བློ་ཕམ་ཤོས་ཤིག – བདེ་ཆེན་སྤེན་པ།

༄༅།། འདི་ཟླའི་ཕྱི་ཚེས་བཅོ་བརྒྱད་དགོང་མོ་དུས་ཚོད་དྲུག་སྐར་མ་བཅུ་གཅིག་སྟེང་བརྒྱབ་པའི་ས་ཡོམ་དེ་ཚད་རིམ་དྲུག་དང་ཚེག་དགུ་ཡིན་པ་དང་། རྒྱ་གར་བྱང་ཤར་མངའ་ཁུལ་ཀ་རྡོར་སྒང་གསུམ་གྱི་ས་གནས་ཁག་་གཙོ་བོ་ཆགས་ཡོད། ཚད་རིམ་དྲུག་དང་ཚེག་དགུ་ཅན་གྱི་རྗེས་སུ་ཡང་བསྟུད་མར་ཚད་རིམ་བཞི་དང་ཚེག་བརྒྱད་དང་། བཞི་དང་ཚེག་དྲུག་སོགས་སྔ་ཕྱི་ཐེངས་ཉི་ཤུར་གཡོ་འགུལ་བྱུང་ཡོད་འདུག

གནས་ཚུལ་ཡོང་ཁུངས་ལྟར་ན་ད་བར་ཤེས་རྟོགས་བྱུང་བ་མི་གོ་བརྒྱད་ཙམ་འཆི་སྐྱོན་དང་། འགྲིམ་འགྲུལ་གྱི་ལམ་ཁ་དང་ཁ་པར་བརྒྱུད་ལམ་སོགས་འགག་སྟེ་ད་དུང་གནས་ཚུལ་རྒྱུས་ལོན་ཐུབ་མེད་པའི་ས་གནས་ཀྱང་གང་འཚམ་ཡོད་སྐད། གནས་ཚུལ་ནས་ད་དུང་ཤི་རྨས་ཀྱི་གྲངས་ཚད་འཕར་རྒྱུ་ཡིན་སྐོར་དང་། སྡོད་ཁྱིམ་ཐོར་ཞིག་ཏུ་ཕྱིན་པ་དང་གས་ཆག་ཏུ་གྱུར་པ། དེ་བཞིན་རི་ཉིལ་ས་ཉིལ་གྱིས་གཞུང་ལམ་ཆད་པ་སོགས་ཀྱི་དཀའ་ངལ་མུ་མཐུད་གནས་ཡོད་པ་གསར་ལམ་ཁག་ཏུ་གནས་ཚུལ་ཐོན་དང་ཐོན་བཞིན་ཡོད།

ཨ་རི་ས་ཁམས་བརྟག་དཔྱད་ཚན་ཁག་ཅིག་གིས་བཤད་པ་ལྟར་ན། འདས་པའི་ལོ་སོ་ལྔའི་ནང་ད་ལྟ་ས་ཡོམ་རྒྱག་ཡུལ་དང་རྒྱང་ཁད་ཀེ་ལོ་མུ་ཊར་བརྒྱའི་གཡས་གཡོན་དུ་ས་ཡོམ་ཐེངས་བཅོ་བརྒྱད་ཙམ་བརྒྱབ་ཡོད་ཚུལ་དང་། དེ་དག་གི་ཁྲོད་ཚད་རིམ་ཆེ་བ་དེ་ཕྱི་ལོ་ ༡༩༨༠ ལོར་དྲུག་དང་ཚེག་གཅིག་ཅན་ཞིག་བྱུང་རྗེས། ད་རབས་ཀྱི་ས་ཡོམ་དྲུག་དང་ཚེག་དགུ་ཅན་འདི་ཚད་རིམ་མཐོ་ཤོས་དེ་ཡིན་པར་ངོས་འཛིན་གནང་ཡོད།

ཀ་རྡོར་སྒང་གསུམ་འདི་ལོ་རྒྱུས་ཐོག་བོད་མིར་འབྲེལ་ཡོད་ཀྱི་ས་གནས་ཤིག་ཡིན་པ་ཟད། ལོ་རབས་ལྔ་བཅུ་ནང་བོད་ལ་དུས་འགྱུར་བྱུང་རྗེས་སྐྱབས་བཅོལ་བོད་མི་ཉིས་ཁྲི་ཡས་མས་ཀྱི་འཚོ་རྟེན་བཅོལ་ཡུལ་དེ་ཆགས་ཡོད་སྟབས། ད་རེས་ས་ཡོམ་འདིས་འབྲས་ལྗོངས་ཁུལ་གྱི་ལ་ཆེན་ལ་ཆུང་བརྒྱུད་དུ་སྡོད་པའི་བོད་མི་དང་། ར་ཝང་ལ་ཀུན་ཕན་གླིང་བོད་མའི་གཞིས་སྒར། སྒང་ཏོག་ཏུ་གནས་སྡོད་བོད་མི་དང་དགོན་སྡེ། ཀ་སྦུག་ཁུལ་གྱི་བོད་མི་གཞིས་གྲོང་དང་དགོན་སྡེ།རྡོར་གླིང་ཁུལ་གྱི་བོད་མིའི་གཞིས་གྲོང་དང་དགོན་སྡེ་ཁག་ལའང་ཤུགས་རྐྱེན་ཆེན་པོ་ཞིག་ཐེབས་ཡོད།

ཡ་ང་བ་ཞིག་ལ་འབྲས་ལྗོངས་ཁོངས་སུ་རྒྱ་གར་བོད་སློབ་འཛིན་ཚོགས་འོག་འཛིན་རིམ་བརྒྱད་པ་བར་དང་། བོད་གཞུང་སཾ་སློབ་ཁྱབ་ཁོངས་འོག་འཛིན་རིམ་བརྒྱད་པ་བར་ཡོད་པའི་གཏན་སློབ་གཉིས་དང་། ཀ་སྦུག་ཏུ་རྒྱ་གར་བོད་སློབ་འཛིན་ཚོགས་འོག་འཛིན་རིམ་བཅུ་གཉིས་བར་ཡོད་པའི་གཏན་སློབ་གཅིག དེ་བཞིན་རྡོར་གླིང་དུ་འཛིན་རིམ་བཅུ་གཉིས་བར་དང་། བརྒྱད་པ་བར་ཡོད་པའི་གཏན་སློབ་གཉིས་དང་། བོད་གཞུང་སཾ་སློབ་ཁྱབ་ཁུངས་འོག་དམའ་རིམ་སློབ་གྲྭ་གཅིག་བཅས་བསྡོམས་སློབ་གྲྭ་ཁག་དྲུག་དང་།

གཞུང་འབྲེལ་མིན་པའི་ལྕགས་པོ་རི་སྨན་རྩིས་ཁང་དང་། འཇམ་དབྱངས་བོད་ཀྱི་རིག་གཞུང་གཅེས་སྐྱོང་ཁང་སོགས་གཞུང་འབྲེལ་དང་གཞུང་འབྲེལ་མིན་པའི་ཤེས་ཡོན་གྱི་སྡེ་ཁག་ཇི་སྙེད་ཅིག་ཡོད།

གོང་གསལ་གྱི་ཤེས་ཡོན་སྡེ་ཁག་དེ་དག་གི་འཛུགས་བསྐྲུན་རྨང་གཞི་ལའང་གས་སྐྱོན་བྱུང་ཡོད་པ་མ་ཟད། དགེ་རྒན་ཤི་རྨས་ཀྱིས་མཚོན་སློབ་ཕྲུག་གི་སེམས་ཁམས་ལ་བརྗོད་མི་ཤེས་པའི་འཇིགས་སྣང་དང་དངངས་ཚོར་ཆེན་པོ་ཞིག་བསྐྲུན་ཡོད། ས་ཡོམ་གོད་ཆག་བྱུང་ནས་ད་བར་དུས་ཚོད་དྲུག་ཅུ་རེ་བརྒྱད་འགྲོ་བཞིན་ཡོད་ཀྱང་། རང་གཞུང་གི་སྲིད་སྐྱོང་མཆོག་གིས་དབུས་ཤེས་རིག་བཀའ་བློན་གྱི་མཚན་ཐོག་གམ། ཡང་ན་ཤེས་རིག་དྲུང་ཆེ་གང་རུང་གི་མཚན་ཐོག་ཏུ་སྐུ་ཚབ་ཆེད་གཏོང་གིས་སེམས་གསོའི་འཚམས་འདྲིའམ་ཡང་ན་དེ་མཐུན་གྱི་སྔོན་འགོག་ལམ་སྟོན་གནང་འཐུས་མེད་ཀྱང་། ས་གནས་བདེ་དོན་ཁག་བརྒྱུད་ཡིག་ཐོག་ནས་ངེས་པར་དེ་ལྟར་དགོས་ངེས་ཤིག་ཡིན་མོད། ད་བར་དེ་སྐོར་ལ་གྲག་འགུལ་གང་ཡང་མེད་པ་འདིས། དགེ་སློབ་མང་པོ་ཞིག་བློ་ཕམ་ངང་བསྡད་ཡོད་པ་མ་ཟད། དེ་ཁུལ་གྱི་བོད་མི་མང་པོ་ཞིག་གིས་ཀྱང་རང་གཞུང་གིས་ཐུགས་གསོའི་འཚམས་འདྲི་མེད་པར་ཡིད་ཐང་ཆད་ཡོད་ཚུལ་འབྲེལ་ཡོད་ཞིག་གིས་ཕྲན་ལ་བརྗོད་བྱུང་།

ས་ཡོམ་དེ་བྱུང་མ་ཐག་རྒྱ་གར་སྲིད་འཛིན་གྱིས་འབྲས་ལྗོངས་བློན་ཆེན་ལ་ཞལ་པར་ཕུལ་ནས་སེམས་གསོ་དང་གཞུང་གིས་སྐྱོབ་གསོ་ཇི་དགོས་སྐོར་བཀའ་མོལ་གནང་ཡོད་ལ། རྒྱ་གར་གཞུང་འཛིན་(congress)ཚོགས་པའི་རཱ་ཧོ་གྷན་དྷི་མཆོག་དང་ (West Bengal) མངའ་སྡེ་བློན་ཆེན་བློན་ཆེན་( Mamta Benerjee )རྣམས་ཀྱང་ས་གནས་རང་ལ་གཟིགས་སྐོར་དུ་ཕེབས་ཡོད་པ་སོགས་ལ་གཞིགས་ཚེ། ང་ཚོའི་སྒྲིག་འཛུགས་འདིའི་འཛིན་སྐྱོང་གསར་ཚོར་ཡང་དེ་ཙམ་གྱིས་རེ་བ་གསར་བ་ཞིག་མེད་པ་ར་སྤྲོད་གསལ་བོ་བྱུང་།