འཇམ་མགོན།
ང་ཚོས་ཡིད་གཟབ་དང་བཤད་སྟངས་མ་ནོར་བ་ཞིག ཁྱབ་བསྒྲགས་མ་འཕྱུག་པ་ཞིག་བྱེད་དགོས། ངས་འདི་ལྟར་བརྗོད་དགོས་དོན་ནི་བོད་དོན་འདི་ཟ་ངེ་ཟེང་ངེ་ཞིག་དང་ཉ་གེ་ཉོག་གེ་ཞིག་བྱས་ནས་བཤད་ན་རྩ་བ་ནས་འགྲིག་ཐབས་མེད་ལ། གང་འདོད་འདོད་བཞིན་བཤད་ན་དེ་བས་ཀྱང་ཡོང་ཐབས་མེད། སྐད་ཆ་ལ་ལ་ཞིག་བསྒྲོག་རྒྱུ་ལས་མ་བསྒྲགས་ན་བཟང་བ་དང་། ལ་ལ་ཞིག་ཡིད་གཟབ་དང་འགྲོ་ཤེས་འདུག་ཤེས་ཤིག་གི་སྟངས་ནས་ཁྱབ་སྤེལ་བྱས་ན་ལེགས།
བོད་དོན་དྲིལ་བསྒྲགས་དང་བོད་མི་ཡར་ལངས་ཀྱི་སྐབས་རྒྱ་ནག་ལ་ངན་གཤིས་ཤིག་དང་ཐབས་ལམ་ཞིག་ཡོད་པ་ནི། དང་ཐོག་ཕྱི་སྡོད་བོད་མི་རྣམས་ལ་སྐད་འབོད་བྱེད་དུ་བཅུག གང་འདོད་སྒྲོག་ཏུ་བཅུག བར་མཚམས་མེད་པར་ཁྱབ་སྤེལ་བྱེད་དུ་འཇུག་བཞིན་ཡོད། ང་ཚོས་ཇི་ཙམ་སྐད་འབོད་བྱས་ཀྱང་རུང་། ཇི་ཙམ་ངན་བཤད་བྱས་ཀྱང་རུང་། རྒྱལ་སྤྱི་དང་མི་དམངས་ཀྱི་སྡིངས་ཆའི་སྟེང་ལ་གང་ལ་གང་ཙམ་གྱི་གདེངས་འཇོག་སླེབས་མཚམས། རྒྱ་གཞུང་ལྷོད་སྡོད་ངང་ནས་མཐའ་དོན་དོན་གནད་ཆུང་ངུ་ཞིག་རྒྱལ་སྤྱིའི་ཐོག་གཡུག་ནས་ཁྱབ་བསྒྲགས་མདོར་ཙམ་བྱས་རྗེས། ང་ཚོ་དང་ང་ཚོའི་གཞུང་གིས་ཁོ་ཚོས་བརྗོད་བཞིན་པའི་གནད་དོན་དེ་འགྲེལ་བརྗོད་དང་སེལ་མ་ཐུབ་པའི་དཀའ་ངལ་ངང་ལྷག་ནས། དེ་སྔོན་བསྒྲགས་པའི་བསྒྲགས་གཏམ་དང་ངར་ཤུགས་རྣམས་རང་བཞིན་གྱིས་བརླག་འགྲོ་བ་རེད།
དཔེ་མཚོན་ཙམ་ཞིག་གི་སྟེང་ནས་བརྗོད་ན། ༢༠༠༨ལོའི་ས་བྱི་ཞི་རྒོལ་ཆེན་མོའི་སྐབས་བྱེས་འབྱོར་གཞུང་དང་བོད་མི་ཚོས་སྐད་འབོད་དང་ཁྱབ་བསྒྲགས་གང་ལ་གང་འཚམ་གནང་བ་རེད། རྒྱལ་སྤྱིའི་སྟེང་ལ་ཡང་གོ་གནས་ཀྱི་ཚད་རིམ་ཡག་པོ་བཟུང་བ་རེད། རྒྱ་གཞུང་དུས་ཡུན་གང་འཚམ་གཉིད་ཁུག་པ་བཞིན་སྣང་མེད་དང་དོན་གནད་ཆེར་བཟུང་མེད་པའི་ངོ་བོའི་ཐོག་བསྡད་ནས། མཐའ་མཇུག་ཚིག་སྐམ་གཅིག་གཡུག་པ་རེད། ༸གོང་ས་མཆོག་གིས་ངན་སྐུལ་འོག་ནས་བོད་མི་ཚོས་ངོ་རྒོལ་བྱས་པ་རེད་ཞེས་ཚིག་དོན་དེ་བསྒྲགས་མ་ཐག་ང་ཚོ་དང་ང་ཚོའི་གཞུང་གིས་དེ་༸གོང་ས་མཆོག་མིན་པའི་གསལ་བཤད། རྒྱལ་སྤྱི་ལ་ར་སྤྲོད་གསལ་བོ་ཞིག་བྱས་པའི་རྗེས་བོད་མིའི་ཞི་རྒོལ་གྱི་དྲོད་ཡལ་ཕྱིན་པ་རེད་ལ། རྒྱལ་སྤྱིའི་ཐོག་ལ་ཡང་ར་སྤྲོད་མུ་མཐུད་མ་བྱུང་བར་འདི་ལྟར་ཁུ་སིམ་མེར་གཏིང་བརྗེད་ལྟ་བུ་ཆགས་པ་རེད།
དེས་སྟབས་ཀྱིས་བོད་ནང་དུ་ཞི་རྒོལ་གང་རུང་ཞིག་བྱུང་རྗེས་ང་ཚོ་ལ་གྲ་སྒྲིག་བརྣལ་མ་ཞིག་དགོས་ལ། གློ་བུར་ཐོལ་རྒྱག་གི་ལས་དོན་མི་བྱེད་པར་སྔ་ཕྱིར་གཉིས་ལ་བསམ་ཞིབ་མཐིལ་ཕྱིན་ཞིག་དང་བློ་རྒྱ་ཡངས་བོ་ཞིག་དགོས་པ་འདུག ཐེངས་འདིའི་སྐུ་ཕུང་མཆོད་མེ་རུ་ཕུལ་བ་འདི་ཡང་འབྲི་མཁན་ཚོས་དྲན་ཚུལ་མི་བྱེད་ལ་བསྒྲགས་མཁན་ཚོས་ཀྱང་ཡིན་ཤག་མི་བྱེད་པར། གོ་རིམ་ཞིག་དང་སྔ་གཞུག་ཞིག་ཡོད་པའི་ཐོག་ནས་ལས་འགུལ་སྤེལ་བ་ལས་ཡང་བསྐྱར་རྒྱ་ནག་གི་གནད་དོན་ཆུང་ངུ་ཞིག་རྒྱལ་སྤྱིའི་སྟེང་གཡུག་རྗེས་ང་ཚོས་དེའི་སྐྱོན་གནད་སེལ་མ་ཐུབ་པར་ལྷག་པ་ལྟ་བུ་བྱེད་མི་རུང་ངོ་།།
གྲོགས་གཡུ་རྔོགས་ལགས། སྐུ་ཉིད་ཕེབས་པ་ཧ་ཅང་དགའ་ཡོད།
ཉིད་ཀྱིས་གསུངས་བ་དེ་དང་བསམ་རྒྱ་དེ་འདྲ་ཞིག་ང་ཚོའི་ཤེས་ཡོན་པ་ཚང་མ་ལ་ཡོད་ན་ཅི་མ་རུང་བསམ་པའི་འདོད་བློ་ཡང་དེ་རིང་ང་ལ་སྐྱེ་རུ་བཅུག་སོང་།
དྲང་མོར་རེད་པེ་ཅིན་སྲིད་གཞུང་གིས་གང་འདོད་དང་གང་དྲན་བཤད་པ་ཚང་མ་རྒྱལ་སྤྱི་ཅན་དུ་འགྱུར་དོན་ལ་ང་ཚོ་དང་ང་ཚོའི་གཞུང་གིས་བསམ་ཞིབ་གནང་དགོས་པ་འདུག་ལ། ལྷད་དོན་ང་ཚོ་དོན་གནད་གཅིག་གི་ཐོག་ལ་མགོ་བོ་རྦད་དེ་འཐོམ་ནས་བསྡད་ན་ཉེན་ཁ་འདུག ཡིན་ཡང་ཉེན་ཁ་འདུག་ཞེས་པ་ཙམ་གྱིས་སུས་ཀྱང་ཡ་ལེན་མི་བྱེད་ལ། ད་དུང་རང་རང་གི་དྲན་ཚུལ་ཁོ་ན་བདེན་པ་ཡིན་པར་བསྒྲོགས། རང་ཉིད་བདེན་ཚད་ལས་གཞན་གྱི་བསམ་ཚུལ་ནོར་བར་འདོད་པ་དེས་ཉེར་ལེན་གྱིས་ང་ཚོ་ལ་དུས་ནམ་ཡང་འབབ་ས་བདེ་བ་ཞིག་རྙེད་མི་སྲིད་བསམ།
ངའི་རེ་བ་ཡང་ཉིད་ཀྱི་འདོད་ཚུལ་འདི་བཞིན་ང་ཚོ་ཚང་མས་བསམ་ན་ང་ཚོ་ཡང་ཐབས་རྡུགས་ཤིག་ཡིན་མི་སྲིད་ལ། ཐབས་རྡུགས་པའི་ལམ་ཁ་ཞིག་ལ་ཕྱོགས་བསྐྱོད་ཀྱང་དུས་ནམ་ཡང་བྱེད་མི་སྲིད་འདོད།
གྲོགས་རང་དབང་རྒྱལ་ལགས། སྐུ་ཉིད་ཀྱི་བསམ་ཚུལ་དེ་འདྲ་ཞིག་ངས་སྔ་ས་ནས་འདོད་ཡོད་ལ་ཁ་ནས་ཕྱིར་འབུད་སྟངས་མ་ཤེས་བར་ལྷག་པ་རེད། ངོ་མ་རེད་རྒྱ་ནག་གིས་ང་ཚོ་ལ་མི་འོས་པའི་ཚིག་ངན་ཞིག་བརྗོད་རྒྱུ་ཡིན་པ་ནི་ཚང་མ་གསལ་གསལ་ཐིང་ཐིང་ཡིན་ལ། དེ་འདྲའི་ཚིག་ངན་ཞིག་མི་བརྗོད་པའི་སྟ་གོན་དང་ལས་འགུལ་ཞིག་ཀྱང་དང་ཐོག་ནས་སྤེལ་དགོས་པ་འདུག ང་ཚོས་ཐད་ཀར་བྱུང་བའི་གནད་དོན་ཁོ་ན་ལ་བལྟས་ནས་ངར་ངར་བྱེད་པ་ལས་དེའི་མཇུག་འབྲས་ལ་བསམ་བློ་གཏོང་གི་མི་འདུག དོན་དངོས་ཐོག་དེའི་མཇུག་འབྲས་ལ་བསམ་བློ་བཏང་ནས་ལས་འགུལ་སྤེལ་ན་རྒྱ་ནག་གིས་ཀྱང་དོན་མེད་༸གོང་ས་མཆོག་ལ་སྐུར་འདེབས་བྱེད་མི་ཕོད་ལ། སྐུར་བ་འདེབས་ན་ཡང་དོན་དངོས་ཀྱི་རྒྱུ་མཚན་དང་བརྡར་ནས་འདེབས་པ་ལས་ད་ལྟའི་ནང་བཞིན་གང་དྲན་ལྟ་བུ་ཞིག་ཡོང་མི་ཐུབ།
དེ་བས་ཁྱོད་ཀྱི་གསུངས་བ་ལྟར་ང་ཚོ་ལ་ཛ་དྲག་འབྲེལ་མཐུད་ཚོགས་ཆུང་ཞིག་དགོས་ངེས་རེད་ལ། ཛ་དྲག་འབྲེལ་མཐུད་དེ་ཡོད་ན་མི་དམངས་དང་གཞུང་བཅས་ལ་དྲན་སྐུལ་དང་སྐུལ་འདེད་བྱས་ན་འབྲི་མཁན་ཚོས་ཀྱང་རང་རང་གི་འདོད་ཚུལ་འབྲི་མི་ཐུབ། གླེང་འདེབས་མཁན་ཚོས་ལ་ཡང་བར་ལྷག་གི་ཁེ་བཟང་ཞིག་རྙེད་མི་ཐུབ། དེ་མིན་འདི་ལྟར་རང་སྒར་འགྲོ་ན་རང་རང་མ་ཤི་རང་རང་ལས་དོན་དམ་གྱི་གོ་རྟོགས་ཤིག་ཡོང་བཞིན་མེད་པའི་ཚོར་སྣང་བྱུང་།
འཇམ་མགོན་ལགས་ཀྱི་བསམ་ཚུལ་འདི་དུས་ལ་བབ་པའི་གླེང་གཞི་དེ་རེད་འདུག རེ་བ་ལ་དཔྱད་མཆན་འདེབས་མཁན་དག་གིས་དོ་སྣང་ཆེ་ཙམ་བསྐྱེད་ནས་ཕུ་འདེད་ཅུང་ཙམ་རེ་བྱེད་ཐུབ་སོང་ན་དགེ་ཕན་ཆེ་བ་འདུག་བསམ་བྱུང་།
ཕྲན་ལ་མཚོན་ཀྱང་མི་ལོ་བཅུ་ལྷག་གི་རིང་བཙན་བྱོལ་བའི་འཚོ་བ་འདི་སྐྱེལ་ནས་ཨམ་ཅོག་ཅོར་ཅོར་དང་མིག་རིག་རིག་བྱས་བསྡད་པའི་རིང་། པེ་ཅིན་གཞུང་གིས་རྒྱལ་སྤྱིའི་ཁྲོད་བོད་འདི་རྒྱ་ནག་གི་ཆ་ཤས་ཡིན་ཚུལ་དང་། དེ་བཞིན་ཁ་བྲལ་རིང་ལུགས་བའི་ངན་ཇུས། མགོ་སྐོར། ཐ་ན་སྐུལ་སློང་བྱས་ནས་འཇིགས་སྐུལ་བྱེད་འཆར་ཡོད་ཚུལ་སོགས་གླེང་འདེབས་གོམས་དུ་གྱུར་པའི་བྱ་སྤྱོད་འདི་རིགས། པེ་ཅིན་གཞུང་གི་ཞལ་འདོན་གཏིང་ནག་པོ་དེ་རེད། དེ་བཞིན་རྒྱལ་སྤྱིའི་སྒང་གི་སྲིད་དོན་པ་ཚོས་ཀྱང་ཡིན་ལ་མིན་གྱི་སྐད་ཆ་རེ་བཤད་ནས་རང་ཉིད་ཀྱི་འདོད་དོན་འགྲུབ་སོང་ན། དེ་གས་འགྲིག་བསྡད་ཡོད་བཟོ་བལྟ་ཐེངས་མང་ལ་འུ་ཅག་གིས་མཐོང་ནས་འཕྲད་ཀྱིན་བའི་བྱ་བ་རེད། སྐབས་རེ་རྒྱལ་སྒང་གི་སྲིད་དོན་པ་ཚོས་དྲང་བདེན་ལ་དེ་ཙམ་རྒྱབ་སྐྱོར་བྱེད་ཐུབ་ཀྱིན་མེད་པའི་ཉམས་དེ་ཕྱིར་ཐོན་ནས་ཡོང་དུས། ང་ཚོས་དུས་ཡུན་སྦྲེལ་དེ་པེ་ཅིན་གཞུང་གིས་བསམ་བཞིན་དུ་འུ་ཅག་གདོང་ལ་བྱུགས་བའི་ནག་རྩི་སྟེང་། དཀར་རྩི་འབྱུག་རྒྱུའི་ལས་དེ་དམིགས་བྱ་རང་ལ་བཟུང་། ནུས་བ་རྩལ་ཏུ་བཏོན། ཛ་དྲགས་སྐབས་ཀྱི་གནས་སྟངས་ལ་བབ་པའི་འཐབ་རྩོད་རིམ་པ་དེ་ག་ལེར་རྒྱལ་སྤྱིའི་སྲིད་སྟེགས་ཀྱི་གནག་སྡུར་ཁྲོད་ལ་བསྟིམས་བཞིན་པ་རེད།
དཔེར་ན་་་ ཁ་སང་དེ་རིང་དྲ་ཐོག་འདིར་རང་རང་གི་བསམ་པའི་དཔུང་རོགས་ལ་ལུང་འདྲེན་ལུང་བ་གང་རེ་དྲུད་ནས་ངར་ངར་ཤོར་ཤོར་ར་ཡོད་པའི་གནས་སྟངས་འདི་ཡང་པེ་ཅིན་གཞུང་གིས་བཟོས་བ་ཤ་སྟག་རེད། འདི་ལྟར་བསམ་པའི་དབང་གིས་གང་ཅིའི་ཐད་ནས་བསྐྱར་ཞིབ་བྱེད་རྒྱུའི་ལས་ཞིག་ལྷག་ནས་བསྡད་འདུག་བསམ་པ་དྲན་བྱུང་།
འཇམ་མགོན་ལགས།
གང་ལྟར། ཁྱོད་ཀྱིས་བརྗོད་ཀྱིན་པའི་དཀའ་ངལ་འདི་ནས། ཟུར་དུ་ཛ་དྲག་འབྲེལ་མཐུད་ཞིབ་འཇུག་ཚོགས་ཆུང་ཞིག་མ་ཡོད་པས་རེད་བསམས་སོང་། གལ་སྲིད། དེ་འདྲའི་བརྒྱུད་ལམ་ཞིག་གཞུང་གི་ངོས་ནས་སྔ་ས་ནས་གྲ་སྒྲིབ་བྱས་ཡོད་རྒྱུ་ཡོད་ན། དགོན་སྡེ་དང་མི་སྒེར་བྱེ་བྲག་པའི་མིང་ཐོག་ནས་ཁྱབ་སྤེལ་བྱེད་མི་དགོས་པར་གཞིས་བཞུགས་བོད་མིའི་ཛ་དྲག་གི་གནས་ཚུལ་དེ། རྒྱལ་སྤྱིའི་ཐོག་ལ་དྲིལ་བསྒྲགས་བྱེད་ཕྱོགས་དེ་མགོ་རྔ་ཡོད་པ་ཞིག་དང་གྲུབ་འབྲས་ཡོད་པ་ཞིག་ཏུ་འགྱུར་གི་རེད་འདོད་དོ།།
གལ་སྲིད། དེ་འདྲའི་ཛ་དྲག་འབྲེལ་མཐུད་ཞིབ་འཇུག་ཚོགས་ཆུང་ཞིག་ཡོད་ན། གཞུང་ངོས་ནས་བཀོད་ཁྱབ་བཏང་ནས། བོད་ནང་གི་ཛ་དྲག་གི་གནས་ཚུལ་སུས་སྔ་སུས་མགྱོགས་མི་བྱེད་པར་གོ་རིམ་དང་འཆར་གཞི་ཡོད་པའི་སྒོ་ནས་གཞུང་ངོས་ནས་གསར་འགོད་ལྷན་ཚོགས་རེ་དུས་ཐོག་ཏུ་བསྐོངས་ནས་ཛ་དྲག་གི་གནས་ཚུལ་རྣམས་ངོ་འཕྲོད་བདེ་བ་དང་། ཁུངས་བཙན་པ་སོགས་ལ་རང་བཞིན་གྱིས་འགྱུར་འགྲོ་གི་མ་རེད་དམ།
ལྷག་པར་དུ། དེ་འདྲའི་བརྒྱུད་ལམ་ཞིག་བསྐྲུན་པ་ཡིན་ན། འབྲེལ་མཐུད་ཉམས་ཞིབ་ཚོགས་ཆུང་གི་ནང་དུ། བོད་རྒྱ་དབྱིན་ཧིན་སྐད་སོགས་ཀྱི་བསྒྱུར་ཐུབ་མཁན་མི་སྣ་གང་མང་ཞིག་བསྡུ་རུབ་བྱས་ནས། དུས་གཅིག་ཉིན་གཅིག་ལ་ཛ་དྲག་གི་གནས་ཚུལ་སྤེལ་བ་ཡིན་ན། དམིགས་བསལ་གྱིས་བོད་གཞུང་གི་ཆེ་མཐོང་དང་ཛ་དྲག་གི་གནས་ཚུལ་དེ་ཚད་གཞི་ཇེ་ཡག་ཏུ་འགྲོ་ངེས་པས་ན། དེ་ལྟར་ཡོང་བར་དྲ་གྲོགས་ཚང་མའི་ངོས་ནས་བསམ་ཚུལ་རེ་འདོན་རོགས་ཞུ།
མ་གཏོགས་ཉིས་སྟོང་བརྒྱད་ནས་ད་ལྟའི་བར་དུ། བཙན་བྱོལ་བའི་གནས་ཚུལ་སྤེལ་ཕྱོགས་ནི། དགོན་པ་ཞིག་དང་མི་སྒེར་ཞིག་གི་ཁ་ལ་ཉན་བསྡད་པའི་གནས་ཚུལ་དེ་ཆེས་མཚར་བོ་ཞིག་རེད། ལྷག་པར་གོ་རིམ་དང་འཆར་གཞི་མེད་པའི་སྒོ་ནས་གང་འདོད་འདོད་དུ་གནས་ཚུལ་སྤེལ་ཕྱོགས་དེས་རང་རང་གི་མིང་འགྲོ་ཕྱོགས་ལ་སྙོབས་ཀྱིན་པའི་བཟོ་ཞིག་མི་འདུག་གམ།
བཀའ་ཁྲི་བློ་བཟང་སེངྒེས་ཁངས་བླངས་ཟིན་པ་ལྟར། ད་ཡིན་ན། ཉིས་སྟོང་བརྒྱད་ལོའི་ཞི་རྒོལ་ལ་བསྐྱར་ཞིབ་བྱས་ཟིན་ཡོད་རྒྱུ་རེད། ཡོད་ན། ད་ནས་བཟུང་། གཞིས་བཞུགས་སྤུན་ཟླ་རྣམ་པའི་ངོས་ནས་རང་ལུས་མེར་བསྲེགས་ཀྱིས་ཞི་རྒོལ་བྱེད་སྟངས་ཀྱི་གནས་ཚུལ་དེ་རྒྱལ་སྤྱིའི་ཐོག་ཏུ་ཞིབ་ཚགས་དང་གོ་རིམ་ཡོད་པའི་སྐྱེལ་རན་པའི་དུས་ཚོད་ཡལ་གྱིན་པ་མ་ཡིན་ནམ།
རང་དབང་རྒྱལ་ལགས། སྐུ་ཉིད་འདི་ལྟར་ཕེབས་ཡོང་བསམ་མ་བྱུང་ལ་ད་དུང་འདི་འདྲ་ཞིག་བརྗོད་ཡོང་ཡང་དེ་བས་ཀྱང་བསམ་མེད།
བསམ་མ་བྱུང་ས་ཞིག་ནས་ང་ལ་ཡང་བློ་རྒྱ་ཞིག་བསྐྱེད་ཐ་ཞེ་ན་སྤྲེལ་ལད་རེད་མ་བསམ་རོགས། དྲང་མོར་བརྗོད་ན་ང་ཚོ་དང་ང་ཚོའི་སྤྱི་ཚོགས་འདི་གཙོ་ཆེར་རང་ཉིད་གཟབ་ས་ཞིག་ལ་ལངས་ནས་ད་གཟོད་འུ་ཤོད་བྱེད་པ་དང་། རང་ཉིད་སྐྱོན་མེད་ས་ཞིག་ལ་བསྒྲེགས་ནས་ད་གཟོད་གཞན་ལ་འགྲིག་མི་འདུག་ཟེར། དེ་ནི་ང་ཚོའི་དགོས་འདུན་མིན་ལ་ཐབས་རྩོད་ཀྱང་མ་རེད་འདོད། གང་ཞིག་ན་འགྲིག་གི་མེད་པ་དེ་སར་ཕྱོགས་ནས་ཁ་ཕྱོགས་དང་ལངས་ཕྱོགས་འཚོལ་དགོས་པ་ལས་བཤད་རྗེས་མི་འབྲངས་བ་དང་། བསྒྲུབ་ཚུལ་ཡིན་མིན་བརྟག་རྒྱུ་ནི་རང་ཉིད་ཁོ་ན་ལ་ཐུག་ཡོད་བསམ།
དེ་བས་ཀྱང་ང་ཚོ་ལ་གཅིག་དགོས་པ་ནི་རང་ཉིད་ཀྱི་འདོད་ཚུལ་ཁོ་ན་ཡིན་མི་རུང་སེམས། རང་ཉིད་ཀྱི་བསམ་ཚུལ་དང་འདོད་དོན་ཁོ་ན་གཅེས་འཛིན་ལ་ཤོར་རྐྱེན་རྒྱ་གཞུང་གིས་ཀྱང་བར་ལྷག་དེ་ནས་ང་ཚོ་ལ་གཏོར་རྒོལ་གྱི་ཚིག་ངན་གང་ཞིག་འོས་ཤིང་འཚམས་མིན་གྲ་སྒྲིག་སྔ་ས་ནས་བྱས་ཡོད་པ་རེད། ཚིག་ངན་གཅིག་བརྗོད་ཐེངས་གཅིག་གིས་ང་ཚོ་གཞི་ནས་གཉིད་སངས་བཞིན་ཡོད་རུང་། གཉིད་སངས་བའི་རྗེས་ནས་ཇི་ལྟར་བརྗོད་རུང་ཆུ་ལ་རྡོ་གཡུག་པ་ལྟ་བུ་ལས་ཞེ་དྲག་ཡ་ལན་དང་ཉན་འཇོག་བྱེད་བཞིན་མེད། དེས་སྟབས་ཀྱིས་ང་ཚོས་ཀྱང་སྟ་གོན་དང་རང་སྒེར་ཚིག་ངན་ཆུང་ངུ་ཞིག་ལ་གཏོར་རྒོལ། གཉའ་གནོན། ཁ་ཕྱོགས་འགྱུར་མི་རུང་བར་བ་ངེས་དགོས་པ་ཡིན།
བསམ་ཚུལ་འདིའི་རིགས་ཀྱིས། བཙན་བྱོལ་བའི་ལས་འགུལ་སྤེལ་ཕྱོགས་ལ་གཟབ་དགོས་སའི་ཕྱོགས་སུ་ཁྲིད་ཀྱིན་པ་ཡག་པོ་འདུག་རུང་། གཞུང་མང་ཚོགས་སྒེར་སུ་ཞིག་གིས་ལས་འགུལ་སྤེལ་སྐབས་སུ། འདིའི་རིགས་ཀྱི་བསམ་ཚུལ་ལ་དོ་སྣང་བྱེད་མཁན་ཡོད་དམ།
ད་ལྟའི་བར་དུ། བཙན་བྱོལ་བའི་གཞུང་མང་སྒེར་ཚོགས་པ་སོགས་ཀྱི་ངོས་ནས་ལས་འགུལ་རབ་དང་རིམ་པ་མང་སེ་སྤེལ་ཡོད་པ་རེད་དེ། མཉམ་རུབ་ཀྱི་སྒོ་ནས་འབོད་སྒྲ་གཅིག་དང་གཅིག་གྱུར་གྱི་ལངས་ཕྱོགས་ཤིག་མ་བཟུང་བར་རང་རང་གི་ས་ནས་རང་སྣང་དྲན་གྱིས་ལས་འགུལ་སྤེལ་བ་དེའི་མཇུག་འབྲས་དེ་སྤྱི་ལ་ཁྱབ་པ་ཞིག་མ་བྱུང་བ་འདྲ།
ད་ཡིན་ན། འདས་པའི་ཉམས་མྱོང་དང་ལེན་བྱས་ཏེ། ད་ལྟའི་ཁ་ཕྱོགས་ལ་འགྱུར་བ་ཞིག་བཏངས་ནས་སང་ཉིན་གྱི་ལས་འགུལ་གྱི་གྲུབ་འབྲས་འབུར་དུ་ཐོན་སེ་ཞིག་གི་ཕྱོགས་སུ་འབད་དགོས་པ་ནི། བཙན་བྱོལ་བ་ཞིག་ལ་འཁྲི་བའི་འཐབ་རྩོད་བྱེད་ཕྱོགས་ཤིག་ཡིན་པ་འདྲ།
སང་ཉིན་ལས་དེ་རིང་གི་ལས་འགུལ་བྱེད་ཕྱོགས་འདི་གལ་གནད་ཆེ་བས་ན། དེ་རིང་གི་ལས་འགུལ་དེ་རིང་རང་ལ་སྨིན་ཐུབ་ཐབས་སུ་འབད་དགོས་པ་ནི། བཙན་བྱོལ་བ་ཞིག་ལ་མ་སྐུལ་རང་འཁྲིའི་ལས་འགན་ཞིག་རེད་ཨང་།
འདི་ནི། རྨི་ལམ་ཞིག་མིན་པར་ད་ལོའི་དཀྱིལ་ཤར་ཨེ་ཤ་ཡེའི་རྒྱལ་ཁབ་ཁག་ཅིག་གིས་དེ་རིང་གི་གྲུབ་འབྲས་དེ་དེ་རིང་རང་ལ་བླངས་པ་མ་ཡིན་ནམ། ང་ཚོས་མི་ལོ་ལྔ་བཅུ་ངང་སྒྲུག་བྱས་རུང་། དེ་རིང་མ་དགོས་སང་ཉིན་གྱི་གྲུབ་འབྲས་གང་ཞིག་འགྲོ་གི་ཡོད་མེད་ཆ་མ་མཚལ་བ་འདི་མ་རེད་དམ།
མ་གཞི་ངའི་བསམ་ཚུལ་ནོར་མེད་ན། བཙན་བྱོལ་བའི་སྲིད་བྱུས་འཛིན་མཁན་དག་ལ། ཆབ་སྲིད་ཀྱི་བསམ་བློ་དང་འགན་འཁུར་ཏག་ཏག་ཅིག་མ་ཡིན་པས་ཡིན་ན་ཐང་། དེ་ལས་ཀྱང་ཚབས་ཆེ་བ་ཞིག་ལ་རྒྱ་གཞུང་དང་དེའི་སྲིད་བྱུས་ལ་ཉམས་ཞིབ་བྱེད་མཁན་ནི། ཆེས་ཉུང་ངུ་ཞིག་ཡིན་པ་མ་ཟད། རྒྱ་གཞུང་གིས་བོད་ཐོག་ལ་ཉམས་ཞིབ་བྱེད་སྟངས་དང་བསྡུར་བ་ཡིན་ན། ཧ་ལམ་མེད་པའི་ཚད་དུ་ལྷུང་བ་མ་ཡིན་ནམ།
དྲང་མོར་བཤད་ན་བརྗོད་གཞི་འདི་དང་བསམ་ཚུལ་འདི་ལ་གང་མང་ཞིག་བརྗོད་རྒྱུ་འདུག་མོད། ང་ཚོ་ནི་འཕོག་ཐུག་འགྲོ་ཆོག་ཆོག་རྐྱང་ཡིན་སྟབས་བཤད་སྙིང་མ་སྤྲོ། ཡིན་ཡང་བསམ་ཚུལ་འདི་སྤེལ་སྐབས་ཤིག་ལ་སྤེལ་བ་ཧ་ཅང་ལེགས།