ཀླུ་སྨྱོན་ཧེ་རུ་ཀ
སེམས་ཅན་རེ་རེའི་ཕྱིར་ཡང་མནར་མེད་པའི། །
མེ་ནང་བསྐལ་པ་རྒྱ་མཚོར་གནས་དགོས་ཀྱང་། །
སྙིང་རྗེས་མི་སྐྱོ་བྱང་ཆུབ་མཆོག་བརྩོན་པའི། །
བརྩོན་འགྲུས་ཕར་ཕྱིན་རྫོགས་པར་བྱིན་གྱིས་རློབས། །
—-པཎ་ཆེན་བློ་བཟང་ཆོས་ཀྱི་རྒྱལ་མཚན།
ལོ་རྒྱུས་དེབ་ཐེར་གྱི་ཤོག་ལྷེ་དག་དལ་བུར་སྐྱར་སློག་རེ་བྱེད་དུས། ལོ་ངོ་ཉིས་སྟོང་ལྔ་བརྒྱའི་སྔོན་གྱི་ཉིན་ཞིག ལོ་མང་སྒོམ་སྒྲུབ་བྱས་པའི་རྒྱ་གར་གྱི་ནང་པའི་གྲྭ་པ་ཞིག ཟག་པ་དང་བཅས་ཤིང་སྡུག་བསྔལ་དུ་མའི་འབྱུང་ཁུངས་སུ་གྱུར་པའི་སྡུག་བདེན་གྱི་ཕུང་པོ་འདི་ལ་སྐྱོ་བ་དྲག་པོ་ཞིག་སྐྱེས་ཏེ། ཁོས་སྒོམ་སྒྲུབ་ལོ་མང་བྱས་པའི་བྲག་ཕུག་དེ་དང་ཐག་མི་རིང་བའི་ས་རུ་ཡོད་པའི་བྲག་གཡང་དེའི་ཕྱོགས་སུ་སྐྱོད་བཞིན་པ་མཐོང་ཡོང་། ཉིན་དེར་ནམ་མཁའ་གཡའ་དག་ཅིང་ཉི་འོད་ཧ་ཅང་ཚ་བོ་ཞིག་གིས་རྒྱ་གར་ནུབ་བྱང་ཕྱོགས་ཀྱི་དབེན་ལྗོངས་འདི་ཡོངས་སུ་ཁེབས་པར་བྱས་འདུག ནགས་ཀླུང་དུ་སྤྲ་དང་སྤྲེའུ་དག་གིས་ལྗོན་ཤིང་དག་གི་ཡལ་གའི་སྟེང་དུ་རྩེད་འཇོའི་གར་ལ་རོལ་བཞིན་ཡོད། ནམ་རྒྱུན་ཡིན་ན་ཁོར་ཡུག་འདི་དག་གིས་གྲྭ་པ་སྒོམ་ཆེན་པ་འདི་ལ་ཞི་བདེ་དང་བག་ཡངས་ཀྱི་སྣང་བ་ཞིག་སྐྱེད་པར་བྱེད་མོད། དེ་རིང་གི་ཁོ་ལ་མཚོན་ན་ཉོན་མོངས་པ་དུ་མ་གནས་བཅའ་སའི་གཟུགས་པོ་འདི་དང་ཕྱི་རོལ་གྱི་ཁོར་ཡུག་འདི་གཉིས་ཀར་སྐྱོ་སྣང་དྲགས་པོ་ཞིག་ལས་ནམ་རྒྱུན་ལྟ་བུར་ཞེན་ཆགས་དང་སྐྱིད་སྣང་འཕེལ་རྒྱུ་ཅི་ཡང་མི་འདུག ཁོང་གི་གོམ་པ་རེ་རེ་བཞིན་བྲག་གཡང་དེའི་ཕྱོགས་སུ་ཐག་ཇེ་ཉེར་གྱུར།
ཁོང་གིས་རང་ཉིད་ཀྱི་ཕ་མ་དང་མིང་སྲིང་ཕ་གཞིས་སོགས་ཁྱིམ་དུ་གནས་པའི་ཆ་རྐྱེན་དུ་མ་ཞིག་རྒྱབ་ཏུ་བསྐྱུར་ཏེ་ལོ་ངོ་དེ་སྙེད་ཅིག་འདས་ཤིང་། ད་ནི་སྐྱེས་ཙམ་ཉིད་ནས་མཉམ་དུ་འགྲོག་པའི་རྣམ་ཤེས་འདི་དང་གཟུགས་པོ་འདི་གཉིས་ཀྱི་འབྲེལ་ཐག་ཀྱང་ཆད་རྒྱུར་སྐར་ཆ་འགའ་ལས་མེད། ཏག་ཏག་བྲག་གཡང་གི་ཁ་དེ་རུ་ཁོས་གོམ་མཚམས་བཞག སྤྱི་གཙུག་ཏུ་རང་ཉིད་ཀྱི་སློབ་དཔོན་དམ་པ་སྟོན་པ་སངས་རྒྱས་དྲག་ཏུ་བསྒོམས་ཤིང་མིག་མཐར་མཆི་མ་འཁྲིགས་ཤིང་ངག་ནས། ཀྱེ་བདག་གི་སྟོན་པ་བདེ་བར་གཤེགས་པ། དགེ་ཕྲུག་བདག་གིས་ཁྱེད་ཀྱི་ཞལ་ལས་ཉོན་མོངས་པའི་དྲི་མ་འདག་པར་བྱེད་པའི་གསུང་གི་བདུད་རྩི་ལན་མང་དུ་མྱངས་ཤིང་། ལོ་ངོ་དེ་སྙེད་ཅིག་ལ་རྩེ་གཅིག་ཏུ་བསྒོམས་པར་བྱས་ཀྱང་། སྐལ་དམན་བདག་ནི་འཁོར་བ་ཐོག་མ་མེད་པའི་དུས་ནས་ཉོན་མོངས་པ་མང་ཞིང་དགེ་བའི་རྩ་བ་ཧ་ཅང་ཕྲ་བར་གྱུར་ཏེ། དུས་དེ་རིང་བར་དུ་དུག་གསུམ་ཕྲ་རགས་དང་བཅས་པ་སྤངས་པའི་རྣམ་པར་གྲོལ་བའི་ཡེ་ཤེས་དེ་བརྙེས་པར་མ་གྱུར་ཅིང་། བཟའ་བཏུང་དང་མལ་ཆ་ན་བའི་གསོས་སྨན་སོགས་ཕྱི་རོལ་གྱི་དངོས་པོ་དུ་མ་ཞིག་ལ་བརྟེན་ནས་འཚོ་བའི་སྡུག་བདེན་གྱི་ཕུང་པོ་འདི་ཡིས་བདག་གི་འཇིག་ཚོགས་ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་འཇོམ་པར་བྱེད་པའི་ཡེ་ཤེས་ཀྱི་རྡོ་རྗེ་བླ་ན་མེད་པ་དེ་རྙེད་པར་བྱེད་པའི་གེགས་བྱས་དང་བྱེད་བཞིན་པའི་དུས་འདིར། བདག་གིས་ཟག་ཕུང་འདི་དུས་འདི་ཉིད་དུ་འདོར་བ་ལས་ལྷག་པའི་གདམ་ཀ་གཞན་ཅི་ཡང་རྙེད་པར་མ་གྱུར་ཅིང་། བགྱི་བ་རྔམ་པོ་ཆེ་འདི་རྩོམ་པ་ཡིས་བདག་གིས་རང་གི་སྟོན་པ་སྤོང་བ་མ་ཡིན། ཆོས་དང་དགེ་འདུན་སྤོང་བ་ཡང་མ་ཡིན། སྡུག་བསྔལ་དུ་མའི་རྩ་བར་གྱུར་པའི་ཟག་ཕུང་འདི་སྤོང་བ་ཡིན་ནོ།། ཁོང་གིས་དེ་སྐད་སྨྲས་རྗེས་བསམ་བློ་གཉིས་པ་ཅི་ཡང་མེད་པར་བྲག་གཡང་དེར་མཆོངས་སོང་། དེ་མ་ཐག་ཏུ་ས་ཆེན་པོ་འདི་ཡང་དྲག་ཏུ་གཡོས་ཤིང་། ནམ་མཁའ་སྟོང་པའི་དབྱིངས་ནས་ཁ་དོག་ལྔ་དང་ལྡན་པའི་འཇའ་ཚོན་སྣ་ཚོགས་ཤར་བྱུང་། བཙུན་པ་དེ་ཉིད་ཀྱང་སྐད་ཅིག་མ་དེ་ཉིད་ལ་དགྲ་བཅོམ་པའི་ཡེ་ཤེས་དང་ལྡན་པར་གྱུར་ཏོ།།
གཏམ་རྒྱུད་འདི་ནི་རྒྱ་ནག་གི་སློབ་དཔོན་ཆེན་པོ་ཞིག་ལོ་ངོ་ཆིག་སྟོང་གི་སྔོན་དུ། རྒྱ་གར་འཕགས་པའི་ཡུལ་དུ་དམ་པའི་ཆོས་ཀྱི་སྡེ་སྣོད་དག་ལ་ཐོས་བསམ་བྱེད་དུ་ཕེབས་དུས་ཁོང་གིས་གནས་སྐོར་གྱི་ལམ་ནས་གཟིགས་པའི་དབེན་གནས་ཤིག་གི་གཏམ་རྒྱུད་ཅིག་ཡིན་ཞིང་། གཏམ་རྒྱུད་དེ་ལས་ང་ཚོས་གནའ་བོའི་རྒྱ་གར་གྱི་ནང་པའི་བཙུན་པ་དག་གི་ཁྲོད་དུ་ཡང་ཆེས་བླ་ན་མེད་པའི་བདེན་དོན་ཞིག་མངོན་དུ་འགྱུར་ཆེད་གདོས་བཅས་ཀྱི་མི་ལུས་འདི་བློས་གཏོང་བའི་ལས་ལ་འཇུག་མཁན་བྱུང་མྱོང་བའི་དཔང་རྟགས་འོད་དུ་འཚེར་བ་རེ་རྙེད་ཐུབ་ལ། རྒྱ་ནག་ཏུ་ཡང་གནའ་བོའི་བཙུན་པ་དག་གི་ཁྲོད་དུ་རང་ལུས་ལ་མེ་སྦར་ཏེ་ཡེ་ཤེས་ཀྱི་འོད་སྣང་འཚོལ་མཁན་དག་བྱུང་ཡོད་ཅིང་། དུས་རབས་སྔོན་མའི་ལོ་རབས་དྲུག་ཅུ་པའི་ནང་དུ་རང་རེའི་བོད་ཡུལ་དང་ཐག་ཉེ་བའི་འབར་མ་རྒྱལ་ཁབ་ཏུ་ཡང་ནང་པའི་གྲྭ་བཙུན་དག་གི་ཁྲོད་དུ་རང་ལུས་ལ་མེ་སྦར་ཏེ་མི་དམངས་ཀྱི་བདེན་དོན་མངོན་འགྱུར་འབྱུང་བར་སྐུལ་འདེད་གནང་མཁན་བྱུང་ཡོད་པ་དེ་ཡང་ང་ཚོའི་ཁྲོད་ཀྱི་མི་མང་པོ་ཞིག་གིས་སྔ་མོ་ནས་ཤེས་ཡོད། གཤམ་གསལ་དྲ་ཐག་ནས་འབར་མའི་གྲྭ་པ་དེས་རང་ལུས་མེ་རུ་བསྒྲོན་པ་དེ་མཐོང་ཐུབ།
འདས་པའི་ལོ་ཟླ་ཉུང་ཉུང་ཞིག་གི་ཀློང་ནས། ང་ཚོའི་མི་རིགས་འདིའི་སྲོལ་རྒྱུན་རིག་གཞུང་དང་ནང་བསྟན་ཆོས་ལུགས་ཀྱི་སྲོག་ཤིང་དུ་གྱུར་ཅིང་། ཞི་བདེའི་གཟུགས་བརྙན་དང་ལྷིང་འཇགས་ཀྱི་ས་བོན་དུ་གྱུར་པའི་བོད་ཀྱི་གྲྭ་པའི་སྡེ་རུ། སྟོན་པའི་ན་བཟའ་ཀླུབས་པའི་བཙུན་པ་དག་གི་ཁྲོད་ནས་རང་ལུས་ལ་མེ་ལྕེ་སྦར་ཏེ་མུན་ནག་འཁྲིགས་པའི་འཇིག་རྟེན་གྱི་འགྲོ་བ་ཀུན་ལ་བདེན་དོན་གང་ཞིག་གི་གཟུགས་བརྙན་དེ་ཆེས་གསལ་བོར་སྟོན་འདོད་པའི་རེ་སྨོན་དེ་ཕྱིར་མངོན་ཐབས་བྱེད་མཁན་སྐོར་ཞིག་བྱུང་དང་འབྱུང་མུས་ཡིན།
འདི་ལྟ་བུའི་བགྱི་བ་རླབས་པོ་ཆེ་དག་གི་རྒྱབ་ལྗོངས་སམ་ལོ་རྒྱུས་ལ་ཕྱི་བཤིག་ཅིག་བརྒྱབ་ནས་ལྟ་དུས། བདག་ཅག་གི་སྟོན་པས་ཀྱང་སློབ་པ་ལམ་གྱི་གནས་སྐབས་སུ་འགྲོ་བ་ཀུན་ལ་ཞི་བདེའི་ལམ་བཟང་སྟོན་པའི་ཆ་རྐྱེན་མེད་དུ་མི་རུང་བར་གྱུར་པའི་བླ་ན་མེད་པའི་ཡེ་ཤེས་ཀྱི་ཆེད་དུ་རང་ལུས་སྟག་མོ་བཀྲེས་སྐོམ་གྱིས་གཟིར་བ་ཞིག་ལ་སྦྱིན་མྱོང་བ་དང་། ལན་གཅིག་ཁོང་བྱ་སྲེག་པར་གྱུར་དུས་ནགས་ཚལ་ལ་མེ་ཤོར་བ་ཟློག་ཕྱིར་མེ་ལ་མཆོང་བ་དང་། ཉ་ཆེན་པོར་གྱུར་དུས་རང་ལུས་སྐྱེ་བོ་བཀྲེས་པ་དག་ལ་སྦྱིན་པར་མཛད་པ་སོགས། རང་ཉིད་ཀྱི་སྐུ་ལུས་དེ་ལན་གྲངས་དུ་མར་འགྲོ་བ་གཞན་གྱི་སྡུག་བསྔལ་སེལ་ཆེད་ཡོངས་སུ་བློས་གཏོང་གནང་མཛད་ཡོད། ད་དུང་ཁོང་གིས་འགྲོ་བ་ཀུན་གྱི་ཞི་བདེའི་རྩ་ལག་ཏུ་གྱུར་པའི་ཆོས་ཚིག་བཞི་རེ་རེའི་ཆེད་དུ་ཡང་སྐུ་ལུས་ལ་མར་མེ་སྟོང་བཙུགས་པ་དང་ལྕགས་གཟེར་སྟོང་བཏབ་པའི་ལོ་རྒྱུས་ཀྱང་ཡོད།
འདི་ལྟ་བུའི་གཞན་ཕན་གྱི་ཆེད་དུ་རང་ཉིད་ཀྱི་ཧ་ཅང་གཅེས་པའི་སྐུ་གཟུགས་ཀྱང་ལན་མང་དུ་བཏང་བར་མཛད་པའི་སྟོན་པ་ཞིག་གི་རྗེས་སུ་འཇུག་པའི་ཁྲོད་དུ། མི་རིགས་ཤིག་གི་བདེན་དོན་མངོན་དུ་འགྱུར་ཆེད་དང་མུན་ནག་ཅིག་གི་གཏིང་མཐའ་སྔོག་ཆེད་རང་ལུས་མེ་ལ་བསྒྲོན་ཕོད་པའི་རབ་བྱུང་བའི་སྡེ་ཞིག་གློ་བུར་དུ་ཕྱིར་མངོན་ཡོང་བ་དང་། འགྲོ་བ་མིའི་ལུས་ཀྱི་ཤ་ཁྲག་དང་སྟོན་པ་སངས་རྒྱས་ཀྱི་ན་བཟའི་སྟེང་ནས་དྲག་ཏུ་འབར་བའི་མེ་ལྕེ་འདིའི་ཀློང་ན། བོད་མི་ས་ཡ་དྲུག་གི་མཐར་ཐུག་གི་དམིགས་ཡུལ་རང་དབང་རང་བཙན་གྱི་རྨི་ལམ་རིང་མོ་དེ་ཡོད་དམ། ཡང་ན་བོད་རྒྱ་གཉིས་ཀྱི་མི་དམངས་དུང་ཕྱུར་བཅུ་གྲངས་ལྷག་གི་མ་འོངས་པའི་གསེར་ཟམ་གཉིས་ཕན་དབུ་མའི་ལམ་ཆེན་གྱི་བློས་བསླངས་ཤིག་བཞེངས་ཡོད་དམ། ཡང་ན་རྒྱ་ཆེ་བའི་དམིགས་ཡུལ་ཏེ་འཛམ་གླིང་གྱི་འགྲོ་བ་མིའི་རིགས་ཡོངས་རྫོགས་ཀྱི་ཕན་ཚུན་མཛའ་བརྩེའི་འཛུམ་མདངས་ཤིག་འཁྱུག་བཞིན་ཡོད་དམ། དེ་ལས་ཀྱང་ཧ་ཅང་རྒྱ་ཆེ་བའི་དམིགས་འདུན་ཏེ་ས་སྟེང་གི་སྐྱེ་འགྲོ་ཡོངས་རྫོགས་ཀྱིས་ཕན་ཚུན་མ་བུ་བཞིན་བྱམས་པའི་ཞི་བདེའི་སྣང་བ་ཞིག་ལ་ལོངས་སུ་སྤྱོད་ཐུབ་པའི་བླ་མེད་བྱང་ཆུབ་ཀྱི་སེམས་བཟང་པོ་ཞིག་གིས་མཛེས་པར་བརྒྱན་ཡོད།
ད་དུང་འཁོར་བའི་སྡུག་བསྔལ་ལས་ཐར་མ་ཐུབ་པའི་བོད་ཀྱི་རབ་བྱུང་སྡེ་སྣོད་འཛིན་པ་སྐོར་ཞིག་གི་སྒྱུ་ལུས་ལས་མཆེད་པའི་རེ་སྨོན་གྱི་མེ་ལྕེའི་ཕུང་པོ་དེ་དག དག་པ་དང་མ་དག་པའི་ཞིང་ཁམས་བགྲང་ལས་འདས་པར་དམ་པ་ཆོས་ཀྱི་ལྗོངས་རྒྱུ་ལ་དུས་རྟག་ཏུ་ཕེབས་པའི་སྟོན་པ་སངས་རྒྱས་ཀྱིས་གཟིགས་ལགས་སམ། མདོ་ཁམས་ཀྱི་གྲྭ་པ་འདི་ཚོས་ཐེ་ཚོམ་ཅི་ཡང་མེད་པར་ཤིན་ཏུ་གཅེས་པའི་རང་ལུས་ལ་བསྒྲོན་པའི་མེ་ལྕེ་དམར་པོ་འདི་དག རི་བོ་ཧི་མ་ལ་ཡའི་མཐོ་སར་ཆགས་པའི་རྒྱ་གར་ངྷ་རམ་ས་ལར་བཞུགས་པའི་གོང་ས་ཏྰ་ལའི་བླ་མ་མཆོག་གིས་གཟིགས་ཡོད་དམ། བོད་ཀྱི་གྲྭ་པ་ཉེན་མཆོངས་པ་སྐོར་ཞིག་གིས་རང་སྲོག་བློས་བཏང་གིས་སྦར་བའི་མེ་ལྕེའི་དཔལ་འབར་འདི་དག དབྱར་དུས་སུ་ཚ་བ་མེ་ལྟར་འབར་ཞིང་དགུན་དུས་སུ་གྲང་བ་རྡོ་ལྟར་འཁྱག་པའི་པེ་ཅིན་གསེར་གྱི་ཕོ་བྲང་ན་ཡོད་པའི་རྒྱ་ནག་སྲིད་འཛིན་ཧུའུ་ཅིན་ཐོ་ཡིས་མཐོང་ཡོད་དམ། འཛམ་གླིང་ཤར་ཕྱོགས་ཀྱི་མི་རིགས་ཉམ་ཆུང་ཞིག་གི་ཚབ་མཚོན་དུ་གྱུར་པའི་གྲྭ་པ་འདི་ཚོས་རང་ལུས་ལ་སྦར་བའི་མེ་ཕུང་ཆུང་ཆུང་ཐོ་རེངས་སྐར་ཆེན་ལྟ་བུ་འདི་ཚོ། སྟོབས་འབྱོར་རིག་གསུམ་གྱི་ཁེངས་པ་མཐོ་བའི་ཕོ་བྲང་དཀར་པོར་བཞུགས་པའི་ཨ་རིའི་སྲིད་འཛིན་ཨོ་སྦ་མས་མཐོང་ཡོད་དམ། འཛམ་གླིང་གི་མི་འབོར་དང་བསྡུར་ན་གྲངས་ཀ་ཉུང་ཡང་ཤུགས་རྐྱེན་ཆེ་བའི་བོད་ཀྱི་གྲྭ་པ་སྐོར་ཞིག་གི་ལུས་ལས་མཆེད་པའི་བདེན་དོན་གྱི་མེ་ལྕེ་དྲག་པོ་དེ། ཕྱོགས་རིས་དང་ངོ་འཛིན་བྲལ་བའི་སྙན་གྲགས་ཅན་གྱི་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་སྦན་ཁེ་མོན་གྱིས་མཐོང་ཡོད་དམ།
རང་ལུས་མེ་རུ་སྦར་བ་འདི་འཚེ་མེད་ཞི་བའི་ངོ་རྒོལ་ཞིག་ཡིན་ནམ། རང་ལུས་མེ་རུ་སྦར་བ་འདི་རྒྱལ་སྲས་ཀྱི་སྤྱོད་པ་རླབས་པོ་ཆེ་ཞིག་ཡིན་ནམ། རང་ལུས་མེ་རུ་སྦར་བ་འདི་གཞན་ལ་འཇིགས་སྣང་སྐུལ་བའི་བྱ་སྤྱོད་ཅིག་ཡིན་ནམ། རང་ལུས་མེ་རུ་སྦར་བ་འདི་འཚེ་བ་ཅན་གྱི་བྱ་སྤྱོད་ཅིག་ཡིན་ནམ།
རང་ལུས་མེ་རུ་སྦར་ན་ཆེས་བླ་ན་མེད་པའི་ཡེ་ཤེས་ཤིག་བརྙེས་ཐུབ་བམ། རང་ལུས་མེ་རུ་སྦར་ན་མི་རིགས་ཤིག་གི་བདེན་མཐའ་གསལ་ཐུབ་བམ། རང་ལུས་མེ་རུ་སྦར་ན་མུན་ནག་ཅིག་ལ་རྫོགས་ཚིག་འབྲི་ཐུབ་བམ། རང་ལུས་མེ་རུ་སྦར་ན་མི་རབས་ཤིག་གི་སེམས་ཤུགས་སྤར་ཐུབ་བམ།
བསམ་འཆར་འདི་ལྟར་བཏོན་པ་ཐུགས་རྗེ་ཆེ།
སྤྱིར་འཆི་བ་ནི་སྐྱེ་འགྲོ་ཡོད་དོ་ཅོག་ལ་ཡོང་པ་ཀུན་གྱིས་ཤེས་ཀྱང་། རང་ལུས་མཆོད་མེ་དཔལ་འབར་རུ་སྒྲོན་ཐུབ་པའི་འཆི་བ་ནི་ལོ་རྒྱུས་ཐོག་རེ་ཟུང་ལས་མེད་པ་མ་ཚད། འདི་ནི་ལས་སླ་པོ་ཞིག་དང་། བྱེད་ཐུབ་ཐུབ་ཞིག་འཛམ་གླིང་ཟླུམ་པོ་འདི་ན་ཤིན་ཏུ་དཀོན། དཔེར་ན་ཝི་དི་ནམ་གི་རྒྱལ་ཁབ་དེ། ཡེ་ཤུ་མ་ཏི་ཀིའི་ཆོས་ལུགས་སུ་བསྒྱུར་ཆིས་བྱེད་པའི་སྐབས་སུ། ནང་པའི་དགེ་སློང་ནང་ནས་མཆོག་ཏུ་གྱུར་པའི་སྡེ་སྣོད་འཛིན་པ་ཆེན་པོ་ཞིག་གི། ཨ་རིའི་གཞུང་ཚབ་ཀྱི་མདུན་དུ་སྐུ་ལུས་མཆོད་མེ་སྦར་ནས་ཡེ་ཤུའི་ཆོས་ལུགས་མཚམས་འཇོག་བྱེད་པའི་ལོ་རྒྱུས་དེ་རྒྱུན་རིང་མིན།
ད་ལན་ཟླ་གསུམ་བཞིའི་ནང་དུ་གངས་ཅན་བོད་པའི་བཙུན་པ་རྣམས་ཀྱིས་སྐུ་ལུས་གཅིག་མིན་གཉིས་མིན་མཆོད་མེ་རུ་ཕུལ་བ་དེ། ཁོང་རྣམ་པའི་རྒྱབ་ཏུ་དབང་འཛིན་ཚུལ་རོལ་མཐོང་བ་པོ་ཞིག་གི་བསྐུལ་ནས་ནང་མི་སྤུན་ཉེ་ལ་བླ་བརྔན་སྤྲད་པའི་བསླུ་བྲིད་ངམ་གནག་ཡང་མིན་ལ། དྲག་ཏུ་འཁྱུར་བཞིན་པའི་ཀྲུང་གོ་དམར་པོ་ལ་ཁ་གཏད་གཅོག་པའི་བསམ་བློ་ཡང་མིན། འཇིག་རྟེན་འདིར་སྡོད་སྙིང་མི་སྤྲོ་ནས་ཆོས་ཀྱི་གནས་ལུགས་རྟོགས་པས་སྒོམ་ཆེན་པའི་སྐུ་ལུས་བཞིན་ན་ཚ་སྤང་ཟིན་པ་མིན་ལ། གཅིག་རྗེས་གཅིག་རྒྱུག་ལྟ་བུ་ལར་མེད་རི་བོང་གི་ཅར་འགྲོག་ལྟ་བུ་དེ་བས་ག་ལ་ཡིན། ཨོ་ཧོ། འདི་ནི་མི་རིགས་ཤིག་གི་བདེ་སྡུག་གཟན་པོ་ཁོག་ཏུ་མ་ཤོང་ནས་ལྐོགས་ཇུས་ངན་པས་ཧམ་བཤད་རྩུབ་པོ་ཉན་སྙིང་མི་འདོད་པ་དང་གཅིག
བོད་མི་རིགས་ཀྱི་བྱ་བ་ཡོད་ཚད་ལ་ཐེ་ཇུས་དང་གཉའ་གནོན་བཟོད་མི་ཐུབ་པའི་རྒྱལ་གཅེས་ཆོས་གཅེས་ཞེས་པའི་མིང་རྫུན་འོག་ནས་ཡོད་ཚད་སྲིད་དོན་དུ་བསྒྱུར་རྐྱང་བྱེད་པས། འདི་ཕྱི་གཉིས་ཀྱི་སྐྱབས་མགོན། བོད་མི་རིགས་སྐྱིད་དུ་རེ་ས་རྒྱལ་བ་ཐམས་ཅད་མཁྱེན་པ། བོད་མི་རིགས་ཀྱི་སྡུག་ཡུས་འཇོ་ས་རྒྱལ་བ་ཐམས་ཅད་མཁྱེན་པ། འཛམ་གླིང་སྐྱེ་འགྲོ་ཡོངས་ཀྱི་སེམས་ཀྱི་ཞི་བདེ་ལེན་ས། སྡུག་གི་ཁུར་པོ་གཏོར་ས། མཉམ་མཐུན་གྱི་འཛའ་འབྲེལ་མཐུད་ས་འཛམ་གླིང་ཞི་བདེའི་རྟགས་མ་བཞེས་ཉན། གོ་ལ་ཧྲིལ་པོ་འདི་ན་དཀོན་པའི་སྐྱེས་ཆེན་འདི་འདྲ་ཞིག་ལ་ཧམ་བཤད་དང་ལོག་སྒྲོག་མ་བཤད་ན་ཤོད་དུ་བཅུག་པ། བྱས་ན་བྱེད་མི་ཆོག་པའི་བཙན་བཀའ་གཏོང་བ་མ་ཚད། བཤད་པ་ལ་ཚོད་མེད་པའི་ལས་ཀ་གཏིང་ནག་པོ་བྱེད་དང་བྱེད་ཆེ་ནས་བྱུང་བའི་རྐྱེན་ལས་གཞན་པ་གང་ཡང་ཤོད་རྒྱུ་མེད། ད་ནི་འབོད་བསྐུལ་ཆེན་པོ་བྱེད་རན་པའི་དུས་སུ་སླེབ་འདུག
བཤད་རྒྱུ་འདུག་ལ་དངོས་ཡོད་ཀྱི་རྒྱུ་མཚན་སྟོན་རྒྱུ་འདུག བཙན་བྱོལ་དུ་ཡོང་པའི་དོན་གོ་འཛམ་གླིང་ལ་བོད་དོན་ཤོད་རྒྱུ་རང་ས་རང་ས་ནས་འགན་ཁུར་འཕྱི་མི་ཉན། ངང་རྒྱུད་མ་རིང་། བོད་པ་ཚོ་སློབ་སྦྱོང་ཡོད་ན་བད་སྤྱོད་བྱོས་ཤོག ད་རེས་མ་འཆུག བོད་གྲྭ་གཞོན་པ་སྐུ་ལུས་དཔལ་འབར་དུ་ཕུལ་བ་རྣམས་ཀྱིས་ཐུགས་དགོང་ངེས་པར་དུ་སྒྲུབ་ཐུབ་པ་བྱེད་དགོས། འཛམ་གླིང་ལ་རྣ་བ་ཡོད་ལ་རྒྱབ་སྐྱོར་བྱེད་ཉན་ཡང་ཡོད་ངེས་རེད།
འདི་ཚོར་མེད་དུ་ནམ་ཡང་ཞར་མི་ཉན། གངས་ཅན་པའི་གཅེན་པོ་ཚོ་རྡོག་རྩ་གཅིག་སྒྲིལ་མ་འཆུག ཡང་ཡང་འབོད་བསྐུལ་ཞུ་གི་ཡོད།
“གནད་དོན་གྱི་ཐོང་རྩ་ནས་འཇུས་ཏེ”་སྐད་ཆ་དམར་དམར་བོ་ཤོད་འདུག དངོས་གནས་རྩོམ་ཡིག་རིན་ཐང་ཅན་ཟེར་རྒྱུ་བོ་རེད། བཀའ་དྲིན་ཤིན་ཏུ་ཆེ། ཀླུ་སྨྱོན་ལགས།
ཀླུ་སྨྱོན་ལགས། དངོས་ནས་འུ་ཚང་གི་ལས་དབང་དང་འབྲེལ་བའི་དམར་པོའི་མེ་ལྕེ་ཡིས་འགུལ་ཤུགས་འདི་དག་བསམ་དུས། སེམས་པ་སྐྱོ་ནས་ཡོད།
གསུངས་པ་ལ་མངོན་པར་བསྟོད་དོ་ཞུ་རྒྱུ་ཡིན་ལ། རྩོམ་པ་པོ་རྒན་རབས་ཤིག་ཡིན་རབས་ཆོག་འདུག་ཨང་།
གཞན་ཡང་བོད་མི་རིགས་བསྟན་སྲིད་དང་བཅས་པའི་དོན་དུ་ལུས་སྲོག་ཚུན་ཆད་གཏོང་བའི་དམ་པ་ཁོང་རྣམ་པར་སྙིང་ཐག་པ་ནས་རྗེས་དྲན་དང་མཆོད་བསྟོད་ཞུ།
གཅེས་པའི་ལུས་སྲོག་ལོངས་སྤྱོད་ཡོངས་བཏང་སྟེ། །
དཀའ་བ་བརྒྱ་ཕྲག་བསྒྲུབས་པའི་སྐྱེས་བོ་རྣམས། །
གྲུ་འཛིན་མགོན་དེས་ཐུགས་རྗེས་སྐྱོང་བར་མཛོད། །
ངོ་མ། ཀླུ་སྨྱོན་ཧེ་རུ་ལགས། བཀའ་དྲིན་ཞུ།
སྤྱིར་མཆན་ཞིག་བཏབ་འདོད་ཡོད། གོང་གསལ་ནང་དོན་ལ་བསམ་ཞིག་དཔྱད་ཚེ། མིག་ཆུའི་ཐིག་པ་་་འཛུམ་ནོན་པང་ལེབ་སྟེང་དུ་འཐོར།
ད་འབྲི་ཐུབ་ཀྱིན་མི་འདུག གནས་སྐབས་མཚམས་འདི་ནས་འཇོག་དགོས་བྱུང་།
ཀླ་སྨྱོན་ཧེ་རུ་ཀ་ལགས་ཁྱེད་ཀྱི་རྩོམ་རིགས་གང་ལ་ཡང་གོ་བའི་འབྲས་བཟང་ཡོད་པ་ཤ་སྟག་ཡིན་པར་རྣམ་ཀུན་མཐོང་གིན་ཡོད། འདིར་ཡང་ལྷག་བསམ་བཟང་པོ་ཀུན་ནས་བླངས་པའི་རིག་རྩོམ་ཞིག་ཏུ་གྱུར་འདུག་པས། སྐུ་ཉིད་ལ་སྙིང་ནས་བཀྲིས་བདེ་ལེགས་གྲངས་མེད་ཞུ།
ངས་འདི་ནས་ཀླུ་སྨྱོན་ཧེ་རུ་ཀ་ལ་བཀའ་དྲིན་ཆེ་ཞུ་རྒྱུ་ཡིན།
སྐུ་ཉིད་ཀྱི་བརྩོམ་ཡིག་འདི་བརྗོད་བྱ་བརྗོད་བྱེད་གང་གི་ཐད་ནས་ཤིན་ཏུ་ལེགས་པོ་འདུག མ་ཟད་བརྩོམ་ཡིག་འདིས་སྐུ་ཉིད་ལྷག་བསམ་དང་ཤེས་རབ་གཉིས་ཀྱི་ཕྱག་འདུག་པ་ཤེས་ཐུབ།