ཤར་ཕྱོགས་ཁུག་རྟ།
བོད་ཐོག་རྒྱ་ནག་གིས་འཛིན་པའི་སྲིད་བྱུས་ལ་བོད་མི་རྣམས་ཀྱིས་བདེན་པའི་ལས་འགུལ་སྤེལ་ཐེངས་རེར། རྒྱ་ནག་གཞུང་གིས་དེ་ནི་ཏཱ་ལ་དང་ཏཱ་ལའི་རུ་ཚོགས་ཀྱིས་ངན་སྐུལ་ཇུས་འགོད་བྱས་པ་ཡིན་པར་བསྒྲགས་རྒྱུར་ཐེ་ཚོམ་དང་ངོ་ཚ་གང་ཡང་མེད་པས། ལས་འགུལ་ནམ་བྱུང་སྐབས་རྒྱ་ནག་གཞུང་གིས་ག་རེ་བརྗོད་ངེས་པ་ནི་བཙན་བྱོལ་བོད་མི་གད་པ་ཚུད་ཆད་ཀྱིས་ཚོད་དཔག་ཐུབ་ཀྱི་ཡོད། ལོ་འདིའི་ཟླ་ ༣ ཚེས་ ༡༦ ནས་བྱུང་བའི་རང་ལུས་མཆོད་མེར་སྒྲོན་ནས་བོད་ཀྱི་རང་དབང་རྩོད་མཁན་ཚོ་ལའང་དེ་བཞིན་༧གོང་ས་མཆོག་དང་བོད་མིའི་སྒྲིག་འཛུགས་ཀྱིས་རྒྱུད་སྐུལ་བྱས་པར་བསྒྲགས་ཡོད། དེ་ནི་རྒྱ་ནག་གཞུང་གི་སྐྱག་རྫུན་ཁུངས་མེད་ཀྱི་རིག་པ་གསར་བ་གང་ཡང་མིན་སྟེ། ༨༩ ལོར་ལྷ་སར་ཞི་རྒོལ་བྱུང་དུས་དང༌། ༢༠༠༦ ལོར་སྐུ་འབུམ་དུ་བོད་མི་སྡེབས་འཛོམས་བྱུང་སྐབས། ༢༠༠༨ ལོ་ནས་ཞི་བའི་ངོ་རྒོལ་ཆེན་མོ་བྱུང་དུས་སོ་སོར་རྒྱ་ནག་གཞུང་གིས། དེ་རིང་ནང་བཞིན་༧གོང་ས་མཆོག་དང་སྒྲིག་འཛུགས་ཀྱིས་ཇུས་བཀོད་བྱས་ཚུལ་གྱི་ཁྱབ་བསྒྲགས་རྫུན་མས་རང་ངོ་རུལ་སུངས་འགེབ་ཐབས་བྱས་ཡོད།
དེང་རྒྱལ་སྤྱིའི་ནང་ཨ་རི་དང་ཡུ་རོབ། དེ་བཞིན་རྒྱ་གར་དང་ཉི་ཧོང༌། ཐའེ་ཝན་བཅས་ཀྱི་ཡུལ་ལུང་སོ་སོ་རྒྱ་ནག་གཞུང་གི་སྐྱག་རྫུན་བཤད་སྟངས་ལ་གད་མོ་ཤོར་ནས་སྡོད་པའི་སྐབས་ཡིན་པས། ཁོང་ཚོས་འདི་ལྟར་རང་ལུས་མེར་བསྲེགས་ཀྱི་ལས་འགུལ་༧གོང་ས་མཆོག་དང་སྒྲིག་འཛུགས་ཀྱིས་ཇུས་གཞི་བཏང་ཚུལ་བསྒྲགས་ཀྱང་ཡིད་ཆེས་བྱེད་མཁན་ནམ་མཁའི་མེ་ཏོག་གི་སྤུན་ཡིན་ཡང༌། ཆེན་པོ་རྒྱ་ནག་གི་ཤེས་ལྡན་གཟུར་གནས་ཅན་རྣམས་དང༌། མི་མང་གང་འཚམས་ཞིག་ལ་གནས་སྐབས་གསལ་ཆ་མ་བྱུང་བའི་དཀའ་ངལ་འཕྲད་སྲིད་པ་ལས། དོན་དངོས་པོར་རྒྱ་ནག་དམར་ཕྱོགས་གཞུང་འཛིན་ཚོགས་པས་རང་གིས་རང་ཉིད་གསོད་བཞིན་པའི་གོམ་སྟབས་སུ་འགྱུར་བཞིན་ཡོད།
ཡིད་སྐྱོ་དགོས་པ་ཞིག་ལ། དྲམ་བསྒྲགས་དང་མེ་མདས་ཐག་ཆོད་ཐབས་མེད་པའི་བོད་ཐོག་འཛིན་པའི་སྲིད་བྱུས་ལམ་དུ་མ་ལྷོངས་བར་རྒྱ་ནག་གཞུང་རང་ཡང་འ་ཆད་འུ་ཐུག་སྟེ། རྒྱ་གཞུང་ཕྱི་དྲིལ་ལས་ཁུངས་ཀྱི་མགྲིན་ཚབ་པ་ལིའུ་ཝེ་མིན་གྱིས་རྒྱ་ནག་གཞུང་འབྲེལ་གྱི་རྒྱུན་ལྡན་གསར་འགོད་གསལ་བསྒྲགས་ཞིག་གི་ཐོག་ཏཱ་ལའི་རུ་ཚོགས་ཀྱི་ཚོགས་མི་ཚོས་བོད་ནང་རང་ལུས་མེར་བསྲེགས་ཀྱི་ངོ་རྒོལ་བྱས་པའི་གནས་ཚུལ་དེ་དག་ལ་སྐྱོན་བརྗོད་མ་བྱས་པ་མ་ཟད། ད་དུང་དེ་རིགས་ཀྱི་གནས་ཚུལ་མང་དུ་ཡོང་ཆེད་འཛམ་གླིང་གང་སར་དྲིལ་བསྒྲགས་བྱེད་བཞིན་ཡོད་པ་རེད་ཟེར། སྐད་ཆ་འདི་དོན་དངོས་བྱས་ན། ༧གོང་ས་མཆོག་དང་བོད་མིའི་སྒྲིག་འཛུགས་ཀྱི་ཆེ་མཐོང་སློང་མོ་བརྒྱབ་སྟེ་བོད་ནང་ཞི་འཇགས་བཏང་འདོད་པས་ཡིན་ཞིང༌། རྒྱལ་སྤྱིའི་ཁ་མིག་ཡོད་ཚད་རྒྱ་ནག་དམར་ཤོག་གཞུང་འཛིན་ཚོགས་པའི་སྟེང་བཙུགས་བཞག་པ་ཅུང་ཙམ་གཡོལ་ཐབས་ལོས་ཡིན་ཀྱང༌། ༧གོང་ས་མཆོག་དང་སྒྲིག་འཛུགས་ཀྱིས་ཅིའི་ཕྱིར་ཁོང་ཚོ་སྐྱོན་བརྗོད་བྱ་འོས་སམ།
ཁོང་ཚོས་བོད་མིའི་རང་དབང་རང་སྲོག་བློས་གཏོང་གིས་རྩོད་བཞིན་པ་ནི། ༧གོང་ས་མཆོག་དང་སྒྲིག་འཛུགས་ཀྱིས་འཛམ་གླིང་ལ་དྲིལ་བསྒྲགས་བྱེད་བཞིན་པའི་བོད་ཀྱི་དཀའ་ངལ་ར་སྤྲོད་བྱས་པ་ཞིག་ཡིན་ལ། རང་སྲོག་བློས་བཏང་བ་དག་གིས་ཁ་ཕྲལ་མིན་ལ། ཆོས་དད་རང་དབང་དང་༧གོང་ས་མཆོག་བོད་དུ་གདན་འདྲེན་ཞུ་དགོས་པ། བོད་ལ་རང་དབང་དགོས་པ། འགྲོ་འདུག་རང་དབང་དགོས་པ། སྨྲ་བརྗོད་རང་དབང་དགོས་པ། རྩོམ་འབྲི་ཁྱབ་སྤེལ་གྱི་རང་དབང་སོགས་ཀྱི་ཆེད་འཚེ་མེད་ཞི་བ་ལུས་སྲོག་ལོངས་སྤྱོད་བློས་གཏོང་གི་ལམ་ནས་སྒྲུབ་པ་འདི། རྒྱ་ནག་གཞུང་གི་རྩ་ཁྲིམས་དང་བཅའ་སྒྲིག་ཁག་དང་ཅུང་ཙམ་ཡང་འགལ་མེད་ལ། ༢༠༠༨ ལོར་སྤྲད་པའི་བོད་མིའི་རང་སྐྱོང་ཡོང་ཐབས་ཀྱི་བསམ་འཆར་དང་གཅིག་མཚུངས་ཆགས་ཡོད་པས། བོད་མིའི་མངོན་འདོད་གང་ཡིན་པ་དེའི་མགྲིན་ཚབ་བྱེད་པའི་བཙན་བྱོལ་བོད་མི་ཚོས་ཁོང་ཚོའི་བློས་གཏོང་གཏན་འགོག་བྱེད་པ་དང༌། ཡང་ན་རྒྱ་ནག་གཞུང་གི་རེ་བ་ལྟར་སྐྱོན་བརྗོད་བྱེད་པའི་གཞི་རྩ་གང་དུ་སྲིད་དམ།
ད་དུང༌། ལིའུ་ཝེ་མིན་གྱིས་ཏཱ་ལའི་རུ་ཚོགས་ཀྱིས་གནས་ཚུལ་དེ་ཚོར་སྒྲོ་བཏགས་པ་དང་དཀྲོགས་གཏམ་བཟོས་ཏེ་སྤེལ་བ་མ་ཟད། ད་དུང་བོད་མི་གཞན་རྣམས་ལ་སྐུ་ལུས་མེར་བསྲེགས་གཏོང་དགོས་པའི་སྐུལ་འདེད་བྱེད་ཀྱི་ཡོད་པ་རེད་ཅེས་དཔང་རྟགས་གང་ཡང་མེད་པར་བྱུང་རྒྱལ་དུ་བཤད་འདུག བོད་ནང་གནས་ཚུལ་གང་བྱུང་བ་རྣམས་རྒྱལ་སྤྱིའི་བརྒྱུད་ལམ་ཁག་གང་ཞིག་ཏུ་ཚུལ་ཅི་ལྟར་སྒྲོ་བཏགས་མིན་མྱུར་ཏུ་གསར་འགོད་གསལ་བསྒྲགས་ཀྱི་ལམ་ནས་སྤེལ་སྟེ་དབུས་བོད་མིའི་སྒྲིག་འཛུགས་ངོ་ཚ་ཁ་སྐྱེངས་མི་བཟོ་བར། གང་དུ་སྒྲོ་བཏགས་པ། སྣོན་པ་བརྒྱབ་པ་རྣམས་སྐོང་དགོས་དོན་ཁྱོན་ནས་མི་འདུག་ལ། རྒྱ་ནག་གཞུང་གིས་ད་ཐེངས་དཔང་རྟགས་ཚད་ལྡན་གྱིས་བོད་མིའི་སྒྲིག་འཛུགས་དང་༧གོང་ས་མཆོག་ཐེངས་གཅིག་རྒྱལ་སྤྱིའི་སྟེང་ངོ་ཚ་ཁ་སྐྱེངས་བཟོ་ཐུབ་ན། བོད་མི་རྣམས་ཀྱིས་མི་ལོ་མང་པོར་བསགས་པའི་ཤ་འཁོན་རྣམས་བརྗེད་དུ་འཇུག་ཐུབ་ངེས་ཡིན།
ལིའུ་ཝེ་མིན་གྱིས་ད་དུང༌། བོད་མིའི་རང་ལུས་མེར་བསྲེག་བཏང་སྟེ། ངོ་རྒོལ་བྱས་པ་དེ་ནི་དྲག་པོའི་སྒོ་ནས་རྒྱ་གཞུང་མགོ་རྟིང་སློག་རྒྱུར་འཆར་གཞི་ཡོད་པའི་ལས་འགུལ་གྱི་ཟུར་ཞིག་ཡིན་པ་དང༌། རང་ལུས་མེར་བསྲེགས་བཏང་བ་དེ་ནི་འགྲོ་བ་མིའི་གཞི་རྩའི་བྱ་སྤྱོད་དང་མི་མཐུན་པ་མ་ཟད། ལྷག་པར་དུ་ནང་པའི་ལྟ་གྲུབ་དང་འགལ་བ་ཞིག་རེད་ཟེར། ད་ལྟའི་རྒྱ་ནག་གཞུང་འདིས་རང་གི་རུལ་སུངས་དང༌། ལོ་རྒྱུས་ནང་བསགས་པའི་ཤ་འཁོན་དང་ནག་ཉེས་ཀྱིས་དམར་ཤོག་ཚོགས་པ་མགོ་རྟིང་མི་སློག་པར། བོད་ཀྱི་རང་དབང་དོན་དུ་རང་སྲོག་མཆོད་མེར་སྒྲོན་པ་ཞིག་གིས་རྒྱ་ནག་གཞུང་མགོ་རྟིང་སློག་པར་བསམས་པ་ནི། ༧གོང་ས་མཆོག་གིས་གསུངས་པའི་གུང་བྲན་ཏང་རྒས་ཡོལ་འགྲོ་ལ་ཉེ་བ་ཞེས་པའི་གསུང་ཚིག་འདི་དང་མཐུན་ཞིང༌། རང་གི་ནག་ཉེས་ཀྱི་རང་ནོངས་པེ་ཅིན་མཁར་དུ་མ་ཤོངས་པའི་དམར་ཤོག་ཚོགས་པའི་ཚོགས་མི་ཚོར་འདི་འདྲའི་དངངས་སྐྲག་ཡོད་པ་ནི་བརྗོད་མི་དགོས་པ་ཞིག་ཡིན་ལ། ལེ་བྷེ་ཡ་དང་ཨེ་ཇིབ་སོགས་ཀྱིས་མཚོན་དེང་འཛམ་གླིང་གི་མང་གཙོ་རང་དབང་གི་མེ་ཏོག་ཕྲ་ལམ་མེར་བཞད་དུས། དམར་ཤོག་སྒེར་གཅོད་པ་རི་བོང་རྡོ་བརྫུས་ཀྱིས་སྡོད་ས་མེད་པ་ནི་གསལ་བོ་ཡིན་པས། མགོ་རྟིང་སློག་པའི་སྔ་རྟགས་ཐོན་པའི་གཞུང་ནི་རྒྱ་ནག་མི་མང་གི་འདོད་བློ་དང་མཐུན་པའི་གཞུང་ཞིག་མིན་པར། དེ་ནི་ད་ལྟའི་རྒྱ་ནག་གི་རྒྱལ་རབས་ནང་ནག་ཉེ་ཆེ་ཤོས་ཀྱི་གཞུང་འཛིན་གུང་བྲན་ཏང་དམར་ཤོག་ཚོགས་པ་ཡིན་ལ། ༡༩༤༩ ལོའི་ ༡༠ ཚེས་ ༡ ལ་ཁྲིམས་མེད་ལུགས་མེད་ཀྱིས་བཙུགས་པའི་ཀྲུང་ཧྭ་མི་དམངས་སྤྱི་འཐུན་རྒྱལ་ཁབ་ཟེར་བ་འདི་ཡིན་ལ། དེའི་བྱེད་པོ་རྣམས་མགོ་རྟིང་སློག་རྒྱུ་ནི་འཛམ་གླིང་ཞི་བདེ་དང༌། ལྷག་ཏུ་གླིང་ཆེན་ཨེ་ཤ་ཡའི་བདེ་སྐྱིད་འཚོ་བར་འབྲེལ་བ་དམ་ཟབ་ཡོད་པ་ཞིག་ཡིན་པས། ཁོང་ཚོས་གཞན་ཕན་སྙིང་སྟོབས་ཀྱིས་རང་སྲོག་བློས་གཏོང་གནང་བ་ནི་འགྲོ་བ་མིའི་ཡ་རབས་ཀུན་སྤྱོད་འབྱུང་ཡུལ་རང་ལས་གཞན་གཅེས་ཀྱི་བྱང་ཆུབ་སེམས་དཔའི་ཉམས་ལེན་དངོས་གནས་དེ་ཡིན།
དེས་ན་བཀའ་བློན་ཁྲི་པས་ཕྱོགས་སྡོམ་གནང་བ་བཞིན། བོད་ནང་གི་བོད་མི་ཚོས་འུ་ཐུག་ཐབས་ཟད་ཀྱི་བྱ་སྤྱོད་དེ་རིགས་མ་སྤེལ་ཐབས་མེད་ཆགས་པའི་རྒྱུ་རྐྱེན་གཙོ་བོ་ནི་ད་ལྟ་བོད་ནང་ཆབ་སྲིད་ཀྱི་དམ་དྲག་དང་རིག་གཞུང་རྩ་གཏོར། དཔལ་འབྱོར་དབྱེ་འབྱེད། དེ་བཞིན་ཁོར་ཡུག་གཏོར་བཤིག་སོགས་ཀྱི་སྲིད་བྱུས་ལག་བསྟར་བྱེད་བཞིན་པ་དེས་ཡིན། གསུངས་པ་ལྟར། རྒྱ་ནག་དམར་ཤོག་ཚོགས་པས་གང་མྱུར་བོད་མིའི་འདོད་འདུན་ལ་ཁྲིམས་དང་དངོས་ཡོད་གཉིས་ཆར་མཐུན་པའི་དགོངས་བཞེས་མ་གནང་ཚེ། འབྱུང་འགྱུར་རིག་གཞུང་ཕྱུག་པོ་ཡོད་པའི་རྒྱ་ནག་མི་མང་ལ་མང་གཙོའི་གཞུང་འཛིན་གསར་པ་ཞིག་ཡོང་བའི་རེ་བ་བྱེད་ཀྱི་ཡིན།
དྲ་གྲོགས་ཡོངས་ལ་ཞུ་རྒྱུ། དཔྱད་བརྗོད་འདི་ལ་རྒྱབ་སྐྱོར་བྱེད་རྒྱུ་དང་། རྒྱལ་གཅེས་དཔའ་པོ་ཚོས་བློས་གཏོང་ཆེན་པོའི་དམར་མཆོད་འདི་དག་ནི་པེ་ཅིང་དམར་ཤོག་གཞུང་ལ་མཚོན་ན་མེ་སྒྱོགས་ཆེན་པོ་དུ་མ་ལས་ལྷག་པ་མངོན་གསལ་རེད། ཁོ་པ་ཚོས་འུ་ཐུག་པའི་ཁག་དཀྲི་དང་རྫུན་གཏམ་འདི་རིགས་ནི་བདེན་པ་ཉིད་རྣམ་པར་རྒྱལ་བའི་རྟགས་མཚན་ཞིག་ཅི་ལ་མིན། དེ་ཙམ་མ་ཟད་ནང་ཆོས་དང་འགལ་མེད་དེ་སྟོན་པའི་སྐྱེས་རབ་ཏུ་སྟག་མོར་ལུས་སྦྱིན་དང་དྲི་མེད་ཀུན་ལྡན་སོགས་ཡོད་པ་མིན་ནམ། བདེན་སྐྱོང་ཞི་བའི་ངོ་རྒོལ་རྒྱལ་གྱུར་ཅིག
བོད་དང་བཙན་བྱོལ་ཁྲོད་ནས་ལས་འགུལ་རེ་སྤེལ་དུས་་་དེ་ལ་རྒྱ་གཞུང་གིས་སྐྱོན་བརྗོད་རེ་ཡོད་པ་སྨོས་མེད་རེད། འོན་ཀྱང་འདི་ཕྱོགས་ནས་སྐྱོན་བརྗོད་དེ་དག་འགོག་ཐབས་སུ་བཙན་བྱོལ་བོད་མིའི་སྒྲིགས་འཛུག་ངོས་ནས་ལས་འགུལ་རིགས་ཁ་ཤས་ལ་བཀག་སྡོམ་བྱས་པའི་བཟོ་འདྲ་དེ་སྔ་མང་པོ་བྱུང་སོང་། དེ་ནི་རྒྱ་གཞུང་དགའ་བའི་ལས་ཞིག་ཏུ་འགྱུར་བ་ལས་ཁ་བཏད་གང་ཅོག་ཐུབ་མེད། ད་ཕན་ཆད་སྐྱོན་བརྗོད་ག་ཚད་བྱས་ན་ལས་འགུལ་དེ་བས་མང་བ་སྤེལ་ཐུབ་ན་ཁ་བཏད་ཡག་ཤོས་ཤིག་རེད་དྲན།
གྲོགས་པོ་རྣམ་པ་ཕེབས་ནས་དགྲ་ཡོང་ན་མདུང་མོ་མཉམ་འཛུགས་བྱས་པ་དགའ་ཡོད། ང་ཚོ་བཙན་བྱོལ་བོད་མི་སྤར་མོ་གང་མ་གཏོགས་མེད་ཀྱང་རྒྱ་ནག་གཞུང་ཆེན་པོ་དེ་དང་བསྡུར་ན་ལོ ༥༠ ནང་ཕྱོགས་གང་ས་ཅི་ཐད་ནས་ང་ཚོ་འཛམ་གླིང་ནང་མགོ་མགྱོགས་ཆོག་ཆོག་ཅིག་ཡོད་པ་༧རྒྱལ་མཆོག་གིས་རྟག་ཏུ་གསུངས་པ་བཞིན། བོད་རང་གི་དོན་དག་བོད་མི་རང་ལ་ཐུག་ཡོད་པས་ཚང་མས་རང་ནུས་ལ་དཔག་ཚོད་རེ་དུས་ཚོད་དང་བསྟུན་པའི་ཐོག་ཆད་མེད་བྱས་ན། རྒྱ་ནག་གཞུང་འདི་ལྟར་འུ་ཐུག་རྒྱུ་དངོས་ཡོད་རེད།
རེད། ཁུག་རྟའི་བཤད་པ་དེ་ལྟར་རེད། ཚེ་སྲོག་མེར་སྒྲོན་གྱི་ལས་འགུལ་འདི་ནི། ཤཱཀྱ་ཐུབ་པའི་སྲས་མཆོག་ཞི་བ་ལྷས་གསུངས་པའི་བདག་གཞན་མཉམ་བརྗེ་དང་། སྟོན་པ་ཏཱ་ལའི་བླ་མས་གསུངས་པའི་འཚེ་མེད་ཞི་བ། གྷན་རྡི་སོགས་ཀྱིས་གསུངས་པའི་འཚེ་བ་མེད་པ་དང་། བདེན་པའི་ལས་འགུལ་ཞིག་ལ་གྱུར་ཡོད་པ་ཅིང། ཆེས་ཚད་མཐོ་བའི་བདེན་པའི་ལས་འགུལ་ཞིག་རེད། ཡིན་ནའང་། བདུད་སྲིན་དེ་འདྲ་ཞིག་གིས་ཚོད་ཚོད་ལ་ཤ་འདར་རྒྱག་དཀའ་ཚོད་རེད་ལ། ཤ་འདར་ཅིག་བརྒྱབས་དུས་ཕལ་ཆེར་ཚེ་སྲོག་གི་འཇུག་པའང་བསྡུས་ཡོད་ཚོད་ཡིན།
ཤར་ཁུག་ལགས་ནས་དཔྱད་བརྗོད་ཡག་པོ་ཞིག་བྲིས་འདུག འདི་ནི་ངོ་མ་མདུང་རྩེ་གཏད་དགོས་ས་ལ་གཏད་པ་ཞིག་རེད། རྗེས་སུ་ཡི་རང་ཡོད།
བོད་མིའི་བཟོད་སྲད་ལ་རྒྱ་ནག་དམར་གཞུང་གི་ཡ་ལན་ཞིག་མ་གནང་ཐབས་མེད་ལྟ་བུ་ཞིག་རེད་གང་ཡིན་ཟེར་ན་ངོ་ཚོས་ཞི་བའི་ངང་ནས་རང་ལུས་མེ་ལ་སྒྲོན་ནས་ངོ་རྒོལ་གནང་པ་འདི་ནི་དམར་གཞུང་ངོ་ཚ་དགོས་པ་ཞིག་མ་ཡིན་ནམ། ང་ཚོས་བདེན་དོན་འདི་འཛམ་གླིང་མི་མང་ལ་བསྒྲགས་ཀྱི་ཡིན་ད་དུང་འདི་འདྲའི་གནང་སྟངས་ཡོང་ངེས་པས་ངོ་ཚོས་རྒྱབ་སྐྱོར་དེ་ལས་ཆེ་བ་ཞིག་གནང་གི་གལ་ཆེན་མ་རེད་ནས་གོང་དུ་ཁུག་རྟ་ལགས་ཀྱི་དཔྱད་བརྗོད་ཡག་པོ་གནང་འདུག་ཡི་རངས་ཡོད། སྨྱུག་འཛིན་པ་ཚོས་སྐད་རིགས་འདྲ་མིན་ཐོག་འདི་འདྲ་འབྲི་ཐུབ་ན་དགེ་མཚན་ཆེ།
ཤར་ཕྱོགས་ཁུག་རྟ་ལགས་ཀྱིས་དཔྱད་བརྗོད་ཡག་ཅིག་སྤེལ་འདུག རྗེས་སུ་ཡི་རངས་ཞུ། སྨྱུ་གུ་འཛིན་མཁན་རྣམས་ཀྱིས་འདི་ལྟར་དཔྱད་བརྗོད་དང་བསྒྲགས་གཏམ་གང་མང་སྤེལ་དགོས་ངེས་རེད། མ་ཟད་དེ་སྐད་ཡིག་འདྲ་མིན་བསྒྱུར་སྤེལ་བྱེད་རྒྱུ་དེ་བའི་གལ་ཆེ་བར་མཐོང་། འདི་ལྟར་འགན་འཁྲི་དང་བླངས་ཀྱིས་དཔྱད་བརྗོད་ན་སྨྱུ་ཐོག་པའི་རང་གཤིས་དང་རང་ཚུགས་མངོན་གྱིན་འདུག དེ་མིན་དོན་མེད་ནང་ཁུལ་ལ་གཞི་མེད་སྐྱོན་བརྗོད་དང་ཧ་གོ་ལ་མ་གོ་ལར་གཉིད་ལབ་རྒྱག་མཁན་རྣམས་ནི་རྒྱུགས་པ་བཟུང་པའི་བོང་རྫི་ལས་ཀྱང་ཐ་ཆད་དུ་སྣང་།
དེ་ནས་རྒྱ་གར་ནང་འཚར་ལོངས་བྱུང་ཞིང་མཐོང་སློབ་དང་འབུམ་རམས་པ་ཐོན་པ་དག་གིས་ཀྱང་བོད་ཡིག་ནང་འབྲི་མ་ཤེས་ན་གནད་ཁག་ཡོད་མ་རེད། རྒྱ་གར་ཡི་གེ་དང་དབྱིན་ཡིག་གང་རུང་ནང་འདི་ལྟའི་རྒྱ་ནག་གི་གདོང་རིས་གསལ་བའི་དཔྱད་བརྗོད་དང་རྒྱུ་མཚན་ལྡན་པའི་དགག་སྒྲུབ་སྐྱོན་བརྗོད་བྱེད་ཐུབ་ན་ཧ་ཅང་དགེ་མཚན་ཆེ་བར་མཐོང་།
དཔྱད་བརྗོད་འདི་ལ་རྒྱབ་སྐྱོར་ཡོད།
ད་ནས་བཟུང་འུ་ཚང་ཡི་གེ་བ་ཚོས་ནང་ཁུལ་ཕན་ཚུན་མཚང་འབྲུ་ཁ་རྡུང་གི་ཀུན་སྤྱོད་དོར་ནས། གནས་དོན་སྐབས་བབ་ལ་གལ་གནད་ཆེ་བའི་རྩོམ་ཡིག་རེ་འབྲི་བ་ལ་ཁ་ཕྱོགས་ཐུབ་ན་ཅི་མ་རུང་།
རྣམ་པ་གཉིས་ཕེབས་ནས་བསམ་ཚུལ་གསུངས་བ་དགའ་བྱུང་།
དཔྱད་བརྗོད་འདི་ལ་རྒྱབ་སྐྱོར་ཡོད།
ད་དུང་འདི་ཡི་རིགས་མང་ཙམ་སྤེལ་ཐུབ་པའི་རེ་བ་ཆེ།
དཔྱད་བརྗོད་འདི་ལ་རྒྱབ་སྐྱོར་ཡོད། བློས་གཏོང་ཆེན་པོའི་དམར་མཆོད་འདི་དག་ནི་པེ་ཅིང་དམར་ཤོག་གཞུང་ལ་མཚོན་ན་མེ་སྒྱོགས་ཆེན་པོ་དུ་མ་ལས་ལྷག་པ་མངོན་གསལ་རེད། ཁོ་པ་ཚོས་འུ་ཐུག་པའི་ཁག་དཀྲི་དང་རྫུན་གཏམ་འདི་རིགས་ནི་བདེན་པ་ཉིད་རྣམ་པར་རྒྱལ་བའི་རྟགས་མཚན་ཞིག་ཅི་ལ་མིན། བདེན་སྐྱོང་ཞི་བའི་ངོ་རྒོལ་རྒྱལ་གྱུར་ཅིག