གངས་སྐྱིད་གཞོན་ནུའི་རྩེད་ཐང་དུ་བོད་རང་བཙན་ཆེད་རང་ལུས་མེར་བསྲེག་གཏོང་རྒྱལ་གཅེས་པ་དག་གི་ཆེད་དུ་ལག་རྩེད་སྤོ་ལོའི་འགྲན་བསྡུར་ཞིག་མགོ་འཛུགས་གནང་ཡོད།
ཁ་སང་ཕྱི་ཚེས་ ༡༧ ཉིན་གྱི་ཕྱི་དྲོར
་བཞུགས་སྒར་གངས་སྐྱིད་གཞོན་ནུའི་ལག་རྩེད་སྤོ་ལོ་རྩེད་ཐང་དུ་ངྷ་ས་ས་གནས་གཞོན་ནུའི་གོ་སྒྲིག་འོག་༼དཔའ་བོ་རྗེས་དྲན་སིལ་སྤོ་འགྲན་བསྡུར།༽ ཞེས་པ་དབུ་འཛུགས་གནང་ཡོད་ཅིང་། ཐེངས་འདིའི་རྩེད་འགྲན་ནང་བཞུགས་སྒར་ཉེ་འཁྲིས་སུ་ཡོད་པའི་ས་རཱ་མཐོ་སློབ་རུ་ཁག་དང་ཤེས་རབ་དགའ་ཚལ་སློབ་གླིང་རུ་ཁག ངྷ་སྟེང་བོད་ཁྱིམ་ལག་ཤེས་སྡེ་ཚན་རུ་ཁག ཆོལ་གསུམ་རུ་ཁག འབྲོག་པ་རུ་ཁག ངྷ་ས་རུ་ཁག སྐུ་སྲུང་རུ་ཁག ཕ་ཡུལ་རུ་ཁག པཎ་ཆེན་རུ་ཁག སུ་ཇཱ་བོད་ཁྱིམ་རུ་ཁག་བཅས་ཕོའི་རུ་ཁག་བཅུ་དང་། ས་རཱ་མཐོ་སློབ་དང་ཤེས་རབ་དགའ་ཚལ་སློབ་གླིང་། སུ་ཇཱ་བོད་ཁྱིམ་བཅས་མོའི་རུ་ཁག་དྲུག་མཉམ་ཞུགས་གནང་ཡོད་པ་དང་། ཕྱི་ཟླ་ ༡༠ བའི་ཚེས་ ༧ ཉིན་གྱི་གཞོན་ནུའི་ཉིན་མོར་ཕོ་མོ་རུ་ཁག་གཉིས་ཀྱི་མཐའ་མའི་རྩེད་འགྲན་བྱ་རྒྱུ་ཡིན་འདུག
འདིའི་ཐད་ངྷ་ས་ས་གནས་གཞོན་ནུའི་དྲུང་ཆེ་བཟོད་པ་ལགས་ཀྱིས་བརྗོད་དོན་ལྟར་ན། ད་ལྟའི་བར་ངྷ་ས་ས་གནས་གཞོན་ནུའི་གོ་སྒྲིག་གནང་བཞིན་པའི་སིལ་སྤོལ་འགྲན་བསྡུར་དེ། བོད་རང་བཙན་དང་བོད་ཀྱི་བདེན་དོན། བོད་ཀྱི་རིག་གཞུང་བཅས་ཀྱི་ཆེད་དུ་རང་སྲོག་བློས་གཏོང་བྱས་པའི་རྒྱལ་གཅེས་པ་ཡོངས་ཀྱི་ཆེད་དུ་གོ་སྒྲིག་གནང་ཡོད་ཀྱང་། འདི་ལོའི་སིལ་སྤོལ་འགྲན་བསྡུར་གྱི་དམིགས་ཡུལ་གཙོ་བོ། བོད་ཀྱི་བདེན་དོན་ཆེད་རང་ལུས་མཆོད་མེར་བསྒྲོན་པའི་དཔའ་བོ་ཐུབ་བསྟན་དངོས་གྲུབ་དང་གྲྭ་ཕུན་ཚོགས། གྲྭ་ཚེ་དབང་ནོར་བུ། གྲྭ་བཀྲ་བྷེ་བཅས་དཔའ་བོ་རྣམ་པ་བཞི་གཙོས། བོད་རང་བཙན་ཆེད་རང་སྲོག་བློས་གཏོང་བྱས་པའི་རྒྱལ་གཅེས་པ་ཡོངས་ལ་རྗེས་དྲན་གྱི་ཆེད་དུ་ཡིན་འདུག་ལ། དུས་ཚོད་ཀྱི་ཆ་ནས་སྔོན་མར་མཐའ་མའི་འགྲན་བསྡུར་དེ་༸གོང་ས་མཆོག་གི་འཁྲུངས་སྐར་དང་དཔའ་བོ་ཐུབ་བསྟན་དངོས་གྲུབ་མཆོག་གི་ཉིན་མོར་འཁེལ་བར་བྱས་ཏེ་གོ་སྒྲིག་བྱས་ཡོད་ཀྱང་། འདི་ལོའི་མཐའ་མའི་རྟིང་རྩོད་འགྲན་བསྡུར་དེ་འཆར་ཟླའི་ཕྱི་ཚེས་ ༧ ཉིན་གྱི་བོད་ཀྱི་གཞོན་ནུའི་ཉིན་མོར་འཁེལ་བར་བྱས་ཏེ་གོ་སྒྲིག་གནང་ཡོད་འདུག་ལ། མཐའ་མའི་རྟིང་རྩོད་འགྲན་བསྡུར་ཁྲོད་རྒྱལ་ཁ་ཐོབ་པའི་ཨང་དང་པོར་ཧིན་སྒོར་ཆིག་ཁྲི་ ༡༠༠༠༠ དང་སྐེ་འདོགས་རྟགས་མ། ཨང་གཉིས་པར་ཧིན་སྒོར་དྲུག་སྟོང་ ༦༠༠༠ དང་སྐེ་འདོགས་རྟག་མ་བཅས་འབུལ་འཆར་ཡོད་འདུག
འགྲན་བསྡུར་གྱི་གཞི་རྒྱ་ཆེ་རུ་གཏོང་འཆར་ཡོད་མེད་ཀྱི་ཐད་ནས་། ད་ལྟའི་བར་ས་གནས་གཞོན་ནུའི་ངོས་ནས་༼ དཔའ་བོ་རྗེས་དྲན་སིལ་སྤོ་འགྲན་བསྡུར།༽ གྱི་དམིགས་ཡུལ་དང་མི་མང་གི་དོ་སྣང་ལ་གཞིགས་ཏེ། བཞུགས་སྒར་བྱང་ཕྱོགས་ཀྱི་ས་གནས་ཁག་དང་གཞིས་ཆགས་ཁག་ཆ་བགོས་ཐོག་འགྲན་བསྡུར་བྱ་རྒྱུ་དང་། རྒྱལ་ཡོངས་རང་བཞིན་གྱི་སིལ་སྤོལ་འགྲན་བསྡུར་ཞིག་གོ་སྒྲིག་གནང་འཆར་བྱས་ཀྱང་། བོད་དོན་འཐབ་རྩོད་དང་འབྲེལ་བའི་ལས་འགུལ་གཞན་དོ་སྣང་ཤུགས་ཆེར་བྱས་ཏེ་རྩེད་མོའི་རིགས་ཀྱི་ལས་འགུལ་ལ་དོ་སྣང་བྱས་མ་ཐུབ་པ་དང་། མ་འོངས་པའི་རྒྱུན་ལས་རྣམ་པའི་ལས་འགུལ་མཇུག་སྐྱོང་ཐུབ་མིན་སོགས་ཀྱིས་དབང་གིས་ཐོག་མའི་དམིགས་ཡུལ་ལྟར་འགྲོ་རྒྱུ་ཁག་པོ་ཡིན་སྐོར་བརྗོད་བྱུང་།
ངྷ་ས་ས་གནས་གཞོན་ནུའི་གོ་སྒྲིག་གནང་བཞིན་པའི་སིལ་སྤོལ་འགྲན་བསྡུར་དེ་ནི། སྤྱི་ལོ་ ༡༩༨༠ ལོ་ཡས་མས་སུ་རྩེད་མོའི་རྣམ་པའི་ཐོག་མགོ་འཛུགས་གནང་བ་ཞིག་ཡིན་པ་དང་། ༢༠༡༠ ལོར་ངྷ་ས་ས་གནས་གོ་སྒྲིག་འོག་ ༼དཔའ་བོ་རྗེས་དྲན་སིལ་སྤོལ་འགྲན་བསྡུར།༽ བསྒྱུར་རྗེས་དཔའ་བོའི་རྗེས་དྲན་དང་གཞོན་སྐྱེས་ཚོའི་མཐུན་ལམ་བཅས་ལ་དམིགས་ཏེ་མུ་མཐུད་རྒྱུན་སྐྱོང་བཞིན་ཡོད་འདུག
གསར་འགོད་པ། དོན་གོ
