གནས་ཚུལ་བཏང་འབྱོར་ལ། ༼ དཔལ་རྒྱལ་བ་ཇོ་ནང་པའི་གཞན་སྟོང་བགྲོ་གླེང་ཆེན་མོ་ཐེངས་བདུན་པ ༽ཞེས་པ་དེ་ཕྱི་ཟླ་ ༩ ཚེས་ ༢༨ ནས་དབུ་འཛུགས་ཀྱིས་ཉིན་བཅོ་ལྔ་རིང་མགོ་ལོག་གཙང་སྐོར་ཞོལ་མའི་དགོན་པ་བཀྲ་ཤིས་ཆོས་གླིང་དུ་འཚོགས་བཞིན་ཡོད་ཅིང་། སྤྱིར་ད་ལོའི་བགྲོ་གླེང་དེ་རྔ་པ་རྩི་ནང་དགོན་དཔལ་མི་འགྱུར་ངེས་དོན་བདེ་ཆེན་གླིང་དུ་འཚོགས་གཏན་ཁེལ་ཡོད་ཀྱང་། ད་ལྟའི་རྔ་ཡུལ་གྱི་གནས་སྟངས་དང་། རྒྱ་གཞུང་གིས་རྔ་ཡུལ་དགོན་སྡེ་ཐམས་ཅད་ལ་དྲག་གནོན་མུ་མཐུད་བྱེད་བཞིན་ཡོད་སྟབས། རྩི་ནང་དགོན་དུ་འཚོགས་མ་ཐུབ་པར་བཀྲ་ཤིས་ཆོས་གླིང་དགོན་དུ་འཚོགས་དགོས་བྱུང་ཡོད་པ་རེད།
ཐེངས་འདིའི་བགྲོ་གླེང་ཐོག་རྒྱལ་བ་ཇོ་ནང་པའི་དགོན་ཆེན་ཤར་འཛམ་ཐང་བསམ་གྲུབ་ནོར་བུའི་གླིང་དང་བསྭེ་དགོན་ཐུབ་བསྟན་ཕྱོགས་ལས་རྣམ་རྒྱལ་གླིང་། ལྕམ་མདའ་དགོན་ཐུབ་བསྟན་ངེས་དོན་ཆོས་འཁོར་གླིང་། ཡར་ཐང་དགོན་ངེས་དོན་བཤད་སྒྲུབ་གླིང་། ལུང་སྐྱ་དགོན་ངེས་དོན་མི་འགྱུར་བདེ་ཆེན་གླིང་། གཙང་བཀྲ་ཤིས་ཆོས་འཁོར་གླིང་སོགས་ཇོ་ནང་དགོན་ཆེན་བདུན་གྱི་གཙོས་ཇོ་ནང་དགོན་སྡེ་ ༧༠ ཙམ་གྱི་དགེ་འདུན་པ་ ༢༠༠༠ བརྒལ་བ་དང་། བླ་སྤྲུལ་མཁན་པོ་དགེ་བཤེས་སོགས་གནད་ཡོད་མི་སྣ་བརྒྱ་ཕྲག་ལྷག་མཉམ་ཞུགས་གནང་ཡོད་འདུག
བགྲོ་གླེང་ཐོག་དགོན་སྡེ་སོ་སོའི་བཤད་གྲྭ་བ་རྣམས་ཀྱིས་རྩོད་རྒྱུགས་དང་བློ་རྒྱུགས། འཆད་འཁྲིད་བཅས་ཀྱི་རྒྱུགས་སྤྲོད་མཛད་རྗེས། གཞུང་ཆེན་བཀའ་བོད་ལྔའི་ཐོག་བགྲོ་གླེང་ངམ་རྩོད་པ་ཕུལ་ཕྱིན་གནང་ཡོད་པ་དང་། ད་ཐེངས་ཀྱི་བགྲོ་གླེང་ཚོགས་ཆེན་འདིར་རྒྱ་སྒོར་འབུམ་བདུན་ ༧༠༠༠༠༠ གྱི་འགྲོ་གྲོན་དེ་དགོན་པ་རང་གི་ལྷ་སྡེ་གཙང་ཞོལ་མར་དུད་ཚང་གཅིག་སྟོང་ལྷག་ཡོད་པ་དེས་མཐུན་འགྱུར་ཁས་ལེན་ཞུས་ཡོད་འདུག
ཉིན་བཅོ་ལྔ་ལ་གྲྭ་བ་ཉིས་སྟོང་ལ་སྒོར་འབུམ་བདུན་ཡིན་ན་མང་པོ་མ་རེད། གྲ་བ་རེ་ལ་ཆ་སྙོམ་སྒོར་༣༥༠དང་ཉིན་རེར་ཆ་སྙོམ་སྒོར་༢༣་ལྷག་ཙམ་རེད།
བདག་གིས་ཤེས་འདོད་པ་གཅིག་ནི་ཇོ་ནང་བར་བོད་ཕྱི་ནང་གཉིས་བསྡོམས་ན་གྲྭ་བ་ཅི་ཙམ་ཡོད་པ་དང། བླ་ཆེན་དང་དགེ་བཤེས་ཅི་ཙམ་ཡོད་པ་དེ་ཡིན།
མདོ་རྒྱུད་གཞན་དང་བཤད་སྲོལ་མི་མཚུངས་པའི། །
ཕྱི་ནང་གཞན་གསུམ་དུས་ཀྱི་འཁོར་ལོ་ཡི།།
ལུངས་་རྟོགས་བཀའ་བབས་བུ་ཇོ་ལུགས་ཟུང་གི།
གངས་ལྗོངས་རྒྱལ་བསྟན་ཡུན་རིང་འབར་གྱུར་ཅིག།
༡༽ བགྲང་ཡས་བསྐལ་བར་ཐུགས་བསྐྱེད་ལེགས་གོམས་པས།།
མཐའ་ཡས་འགྲོ་བའི་རེ་སྐོང་དམ་ཆོས་ཆར།།
འབེབས་མཁས་མཉམ་མེད་ཤཱཀྱའི་དབང་པོ་ཡིས།།
འགྲོ་འདི་དགེ་ལེགས་དཔལ་གྱིས་བསྐྱང་དུ་གསོལ།།
༢༽ རིམ་གསུམ་ཆོས་ཀྱི་འཁོར་ལོའི་དགོངས་པའི་དོན།།
མཁས་དང་གྲུབ་བརྙེས་དུ་མས་བཀྲལ་བ་ལས།།
ཆོས་ཀྱི་སྒོ་མང་རབ་དབྱེའི་ཡ་གྱལ་གཅིག།
ཇོ་ནང་པ་ཡི་བསྟན་པ་རྒྱས་གྱུར་ཅིག།
༣༽ གངས་ལྗོངས་རྒྱལ་བསྟན་པདྨའི་ཚལ་ཡངས་པོར།།
བཤད་སྒྲུབ་ཆོས་ཚུལ་འདབ་བརྒྱ་གྲོལ་བའི་ཁྲོད།།
འཁོར་ལོ་ཐ་མའི་དགོངས་པ་རྩལ་བཏོན་པའི།།
ཇོ་ནང་པ་ཡི་བསྟན་པ་རྒྱས་གྱུར་ཅིག།
༤ ༽ མདོ་རྒྱུད་གཞན་དང་བཞད་སྲོལ་མི་འདྲ་བའི།།
ཤིང་རྟའི་སྲོལ་ཆེན་དུས་ཀྱི་འཁོར་ལོའི་རྒྱུད།།
མི་ཉམས་འཛིན་ཅིང་སྤེལ་བའི་བཀའ་བབས་པ།།
ཇོ་ནང་པ་ཡི་བསྟན་པ་རྒྱས་གྱུར་ཅིག།
༥༽ ཡུ་མོ་མི་བསྐྱོད་རྡོ་རྗེ་ནས་བཟུང་སྟེ།།
དོལ་བུ་བ་དང་ཀུན་དགའ་གྲོལ་བའི་མཆོག།
རྗེ་བཙུན་སྒྲོལ་མགོན་སོགས་ཀྱིས་ལེགས་སྤེལ་བའི།།
ཇོ་ནང་པ་ཡི་བསྟན་པ་རྒྱས་གྱུར་ཅིག།
༦ ༽ སྙིང་པོའི་མདོ་དང་ཀླུ་སྒྲུབ་གཞུང་གི་དོན།།
གཞི་འབྲས་དབྱེར་མེད་རྟག་བརྟན་བདེ་གཤེགས་སྙིང༌།།
ཡེ་ནས་བཞུགས་པའི་དོན་དམ་འགྲེལ་བའི་ཚུལ།།
ཇོ་ནང་པ་ཡི་བསྟན་པ་རྒྱས་གྱུར་ཅིག།
༧༽ མདོ་ཡི་ལྟ་བ་གཞན་སྟོང་དབུ་མ་དང༌།།
རྒྱུད་དོན་རྣལ་འབྱོར་དྲུག་གི་ཉམས་ལེན་གྱིས།།
ཆོས་སྐུ་མངོན་དུ་མཛད་པའི་བཞེད་སྲོལ་ཆེ།།
ཇོ་ནང་པ་ཡི་བསྟན་པ་རྒྱས་གྱུར་ཅིག།
༨ ༽ སྐྱབས་གནས་རྒྱལ་དང་རྒྱལ་སྲས་བྱིན་ཆེན་དང༌།།
ཆོས་ཉིད་དོན་དམ་འགྱུར་བ་མེད་པའི་སྟོབས།།
དཀར་ཕྱོགས་ལྷ་དང་བདག་ཅག་མོས་གུས་མཐུས།།
སྨོན་ལམ་འདི་བཏབ་ཇི་བཞིན་འགྲུབ་པར་ཤོག།
ཅེས་པ་འདི་ཡང་ཇོ་ནང་པའི་བསྟན་རྒྱས་སྨོན་ལམ་གསོལ་འདེབས་ཤིག་དགོས་ཞེས་མཁན་པོ་ངག་དབང་རྡོ་རྗེས་གཙོས་གཞིས་བྱེས་ཇོ་ནང་པ་སེར་སྐྱ་མི་མང་ཐུན་མོང་ནས་རྟེན་བཅས་བསྐུལ་བ་ལྟར་ཤཱཀྱའི་དགེ་སྦྱོང་བསྟན་འཛིན་རྒྱ་མཚོས། བོད་རྒྱལ་ལོ་ ༢༡༢༨ རབ་བྱུང་བཅུ་བདུན་པའི་ལྕགས་སྦྲུལ་ཟླ་ ༡༠ ཚེས་ ༨ ཕྱི་ལོ་ ༢༠༠༡ ཟླ་ ༡༡ ཚེས་ ༢༣ ཉིན་འཕགས་ཡུལ་ཧི་མ་ཅལ་མངའ་སྡེ་ཀང་ར་རྫོང་ཁོངས་དྷ་རམ་ས་ལ་ཐེག་ཆེན་ཆོས་གླིང་དུ་བྲིས་པ་དེ་དེ་བཞིན་དུ་འགྲུབ་པར་གྱུར་ཅིག།
དུས་བབ་རྩོམ་སྒྲིག་པར་ཐུགས་རྗེ་ཆེ་ཞུ་བ་དང་སྦྲགས། ཀློག་མཁན་རྣམ་པར་གསལ་བཤད་ཚིག་གཅིག་ཞུ་འདོད་བྱུང་།
གཞན་སྟོང་བགྲོ་གླེང་ཆེན་མོའི་སྐབས་ཀྱི་སྦྱིན་བདག་གཙང་སྐོར་ཞོལ་མའི་སྲས་མཆོག་ཚང་ནང་མི་གཅིག་པོ་རེད། ཡིན་ན་ཡང་གཙང་ཞོལ་མའི་སྡེ་བ་ཡོངས་ཀྱིས་མཐུན་འགྱུར་ཞུས་པ་རེད་ཅེས་བཤད་ན་མ་འགྲིག་པ་མེད་པར་མངོན།
གཡག་རོག་ལགས་ཀྱིས་གསུང་པ་བདེན་པ་རེད་མོད། མི་ཁྱིམ་འབྱོར་ལྡན་རྣམས་ཀྱིས་དགེ་འདུན་པའི་སྡེ་ལ་འཚོ་བ་སྦྱོར་རྒྱུའི་ལུགས་སྲོལ་བཟང་པོ་དེ་སྔོན་སྟོན་པ་ཞལ་བཞུགས་པའི་སྐབས་ནས་ཡོད་པ་རེད། དཔེར་ན་ཁྱིམ་བདག་མགོན་མེད་ཟས་སྦྱིན་གྱིས་ཀུན་དགའ་ར་བ་བཞེངས་ཏེ། དགེ་འདུན་ལྔ་སྟོང་ལྷག་ལ་འཚོ་བ་སྦྱར་བ་ལྟ་བུ་རེད།
ད་དུང་གཞན་སྟོང་བགྲོ་གླེང་འདིའི་སྐབས་ཀྱི་སྦྱིན་བདག་ཆེན་མོ་སྲས་མཆོག་ཚང་གིས་རང་ངོས་དང་ལེན་ཞུས་ཏེ། སྦྱིན་བདག་ཞུ་ཆོག་པའི་རེ་སྐུལ་ཞུས་པ་དགེ་འདུན་པས་ཞལ་བཞེས་གནང་བ་ཞིག་ཡིན་པ་ལས། དེང་དུས་ཀྱི་དགོན་སྡེ་ཕལ་མོ་ཆེའི་སྦྱིན་བདག་འཚོལ་སྟངས་ལྟར། གོ་རིམ་དང་དམིགས་ཡུལ་ངེས་ཅན་ཅི་ཡང་མེད་ལ། སྦྱིན་བདག་སྲས་མཆོག་ནང་མིས་ཀྱང་ལན་དང་རྣམ་སྨིན་ལ་མི་རེ་བའི་ཐོག་ནས་ལྷག་བསམ་རྣམ་དག་གིས་དད་པའི་མཆོད་སྤྲིན་བསྟར་བ་ཡིན་པས། འདི་ལས་ལྷག་པའི་ཀུན་རྫོབ་རྣམ་དཀར་གྱི་དགེ་བ་ཞིག་གཞར་ཡང་མེད་དོ༎
རྗེས་སུ་ཡི་རང་ཞུ། སངས་རྒྱས་བསྟན་པ་དར་ཞིང་རྒྱས་པར་ཤོག
བོད་གངས་རིའི་ཁྲོད་དུ་འཁོར་ལོ་བར་པའི་དགོངས་རྩལ་དུ་གཏོང་ནས་འཆད་ཉན་བྱེད་མཁན་མང་མོད། འཁོར་ལོ་ཐ་མའི་དགོངས་པ་རྩལ་དུ་གཏོང་ནས་འཆད་མཁན་དེ་ནི་གཙོ་བོ་༧དཔལ་རྒྱལ་བ་ཇོ་ནང་པ་གཅིག་པུ་ཡིན། དེའི་ཕྱིར་བར་ལམ་དབུས་ཕྱོགས་ཉམས་ཆགས་ཆེ་རུང་མདོ་སྨད་ཕྱོགས་འདིར་གང་འཚམས་དར་རྒྱས་ཡོད་པ་ནི་ཆེས་དགའ་འོས་པའི་དོན་བཟང་ཞིག་ཡིན། ལུགས་འདི་ནི་བོད་རྒྱུད་ནང་བསྟན་གསེར་གྱི་མཆོད་སྡོང་མཛེས་པར་བྱེད་པའི་ཕྲ་ཚོམ་དུ་ཤེས་དགོས་ལ། ངེས་དོན་དབུ་མ་ཆེན་པོ་ཕྱོགས་ཀུན་དུ་དར་ཞིང་རྒྱས་པའི་སྨོན་འདུན་དང་བཅས།
གཞན་སྟོང་ཆེན་མོར་བགྲོ་གླེང་གནང་བ་གལ་ཆེན་རེད་ལ་དེ་ལས་ཀྱང་ཆོས་ཆོས་སུ་འགྲོ་ཆེན་སྦྱིན་བདག་ཚོར་དཀའ་ལས་མ་གཏད་ན་བཟང་ གདན་ས་ཁག་འཚོག་དུས་་གྲག་་ཚོགས་ཆིག་ཁྲིར་ཉེ་བ་བྱུང་གི་ཡོད་ཀྱང་འགྲོ་སོང་ཅི་ཡང་ཡོད་པ་མ་རེད། དཔལ་འབྱོར་གྱི་རྒྱས་སྤྲོས་འདི་ངོམ་འོས་པ་ཞིག་དང་ངོམ་རིན་ཆོག་པ་ཞིག་མ་རེད
ཇོ་ནང་ཆོས་འབྱུང་ཆེན་མོ་ཟླ་བའི་འོད་ཟེར་ལན་འགར་བཀླགས་པའི་རྗེས་ནས་བཟུང་དཔལ་རྒྱལ་བ་ཇོ་ནང་པའི་བསྟན་པ་ལ་མི་ལྡོག་པའི་དད་པ་བརྟན་པོ་ཞིག་རྙེད་སོང་། ཁོང་དག་ལ་ཆོས་བརྒྱུད་ཀྱི་ཐོབ་ཐང་གང་མྱུར་ཐོབ་པའི་སྨོན་འདུན་དང་བཅས།
ཉིན་བཅོ་ལྔ་རིང་ལ་རྒྱ་སྒོ་ཁྲི་བདུན་བཅུའི་འགྲོ་གྲོན་བཏང་ཡོད་ན་ཧ་ལས་དགོས་པའི་གྲ་རྒྱས་པོ་ཞིག་བྱུང་ཡོད་ཐག་ཆད་རེད།