དབུ་མའི་ལམ་ཁ་རུ་ཁྱེར་ཏེ་སྒེར་དོན་མ་བསྒྲུབ་རོཊ།

རེས་གཟའ་ཉི་མར་ངྷ་ས་ཡོངས་གླང་སློབ་གྲྭ་རུ་དབུ་མའི་ལམ་གྱི་ཉིན་མོ་སྲུང་གཙི་གནང་ཏེ། སྐུ་མགྲོན་གཙོ་བོ་བཀའ་ཟུར་མདོ་སྨད་སྤྱི་འཐུས་ཐུབ་བསྟན་ལུང་རིགས་མཆོག་གིས་ད་ལྟའི་༧གོང་ས་མཆོག་གི་མཚན་སྙན་དང་ཕྱི་རྒྱལ་བོད་དོན་རྒྱབ་སྐྱོར་སོགས་དབུ་མའི་ལམ་ལ་བརྟེན་ཏེ་བྱུང་སྐོར་གསུངས་སོང་།

ཟླ་འདིའི་ཕྱི་ཚེས་ ༡༨ ཉིན་བཞུགས་སྒར་གྱི་གཞུང་འབྲེལ་མིན་པའི་ཚོགས་པ་དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག རེ་གཟའ་ཉི་མའི་ཞོགས་པར་ངྷ་ས་ཡོངས་གླང་སློབ་གྲྭའི་ཚོགས་ཁང་དུ་ད་ལྟའི་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་ ༡༩༩༧ ལོའི་ཟླ་༩ ཚེས་༡༨ ཉིན་བོད་མི་མང་སྤྱི་འཐུས་ལྷན་ཚོགས་སུ་སྤྱི་མོས་གཏན་འབེབས་བྱུང་པའི་ཉིན་མོ་སྲུང་གཙིའི་མཛད་སྒོ་ཞིག་ཚོགས་སོང་ལ། མཛད་སྒོའི་སྐུ་མགྲོན་གཙོ་བོར་བཀའ་ཟུར་མདོ་སྨད་སྤྱི་འཐུས་ཐུབ་བསྟན་ལུང་རིགས་མཆོག་ཕེབས་འདུག

མཛད་སྒོ་དབུ་འཛུགས་ཀྱི་ཐོག་མར་དབུ་མའི་ལམ་མི་མང་ལས་འགུལ་ཁང་གི་དྲུང་ཆེ་སྤྱི་འཐུས་རྨོག་རུ་བསྟན་པ་ལགས་ཀྱིས་ལས་འགུལ་ཁང་དེའི་ལས་བསྡོམས་སྙན་སྒྲོན་ཞུས་པ་ལྟར་ན། ད་སྔ་ས་གནས་ ༢༧ ནང་དབུ་མའི་ལམ་ལས་འགུལ་ཁང་གི་ཡན་ལག་བཙུགས་ཡོད་པ་དང་། མི་མང་ནང་དབུ་མའི་ལམ་གྱི་ཟབ་སྦྱོང་སྤྲོད་པ་དང་དྲ་རྒྱ་གསར་བཟོ་སོགས་བྱས་ཏེ། བོད་མི་དང་། རྒྱ་རིགས། ཕྱི་རྒྱལ་ཡུལ་མི་མང་པོར་དབུ་མའི་ལམ་ངོ་སྤྲོད་བྱེད་བཞིན་ཡོད་འདུག

ལས་འགུལ་ཁང་གི་འགན་འཛིན་གཞོན་པ་སྤྱི་ཟུར་ཡོན་ཏན་རྒྱ་མཚོ་ལགས་ཀྱིས་དུས་ཆེན་ངོ་སྤྲོད་དང་སྦྲགས་ཏེ། དབུ་མའི་ལམ་ནི་བོད་རྒྱ་གཉིས་ཕན་གྱི་སྲིད་བྱུས་ཤིག་ཡིན་པ་དང་། ༧གོང་ས་མཆོག་བཙན་བྱོལ་དུ་མ་ཕེབས་གོང་ནས་དབུ་མའི་ལམ་གྱི་དགོངས་བཞེད་ཡོད་ལ། ད་ལྟའི་དབུ་མའི་ལམ་གྱི་སྲིད་བྱུས་ནི། རྒྱ་ནག་གཞུང་གི་རྩ་ཁྲིམས་དང་ས་གནས་མི་རིགས་རང་སྐྱོང་བཅའ་ཁྲིམས་ཀྱི་སྒྲོམ་གཞིའི་འོག བོད་རྒྱ་གཉིས་མཉམ་གནས་བྱ་རྒྱུ་དང་། དོན་དུ་རྒྱ་ནག་གི་རྩ་ཁྲིམས་དང་བཅའ་ཁྲིམས་ནང་གསལ་ལྟར། བོད་མི་ཚོར་གྲངས་ཉུང་མི་རིགས་ཀྱི་ཐོབ་ཐང་ཆ་ཚང་སྤྲོད་དགོས་པ་དེ་ཡིན་ཚུལ་བརྗོད་བྱུང་།

སྒུ་མགྲོན་གཙོ་བོ་བཀའ་ཟུར་མདོ་སྨད་སྤྱི་འཐུས་ཐུབ་བསྟན་ལུང་རིགས་མཆོག་གིས་༧གོང་ས་མཆོག་འཛམ་གླིང་སྟེང་འདི་འདྲའི་མཚན་སྙན་རྒྱས་པ་དེ་དབུ་མའི་ལམ་གྱི་སྲིད་བྱུས་ལ་བརྟེན་ནས་བྱུང་པ་ཞིག་དང་། གལ་སྲིད་རང་བཙན་ནམ་སྲིད་བྱུས་གཞན་ཞིག་བཟུང་ཡོད་ཚེ་འཛམ་གླིང་ཐོག་བོད་མི་ཚོར་ད་ལྟའི་རྒྱབ་སྐྱོར་འདི་འདྲ་ཞིག་བྱུང་མེད་པ། དེ་བཞིན་ཏཱ་ལའི་བླ་མ་ཞེས་པའི་མཚན་གནས་འདི་སྔོན་མ་ནས་ཡོད་པ་ཞིག་དང་། ༧གོང་ས་བཅུ་བཞི་བ་ཆེན་པོར་འཛམ་གླིང་སྟེང་འདི་འདྲའི་མཚན་སྙན་རྒྱས་ཐུབ་པ་དེ་ཏཱ་ལའི་བླ་མ་ཞེས་པའི་མཚན་གནས་ཀྱིས་ཐོབ་པ་ཞིག་མིན་པར། ཁོང་གི་གཉིས་ཕན་དབུ་མའི་ལམ་གྱི་སྲིད་བྱུས་ལ་བརྟེན་ནས་ཐོབ་པ་ཞིག་ཡིན་པ་དང་། ད་ལྟ་དང་མ་འོངས་པར་འཛམ་གླིང་ཞི་བདེ་ནི་བོད་པ་མ་གཏོགས་བསྐྲུན་ཐུབ་མཁན་མེད་སྐོར་གསུངས་སོང་།

སྤྱི་འཐུས་ཐུབ་བསྟན་ལུང་རིགས་མཆོག་གིས་མུ་མཐུད་དུ་བཙན་བྱོལ་བོད་མིའི་སྒྲིག་འཛུགས་ལ་ལས་དོན་གྱི་བྲེལ་འཚུབ་ཆེན་པོ་ཡོད་སྟབས། གཞུང་འབྲེལ་མིན་པའི་ཚོགས་པ་ཁག་ལྟར་ལས་འགུལ་དང་སྲིད་བྱུས་དྲིལ་བསྒྲགས་བྱ་ཐུབ་ཀྱི་མེད་པར་བརྟེན། དབུ་མའི་ལམ་མི་མང་ལས་འགུལ་ཁང་འདིས་དབུས་བོད་མིའི་སྒྲིག་འཛུགས་ལ་གཞོགས་འདེགས་ཆེན་པོ་སྒྲུབ་ཀྱི་ཡོད་པ་དང་། ལས་འགུལ་དང་དྲིལ་བསྒྲགས་བྱེད་སྐབས། ལས་འགུལ་གྱི་ཐོག་མའི་དམིགས་ཡུལ་གཞིར་བཞག་སྟེང་ཁ་ཞེ་གཉིས་མེད་བྱ་རྒྱུ་ལས། ལས་དོན་ཁ་རུ་ཁྱེར་ཏེ་སྒེར་དོན་བསྒྲུབ་ཐབས་ཤིག་ཏུ་མ་སོང་པ་བྱ་དགོས་པའི་འབོད་སྐུལ་ཡང་ཞུས་སོང་།

མཇུག་ཏུ་དབུ་མའི་ལམ་མི་མང་ལས་འགུལ་ཁང་གི་འགན་འཛིན་སྤྱི་འཐུས་ཟླ་བ་ཚེ་རིང་ལགས་ཀྱིས་ཐུགས་རྗེ་ཆེའི་གསུང་བཤད་དང་བཅས། གཞུང་དང་ཚོགས་སྡེ་སྒྲིག་འཛུགས་གང་འདྲ་ཞིག་ཡིན་ཡང་གཙོ་བོ་མི་མང་གི་རྒྱབ་སྐྱོར་དགོས་པ་དང་། མི་མང་གི་རྒྱབ་སྐྱོར་ཡོད་པའི་རྣམ་པ་དེ་སྒྲིག་འཛུགས་གང་དེ་སྲ་བརྟན་རྒྱུན་གནས་དང་ལས་དོན་ཚགས་ཚུད་ཡོང་རྒྱུའི་སྲོག་ཤིང་ལྟ་བུ་ཡིན་པ། བོད་མིའི་སྒྲིག་འཛུགས་འདི་ཡང་བོད་མིའི་དང་བླངས་དཔྱ་ཁྲལ་གྱི་ཡོང་བབ་ལ་རྟེན་ནས་འཚོ་ཐུབ་ཡོད་པ་རེད། ཕྱིའི་རོགས་དངུལ་ནི་དེ་རིང་ཡོད་ན་སང་ཉིན་ཆད་འགྲོ་བ་དང་། སང་ཉིན་ཡོད་ན་གནངས་ཉིན་ཆད་འགྲོ་བའི་གནས་སྟངས་ཡིན་སྟབས། མང་ཉུང་ལ་མ་སྟོས་པར་དབུ་མའི་ལམ་མི་མང་ལས་འགུལ་ཁང་ལ་རྒྱབ་སྐྱོར་མཚོན་ཕྱིར་རང་བློས་གང་ཡོང་གིས་ཞལ་འདེབས་གནང་རྒྱུའི་རེ་སྐུལ་ཡང་ཞུས་སོང་།