མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

སེང་གེའི་བཀའ་ཤག་གི་མདུན་ལམ།

བོད་ཀྱི་དུས་བབ།
༢༠༡༡/༡༠/༠༤
Share on FacebookShare on TwitterShare on EmailShare on Whatsapp

ཤར་ཕྱོགས་ཁུག་རྟ།

༡ སེང་གེའི་བཀའ་ཤག་ངོ་སྤྲོད་སྔོན་མེད་མ།

སྐབས་ ༡༥ པའི་ཚོགས་དུས་གཉིས་པ་མཇུག་སྒྲིལ་བ་དང་། བཀའ་ཤག་གསར་བས་གྲོས་ཚོགས་ལ་འགན་ཁུར་སྟངས་ཐད་སྲིད་དོན་པ་དག་གིས་དཔྱད་བརྗོད་སྤེལ་བཞིན་པའི་སྐབས་འདིར། ཨ་རི་དང་ཡུ་རོབ། ཐའེ་ཝན་ན་ཡོད་པའི་གྲོགས་པོ་སྐོར་ཞིག་གི་མཉམ་དུ་གླེང་མོལ་གྱིས་སེང་གེའི་བཀའ་ཤག་གི་མདུན་ལམ་ལ་རོབ་ཙམ་བལྟས་པ་ཡིན། ངའི་གྲོགས་པོ་ཚོས་སོ་སོའི་གནས་ཡུལ་གྱི་སྲིད་དོན་གནམ་ངོ་དང་འབྲེལ་ནས་སེང་གེའི་བཀའ་ཤག་གི་མདུན་ལམ་ལ་བསམ་ཚུལ་རེ་རེ་གསུང་གི་འདུག ང་ཚོས་སེང་གེའི་བཀའ་ཤག་གི་མདུན་ལམ་ལ་ལྟ་དགོས་ན། གཙོ་བོ་བཀའ་ཁྲི་དང་བཀའ་བློན་གཞན་གྱི་ནུས་པ་དང་རྣམ་དཔྱོད་ལའང་ལྟ་དགོས།

བཀའ་ཁྲི་འདི་ཉིད་རང་གི་བློ་ཡུལ་ལས་འགོངས་པའི་སྲིད་ཁྲིར་བསླེབས་པ་ལ། སྲིད་དོན་པ་མང་པོས་ཁོང་གི་རྨི་ལམ་མངོན་གྱུར་བྱས་པར་གླེང་གི་མེད་ལ། ཁོང་ལ་འདི་འདྲའི་རྨི་ལམ་ཞིག་ཡོད་པར་ཉེ་བོ་དང་འདྲིས་བོ་ཚོས་ངོས་འཛིན་གནང་མེད། དེ་ལས་ལྡོག་སྟེ་འོལ་ཚོད་དོན་དངོས་གྱུར་བ་དང་། རླུང་རྟ་ཡག་རབས་ཀྱི་གཏམ་གྱིས་སྡོམ་ཚིག་བཀོད་ཡོད། ཡིན་ནའང་། ཁོས་འོས་འགྲན་སྐབས་ནས། ” རྩ་དོན་གསུམ་“ཟེར་བའི་དམ་བཅའ་ཁྲི་བརྩེགས་སུ་ཟློས་ཤིང་། བཀའ་བློན་འབྲོང་ཆུང་དངོས་གྲུབ་ཀྱི་ཤུགས་རྐྱེན་ཡོངས་གྲགས་ཀྱིས་ཉོས་ཤིང་། བུད་མེད་དང་ཆོལ་ཁ་རིས་མེད་ཟེར་བའི་བཀའ་བློན་ཡོང་ཁུངས་ཀྱིས་ཁོང་ལ་རོགས་འདེགས་རླབས་ཆེན་ཐུབ་ཡོད། ཡིན་ནའང་། དོན་དངོས་ལག་བསྟར་ཁྲོད། ཁོང་གིས་བཀའ་བློན་འདེམས་ཕྱོགས་ཀྱིས་མི་རྣམས་ཧ་ལས་ཤིང་ཧང་སང་དུ་བཅུག་ཡོད། གསལ་བོར་བཤད་ན། བཀའ་བློན་འབྲོང་ཆུང་དངོས་གྲུབ་དང་ཚེ་རིང་དོན་གྲུབ་རྣམ་གཉིས་ཞལ་རས་ནག་ཅིང་བཞུགས་སྟངས་བརྗིད་པོའི་རྣམ་པ་དེས། སྲིད་དོན་པ་མང་པོར་སེང་གེའི་བཀའ་ཤག་གི་ལྗིད་ཁོག་ཚོད་བགམ་ཐུབ་པ་བྱུང་ཡོད།

བོད་ནས་འབྱོར་བ་སེར་སྐྱ་རྒན་གཞོན་མེད་པར་འབྲོང་ཆུང་དངོས་གྲུབ་ཚང་གི་རྣ་མིག་མ་འགྲིམས་པ་ཞིག་མེད་ལ། བོད་ནང་ནས་རྩ་དོན་ཐད་ལས་ཀ་མ་འདྲ་བ་གནང་མཁན་གཅིག་ཀྱང་མ་ལུས་པར་ཁོང་ལ་ཐུག་འཕྲད་གནང་ཡོད། ཁོང་གིས་དེ་དག་གི་སེམས་ཁམས་དང་ལྟ་ཚུལ་བཅས་ལ་མཐུན་པའི་བཀའ་མོལ་གནང་ཕྱོགས་ནས་ཐག་གཅོད་ཅི་ཞིག་བྱེད་དགོས་མིན་བར་གྱི་ལས་དོན་ཡོངས་རྫོགས་ཀྱིས། ཆོལ་གསུམ་རིས་མེད་སྐྱེས་བོ་ཀུན་ལ་འབྲོང་ཆུང་དངོས་གྲུབ་ཚང་སྤྱི་མི་ཚད་དང་ལྡན་པ་ཞིག་ཆགས་ཡོད། དེ་བཞིན་ཁོང་ཉིད་འཛིན་སྐྱོང་ནང་ལོ་མང་བཞུགས་པས་ལས་བྱེད་རྣམས་ཀྱི་བརྩི་བཀུར་ཀྱང་ད་ལྟའི་ཆ་ལ་བློ་སེང་ལས་བརྒལ་བ་ཡིན་པ་མིག་མཐོང་རང་རེད། དེ་ལས་ཀྱང་འུ་ཚོའི་ཆེ་དྲགས་དབང་ལྡན་རྣམ་པ་ཚོས་ཀྱང་འབྲོང་ཆུང་ཚང་གི་བབ་བརླིང་ལ་ཞེ་འདར་ཤོར་བའི་བརྩི་བཀུར་བྱེད་ཀྱི་ཡོད། རྒྱུ་མཚན་དེས་ན་སེང་གེའི་བཀའ་ཤག་གི་ཕྱི་ནང་གསང་གསུམ་གྱི་ཤུགས་རྐྱེན་ཆེ་ཤོས་དེ་བདེ་སྲུང་བཀའ་བློན་འདི་བ་ཚང་ལས་གཞན་ཞིག་འཇོག་རྒྱུ་མི་འདུག

དེ་བཞིན་བཀའ་བློན་ཚེ་རིང་དོན་གྲུབ་མཆོག་ཀྱང་བཙན་བྱོལ་བོད་གཞུང་གི་ལས་དོན་ཐམས་ཅད་ལ་གཞན་དྲིང་མི་དགོས་པའི་རྣམ་དཔྱོད་ཡོད་ཅིང་། སྒམ་ཚུགས་ཀྱི་ཆ་ནས་ཞུས་ན་བདེ་དཔལ་བཀའ་བློན་གཉིས་ལ་དམིགས་བསལ་གྱི་མཚུངས་ཆོས་མང་པོ་འདུག མ་ཟད་རྣམ་པ་གཉིས་སྐུ་སྒེར་ནས་ཀྱང་བློས་ཐུབ་ལྟ་བུའི་སྣང་ཚུལ་མངོན་བཞིན་ཡོད། འདི་ནི་ཕལ་ཆེར་སེང་གེའི་བཀའ་ཤག་གི་མ་གདན་དང་ཕྱོགས་དང་མཚམས་གང་དུའང་ཟགས་ནས་དྲུད་མི་འགྲོ་བའི་ཡིད་ཆེས་བྱེད་ས་ཉག་ཅིག་ཏུའང་བཙན་བྱོལ་བོད་མིའི་དཀྱིལ་འཁོར་དུ་ངོས་འཛིན་བྱེད་བཞིན་ཡོད།

གཞན་པད་མ་ཆོས་འབྱོར་གྱི་ན་རྒ་རྫི་ལྡིབ་དང་། རྒྱ་རི་སྒྲོལ་མའི་ལྷག་བསམ་མིག་ཆུ། གསར་བུ་གསར་མོ་གཞན་བཅས་དུས་ཚོད་ལ་ལྟོས་ཏེ་ཅི་ཆགས་ལྟ་རྒྱུ་ལས་དཔྱད་གླེང་བྱེད་རིན་མ་མཐོང་།

༢ སེང་གེའི་ཤག་གི་ལས་ཀ་རབ་རིབ་མར་དཔྱད་པ།

འོ་ན། ད་བཀའ་ཤག་འདི་ཉིད་ལས་དོན་ཐོག་ཅི་ལྟར་མདུན་བསྐྱོད་བྱ་རྒྱུ་ཡིན་ནམ་ཟེར་ན། དེ་ནི། བློ་སེང་གིས་སྔོན་ནས་གཡར་དམ་ཅི་ལྟར་བཅས་པ་བཞིན། བོད་མི་རྒན་གཞོན་ཚོར་སྐྱོར་རྒྱུ་ཡོད་པའི་ ” ཆིག་སྒྲིལ། གསར་གཏོད། རང་མགོ་རང་ཐོན། ” གསུམ་ཡིན་ཞིང་། ཚིག་འདི་དག་ཐོན་མ་ཐག་བློ་སེང་གཞན་གྱི་ཆབ་སྲིད་ལ་དབྱིངས་ཡོད་པ་རྟོགས་ཤིང་། བསམ་ཚུལ་དེས་མི་རབས་གསར་བར་ལས་འཆར་གསར་བ་འདྲ་སྟོན་རྒྱུ་ཨེ་ཡོད་བསམས་ནས། དམ་འབུལ་གཏམ་བཤད་ནས་ཁ་སང་ཚོགས་དུས་གཉིས་པའི་བཀའ་ཤག་གི་གསལ་བཤད་བར་བོད་མི་འགན་ཁུར་ཅན་རྣམས་ཀྱིས་ས་ཆའི་ཁ་ཐག་ལ་མ་ལྟོས་པར། མིག་གོར་གོར་དང་རྣ་ཅོར་ཅོར་བྱས་ཏེ་བསྡད་པ་རེད། ཡིན་ནའང་། བློ་སེང་གིས་ཚོར་སྣང་ཤུགས་ཆེན་གྱི་ཐ་ཀ་ཐད་ཀར་གང་དྲན་རྣམས་ཡིག་ཐོག་ཏུ་ཕབས་བཅུགས་ནས་བཤད་རྐྱང་བྱས། གཏམ་བཤད་གང་དེ་དང་འབྲེལ་བའི་སྔར་གནས་ལ་མིག་བཤེར་ཙམ་ཡང་མི་འཕེན་པར། དམ་འབུལ་གཏམ་བཤད་དང་། མང་གཙོའི་གཏམ་བཤད། གྲོས་ཚོགས་གསལ་བཤད། ཆོས་ཚོགས་གཏམ་བཤད་བཅས་རིམ་པར་སྤེལ་ཡང་། གྲོས་ཚོགས་འཐུས་མི་ཚོའི་འདོད་བློ་ཁེངས་པ་ཞིག་གཏན་ནས་མ་བྱུང་། དཔལ་ལྡན་ཚོགས་གཙོ་མཆོག་གིས་མཇུག་སྡོམ་གསུང་བཤད་དུ་མ་འོངས་པར་བཀའ་ཤག་གི་གཏམ་བཤད་ཡར་རྒྱས་འགྲོ་རྒྱུའི་རེ་སྐུལ་གནང་། གཏམ་གང་བཤད་དང་ལས་གང་བྱེད་ལ་གཟབ་ནན་དང་གཞུང་ལུགས་དགོས་ཚུལ་གྱི་ཚིག་མདའ་ཅིག་ཀྱང་མཉམ་དུ་འཛིན་སྐྱོང་བཀའ་ཤག་ལ་བསྩལ།

ད་ཐེངས་བློ་སེང་གི་མཉམ་སྡེབས། མགོ་སྦྲེལ། ཆིག་ཁྲི་ཆིག་འབུམ། གདན་ཞུ། ཤེས་ཡོན་སྲིད་བྱུས་བཅས་ཀྱི་ཐད་གྲོས་ཚོགས་འཐུས་མི་ཚོར་གསལ་ཁ་དེ་ཙམ་མ་བྱུང་བ་དེ། བཙན་བྱོལ་བོད་མིའི་དཀྱིལ་འཁོར་དུ་རེ་དོགས་གང་ཡོད་མ་ཐོས་མོད། ཁོ་བོས་བསམས་ན་དེ་ནི་ཁོང་གི་ཤེས་བྱའི་ནང་ཁོག་དང་འབྲེལ་བ་ངེས་ཅན་ཞིག་ལོས་ཡོད་དེ། འཆར་གཞི་རེ་རེར་ཚུལ་མཐུན་སྒྲུབ་ལུགས་ཀྱི་གཞུང་ལུགས་གསར་གཏོད་བྱ་རྒྱུ་མ་རྙེད་པ་དེས་ངེད་ལ་ཁོང་གི་འབུམ་རམས་པའི་ཤེས་ཚད་ལ་དོགས་གཞི་ནམ་མཁའ་འདྲ་ཞིག་བྱུང་།

ཁོང་གི་མགོ་སྦྲེལ་ལ་མཚོན་ན། ད་ལྟ་ཁ་ཎ་སྒྲ་དཔེ་མཚོན་ཞིག་ཏུ་གྱུར་ཟིན་པ་ལྟར་ཁོང་གི་རེ་བ་དེ་མ་མཐའ་སློབ་མ་གཅིག་གི་སློབ་ཡུན་གྱི་སྟེང་དུ་བབས། དེ་བཞིན། མཉམ་སྡེབས་ཀྱང་མཐར་གཏུག་ན་སྒོར་འབུམ་ཁ་ཤས་ཀྱི་མཐུན་རྐྱེན་ལ་ཐུག་ཡོད་པ་ཙམ་ལས། ཞིབ་འཇུག་པ་འདེམས་སྒྲུག་བྱེད་སྟངས་ཚིག་ཟུར་ཙམ་ཡང་ཐོན་མེད། དེ་ནི་གཅིག་བྱས་ན་ཚད་ལྡན་ཞིག་གིས་ཁོང་ལ་ཁས་ལེན་མ་གནང་བས་ཀྱང་ཡིན་སྲིད།

ཆིག་ཁྲི་ཆིག་འབུམ་ནི་རི་བོང་གི་རྭར་གྱུར་མིན་ལ་མ་ལྟོས་པར། ༧གོང་ས་མཆོག་ནས་ཀྱང་བསྟོད་བསྔགས་གནང་ཡོད། སྤྱིར་བཏང་༧གོང་ས་མཆོག་གི་བསྟོད་བསྔགས་དེ་བེད་སྤྱོད་ལོག་པར་བཏང་ན་མི་རེ་འགའ་མགོ་འཁོར་ངེས་ཀྱང་། ཅི་ལྟར་སྤྱི་འཐུས་གནས་ཚད་མཐོ་གྲས་བོན་པོ་བ་སྨོན་ལམ་མཐར་ཕྱིན་པས་བཤད་པ་ལྟར། དང་པོ་བཙན་བྱོལ་དུ་བོད་ཡིག་ཐོག་ཁྱད་ལས་པ་ ༥༠༠ ཐོན་ཐུབ་བྱས་ན་ཟེར་བ་དེ་གནད་འགག་དང་དོན་དངོས་ཐག་ཉེ་བོ་འདུག ཅིའི་ཕྱིར་ལོ་ཉི་ཤུའི་དམིགས་ཚད་བཟུང་བ་རེད་དམ། ལོ་ཉི་ཤུར་དེ་འདྲ་ཞིག་ཐོན་ཐུབ་བམ། བོད་ནང་གནས་སྐབས་བཞག་ནས། བཙན་བྱོལ་དུ་ཁྱད་ལས་པ་དེ་དག་ས་ཆ་གང་ནས་འདེམས་སྒྲུག་བྱ་རྒྱུ་ཡིན་ནམ་ཟེར་ན། བློ་སེང་ལ་འདིའི་དྲིས་ལན་གསལ་བོ་ཞིག་མེད། དེ་བས་ལོ་ཉི་ཤུ་འདི་ནི་ལོ་ལྔ་ཚན་ཕྱི་མ་དེའི་མ་གདན་ནམ་འོས་ཤོག་དངོས་གནས་དེ་རེད།

གདན་ཞུའི་ཐད་ནས་ཉུང་ཙམ་སྤྲོས་ན། དེང་བཙན་བྱོལ་ནང་གི་ལས་བྱེད་པའི་བློ་འགུགས་བྱེད་ཐབས་སུ། བོད་ནང་གི་སྤུན་གཉེན་དག་ལ་ཞི་དྲག་གི་ཐབས་ཤེས་བསྟུད་མར་བྱེད་པ་བདེ་སྲུང་བཀའ་བློན་གྱིས་གསུངས་བ་ལྟར། རྒྱ་ནག་གི་འདོད་པར་མ་བབས་ན་བོད་མི་དཀྱུས་མ་ཞིག་ཀྱང་བོད་དུ་ལོག་རྒྱུ་མེད་པ་རེད། ཕྲན་ལྟ་བུས་ལས་བྱེད་པ་འཐབ་རྩོད་པ་ཐབས་ཆག་ཅིག་ལའང་ཕ་ཡུལ་དུ་ལོག་འདོད་ན་ལས་ཀ་དེ་འདྲ་མ་བྱས་ན་བཟང་བས་འཇིགས་སྐུལ་སླེབས་སོང་། དངོས་ཡོད་དེས་ད་བར་བློ་སེང་གིས་བོད་མིའི་དད་འདུན་སྲིད་དོན་ནང་བེད་སྤྱོད་བྱས་པ་དེ་རྦད་དེ་ནོར་འཁྲུལ་ཆེན་པོ་རེད་ལ། བྱུང་ན། ༧གོང་ས་མཆོག་གདན་ཞུ་ཟེར་བ་འདི་མང་པོ་མ་གསུངས་ན་ཡག་ཅིང་། བོད་ལ་རང་དབང་བྱུང་མཚམས་༧གོང་ས་མཆོག་གི་སྲིད་འགན་མི་བཞེས་རྒྱུ་མ་འོངས་རྩ་ཁྲིམས་སོགས་སུ་བཀོད་ནས་ཁྱབ་བསྒྲགས་གནང་བ་དང་། དེང་སྐབས་ཡོངས་སུ་སྲིད་འགན་རྩིས་སྤྲོད་ཞུས་ཟིན། དེ་དག་རྒྱ་ནག་ལ་༧ཏཱ་ལའི་བླ་མ་མི་གཅིག་གི་ཆེད་དུ་གླེང་རྒྱུ་གང་ཡང་མེད་པ་དང་། ལྷག་ཏུ་༧ཏཱ་ལའི་བླ་མས་ཞིང་བྲན་བསྐྱར་གསོ་བྱེད་ཀྱི་མེད་པས་བརྡ་ལན་མཚོན་ཆེད་ཡིན་པ་གསལ་བོ་ཡིན་སྟབས། དེང་སྐབས་༧གོང་ས་མཆོག་གདན་ཞུ་ཟེར་བའི་ཚིག་འདི་བོད་ཀྱི་རང་དབང་འཐབ་རྩོད་ཀྱི་སྲིད་དོན་སྡིངས་ཆའི་སྟེང་དེ་ཙམ་འབྲེལ་བ་མེད་ལ། འདི་ནི་༧ཏཱ་ལའི་བླ་མར་བཅངས་བའི་དད་འདུན་བེད་སྤྱོད་བྱས་པ་ཞིག་ཀྱང་རེད་འདུག་པས། ཁོང་དངོས་གནས་གདན་འདྲེན་ཞུ་མཁན་ནི་ཆབ་སྲིད་དང་འབྲེལ་བ་མེད་པའི་དགའ་ལྡན་ཕོ་བྲང་བ་ཡིན་ལ། དེས་འབྲེལ་བ་བྱེད་ས་འང་རྒྱ་ནག་གི་ཆོས་ལུགས་སྡེ་ཚན་ཁག་ཡིན་པས། བཀའ་བློན་ཁྲི་པའི་འོས་འགན་དང་དེ་ཙམ་འབྲེལ་བ་མེད།

ཤེས་ཡོན་ཐད། བཀའ་ཁྲི་གསར་བས་དམིགས་བསལ་གནང་གི་ཡོད་པ་དེས་མི་རྣམས་ལ་བག་ཆགས་ཡག་པོ་བཞག་ཡོད་ལ། བོད་ཀྱི་རིག་གཞུང་བྱུང་རབས་སྐད་ཡིག་ཚུགས་ཐུབ་མེད་མཁན་ཞིག་ཤེས་རིག་བཀའ་བློན་དུ་བསྡད་ཀྱང་བཙན་བྱོལ་ནང་བསམ་ཚུལ་གང་བྱུང་གི་ཡོད་མེད་ངས་མ་ཐོས་མོད། ཤེས་རིག་སློབ་གསོའི་ལས་དོན་འདི་འཛིན་སྐྱོང་གི་རིགས་ལམ་གཅིག་པུས་མཐའ་འཁྱོངས་པ་ཞིག་མིན་པ་གསལ་བོ་ཡིན་ཡང་། བཀའ་ཁྲིས་གྲོས་ཚོགས་སུ་གསུངས་བ་ལྟར་ན་ཤེས་ཡོན་ཐད་སྔར་མེད་ལས་འཆར་སྒྲིག་དང་སྒྲིག་རྒྱུ་ཡོད་པའི་བསམ་ཚུལ་ཤུགས་ཆེར་བཏོན་ཡོད། འདི་ནི་གཅིག་བྱས་ན་འགལ་རྐྱེན་དུའང་འགྲོ་སྲིད་མོད། ང་ཚོས་ཡོང་རྒྱུར་ལྷགས་པའི་ནོ་བྷེལ་གཟེངས་རྟགས་དུས་དྲན་སྐབས། ཁོང་གི་བོད་ཡིག་ཀློག་སྟངས་ལ་ལྟོས་ན་ཁོང་གིས་ཅི་ཙམ་བོད་སྐད་ཡིག་གི་ཤེས་བྱར་ཅི་ཙམ་དོ་ནན་བྱེད་བཞིན་པ་རྟོགས་ཐུབ་ལ། དེས་ཁོང་ལ་བསྐྱར་གསོ་བྱེད་དགོས་པའི་རང་དང་འདྲ་བའི་བཙན་བྱོལ་བོད་མིའི་བོད་ཀྱི་ཤེས་རིག་གི་འབྱུང་འགྱུར་མཐོང་འཇུག་གི་རེད་ལ། མྱོང་འཇུག་གི་རེད།

དེས་ན་སེང་གེའི་བཀའ་ཤག་གི་ལས་འཆར་ལས་རིམ་འདི་དག་གིས་བོད་མི་ཞིག་ལ་བསམ་ཚུལ་ཅི་ཞིག་སྤྲོད་ཀྱི་རེད་དམ།

༣ རང་ངོས་ནས་རང་ལུགས་བཞག་སྟེ་བོད་ཀྱི་མདུན་ལམ་ལ་ལྟ་བ།

            གོང་དུ་རོབ་བཤད་བྱས་པའི་བཀའ་ཤག་དང་དེའི་ལས་འཆར་ལས་རིམ་ཐད་དཔྱད་པ་བྱས་ནས་མཚམས་འདིར་བསླེབས་པ་ན། བོད་ནང་ནས་གཅིག་རྗེས་གཉིས་མཐུད་ཀྱིས་རང་ལུས་མཆོད་མེར་སྒྲོན་པའི་ལས་འགུལ་བྱུང་དང་འབྱུང་བཞིན་པས། སེང་གེའི་བཀའ་ཤག་གིས་ལམ་དབུ་མ་རྒྱུན་འཁྱོངས་ཀྱིས་མཆོད་མེ་སྦར་བའི་རྒྱུ་མཚན་ཐག་གིས་གཅོད་ཀྱི་ཡིན་ན། བཀའ་ཤག་སྐབས་གོང་མའི་“དབུས་གཞུང་ལ་ཕུལ་བའི་” “བསམ་འཆར་” དང་དེའི “འགྲེལ་བརྗོད་” ཐད་གསལ་ཁ་བྱེད་དགོས་ཀྱི་འདུག་ལ། སེང་གེའི་བཀའ་ཤག་གི་སྐབས་སུ་བྱུང་བའི་རང་ལུས་མཆོད་མེར་སྒྲོན་པའི་གནས་སྟངས་ནི་ལོ་རྒྱུས་གསར་བ་ཞིག་ཡིན་པས། ” བསམ་འཆར“་དེ་ལ་བསྐྱར་ཞིབ་བྱ་དགོས་མིན་དང་དེས་དེང་བོད་ནང་བྱུང་བཞིན་པའི་མངོན་འདོད་མཚོན་གྱི་ཡོད་ན། “བསམ་འཆར་“དེའི་མཇུག་སྣོན་ཅི་ལྟར་སྐྱོང་མིན་ལ་འབྲེལ་མོལ་གྱི་སྒོ་མོ་ཕྱེས་ཡོད་ཟེར་བའི་ཚིག་ཙམ་གྱིས་འཐུས་བར་མི་འདོད།

            དགའ་ལྡན་ཕོ་བྲང་པའི་སྲིད་དབང་འཕོ་འགྱུར་བྱུང་བ་དང་། ན་ནིང་ཟླ་ ༣ ཚེས་ ༡༠ ནས་འཛམ་གླིང་གི་དོ་སྣང་མ་འདྲ་བ་གནང་གི་ཡོད་ན། རྒྱ་ནག་གི་མཁས་དབང་ཁག་དང་འབྲེལ་འདྲིས་གཏིང་ཟབ་ཡོད་པ་ཡིན་ན། སེང་གེས་བཀའ་ཤག་གིས་ཕྱི་སྡོད་རྒྱ་རིགས་གང་ན་ཅི་ཡོད་རྣམས་ངྷ་སར་མགྲོན་འབོད་ཀྱིས་ཚོགས་ཆེན་དམིགས་བསལ་བ་ཞིག་བསྡུས་ཏེ་བོད་མིར་རང་དབང་ཐོབ་ཐབས་སུ་ཞུ་འབོད་བྱེད་དགོས་ཤིང་། ” བསམ་འཆར་“སྤྲད་པས་རྒྱལ་སྤྱིའི་སྤྱི་ཚོགས་ཀྱི་རྒྱབ་སྐྱོར་དེས་བོད་དོན་ལ་ཕན་མིན་གྱི་གནས་སྟངས་གསལ་བོ་བཟོ་དགོས་པར་སྙམ་ལ། གལ་སྲིད་དེར་ད་དུང་རྔོ་ཐོགས་པ་ཞིག་མེད་ན། རྒྱ་ནག་རང་གིས་རང་གི་རྩ་ཁྲིམས་འབྲུ་འགྲེལ་དང་རྩ་ཁྲིམས་བརྩི་མིན་གྱི་ཡ་ལན་ལ་སྒུག་ནས་མི་སྡོད་པར། བཀའ་ཤག་གསར་བའི་ལོ་གཉིས་ཀྱི་ནང་གནས་སྟངས་དེ་ཁ་གསལ་བཟོ་མ་ཐུབ་ཚེ། སེང་གེའི་བཀའ་ཤག་གི་རྒྱ་བོད་འབྲེལ་ལམ་གྱི་གསར་གཏོད་རི་བོང་གི་རྭ་དང་། ལོ་རྒྱུས་ཀྱི་མགོ་བསྐོར་སྔ་ན་མེད་པ་ཞིག་ཆགས་ཀྱི་རེད་ལ།  “རྩ་དོན་གསུམ་” “ནག་ཉེས་གསུམ་“གྱི་ངོ་བོར་འགྱུར་གྱི་རེད།

            གལ་སྲིད་དེ་ལྟར་དུས་ཡུན་ངེས་ཅན་ནང་རྒྱ་བོད་ཆབ་སྲིད་ཐད་རེ་བ་མ་མཐོང་ཚེ། བཀའ་ཁྲི་གསར་བས་བརྒྱུད་ལམ་སྣ་ཚོགས་ནས་བོད་ཕྱི་ནང་གཉིས་དང་། བོད་དང་རྒྱ་ནག་བར་ལ་རིག་གཞུང་གི་བརྗེ་རེས་གསར་གཏོད་བྱེད་དགོས་པར་འདོད་ལ། བོད་ཕྱི་ནང་གཉིས་སུ་ཡོངས་སུ་འགྲོ་བསྐྱོད་རང་དབང་ལྡན་པ་ཞིག་ཆགས་རྒྱུར་འབད་བརྩོན་གནང་སྟེ། རྒྱ་བོད་བར་ལ་ཆབ་སྲིད་ཀྱི་གནད་དོན་ཕུད་གཞན་རྙོག་གླེང་གང་ཡང་མེད་པ་དོན་དངོས་ཐོག་ལག་ལེན་བསྟར་ཐུབ་པ་ཞིག་ལ་ལས་འཆར་སྒྲིག་དགོས་པར་འདོད། དེ་འདྲའི་མཐུན་ཟབ་ཞི་གནས་ཀྱི་ལྟ་ཚུལ་ལ་ཡ་ལན་བྱེད་རྒྱུའི་རེ་བ་མ་མཐོང་ཚེ། སྐབས་དེ་ནས་བཟུང་འཚེ་མེད་ཞི་བ་བེམ་པོར་གྱུར་སོང་བ་རེད་ལ། དྲང་བདེན་ཀྱང་རུལ་སོང་བ་ཡིན་པས། ཚེ་སྲོག་རྒྱུ་འབྱོར་ཕངས་མེད་ཀྱིས། གསོན་གནས་གཉིས་ཀྱི་གཅིག་བདམས་སྟེ་བློ་ཐག་ཆོད་པོས་ལམ་དུ་བསྐྱོད་དགོས་ཤིང་། ཉི་མ་དེར་ཤི་སོང་བའི་བོད་མི་རིགས་ཤིག་ཡོད་ན་དེ་ནི་སྐྱེ་བ་རླབས་ཆེ་ཞིང་ཤི་བ་གཟི་བརྗིད་ལྡན་པ་ཞེས་པ་དེ་ཡིན། སྐབས་དེ་ནས་བཙན་བྱོལ་བ་འབོར་ཆེན་བོད་དུ་ཞི་བའི་གོམ་བགྲོད་ཀྱིས་སྲོག་གཏོང་དགོས་ཤིང་། བོད་ནང་དུ་ཞི་བའི་ལས་འགུལ་སྤེལ་ཕྱོགས་ཀྱི་བཀོད་གདམ་བཙན་བྱོལ་བོད་གཞུང་གིས་བྱེད་དགོས། དེ་ལྟར་བོད་ཕྱི་ནང་གཉིས་ནས་བོད་མི་འབུམ་གཅིག་གིས་རྒྱལ་ཁབ་ཀྱི་དོན་དུ་སྲོག་དོར་བ་ཡིན་ན། ང་ཚོར་གང་མགྱོགས་རང་དབང་ཐོབ་ཀྱི་རེད།

༢༠༡༡། ༩། ༤། ཉིན།

འབྲེལ་ཡོད་གསར་འགྱུར།

Mobile App

བཙན་འོག་གི་གྲོས་མཐུན་དོན་ཚན་ ༡༧ ནུས་མེད་ཆགས་པ་རྒྱལ་སྤྱིའི་ཐོག་ཁ་གསལ་བཟོ་དགོས།

༢༠༢༥/༠༥/༢༣
དབྱིན་ཇིའི་རྒྱལ་ཁབ་སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་གནད་དོན་ཐད་ལངས་ཕྱོགས་གསལ་བོ་བཟོས་འདུག བོད་ཀྱི་དུས་བབ་གསར་ཁང་གིས་པར་སྒྲིག་སྦྱོར་བྱས། ༢༠༢༥།༥།༢༣
Mobile App

སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་བདག་དབང་ཐད་ལངས་ཕྱོགས་བརྟན་པོ་བཟོས་འདུག

༢༠༢༥/༠༥/༢༣
ཧཱ་ཝར་ཌི་གཙུག་ལག་སློབ་གཉེར་ཁང་། དྲ་ལམ་གྱི་པར།
Mobile App

ཧཱ་ཝར་ཌི་གཙུག་ལག་སློབ་གྲྭར་རྒྱལ་སྤྱིའི་སློབ་མ་བཀག་སྡོམ་གནང་འཆར་ཡོད་འདུག

༢༠༢༥/༠༥/༢༣
དྷ་ས་ས་གནས་མགོ་འཛིན་དཀོན་མཆོག་མིག་དམར། དུས་བབ་ཀྱི་པར། ༢༠༢༢།༦།༤
Mobile App

དཀོན་མཆོག་མིག་དམར་ལགས་བསྐྱར་དུ་དྷ་ས་ས་གནས་མགོ་འཛིན་དུ་འདེམས་ཐོན་བྱུང་།

༢༠༢༥/༠༥/༢༣
བོད་ཀྱི་གནས་མཆོག་གངས་རིན་པོ་ཆེ། དྲ་ལམ་གྱི་པར།
Mobile App

རྒྱ་གར་གྱི་གནས་མཇལ་བ་ ༧༥༠ གངས་རིན་པོ་ཆེར་གནས་མཇལ་དུ་གཏང་རྒྱུ་ཡིན་འདུག 

༢༠༢༥/༠༥/༢༢
༸གོང་ས་མཆོག གསར་འགྱུར།

ཡེ་ཤུ་ཆོས་དཔོན་ཕོབ་ལེའོ་མཆོག་ལ་༧གོང་ས་མཆོག་དང་ལྷན་དུ་མགྱོགས་མྱུར་མཇལ་འཕྲད་གནང་བའི་འབོད་སྐུལ་ཞུས།

༢༠༢༥/༠༥/༢༢

མཆན། 11

  1. གསར་བུ། says:
    ལོ་ 14 སྔོན།

    སྐུ་ཞབས་ཤར་ཕྱོགས་ཁུག་རྟས། བཤད་པ་དེ་ཚོ་དངོས་གནས་བདེན་པ་རེད། སྔར་བློ་སེང་བཀའ་ཁྲིར་མ་སླེབས་གོང་། ངས་ཆེད་དུ་ཁོང་བཀའ་བློན་ཁྲི་བར་མི་འོས་པའི་བསམ་ཚུལ་བཏོན་པ་ཡིན། དེ་སྐབས་ཚོགས་གཏམ་གཏོང་མཁན་འགའ་ཡང་བྱུང་། གང་ལྟར་ད་ལྟའི་ཆར་བློ་སེང་གི་ནང་མཉམ་ཕྱིར་སྟོན་བྱེད་བཞིན་པའི་སྐབས་སུ། ཁྱེད་ཀྱི་བསམ་ཚུལ་ཁ་གསལ་བོ་དང་དངོས་ཡོད་ཀྱི་རང་བཞིན་ལྡན་པ་ཁག་ཅིག་སྤེལ་འདུག་པར་དགའ་བསུ་ཡོད། ད་ལྟའི་ཆར་ཁྱེད་རང་ལས་གནས་ནས་ཕྱིར་ཕུད་བྱས་ཡོད་ན་དེ་ནི་ཁྱེད་རང་གི་གཟི་བརྗིད་ལས་ཅུང་གང་ཡང་མ་རེད། དེ་རིང་ཁྱེད་རང་ལས་གནས་ནས་ཕྱིར་ཕུད་བྱས་ཚུལ་ཐོས་སྐབས་འཕྲལ་དུ་འབྲེལ་ཡོད་རྩོམ་ཡིག་ཁག་གཉིས་བཀླགས་པ་ཡིན། ཡག་པོ་བྲིས་འདུག གངས་ཅན་སྐྱིད་གཤུང་གི་མིག་ཁར་སིར་པན་ཚ་བོ་ཞིག་བཏབ་འདུག

    སྐྱེས་སར་ཀླུ་སྒྲུབ་ཀྱིས་་་་་

    Reply
  2. ཤར་ཕྱོགས་ཁུག་རྟ། says:
    ལོ་ 14 སྔོན།

    རྒན་ལགས་ཀྱི་བསམ་ཚུལ་གོ་སོང་། མྱི་ཤེས་མྱོང་ཅན་གྱི་ཚིག་རེ་ན། ། དོན་བརྗིད་ལྡན་མཚོན་གྱི་རྣོ་ཁ་གདའ།།

    Reply
  3. ཆབ་བྲག་ལྷ་མོ་སྐྱབས། says:
    ལོ་ 14 སྔོན།

    འཛིན་སྐྱོང་སྔོན་མའི་ཐུགས་རྗེ་བཀའ་དྲིན་དང་འཛིན་སྐྱོང་གསར་བའི་ནང་གི་བཀའ་བློན་ཉམས་མྱོང་དང་འཇོན་ཐང་ཅན་རྣམ་པའི་ནུས་པ་ལ་བརྟེན་ནས་མ་མཐར་ཡང་གོམ་ཁ་མི་འཆོལ་བར་ཕ་ཤུལ་བུས་འཛིན་གྱི་ལས་འཕྲོ་སྐྱོང་ཐུབ་བསམས་ནས་སེམས་བདེ་བར་ཡོད།
    བསམ་བློ་གཞན་ཞིག་ནས་བཏང་ན་་བདག་གི་ཐོག་མའི་རེ་བའི་བཀའ་ཁྲི་རྒྱ་རི་སྒྲོལ་མ་ལགས་དང་སྤྱི་འཐུས་ཚགས་གཙོ་སྤེན་པ་ཚེ་རིང་ལགས་རྣམ་པ་གཉིས་ཀ་གཅིག་འཛིན་སྐྱོང་ནང་དང་གཅིག་སྔར་བཞིན་ཚོགས་གཙོར་ཕེབས་ཡོད་པ་འདིས་བདག་ཡིད་ཕལ་ཆེར་ཚིམ་ཡོད།

    Reply
  4. ཉི་ཟླ་སྐར་གསུམ། says:
    ལོ་ 14 སྔོན།

    བཀའ་ཁྲི་ལ་ངེས་པར་དགོས་པའི་ལས་འགུལ་རང་སྲོག་མེ་ལ་སྲིག་མི་རིམ་པར་བོད་ནས་བྱུང་ཡང་། བཀའ་ཁྲིའི་སྐད་ཆ་ན་གཅིག་དང་ལས་འགུལ་སྣེ་གཅིག་གོ་རྒྱུ་མི་འདུག་ ད་ག་རེ་བྱས་རེད་། སླ་ཆགས་ཡིན་ན་ གཉིད་ཁུག་ཡིན་ན་ དཔའ་ཞུམས་ཡིན་ན་
    བཀའ་ཁྲིའི་མིང་ལས་གཞན་མི་དགོས་ཡིན་ན། ཁྱོད་རང་བོད་མིའི་བཀའ་ཁྲི་ཡིན་ན་ཕྱི་ལ་དོན་ནས་བོད་མིའི་ལས་འགུལ་འགོ་འཛུགས་རྒྱུ་ལུས་འདུག་། ཡོང་མི་གང་ཡོད་ཁྲིད་ནས་གོམ་བགྲོད་ཐོག་བོད་ལ་བདེན་དོན་དང་བོད་མིའི་ཆེད་འགྲོ་རོགས་།
    ང་ཡང་མཉམ་འགྲོ་ཡིན་། ཁ་ཤས་རང་སྲོག་དོར་ཡང་ཚོར་བ་གང་ཡང་མེད་པའི་བཀའ་ཁྲི་ཞིག་ང་ཚོ་ལ་མི་དགོས་། ཁྱོད་རང་བསམ་བློ་གཏོང་ཤོག་

    Reply
  5. ཉི་ཟླ་སྐར་གསུམ། says:
    ལོ་ 14 སྔོན།

    བཀའ་ཁྲིའི་འགྲན་སྡུར་སྐབས་སུ་བཤད་པའི་སྐད་ཆ་དང་སྤོ་པ་ལ་བརྟེན་པའི་མི་དམངས་ཀྱི་རེ་བ་རྣམས་དམ་འབུལ་ཚར་ནས་ད་ལྟའི་བར་དུ་ཉམས་གུད་མ་ཏོགས་བྱུང་མི་འདུག་།
    ལྷག་པར་དུ་བོད་པའི་རིག་གཞུང་གི་ཤེས་ཚད་ཧ་ལམ་ཀླད་ཀོར་ཡི་པའི་བཀའ་ཁྲི་རང་ཉིད་ཤེས་རིག་བཀའ་བློན་ལ་ཁས་ལེན་བྱས་པ་དེ་ཧམ་པ་ལས་རྒྱུ་མཚན་སྣེ་གཅིག་མི་འདུག་།
    བཀའ་བློན་དང་ལས་བྱེད་སུ་ཡིན་ལས་གཞི་དང་མཚུངས་པའི་ཤེས་ཚད་དགོས་སྐོར་བཤད་པ་དེ་དག་ཆོས་རིག་དང་ཤེས་རིག་དང་ཕྱི་འབྲེལ་བཀའ་བློན་གསུམ་ག་དང་མ་འོས་པ་ཤར་ཅིག་ཡིན་།

    Reply
  6. ཤར་ཕྱོགས་ཁུག་རྟ། says:
    ལོ་ 14 སྔོན།

    སྐུ་ཞབས་བློ་སེང་གི་རྩོམ་ཡིག་བཙལ་ནས་དུས་ཚོད་མང་པོ་བཏང་ཟིན། དེ་ནི་འོས་གཞིའི་སྐབས་ནས་ཡིན། ཁོང་ལ་དངོས་སུ་རེ་བ་བཏོན་ནས་བྱུང་ན་མང་གཙོའི་སྐོར་གྱི་རྩོམ་ཡིག་དེ་བོད་བསྒྱུར་བྱས་ནས་བཙན་བྱོལ་བོད་མིའི་སྤྱི་ཚོགས་ནང་བཀྲམས་རོགས་ཞེས་ཐེངས་མང་ཞུས་མྱོང་། ཡིག་ཐོག་ནས་ཀྱང་ཞུས་ཚར། ཡིན་ནའང་། རྩོམ་ཡིག་དེའི་ཐད་བགྲོ་གླེང་མང་པོ་ཡོད་ཡོད་པ་རེད།

    ཁ་སང་གྲོས་ཚོགས་སུ་གསུངས་བའི་རྒྱལ་སྤྱིའི་ཚགས་དེབ་སོགས་སུ་རྩོམ་འབྲིའི་སྐོར་བྱེད་པ་དེ་དག་ཕལ་ཆེར་བཀའ་ཁྲིས་མིང་གིས་ཁྱེར་བ་ཡིན་འདུག་ལ། ནམ་རྒྱུན་གྱི་རྩོམ་འབྲི་དང་པར་ཐོན་མིན་གྱི་ཆ་ནས་བཤད་ན་ད་དུང་བསྟན་འཛིན་བརྩོན་འགྲུས་མདུན་དུ་སླེབས་ཡོད། དེ་བས་སྐད་ཆ་ཚིག་རེ་རེར་ཞིབ་འཇུག་བྱས་ན་བསམས་ཚུལ་སྣ་ཚོགས་ཡོང་གི་རེད་ལ། ཡོང་ཆོག་གི་རེད།

    Reply
  7. འདྲེ་མགོ་རྡོ། says:
    ལོ་ 14 སྔོན།

    མ་རྩོམ་དང་མཆན་བུ་གང་སར་རྒྱུ་མཚན་ཞིག་བཤད་ཀྱི་འདུག ཐོག་སྒྲ་ལགས་ཀྱི་དེང་དུས་རྒྱལ་སྤྱིའི་རྩོམ་ཡིག་ཚད་ལྡན་བཀོད་ས་གང་སར་བཙལ་འཚོལ་བྱས་ཀྱང་རྩོམ་ཡིག་གང་ཡང་ལག་སོན་མ་བྱུང་བ་དེ་ནི་གནད་འགག་ཅིག་རེད།

    Reply
  8. བསྟན་པ། says:
    ལོ་ 14 སྔོན།

    དེ་རིང་ཁ་སང་སྤྱི་ཚོགས་ནང་དུ་བཀའ་བློན་སྟེང་ལ་གླེང་སློང་ཧ་ཅང་ཆེ་བས་དྲ་རྒྱ་སོགས་ཀྱི་གནས་སྐབས་སྒོ་ཡང་རྒྱག་དགོས་པའི་གནས་ཚུལ་ཡང་འབྱུང་གི་འདུག འདི་ནི་བློ་སེང་གི་ཁ་གཡང་གི་གྲུབ་འབྲས་ཞིག་ཀྱང་ཅི་ལ་མིན། བོད་མི་ཚོས་གཡབ་རྒྱུག་དང་རེ་བ་བྱེད་རྒྱུ་འདི་གོམས་གཤིས་ཤིག་ཆགས་བསྡད་འདུག ང་ནི་བོད་པའི་མིའི་སྐད་ཆ་ལ་ཐང་ཆད་ནས་རེ་བ་གཞན་ལ་བཅོལ་རྒྱུ་མིན་པ་རང་ཉིད་ཀྱི་རང་ཉིད་ལ་རེ་བ་བྱེད་བཞིན་རྒྱུ་ཡིན།

    རྨོངས་དད་ཀྱི་འཁོར་ཡུག་འདི་ནས་ངའི་ཁ་དབུགས་ཡོད་ཚད་ཉི་མ་དེ་རིང་ནས་བརླག་སོང་ནུབ་སོང་ཚར་སོང་། ང་རང་ཉིད་ཀྱི་བསམ་གཞིག་ཡོད་ཚད་འགྲིགས་སོང་འཁྱོངས་སོང་མཐུན་སོང་། ལ་ལ་ལས་ཀྱི་འཁོར་སོང་། ལ་ལ་ཆུ་ལ་བསྐུར་སོང་། ལ་ལ་གཉིད་ནས་སད་སོང་། ལ་ལ་སྨྱོན་པ་ཆགས་སོང་། ལ་ལས་རྨི་ལམ་བཏང་སོང་། ལ་ལས་བཤད་རྒྱུ་ཆགས་སོང་། ལ་ལས་བསྟོད་རྒྱུ་བོར་སོང་། ལ་ལས་རེ་བ་ཆགས་སོང་། འདི་ཐམས་ཅད་ནི་སྟོང་སང་ཡིན།
    རྣམ་དཔྱོད་སྟོང་ལས་གང་བའི་ཤར་ཕྱོགས་ཁུག་རྟ་ལགས་ཀྱིས་བསམ་ཚུལ་ངོ་རྗེན་མ་ཞིག་སྤེལ་འདུག་པས་གནས་ལུགས་དྲང་བདེན་གྱི་ཚུགས་སུ་ཟིན་འདུག

    Reply
  9. འགྱུར་མེད་བསྟན་འཛིན། says:
    ལོ་ 14 སྔོན།

    ཤར་ཕྱོགས་ཁུག་རྟག་ལགས།
    གཏམ་ཕར་མི་བཤད་པར་མཛུམ་བོ་ནང་དུ་ཚུར་འཛུགས་ན་ཁྱོད་རང་མི་འབུམ་གཅིག་གི་རང་སྲོག་དོར་དགོས་བའི་ནང་དུ་མཆོང་རྒྱུའི་ཐག་ཆོད་ཡོད་དམ།
    ཁ་ནང་ནས་སྐད་ཆ་ཙམ་ཤོད་རྒྱུ་ལ་དཀའ་ངལ་གང་མེད།

    Reply
  10. ཐོག་སྒྲ། says:
    ལོ་ 14 སྔོན།

    ཤར་ཁུག་ལགས་ཁྱེད་ཀྱིས་གསུངས་པ་ད་བདེན་ག་་་་འཆར་གཞི་རེ་རེར་ཚུལ་མཐུན་སྒྲུབ་ལུགས་ཀྱི་གཞུང་ལུགས་གསར་གཏོད་བྱ་རྒྱུ་མ་རྙེད་པ་དེས་ངེད་ལ་ཁོང་གི་འབུམ་རམས་པའི་ཤེས་ཚད་ལ་དོགས་གཞི་ནམ་མཁའ་འདྲ་ཞིག་བྱུང་།་་་་

    http://www.khabdha.org/?p=16958
    http://www.khabdha.org/?p=17312
    http://www.khabdha.org/?p=15303
    མཁས་པའི་ཡོན་ཏན་འཇལ་བ་ལ་ཐོག་མར་ཁོ་བོའི་དཔར་སྐྲུན་བྱས་ཟིན་པའི་བརྩམས་ཆོས་དག་ལ་ངེས་པར་དུ་གཟབ་ནན་གྱིས་ལྟ་དགོས། དེར་བརྟེན། ང་ཚོ་བོད་ཀྱི་ཆབ་སྲིད་བསྐྱར་ཞིབ་རྩོམ་སྒྲིག་པས་བོད་མི་འོས་ཤོག་ལྡུག་མཁན་ཚོས་བློ་སེང་ལགས་ཤེས་ལྡན་པ་ཞིག་ཡིན་པའི་གཞི་རྩའི་ཐོག་ནས་བྱ་གཞག་ཅི་ཞིག་བསྒྲུབ་ཡོད་པ་དག་ཡག་པོ་མཁྱེན་རྟོགས་ཡོང་བའི་རོགས་རམ་གྱི་ཆེད་དུ་དེ་སྔ་དཔར་སྐྲུན་བྱས་ཟིན་པའི་བརྩམས་ཆོས་ཁག་ལ་དཔྱད་པ་མདོར་བསྡུས་ཤིག་བཏང་ཡོད།

    ཐོག་མར་ང་ཚོས་བློ་སེང་གི་དཔར་སྐྲུན་བྱས་ཟིན་པའི་རྩོམ་ཡིག་སྤྱི་ལ་དཔྱད་པ་བཏང་ཡོད། དེ་ནས་ཁོང་གི་རྩོམ་ཡིག་བྱེ་བྲག་པ་རེ་རེ་ལ་དཔྱད་པ་བཏང་པ་བཅས་ཁག་གཉིས་སུ་དབྱེ་ཡོད། མདོར་བསྡུས་ཏེ་བརྗོད་ན། བློ་སེང་ལགས་ཕྱི་ལོ་ ༢༠༠༤ ཁྲིམས་ལུགས་རིག་པའི་སློབ་དཔོན་ S.J.D. གྱི་སློབ་མཐར་ཕྱིན་རྗེས་མཁས་པའི་ངང་ཚུལ་ཐོག་ནས་རྩོམ་ཡིག་གསུམ་དཔར་སྐྲུན་གནང་འདུག རྩོམ་ཡིག་གཅིག་ཀྱང་རྒྱལ་སྤྱིའི་ཚད་ལྡན་གྱི་དཔེ་དེབ་གྲས་སུ་དཔར་སྐྲུན་བྱ་ཐུབ་མི་འདུག་ཅིང་། རྩོམ་ཡིག་གསུམ་ལས་གཅིག་གི་བརྗོད་གཞི་ནི་ལོ་རྒྱུས་དང་འབྲེལ་ཞིང༌། ལོ་རྒྱུས་ཀྱི་དོན་དངོས་ལ་བདེན་པ་ཁུངས་སྐྱེལ་ཡང་བྱས་འདུག་མོད། འོན་ཀྱང༌དེ་ལ་རྒྱལ་སྤྱིའི་ངོས་འཛིན་ལྡན་པའི་ཚད་ལྡན་གྱི་རྩོམ་ཡིག་གམ་ཡང་ན་མཁས་བའི་ཁྱད་ཆོས་ལྡན་པའི་གསུང་ཚིག་དེ་ཙམ་མི་སྣང༌། རྩོམ་ཡིག་གཅིག་གི་ནང་དུ་རྩོམ་པོ་ཁོང་གིས་མང་གཙོ་ལ་དོ་འཁུར་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་བོད་ལ་རང་སྲིད་རང་སྐྱོང་ཐོབ་ཐབས་ཀྱི་སྐོར་བཀོད་འདུག

    གཉིས་པ། བློ་བཟང་སེང་གེ་ལགས་ཀྱི་རྩོམ་ཡིག་སྤྱི་ལ་དཔྱད་པ།

    ང་ཚོས་གང་ཡོང་ཡོང་གིས་གོ་བདེ་བའི་ཞིབ་འཇུག་བྱས་ཏེ་ཁོང་གི་རྣམ་དཔྱོད་ཀྱིས་བྲིས་བའི་རྩོམ་ཡིག་ཚང་མ་འདི་ལ་བསྟན་ཡོད། འོན་ཀྱང་། ཚགས་ཤོག་ཁག་ཏུ་བཀོད་ཡོད་པའི་རྩོམ་ཡིག་ཁག་འདིར་དཔྱད་ཞིབ་བྱས་མེད། དེར་བརྟེན། ང་ཚོས་ཐོག་མར་ཁྲིམས་ལུགས་དང་མཐུན་པའི་ཞིབ་འཇུག་བྱ་ཡུལ་དེ་ཁྲིམས་མཐུན་གྱི་མཁས་པ་ཚོ་དང་ཁྲིམས་རྩོད་པ་དག་གིས་བེད་སྤྱོད་བྱེད་ཀྱིན་པའི་དྲ་གནས་བེ་སུ་དྲུ་ལོ་ Westlaw ནང་འཚོལ་ཞིབ་བྱས་པ་ཡིན། འདིའི་ནང་དུ་རྒྱལ་སྤྱིའི་མཁས་དབང་ཚོས་བརྩམས་པའི་དཔེ་དེབ་ཚད་ལྡན་གྱི་ལས་གཞིའི་རེའུ་མིག་ ༤༠༠༠༠ དང༌། ཨ་རའི་གཙུག་ལག་ཁང་ཁག་གི་ཚད་ལྡན་མཁས་པ་ཚོའི་བརྩམས་ཆོས་དག་འཚོལ་ཐུབ་ཀྱི་ཡོད། འོན་ཀྱང་། ང་ཚོའི་ལག་ཏུ་བེ་སུ་དྲུ་ལོ་ Westlaw ནས་བློ་སེང་གི་བརྩམས་ཆོས་གཅིག་ཀྱང་རག་མ་སོང་། དེ་ནས་ང་ཚོས་འཚོལ་ཞིབ་ཀྱི་ལས་གཞི་ཆེ་རུ་བཏང་ཏེ་སྤྱི་ཚོགས་རིག་གནས་འཚོལ་ཞིབ་དྲ་གནས་མཉམ་འབྲེལ་ Social Science Research Network ཞེས་པའི་ནང་བཙལ་ཡང་། འདིའི་ནང་དུ་ཡང་བློ་སེང་གི་རྩོམ་ཡིག་གཅིག་ཀྱང་ལག་སོན་མ་བྱུང་། མཐར་ང་ཚོས་གྷོ་གྷིལ་སི་ཁོ་ལར་ Google Scholar ནང་དུ་འཚོལ་ཞིབ་བྱས་སྐབས་གཤམ་གྱི་རྩོམ་ཡིག་འདི་གཉིས་རྙེད་བྱུང༌། རྩོམ་ཡིག་གཅིག་ནི་དེབ་ཅིག་གི་ནང་གི་ལེ་ཚན་གཅིག་རེད་འདུག གང་ལྟར་རྩོམ་ཡིག་ཆ་ཚང་ཕྱི་ལོ་ ༢༠༠༤ ལོར་སློབ་དཔོན་གྱི་སློབ་མཐར་མ་ཕྱིན་གོང་དཔར་སྐྲུན་བྱས་པའི་རྩོམ་ཡིག་རེད་འདུག

    Reply
  11. ཤར་ཕྱོགས་ཁུག་རྟ། says:
    ལོ་ 14 སྔོན།

    སློབ་ཡུན་དེ་སློབ་ཡོན་དུ་བཅོས་རོགས།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese