རྒྱ་ནག་གཞུང་གིས་ཨ་མདོ་རྨ་ལྷོ་སོག་རྫོང་འབྲོག་ཁུལ་དུ་༼མཉམ་ལས་ཁང་༽ཟེར་བའི་སྲིད་ཇུས་ཤིག་ལག་བསྟར་བྱས་ཏེ། ཐོག་མའི་འཆར་གཞི་ལྟར་ལེགས་འགྲུབ་མ་བྱུང་བར་ད་ཆར་དཀའ་ངལ་འཕྲད་ཀྱི་ཡོད་པ་དང་། ས་གནས་དེ་ཁུལ་དུ་བོད་རིགས་དང་སོག་རིགས་དབྱེ་འབྱེད་ཀྱི་ལས་དོན་སྣ་ཚོགས་བརྩམས་ཏེ། མང་ཚོགས་ཀྱི་མཐུན་སྒྲིལ་ལ་གཏོར་བརླག་གཏོང་བཞིན་ཡོད་འདུག
ཉེ་ཆར་ངྷ་རམ་ས་ལའི་དབུས་སྣེ་ལེན་ཁང་ལ་བོད་ནས་གསར་དུ་འབྱོར་བའི་ཕ་ཡུལ་རྨ་ལྷོ་སོག་རྫོང་ནས་ཡིན་པའི་གྲྭ་བརྩོན་འགྲུས་རྒྱ་མཚོ་དང་དགེ་འདུན་བསོད་ནམས་གཉིས་སུ་གསར་འགོད་པས་བཅར་འདྲི་ཞུས་པར། གྲྭ་བརྩོན་འགྲུས་རྒྱ་མཚོ་ལགས་ཀྱིས་རྒྱ་ནག་གཞུང་གི་ལོ་གཅིག་ཙམ་གྱི་གོང་ནས་བརྙན་འཕྲིན་དང་ཚགས་ཤོག་སོགས་བརྒྱུད་ལམ་ཁག་ཏུ་དྲིལ་བསྒྲགས་ཤུགས་ཆེན་བྱས་ཏེ། མི་མང་མཉམ་ལས་ཁང་རྒྱག་རྒྱུ་ཡིན་པ་དང་། དེ་ནི་མི་མང་གི་ཁེ་ཕན་ཆེད་ཡིན་སྐོར། མང་ཚོགས་ཀྱིས་ལས་གཞི་དེར་རྒྱབ་སྐྱོར་བྱ་དགོས་ཚུལ་སོགས་བརྗོད་དེ་མང་ཚོགས་ལ་ཐོ་འགོད་བྱེད་བཅུག་ཡོད་པ་དང་། སྔོན་མཉམ་ལས་ཁང་གི་སྐྱིད་སྡུག་མཐོང་མྱོང་མཁན་རྨ་ལྷོ་སོག་རྫོང་ས་ཁུལ་གྱི་རྒན་རབས་པ་དག་གིས་བཀག་འགོག་བྱས་མིན་ལ་མ་ལྟོས་པར། གཞོན་སྐྱེས་མང་པོ་ཞིག་རྒྱ་ནག་གི་མགོ་སྐོར་འོག་ཚུད་དེ་ཐོ་འགོད་བྱས་ཡོད་ཀྱང་། གཞུང་གིས་འདང་ངེས་ཀྱི་འགྲོ་སོང་མ་བཏང་བ་དང་། ས་གནས་དཔོན་རིགས་ཚོས་ལྐོག་ཟ་བྱས་པ་བཅས་ཀྱིས་ཐོག་མའི་དྲིལ་བསྒྲགས་ལྟར་ལེགས་འགྲུབ་བྱུང་མེད་པར། སྡོད་ཁང་མང་པོ་ཞིག་མི་མང་གནས་སྤོར་མ་བྱས་གོང་ནས་གས་ཆག་ཤོར་བ་དང་འཚོ་བའི་མཐུན་རྐྱེན་ཟླ་འགའི་རྗེས་སུ་མེད་པར་གྱུར་བ་སོགས་ཀྱི་དབང་གིས། ད་ལྟའི་ཆར་མི་མང་ཁྲོད་ལས་གཞི་དེར་སྐྱོན་བརྗོད་བྱེད་མཁན་ཇེ་མང་དུ་འགྲོ་བཞིན་ཡོད་པ་མ་ཟད། ལས་གཞིའི་དེའི་ཁོངས་སུ་ཐོ་འགོད་བྱེད་མེད་མཁན་ཚོར་ལས་གཞི་དེར་ཞུགས་མི་རུང་བའི་རེ་སྐུལ་ཡང་ཞུ་བཞིན་ཡོད་པ་དང་། ལས་གཞི་དེ་ལས་ཕྱིར་འཐོན་མཁན་ཡང་མང་པོ་འབྱུང་བཞིན་ཡོད་འདུག
ཡང་ཁོང་གིས་བརྗོད་དོན་ལྟར་ན། ལོ་གཅིག་གི་གོང་དུ་རྨ་ལྷོ་སོག་རྫོང་དུ་རྫོང་དཔོན་གསར་བ་ཞིག་བསླེབས་ཏེ། རྫོང་གི་ལས་ཁུངས་ཁག་དང་ཚོང་ཁང་། ཟ་ཁང་སོགས་ཁྲོམ་གཞུང་གི་སྒོ་བྱང་ཡོད་ཚད་སོག་ཡིག་ཏུ་བསྒྱུར་ཞིང་། མང་ཚོགས་ནང་གཏམ་བཤད་བྱེད་སྐབས་སོག་པོ་ཡིན་པའི་ལོ་རྒྱུས་འདྲ་མིན་བཤད་པ་དང་། ལྷག་པར་དུ་གཞོན་སྐྱེས་ཚོར་དེའི་སྐོར་ཤུགས་ཆེན་པོས་བཤད་དེ། ད་ཆར་སོག་རྫོང་དུ་སོག་པོའི་རྣམ་པ་ཤུགས་ཆེ་རུ་འགྲོ་བཞིན་ཡོད་འདུག་ལ། བོད་དང་སོག་པོ་ཞེས་མི་རིགས་དབྱེ་འབྱེད་ཀྱི་སྣང་ཚུལ་ཡང་ཡོང་གི་ཡོད་འདུག དེ་བཞིན། ས་གནས་ཀྱི་བླ་མ་སྤྲུལ་དང་མི་སྣ་མཁྱེན་ཡོན་ཅན་ཚོས་རྟ་རྒྱུག་རྒྱལ་འཇོག་རིགས་ལ་དགག་བྱ་གནང་གི་ཡོད་ཀྱང་། རྒྱ་གཞུང་གིས་འགྲོ་སོང་ཕོན་ཆེན་བཏང་སྟེ་ལོ་ལྟར་རྟ་རྒྱུག་འགྲན་ཚོགས་བསྡུས་ཏེ། བྱ་དགའ་སྤྲོད་པ་དང་མཛད་སྒོ་རྒྱས་སྤྲོས་ཆེན་པོ་བྱས་ཏེ། གཞོན་སྐྱེས་མང་ཞིག་རྟ་རྒྱུག་ལ་དབྱིངས་འཕར་ཏེ་ཤེས་ཡོན་སློབ་སྦྱོང་ལ་དོ་སྣང་མེད་པ་ཆགས་ཡོད་པ་དང་། ས་གནས་མང་ཚོགས་ཕལ་ཆེ་བ་ཡིག་རྨོངས་ཡིན་སྟབས། རྒྱན་འཇོག་གི་རྣམ་པ་ཤུགས་ཆེ་རུ་ཕྱིན་པ་དང་བསྟུན་ཏེ་ནང་འཁྲུག་གི་གནད་དོན་ཡང་བསྟུད་མུར་ཡོང་གི་ཡོད་འདུག
མཇུག་ཏུ་གྲྭ་དགེ་འདུན་བསོད་ནམས་ལགས་སུ་རྒྱ་ནག་གཞུང་གིས་དགོན་སྡེ་ཁག་ཏུ་ལས་འགུལ་གང་འདྲ་སྤེལ་གྱི་ཡོད་མེད་དྲིས་པར་ཁོང་གིས། “༢༠༠༨ ལོའི་རྗེས་སུ་སོག་རྫོང་བྲག་དམར་ཞང་ལྭ་ཁ་དགོན་པའི་ནང་སྲིད་གཞུང་ཆོས་ལུགས་སྡེ་ཁག་གི་མི་སྣ་སྐོར་ཞིག་ཡོང་སྟེ། གྲྭ་བ་ཚོར་འགེངས་ཤོག་ཅིག་སྐོང་དུ་བཅུག་སྟེ། ༧གོང་ས་མཆོག་བོད་ལ་ཕེབས་ན་བཟང་མིན་ཐད། མི་བཟང་བའི་ཐོག་མཚན་རྟགས་བཀོད་དགོས་ཚུལ་བཤད་འདུག ༧གོང་ས་མཆོག་བོད་ལ་མ་ཕེབས་ཀྱང་། རྒྱ་ནག་གཞུང་གིས་བོད་མི་ཚོར་སློབ་གསོ་དང་འཚོ་བ་སོགས་ཕྱོགས་ཡོངས་ལ་རོགས་རམ་གནང་སྟེ་དཀའ་ངལ་གང་ཡང་མེད་པ་དང་། ༧གོང་ས་མཆོག་བོད་དུ་ཕེབས་ཀྱང་དམིགས་བསལ་གྱི་བདེ་སྐྱིད་ཅི་ཡང་བསྐྲུན་མི་ཐུབ་པ་དང་། ཁོང་ཕེབས་པ་ཡིན་ན། རྒྱལ་ཁབ་ཁ་བྲལ་དང་ཟིང་ཆ་བསླང་རྒྱུ་ཡིན་ཚུལ་སོགས་བཤད་འདུག གནས་ཚུལ་དེ་གཞན་ལ་བཤད་མི་ཆོག་པ་དང་། གལ་སྲིད་བཤད་མཁན་བྱུང་ན་ཁྲིམས་ཁང་ལས་འགྲོ་ས་མེད་པའི་འཇིགས་སྐུལ་ཡང་བྱས་འདུག གྲྭ་བ་མང་པོ་ཞིག་གིས་མཚན་རྟགས་བཀོད་མེད་ཀྱང་། དགོན་པའི་དོ་དམ་ཁང་གིས་གྲྭ་ཚང་གི་ཚབ་བྱས་ཏེ་མཚན་རྟགས་བཀོད་འདུག་ལ། རྫོང་ཁུལ་གྱི་དགོན་སྡེ་གཞན་དག་གིས་ཀྱང་མཚན་རྟགས་བཀོད་འདུག” ཅེས་བརྗོད་བྱུང་།
ཁོས་མུ་མཐུད་དུ “ རྒྱ་ནག་གཞུང་གིས་དགོན་པའི་བླ་སྤྲུལ་ཆེ་ཁག་གི་མཚན་བེད་སྤྱད་དེ་དགོན་པར་སྟངས་འཛིན་བྱེད་ཀྱི་འདུག ལྷག་པར་དུ་བླ་བྲང་ས་ཁུལ་ལ་མཚོན་ན་ཀུན་མཁྱེན་འཇམ་དབྱངས་བཞད་པ་མཆོག་སེར་སྐྱ་གཉིས་ཀྱི་སྐྱབས་གནས་རེད། མཚམས་རེར་རྒྱ་གཞུང་གིས་དགོན་པའི་དོ་དམ་ཁང་བརྒྱུད་དེ་ཁོང་གི་མཚན་འཁོད་ཡིག་ཆ་སྣ་ཚོགས་དགོན་པར་བཀྲམས་ཏེ། དགོན་པའི་གྲྭ་པ་ཚོའི་བསམ་བློའི་གོ་རྟོགས་ཇེ་མཐོར་གཏོང་དགོས་ཚུལ་དང་། དཀར་ནག་གི་དབྱེ་བ་དང་། རྒྱལ་ཁབ་ཀྱི་བཀའ་དྲིན་ངོ་ཤེས་དགོས་ཚུལ། གཞུང་གིས་བོད་སྐད་ཡིག་གི་འཕེལ་རྒྱས་ཐད་ལ་རོགས་སྐྱོར་བྱེད་ཀྱི་ཡོད་ཚུལ་སོགས་བཀོད་འདུག འོན་ཀྱང་གྲྭ་བ་ཚོས་ཡིག་ཆའི་སྟེང་གི་མཚན་རྟགས་དང་། ཡི་གེའི་ནང་དོན་སོགས་ཁོང་གི་ཡིན་པར་ཡིད་ཆེས་བྱེད་ཀྱི་ཡོད་པ་མ་རེད། ”ཅེས་བརྗོད་བྱུང་།
མཇུག་ཏུ་ཁོས་བོད་ནང་གི་བོད་མི་ཚོས་དུས་རྒྱུན་༸གོང་ས་མཆོག་གཙོས་ཕྱི་སྡོད་བོད་མི་ཚོར་རེ་བ་བརྒྱབ་ཡོད་པ་དང་། བོད་ནང་ལས་འགུལ་གང་ཞིག་སྤེལ་ཡང་ཕྱི་ཕྱོགས་སུ་རྒྱབ་རྟེན་ཞིག་ཡོད་པའི་རེ་བའི་ཐོག་ནས་སྤེལ་གྱི་ཡོད་ཀྱང་། མཚམས་རེར་བོད་ནང་གི་བོད་མིའི་ཁྲོད་ཕྱི་ཕྱོགས་ནས་ནུས་པ་འཐོན་གྱི་མེད་པ་དང་། ཕྱི་རྒྱལ་རང་དབང་ལུང་པར་འབྱོར་རྗེས་བོད་ནང་གི་དཀའ་སྡུག་གི་ཚོར་བ་ཡལ་འགྲོ་བཞིན་ཡོད་པའི་བསམ་ཚུལ་རེ་ཟུང་ལ་ཡོང་གི་ཡོད་སྐོར་བརྗོད་སོང་ལ། ཁོ་རང་གི་ངོས་ནས་བོད་མི་ཚོ་རྒྱལ་ཁབ་གང་དང་ས་ཆ་གང་དུ་ཡོད་ཀྱང་། རྡོག་རྩ་གཅིག་ཏུ་བསྒྲིལ་ཏེ་ཕྱི་ནང་ལྷན་འཛོམས་དང་། ༧གོང་ས་མཆོག་བོད་ནང་གདན་འདྲེན་ཐོག་འབད་དགོས་ཚུལ་བརྗོད་བྱུང་།
གསར་འགོད་པ། དོན་གོ
གསར་འགོད་པ་ལགས། ངས་བལྟས་ན་འགོ་བརྗོད་ཀྱི་༼བོད་ནང་ལས་འགུལ་གང་ཞིག་སྤེལ་ཡང་ཕྱི་ལ་ཡིད་རྟེན་བཅོལ་ཡོད།༽ ཅེས་པའི་ཡིད་རྟེན་དེ་ཡིད་རྟོན་དང་གོ་འཛོལ་བྱུང་འདུག། ཡིད་རྟོན་ཞེས་པ་ཆ་འཇོག་བྱེད་པའམ་ཡིད་ཆེས་བྱེད་པའི་དོན་ཡིན།
དཔེར་ན་ནང་པ་སངས་རྒྱས་པའི་གཞུང་ལུགས་ནང།
གང་ཟག་ལ་མི་རྟོན་ཆོས་ལ་རྟོན།།
ཆོས་དེ་ཡང་ཚིག་ལ་མི་རྟོན་དོན་ལ་རྟོན།།
དོན་དེ་ཡང་དྲང་དོན་ལ་མི་རྟོན་ངེས་དོན་ལ་རྟོན།།
ངེས་དོན་དེ་ཡང་རྣམ་ཤེས་ལ་མི་རྟོན་ཡེ་ཤེས་རྟོན། །ཞེས་རྟོན་པ་བཞི་གསུངས་ཡོད།
དྲ་གྲོགས་ཕལ་མོ་ཆེ་ཡིས་དེ་ལ་དོ་སྣང་གནང་མི་འདུག
ཕ་ས་ཕ་ཡུལ་རང་གི་གྲྭ་བ་གཉིས་སྐྱབས་བཅོལ་ལ་ཕེབས་པར་དགའ་བསུ་ཞུ། ལྷག་པར་གསར་འགོད་པའི་བཅར་འདྲི་དང་དུ་བླངས་ནས་ཕ་ཡུལ་རང་གི་སྐྱིད་སྡུག་འདི་ལྟར་གསལ་བཤད་གནང་བར་བཀའ་དྲིན་ཆེ་ཞུ།
ད་དུང་ཕཡུལ་གྱི་གནས་ཚུལ་རིགས་ཡོད་ན་ཡི་གེར་འགོད་རོགས། རྒྱལ་གཅེས་དཔའ་བོ་གླུ་བ་བཀྲ་ཤིས་དོན་གྲུབ་ལགས་བདེ་མོ་ཡིན་ནམ།
“ངས་གངས་སེང་དར་ཆ་ཕྱར་མ་ཐུབ། ཕྱར་འདོད་ཀྱང་འཕྱར་དབང་ང་ལ་མེད། འདི་བསམ་ན་ང་འདི་ལས་ངན་རེད།”ཁོས་ད་དུང་འདི་ལྟར་བསམ་གིན་ཡོད་པ་ཐག་ཆོད།
བོད་མི་མང་གི་འཐུས་ཚབ་རྣམ་པའི་མགོ་འཁྲིད་དེ་ཁ་བཤད་དོན་གནས་དང་ཁ་ཚ་དགོས་གཏུགས་ཀྱི་ལས་འགུལ་ལ་སྙིང་ནས་ཡི་རངས་ཞུ།
འཐེན་འཁྱེར་འཁོན་འཛིན་ལྟ་བ་རིང་དོར་ཏེ།།
གངས་རིའི་ཁྱིམ་དུ་གཞི་བྱེས་ལྷན་འཛོམས་ཆེད།།
གདོང་དམར་བོད་མིའི་དཔུང་བ་མཉམ་དུ་གཤིབ།།
རྩམ་ཟ་རྣམས་ཀྱི་སེམས་རྩ་གཅིག་ཏུ་སྒྲིལ།།
བོད་རྒྱལ་ལོ། བོད་རྒྱལ་ལོ། བོད་རྒྱལ་ལོ།
རྒྱ་ནག་གཞུང་གིས་བདེན་པ་རྫུན་སྒྲིག་དང་ངན་པ་བཟང་མདོག་གི་ཐབས་ཇུས་ལ་བརྟེན་ནས་མ་འོངས་བ་ན་བོད་མི་རྣམས་ཅི་བྱ་བརྟོལ་མེད་དང་གང་བྱས་ཅི་བྱས་ཆོག་པའི་སྲིད་ཇུས་ལག་སྟེར་བྱེད་བཞིན་འདུག དེར་བརྟེན་ང་ཚོ་འདི་ནས་ནུས་ཤུགས་གང་ཡོད་དང་རྡོག་རྩ་གཅིག་སྒྲིལ་གྱིས་རྒྱ་ནག་གཞུང་གི་ཇུས་ངན་དེ་དག་ཕྱི་གསལ་ནང་གསལ་དུ་བཟོས་དགོས།