དེ་རིང་ཕྱི་ཚེས་ ༢༦ ཉིན་སྟེ། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་ ༩ པའི་སྔ་དྲོར། ཉེ་ཆར་སྐབས་བཅོ་ལྔ་པའི་བྱང་ཨ་རིའི་སྤྱི་འཐུས་བདེ་སྐྱིད་ཆོས་དབྱངས་ལགས་བཀའ་བློན་དུ་བདམས་ཐོན་བྱུང་ཡོད་སྟབས། འོས་བསྡུ་དངོས་གཞིའི་སྐབས་བྱང་ཨ་རི་ཁུལ་གྱི་འོས་གྲངས་རྩེ་ཕུལ་གྲས་བཀྲ་ཤིས་རྣམ་རྒྱལ་ལགས་སྐབས་བཅོ་ལྔ་པའི་བྱང་ཨ་རིའི་སྤྱི་འཐུས་སུ་དམ་འབུལ་ཞུས་སོང་།
བཀྲ་ཤིས་རྣམ་རྒྱལ་ལགས་ནི་ཕྱི་ལོ་ ༡༩༥༢ འཁྲུངས་ཤིང་། ཆ་མ་རི་བོད་གཞུང་སློབ་གྲྭར་སློབ་ཞུགས་ཀྱིས་ཕྱི་ལོ་ ༡༩༧༢ ལོར་གཞི་རིམ་སློབ་གྲྭ་ཐོན་རྗེས་བོད་གཞུང་འདྲ་དཔར་ཁང་དང་བདེ་སྲུང་ལས་ཁུངས་སུ་ལས་འཁུར་ཞུ་མུས་སྐབས། ལྡི་ལི་གཙུག་ལག་སློབ་གྲྭ་ནས་ཡིག་འབྲེལ་ཐོག་སློབ་སྦྱོང་གནང་སྟེ་མཐོ་སློབ་ཀྱི་ལག་ཁྱེར་ཐོབ། ཕྱི་ལོ་ ༡༩༨༣ ལོར་བོད་ཀྱི་གཞོན་ནུའི་སྤྱི་ཁྱབ་དབུས་རྒྱུན་ལས་ཁང་གི་དྲུང་ཆེའི་ལས་དུས་གཉིས་བསྟུད་མར་ལས་འཁུར་ཞུས་ཡོད། དེ་ནས་མན་སྤར་ཕན་བདེ་གླིང་གི་གཞིས་མགོ་དང་། བོད་གཞུང་འཕྲོད་བསྟེན་ལས་ཁུངས་ཀྱི་དྲུང་གཞོན། བལ་ཡུལ་སྐུ་ཚབ་དོན་གཅོད་ཁང་བཅས་ཀྱི་ལས་འཁུར་ཞུས་ཡོད་ཅིང་། དེ་རྗེས་བདེ་སྲུང་ལས་ཁུངས་ཀྱི་ཟུང་དྲུང་དུ་བསྐོ་བཞག་དང་། ཕྱི་ལོ་ ༡༩༩༩ ལོར་ཨ་རིར་ཕེབས་རྗེས་ལོ་བདུན་ཙམ་རིང་བོད་རིགས་སྤྱི་མཐུན་ཚོགས་པའི་ཚོགས་གཙོའི་ལས་འཁུར་ཞུས། ཕྱི་ལོ་ ༢༠༡༠ ནང་ཝ་ཤིན་ཊོན་མངའ་སྡེའི་སྲིད་སྐྱོང་ནས་ཨེ་ཤི་ཡ་དང་ཞི་བདེ་རྒྱ་མཚོའི་ཁོངས་ཨ་རིའི་གྲངས་ཉུང་མི་རིགས་ཚོགས་ཆུང་གི་ཚོགས་མིར་བསྐོ་བཞག་གིས་ལས་འཁུར་ཞུས་ཡོད། ་
