ཁ་སང་སྔ་དྲོར་གངས་སྐྱིད་ཕྱི་ལྷག་པ་ཚེ་རིང་ཚོགས་ཁང་ནང་དུས་དབང་གོ་སྒྲིག་ཚོགས་ཆུང་གིས་གསར་འགོད་ལྷན་ཚོགས་ཤིག་གནང་སྟེ། ཟླ་འདིའི་ཟླ་མཇུག་ཏུ་དྷ་སའི་འཕྲལ་སེལ་ལས་ཁུངས་རྡོ་གདན་དུ་གནས་སྤོར་གྱིས་དངོས་གཞིའི་ལས་ཀ་མགོ་རྩོམ་རྒྱུ་ཡིན་པ་བསྒྲགས་སོང་།
ཁ་སང་ཕྱི་ཚེས་ ༢༠ ཉིན་གྱི་སྔ་དྲོ་ཆུ་ཚོད་ ༡༡ སྟེང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་གནས་མཆོག་རྡོ་རྗེ་གདན་གྱི་དུས་དབང་གོ་སྒྲིག་ཚོགས་ཆུང་གི་འགན་འཛིན་ཐུབ་བསྟན་རིན་པོ་ཆེ་དང་བླ་མ་ངག་དབང་ནོར་བུ། དགེ་བཤེས་ཕུར་བུ་བསམ་གཏན་གསུམ་ལྷན་བཞུགས་ཐོག་གསར་འགོད་ལྷན་ཚོགས་ཤིག་གནང་སྟེ། དཔལ་དུས་ཀྱི་འཁོར་ལོ་བཀའ་དབང་གནང་རྒྱུར་ཟླ་ ༢ ཙམ་མ་གཏོགས་ལྷག་མེད་པར་བརྟེན། ཟླ་འདིའི་ཟླ་མཇུག་ལ་དྷ་རམ་ས་ལའི་འཕྲལ་སེལ་ལས་ཁུངས་དེ་རྡོ་རྗེ་གདན་ལ་གནས་སྤོར་བྱས་ཏེ། ཕྱི་ཟླ་ ༡༡ ཚེས་ ༢ ལ་ལས་ཁུངས་དབུ་འབྱེད་ཀྱིས་ས་གནས་ས་ཐོག་གཏན་འཇགས་ཀྱི་ཐོག་ནས། གསུང་ཆོས་ར་བའི་སྡོད་གུར་དང་མང་ཚོགས་ཀྱི་སྡོད་གུར་ཕུབ་པ་སོགས་དངོས་གཞིའི་ལས་ཀ་རྣམས་མགོ་བརྩམ་རྒྱུ་ཡིན་པ་གསལ་བསྒྲགས་དང་། དེ་བཞིན། ཟླ་འདིའི་ཕྱི་ཚེས་ ༡༥ ཉིན་དཔལ་ལྡན་སྐུ་སྒེར་ཡིག་ཚང་གི་བཀའ་ཁྲོལ་ཐོག རྣམ་རྒྱལ་གྲྭ་ཚང་གི་དཔེ་མཛོད་ཁང་དུ་དཔལ་ལྡན་ཆོས་རིག་བཀའ་བློན་དང་། དཔལ་ལྡན་སྐུ་སྒེར་ཡིག་ཚང་གི་སྐུ་ངོ་དྲུང་ཆེ་ལྷན་རྒྱས། གཞན་ཡང་སྡེ་ཚན་ཁག་གི་དྲུང་ཆེ་རྣམ་པ་ལྷན་རྒྱས་བཅས་དབུ་བཞུགས་ཐོག དུས་འཁོར་དབང་ཆེན་གོ་སྒྲིག་ཚོགས་ཆུང་གི་སྡེ་ཚན་གཙོ་བོ་གསུམ་གྱི་སྐུ་ཚབ་བཅས་ཚང་འཛོམས་ཐོག་ཚོགས་འདུ་ཐེངས་དྲུག་པ་ཚོགས་ཏེ། འདས་པའི་ཚོགས་འདུ་ཐེངས་ལྔའི་རིང་ལ་ག་རེ་གནང་ཡོད་མེད་དག་ཐེར་གནང་ཡོད་སྐོར་ངོ་སྤྲོད་གནང་བྱུང་།
གསར་འགོད་ལྷན་ཚོགས་ཐོག་དུས་དབང་གོ་སྒྲིག་ཚོགས་ཆུང་གི་འགན་འཛིན་ལྷན་ཚོགས་ཀྱི་ཚོགས་མི་སྤྲུལ་སྐུ་ཐུབ་བསྟན་ཡར་འཕེལ་ལགས་ཀྱིས། ཁོང་ཉིད་ཨ་རི་ཎ་ཅལ་མངའ་སྡེ་སྤྱི་ཁྱབ་བློན་ཆེན་འདས་པོ་དམ་པ་དེ་ཉིད་ཀྱི་སྐུ་ཚབ་ཀྱི་ཐོག་ནས་དུས་དབང་གོ་སྒྲིག་ཚོགས་ཆུང་གི་འགན་འཛིན་ཁྲོད་བདམས་པ་ཞིག་ཡིན་པ་གསལ་བཤད་དང་སྦྲགས། ད་ལྟ་གདན་ས་ཁག་ཡོངས་ལ་ཧི་མ་ལ་ཡའི་རི་བརྒྱུད་ཀྱི་སློབ་ཕྲུག་མང་པོ་ཞིག་ལ་མི་ཚེ་གཏན་གྱི་འདུན་མ་དང་། རྫོགས་པའི་སངས་རྒྱས་ཀྱི་གོ་འཕངས་བར་བཀའ་དྲིན་སྐྱོང་བཞིན་པའི་སྐྱབས་གནས་བླ་ན་མེད་པ་དེ་༸གོང་ས་མཆོག་ཆགས་ཡོད་པས། ད་ལྟའི་དུས་ཚོད་འདིར་བཀའ་དྲིན་རྗེས་དྲན་ཆེད་དུས་འཁོར་དབང་ཆེན་ཞུ་རྒྱུ་ཡིན་ཞེས་འདས་པོ་དམ་པ་དེ་ཉིད་ཀྱི་དགོངས་བཞེས་གནང་བ་ལྟར། དཔལ་ལྡན་སྐུ་སྒེར་ཡིག་ཚང་གིས་ཀྱང་སྦྱིན་བདག་གཙོ་བོ་འདས་པོ་དམ་པ་ཁོང་ཉིད་ཡིན་ཞེས་བཀའ་ཕེབས་པ་ནང་བཞིན་སྦྱིན་བདག་གཙོ་བོའི་ཐོག་ནས་གནང་གི་ཡོད་སྟབས། རྒྱལ་བའི་མཆོད་སྤྲིན་དུ་འགྱུར་ཐུབ་པའི་ཆེད་དུ་གནས་རྩ་ཆེན་པོ་དེར་དམར་ཟས་སྤོངས་བ་དང་། ཆང་རག་གི་རིགས་མི་སྤྱོད་བ་བྱ་རྒྱུ་དེ་འདས་པོ་དམ་པ་དེ་ཉིད་ཀྱི་དགོངས་གཞི་ཡིན་པར་བརྟེན། ད་ལོ་དུས་དབང་ལ་ཕེབས་མཁན་ཚང་མའི་ཐུགས་སྣང་ཆེན་པོ་གནང་དགོས་པའི་འབོད་སྐུལ་དང་། དེ་བཞིན། སྡོད་ཁང་གུར་སོ་སོའི་ནང་ལ་ཡིན་ནའང་། དཔའ་འབྱོར་བསྡུ་སྒྲིག་ཐོག་རྙོག་དྲ་དང་། ལྷག་པར་དུ་དཔལ་འབྱོར་ཡར་ཐོན་ཅན་གྱི་ཕྱིའི་ཡུལ་གྲུ་ཁག་ནས་སླེབ་མཁན་ཚོ་ཡིན་ནའང་། དམར་ཟས་དང་ཆང་རག་བཞེས་པའི་གནས་ཚུལ་བྱུང་བ་ཡིན་ན། ས་གནས་ཉེན་རྟོག་པ་དང་འབྲེལ་བའི་ཐོག་ནས་དུས་དབང་གོ་སྒྲིག་ཚོགས་ཆུང་གི་ངོས་ནས་སྟངས་འཛིན་ནན་མོ་ཞུ་རྒྱུ་ཡིན་སྐོར་བརྗོད་སོང་། དེ་བཞིན། ཁོང་གིས་ “ ང་ཚོའི་སྒྲུབ་བྱའི་དོན་ཚན་དང་པོ་དང་གལ་ཆེ་ཤོས་དེ་ནི་༸གོང་ས་མཆོག་གི་སྐུ་ཕྱྭ་རེད། ད་ལྟ་ཆོས་ཞུ་བར་ཕེབས་མཁན་ཚང་མའི་སྙིང་གི་ནོར་བུ་དེའང་དེ་ཡིན་པར་བརྟེན། རྒྱ་གར་ཉེན་རྟོག་པ་དང་བདེ་འཇགས་སྲུང་སྐྱོབ་གནང་མཁན་མི་སྣ་ཁོ་ནའི་འགན་མ་ཡིན་པར། ཆོས་ཞུ་བ་ཡོངས་ཀྱི་ངོས་ནས་ཀྱང་འགྲོ་འདུག་སྤྱོད་གསུམ་གང་ཅིའི་ཐད་ནས་སྒྲིག་སྲོལ་སྲུང་བརྩི་བྱ་རྒྱུ་གལ་ཆེ་ཤོས་སུ་བརྩིས་ཏེ། ༸གོང་ས་མཆོག་གི་སྐུ་བྱར་ཐུགས་ཁུར་ཆེ་བཞེས་གནང་རོགས” ཞེས་འབོད་སྐུལ་ཞུས་སོང་།
དུས་དབང་གོ་སྒྲིག་ཚོགས་ཆུང་གི་ཚོགས་གཙོ་མོན་རྟ་དབང་དགོན་པའི་བླ་མ་ངག་དབང་ནོར་བུ་ལགས་ཀྱིས་ཀྱང་ཐེངས་འདིའི་དུས་དབང་སྐབས། རྒྱལ་སྤྱིའི་བོད་བརྒྱུད་ནང་བསྟན་རྗེས་འཇུག་ཐུན་མོང་ནས་༸གོང་ས་མཆོག་ལ་བསྟན་བཞུགས་རྒྱས་པ་ཞིག་འབུལ་རྒྱུ་ཡིན་པ་དང་། སྐབས་དེ་དང་བསྟུན་ཏེ་རྒྱལ་སྤྱིའི་བོད་བརྒྱུད་ནང་བསྟན་གྱི་ཆོས་རྒྱུད་ཁག་ཚང་མའི་དབུ་ཁྲིད་རྣམ་པ་དང་། རྗེས་འཇུག་གྲྭ་བཙུན་སྔགས་གསུམ་ཐུན་མོང་གིས་ཆེ་བསྟོད་གཟེངས་རྟགས་ཤིག་འབུལ་ལམ་ཞུ་འཆར་ཡོད་སྟབས། དེའི་ཐད་ཆོས་རྒྱུད་ཁག་གི་དབུ་ཁྲིད་རྣམ་པ་སྐུ་མདུན་ལ་བཅར་རྒྱུ་དང་། ཆོས་སྡེ་ཁག་ཚང་མས་མཐུན་འགྱུར་ག་རེ་གནང་དགོས་མིན་སོགས་མ་འོངས་པར་རིམ་པས་གོ་སྒྲིག་ཚོགས་ཆུང་གི་ངོས་ནས་མར་གསལ་བསྒྲགས་གང་གནང་དུས་ཐོག་ཕྱག་ལས་གནང་ཐུབ་རྒྱུར་དགོངས་པ་བཞེས་དགོས་པའི་པའི་འབོད་སྐུལ་དང་སྦྲགས། ཐེངས་འདིར་བསྟན་བཞུགས་དང་ཆེ་བསྟོད་གཟེངས་རྟགས་འབུལ་འཆར་སྐོར་ལ། “རྒྱལ་དབང་སྐུ་ཕྲེང་རིམ་བྱོན་ཁྲོད་དཔལ་དུས་ཀྱི་འཁོར་ལོའི་བཀའ་དབང་དེ་ཧ་ཅང་ཉུང་ཉུང་མ་གཏོགས་ཡོང་གི་ཡོད་པ་མ་རེད། རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་འཕྲིན་ལས་ཀྱི་ཐོག་ནས་དཔལ་དུས་ཀྱི་འཁོར་ལོའི་བཀའ་དབང་ཐེངས་ ༣༢ བཀའ་དྲིན་བསྐྱངས་ཡོད་པར་བརྟེན། ང་ཚོ་རྒྱལ་སྤྱིའི་བོད་བརྒྱུད་ནང་བསྟན་རྗེས་འཇུག་པ་ཚང་མས་དམ་ཚིག་དད་པ་གཅིག་སྒྲིལ་གྱི་ཐོག་ནས་བསྟན་བཞུགས་དང་ཆེ་བསྟོད་གཟེངས་རྟགས་ཕུལ་དགོས་པར་མ་ཟད། དེ་དང་འབྲེལ་བའི་ཐོག་ནས་རུས་མེད་ཀྱི་སྨོན་ལམ་ཞུ་དགོས་པ་དེ་ཧ་ཅང་གལ་ཆེན་པོ་རེད། ཅེས་བརྗོད་སོང་།
གཞན་ཡང་། གསར་འགོད་པའི་དུས་དབང་གོ་སྒྲིག་ཐད་དཀའ་ངལ་ཆེ་ཤོས་ག་རེ་ཆགས་ཀྱི་ཡོད་མེད་དང་། དཀའ་ངལ་དེ་དག་སེལ་ཐབས་སུ་ཐབས་ཤེས་ག་རེ་གནང་གི་ཡོད་མེད་དྲིས་པར། དུས་དབང་གོ་སྒྲིག་ཚོགས་ཆུང་གི་འགན་འཛིན་ལྷན་ཚོགས་ཀྱི་ཚོགས་མི་དགེ་བཤེས་ཕུར་བུ་བསམ་འགྲུབ་ལགས་ཀྱིས་ལན་འདེབས་གནང་དོན། ཆོས་ཞུ་མང་ཚོགས་རྣམས་ལ་གོ་སྒྲིག་དང་ཕྱོགས་གང་ཅིའི་ཐད་མཐུན་འགྱུར་གནང་རྒྱུ་དེ་དཀའ་ངལ་ཆེ་ཤོས་ཆགས་ཀྱི་ཡོད་སྟབས། ང་ཚོས་འདས་པའི་ཉམས་མྱོང་ལས་བསླབ་བྱ་བླངས་པའི་ཐོག་ནས། ༸གོང་ས་མཆོག་གི་གསུང་ཆོས་དེ་ཆོས་ཞུ་བ་ཚང་མས་ཞི་བདེ་བག་ཕེབས་ཀྱི་ཐོག་ནས་གསན་བསམ་ཡོང་ཐབས་ལ། གསུངས་ཆོས་ར་བའི་ཁོར་ཡུག་དང་། འཕྲོད་བསྟེན་སོགས་ཀྱི་ཐོག་ལ་ཤུགས་སྣོན་རྒྱག་གི་ཡོད། དེར་བརྟེན། ང་རང་ཚོ་ཚང་མའི་སྒྲུབ་བྱ་དམིགས་ཡུལ་གཅིག་ཡིན་པར་བརྟེན། དེ་འདྲའི་དཀའ་ངལ་སེལ་ཐབས་ཐད་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གིས་ཀྱང་ཆ་ཤས་བླངས་ཏེ། ཐེངས་འདིའི་དུས་འཁོར་དབང་ཆེན་གྲ་འགྲིག་པོ་དང་ཕུན་སུམ་ཚོགས་པོ་ཞིག་ཡོང་ཐབས་དང་། གཙོ་ཆེ་ཤོས་རྒྱལ་བ་དགྱེས་པའི་མཆོད་སྤྲིན་ལ་འགྲོ་བ་ཞིག་དང་བསྟན་པ་ཆབ་སྲིད་ལ་ཕན་ཐོག་པ་ཞིག དེ་བཞིན། འབྲེལ་ཡོད་ཚང་མར་མཚན་མཐོང་ལ་རྒྱ་དང་རྒྱ་ཆེའི་མི་མང་ཡིན་ནའང་རྗེས་སུ་ཡི་རེངས་ཀྱིས་དགའ་བ་སྒོམ་པའི་རྒྱུ་རུ་འགྱུར་བ་ཞིག་ཡོང་རྒྱུར་སྒོ་ཀུན་ནས་འབད་བརྩོན་བྱ་དགོས་པ་ཆགས་ཀྱི་ཡོད་པ་རེད། ཅེས་བརྗོད་སོང་།
གསར་འགོད་པ། ཚེ་རིང་རྒྱལ།
བདེན་པ་རེད། ང་ཚོ་གངས་ཅན་པ་རྣམས་ཀྱི་དཔྲལ་བའི་མིག་དང་ཁོག་པའི་སྙིང་ལྟབུ་ནི། ༸རྒྱལ་དབང་བསྟན་འཛིན་རྒྱ་མཚོ་ཡིན་པ་སྨོས་མེད་རེད། དེར་བརྟེན་ང་ཚོ་ནང་པ་སྤྱི་དང་ཡང་སྒོས་བོད་མི་སྤྱི་བོ་གནམ་བསྟན་ཡོངས་ཀྱིས་ཁོང་གི་སྐུ་ཕྱྭའི་ཆེད་དུ་ཐུགས་འགན་བཞེས་རྒྱུ་ཤིན་ཏུ་གལ་ཆེན་པོ་རེད།
ཞོར་དུ་གསར་འགོད་པར་ཞུ་རྒྱུར།
གསར་འགྱུར་ནང་ཡིག་ནོར་མང་པོ་འདུག་པས་རྗེས་སུ་དག་ཆར་གཟབ་གཟབ་གནོངས་རོགས། ཐུགས་རྗེ་ཆེ།
དུས་འཁཽར་དབང་ཆེན་གྱི་སྐབས་དང་བསྟུན་ནས་བོད་ཀྱི་སྐད་ཡིག་སྲུང་སྐྱོབས་ཚོགས་པའི་ངོས་ནས་གཞི་བརྒྱ་ཆེ་བའི་ལས་རིགས་འདྲ་མིན་སྤེལ་གལ་ཆེ། དཔེར་ན། ༡ གཞུང་དང་གཞུང་འབྲེལ་མ་ཡིན་པ་སུ་ཡིན་རུང་ཡིག་ཆ་འགྲེམ་སྤེལ་ག་རེ་དགོས་ན་བོད་ཡིག་ཐོག་ནས་བཀྲམ་རྒྱུ། ༢ དུས་དབང་སྐབས་ཀྱི་ཚོང་ཁང་དང་ཟ་ཁང་ཚང་མའི་སྒོ་བྱང་བོད་ཐོག་ནས་འབྲི་རྒྱུ། ༣ བོད་ནང་ཁུར་ལ་ཁྲོམ་གཞུང་དང་ཇ་ཁང་ཚོང་ཁང་སོགས་ནས་ར་མ་ལུག་གི་སྐད་བཤད་མཁན་ཡོད་ན་་ཉེས་ཆད་ལེན་རྒྱུ། ༤ ལམ་ཆེན་གྱི་བཞི་མདོ་སོགས་ལ་སྐད་ཡིག་སྲུང་སྐྱོབས་ཚོགས་པའི་ངེས་སྟོན་པ་རེ་བསྡད་ནས་ལམ་སྟོན་སོགས་གནང་རྒྱུ་བཅས་ལས་འགུལ་སྣ་ཚོགས་སྤེལ་ན་སྙམ།
དུས་དབང་གྲ་སྒྲིགས་གནང་མཁན་དགེ་བཤེས་ཕུར་བུ་བསམ་གྲུབ་ལགས་སུ་ཉམས་མྱོང་དང་། ལྷག་བསམ། སེམས་ཤུགས་སོགས་སྒོ་གང་ཕྱིར་ཤེས་མཁན་དང་འཇོན་མཁན་ཞིག་ཡིན་དུས་དུས་དབང་གོ་སྒྲིགས་ཚགས་ཚུད་ཡོང་བའི་ཡིད་ཆེས་ཡོད།
ཁྱེད་རྣམ་པའི་བྱ་དོན་ཐམས་ཅད་ཡིད་བསམ་ལྟར་འགྲུབ་ཐུབ་པ་དང་ལྷག་པར་དུ་༸གོང་ས་མཆོག་གིས་རླབས་ཆེན་གྱི་མཛད་པ་རྣམས་ཡར་ངོས་ཟླ་ལྟར་དུ་འཕེལ་ཐུབ་པའི་སྨོན་འདུན་གྲངས་མེད་ཞུ་རྒྱུ་ཡིན།
འཕགས་མཆོག་ཐུགས་རྗེ་ཆེན་པོ་༧རྒྱལ་བ་ཐམས་ཅད་མཁྱེན་པ་སྐུ་ཚེ་བསྐལ་བ་བརྒྱ་རུ་བརྟན་ཅིང་ཐུགས་ཀྱི་དགོངས་པ་འཛམ་གླིང་སྤྱི་དང་བྱེ་བྲག་བསིལ་ལྡན་ཁ་བ་བོད་གངས་ཅན་གྱི་ལྗོངས་སུ་རང་དབང་ཞི་བདེའི་དཔལ་ཡོན་མྱུར་དུ་འཆར་བའི་སྨོན་ལམ་ཞུ།།།