རྩྭ་ཐང་སྲུང་སྐྱོབ་པ་ཞིག་རླངས་འཁོར་འོག་བརྫིས་ཏེ་བསད་འདུག

ཕྱི་ཚེས་ ༢༠ ཉིན་ནང་སོག་ཐའོ་ལའེ་རྒེ་གྷ་སྡེ་བའི་འབྲོག་པ་ཀྲའོ་རི་ཀུ་ཐའོ་ལགས་ཀྱིས་རྩྭ་ཐང་སྲུང་སྐྱོབ་བྱེད་སྐབས། རྒྱ་རིགས་རླངས་འཁོར་ཁ་ལོ་བ་ཞིག་གིས་ཁོ་རང་རླངས་འཁོར་འོག་བརྫིས་ཏེ་དམར་གསོད་བཏང་ཡོད་འདུག 

ཟླ་འདིའི་ཕྱི་ཚེས་ ༢༠ ཉིན། ནང་སོག་ཨོ་ཨར་ཊོ་སི་གྲོང་ཁྱེར་ཝུའུ་ཧྲིན་ཆི་རྫོང་ཐའོ་ལའེ་རྒེ་གྷ་སྡེ་བའི་སོག་པོ་འབྲོག་པ་ཀྲའོ་རི་ཀུ་ཐའོ་ལགས་ཀྱིས་རྩྭ་ཐང་སྲུང་སྐྱོབ་ཆེད་རྡོ་སྣུམ་གཏེར་ཁ་སྐྱེལ་འདྲེན་གྱི་རླངས་འཁོར་དག་རྩྭ་ཐང་སྟེང་བསྐྱོད་རྒྱུར་བཀག་འགོག་བྱས་སྐབས།  རྒྱ་རིགས་རླངས་འཁོར་ཁ་ལོ་བ་ལིས་ཡུག་ལཱིང་ཟེར་བ་ཞིག་གིས་བསམ་བཞིན་དུ་རླངས་འཁོར་མདུན་ཕྱོགས་སུ་བཏང་སྟེ་འབྲོག་པ་ཀོ་རི་ཀུ་ཐའོ་རླངས་འཁོར་འོག་བརྫིས་ཏེ་དམར་གསོད་བཏང་ཡོད་འདུག

ལྷོ་སོག་རང་དབང་སྐབས་དོན་གླེང་སྟེགས་ཀྱིས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༢༤ ནས་ཚེས་ ༣༠ བར་ནང་སོག་གཞི་རིམ་ས་ཁུལ་དང་།  རྒྱལ་ས་ཧའོ་ཧི་ཧའོ་ཐི་གཙོས་པའི་གྲོང་ཁྱེར་ཆེ་ཁག་ནང་མི་ཚོགས་འདུ་འཛོམས་ཀྱིས། སོ་སོའི་རིག་གནས་དང་ཕ་ཡུལ་རྩྭ་ཐང་སྲུང་སྐྱོབ་ཀྱི་ལས་འགུལ་གཞི་རྒྱ་ཆེ་བ་ཞིག་བསྐྱར་དུ་སྤེལ་འཆར་ཡོད་པ་དང་།  ལུས་འགུལ་སྐབས་ཉེ་ཆར་རྡོ་སྣུམ་གཏེར་ཁ་དབོར་འདྲེན་རླངས་འཁོར་འོག་བརྫིས་ཏེ་དམར་གསོད་བཏང་བའི་ཀྲའོ་རི་ཀུ་ཐའོ་དང་། ཕྱི་ཟླ་ ༥ ཚེས་ ༡༠ ཉིན་རྡོ་སོལ་གཏེར་འདྲེན་རླངས་འཁོར་འོག་བརྫིས་ཏེ་དམར་གསོད་བཏང་བའི་མའོ་རི་ཀིན་རྣམ་གཉིས་ལ་རྒྱ་གཞུང་གིས་མྱ་ངན་ཚོགས་འདུ་བསྡུས་ཏེ། ཁོང་རྣམ་གཉིས་ཀྱིས་སོག་པོའི་རང་བྱུང་རྩྭ་ཐང་སྲུང་སྐྱོབ་ཆེད་རང་སྲོག་བཏང་བར་དྲན་རྟེན་རྡོ་རིང་བཞེངས་དགོས་པར་མ་ཟད།  སོག་པོའི་རིག་གནས་དང་རང་བྱུང་རྩྭ་ཐང་སྲུང་སྐྱོབ་ཀྱི་ཁྲིམས་གཞི་གཏན་འབེབ་ཀྱིས་ལག་བསྟར་བྱ་དགོས་པའི་དགོས་འདུན་ཤུགས་ཆེན་པོ་འདོན་རྒྱུ་ཡིན་སྐོར་བརྗོད་འདུག 

རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བའི་ནང་། རླངས་འཁོར་ཁ་ལོ་བས་ཀྲོ་རི་ཀུ་ཐའོ་རླངས་འཁོར་གཡས་ཕྱོགས་མགྱོགས་པོར་མདུན་དུ་བསླེབས་པ་མ་མཐོང་པར་རླངས་འཁོར་དང་གདུང་ཐུག་བརྒྱབ་སྟེ་རྐྱེན་འདས་སུ་གྱུར་བ་དང་། ས་གནས་ཉེན་རྟོག་པས་རླངས་འཁོར་ཁ་ལོ་བ་བཀག་ཉར་བྱས་ཡོད་སྐོར་བཀོད་ཡོད་པ་རེད། ཡིན་ནའང་། ལྷོ་སོག་པོའི་རང་དབང་གླེང་སྟེགས་དྲ་བའི་སྟེང་གནས་ཚུལ་སྤེལ་བར། སོག་པོའི་འབྲོག་པ་ཀྲོ་རི་ཀུ་ཐའོ་ལགས་ཀྱིས་རྡོ་སྣུམ་གཏེར་ཁ་དབོར་འདྲེན་གྱི་རླངས་འཁོར་དེ་བཀག་འགོག་བྱས་སྐབས། རླངས་འཁོར་ཁ་ལོ་བས་བསམ་བཞིན་དུ་ཁོང་རླངས་འཁོར་འོག་བརྫིས་ཏེ་དམར་གསོད་བཏང་ཡོད་པ་བརྗོད་འདུག 

ཤིན་ཧྭ་གསར་ཁང་དང་ལྷོ་སོག་རང་དབང་གླེང་སྟེགས་གཉིས་ཀྱིས་གནས་ཚུལ་འགོད་སྟངས་ཐད། ཨ་རིར་གནས་སྡོད་འགྲོ་བ་མིའི་ཐོབ་ཐང་ལས་འགུལ་བ་ལིག་ཉན་ཁྲོན་ལགས་ཀྱིས “དངོས་ཡོད་གནས་ཚུལ་མཐོང་མཁན་ས་གནས་མང་ཚོགས་ཀྱི་སྐད་ཆ་དང་ལྷོ་སོག་རང་དབང་གླེང་སྟེགས་དྲ་བའི་སྟེང་བཀོད་པའི་གནས་ཚུལ་གཉིས་གཅིག་མཐུན་རེད། མ་གཞི་ཞིན་ཧྭ་གསར་ཁང་ནི་དོན་གྱིས་རྒྱ་གཞུང་དཔོན་རིགས་ཚོའི་མགྲིན་ཚབ་ཡིན་པས།  ཞིན་ཧྭ་གསར་ཁང་གི་བརྗོད་སྟངས་དེར་ཡིད་ཆེས་བྱ་ཐབས་རྩ་བ་ནས་མེད། ” ཅེས་བརྗོད་ཡོད་པ་དང་།   དེ་བཞིན། ནང་སོག་འགྲོ་བ་མིའི་ཐོབ་ཐང་མནའ་འབྲེལ་ཚོགས་པའི་ཚོགས་གཙོ་ཞིའི་མུའུ་མེན་ལགས་ཀྱིས་ཀྱང་། “ཞིན་ཧྭ་གསར་ཁང་གིས་མངོན་གསལ་དོད་པོའི་ཐོག་ནས་གནས་ཚུལ་དེ་སྤྱིར་བཏང་གི་འགྲུམ་འགྲུལ་དོན་རྐྱེན་ཕལ་བ་ཞིག་ལ་ཁ་བསྒྱུར་ཏེ་གནས་ཚུལ་སྤེལ་ཡོད་པ་རེད།  གནས་ཚུལ་དེ་མ་བྱུང་ཡར་སྔོན་ནས་རྡོ་སྣུམ་གཏེར་ཁ་སྔོག་མཁན་རྒྱ་མི་དང་ས་གནས་སོག་རིགས་འབྲོག་པའི་བར་འཁོན་འཛིང་དོན་རྐྱེན་ཐེངས་མང་བྱུང་མྱོང་ཡོད་པ་རེད།  དེའི་རྒྱུ་རྐྱེན་གཙོ་བོ་ནི་གཏེར་ཁ་སྔོག་མཁན་རྒྱ་མི་ཚོས་ས་གནས་མི་མང་ལ་གོ་བསྡུར་དང་ཁྲིམས་མཐུན་གན་རྒྱ་གང་ཡང་མ་བཞག་པར།  བཙན་ཤུགས་ཀྱིས་མི་མང་གི་ལག་ནས་ས་ཆ་བཙན་འཕྲོག་གིས་གཏེར་ཁ་སྔོག་འདོན་བྱས་ཏེ།  ས་གནས་མང་ཚོགས་ཀྱི་ཁེ་ཕན་བཙན་འཕྲོག་བྱས་པར་མ་ཟད།  རྩྭ་ཐང་ལ་གང་བྱུང་གཏོར་སྐྱོན་བཟོས་པར་བརྟེན་ཁོར་ཡུག་ཉམ་ཆག་ཏུ་གྱུར་ཏེ་ས་གནས་མང་ཚོགས་ཀྱི་འཚོ་བར་དཀའ་ངལ་སྣ་ཚོགས་འཕྲད་བཞིན་ཡོད་པ་རེད། ཐེངས་འདིའི་དོན་རྐྱེན་དེའང་སྤྱིར་བཏང་གི་འགྲུམ་འགྲུལ་དོན་རྐྱེན་ཙམ་མིན་པར། ཕྱི་ཟླ་ ༥ པའི་ནང་བྱུང་བའི་དོན་རྐྱེན་དང་ངོ་བོ་གཅིག་རེད།  རྗེས་ཕྱོགས་ད་དུང་དོན་རྐྱེན་འདི་རིགས་རྒྱུན་མི་ཆད་པར་ཇེ་མང་དུ་འགྲོ་ངེས་རེད།” ཅེས་བརྗོད་འདུག   

ནང་སོག་ཝུའུ་ཧྲིན་ཆི་རྫོང་ནི་རྒྱ་ནག་ཧྲན་ཞི་ཞིང་ཆེན་དང་ཉིན་ཞཱ་ཧེ་རིགས་རང་སྐྱོང་ཁུལ་གཉིས་དང་མཐའ་འབྲེལ་ས་ཁུལ་ཡིན་པ་དང་། རྫོང་ཡོངས་ལ་ས་ཁྱོན་སྤྱི་ལེ་གྲུ་བཞི་མ་ ༡༡༦༤༥ ཡོད་པ་རེད།   དེང་སྐབས་ས་ཁུལ་དེར་མི་གྲངས་ཁྲི་ ༡༠ ཡོད་པའི་ནང་། སོག་རིགས་མི་ཁྲི་ ༣ མ་གཏོགས་མང་ཆེ་བ་རྒྱ་རིགས་ཡིན་འདུག  

 གསར་འགོད་པ། ཚེ་རིང་རྒྱལ།