན། ད་ལྟ་ད་དུང་ཡང་སྔོན་མ་བོད་གཞུང་གིས་བརྒྱབ་པའི་ཁང་རྙིང་དག་ཏུ་བསྡད་འདུག་ལ། ཁང་པ་ཆུང་ཆུང་ཞིག་གི་ནང་མི་བདུན་བརྒྱད་རེ་མཉམ་དུ་བསྡད་འདུག དེའི་ནང་ཨེ་ཙི་སོགས་ཀྱི་འགོས་ནད་རིགས་ཡོད་མཁན་ཡང་ཡོད་ས་རེད། འཕྲོད་བསྟེན་གྱི་ཕྱོགས་ནས་ཀྱང་མཐུན་རྐྱེན་ཧ་ཅང་སྐྱོ་བོ་རེད། སྔོན་མ་དབུས་བོད་མིའི་སྒྲིག་འཛུགས་དང་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ཁག་ཅིག་གིས་ས་གནས་དེ་གའི་བོད་རིགས་གཞོན་སྐྱེས་ལས་མེད་ཚོར་དམིགས་ཏེ། མགྲོན་ཁང་དང་ལག་ཤེས་སློབ་གྲྭ་སོགས་བཙུགས་ཡོད་ཀྱང་། དེ་དག་ནང་ལས་ཀ་བྱེད་མཁན་བོད་པ་ཉུང་ཤས་ཤིག་ལས་མང་ཆེ་བ་ཡུལ་མི་རྐྱང་ཆགས་འདུག དེ་དག་བོད་གཞུང་གིས་མ་ཤེས་པ་དང་བདག་པོ་མ་བརྒྱབ་པ་དེ་འདྲ་ཡིན་ས་མ་རེད་དེ། བལ་ཡུལ་གྱི་ཆབ་སྲིད་བརྟན་པོ་མེད་པའི་དབང་གིས་དཀའ་ངལ་སེལ་ཐབས་ཡག་པོ་ཞིག་གནང་ཐུབ་ཀྱི་མེད་པ་འདྲ། ” ཅེས་བརྗོད་བྱུང་།
ཡང་ཁོང་ལ་བལ་ཡུལ་བོད་མིའི་སློབ་གྲྭ་ཁག་གི་སྐོར་དྲིས་པར། “ རྣམ་རྒྱལ་མཐོ་སློབ་དང་སྲོང་བཙན་སློབ་གྲྭ་གཙོས་པའི་སློབ་གྲྭ་ཁག་མང་པོ་ཞིག་སློབ་གྲྭའི་འཛུགས་སྐྲུན་དང་སློབ་སྦྱོང་གི་མཐུན་རྐྱེན། དེ་བཞིན་དགེ་རྒན་གྱི་ཆ་རྐྱེན་སོགས་ཧ་ཅང་ཡག་པོ་འདུག ཡིན་ནའང་། རྒྱལ་སར་ཡོད་པའི་སློབ་གྲྭ་ཁག་ཏུ་མའོ་ཤོག་ཁག་གིས་དཀའ་ངལ་འདྲ་མིན་བཟོ་བཞིན་ཡོད་ས་རེད། མའོ་ཤོག་ཁག་གི་མི་ཡོང་སྟེ་སློབ་གྲྭའི་ནང་ཡུལ་མིའི་ཕྲུ་གུ་བསྡུས་མི་ཆོག་པ་དང་། ཁོང་ཅག་མའོ་ཤོག་ཁག་གི་ཕྲུ་གུ་ལེན་དགོས་ཚུལ། ཡུལ་མིའི་སློབ་ཕྲུག་ཚོར་བོད་ཡིག་ཤུགས་ཆེན་བསླབས་ཏེ་བོད་པ་བཟོ་ཐབས་བྱས་ན་མི་འགྲིག་སྐོར་སོགས་ཀྱི་རྙོག་དྲ་བཤད་དེ་སུན་གཙེར་ཡང་ཡང་བཟོ་བཞིན་འདུག ད་ཆར་ཁོང་ཅག་གིས་དེ་སྔོན་བོད་མི་ཆིག་སྟོང་ཨ་རིར་འཐེན་རྒྱུའི་གླེང་སློང་ཞིག་བྱུང་ཡོད་པ་དེ་རྒྱུན་འཁྱོངས་བྱས་ཏེ། བལ་ཡུལ་གནས་སྡོད་སྐྱབས་བཅོལ་བོད་མིའི་གཞིས་ཆགས་ཁག་དང་བོད་མི་ཁ་འཐོར་རིགས་ཕྱི་རྒྱལ་ལུང་པ་ཞིག་ལ་གནས་སྤོ་བྱས་ན་ལེགས་པའི་དགོངས་ཚུལ་འདུག ” ཅེས་བརྗོད་བྱུང་།
རྒྱ་གར་བྱང་ཕྱོགས་ལ་དྭགས་ཁུལ་དུ་འཚམས་གཟིགས་སུ་ཕེབས་མཁན་མདོ་སྨད་སྤྱི་འཐུས་རྒྱ་རིགས་མཐར་ལགས་སུ་བཅར་འདྲི་བྱས་པར་ཁོང་གིས། “ ཐེངས་འདིར་སྤྱི་འཐུས་རྒྱ་རོང་ཟླ་བ་ཚེ་རིང་དང་ངེད་གཉིས་ཟླ་གཅིག་ལྷག་རིང་ལ་དྭགས་སླེ་ཁུལ་གྱི་བོད་མིའི་གཞིས་གྲོང་ཆེ་ཆུང་ ༡༢ དང་། བྱང་ཐང་བཅས་ཀྱི་ས་ཁུལ་མང་ཆེ་བའི་ནང་འཚམས་གཟིགས་སུ་ཕྱིན་པ་ཡིན། འགྲོ་མ་ཐུབ་པའི་ས་གནས་ཁག་གི་གཞིས་མགོ་ལ་དྭགས་རྒྱལ་ས་སླེ་རུ་སྐད་བཏང་སྟེ་གནས་སྟངས་རྒྱུས་ལོན་བྱས་པ་ཡིན། སྤྱི་ཡོངས་ཀྱི་ཆ་ནས་ལ་དྭགས་ཁུལ་གྱི་བོད་མིའི་འཚོ་རྟེན་དང་དཔལ་འབྱོར་གང་འཚམས་ཡག་པོ་འདུག ལྷག་པར་དུ་རིག་གཞུང་གི་ཕྱོགས་ནས་ལ་དྭགས་ལ་མཚོན་ན། བོད་ཡིག་བོད་སྐད་ཙམ་མིན་པར། གདོད་མ་ནས་དར་བའི་བོད་པའི་ལེགས་བྱང་དང་སྲོལ་རྒྱུན་རིག་གནས་མང་པོ་ཞིག་ཉར་ཚགས་བྱས་འདུག ནང་ཆོས་ལའང་ཕྱིའི་གནོན་ཤུགས་དང་གཏོར་བཅོམ་མ་ཐེབས་པར་རྒྱུན་འཛིན་བྱེད་སྟངས་ཧ་ཅང་ཡག་པོ་འདུག ས་གནས་དེར་མ་འོངས་པར་ཡང་མུ་མཐུད་དུ་ལྷད་མ་ཞུགས་པའི་བོད་པ་རང་གི་སྲོལ་རྒྱུན་གྱི་རིག་གཞུང་རྒྱུན་གནས་བྱ་ཐུབ་པའི་རེ་བ་ཆེན་པོ་ཞིག་མཐོང་བྱུང་། དེ་བཞིན། ངེད་ཅག་ལ་དྭགས་སླེ་དང་བྱང་ཐང་གི་ས་ཁུལ་ཁག་གི་སློབ་གྲྭ་ཁང་མང་པོ་ཞིག་ཏུ་ཕྱིན་པ་ཡིན། སློབ་གྲྭ་མང་ཆེ་བའི་ནང་སློབ་མའི་སློབ་ཞུགས་ཀྱི་གྲངས་འབོར་དང་སློབ་སྦྱོང་གི་མཐུན་རྐྱེན། དགེ་རྒན་གྱི་སློབ་ཁྲིད་བྱེད་ཕྱོགས་གང་ཐད་ནས་ཡག་པོར་མཐོང་བྱུང་། དགེ་རྒན་འགའ་རེ་ཡིས་འོ་མའི་ཤོག་སྒམ་སོགས་ཀྱི་སྟེང་དུ་རི་སྐྱེས་སྲོག་ཆགས་དང་ཤིང་ཏོག ཅ་དངོས་སོགས་དབྱིན་བོད་གཉིས་ཐོག་བྲིས་ཏེ་ངོས་འཛིན་བྱེད་པ་དང་ཐ་སྙད་སྦྱོང་བརྡར་བྱེད་པ། སློབ་ཁང་གི་རྩིག་ལྡེབས་སོགས་སུ་ཡང་བོད་ཡིག་དང་དབྱིན་ཡིག་གི་ཐ་སྙད་སོགས་སྡེ་ཚན་འདྲ་མིན་དུ་བགོས་ཏེ་སློབ་མའི་ཤེས་ཡོན་ཡར་རྒྱས་ཀྱི་མཐུན་རྐྱེན་བསྐྲུན་འདུག དགེ་རྒན་ཚོས་ངག་གི་སློབ་ཁྲིད་ཙམ་མིན་པར་མིག་སྟོན་ལག་ལེན་མང་པོ་ཞིག་འགྲོ་བཞིན་འདུག དེ་རིགས་ཧ་ཅང་ཡག་པོར་མཐོང་སོང ” ཞེས་བརྗོད་བྱུང་།
སྔར་ལོ་ལ་དྭགས་ཁུལ་དུ་ཆུ་ལོག་གི་གོད་ཆག་ཆེན་པོ་བྱུང་བའི་ས་གནས་ཁག་གང་འདྲ་ཆགས་ཡོད་མེད་དྲིས་པར། “ སྔར་ལོ་ཆུ་ལོག་བརྒྱབ་པ་དེས་ས་གནས་མི་མང་ལ་གོད་ཆག་ཆེན་པོ་བཟོས་ཡོད་ཀྱང་། རང་གཞུང་གི་རོགས་རམ་འོག་ད་ཆར་གང་འཚམ་བསྐྱར་གསོ་བྱས་འདུག ལ་དྭགས་ཡུལ་མིའི་ཁང་ཁྱིམ་སླར་གསོ་དང་བོད་པའི་ཁང་ཁྱིམ་སླར་གསོ་གཉིས་བསྡུར་ན། བོད་མིའི་གཞིས་གྲོང་ ༡༢ ཙམ་གྱི་སྡོད་ཁང་དང་ཞིང་ས། སྡོང་རྭ་སོགས་བསྐྱར་གསོ་གྲུབ་ཏེ། གཞུང་གིས་འགྲོ་གྲོན་བཏང་བར་གྲུབ་འབྲས་ཡག་པོ་ཐོན་འདུག་བསམ་པ་ཞིག་བྱུང་སོང་། མི་མང་ཚོའི་ངོས་ནས་ཀྱང་ཆད་ལྷག་དང་། འདྲ་མཉམ་མ་བྱུང་བ། འདོད་པ་མ་ཁེངས་པ་དེ་འདྲ་གང་ཡང་གསུང་མ་སོང་། སྤྱིར་ས་ཁུལ་དེ་དག་ནང་བརྒས་གཅོང་ཉམ་ཐག་མང་པོ་དེ་འདྲ་མཐོང་མ་སོང་མོད། ལོ་ ༨༠ ཡས་མས་ཅན་འགའ་རེ་ཁོ་རང་ཚོས་རྒན་གསོ་ཁང་ལ་འགྲོ་འདོད་མ་བྱས་པར་ལྷག་འདུག་པ་དེ་འདྲ་འདུག ” ཅེས་བརྗོད་བྱུང་།
ཁོང་གིས་མུ་མཐུད་དུ་གསུངས་དོན། “ ལ་དྭགས་ལྷོ་བྱང་གཉིས་ལ་དཀའ་ངལ་ཞིག་ཡོད་པ་ནི། ས་ཁུལ་མང་ཆེ་བར་ཞིང་ཁར་ཆུ་འདྲེན་མ་ཐུབ་པའི་དཀའ་ངལ་ཞིག་འདུག ས་གནས་ཁག་ཅིག་ཏུ་འཐུང་ཆུའི་དཀའ་ངལ་ཡང་འདུག བོད་གཞུང་གི་ངོས་ནས་དེ་སྔ་དུང་ཁ་ཤས་བརྐོས་འདུག་ཀྱང་། ད་དུང་ཆུའི་དཀའ་ངལ་ཡོད་ས་མང་པོ་ལྷག་འདུག ང་ཚོར་ས་གནས་མི་མང་གིས་རེ་བ་ཁ་ཤས་བཏོན་པ་ནི། དེ་སྔ་བོད་གཞུང་གིས་མི་མང་ལ་ཕྱུགས་ཟོག་གི་གཟན་རྩྭ་གྲ་སྒྲིག་ཐད་བུན་དངུལ་སྤྲད་ཡོད་པ་དེ་མུ་མཐུད་དུ་གནང་རྒྱུ་དང་། དྲོད་ཁང་གསར་རྒྱག་བྱ་རྒྱུ། བྱང་ཐང་ས་ཁུལ་དུ་རྨོ་འདེབས་འཕྲུལ་ཆས་ཀྱི་མཐུན་རྐྱེན་སྦྱོར་རྒྱུ། ཆུ་ཤུར་ས་ཁུལ་གྱི་གནས་སྤོར་བཅས་ལ་རོགས་སྐྱོར་བྱ་དགོས་པ་སོགས་རེད། ལ་ཐེངས་འདིའི་སྐོར་སྐྱོད་སྐབས་ཚོར་སྣང་ཆེ་ཤོས་ཤིག་བྱུང་བ་ནི། ལ་དྭགས་ས་ཁུལ་དེ་བོད་པའི་སྲོལ་རྒྱུན་རིག་གནས་ཀྱི་ངོ་བོ་མ་འགྱུར་བར་གནས་བསྡད་ཡོད་པ་དེ་རེད། ས་གནས་མི་མང་ལ་གཞན་དང་མི་འདྲ་བའི་མི་རིགས་རང་གི་ཁྱད་ཆོས་མང་པོ་ཞིག་འདུག མ་འོངས་པར་མཐུན་རྐྱེན་གང་ལེགས་བསྐྲུན་དེ། ལ་དྭགས་གནས་སྡོད་བོད་མི་ཚོ་མུ་མཐུད་ས་གནས་དེ་ག་རང་དུ་གནས་ཐུབ་ལ་འབད་བརྩོན་བྱ་རྒྱུ་དེ་གལ་ཆེན་འགེངས་ཆེན་ཞིག་ཏུ་མཐོང་སོང ” ཞེས་བརྗོད་བྱུང་།
ཀ་རྡོར་སྒང་གསུམ་ཁུལ་དུ་འཚམས་གཟིགས་སུ་ཕེབས་མཁན་བཀའ་བརྒྱུད་སྤྱི་འཐུས་བསྟན་པ་ཡར་འཕེལ་ལགས་སུ་བཅར་འདྲི་བྱས་པར་ཁོང་གིས། “ ཐེངས་འདིར་ང་དང་སྤྱི་འཐུས་ཀ་རྨ་ཆོས་འཕེལ་གཉིས་ཟླ་གཅིག་ལྷག་རིང་རྒྱ་གར་ཤར་བྱང་ཁུལ་གྱི་སོ་ན་རྡ་བཀྲ་ཤིས་གླིང་དང་ཁར་ཤང་། པ་ཏི། རྡོར་གླིང་། ར་ཝང་ལ། ཞུ་རི་ཞིང་གཡུང་དྲུང་ཀུན་གྲགས་གླིང་། སྒང་ཏོག རུམ་བཏེགས། འབྲས་ལྗོངས། ཀ་སྦུག རྡོར་གདན་བཅས་ཀྱི་གཞིས་མགོ་ ༤ དང་ས་གནས་ཁག་ ༢༠ ཙམ་ལ་སྐོར་སྐྱོད་བྱས་པ་ཡིན། ཀ་རྡོར་སྒང་གསུམ་གྱི་བོད་མི་འདུས་སྡོད་ཁག་གི་དཀའ་ངལ་གཙོ་བོ་དེ། གཞིས་ཆགས་དེ་དག་གི་གཞོན་སྐྱེས་མང་ཆེ་བ་ཕྱི་རྒྱལ་དང་རྒྱ་གར་གྲོང་ཁྱེར་ཁག་ཏུ་ལས་ཀ་འཚོལ་དུ་ཕྱིན་སྟེ་ཤུལ་དུ་རྒན་འཁོགས་འགའ་རེ་ལས་ལྷག་མི་འདུག གཞིས་ཆགས་དེ་དག་གི་ས་ཞིང་འདེབས་ལས་དང་ཕྱུགས་ཟོག་འཚོ་སྐྱོང་སོགས་རྒྱ་གར་བ་མང་པོ་གླས་འདུག གནས་སྟངས་དེ་མཐོང་སྐབས་ང་ཚོས་ནམ་རྒྱུན་བཤད་བསྡད་པའི་ “གཞིས་ཆགས་སྲ་བརྟན” ཟེར་བ་དེ་གང་འདྲ་ཞིག་ལ་སླེབ་ཀྱི་ཡོད་ན། ད་དུང་མུ་མཐུད་དུ་དེ་ལྟར་ཕྱིན་པ་ཡིན་ན་གཞིས་ཆགས་དེ་དག་རྩ་བརླག་ཏུ་འགྲོ་རྒྱུར་ལོ་མང་པོ་འགོར་ས་མ་རེད་སྙམ་པའི་ཚོར་བ་ཤུགས་ཆེན་པོ་བསླེབས་སོང་། དེ་བཞིན། ཀ་རྡོར་སྒང་གསུམ་ལ་མཚོན་ན་ཡང་སྤྱིར་བཏང་བོད་མི་མང་པོ་ཡིན་ཡང་། དེ་ཁུལ་གྱི་བོད་མི་ཚོས་བོད་སྐད་བོད་ཡིག་བེད་སྤྱོད་གཏོང་གི་མེད་པར་བལ་ཡུལ་གྱི་སྐད་བཤད་ཀྱི་འདུག ཐ་ན་ཁྱིམ་ཚང་ནང་ཁུལ་ནས་ཀྱང་བལ་ཡུལ་གྱི་སྐད་བཤད་དེ་གཞོན་སྐྱེས་ཚོའི་ཁྲོད་བོད་སྐད་གཙང་མ་བཤད་ཐུབ་མཁན་ཧ་ཅང་དཀོན་པོ་ཆགས་འདུག ” ཅེས་བརྗོད་བྱུང་།
ཁོང་གིས་རྒན་འཁོགས་ཉམ་ཐག་གི་སྐོར་གསུངས་དོན། “ བོད་མི་ཁ་འཐོར་དུ་ཡོད་པའི་འབྲས་ལྗོངས་ལ་ཆེན་ལ་ཆུང་ཕྱོགས་སུ་བརྒས་གཅོང་ལྟ་རྟོག་བྱེད་མཁན་མེད་པའི་ཉམ་ཐག་མང་པོ་མཐོང་རྒྱུ་འདུག དེ་དག་ལ་བོད་མིའི་སྒྲིག་འཛུགས་ཀྱི་ངོས་ནས་ད་བར་ཉམ་ཐག་སྐྱོབ་གསོའི་རོགས་དངུལ་སྤྲོད་ཀྱི་ཡོད་རབས་གོ་ཐོས་བྱུང་ཡང་། དེ་དག་དུས་ཐོག་སྨན་པ་ཞིག་དང་། དངོས་ནས་ཉམ་ཐག་ཡིན་རིགས་ཚོར་ཐོབ་ཀྱི་ཡོད་མེད་ཀྱི་སྐད་ཆ་ཡང་འདུག ” ཅེས་བརྗོད་བྱུང་།
ཁོང་ལ་སློབ་གྲྭའི་སྐོར་དྲིས་པར། “ ཀ་རྡོར་སྒང་གསུམ་དུ་ཡོད་པའི་སློབ་གྲྭ་མང་ཆེ་བ་གཏན་སློབ་རྐྱང་རེད། སྤྱི་ཚོགས་ནང་སློབ་གྲྭ་དེ་དག་རྒྱ་གར་གཞུང་ལ་རྩིས་སྤྲོད་བྱ་རྒྱུ་ཡིན་པ་དང་། བོད་མིའི་སྒྲིག་འཛུགས་ཀྱིས་འགན་ལེན་བྱ་རྒྱུ་མིན་པའི་དཀྲོག་གཏམ་ཞིག་བྱུང་སྟེ། སློབ་གྲྭ་དེ་དག་གི་དགེ་རྒན་རྒྱ་གར་དང་བོད་པ་ཚོར་སོ་སོའི་ལས་ཀ་གཏན་པོ་ཡོད་མེད་ཀྱི་དོགས་གཞི་བྱུང་སྟེ། སློབ་སྦྱོང་གི་ཕྱོགས་ལ་འཐུས་ཤོར་གང་འཚམ་བཏང་ཡོད་ས་རེད། གནས་ཚུལ་དེ་ང་ཚོས་བོད་གཞུང་ཤེས་རིག་ལས་ཁུངས་ལ་འབྲེལ་བ་ཞུས་ཏེ། ཤེས་རིག་གིས་གནས་སྟངས་དེ་འདྲ་ཆགས་མི་སྲིད་པའི་བཀའ་ལན་གནང་བ་ལྟར། སློབ་གྲྭ་ཁག་ཏུ་གནས་ཚུལ་གསལ་བཤད་བྱས་པ་ཡིན། སྤྱི་ཡོངས་ཀྱི་ཆ་ནས་ཀ་རྡོར་སྒང་གསུམ་གྱི་སློབ་གྲྭ་ཁག་ཚང་མ་བོད་ཁྱིམ་དང་བསྡུར་ན་སློབ་གྲྭའི་འཛུགས་སྐྲུན་དང་སློབ་སྦྱོང་མཐུན་རྐྱེན། དགེ་རྒན་སོགས་སྐྱོ་བོ་རེད ” ཅེས་བརྗོད་སོང་།
མཐར་ཁོང་གིས་ཚོར་ཤུགས་ཆེན་པོས་བརྗོད་དོན། “ ཀ་རྡོར་སྒང་གསུམ་གྱི་བོད་མི་ཚོས་བོད་སྐད་བོད་ཡིག་ལ་སྣང་ཆུང་བྱེད་ཀྱི་ཡོད་པ་དང་། རྒྱ་གར་གཞུང་གིས་གནང་བའི་བོད་མི་སྐྱབས་བཅོལ་བའི་ཐོང་ཐང་མཐུན་རྐྱེན་དེ་དག་ལ་བདག་པོ་རྒྱག་གི་མེད་པ་འདི་དང་། རྒྱ་ནག་གི་གཉའ་གནོན་དང་བརྙས་བཅོས་འོག་ནས་ཡུན་རིང་དཀའ་སྡུག་མྱངས་ཤིང་། རྒྱ་གར་དང་བོད་ཀྱི་ས་མཚམས་ནས་ཚེ་སྲོག་ལ་མ་འཛེམས་པར་རྒྱ་གར་ནང་ཕྱིས་སུ་འབྱོར་བའི་བོད་མི་གསར་འབྱོར་བ་དེ་ཚོར་ཐ་ན་སྡོད་ཁང་ཙམ་ཡང་མེད་པར་རྒྱ་གར་གྱི་ཁང་པ་གླས་ཏེ་བསྡད་ཡོད་པ། འདི་གཉིས་བར་ཧེ་བག་ཆེན་པོ་ཞིག་ཤོར་ཡོད་སྟབས། ང་ཚོས་བསམ་བློ་གཏོང་དགོས་པ་ཞིག་དང་ཕྱོགས་ཡོངས་ནས་འགན་འཁུར་དགོས་པ་ཞིག་ཆགས་ཀྱི་འདུག ” ཞེས་བརྗོད་བྱུང་།
རྒྱ་གར་བྱང་ཤར་ཧི་མ་ཅལ་མངའ་ཁོངས་ཀྱི་བོད་མིའི་གཞིས་ཆགས་ཁག་ནང་འཚམས་གཟིགས་སུ་ཕེབས་མཁན་ས་སྐྱའི་སྤྱི་འཐུས་མཁན་པོ་ནོར་བུ་ཚེ་རིང་ལགས་སུ་བཅར་འདྲི་བྱས་པར་ཁོང་གིས། “ ཐེངས་འདིར་ང་དང་སྤྱི་འཐུས་གཡུང་དྲུང་རྒྱལ་མཚན་གཉིས་ཟླ་གཅིག་ལྷག་རིང་བཀྲ་ཤིས་ལྗོངས་དང་སྦིར་གཞིས་ཆག་ཁྱབ་ཁོངས། སྤོན་ཊ་བཀྲ་ཤིས་གླིང་། ཀུ་ལུ་མ་ན་ལིའི་ཁྱབ་ཁོངས། སིམ་ལ་ཁྱབ་ཁོངས་བཅས་གཞིས་མགོ་ ༨ ཀྱི་ཁོངས་སུ་སྐོར་སྐྱོད་བྱས་པ་ཡིན། ས་གནས་དེ་དག་ནང་རྩ་བའི་ཆ་རྐྱེན་ཡག་པོ་རེད། ཡིན་ནའང་གནས་ཚུལ་ཁ་ཤས་ཐོག་དཀའ་ངལ་ལྷག་ཡོད་ས་མང་པོ་མཐོང་ཐོས་བྱུང་སོང་། སྤིར་གཞིས་ཆགས་ལ་མཚོན་ན། བོད་ནས་གསར་དུ་འབྱོར་བའི་བོད་མི་ ༢༠༠ ལྷག་གཞིས་ཆགས་གང་གི་ཁོངས་སུའང་ཚུད་ཀྱི་མེད་པ་དང་། ཚོང་ལས་ཀྱི་ཕྱོགས་ནས་ཀྱང་དམིགས་བསལ་གྱི་ཁྲོམ་ས་སོགས་གང་ཡང་མེད་པར་སྲང་ལམ་གྱི་ཟ་ཟུར་ནས་ཐང་ཁྲོམ་བསྟན་ཏེ་ཉིན་རེའི་འཚོ་བ་འཁྱོལ་ཐབས་ཙམ་བྱེད་ཀྱི་འདུག འདི་དག་གི་མ་འོངས་པའི་འཚོ་བ་སྐྱེལ་སྟངས་དང་ཕྲུ་གུ་སློབ་གྲྭར་གཏོང་རྒྱུ་བཅས་ལ་སེམས་འཁྲུལ་ཆེན་པོ་འདུག དེ་བཞིན། སོན་ཛི་ནཱ་ཀ་དང་མན་ཊི། མཚོ་པདྨ་བཅས་ཀྱི་ས་ཁུལ་ཁག་ལ་ཡང་འབྲོག་པའི་འབྲོག་ལས་དང་ཞིང་པའི་ཞིང་ལས་སོགས་གཅིག་ཀྱང་མེད་པར་ཚོང་ཁང་དང་ཟ་ཁང་ཉར་བ་དང་། ཕྱི་ལོགས་ནས་ཁྲོམ་སྟེགས་ལ་བརྟེན་ནས་འཚོ་བ་རོལ་གྱི་འདུག དེ་དག་གི་འཚོ་ཐབས་དེ་ཕུགས་བརྟན་པོ་དང་རྒྱུན་གནས་ཐུབ་པ་ཞིག་མ་རེད། ཀུ་ལུ་མུ་ན་ལེ་ལྟ་བུར་མཚོན་ན། ཐོག་མ་ནས་གཞིས་ཆགས་ཀྱི་ས་ཆ་ཡག་པོ་མེད་སྟབས། ལོ་ལྟར་ཁང་པ་དང་ས་ཞིང་ཆུ་ལོག་གིས་གཏོར་སྐྱོན་གཏོང་གི་འདུག ངེད་ཅག་ས་དེར་འབྱོར་སྐབས་ཀྱང་ཆུ་ལོག་གི་ཉེན་ཁ་ཆེན་པོ་ཆགས་འདུག དེ་ལ་བོད་གཞུང་གི་ངོས་ནས་ཆུ་ལོག་ཉེན་འགོག་གི་ཐབས་ཤེས་བྱས་འདུག་ཀྱང་། ས་གནས་མི་མང་ཆུ་ལོག་གི་འཇིགས་སྣང་འོག་སྡོད་དགོས་པའི་དཀའ་ངལ་དེ་སེལ་ཐུབ་མི་འདུག ཡང་ས་གནས་ཁག་ཅིག་ནང་བོད་པ་ཚོ་འདུ་འཛོམ་བྱེད་སའི་ཚོགས་ཁང་མེད་པའི་དཀའ་ངལ་འདུག སིམ་ལར་མཚོན་ན། ས་གནས་ཁག་ཅིག་ལ་སྔོན་མ་རྒྱ་གར་གཞུང་གིས་བོགས་མར་བཏང་བའི་གཞིས་ཆགས་ཀྱི་ས་ཆའི་དུས་ཡུན་རྫོགས་ཏེ། བསྐྱར་དུ་དུས་ཚོད་ཁ་གསབ་བྱ་མ་ཐུབ་པའི་དཀའ་ངལ་འཕྲད་འདུག གལ་སྲིད། རྒྱ་གར་གཞུང་གིས་བོད་མི་ཚོར་བོགས་མར་བཏང་ཡོད་པའི་ས་ཆ་ཕྱིར་བསྡུ་བྱས་ཚེ། བོད་པའི་གཞིས་གྲོང་ཁག་ཅིག་དེ་གར་སྡོད་ཐབས་མེད་པ་ཆགས་འདུག འདིའི་ཐད་འགྲོ་སོང་ཡང་ཆེན་པོ་བཏང་སྟེ་དཀའ་ངལ་སེལ་ཐབས་བྱས་ཡོད་ཀྱང་ཉིན་འགྱངས་ཕྱག་ཕུད་ཀྱིས་ཐག་གཅོད་གང་ཡང་བྱུང་མི་འདུག ” ཅེས་བརྗོད་བྱུང་།
གསར་འགོད་པས་ཁོང་ལ་ས་གནས་དེ་ཁུལ་གྱི་སློབ་གྲྭའི་སྐོར་དྲིས་པའི་ལན་དུ། “ སྤིར་གཞིས་ཆགས་ཉེ་ཁུལ་དུ་ཡོད་པའི་སློབ་གྲྭ་ཁག་ལ་མཚོན་ན་སློབ་གྲྭའི་མཐུན་རྐྱེན་དང་འཛིན་སྐྱོང་། སློབ་སྦྱོང་སོགས་ཕྱོགས་གང་ཐད་ནས་ཡག་པོ་འདུག དམིགས་བསལ་བོད་སྐད་ཡིག་གི་ཐད་ནས་དོ་སྣང་ཆེན་པོ་རེད། ང་རང་འདིའི་སྐོར་ལ་སྔོན་མ་ནས་ཆ་རྒྱུས་ཡོད། ཧི་མ་ཅལ་མངའ་ཁུལ་གྱི་སློབ་གྲྭ་གཞན་དག་ནང་སློབ་ཕྲུག་མང་ཆེ་བ་ཧི་མ་ལ་ཡའི་རི་རྒྱུད་ནས་བསླེབས་པ་ཡིན་ཡང་། ཁོང་ཚོའི་སློབ་སྦྱོང་གི་མཐུན་རྐྱེན་དང་འཛིན་སྐྱོང་། བོད་པའི་ཆོས་དང་རིག་གཞུང་སྲུང་སྐྱོབ་ཐོག་ཧ་ཅང་ཡག་པོ་འདུག བོད་སྐད་བོད་ཡིག་དང་བོད་པའི་ཡུལ་སྲོལ་གོམས་སོགས་ལ་ཡང་དགའ་ཞེན་ཆེན་པོ་རེད། དེ་བཞིན། ཧི་མ་ཅལ་མངའ་ཁུལ་གྱི་དགོན་སྡེ་ཁག་ལ་མཚོན་ན། དགོན་པའི་ནང་ཆོས་ཕྱོགས་ཀྱི་བསླབ་པ་སློབ་གཉེར་ཁོ་ན་མིན་པར། བོད་པའི་ཐ་སྙད་རིག་གནས་དང་། དེང་རབས་ཀྱི་རིག་གནས་སོགས་ལ་ཡང་སྔར་ལས་ལྷག་པའི་ཡར་རྒྱས་ཆེན་པོ་ཕྱིན་འདུག ” ཅེས་བརྗོད་བྱུང་།
ཁོས་མུ་མཐུད་དུ་བརྗོད་དོན། “ དགོན་སྡེ་དང་སློབ་གྲྭ་འདི་དག་ལ་མཚོན་ན་ད་དུང་ཡར་རྒྱས་གཏོང་དགོས་པའི་ཆ་མང་པོ་ཞིག་འདུག དེ་ལ་བོད་གཞུང་གི་ངོས་ནས་རོགས་རམ་མཐུན་འགྱུར་གནང་རྒྱུ་གལ་ཆེན་པོ་ཡིན་ཡང་། ས་གནས་མི་ཚོས་གཞུང་ལ་རེ་བ་བརྒྱབ་ནས་མི་སྡོད་པར། རང་ངོས་ནས་འབད་པ་ཧུར་སྐྱེད་བྱ་རྒྱུ་གལ་ཆེན་པོ་རེད་དྲན་གྱི་འདུག ང་རང་གི་ངོས་ནས་ཐེངས་འདིའི་འཚམས་གཟིགས་སྐབས་ཀྱི་གནས་ཚུལ་ཚང་མ་འབྲེལ་ཡོད་ལྷན་ཁང་ཁག་ལ་སྙན་སེང་ཞུས་ཡོད། ལྷག་པར་དུ་ནང་སྲིད་ལས་ཁུངས་ལ་བརྡ་འདེད་བཏང་སྟེ་དཀའ་ངལ་སེལ་ཐབས་བྱ་དགོས་པའི་རེ་བ་བཏོན་ཡོད། གཙོ་བོ་འབྲེལ་ཡོད་ལས་ཁུངས་ཁག་གིས་མི་མང་གི་དཀའ་ངལ་དེ་དག་ལྷོད་གཡངས་མ་ཕྱིན་པ་ཞིག་གནང་སྟེ། ཁ་ཡོད་ལག་ཡོད་ཀྱི་ལས་དོན་ཞིག་གནང་རྒྱུ་གལ་ཆེན་པོ་རེད ” ཅེས་བརྗོད་བྱུང་།
རྒྱ་གར་བྱང་ཤར་ཨ་རུ་ན་ཅལ་ཕྱོགས་སུ་འཚམས་གཟིགས་སུ་ཕེབས་མཁན་བོན་པོའི་སྤྱི་འཐུས་དགེ་བཤེས་རྣམ་དག་གཙུག་ཕུད་ལགས་སུ་བཅར་འདྲི་བྱས་པར་ཁོང་གིས། “ ཉེ་ཆར་ང་དང་སྤྱི་འཐུས་བསོད་ནམས་རྒྱལ་མཚན་གཉིས་ཟླ་གཅིག་ལྷག་རིང་རྒྱ་གར་བྱང་ཤར་ཨ་རི་ནཱ་ཅལ་མངའ་སྡེ་ཁུལ་གྱི་ཤི་ལོང་དང་ལྡི་མ་པུར། ཀོ་ཧི་མ། ཏི་ཛ་པུར། འབུམ་སྡེ་ལ། བསྟན་འཛིན་སྒང་བཅས་སུ་ཕྱིན་པ་ཡིན། ཐོག་མར་འབྲུག་ཡུལ་ནང་འགྲོ་རྒྱུའི་འཆར་གཞི་ཡོད་ཀྱང་འབྲུག་ནང་སྲིད་ལས་ཁུངས་ལ་འབྲེལ་བ་བྱ་མ་ཐུབ་པའི་དབང་གིས་འགྲོ་ཐུབ་ཡོད་པ་མ་རེད། ངེད་གཉིས་སོང་ཡུལ་གྱི་ས་གནས་ཁག་ཏུ་དཀའ་ངལ་ཆེན་པོ་དེ་འདྲ་མེད་ཀྱང་། ཁ་འཐོར་བོད་མི་མང་པོ་ཞིག་ལ་གཞིས་ཆགས་མེད་པའི་དཀའ་ངལ་ཞིག་འཕྲད་འདུག བསྟན་འཛིན་སྒང་ལྟ་བུར་མཚོན་ན། འཚོ་བའི་ཐད་ནས་བོད་མི་མང་ཆེ་བ་ས་གནས་གཞན་དུ་ཕྱིན་སྟེ་ཞོར་ལས་བྱེད་པ་དང་དམག་མིའི་ཁོངས་སུ་འཛུལ་བ། སུད་ཚོང་སོགས་ལས་དམིགས་བསལ་ཐོན་ཁུངས་མེད་པའི་དཀའ་ངལ་ཞིག་བཤད་ཀྱི་འདུག ས་ཆ་ཁུག་ཀྱོག་ཡིན་སྟབས་གློག་དང་ཆུ། བརྒྱུད་ལམ་སོགས་ཡག་པོ་མི་འདུག ༢༠༠༠ ལོར་བོད་གཞུང་གིས་ཀུ་ཤུ་འདེབས་འཛུགས་བྱས་ཏེ་ས་གནས་མི་མང་ལ་རོགས་རམ་ཞིག་བྱས་འདུག་མོད། གནམ་གཤིས་དང་ས་བབ་ཀྱི་ཆ་ནས་ཀུ་ཤུ་འདེབས་འཛུགས་ཀྱི་ལས་གཞི་དེར་གྲུབ་འབྲས་མེད་ཐོན་མི་འདུག ད་ཆར་ས་གནས་མི་མང་གིས་ཤིང་ཏོག་ཀི་སྤེ་( kiwi fruit )ཟེར་བ་དེ་འདེབས་ལས་སྐོར་ལ་བསམ་བློ་གཏོང་གི་འདུག དཀའ་ངལ་གཞན་ཞིག་ནི། ས་གནས་དེའི་ནང་བོད་གཞུང་འཕྲོད་བསྟེན་ལས་ཁུངས་ཀྱི་སྨན་ཁང་ཞིག་ཡོད་ཀྱང་། ཛ་དྲག་གི་སྨན་བཅོས་སོགས་བྱེད་དགོས་དུས་སྨན་པ་མེད་སྟབས། ཆུ་ཚོད་ ༡༠ ལྷག་གི་མཚམས་སུ་འགྲོ་དགོས་ཀྱི་འདུག འགྲིམ་འགྲུལ་སྟབས་བདེ་མིན་པའི་དབང་གིས་ནད་པ་སྨན་ཁང་དུ་བསྟེན་གཏུག་ཐོག་དཀའ་ངལ་འདུག ” ཅེས་བརྗོད་བྱུང་།
ཡང་ཁོང་གིས་སློབ་གྲྭའི་སྐོར་བརྗོད་དོན། “ ཤི་ལོང་དུ་སམ་བྷོ་ཊའི་ཁྱབ་ཁོངས་ཀྱི་འཛིན་རིམ་ལྔ་བའི་བར་ཡོད་པའི་སློབ་གྲྭ་ཞིག་འདུག དེར་དགེ་སློབ་ ༩༠ ཡས་མས་ཡོད་ས་རེད། སློབ་གྲྭ་དེའི་མཐུན་རྐྱེན་སོགས་ཕྱོགས་ཡོངས་ནས་ཡག་པོ་འདུག གཞན། བསྟན་འཛིན་སྒང་དུ་( CST )ཁྱབ་ཁོངས་ཀྱི་འཛིན་རིམ་བརྒྱད་པའི་བར་གྱི་སློབ་གྲྭ་ཞིག་འདུག དེར་དགེ་སློབ་ཁྱོན་བསྡོམས་ ༣༢༡ ཙམ་འདུག སློབ་གྲྭ་དེར་ཁྱོན་བསྡོམས་དགེ་རྒན་ ༧ ཙམ་ལས་མི་འདུག གལ་སྲིད་དགེ་རྒན་ཞིག་ཉིན་གཅིག་གཉིས་ལ་དགོངས་པ་ཞུས་པ་དང་། ཡང་ནས་སློབ་གྲྭ་ནས་རྩ་དགོངས་ཞུས་པ་དེ་འདྲ་བྱུང་སྐབས། འཛིན་གྲྭ་མང་ཆེ་བར་དགེ་རྒན་མེད་པར་ལྷག་ཡོད་འདུག ད་དུང་མི་མང་གི་བཤད་ཚུལ་ལྟར་ན། དགེ་རྒན་དེ་དག་ཀྱང་ས་གནས་གཞན་དང་སློབ་གྲྭ་གཞན་ནས་ཉེས་པ་བཏང་བ་དང་ཕྱིར་ཕུད་བཏང་བའི་རིགས་ཡིན་སྐོར་ཤོད་ཀྱི་འདུག ལྡི་མ་པུར་དང་ཀོ་ཧི་མ་རུ་གློ་བ་དང་བོད་པ་མཉམ་འཛོམས་ཀྱི་ཁྱིམ་ཚང་ ༩༠ ལྷག་ཡོད་ཀྱང་། དེ་དག་གི་ཕྲུ་གུ་མང་ཆེ་བ་རྒྱ་གར་གྱི་སློབ་གྲྭར་གཏོང་གི་འདུག ས་གནས་མི་མང་གི་བོད་པའི་དགེ་རྒན་ཞིག་བཙལ་ཏེ་ཟུར་དུ་བོད་ཡིག་དང་ནང་ཆོས་སོགས་ཀྱི་སློབ་སྦྱོང་སྤྲོད་ཀྱི་ཡོད་ཀྱང་། སྤྱི་ཡོངས་ཀྱི་ཆ་ནས་ས་གནས་དེ་དག་ཏུ་བོད་པ་རང་གི་སློབ་གྲྭ་མེད་པའི་དབང་གིས་ཕྱོགས་མང་པོ་ཞིག་གནས་དཀའ་ངལ་འཕྲད་ཀྱི་འདུག ” ཅེས་བརྗོད་བྱུང་།
གསར་འགོད་པས་ཁོང་ལ་འཚམས་གཟིགས་རིང་གི་ཚོར་བ་ཆེ་ཤོས་དེ་གང་ནས་བྱུང་མིན་དྲིས་པར། “ ང་རང་ལ་མཚོན་ན་ས་གནས་དེ་དག་ནང་ཚོར་བ་ཤུགས་ཆེ་ཤོས་དེ། མི་རབས་སྔོན་མ་དག་གིས་བོད་པའི་ཆོས་དང་རིག་གཞུང་། སྐད་ཡིག་བཅས་ཀྱི་ཐོག་སྐུ་ངལ་བསྐྱོན་ཏེ། ད་ལྟའི་དུས་ཚོད་ལ་ཡར་རྒྱས་དང་གྲུབ་འབྲས་གང་འཚམ་ཐོབ་ཡོད་པའི་སྤོབས་པ་བྱེད་ཆོག་པ་ཞིག་ཡིན་ཡང་། མ་འོངས་པའི་མི་རབས་རྗེས་མ་དག་གིས་བོད་རང་གི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་ཐུབ་མིན་ཉེན་ཁ་ཆེན་པོ་ཡོད་པའི་ཚོར་སྣང་ཆེན་པོ་བསླེབས་སོང་། ང་རང་གི་བསམ་པར། གཞུང་ངོས་ནས་ཆེད་དུ་ས་གནས་དེ་དག་ནང་རྟོག་ཞིབ་མི་སྣང་བཏང་སྟེ་ས་གནས་མི་མང་གི་དཀའ་ངལ་དེ་དག་མིག་མཐོང་ལག་ཟིན་ཡོང་བ་གནང་རྒྱུ་དང་། ལྷག་པར་དུ་རླུང་འཕྲིན་དང་ཚགས་པར་སོགས་ཀྱི་མཐུན་རྐྱེན་བསྐྲུན་ཏེ་༧གོང་ས་མཆོག་དང་བོད་གཞུང་གི་མཛད་འཕྲིན་ཁག་ཧ་གོ་ཐབས་ཀྱི་ལམ་ཁ་ཞིག་བསྐྲུན་རྒྱུ་གལ་ཆེན་ཆགས་འདུག དེ་བཞིན་དུས་ནས་དུས་སུ་གཞུང་གི་ལས་བྱེད་ཆེད་གཏོང་གིས་མི་མང་ལ་ཟབ་སྦྱོང་སོགས་བརྒྱུད་དེ་མི་མང་ལ་གོ་རྟོགས་སྤེལ་དགོས་ཀྱི་འདུག ས་གནས་མི་མང་གི་རེ་བ་ཆེ་ཤོས་བསྟན་འཛིན་སྒང་ལྟ་བུ་ཞིག་ལ་བོད་པ་རང་གི་སློབ་གྲྭ་ཞིག་བཙུགས་ཏེ། ཁ་འཐོར་མི་མང་གི་ཕྲུ་གུ་ཚོར་སློབ་སྦྱོང་གི་གོ་སྐབས་ཤིག་བསྐྲུན་རྒྱུ་དེ་རེད། ཅེས་བརྗོད་བྱུང་།
གསར་འགོད་པ། དོན་གོ
དྷཱིཿལྷལྡན།།
ཀྲག་གིས་སྦས་པའི༢༠༠༨
བརྡ་ལུང་སྙན་མོ་ཞིག་གིས་འབོད་བརྡ་གཏོང་དུས།།
༢༠༠༨འཛུམ་ཆུང་གིས་སླེབ་ཡོང་བ་འདྲ་མོད།།
མེ་མདའ་གཟན་པོ་ཞིག་གིས་པ་རྨས་དུས།།
༢༠༠༨འཇིགས་སྐྲགས་གི་ཁྲོད་ནས་ཟད་སོང་།།
དེ་ནས་བཟུང༢༠༠༨གཏན་ནས་ཤར་མི་སྲིད།།
ལུང་བསྟན། ངས་ཇི་ལྟར་འགྲེལ་དགོས་ཨང་།།
བོད་གཞུང་གི་སྤྱི་མཐུས་ཁག་ཕྱོགས་བསྐྱོད་བྱེད་པ་འདི་ནི་བོད་མི་རིགས་ཀྱི་དངོས་ཡོད་གནས་སྟངས་རྟོག་ཞིབ་ཆེད་དུ་ཡིན་པ་ལས་དེའི་ནང་ཚན་ནས་ཟུར་དུ་གསར་འབྱོར་བའི་གནས་སྟངས་ཟེར་ནས་ལོགས་སུ་ཡོད་པ་མ་རེད། མ་གཞི་ནས་གསར་འབྱོར་རྣམས་ས་ཁུལ་གང་དུ་ཡོད་ན་ཡང་ས་ཁུལ་དེར་དངོས་ཡོད་གནས་སྟངས་ཞིབ་འཇུག་བྱེད་སྐབས་དེའི་ཁོངས་སུ་ཚུད་ཀྱིན་ཡོད། སྤྱིར་བཏང་བོད་གཞུང་གིས་ངོས་ནས་གསར་འབྱོར་བ་རྣམས་ལ་རང་ནུས་གང་ཡོད་དང་འཇོན་ཚོད་ཀྱིས་ཞབས་འདེབས་ཞུ་བཞིན་ཡོད་ཀྱང་། འགའ་ཞིག་ནི་ད་དུང་དྲིན་ལན་ལོག་འཇལ་གྱིས་དུས་རྟག་ཏུ་གསར་འབྱོར་བ་ལ་གཅིག་བྱེད་ཀྱི་མིན་འདུག གཉིས་བྱེད་ཀྱི་མིན་འདུག་ཟེར་བ་སོགས་ནི་རྣམ་འགྱུར་ཡག་པོ་ཞིག་གཏན་ནས་མ་རེད་སྙམ། འདི་ནི་དེ་ལྟ་བུའི་གང་ཟག་འགའ་ཞིག་ལ་གསལ་འདེབས་ཀྱི་ཚུལ་དུ་བྲིས་པ་ལགས།
མ་གཞི་ནས་སྤྱི་འཐུས་ལྷན་ཚོགས་དེ་གཞིས་ཆགས་ཁོ་ནར་དམིགས་པ་ཞིག་ཡིན་རྒྱུ་རེད། གཞིས་ཆགས་ཁག་ལ་ཕྱོགས་བསྐྱོད་བྱས་པ་ལས་དེའི་ནང་གསར་འབྱོར་གྱི་དཀའ་ངལ་སྣེ་གཅིག་ཀྱང་བཤད་མིན་འདུག
བཀའ་སྤྱི་གཉིས་གསར་པ་བསླེབས་བསྡད་ཡོད་རེད། སྤྱིའི་ཆ་ནས་སྐྱོན་བརྗོད་བྱེད་དགོས་པ་ནི་ཡར་རྒྱས་ཀྱི་ལམ་འགག་རེད། ཡིན་ནའང་གནད་ལུགས་མེད་པ་དང་རིག་པའི་སྒྲུབ་བྱེད་མེད་པའི་སྐྱོན་བརྗོད་རིགས་གཏན་ནས་བྱེད་མི་རུང་སྙམ། ཚང་མས་གཟབ་གཟབ་བྱེད་དགོས་པ་འདོད།།།།
ཁོང་ཚོ་ལ་་་མི་དམངས་ཀྱིས་རྒྱབ་སྐྱོར་མ་བྱེད་ན་བཀའ་སྤྱི་གཉིས་ཁོ་ནའི་བྱེད་ཐུབ་པའི་ལས་དོན་ཁ་པོ་རེད་་།།
བཀུར་འོས་སྤྱི་འཐུས་འཇམ་དབྱངས་བཟོད་པ་ལགས།
ཁྱེད་ནི་ང་ཅོ་རིས་འོས་བསྡུའི་སྐབས་སུ་རྒྱབ་སྐྱོར་བྱས་ས་ཞིག་ཡིན་ལ་་་རེ་བ་བྱས་ས་ཞིག་ཀྱང་ཡིན། ཁྱེད་དང་འཇུ་ཆེན་དཀོན་མཆོག་གཉིས་ཀ་ལ་རྒྱབ་སྐྱོར་བྱས་པ་ཡིན། རྒྱབ་སྐྱོར་བྱས་པ་དེ་ཡང་ཁྱེད་རྣམ་པ་ཚོས་བཙན་བྱོལ་བོད་མི་དམངས་དང་བཙན་བྱོལ་བོད་གཞུང་གཉིས་ཀྱི་ལས་དོན་ཡག་པོ་ཞིག་སྒྲུབ་ཐུབ་ཀྱི་རེད་བསམ་པས་ཡིན།
ཁྱེད་རྣམ་པ་ཚོ་སྤྱི་འཐུས་ཀྱི་རྐུབ་སྟེགས་སྟེང་བསླེབས་ཟིན་པ་མ་ཟད་བོད་དོན་ཐོག་ཏུ་ཕྱོགས་བསྐྱོད་བྱས་པ་རེད། བལ་ཡུལ་དུ་ཕྱིན་ནས་བཙན་བྱོལ་བོད་མིའི་དཀའ་ངལ་ཡག་པོ་ཞིབ་འཇུག་བྱས་ནས་བསླེབས་འདུག་པར་དགའ་པོ་བྱུང་།
བལ་ཡུལ་དུ་ཡོད་པའི་བོད་མི་རྣམས་བལ་ཡུལ་ལུང་པའི་ནང་དུ་གནས་མི་ཐུབ་པ་དངོས་ཡོད་གནས་ཚུལ་རེད། བཙན་བྱོལ་བོད་གཞུང་གི་བཀའ་སྤྱིའི་འོས་བསྡུའི་སྐབས་སུ་བལ་དམག་གིས་འོས་བསྡུ་བྱས་བཅུག་་མེད་པ་དང་། བོད་སྤྱི་པའི་དོན་དག་ཆེ་ཆུང་གང་ཡིན་ནའང་དགག་བྱ་བྱས་བསྡད་ཀྱི་ཡོད་པ་རེད།
བལ་ཡུལ་བོད་མི་རེ་འགའ་ལ་སྐྱབས་བཅོལ་ལག་ཁྱེར་མེད་པ་དང་། འཚོ་བའི་དམིགས་བརྟེན་མེད་པས་དཀའ་ངལ་གང་མང་འཕྲད་ཀྱི་ཡོད་པ་རེད། བཙན་བྱོལ་བོད་གཞུང་གིས་ངོས་ནས་དཀའ་ངལ་འདི་ངེས་པ་ཏུ་མེད་པ་བཟོ་དགོས་ཀྱི་ཡོད་རེད།
སྤྱིའི་ཆ་ནས་བུལ་ཡུལ་གྱི་བོད་མི་རྣམས་ཀྱིས་འདོད་པ་དང་དམིགས་ཡུལ་ངོ་མ་ཕྱི་རྒྱལ་ཁབ་ཤིག་འགྲོ་ནས་འཚོ་བ་ཞིག་བསྐྱེལ་བསམ་གྱི་ཡོད། བསམ་པ་དེ་ཡང་བོད་མི་བཙན་བྱོལ་མང་པོའི་མི་ཚེའི་མདུན་ལམ་དང་འབྲེལ་བ་ཡོད་པ་ཆགས་བསྡད་ཀྱི་ཡོད།
མདོ་དོན་སྤྱི་འཐུས་གྲོས་འཚོགས་ཀྱིས་ངོས་ནས་བལ་ཡུལ་བོད་མི་རྣམས་་ཨ་རི་དང་ཡུང་རོལ་གཉིས་ལྟ་བུའི་སྟོབས་འབྱོར་དང་མང་གཙོའི་རང་དབང་ལྡན་པའི་རྒྱལ་ཁབ་ཤིག་གི་ནང་དུ་གཏོང་ཐུབ་པ་བྱེད་དགོས་ཀྱི་གནད་འགག་ཆེན་ཤོས་རེད་འདོད། དེ་འདྲ་ཡིན་དུས་སུ་གྲོས་འཚོགས་ནང་དུ་གྲོས་ཆོད་བཞག་དགོས་པ་དང་ཨ་རིའི་གྲོས་འཚོགས་དང་ཡོང་རོལ་གྲོས་འཚོགས་བཅས་སུ་སྙན་ཞུ་རྒྱབ་རྒྱུ་དང་འབྲེལ་བ་འཛུགས་རོགས་བྱོས་ཞུ་རྒྱུ་ཡིན།
ཞོར་དུ་་་དྲ་གྲོགས་རྐང་གསུམ་ཟེར་བ་ཞིག་གིས་དབུས་གཙང་སྤྱི་འཐུས་ཤར་གླིང་ཟླ་སྒྲོལ་དང་འཇམ་དབྱངས་བཟོད་པ་གཉིས་ཀྱིས་ཕྱོགས་བསྐྱོད་སྐབས་སུ་ཞིབ་འཇུག་ཡག་པོ་བྱུང་མི་འདུག་པས་བོད་གཞུང་གི་འགྲོ་སོང་འཕྲོག་རླག་རེད་ཞེས་སྡུག་སྐད་བཞིན་འདུག་པས་ཁྱོད་ལ་དྲི་བ་ཁག་གཅིག་དང་གསལ་བཤད་ཁག་གཅིག་ཡོད།
ཤར་གླིང་ཟླ་སྒྲོན་ལགས་ཀྱི་སྐོར་དུ་བཤད་དགོས་པ་མ་མཐོང་། གནས་ཚུལ་རིམ་པའི་གསལ་རེར་འགྲོ་གི་རེད། གཅིག་རེད།
གཉིས་ནས་ཁྱེད་ཀྱིས་་སྤྱི་འཐུས་འཇམ་དབྱངས་བཟོད་པའི་སྐོར་དུ་སྐད་ཆ་འདི་འདྲ་ཞིག་བཤད་འདུག་་་་་ཁྱེད་ཀྱིས་གསུངས་་་་་་་མདོ་སྟོད་སྤྱི་འཐུས་འཇམ་དབྱངས་བཟོད་པ་ལགས་ནས་༼བལ་ཡུལ་ཉེན་རྟོག་པས་བོད་མི་མང་པོ་འཛིན་བཟུང་དང་གཅར་རྡུང་ཚད་མེད་བྱེད་ཀྱི་ཡོད་ས་རེད། ༽ དེ་མིན་ཁོང་གི་གསུང་དུམ་གཞན་ཞིག་གི་ནང་དུ་༼ཨེ་ཙི་སོགས་ཀྱི་འགོས་ནད་རིགས་ཡོད་མཁན་ཡང་ཡོད་ས་རེད། ༽སོགས་ཀྱི་བཤད་སྟངས་འདིའི་རིགས་ནི་དོགས་གཞི་དང་ཐེ་ཚོམ་སྟོན་བྱེད་ཀྱི་ཚིག་ལས་ཕྱོགས་སྐྱོད་ཞིབ་འཇུག་འོག་མི་མང་གི་དཀའ་ངལ་དབུས་གཞུང་དང་བོད་རིགས་མི་མང་ལ་བཤད་སྟངས་ཤིག་གཏད་ནས་མ་རེད།་་་་་ཞེས་གསུངས་འདུག
བལ་ཡུལ་ཉེན་རྟོག་པས་བོད་མི་འཛིན་བཟུང་གཅར་རྡུང་བཏང་གི་ཡོད་ས་རེད་་ཟེར་བ་དང་ཨེ་ཙི་སོགས་ཀྱི་འགོས་ནག་རིགས་ཡོད་ས་རེད་ཞེས་ཟེར་བ་དེར་ཐེ་ཚོམ་སྟོན་བྱེད་ཀྱི་སྐད་ཆ་ཡིན་པར་ངོས་ལེན་བྱས་ཀྱི་ཡོད་རེད།
ཁྱོད་ལ་དྲི་བ།
༡་་་ཁྱོད་རང་སྤྱི་འཐུས་ཤིག་ཡིན་པའི་དབང་བཏང་ན་་་ཁྱེད་ཀྱིས་ཐེ་ཚོམ་མི་དགོས་པ་མི་འདི་དང་འདི་ལ་ཨ་ཙི་འགོས་ནག་འདུག་་་ནང་མི་འདི་འདྲ་རེད་འདུག་་་གཞི་ཆགས་འདི་འདྲ་རེད་འདུག་ཟེར་ནས་དུས་བབ་གསར་ཁང་དུ་ལབ་ཀྱི་ཡིན་པས།
༢་་་གལ་སྲིད་སྤྱི་འཐུས་འཇམ་དབྱངས་བཟོད་པས་ཨི་ཙི་ནད་པ་འདི་དང་དེ་རེད་་་ཞེས་གསལ་པོ་དག་པོ་བྱས་ནས་གསར་འགོད་པ་ཚོ་ལ་ལབ་ན་ཁྲིམས་ལུགས་དང་མཐུན་གྱི་རེད་པས།
༣་་་་གནད་དོན་ཡག་པོ་ཤེས་པས་ཐོག་ནས་སྐད་རྒྱོབ་རོགས་བྱོས་ཞེས་རེ་བསྐུལ་ཞུ་རྒྱུ་ཡིན། དོན་མེད་དགོས་མེད་ཀྱི་སྐད་ཆ་བཤད་ན་ཡག་པོ་མ་རེད། བསམ་བློ་ཐོངས།
མདོ་སྟོད་སྨད་མི་མང་སྙིང་རྗེ། མགོ་བདེ་དྲན་འཕྲུལ་ཅན་ཁ་ཤས་ཀྱིས་ཡར་བསྐོད་མར་བསྐོར་བྱས་ནས་ལྷག་བསྡད་ཡོད་པ་རེད། དབུས་གཙང་མི་མང་ཡང་དེ་ག་རང་རེད།
ཨ་རིག་དགེ་མཐོང་ཞུ་བ་ལགས། དངོས་གནས་ཤར་གླིང་ལགས་ཀྱི་ཀ་ཀོར་་མེད་པར་མང་ཚོགས་ཀྱི་དཀའ་ངལ་ངོ་མ་གླེང་འདུག་པར་ཉིད་ཀྱི་མ་རངས་པའི་དྲི་བ་འདྲ་བཏང་འདུག དངོས་གནས་བྱས་ན་བཀའ་ཁྲི་ཟམ་གདོང་བླ་མ་ཡིན་ཀྱང་ཡར་རྒྱས་ཕྱིན་རབས་ལས་
དེ་ལྟ་བུའི་མི་མང་གི་དཀའ་ངལ་ངོ་མ་ཞིག་བཤད་མྱོང་མེད། ང་ཚོར་དགོས་པའི་་སྤྱི་མཐུས་ངོ་མ་དེ་མང་ཚོགས་ཀྱི་དཀའ་ངལ་ངོ་མ་དམར་རྗེན་དུ་ཤེས་ཚོར་ཡོད་མཁན་ཞིག་རེད།
གཅིག་བྱས་ན་སྤྱི་མཐུས་ཤར་གླིང་གིས་ཉིད་ལ་སྐད་ཆ་མ་དྲིས་པ་དེར་ཁྱེད་རང་གི་དཔོན་ཉམས་ཤོར་བ་ཡིན་རྒྱུ་རེད། འོན་ཀྱང་ཁྱེད་རང་ཕུད་པའི་སྦེལ་ཀོབ་ཏུ་མདོ་སྨད་པ་མང་པོ་ཡོད་པ་རེད་ལོ།
གངས་སྤྲེལ་ཚ་ལགས། གོང་དུ་ངས་བཏབ་པའི་མཆན་བུ་ཚིག་འདི་མ་མཐོང་བ་ཉིད་ཀྱི་མིག་ལ་སྐྱོན་ཞིག་ཡོད་པ་འདྲ།
༼ ས་གནས་འོས་བསྡུ་མ་ཐུབ་པ་མདོ་སྟོད་སྨད་གཉིས་ཀྱིས་སྒེར་དོན་ཡིན་པ་ཉིད་ལ་མི་མང་གིས་བཤད་སོང་ཟེར་བའི་མདོ་སྟོད་མི་མང་དང་ལྷག་པར་མདོ་སྨད་མི་མང་དེ་སྟོན་རོགས། ༽ གང་དུ་མདོ་སྨད་གཅིག་བུ་ལབ་འདུག མདོ་སྟོད་ལ་མོས་འཐད་ཡོད་མེད་དེ་ང་ལ་འབྲེལ་བ་མི་འདུག དེ་བསམ་འཆར་བཤད་ན་ཁྱོད་ཚོ་ལ་འོས་འགན་ཡོད་རེད།
རྡོར་གླིང་དུ་ཡབ་གཞིས་བཟོ་གྲྭ་ཟེར་བ་ཞིག་ཡོད་པ་དེར་སྐུ་ངོ་རྒྱལ་ལོ་དྲོན་གྲུབ་ཀྱི་སྲུས་བསྟན་འཛིན་མཁས་གྲུབ་ཀྱིས་བདག་པོ་བརྒྱབ་ཡོད་པ་རེད། ས་གནས་དེར་མི་མང་ལ་འཚོ་བའི་མཐུན་རྐྱེན་ཡང་སྐྱོ་པོ་ཡིན་པ་དང་། ཡབ་གཞིས་ཀྱི་བཟོ་གྲྭ་དེའི་ནང་ལས་ཀ་བྱེད་མཁན་ཚོར་གླ་ཆ་ཧ་ཅང་ཆུང་ཆུང་ཡིན། དེ་ཡང་ས་གནས་ཀྱི་གླ་བབ་དང་མི་མཐུན་པ་དང་། གཟོ་གྲྭའི་ཚོང་གི་ཡོང་སྒོ་དང་མི་མཐུན་པར་གླ་པ་ཚོར་གླ་ཆ་ཆུང་ཆུང་རེད། སྤྱིར་བཏང་སྒེར་གྱི་བཟོ་གྲྭ་ཡིན་པས། གླ་བབ་ག་ཚོད་སྤྲོད་མིན་བཟོ་བདག་གི་ལག་པར་ཡོད་པ་རེད་མོད། ས་གནས་ཀྱི་མི་མང་སྐྱོ་པོ་ཚོར་གཟིགས་རྟོགས་རེ་བྱེད་མཁན་ཡོད་ན་ཡག་པོ་འདུག དེང་སྐབས་གླ་བབ་སྤྲོད་སྟངས་འདི་ཁྲིམས་དང་ཡང་མཐུན་རྒྱུ་གལ་ཆེ།
ཤར་གླིང་ཟླ་སྒྲོན་གྱིས་ཟེར་ན་སྦེལ་ཀོབ་ཏུ་ས་གནས་གྲོས་ཚོགས་འཚོགས་མ་ཐུབ་པ་འདི་མདོ་སྟོད་སྨད་གཉིས་ཡིན་ཚུལ་བརྗོད་པ་དང་། ཨ་རིག་དགེ་མཐོང་གིས་ཟེར་ན་མདོ་སྟོད་གཅིག་པུ་ལས་མདོ་སྨད་ཀྱིས་མོས་མཐུན་ཡོད་ལུགས་ཀྱི་ད་མདོ་སྟོད་ཚོས་མོས་མཐུན་མེད་ཚུལ་དོན་ལ་བསྟན་ཡོད་ད་གང་ལྟར་་ཤར་གླིང་ཟླ་སྒྲོན་གྱིས་གསལ་བཤད་དགོས་ན་་་་་དགེ་མཐོང་གིས་ཀྱང་མདོ་སྟོད་མི་མང་གཅིག་པའི་མོས་མཐུན་མ་བྱུང་ལུགས་ཞིག་ཀྱང་གསལ་བཤད་བྱེད་དགོས་ངེས་རེད།
དྲ་གྲོགས་རྐང་གསུམ་གང་གསུང་བར་རྒྱབ་སྐྱོར་ཡོད། གཅིག་ཡོད་ས་རེད་་་གཉིས་ཡོད་ས་རེད་་་དེ་ལུགས་གཏན་ནས་ཡག་པོ་མི་འདུག་་་་དཔེར་ན་མདོ་སྟོད་སྤྱི་འཐུས་འཇམ་དབྱངས་བཟོད་པས་དྲི་ལན་ཐུང་ངུ་དེའི་ནང་བློ་ཐག་མ་ཆོད་པའི་ཚིག་་་༼་ཡོད་ས་རེད་༤་༽འདུག་དེ་རིགས་ཀྱིས་ང་ཚོ་ལ་བློ་གཏོད་མེད་པའི་ན་ཟུགས་བཞག་སོང་་་་རྗེས་སོར་གཞུང་གི་འགྲོ་གྲོན་འཕྲོ་བརླགས་མི་གཏོང་བར་ཞུབ་འཇུག་མཐུལ་ཕྱིན་རེ་གནང་རོགས་ཞུ་་ཞུ་་
ཀ་རྡོར་སྒང་གསུམ་དུ་གཟིགས་བསྐོར་ཕེབས་མཁན་ཚོ། ཁྱེད་ཚོས་གཟིགས་པ་ཕལ་ཆེར་བདེན་པ་རེད། ཡིན་ན་ཡང་རྡོར་གླིང་དུ་ཡབ་གཞིས་བཟོ་གྲྭ་ཟེར་བ་ཞིག་ཡོད་པ་དེའི་ནང་དྲུག་ཅུ་རེ་གྲངས་ནས་ད་བར་དཀའ་ལས་རྒྱག་གིན་པའི་ཉམ་ཐག་རྒས་ཁོགས་དེ་དག་གི་གནས་སྟངས་མ་གཟིགས་པ་རེད་དམ། མཁྱེན་བཞིན་དུ་མ་གསུངས་པ་རེད། དེ་ན་དུག་ཅུ་རེ་གྲངས་ནས་ད་བར་མི་ཚེར་དཀའ་ལས་རྒྱག་མཁན་རྣམས་གཅིག་མཇུག་གཉིས་མཐུད་ཀྱིས་འཇིག་རྟེན་ཕྱི་མའི་ལྔ་ལམ་དུ་བཞུད་བཞིན་ཡོད་ལ་ལྷག་བསྡད་རྣམས་ཀྱི་སྡོད་གནས་དང་། འཚོ་བའི་མཐུན་རྐྱེན། སྨན་བཅོས་རོགས་སྐྱོར། ལས་ཡུལ་ཁོར་ཡུག སྤྱི་སྤྱོད་གསང་སྤྱོད་སོགས་ཀྱི་གནས་སྟངས་དག་མཐོང་ན་ཡ་ང་དགོས་པ་ཡོད་པས་སྐུ་མཁྱེན་ཐེར་འདོན་གནང་རོགས། གསར་འགོད་པས་དེར་ཕེབས་ནས་མི་མང་དཀྱུས་མའི་ཁྲོད་བཞུགས་ནས་གནས་ཚུལ་རྒྱུས་ལོན་གནང་རོགས། མགོ་ལ་སྡོད་མཁན་ཚོར་དྲིས་ན་ག་དུས་ཡིན་ན་ཡང་འདྲ་ཆགས་ཆགས་རྐྱང་རྐྱང་ཤོད་ཀྱི་རེད།
ཤར་གླིང་ཟླ་སྒྲོན་གྱིས་གསུངས་པ་བདེན་པ་རེད། ད་ལྟ་བར་དུ་སྦེལ་ཀོབ་ནང་དུ་ས་གནས་འཐུས་ཚོགས་བསྐོ་མ་ཐུབ་པ་ནི་སྦེལ་ཀོབ་མི་མང་ལ་མཚོན་ན་ཞབས་འདྲེན་རེད། སྤྱི་ཚོགས་ཡར་རྒྱས་ཆེན་པོ་ཕྱིན་ཡོད་ཀྱང་མི་མང་གི་བསམ་བློའི་གནས་སྟངས་སྐྱོ་བོ་དེས་ཁ་མ་འདུམ་པར་འགྱུར་ཡོད། ཁོ་བོས་བལྟས་ན་བསམ་ཚུལ་འདི་ནི་མི་མང་སྤྱི་བྱིངས་ཀྱི་བསམ་བློ་ཞིག་གཏན་ནས་མ་ཡིན་པར་འགོ་ལ་བཞུགས་མཁན་གྱི་ལས་ཀྱི་སྣེ་མོ་བ་ག་གེ་མོ་ཚོས་སྐད་ཆ་དཀྲོག་གཏམ་འདྲ་མིན་བཤད་ནས་མི་མང་གི་དམངས་གཙོའི་རང་དབང་རྡོག་རོལ་དུ་བཏང་བ་ཞིག་ཏུ་ངོས་འཛིན་བཞིན་ཡོད།
ཤར་གླིང་བསྟན་འཛིན་ཟླ་སྒྲོན་ལ་དོགས་འདྲི།
བཀུར་འོས་དབུས་གཙང་སྤྱི་འཐུས་ཤར་གླིང་བསྟན་འཛིན་ཟླ་སྒྲོན་ལགས། ཉིད་ལ་དུས་བབ་གསར་འགོད་པས་གལ་ཆེན་དོན་ཆེན་ལྟ་བུ་ལ་དམིགས་ཏེ་སྤྱི་འཐུས་ཕྱོགས་སྐྱོད་ཀྱི་ལས་རིམ་དང་འབྲེལ་བའི་བཅར་འདྲི་ཞུས་སྐབས་ཀྱི་གསུང་ལན་དེ་ཏག་ཏག་བསྡད་ཨེ་སྙམ་པ་དང་འབྲེལ་བའི་སྐད་ཆ་འགའ་ཞུ། ཁྱེད་ཀྱིས་ལན་དུ། ༼ སྦེལ་ཀོབ་གཞིས་ཆགས་ལ་མཚོན་ན། ད་ལྟའི་བར་ཆོལ་ཁ་གསུམ་རྡོག་རྩ་ཆིག་སྒྲིལ་བྱ་མ་ཐུབ་པའི་དབང་གིས་ས་གནས་འཐུས་ཚོགས་འཛུགས་ཐུབ་ཀྱི་མི་འདུག དེ་དཀའ་ངལ་ཆེ་ཤོས་རེད། གནས་ཚུལ་དེ་ས་གནས་མི་མང་ལ་དྲིས་སྐབས་དབུས་གཙང་གི་མི་ཚོས་མདོ་སྟོད་སྨད་གཉིས་ཀྱིས་མཉམ་རུབ་བྱེད་ཀྱི་མི་འདུག་ཟེར་ཞིང་། མདོ་སྟོད་སྨད་ཀྱི་མིས་ས་གནས་གྲོས་ཚོགས་དེ་འོས་བསྡུའི་ལམ་ནས་བདམས་པ་ཡིན་ན། དབུས་གཙང་ལ་མི་འབོར་མང་བས་གྲོས་ཚོགས་འཐུས་མི་ཚང་མ་དབུས་གཙང་གི་མི་ཆགས་ཏེ་མདོ་སྟོད་སྨད་གཉིས་ཀྱི་མི་མང་གི་མངོན་འདོད་འགྲུབ་དཀའ་མོ་ཡིན་ཚུལ་བརྗོད་བྱུང་།༽ ཞེས་གསུངས་འདུག ཁྱེད་ཀྱིས་གནས་ཚུལ་དེ་ས་གནས་མི་མང་ལ་དྲིས་ཞེས་པའི་མི་མང་དེའི་གྲངས་ཚུལ་དང་། མི་མང་ལབ་ན་ག་འདྲ་ཞིག་ལ་གོ་གི་ཡོད། སྦེལ་ཀོབ་ཀྱི་ཁུངས་སུ་གཏོགས་པའི་མི་བུ་བྱེ་བྲག་པ་ཞིག་ལ་དྲིས་པས་གོ་ཆོད་དམ། ས་གནས་འོས་བསྡུ་མ་ཐུབ་པ་མདོ་སྟོད་སྨད་གཉིས་ཀྱིས་སྒེར་དོན་ཡིན་པ་ཉིད་ལ་མི་མང་གིས་བཤད་སོང་ཟེར་བའི་མདོ་སྟོད་མི་མང་དང་ལྷག་པར་མདོ་སྨད་མི་མང་དེ་སྟོན་རོགས། སྦེལ་ཀོབ་མདོ་སྨད་མི་མང་སེར་བྱེས་བསམ་བློ་ཁང་དུ་འཚོགས་ཏེ་གནད་དོན་དེའི་ཐད་དུ་གྲོས་བསྡུར་དང་དེར་ཕེབས་པའི་མི་མང་གི་འདོད་པ་རང་ལ་མང་གཙོའི་ཐོག་ནས་བཞག་པ་རེད། བསམ་འཆར་ཁག་གཉིས་བྱུང་བའི་མཐའ་དོན། ས་གནས་གྲོས་ཚོགས་དགོས་པ་ལ་རྒྱབ་སྐྱོབ་ཐོབ་པ་རེད། དེའི་སྐབས་མདོ་སྨད་ཚོགས་གཙོ་སྐུ་ཞབས་བློ་བཟང་དཔལ་ལྡན་རེད། དུས་ཚོད་བྱས་ན་ལོ་གཅིག་གི་སྔོན་རེད། ད་ལྟ་སྦེལ་ཀོབ་མདོ་སྨད་ཚོགས་གཙོའི་མིང་ཙམ་ཁོ་བོ་ལ་ཡོད་པས་གནད་དོན་དེའི་ཐད་དོགས་འདྲི་ལས་གྱོད་གཞི་བསླངས་པ་མིན། རྗེས་སུ་རིམ་གྱིས་གླེང་ཆོག ད་དུང་། ཟླ་འགའི་སྔོན་དུ་༼ བོད་ཀྱི་གྲོས་ཚོགས་སྲིད་བྱུས་ཉམས་ཞིབ་ཁང་༽ མིང་འདི་ཡིན་བསམ་ཏག་ཏག་ཅིག་དྲན་མ་སོང་༼ གཉའ་ཁྲི་དཔེ་མཛོད་ཁང ༽ གཉིས་ཀྱིས་གོ་སྒྲིག་འོག་མང་གཙོ་དང་རང་དབང་སྐོར་ལ་ཟབ་སྦྱོང་ཞིག་འཚོགས་པ་རེད། དེའི་སྐབས་ཚོགས་སྡེ་ཁག་གི་ཚོགས་གཙོ་དང་ལས་བྱེད་ཚོ་མགྲོན་འབོད་དང་ཉམས་ཞུགས་བྱས་པ་ཡིན། སྐབས་དེའི་བཀའ་ཁྲི་ཟམ་གདོང་རིན་པོ་ཆེའི་གསུང་བཤད་མཇུག་གྲུབ་རྗེས། བཅར་འདྲིའི་གོ་སྐབས་བཟུང་ནས་ཕྲན་གྱིས་ངའི་སྐད་ཆ་འདི་རིན་པོ་ཆེའི་དེ་རིང་གི་བརྗོད་གཞི་མིན་ཡང་དཀའ་གནད་དུ་མཐོང་བས་གསལ་བཤད་ཅིག་ཡིན་ཞེས་འདི་ལྟར་ལབ་ཡིན། སྦེལ་ཀོབ་ཏུ་ས་གནས་གྲོས་ཚོགས་འཚོགས་མ་ཐུབ་པ་འདི་མདོ་སྨད་ཀྱི་མི་མང་གིས་འཐེན་ཁྱེར་དང་མ་དགའ་བ་དེ་འདྲ་མ་རེད། ང་ཚོ་ས་གནས་མདོ་སྨད་ཀྱིས་འཚོགས་འདུ་སྐོང་ནས་མཐའ་དོན་གྲོས་ཚོགས་དགོས་པ་ལ་རྒྱབ་སྐྱོར་ཐོབ་ཡོད། དེ་ནི་གསལ་བཤད་ཅིག་ཡིན། ཕྲན་མདོ་སྨད་ཀྱི་ས་གནས་ཚོགས་གཙོའི་འགན་ཙམ་ཡོད་པའི་ཆ་ནས་ལབ་ཡིན། ཞུས་སྐབས་ཁོང་གིས་དེ་ནི་ས་གནས་རང་ལ་དབང་བ་ལས་ང་ཚོ་ལ་དམིགས་བསལ་གྱི་ཐབས་ཤེས་མི་འདུག དེའི་ཐད་ནས་དེ་འདྲ་བྱུང་ལེགས་ཞེས་གསུངས། སྐབས་དེ་དང་ཉིན་དེར་ད་ལྟའི་བཀའ་ཁྲི་བློ་བཟང་སེང་གེ་མཆོག་ཀྱང་བཞུགས་ཡོད་པ་རེད། དེས་ན་༼ མདོ་སྟོད་སྨད་ཀྱི་མིས་ས་གནས་གྲོས་ཚོགས་དེ་འོས་བསྡུའི་ལམ་ནས་བདམས་པ་ཡིན་ན། དབུས་གཙང་ལ་མི་འབོར་མང་བས་གྲོས་ཚོགས་འཐུས་མི་ཚང་མ་དབུས་གཙང་གི་མི་ཆགས་ཏེ་མདོ་སྟོད་སྨད་གཉིས་ཀྱི་མི་མང་གི་མངོན་འདོད་འགྲུབ་དཀའ་མོ་ཡིན་ཚུལ་བརྗོད་བྱུང་།༽ཞེས་བརྗོད་འདུག་ན། གསལ་བཤད་ངེས་པར་དགོས། དེ་ནི་ཁྱེད་རང་སྒེར་གྱི་སྐད་ཆ་མིན་པ་དང་སྤྱི་འཐུས་ཕྱོགས་སྐྱོད་ཀྱི་དཀའ་གནད་ཕྱོགས་བསྡུས་ཀྱི་སྐད་ཆ་ཡིན་པས་ལབ་ཡིན། ད་དུང་ཟུར་རེ་ན་དོགས་གནས་ཅན་མང་ཡང་ཁོ་བོ་ལ་ཡང་ལས་དོན་གང་མང་ཡོད་པས་འདི་ཙམ་གྱིས་འཐུས་པར་གྱིས། གསར་འགྱུར་འདི་མཐོང་མ་ཐག་སེམས་མ་བདེ་བས་ཁ་ཐུག་བྲིས་པ་ཡིན་པས་ཡིག་ནོར་དང་དོན་ནོར་ཡོད་སྲིད་པས་མཁྱེན་མཁན་ཚོས་བཅོས་རོགས་ཨ་རིག་དགེ་མཐོང་གིས
༄༅།གལ་སྲིད་སྦེལ་ཀོབ་ནང་མདོ་སྟོད་སྨད་ཆོལ་ཁ་གཉིས་ནས་ཆོལ་གསུམ་ལྡན་པའི་ས་འཐུས་ཡིན་ནའང་རང་བཙན་ཚོགས་ཆུང་དགོས་འདུག་བརྗོད་ཀྱི་ཡོད་ན་དེར་དབུས་གཙང་མི་མང་ནས་བསམ་ཤེས་ཅི་བྱེད་ནས་མི་གཏོང་བར་ད་བར་ཚུགས་པར་འགོག་རྐྱེན་གང་ཡིན་མི་ཤེས།
ཇོ་བོ་རྣམ་གཉིས་ལགས་་་་་་ཞེ་ཚིགས་ཟེར་བ་དེ་ཅི་ཞིག་རེད། གསར་འགོད་པ་བསླབ་བྱ་གཏོང་མཁན་ཞིག་གིས་ཡིག་ནོར་ཡིན་རྒྱུ་མ་རེད།
སྐབས་འདིར་བརྗོད་འདོད་པའི་གནད་དོན་གཙོ་བོ་ནི། སྦེལ་ཀོབ་གཞིས་ཆགས་འདི་ནི་བཙན་བྱོལ་ནང་གི་གཞིས་ཆགས་ཐོག་མ་དང་། མི་གྲངས་མང་ཤོས་དང་རྒྱ་ཁྱོན་ཆེ་ཤེས། དུས་ནས་དུས་སུ་ངོམ་སོ་བྱེད་ཀྱིན་པའི་གཞིས་ཆགས་ཞིག་རེད། འོན་ཀྱང་ད་དུང་ཡང་ཐུན་མོང་གི་ས་གནས་མཐུས་ཚོགས་ཤིག་ཀྱང་འཛུགས་ཐུབ་ཀྱིན་མེད་པ་རེད།
འདིས་ཅི་ཞིག་སྟོན་གྱིན་ཡོད་ཟེར་ན། རྒྱུན་དུ་ང་ཚོས་ཆོལ་གསུམ་ཆིག་སྒྲིལ་ཟེར་ཡང་། ཕན་ཚུན་གཅིག་གིས་གཅིག་ལ་ཡིད་ཆེས་མེད་པ་དང་། ཡང་ན་མང་ཉུང་དང་གོ་གནས་ཀྱིས་གཉའ་གནོན་དང་ཐོབ་ཤོར་རྕོད་ཀྱི་ཡོད་པ་དེ་རེད། དེ་མིན་གནས་སྟངས་འདི་འདྲར་ལུས་མི་སྲིད།
ང་ཚོས་སུ་ལ་ཡིད་ཆེད་དགོས། སུ་ཞིག་ང་ཚོའི་གཉེན་དུ་རེ་དགོས། ང་ཚོར་རྒྱལ་ཁ་ཞིག་ཡོད་དམ།
གསར་འགོད་པས་ཞེ་ཚིགས་མང་ཙམ་བེད་སྤྱོད་གཏང་དགོས་པ་ལས།
ཁོས་མུ་མཐུད་དུ་བརྗོད་དོན། ཞེས་པ་ལྟ་བུའི་མ་རང་པའི་ཚིགས་བེད་སྤྱོད་མ་གནང་རོག །
སྤྱིར་ན་རྐང་གསུམ་ང་་་་་་་ཆོས་རྒྱུད་སྤྱི་འཐུས་དང་གྲྭ་བའི་རིགས་ཀྱི་སྤྱི་འཐུས་ཤིག་བཙན་བྱོལ་བོད་མིའི་སྤྱི་འཐུས་ར་བའི་ནང་གཏད་ནས་མི་དགོས་ཟེར་མཁན་གྱི་ཚོགས་གྲལ་ན་ཡོད། ཡིན་ནའང་ད་རེབ་བོད་མི་མང་གི་ཚབ་མཚོན་རང་བཞིན་འོག་ཕྱོགས་སྐྱོད་བྱེད་མཁན་གྱི་སྤྱི་འཐུས་སྐོར་ཞིག་གིས་ཕྱོགས་སྐྱོད་གྲུབ་འབྲས་གླེང་སྐབས་གྲྭ་བའི་རིགས་ཀྱི་སྤྱི་འཐུས་ཚོའི་ཕྱོགས་སྤྱོད་གྲུ་འབྲས་འདིས་བོད་གཞུང་གི་དཔལ་འབྱོར་རླག་མི་འདུག་བསམ་སོང་། ཡིན་ནའང་མདོ་སྨད་སྤྱི་འཐུས་རྒྱ་རོང་ཟླ་བ་ཚེ་རིང་དང་རྒྱ་རིགས་མཐར་གཉིས་མ་ཡིན་པའི་སྤྱི་འཐུས་སྐོར་སྐྱོད་པ་ཚོས་བོད་གཞུང་གི་དཔལ་འབྱོར་འགྲོ་གྲོན་བཏང་པ་ཁྲོ་རླག་ཏུ་བཏང་འདུག་པ་དངོས་ཡོད་བདེན་གྲུབ་ཀྱི་གནས་ཚུལ་ཞིག་ཏུ་གྱུར་འདུག་ཡོད་པ་ནི་ཁོ་བ་ཚོའི་གསུང་བཤད་ལས་གསལ་བོ་ཤེས་ཀྱི་འདུག་་་་་་དཔེར་ན་དབུས་གཙང་སྤྱི་འཐུས་ཤར་གླིང་བསྟན་འཛིན་ཟླ་སྒྲོན་ལགས་ནས་༼སྲོལ་རྒྱུན་ཞིང་ལས་གཙོ་བྱས་པའི་ཟ་འབྲུ་དང་སྔོ་ཚོད་སོགས་ཀྱི་ཐོན་སྐྱེད་ཡག་པོ་ཡོད་ས་རེད༽ཟེར་དོན་དང་མདོ་སྟོད་སྤྱི་འཐུས་འཇམ་དབྱངས་བཟོད་པ་ལགས་ནས་༼བལ་ཡུལ་ཉེན་རྟོག་པས་བོད་མི་མང་པོ་འཛིན་བཟུང་དང་གཅར་རྡུང་ཚད་མེད་བྱེད་ཀྱི་ཡོད་ས་རེད། ༽ དེ་མིན་ཁོང་གི་གསུང་དུམ་གཞན་ཞིག་གི་ནང་དུ་༼ཨེ་ཙི་སོགས་ཀྱི་འགོས་ནད་རིགས་ཡོད་མཁན་ཡང་ཡོད་ས་རེད། ༽སོགས་ཀྱི་བཤད་སྟངས་འདིའི་རིགས་ནི་དོགས་གཞི་དང་ཐེ་ཚོམ་སྟོན་བྱེད་ཀྱི་ཚིག་ལས་ཕྱོགས་སྐྱོད་ཞིབ་འཇུག་འོག་མི་མང་གི་དཀའ་ངལ་དབུས་གཞུང་དང་བོད་རིགས་མི་མང་ལ་བཤད་སྟངས་ཤིག་གཏད་ནས་མ་རེད། ངོ་མ་ཁྱེད་ཚོ་བོད་མིའི་གཞིས་ཆགས་ཁག་ལ་དཀའ་ངལ་གང་ཡོད་ཤེས་རྟོགས་དང་རྒྱུས་ལོན་བྱེད་དུ་འགྲོ་བ་ཡིན་ན་དོགས་གཞི་དང་ཐེ་ཚོམ་སྟོན་བྱེད་ཀྱི་སྐད་ཆ་གཏད་ནས་བཤད་མི་རུང་། ས་ཆ་འདི་དང་འདི་ལ་དཀའ་ངལ་འདི་དང་འདི་འདུག དཀའ་ངལ་འདིའི་འབྱུང་རྩ་འདི་དང་འདི་རེད་ཟེར་ནས་གཏན་ཚིག་དང་ཐག་ཆོད་རང་བཞིན་འོག་དབུས་གཞུང་དང་བཙན་བྱོལ་བོད་རིགས་མི་མང་ལ་བཤད་དགོས། དེ་འདྲ་བཤད་མ་ཐུབ་ཚེ་ཁྱེད་ཚོའི་སྐོར་སྤྱོད་ནི་ཕྱི་གླིང་གི་ལྗོངས་རྒྱུ་བ་ཚོ་དང་ཁྱད་པར་གཏད་ནས་མི་འདུག
སྤེལ་གོབ་ཀྱི་གནས་སྟངས་དེ་ཧ་ཅང་ཐབས་སྐྱོ་བོ་རེད། གནས་སྟངས་དེ་གོ་དུས་བོད་ཆོལ་ཁ་གསུམ་ཟེར་བའི་ཐ་སྙད་འདི་ལའང་ཁོང་ཁྲོ་ཟ་གི ང་ཚོར་རེས་བཅད་འདུ་ཤེས་བསྐྲུན་པ་རེད། ད་ནས་བཟུང་ང་ཚོ་བོད་ཅེས་པ་འདི་གཅིག་པུ་ལས་ཕྱོགས་ཞེན་བྱེད་ས་ཞིག་མེད་ན་དགའ་བ་ལ། སྤུན་ཟླ་ཚོ་ང་ཚོ་བོད་ཡིན། རྒྱ་དམར་གྱིས་མནར་གཅོད་གཏོང་གིན་ཡོད་པའི་མི་རིགས་དེ་ཡིན། རང་ས་རང་ཡུལ་དགྲ་ལག་ཏུ་ཤོར་ཏེ་གནམ་འོག་འདི་ན་ས་ལག་མཐིལ་ཙམ་ཞིག་གི་བདག་དབང་མེད་པའི་སྤྲང་པོ་ཚོ་ཡིན། ད་དུང་ཁྱོད་ཚོས་ནང་ཁུལ་ནས་ཅི་ཞིག་གི་ཐོབ་ཤོར་རྩོད་ཀྱི་ཡོད།