ལོ་འཁོར་ལས་བསྡོམས།

ཁ་སང་སྔ་དྲོར་དབུས་བོད་མིའི་སྒྲིག་འཛུགས་ཀྱི་ལྷན་ཁང་ཁག་བདུན་གྱི་ལོ་འཁོར་ལས་བསྡོམས་གྲོས་ཚོགས་སུ་སྙན་སྒྲོན་ཞུས་ཡོད་པ་དང་། ཁ་སང་ཉིན་རྒྱབ་ནས་བཟུང་སྤྱི་འཐུས་རྣམ་པས་ལས་བསྡོམས་ཐོག་བགྲོ་གླེང་དོགས་དྲི་གནང་བཞིན་ཡོད།

 དཔལ་འབྱོར་ལས་ཁུངས་ཀྱི་ལས་བསྡོམས་ནང་། ཕྱི་ལོ་ ༢༠༡༡ ཟླ་ ༣ ཚེས་ ༣༡ ཉིན་བར་དབུས་བོད་མིའི་སྒྲིག་འཛུགས་ཀྱི་གཏན་འཇགས་མ་དངུལ་ཧིན་སྐོར་ས་ཡ་ ༡༧༨ ། ༤༨ ཙམ་ཡོད་སྐོར་བཀོད་འདུག

ཕྱི་ལོ་ ༢༠༡༠ ནས་ ༢༠༡༡ བར་འཛིན་སྐྱོང་གི་རྒྱུན་གྲོན་དང་དམིགས་བསལ་ལས་དོན་ཆེད་དཔལ་འབྱོར་ལས་ཁུངས་བརྒྱུད་འགྲོ་གྲོན་གཏོང་དགོས་པ་སྒོར་ས་ཡ་ ༢༧༧།༥༠ དང་། ཡོང་འཆར་སྒོར་ཡ་ས་ ༢༧༧ ། ༠༨ ཙམ་ཡོད་ཀྱང་། དངོས་སུ་འགྲོ་གྲོན་ཕྱིན་པ་སྒོར་ས་ཡ་ ༢༢༩ ། ༣༣ དང་། དངོས་སུ་ཡོང་བ་སྒོར་ས་ཡ་ ༢༧༡། ༣༤  ཙམ་ཆགས་ཡོད་འདུག

གཞན། འདི་ལོར་རྒྱ་བལ་འབྲུག་གསུམ་དང་། ཕྱི་རྒྱལ་ཁག་ཏུ་གནས་སྡོད་བོད་མིའི་དྭང་བླངས་དཔྱ་དངུལ་གཙོས་པའི་ཡོང་འབབ་ཧིན་སྒོར་ས་ཡ་ ༡༢༢ ། ༥༦ ཙམ་བྱུང་སྟེ། སྔར་ལོ་ལས་བརྒྱ་ཆ་ ༤༢ ། ༤༦ ཙམ་ཕར་ཡོད་པ་དང་། དྭང་བླངས་དཔྱ་དངུལ་འབུལ་མཁན་ལོ་རེ་བཞིན་མང་དུ་འགྲོ་བཞིན་ཡོད་འདུག

བདེ་སྲུང་ལས་ཁུངས་ཀྱི་ལས་བསྡོམས་ནང་། འདི་ལོར་བོད་མི་ཕྱི་སྐྱོད་ལག་འཁྱེར་ ( IC ) ཞུ་མཁན་ ༣༨༢༩ ཙམ་བྱུང་ཡོད་པ་དང་། བལ་ཡུལ་སྣེ་ལེན་ཁང་བརྒྱུད་བོད་ནས་ཕེབས་པ་ ༨༠༩ ཙམ་བྱུང་ཡོད་ཚུལ་བསྟན་འདུག  

ཤེས་རིག་ལས་ཁུངས་ཀྱི་ལས་བསྡོམས་ནང་། ད་ལོ་རྒྱ་གར་རྒྱལ་ཡོངས་འཛིན་རིམ་ ༡༢ ཀྱི་ཡིག་རྒྱུགས་ནང་ཞུགས་མཁན་ ༡༣༩༠ ཡོད་པ་ལས་སློབ་མ་ ༡༢༥༩ ཙམ་གྱིས་ཡིག་འཕྲོད་ཡོད་པ་དང་། འཛིན་རིམ་ ༡༠ པའི་ཡིག་རྒྱུགས་ནང་ཞུགས་མཁན་ ༡༨༥༨ ཙམ་ཡོད་པ་ལས་སློབ་མ་ ༡༨༤༤ ཙམ་གྱིས་ཡིག་རྒྱུགས་འཕྲོད་ཡོད་འདུག

འཕྲོད་བསྟེན་ལས་ཁུངས་ཀྱི་ལས་བསྡོམས་ནང་། རྒྱ་གར་དང་བལ་ཡུལ་གཉིས་ཀྱི་བོད་མིའི་ཁྲོད་ཊི་སྦི་ནད་པ་ ༥༤༠ ཙམ་ལ་སྨན་བཅོས་བྱས་ཡོད་པ་དང་། ཊི་སྦི་འགོས་ནད་ཅན་ ༡༢༠ ཙམ་ཟུར་འཇོག་གིས་སྨན་བཅོས་བྱེད་བཞིན་ཡོད་འདུག ད་ལོ་ཊི་སྦི་ནད་པ་གསར་པ་ ༣༨༤  ཙམ་བྱུང་ཡོད་པ་ལས་ཕོ་བརྒྱ་ཆ་ ༧༠ དང་མོ་བརྒྱ་ཆ་ ༣༠ རེད། གཞན། མཛེ་ནད་ཅན་ ༡༣ དང་དབང་བོ་སྐྱོན་ཅན་ ༡༧༦ ལ་འཕྲོད་བསྟེན་ལས་ཁུངས་ཀྱིས་འཚོ་སྣོན་སྦྱོར་བཞིན་ཡོད་འདུག

སྤྱི་འཐུས་རྣམ་པས་གོང་གསལ་ལས་བསྡོམས་སྟེང་བགྲོ་གླེང་དོགས་འདྲི་གནང་སྐབས། སྤྱི་འཐུས་མང་པོ་ཞིག་གིས་སྔོན་ཆད་ལྷན་ཁང་ཁག་བདུན་གྱི་ལས་བསྡོམས་དང་མཉམ་དུ་སྡེ་ཚན་ཁག་དང་ལྷན་ཁང་མ་ལག་དང་བཅས་པའི་ལས་བསྡོམས་ཁ་གསལ་ཡོད་ཀྱང་ད་ལོ་སྡེ་ཚན་གཞན་དག་ཞིབ་ཚགས་མེད་པའི་ལྟ་ཚུལ་ཡང་བཏོན་སོང་།