ཟླ་འདིའི་ཕྱི་ཚེས་ ༧ ཉིན་ཁམས་སོག་རྫོང་གི་ཆབ་སྲིད་བཙོན་ཟུར་ཡེ་ཤེས་བསྟན་འཛིན་ལགས་ངོས་འཛིན་དཀའ་བའི་ནད་གཞི་ཞིག་གིས་འདས་གྲོངས་སུ་ཕྱིན་ཡོད་འདུག
གནས་ཚུལ་བཏང་འབྱོར་ལ། ཕ་ཡུལ་ཁམས་སོག་རྫོང་ནས་ཡིན་པའི་ཡེ་ཤེས་བསྟན་འཛིན་ལགས་དེ་སྔོན་༧གོང་ས་མཆོག་གིས་འབྲས་ལྗོངས་སུ་དུས་འཁོར་དབང་ཆེན་གནང་སྐབས་བཅར་མྱོང་ཡོད་པ་དང་། ཕྱི་ལོ་ ༢༠༠༡ ལོར་སོག་རྫོང་དུ་བོད་དོན་དང་འབྲེལ་བའི་སྦྱར་ཡིག་བཀྲམ་སྐབས། རྒྱ་གཞུང་གིས་ཁོ་ནི་ཡིག་ཆ་དེ་དག་དཔར་སློག་རྒྱག་མཁན་ཡིན་པའི་ཉེས་འཛུགས་འོག་འཛིན་བཟུང་གིས་ལོ་ ༡༠ ཡི་ཁྲིམས་ཐག་བཅད་ཡོད་ཅིང་། ཕྱི་ལོ་ ༢༠༡༠ ཟླ་ ༡༢ ནང་ཁོང་གི་དུས་བཀག་བཙོན་འཇུག་གི་ཡུན་ཚད་རྫོགས་ཏེ་ཀློད་གྲོལ་བཏང་ཡོད་ཀྱང་། བཙོན་ཁང་ནས་གཅར་རྡུང་མནར་གཅོད་བཏང་བ་དང་། ངལ་རྩོལ་ལ་སྐུལ་དྲགས་པ་བཅས་ཀྱིས་ཁྱིམ་དུ་ལོག་སྐབས་ཉལ་སར་ལྷུང་ཡོད་འདུག ཁོང་གི་ནང་མིས་ལྷ་ས་དང་ནག་ཆུ་སོགས་ཀྱི་སྨན་ཁང་མང་པོར་བསྟེན་གཏུག་བྱས་ཀྱང་དྲག་སྐྱེད་མ་བྱུང་བར་མཐར་འདས་གྲོངས་སུ་གྱུར་ཡོད་འདུག
ཡེ་ཤེས་བསྟན་འཛིན་ལགས་རྒྱའི་བཙོན་འོག་ནས་ལོ་ ༡༠ ལ་མནར་གཅོད་མྱངས་པ་དང་། བཙོན་གྲོལ་ཐོབ་རྗེས་ཟླ་ ༡༠ རིང་ནད་མནར་གྱི་དཀའ་སྡུག་མྱངས་མཐར་ཟླ་འདིའི་ཕྱི་ཚེས་ ༧ ཉིན་འདས་གྲོངས་སུ་ཕྱིན་ཡོད་འདུག
ས་གནས་བོད་མི་རེ་ཟུང་གིས་བརྗོད་ན། ཆབ་སྲིད་བཙོན་པ་དེ་ཚོ་ཕྱིར་གཏོང་སྐབས། རྒྱ་གཞུང་གིས་དུག་སྨན་སྤྲད་དེ་ཟླ་ཤས་རྗེས་ཤི་འགྲོ་བ་དང་། མ་ཤི་ཡང་སླར་དྲག་སྐྱེད་ཡོང་ཐབས་མེད་པ་ཞིག་བཟོ་བཞིན་འདུག དེ་སྔོན་སོག་རྫོང་གི་ཆབ་སྲིད་བཙོན་པ་བསྟན་འཛིན་ཆོས་དབང་ཞུ་བ་ཁོང་ཡང་། བཙོན་ནས་ཕྱིར་བཏང་རྗེས་ན་ཚ་གང་ཡིན་ངོས་འཛིན་བྱེད་དཀའ་བ་ཞིག་གིས་ལོ་གཉིས་རིང་ཉལ་སར་ལུས་རྗེས་འདས་གྲོངས་སུ་ཕྱིན་ཡོད་པ་དང་། ཡེ་ཤེས་བསྟན་འཛིན་དང་བསྟན་འཛིན་ཆོས་དབང་གཉིས་ཀྱི་ནད་རྟགས་དང་ངོ་བོ་གཅིག་པ་ཡིན་ཚུལ་སོགས་རྗོད་ཀྱི་ཡོད་འདུག
གནས་ཚུལ་མཁོ་གཏོང་བ། ངག་དབང་ཐར་པ།
སྙིང་རྗེ་་་་འདས་པོ་འདིའི་ཆད་དུ་བསྔོ་སྨོན་གང་མང་གསུངས་རོགས།