སྤྱི་མཐུས་ཀྱི་ལས་འགན་མ་བསྒྲུབས་ཐལ།

བཀའ་བློན་དྲུག་པོ་ཁ་ཁུ་སིམ་པོས་སྤྱི་མོས་སུ་བཏང་བ་དེ་སྤྱི་མཐུས་ཀྱི་ལས་འགན་མ་བསྒྲུབས་པ་རེད།

ཚེ་རིང་བསམ་གྲུབ།

ཉེ་ཆར་སྐབས་བཅོ་ལྔ་པའི་བཀུར་འོས་སྤྱི་མཐུས་གཅིག་གིས་ཀྱང་བཀའ་བློན་འོས་མི་དྲུག་ལ་དགོས་ངེས་ཀྱི་ཆ་རྐྱེན་དང་ཉམས་མྱོང་འཇོན་ཐང་སོགས་གང་འདྲ་ཡོད་མེད་ལ་དྲི་བ་དང་དགག་བྱ་གང་ཡང་མ་བྱས་པར་མིང་བཤེར་བྱས་པ་ཙམ་གྱིས་སྤྱི་མོས་སུ་བཏང་སོང་། དེས་གང་ཞིག་མཚོན་གྱི་ཡོད་ཅེ་ན། བཀུར་འོས་སྤྱི་མཐུས་རྣམས་ཀྱིས་རང་ཉིད་ཀྱི་ལས་འགན་དེ་གལ་ཆེན་ཡིན་པར་ངོས་འཛིན་གསལ་པོ་མེད་པ་དང་། དེ་བཞིན་བཀའ་བློན་ཕྱག་རོགས་རྣམས་ནི་བོད་ཀྱི་རྩ་དོན་དང་ཐད་ཀར་འབྲེལ་བ་ཆགས་ཀྱི་ཡོད་མེད་ཐོག་བསམ་བློ་དང་དངངས་འཚབ་ཀྱང་མེད་པ་ཤེས་རྟོགས་ཐུབ།

དངོས་གནས་བྱས་ན་ད་ལྟའི་དུས་ཚོད་འདིར་སྔར་བས་ཀྱང་ཟབ་ནན་གྱིས་རིག་པ་བསྒྲིམ་དགོས་པའི་གནས་ཚུལ་ཞིག་ཆགས་ཡོད། རྒྱུ་མཚན་ནི། ད་ལྟའི་སྲིད་སྐྱོང་བློ་བཟང་སེང་གེ་མཆོག་ནི་སྔོན་གྱི་བཀའ་ཁྲི་རྣམས་དང་མི་འདྲ་བར་མི་རབས་གསར་པ་ཡིན་པའི་ཁར། བོད་རྒྱལ་ཁབ་ཀྱི་ཆབ་སྲིད་འགན་དབང་ཆ་ཚང་ཡོད་པ་ཞིག་ཡིན། ད་ལྟའི་དུས་ཚོད་འདི་ནི་བོད་མི་རིགས་རང་ཉིད་ཀྱིས་རང་ཉིད་ལ་ཡིད་ཆེས་དང་སྤོབས་པ། གདེང་ཚོད་སྔར་བས་ཆེ་བ་ཡོང་རྒྱུར་འགག་རྩ་ཞིག་ཆགས་ཡོད། བོད་མི་མང་སྤྱི་མཐུས་ཀྱིས་སྲིད་སྐྱོང་བློ་བཟང་སེང་གེར་ངེས་པར་དུ་འཕྱར་བ་གྲུ་འདེགས་ཀྱིས་བོད་ཀྱི་མང་གཙོའི་འཕེལ་རྒྱས་ལ་བརྟེན་ནས་བོད་མི་རིགས་ཀྱི་རྩ་དོན་དང་དམངས་དོན་ཕན་ཐོགས་ཡོང་བ་ཞིག་བྱ་དགོས།།

ཁ་སྔོན་གྲོས་ཚོགས་སུ་བཀའ་བློན་འོས་མི་དྲུག་པོ་རྣམས་ཁ་ཁུ་སིམ་པོས་སྤྱི་མོས་སུ་བཏང་བ་དེ་འདྲ་ནི་བྱུང་མི་སྲིད་པ་ལྟ་བུ་ཞིག་རེད། དཔེར་ན། བཀའ་བློན་འོས་མི་ཚེ་རིང་དབང་ཕྱུག་ལགས་ལ་ཆ་མཚོན་ན། ཤེས་ཡོན་གྱི་གནས་ཚད་གང་ལེགས་ཡོད་ཀྱང་། ཁོང་ལ་ཆབ་སྲིད་ཀྱི་གོ་རྟོགས་དང་ཉམས་མྱོང་། འཇོན་ཐང་གང་འདྲ་ཡོད་མེད་གསལ་ཁ་གང་ཡང་མེད། བཀའ་བློན་ཡིན་ན་ངོ་བོའི་ཆ་ནས་སྲིད་དོན་པ་ཞིག་ཡིན་དགོས། ཁོང་འཕྲོད་བསྟེན་བཀའ་བློན་དུ་བཞག་པ་ཡིན་ནའང་། བོད་གཞུང་གི་སྲིད་བྱུས་དང་ལོ་རྒྱུས་སོགས་ཀྱི་གོ་རྟོགས་གང་ལེགས་དགོས། བོད་གཞུང་གི་འཕྲོད་བསྟེན་སྲིད་བྱུས་དེ་རྩ་བ་ཆ་ནས་བོད་གཞུང་གི་རྩ་བའི་སྲིད་བྱུས་མཐུན་དགོས་པ་ནི་སྨྲོས་ཅི་དགོས། ང་འཕྲོད་བསྟེན་བཀའ་བློན་ཡིན་པས་བོད་གཞུང་གི་སྲིད་བྱུས་དང་ཆབ་སྲིད་ལ་འབྲེལ་བ་མེད་ཟེར་ས་མེད། དེ་ནི་ཀུན་གྱིས་མཁྱེན་གསལ་རེད། ལར་ནས་སྤྱི་མཐུས་ཕལ་ཆེ་བས་བཀའ་བློན་ཚེ་རིང་དབང་ཕྱུག་དེ་སྔོན་མཐོང་མྱོང་ཡོད་མེད་ཀྱང་བཤད་ཁག་པོ་རེད།།

དཔེ་མཚོན་གཞན་ཞིག་ཞུ་ན། བཀའ་བློན་བདེ་སྐྱིད་ཆོས་དབྱིངས་ལགས་ནི་བོད་ཀྱི་བུད་མེད་ཤེས་འཇོན་གཉིས་ལྡན་ ཞིག་ཡིན་པར་ཐེ་ཚོམ་མེད། འོན་ཀྱང་བོད་ཀྱི་ཕྱི་འབྲེལ་བཀའ་བློན་དུ་བསྐོ་བཞག་བྱེད་འོས་པ་ཞིག་ཡོད་མེད་སྤྱི་མཐུས་རྣམ་པ་ཚོས་བགྲོ་གླེང་ཅི་ཡང་གནང་མ་སོང་། འདིར་དོགས་སློང་ཞུ་ན། ཁོང་གི་བོད་ཡིག་གི་གནས་ཚད་དེ་བཀའ་བློན་ཞིག་ལ་དགོས་པའི་མ་མཐའི་གནས་ཚད་དེ་ཡོད་དམ་མེད། བོད་གཞུང་གི་ཡིག་ཆ་ཆ་ཚང་བོད་ཡིག་ཐོག་ཡོད། དབྱིན་ཡིག་ཐོག་ཡོད་པ་ནི་ཚད་འཛིན་དུ་བྱེད་མི་ཆོག

གལ་ཏེ་བོད་ཡིག་དང་བོད་སྐད་སྐྱོ་བོ་ཡོད་པ་ཡིན་ན། བོད་ཕྱི་ནང་གི་བོད་མི་རྣམས་དང་འབྲེལ་བ་གནང་བའི་སྐབས་གནས་སྟངས་གང་འདྲ་ཞིག་ ཏུ་འགྱུར་རྒྱུ་རེད། བོད་གཞུང་ནས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་བྱེད་བཞིན་ཡོད་ལུགས་གང་སར་སྒྲོག་པའི་ཚེ་བཀའ་བློན་ཞིག་བོད་ཡིག་དང་བོད་སྐད་ཡག་པོ་མ་ཤེས་པ་ཞིག་ཐོན་ན་འགྲེལ་བརྗོད་ཇི་ལྟར་བྱེད།

གནད་དོན་འདི་ལྟ་བུའི་ཐོག་བགློ་གླེང་གང་ཡང་བྱས་མེད་པ་ནི་ཧ་ཅང་བློ་ཕམ་གྱི་རང་བཞིན་དུ་འདུག གལ་ཏེ་སྤྱི་མཐུས་ག་གེ་མོ་ཞིག་གིས་གླེང་སློང་གནང་ཡོད་ན། སྲིད་སྐྱོང་བློ་བཟང་སེང་གེ་ལགས་ལ་ཡང་འགྲེལ་བརྗོད་བྱ་རྒྱུའི་གོ་སྐབས་ཤིག་ཡོང་གི་རེད། དེ་ཡང་བྱུང་མ་སོང་། གང་ལྟར་ཐེངས་འདིའི་སྤྱི་མཐུས་ཀྱི་མི་སྨྲ་བའི་རྟུལ་ཞུགས་བཟུང་པ་དེས་བོད་ཀྱི་རྩ་དོན་ལ་གནོད་རྒྱུ་ལས་ཕན་རྒྱུ་ཞིག་མེད་པ་གསལ་པོ་རེད། མདོར་ན་བཀའ་བློན་སྤྱི་མོས་བྱུང་སྟངས་དེ་གཞི་རིམ་སློབ་གྲྭའི་དགེ་རྒན་འདེམས་སྟངས་ལས་ཀྱང་ལས་སླ་བ་ཞིག་བྱུང་སོང་།། དེ་ནི་སྲིད་སྐྱོང་བློ་བཟང་སེང་གེ་ལམ་འགྲོ་རྒྱུགས་པའི་རྟགས་ཤིག་རྩ་བ་ནས་མིན་ནོ།། །།