དེ་རིང་འབར་མའི་གཞུང་གིས་བཙོན་པ་མང་པོ་ཞིག་ཉེས་ཡང་ཀློད་གྲོལ་གཏོང་མགོ་ཚུགས་ཡོད་ཅིང་། དེ་དག་ཁྲོད་ཆབ་སྲིད་བཙོན་པ་ཅི་ཙམ་ཡོད་མེད་ཁ་གསལ་བྱུང་མི་འདུག
ཟླ་འདིའི་ཕྱི་ཚེས་ ༡༡ ཉིན་འབར་མ་དམག་མིའི་གཞུང་གིས་གསལ་བསྒྲགས་ཤིག་སྤེལ་ཏེ། སྲིད་འཛིན་ཐེན་སེན་(Thein Sein)མཆོག་གིས་བཀའ་འཁྲོལ་ཐོབ་པ་ལྟར། འབར་མའི་བཙོན་འོག་གི་བཙོན་པ་ ༦༣༥༩ ཙམ་ཉེས་ཡང་བཙོན་གྲོལ་གཏོང་རྒྱུའི་ཐག་གཅོད་དེ་བྱུང་བ་ཞིག་ཡིན་ཞིང་། དེ་དག་ཕྱི་ཚེས་ ༡༢ ཉིན་འབར་མའི་ཆོས་ལུགས་དུས་ཆེན་དང་བསྟུན་ཏེ་བཙོན་གྲོལ་གཏོང་རྒྱུ་ཡིན་ཚུལ་བསྒྲགས་ཡོད།
ཐེངས་འདིར་འབར་མའི་གཞུང་གིས་བཙན་པ་མང་པོ་ཞིག་ཀློད་གྲོལ་བཏང་བ་འདི་ནི། རྒྱལ་སྤྱིའི་ཚོགས་སྡེ་ཁག་དང་འབར་མ་རྒྱལ་ཡོངས་འགྲོ་བ་མིའི་ཐོབ་ཐང་ལྷན་ཚོགས་བཅས་ཀྱིས་སྲིད་འཛིན་ལ་གཞུང་གི་སྲིད་ཇུས་སྔར་ལས་གུ་ཡངས་དང་དམངས་གཙོ་བཅོས་སྒྱུར་གྱི་ཕྱོགས་སུ་གོམ་སྟབས་བསྒྱུར་ཆེད། འབར་མའི་བཙོན་ཁང་ཁག་གི་བཙོན་པ་མང་པོ་ཞིག་ཉེས་ཡང་ཀློད་གྲོལ་གཏོང་དགོས་པའི་འབོད་སྐུལ་ཞུས་པ་དང་ལེན་བྱས་པ་ཞིག་ཡིན་འདུག
ཀློད་གྲོལ་གྱི་ཆོག་མཆན་ཐོབ་ཡོད་པའི་བཙོན་པ་དེ་དག་ཁྲོད་ཆབ་སྲིད་བཙོན་པ་ཅི་ཙམ་ཡོད་མེད་གསལ་བོ་ཤེས་རྟོགས་ཐུབ་མེད་ཀྱང་། ཆབ་སྲིད་བཙོན་པ་ ༢༠༠༠ ཙམ་ཡོད་པར་ཚོད་དཔག་བྱེད་ཀྱི་ཡོད་འདུག་ལ། དེ་སྔོན་ ༢༠༠༧ དང་ ༢༠༠༨ བཅས་སུ་འཛིན་བཟུང་བྱས་པའི་ཆབ་སྲིད་བཙོན་པ་ཁག་ཅིག་ཀྱང་ཡོད་འདུག
གནད་དོན་འདིའི་ཐད་ཨང་སན་སུའུ་ཀེའི་རྒྱལ་ཡོངས་དམངས་གཙོ་མཐུན་ཚོགས་ཀྱི་མགྲིན་ཚབ་པ་ཝེན་(Nyan Win) གྱིས། “ཆབ་སྲིད་བཙོན་པ་ཀློད་གྲོལ་བཏང་པ་དེ་གཞུང་གི་སྲིད་ཇུས་ལ་དམངས་གཙོ་བཅོས་སྒྱུར་བྱེད་པའི་ཆ་ཤས་གཅིག་ཡིན་པ་དང་། དེ་བཞིན་གསར་འགྱུར་བརྒྱུད་ལམ་གྱི་རང་དབང་སོགས་གནད་དོན་ཕྱོགས་ཡོངས་ནས་གུ་ཡང་ཡར་རྒྱས་གཏོང་དགོས་པ་རེད། ”ཅེས་བརྗོད་འདུག
གསར་འགོད་པ། བནྡེ་སྐྱབས།
འབར་མའི་དམངས་གཙོ་དོན་གཉེར་བ་ཆེན་མོ་ལྕམ་ཨང་སན་སུའུ་ཀེའི་དཀའ་ལས་རྒྱབ་པའི་འབྲས་བུ་མིན་ནམ་སྙམ།
བཙོན་མ་འབོར་ཆེན་ཞིག་གློད་ཀྱིན་འདུག ད་དུང་ཅི་ཙམ་ལྷག་ཡོད་དམ། བཙོན་མ་འདི་རིགས་ཀྱི་ཉེས་པ་ཆེ་ཆུང་ཅི་འདྲ་ཡིན་ནམ། ཕྱི་ཚུལ་མིན་ནམ། གང་ལྟར་སྲིད་དོན་བཙོན་མ་མང་པོ་བཏང་ཡོད་ན་དགའ་འོས་པའི་རེ་བ་ཞིག་ཡིན་སྲིད།
འབར་མ་འདི་དེང་སང་རྒྱལ་སྤྱི་ལ་ཁ་ཕྱོགས་ཏེ་འགྲོ་གི་འདུག འབར་མའི་རང་དབང་དང་མང་གཙོ་དར་རྒྱས་འགྲོ་ཡོང་བར་ཤོག
དེ་འདྲ་ཡག་བ་ལགས། སེམས་པ་དགའ་བ་ལགས།
འདི་ནི་དགའ་འོས་པའི་དོན་བཟང་ཞིག་རེད་ལ། རྒྱ་ནག་གིས་ཀྱང་འདི་ལྟ་བུའི་གུ་ཡངས་ཀྱི་བསམ་བློ་ལ་མིག་དཔེ་ལྟ་འོས་པ་ཡིན་པར་འདོད། གང་ལྟར་བཙོན་པ་ཞིག་ཡིན་ཕྱིན་གློད་གྲོལ་བྱུང་ན་དགའ་བསུ་ཞུ་གིན་ཡོད་ལ། རྗེས་སུ་ཡི་རང་ལས་ཀྱི་ཡོད།
ཆོས་སྲིད་ཟུང་འབྲེལ་གྱི་ལམ་སྲོལ་འདི་འཛམ་གླིང་ཀུན་ཏུ་དར་ཁྱབ་དང་ཡུན་བརྟན་ཤོག །
ཆབ་སྲིད་ཀྱི་བཙོན་པ་ཡོད་མེད་ཇི་ལྟར་ཡང་། གནས་ཚུལ་འདི་ནི་གློད་དཀྲོལ་བཏང་བའི་བཙོན་པ་ཚོས་མཚོན། རང་གཞན་སུས་བལྟས་ཀྱང་ཤིན་ཏུ་དགའ་འོས་པ་ཞིག་དང། འབར་མ་གཞུང་ལ་སེམས་ཐག་པ་ནས་ཡི་རང་དང་བསྔགས་བརྗོད་ཞུ་འོས་པ་ཞིག་དང་ཞུ་དགོས་ངེས་རེད་སྙམ་བཞིན་ཡོད།
ཕྲན་ལྟ་བུ་ཞིག་ལ་མཚོན་ན་ཆབ་སྲིད་པ་དང་ཆབ་སྲིད་ཀྱི་བཙོན་པ་ཚོ་ནི། འཛམ་གླིང་གི་ཞི་བདེ། མི་མང་གི་བདེ་སྐྱིད། མི་རིགས་འཆམ་མཐུན། སྤྱི་ཚོགས་ལྷིང་འཇགས་སོགས་གཏོར་བཤིག་གཏོང་མཁན་ཞིག་ཏུ་ངོས་འཛིན་བྱེད་ཀྱིན་ཡོད་ན། དེ་ལྟ་བུའི་བཙོན་པ་ཞིག་དེ་རིང་གློད་དཀྲོལ་བཏང་མེད་ཀྱང་། དེ་ལ་སེམས་ཕམ་མེད་ཅེས་ཞུ་རྒྱུ་ཡིན།
འབར་མའི་སྲིད་འཛིན་ལ་མངོན་པ་བསྟོད་དོ། ཁྱེད་ཀྱིས་མི་རིགས་དང་རྒྱལ་ཁབ་བཅས་འཚེ་མེད་ཞི་བདེའི་དཔལ་ལ་ལོངས་སྤྱོད་ཐུབ་པར་གྱུར་ཅིག།