གཞོན་ནུ་ཚོགས་པར་ཞུཊ་རོཊ།

དེ་རིང་གངས་སྐྱིད་དུ་བོད་ཀྱི་གཞོན་ནུ་ལྷན་ཚོགས་དབུ་བརྙེས་ཏེ་མི་ལོ་ ༤༢ འཁོར་བའི་དུས་དྲན་སྲུང་གཙི་བྱས་ཏེ། ངྷ་ས་ས་གནས་གཞོན་ནུའི་ཚོགས་གཞོན་བསྟན་འཛིན་བརྩོན་འགྲུས་ལགས་ཀྱིས་བོད་པ་གང་མང་གཞོན་ནུའི་ཚོགས་ཁོངས་སུ་ཞུགས་རོགས་ཟེར།

དེ་རིང་ཕྱི་ཚེས་ ༧ ཉིན་གྱི་ཕྱི་དྲོའི་ཆུ་ཚོད་ ༤ པའི་སྟེང་གངས་སྐྱིད་སྤོ་ལོ་རྩེད་ཐང་དུ། བོད་ཀྱི་གཞོན་ནུ་ལྷན་ཚོགས་དབུ་བརྙེས་ཏེ་ཁྱོན་མི་ལོ་ཧྲིལ་པོ་ ༤༢ འཁོར་བའི་དུས་དྲན་སྲུང་གཙི་བྱས་ཡོད་ཅིང་། མཛད་སྒོེར་བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་གཙོས་པའི་གཞོན་ལྷན་གྱི་ཚོགས་གཙོ་ཟུར་པ་རྣམ་པ་དང་། རྒྱུན་ལས། ས་གནས་མི་མང་བཅས་ཁྱོན་མི་ ༢༥༠ ལྷག་འདུ་འཛོམས་བྱུང་སོང་ལ། མཛད་སྒོའི་ཐོག་མར་ས་གནས་གཞོན་ནུའི་ཚོགས་གཙོ་བསྟན་འཛིན་བརྩོན་འགྲུས་ལགས་ཀྱིས། གཞོན་ལྷན་གྱི་འདས་པའི་ལོ་རྒྱུས་དང་བྱས་རྗེས་སོགས་མང་ཚོགས་ལ་ངོ་སྤྲོད་དང་སྦྲགས། མ་འོངས་པར་བོད་པ་གང་མང་མང་གཞོན་ལྷན་སྒྲིག་འཛུགས་ནང་འཛུལ་ཞུགས་དགོས་པའི་འབོད་སྐུལ་ཞུས་པ་མ་ཟད། ས་གནས་གཞོན་ནུ་ཁག་གི་ལས་འགུལ་གྱི་ནུས་ཤུགས་ཆེ་རུ་གཏོང་ཆེད། མི་འགྱང་བར་ནོར་གླིང་གཙོས་པའི་ས་གནས་ཁག་ཅིག་ཏུ་གཞོན་ལྷན་ས་གནས་ཡན་ལག་གསར་འཛུགས་རྒྱུ་ཡིན་སྐོར་བརྗོད་སོང་།

དེའི་རྗེས་དབུས་བོད་ཀྱི་གཞོན་ནུ་ལྷན་ཚོགས་ཚོགས་གཞོན་དོན་གྲུབ་ལྷ་དར་ལགས་ཀྱིས་དུས་དྲན་སྲུང་གཙིའི་གནས་ཚུལ་སྒྲོག་སྦྱང་གནང་ཡོད་ཅིང་། བསྒྲགས་ཡིག་དེའི་ནང་།  “ བོད་ཀྱི་གཞོན་ནུ་ལྷན་ཚོགས་ཀྱིས་ལོ་ངོ་ ༤༢ རིང་བོད་རང་བཙན་སླར་གསོའི་འཐབ་རྩོད་རྒྱུན་འཆང་མདུན་སྐྱོད་དང་དམངས་གཙོ་གོང་འཕེལ། ཆོས་རིག་སྲུང་སྐྱོབ། སྤྱི་ཚོགས་ཞབས་ཞུ། བོད་མིའི་རྡོག་རྩ་གཅིག་སྒྲིལ་སོགས་ཀྱི་ཐད་རླབས་ཆེན་གྲུབ་འབྲས་མི་དམན་པ་བཞག་ཡོད་པ་ནི། མང་ཚོགས་ཀྱི་རྒྱབ་སྐྱོར་དང་བཙན་བྱོལ་གཞུང་གི་རང་དབང་དམངས་གཙོའི་ཁོར་ཡུག གཞོན་ལྷན་དབུས་སའི་རྒྱུན་ལས་དང་ཚོགས་མི་ཚོའི་འབད་བརྩོན་ལ་བརྟེན་ནས་བྱུང་བ་ཞིག་ཡིན་ཞིང་། དེ་ནི་ང་ཚོ་ཐུན་མོང་གི་གཟི་བརྗིད་དང་རིན་ཐང་ཡིན་སྟབས་མུ་མཐུད་ནས་གཅེས་སྤྲས་རྩོད་ལེན་གནང་དགོས།  ” ཞེས་འཁོད་འདུག

བསྒྲགས་ཡིག་ནང་མུ་མཐུད་དུ།  “ ལོ་མི་ཞེ་གཉིས་རིང་དགྲ་བོའི་བཙན་འཛུལ་གཉའ་གནོན་འོག་གཞིས་ལུས་སྤུན་ཟླའི་རྒྱལ་ཞེན་སྙིང་སྟོབས་ལ་འགྱུར་བ་མེད་པར། བོད་རྒྱལ་ཁབ་སླར་གསོའི་འཐབ་རྩོད་རྒྱུན་འཆང་གནང་བ་མ་ཟད། ལྷག་པར་དུ་  ༡༩༨༧ ནས་དབུ་བཙུགས་ཏེ། ༢༠༠༨ ལོ་ནས་གངས་ཅན་མི་རབས་གསར་པ་ཚོས་རང་གི་རྒྱལ་ཁབ་ཀྱི་བདག་དབང་དང་། བླ་ན་མེད་པའི་དབུ་ཁྲིད་ལ་གུས་བཀུར་བྱས་ཐོག་བོད་རང་བཙན་སླར་གསོའི་འཐབ་རྩོད་ཚད་མཐོར་གཏོང་འདོད་གནང་བ་ནི། ང་ཚོ་གངས་ཅན་པའི་གཟི་བརྗིད་དང་མདུན་ལམ་གྱི་འོད་ཟེར་ཡིན་ཞིང་། འདི་ལོར་དེ་བས་ཀྱང་བོད་རྔ་པ་དང་དཀར་མཛེས་སོགས་བོད་ཀྱི་ས་ཁུལ་མང་ཆེ་བར། རྒྱལ་གཅེས་དཔའ་པོ་དཔའ་མོ་ཚོས་རླབས་ཆེན་གྱི་ཞི་བའི་ལས་འགུལ་སྣ་མང་སྤེལ་བཞིན་ཡོད་ལ། དེ་དག་ནི་རྒྱ་ནག་གི་དབང་བསྒྱུར་དེ་བོད་ལ་དགོས་མཁོ་མེད་པའི་བཙན་ཤེད་ཀྱི་དབང་སྒྱུར་ཞིག་ཡིན་པ་གསལ་པོར་བསྟན་པ་རེད།  ” ཅེས་འཁོད་འདུག

མཐའ་མར་བསྒྲགས་ཡིག་དེར།  “ ང་ཚོའི་འགྱུར་བ་མེད་པའི་རྟག་བརྟན་གྱི་སྟོབས་ཤུགས་ནི། ལོ་རྒྱུས་ཀྱི་བདེན་དབང་དང་བླ་ན་མེད་པའི་དབུ་ཁྲིོད། རང་གཞུང་ལ་གུས་བཀུར་དང་ཡིད་ཆེས། བོད་ཀྱི་ངོ་བོ་སྲུང་སྐྱོབ། བོད་མིའི་ཆོག་སྒྲིལ་གྱི་ནུས་པ་བཅས་ཡིན་པས་དེ་དག་རྩ་འཛིན་གཅེས་སྤྲས་བྱ་རྒྱུ་ཧ་ཅང་གལ་ཆེ་ལ། ལྷག་པར་དུ་གཞོན་སྐྱེས་ཚོས་ཆོད་སེམས་དང་ཁ་ཕྱོགས་མ་ནོར་བར་མི་ཚེ་མདུན་སྐྱོད་དང་མི་ཚེའི་རིན་ཐང་འཚོལ་དགོས་ཤིང་། དེའི་ཆེད་དུ་གནའ་དེང་ཤེས་ཡོན་སློབ་སྦྱོང་དང་། བོད་དང་རྒྱལ་སྤྱིའི་ལོ་རྒྱུས་ལ་སློབ་སྦྱོིང་བྱས་ཏེ། རང་ཉིད་སུ་ཡིན་པ་དང་། གང་དུ་ཡོད་པ། མ་འོངས་པར་ཇི་ལྟར་བསྒྲུབ་དགོས་མིན་ངོས་འཛིན་དང་ཁ་ཕྱོགས་གསལ་པོ་བཟོ་དགོས་རྒྱུ་དག་ནི། ང་ཚོ་ཐུན་མོང་གི་ལས་འགན་ཆགས་ཡོད  ” ཅེས་འཁོད་འདུག

མཇུག་ཏུ་བཀའ་ཟུར་བསོད་ནམས་སྟོབས་རྒྱལ་མཆོག་གིས་གཞོན་ལྷན་རྒྱུན་ལས་རྣམས་ཀྱི་ལྷག་བསམ་དང་སྙིང་སྟོབས་ལ་བསྟོད་བསྔགས་དང་འབྲེལ། མ་འོངས་པར་ཡང་འབྲེལ་ཡོད་ལས་བྱེད་ཚང་མས་མུ་མཐུད་བོད་རང་དབང་ཆེད་འབད་བརྩོན་གནང་དགོས་སྐོར་གྱི་འབོད་སྐུལ་བཅས་ཞུས་སོང་།  

མཛད་སྒོ་གྲུབ་རྗེས་ས་གནས་གཞོན་ནུའི་གོ་སྒྲིག་ལྟར། ཉེ་ལམ་ནས་གངས་སྐྱིད་སྤོ་ལོ་རྩེད་ཐང་དུ་རྩེ་བཞིན་པའི་ཕོའི་རུ་ཁག་ངྷ་ས་རུ་ཁག་དང་འབྲོག་པ་རུ་ཁག་དང་། མོའི་རུ་ཁག་ཤེས་རབ་དགའ་ཚལ་སློབ་གླིང་རུ་ཁག་དང་སུ་ཇཱ་བོད་ཁྱིམ་རུ་ཁག་གཉིས་ཀྱིས། ཐེངས་འདིའི་ལག་རྩེད་སྤོ་ལོའི་འགྲན་བསྡུར་གྱི་མཐའ་མའི་རྟིང་རྩོད་འགྲན་བསྡུར་དེ་མགོ་འཛུགས་གནང་སོང་།

བོད་ཀྱི་གཞོན་ནུ་ལྷན་ཚོགས་ནི་གཞུང་འབྲེལ་མིན་པའི་ཚོགས་པ་ཆེ་ཤོས་ཤིག་ཡིན་ལ། ཚོགས་པ་འདིར་ད་ཆར་འཛམ་གླིང་གང་སར་ཚོགས་མི་ ༢༠༠༠༠ ལྷག་ཡོད་འདུག

གསར་འགོད་པ། དཔལ་ལྡན།