སྐབས་བཅོ་ལྔ་པའི་དབུས་གཙང་སྤྱི་འཐུས་ཀྱི་འོས་བསྡུ་འཕར་མའི་དངོས་གཞིའི་ཁྲོད་ཟླ་བ་ཕུན་སྐྱིད་ལགས་སུ་ཨང་དང་པོ་དང་། འཇིགས་མེད་འབྱུང་གནས་ལགས་སུ་ཨང་གཉིས་པ་བཅས་ཐོབ་འདུག
དེ་རིང་སྔ་དྲོའི་ཆུ་ཚོད་ ༡༠ དང་ཕྱེད་ཀའི་སྟེང་དབུས་བཙན་བྱོལ་བོད་མིའི་སྒྲིག་འཛུགས་འོས་བསྡུ་ལྷན་ཁང་གིས་གངས་སྐྱིད་ལྷག་པ་ཚེ་རིང་ཚོགས་ཁང་དུ། སྐབས་བཅོ་ལྔ་པའི་དབུས་གཙང་སྤྱི་འཐུས་ཀྱི་འོས་བསྡུ་འཕར་མའི་དངོས་གཞིའི་གྲུབ་འབྲས་གསལ་བསྒྲགས་བསྐྱངས་དོན་ལྟར་ན། ཐེངས་འདིའི་འོས་བསྡུའི་ཁྲོད་སྤྱི་ཟུར་ཟླ་བ་ཕུན་སྐྱིད་ལགས་སུ་འོས་གྲངས་ ༩༧༨༣། བརྒྱ་ཆ་ ༦༡།༦༤ ཐོབ་སྟེ་ཨང་དང་པོ་ཆགས་ཡོད་པ་དང་། འཇིགས་མེད་འབྱུང་གནས་ལགས་སུ་འོས་གྲངས་ ༨༠༧༥། བརྒྱ་ཆ་ ༥༠།༨༨ ཐོབ་སྟེ་ཨང་གཉིས་པ་ཆགས་ཡོད་འདུག
གཞན། ཨང་གསུམ་པ་པདྨ་རྡོ་རྗེ་ལགས་སུ་འོས་གྲངས་ ༦༥༡༡ དང་། ཨང་བཞི་པ་ཨོ་རྒྱན་བསྟན་འཛིན་ལགས་སུ་འོས་གྲངས་ ༦༠༩༠ བཅས་ཐོབ་ཡོད་འདུག ཐེངས་འདིར་མིང་གཞུང་དེབ་འགོད་བྱེད་མཁན་ ༤༥༨༧༤ བྱུང་ཡོད་པ་ལས་དངོས་སུ་འོས་འཕེན་མཁན་ ༡༥༨༧༠ བྱུང་ཡོད་འདུག
འོས་བསྡུ་འཕར་མའི་སྔོན་འགྲོའི་སྐབས། ཟླ་བ་ཕུན་སྐྱིད་ལགས་སུ་འོས་གྲངས་ ༣༦༩༡ དང་། འཇིགས་མེད་འབྱུང་གནས་ལགས་སུ་འོས་གྲངས་ ༣༡༥༦ ། ཨོ་རྒྱན་བསྟན་འཛིན་ལགས་སུ་འོས་གྲངས། ༢༤༨༦ ། པདྨ་རྡོ་རྗེ་ལགས་སུ་འོས་གྲངས། ༡༦༩༣ བཅས་ཐོབ་ཡོད།
སྐབས་དེར་འོས་བསྡུའི་འགན་འཛིན་ལས་འཕར་གཡང་མཁོ་རྒྱལ་ལགས་ཀྱིས་སྐབས་བཅོ་ལྔ་པའི་སྤྱི་འཐུས་ནང་མདོ་སྟོད་སྨད་ནས་གསར་འབྱོར་བ་མང་པོ་བསླེབས་ཡོད་ཀྱང་། དབུས་གཙང་སྤྱི་འཐུས་ནང་གསར་འབྱོར་བ་དེ་ཙམ་ཡོང་ཐུབ་ཀྱི་མེད་པ་དེ་ཧ་ཅང་བློ་ཕམ་སྐྱེ་གཞི་ཞིག་ཆགས་ཡོད་པ་དང་། ལྷ་ས་ནི་འདས་པའི་ལོ་རྒྱུས་ཐོག་བོད་བསྟན་སྲིད་ཀྱི་བསྟིི་གནས་ཤིག་ཆགས་ཡོད་སྟབས། རྒྱལ་ས་ལྷ་སའི་ཕྱོགས་ནས་གསར་འབྱོར་སྤྱི་འཐུས་འགའ་རེ་བསླེབས་པ་ཡིན་ན། བོད་པའི་འཐབ་རྩོད་ལ་དམིགས་བསལ་ཕན་ཐོགས་ཆེན་པོ་ཡོད་སྐོར་བཅས་གསུངས་སོང་ལ། སྐབས་བཅུ་དྲུག་པའི་སྤྱི་འཐུས་འོས་འདེམས་ཁྲོད་དབུས་གཙང་མི་མང་གིས་ཁ་ཞེ་གཉིས་མེད་ཐོག་གཞིས་བྱེས་གཉིས་ཀྱི་ཚབ་མཚོན་ཐུབ་པའི་གསར་འབྱོར་བ་ཚོར་འོས་ལྡུག་རོགས་གནང་ཞེས་འབོད་སྐུལ་ཡང་གནང་སོང་།
དེ་བཞིན་འོས་བསྡུའི་འགན་འཛིན་འཇམ་དཔལ་ཆོས་བཟང་ལགས་ཀྱིས་ཀྱང་བཞུགས་སྒར་ངྷ་ས་ནི་༧གོང་ས་མཆོག་གི་བཞུགས་གནས་དང་བཙན་བྱོལ་བོད་མིའི་སྒྲིག་འཛུགས་གནས་ཡུལ་གཉིས་ཆགས་ཡོད་སྟབས། ས་གནས་གཞན་དང་མི་འདྲ་བར་དམིགས་བསལ་ས་གནས་ཞིག་ཆགས་ཡོད་ཀྱང་། དབུས་གཙང་སྤྱི་འཐུས་ཀྱི་སྔོན་འགྲོའི་སྐབས་ངྷ་སར་འོས་བསྡུ་དེབ་སྐྱེལ་བྱེད་མཁན་ ༦༣༠༡ དང་། དངོས་སུ་འོས་འཕེན་མཁན་ ༡༥༠༠ བྱུང་སྟེ། བརྒྱ་ཆ་ ༢༤ ཙམ་ལས་ཟིན་མེད་ཀྱི་མེད་པས་འོས་བསྡུ་སྤྱི་ཡོངས་ཀྱི་གྲུབ་འབྲས་དང་བསྡུར་ན་མཐའ་མ་གཉིས་པ་དེ་ཆགས་ཡོད་པ་དང་། ཐེངས་འདིའི་འོས་བསྡུ་འཕར་མའི་སྐབས་སུའང་འོས་འཕེན་མཁན་ ༡༣༧༠ ཙམ་དང་། དེས་བརྒྱ་ཆ་ ༢༢ ཙམ་ལས་ཟིན་མེད་པས་ཆེས་མཐའ་མ་དེ་ཆགས་ཡོད་སྐོར་སོགས་གསུངས་སོང་།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
སྤྱི་འཐུས་གསར་བ་འཇིགས་མེད་འབྱུང་གནས་ལ་བཀྲ་ཤིས་བདེ་ལེགས་ཞུ། ཁྱེད་ལ་རེ་བ་ཆེན་པོ་ཡོད།
གཞན་ད་ཡང་མ་བྱུང། དབུས་གཙང་མི་མང་གིས་སླར་ཡང་ཞབས་འདྲེན་ཞུས་འདུག ད་བར་གསར་འབྱོར་གཅིག་ཀྱང་སྤྱི་འཐུས་ནང་མ་སླེབས་པ་དེ་ཞབས་འདྲེན་རེད། དེ་བཞིན་བདེ་ལེགས་སྨན་ཁང་གི་དབུ་འཛིན་ཟླ་བ་ཕུན་སྐྱིད་ཟེར་བའི་མགོ་གཉིས་མ་དེ་སླར་ཡང་སླེབས་བྱུང་བས་མ་བྱུང་རེད། སྤྱི་འཐུས་སྐབས་༡༤བའི་ནང་མདོ་སྟོད་སྤྱི་འཐུས་སྨྲ་ཁམས་བསོད་ནམས་སྟོབས་རྒྱལ་གྱི་ལམ་གྲོན་ཆེད་རྙོགས་དྲ་བྱུང་སྐབས་ཟླ་བ་ཕུན་སྐྱིད་ཀྱིས་མདོ་སྟོད་སྤྱི་འཐུས་ཚོར་ཁྱེད་ཚོ་ཕྱི་ལ་ཐོན་པར་ཐུགས་ཁག་རྒྱུད་ནས་མི་འདུག ཁྱེད་ཅག་གི་རྗེས་ལ་ང་ཡང་ཐོན་གྲབས་བྱས་ཀྱང་། སྐབས་༡༥བའི་སྤྱི་འཐུས་ཀྱི་འོས་ཤོག་ལ་གནོད་མི་ཡོང་བསམ་བློ་འཁོར་ནས་ཡོང་ཐུབ་མ་སོང་། ཞེས་བཤད།
དེ་བཞིན་དབུས་གཙང་དང་། མདོ་སྨད་སྤྱི་འཐུས་ཚོར་མདོ་སྟོད་སྤྱི་འཐུས་དེ་ཚོ་ལྐུག་པ་ལྐུག་ནག་རེད། དུད་འགྲོ་དང་གཅིག་པ་རེད། དེ་ཚོར་ག་ཚོད་བཤད་ཀྱང་གོ་བརྡ་མི་འཕྲོད་པ་ང་ཚོས་ཤེས་ཤེས་པ་རེད། ཅེས་བཤད་ཡོད་རེད། ཞབས་འདྲེན་དེ།
གཡང་མཁོ་རྒྱལ་ལགས་ཀྱིས་གསུངས་པ་དེ་དངོས་གནས་རེད། དབུས་གཙང་གི་སྤྱི་འཐུས་ནང་ལ་ད་བར་གསར་འབྱོར་བ་རྩ་བ་ནས་སླེབས་མྱོང་མེད་པ་དེ་དངོས་ཡོད་རེད། དེ་ནི་དཀྲུགས་ཤིང་རྩ་བ་ནས་མ་རེད། ང་ཚོས་དངོས་ཡོད་ཀྱི་གནས་ཚུལ་ཁས་ལེན་དགོས་ཀྱི་རེད། གལ་སྲིད་ང་ཚོར་དངོས་ཡོད་ཀྱི་གནས་ཚུལ་ཁས་ལེན་རྒྱུའི་སྤོབས་པ་མེད་ན། ཁ་ནས་དམངས་གཙོ་དང་ཞི་བདེ་ག་རི་བཤད་ཀྱང་ཆུའི་དཀྱིལ་ལ་སྟུ་དྲི་བཏང་བ་དང་ཁྱད་པར་ཅི།།
དབུས་གཙང་ཆོལ་ཁའི་སྤྱི་མཐུས་གཉིས་འདེམས་ཐོན་བྱུང་བ་ལ་མཚམས་འདྲི་ཞུ། ཁྱེད་རྣམ་གཉིས་ཀྱི་བྱ་བ་ལམ་ལྷོངས་ཡོང་བའི་སྨོན་འདུན་ཞུ།
འོས་བསྡུ་ལས་འཕར་གཡང་མཁོ་རྒྱལ་གྱི་འཐེན་འཁྱེར་གྱི་གཏམ་བཤད་ལ་དགག་པ་མཐའ་གཅིག་ཏུ་ཡོད། གསར་འབྱོར་རྙིང་འབྱོར་གྱི་སྐད་ཆ་དཀྲོག་གཏམ་དེ་མ་སླང་ན་གང་འདྲ་འདུག གཞིས་ཆགས་པས་གསར་འབྱོར་ལ་རྙོག་དྲ་བཤད་མ་ཤེས་པ་མ་རེད། ཁྱེད་རང་གསར་འབྱོར་བ་ཡིན་ཙང་གྲོས་ཚོགས་ནང་དུ་གསར་འབྱོར་བ་སླེབས་ཐབས་ཆེད་སྐུལ་སློང་གཏམ་བཤད་སྤེལ་བ་ལ་ངོས་རང་བློ་ཕམ་བྱུང་། མ་གཞི་ཁྱེད་རང་ལས་ཀ་འདི་ཟླ་བ་ཁ་ཤས་རིང་གི་ལས་ཀ་རེད་དེ་རྐུབ་རྐྱག་སྒང་ནས་གཏམ་བཤད་སྤེལ་སྐབས་ནམ་རྒྱུན་གྲོགས་པོ་ཕན་ཚུན་བཤད་རེས་བྱེད་པ་དང་མི་འདྲ། འདི་ལ་འགན་ལེན་ཆེན་པོ་ཁུར་དགོས། མ་འོངས་པར་གཟབ་གཟབ་བྱེད་ནས་སྐད་ཆ་དེ་འདྲས་རིགས་མ་སྤེལ་ན་ཡག་པོ་རེད་སྙམ། གསར་འབྱོར་བ་མང་སའི་ས་ཁུལ་ལ་གཞིས་ཆགས་པ་རྣམས་ལ་དཀའ་ངལ་འཕྲད་པ་རྣམས་བྲིས་ན་བྲིས་ཚད་ཡོད་མ་རེད། རྙོག་དྲ་ཆུང་ཆུང་གིས་སྤྱི་ཚོགས་དཀྲུགས་ནས་ཆོ་ཡོད་མ་རེད།
ནམ་ཡང་རང་ཚུགས་མི་བོར་ཞིང་དྲང་བདེན་དང་ལྷག་བསམ་གྱི་ཕྱོགས་སུ་སྐྱོད་མཁན་སྤྱི་འཐུས་ཟླ་བ་ཕུན་སྐྱིད་ལགས་སླར་ཡང་གྲོས་ཚོགས་ཀྱི་ཞབས་སྟེགས་སུ་བསླེབས་པ་འདི་ནི་བོད་མི་མང་སྤྱི་འཐུས་གྲོས་ཚོགས་ཀྱི་གཟི་བརྗིད་ཅིག་ཏུ་ངོས་འཛིན་ཞུ་འོས་སུ་མཐོང་ལགས།ད་དུང་ཡང་སྔར་ལྟར་གནང་རྒྱུའི་རེ་བ་དང་སྨོན་ལམ་ཡོད། འཇིགས་མེད་འབྱུང་གནས་ཀྱང་ཁོང་ལྟར་ལྷག་བསམ་དང་དྲང་བདེན་གྱི་ཕྱོགས་སུ་སྐྱོད་མཁན་ཞིག་ཡིན་པའི་རེ་བ་ཡོད།
དབུས་གཙང་སྤྱི་འཐུས་མི་སྣ་བཅུ་བོ་ཏག་ཏག་འདེམས་ཐུབ་ཀྱིན་མེད་པར་གཟིགས་དང། ད་གསར་འབྱོར་ཞིག་ད་ཕ་རིའི་སྤང་རྒྱན་མིན་ན་ཅི་ཡིན། ངས་དེ་སྔོན་ཞིག་ནས་དབུས་ཚང་མི་མང་གི་མིག་གཅིག་ལོང་པ་རེད་ལབ་ཡོད།
གཅིག་བྱས་ན་རྗེས་མ་ནས་ཆོལ་ཁོངས་གསུམ་པོའི་ནང་ཁུལ་གྱི་ས་ཁུལ་ཆེ་ཁག་ལ་ཡང་མི་གྲངས་ཀྱི་ཐོབ་སྐལ་ཞིག་འཇོག་ཐུབ་ན་བསྐྱར་འདེམས་ཡང་བདམས་མི་དགོས་པ་ཞིག་ཡོང་གི་རེད་ལ། འཐུས་མིའི་ཁྱབ་ཁོངས་ཀྱི་ཆ་ནས་ཀྱང་བཟང་ས་ཡོད། འདི་འོས་འདེམས་སྐབས་སུ་ཆོལ་ཁོངས་སོ་སོའི་ས་ཁུལ་ཚང་མ་འདུས་པའི་ཚོགས་ཆེན་འཚོགས་ནས་གླེང་སློབ་བྱ་འོས།
དབུ་གཙང་སྤྱི་འཐུས་གཉིས་ལ་མཚམས་འདྲི་ཡོད།
རང་མི་རིགས་དང་རིག་གཞུང་ལ་རྨ་མེད་པའི་ཞབས་འདེགས་སྒྲུབ་ཐུབ་པའི་རེ་བ་ཡོད། ཅུང་ངར་ཙམ་ཡོད། གང་ལྟར་ནམ་ཡིན་ཡང་དྲང་ཚུགས་བོར་མི་ཉན།
དབུས་གཙང་སྤྱི་འཐུས་ཀྱི་འཕར་མའི་འོས་བསྡུ་ལེགས་འགྲུབ་བྱུང་བ་ལ་བཀྲ་ཤིས་བདེ་ལེགས་ཞུ།