བོད་མིར་ལྟ་རྟོག་བཀག་སྡོམ་བྱེད་སྤྱད་ཀྱི་ལག་ཁྱེར་གསར་བ།

ཉེ་ཆར་བོད་ནས་གསར་དུ་དབུས་སྣེ་ལེན་ཁང་ལ་འབྱོར་བའི་ཕ་ཡུལ་མཛོ་དགེ་ནས་ཡིན་པའི་གྲྭ་བསྟན་འཛིན་ལགས་སུ། ད་ལྟའི་ཆར་བོད་ནང་དུ་བཀག་སྡོམ་གནས་སྟངས་ག་འདྲ་ཡིན་མིན་དྲིས་སྐབས། ༢༠༠༨ ལོའི་ཚུན་ལ་གསར་དུ་བཟོས་པའི་ཐོབ་ཐང་ལག་ཁྱེར་དེ་ནི་བོད་མི་ཚོར་མཚོན་ན། རྒྱ་གཞུང་གིས་ཕྱོགས་ཡོངས་ནས་ལྟ་རྟོག་བཀག་སྡོམ་བྱེད་སྤྱད་ཀྱི་ལག་ཆ་གསར་བ་ཞིག་རེད་ཟེར།

གྲྭ་མིང་ཐོགས་ཚུལ་ལ་དོགས་འདྲོག

གྲྭ་བསྟན་འཛིན་ལགས་ཀྱིས་བརྗོད་པ་ལྟར་ན།  ཕྱི་ལོ་ ༢༠༠༨ ལོར་བོད་ས་ཡོངས་སུ་ཞི་རྒོལ་བྱུང་རྗེས། རྒྱ་གཞུང་གི་ཉེན་རྟོག་པ་རྣམས་དགོན་པའི་ནང་ཡོང་སྟེ། གྲྭ་ཤག་རེ་རེར་ཉུལ་ཏེ་ལོ་ ༡༢ ཡན་གྱི་གྲྭ་བ་ཡོངས་ལ་ཐོབ་ཐང་ལག་ཁྱེར་བཟོས་ཡོད་པ་དང་།  དེ་དང་མཉམ་དུ་གྲྭ་ཤག་རེ་རེ་བཞིན་ས་ཁྱོན་འཇལ་བ་དང་སྒོ་རྟགས་སྦྱར་པ་མ་ཟད། གྲྭ་ཤག་རེ་རེར་གྲྭ་བ་ག་ཚོད་ཡོད་པ་དང་། ཁོ་ཚོ་ཕན་ཚུན་འབྲེལ་བ་གང་ཡིན། ཕ་མ་སྤུན་མཆེད་ཀྱི་གནས་སྟངས། གྲྭ་བ་རེ་རེའི་མིང་དང་ལོ་རྒྱུས་ཆ་ཚང་བྲིས་ཏེ། ས་གནས་རྫོང་ཐོག་གི་སྒེར་གཉེར་མགྲོན་ཁང་ཚུན་ནང་མི་རེ་རེའི་ལོ་རྒྱུས་ཆ་ཚང་རྟོགས་ཐུབ་པའི་ཐོབ་ཐང་ལག་ཁྱེར་ཞིབ་བཤེར་གྱི་འཕྲུལ་ཆས་བཙུགས་ཏེ། གྲྭ་བ་རྣམས་ཀྱི་ཕྱོགས་སྐྱོད་དང་གནས་སྡོད་ཀྱི་ཐད་ལ་དམིགས་བསལ་གྱིས་ལྟ་རྟོག་ནན་མོ་བྱེད་བཞིན་ཡོད་འདུག  གྲྭ་བསྟན་འཛིན་ལགས་ཀྱིས་བརྗོད་རྒྱུར་  “ ༢༠༠༨ ལོའི་སྔོན་ལ་གྲྭ་བ་ཚོས་ཐོབ་ཐང་ལག་ཁྱེར་བཟོས་སྐབས། སྐྱ་ཆས་གྱོན་པའི་པར་དང་སྐྱ་མིང་འགོད་དགོས་ཀྱི་འདུག ༢༠༠༨ ལོའི་རྗེས་སུ་བསྐྱར་དུ་ཐོབ་ཐང་ལག་ཁྱེར་བཟོས་སྐབས། གྲྭ་ཆས་གྱོན་པའི་པར་དང་གྲྭ་མིང་འགོད་དགོས་ཀྱི་འདུག  དེའི་དམིགས་ཡུལ་གཙོ་བོ་ད་ལྟ་དགོན་པར་གྲྭ་བ་ཡིན་ཡང་། རྗེས་ཕྱོགས་གལ་སྲིད་གྲྭ་ལོག་བྱས་ཀྱང་ལྟ་རྟོག་བྱ་བདེ་བའི་ཆེད་དུ་རེད། ཐ་ན་མིང་ལ་བསྟན་པ་དང་རྒྱ་མཚོ་ཟེར་མཁན་ཚོར་ཡང་གྲྭ་བ་བྱས་མྱོང་མིན་ལ་ཞིབ་འཇུག་བྱེད་ཀྱི་འདུག ” ཅེས་བརྗོད་བྱུང་།

ཐོབ་ཐང་ལག་ཁྱེར་དྲ་ལམ་ལ་མཐུད་འདུག

དེང་སྐབས་ཀྱི་བརྡ་འཕྲིན་དུས་རབས་ནང་རྒྱ་གཞུང་གི་ཐོབ་ཐང་ལག་ཁྱེར་དེས། བོད་ནང་གི་བོད་མི་ཚོས་གནས་འཕྲིན་དྲ་བ་བརྒྱུད་ཕྱི་ཕྱོགས་ཀྱི་གནས་ཚུལ་ཤེས་རྟོག་ཐད་བཀག་རྒྱ་ཆེན་པོ་ཞིག་བཟོས་ཡོད་འདུག  གྲྭ་བསྟན་འཛིན་ལགས་ཀྱིས་བརྗོད་ན། ༢༠༠༨ ལོ་ཚུན་ནས་བཟུང་བོད་ཀྱི་ས་ཁུལ་ཁག་ནང་དྲ་ཁང་དུ་སྐྱོད་སྐབས་ཐོབ་ཐང་ལག་ཁྱེར་མེད་ཚེ་དྲ་རྒྱ་སྔོག་མི་ཆོག་པ་དང་། དྲ་ཁང་དུ་མཛུལ་སྐབས་ཐོག་མར་དྲ་བདག་གིས་གློག་ཀླད་ནང་ཐོབ་ཐང་ལག་ཁྱེར་ཞིབ་བཤེར་བྱེད་ཅིང་། དེ་ནས་སོ་སོའི་ཐོབ་ཐང་ལག་ཁྱེར་གྱི་ཨང་གྲངས་དང་། དྲ་བདག་གིས་སྤྲད་པའི་ཨང་གྲངས་གཉིས་ཀྱིས་གློག་ཀླད་ཁ་འབྱེད་དགོས་ཀྱི་ཡོད་འདུག དེ་ནི་དྲ་རྒྱར་ཞུགས་མཁན་མི་རེ་རེ་ཡིས་གློག་ཀླད་གང་གི་སྟེང་དུ་དུས་ཚོད་ཅི་ཙམ་ལ་བསྡད་ཡོད་མེད་དང་དྲ་ཚིགས་ག་རེ་སྔོག་ཡོད་མེད། གླེང་མོལ་གང་ཞིག་བྱས་ཡོད་མེད་ཞིབ་བཤེར་ཐུབ་ཀྱི་ཡོད་འདུག  གྲྭ་བསྟན་འཛིན་ལགས་ཀྱིས་བརྗོད་དོན། “ ང་རང་དུས་རྒྱུན་དྲ་རྒྱར་ཞུགས་རྒྱུར་དགའ་མོས་ཡོད། སྤྱིར་རྒྱ་གཞུང་གིས་ཕྱི་ཕྱོགས་ཀྱི་དྲ་ལམ་ཁག་བཀག་སྡོམ་བྱས་ཡོད་ཀྱང་། ༢༠༠༨ ལོའི་སྔོན་ལ་དྲ་རྒྱུར་ཞུགས་པར་དཀའ་ངལ་མེད་ལ། ཐབས་ཤེས་འདྲ་མིན་བརྒྱུད་ཕྱི་ནང་གི་གནས་ཚུལ་མང་པོ་ཤེས་ཐུབ་ཀྱང་། ༢༠༠༨ ལོའི་རྗེས་ནས་ཐོབ་ཐང་ལག་ཁྱེར་གྱི་ཐོག་ནས་དྲ་རྒྱར་ཞུགས་དགོས་སྟབས། ད་ཆར་ཕྱི་ཕྱོགས་ཀྱི་གནས་ཚུལ་ལྟ་ཀློག་ཁག་པོ་ཆགས་འདུག ” ཅེས་བརྗོད་བྱུང་།

ལྷ་ལྡན་གྲོང་ཁྱེར་རྒྱ་རིགས་ཀྱིས་ཁེངས་འདུག

གྲྭ་བསྟན་འཛིན་ལགས་ཉེ་སྔོན་ལྷ་སར་ཟླ་གསུམ་རིང་བསྡད་མྱོང་ཡོད་ཅིང་། ཁོས་རང་ཉིད་ལྷ་སར་སྡོད་སྐབས་ཀྱི་མཐོང་ཐོས་འགའ་ངོ་སྤྲོད་གནང་དོན། “དེང་སྐབས་ལྷ་ས་གྲོང་ཁྱེར་ནང་བར་སྐོར་དང་ར་མོ་ཆེ། པོ་ཏ་ལ་གཙོས་བོད་མི་འདས་སྡོད་ཁུལ་དུ་དམ་དྲག་ཆེན་པོ་འདུག  སེ་འབྲས་དགའ་གསུམ་གྱི་གྲྭ་བ་རྣམས་གྲོང་ཁྱེར་དུ་སྐྱོད་སྐབས་ངེས་པར་དུ་སྐྱ་ཆས་གྱོན་དགོས་ཀྱི་འདུག་ལ། སྲང་ལམ་དུ་གྲྭ་ཆས་གྱོན་མཁན་དག་ལ་དྲི་བརྩད་དང་ལྟ་རྟོག་བྱེད་ཀྱི་འདུག བོད་མི་མཇལ་སྐོར་བ་ཚོས་ཀྱང་པོ་ཏ་ལར་མཇལ་སྐབས་རྒྱ་སྒོར་ ༢ སྤྲད་དེ་འཛིན་བྱང་ཉོ་དགོས་ཀྱི་འདུག  པོ་ཏ་ལའི་ནང་གི་གནས་ཤན་པ་ཚང་མ་རྒྱ་མི་རེད། ཁོ་ཚོས་རྒྱ་མི་ཡུལ་སྐོར་བ་ཚོར་པོ་ཏ་ལའི་བརྩིག་ངོས་ཀྱི་རྒྱལ་དབང་སྐུ་ཕྲེང་ལྔ་དང་རྒྱ་ནག་གོང་མ་ལྷན་དུ་ཁྲི་བཞུགས་ཀྱི་ལྡེབས་རིས་དེར་ལོག་འགྲེལ་བརྒྱབ་སྟེ། བོད་ཀྱི་ལོ་རྒྱུས་བདག་དབང་ལ་འཁྱོག་བཤད་བྱེད་ཀྱི་འདུག གཞན་དེང་སྐབས་ལྷ་ས་གྲོང་ཁྱེར་ཧྲིལ་བོ་རྒྱ་མིས་གྲོང་ཁྱེར་ཆགས་འདུག་པ་མ་ཟད། ལྷ་སའི་བར་སྐོར་ནང་གི་བོད་པའི་ཁྱད་ཆོས་ལྡན་པའི་དངོས་རིགས་དང་། ཁ་བཏགས་དང་ཕྲེང་བ་སོགས་བཙོང་མཁན་ཕལ་ཆེ་བ་སི་ཁྲོན་གྱི་རྒྱ་མི་རེད། ཐ་ན་དགུ་མདུད་དང་ཕྱག་མདུན་སོགས་ཀྱང་རྒྱ་མིས་བཟོས་ཏེ་བོད་པར་བཙོང་གི་འདུག” ཅེས་བརྗོད་སོང་།

བླ་བྲང་དགོན་པའི་གྲྭ་བ་ཇེ་ཉུང་རེད།

གྲྭ་བསྟན་འཛིན་ལགས་ལོ་གཅིག་ལྷག་རིང་བླ་བྲང་དགོན་པའི་ནང་དཔེ་ཁྲིད་དུ་བསྡད་མྱོང་འདུག  ཁོང་གིས་ཤེས་རྟོག་བྱུང་བ་ལྟར་ན། བླ་བྲང་དགོན་པའི་གྲྭ་ཚང་དྲུག་གི་ནང་མཚན་ཉིད་གྲྭ་ཚང་ལ་རྒྱུན་དུ་ཆོས་རར་ཞུགས་མཁན་གྲྭ་བ་ ༤༠༠ ལྷག་དང་། གྲྭ་ཚང་གཞན་ལྔ་ལ་ཆ་སྙོམས་གྲྭ་བ་ ༢༣༠ རེ་བཅས། ད་ལྟ་བླ་བྲང་དགོན་པ་རང་ལ་ཁྱོན་སྡོམ་གྲྭ་བ་ཆིག་སྟོང་ལྷག་མ་གཏོགས་མེད་པ་དང་། དེ་མིན་ཕྱོགས་ཡོང་གི་དཔེ་ཁྲིད་པ་དང་གྲོང་ཆོག་པ་སོགས་ལའང་གྲྭ་བ་ ༨༠༠ ཙམ་ལས་མེད་སྐོར་བརྗོད། ཁོས་བརྗོད་དོན། “ དེང་སྐབས་བླ་བྲང་དགོན་པའི་ནང་ལོ་རེར་འཛིན་གྲྭ་གཅིག་རེ་མ་གཏོགས་ཚོགས་ཞུགས་བྱེད་འཇུག་གི་མེད་པ་དང་། འཛིན་གྲྭ་གཅིག་པུ་དེ་ལའང་གྲྭ་བ་ ༣༠  ལས་བརྒལ་ཆོག་གི་གི་མ་རེད། དེའི་ཁྲོད་གྲྭ་བ་ ༡༥ ནི་དགོན་པའི་ནང་གི་ཡུལ་སྐོར་སྣེ་ཤན་པ་དང་། ལས་ཀ་ཙག་ཙིག་བྱེད་མཁན་གྱི་ངོ་བོའི་ཐོག་ནས་བསྡུ་བཞིན་ཡོད་སྟབས།  ཟླ་གཅིག་གཉིས་རིང་ཆོས་རྭར་ཞུགས་རྗེས་ལས་བགོས་ལྟར་ལས་ཀར་ཞུགས་དགོས་ཀྱི་འདུག དེ་འཕྲོས་ཀྱི་གྲྭ་བ་ ༡༥ ནི་རྒྱུགས་སྤྲོད་ཀྱི་ངོ་བོའི་ཐོག་ནས་ཚོགས་ཞུགས་བྱེད་ཀྱི་ཡོད་མོད། དོན་དངོས་ཐོག་ཆོས་ལ་སློབ་གཉེར་བྱེད་མཁན་ལྔ་དྲུག་ཙམ་མ་གཏོགས་ཚོགས་ཐུབ་ཀྱི་མི་འདུག གྲྭ་ས་ཆེན་པོ་དེ་འདྲ་ཞིག་གི་ནང་ལོ་རེར་ཆོས་སློབ་གཉེར་བྱེད་མཁན་གྲྭ་བ་དེ་ཙམ་མ་གཏོགས་ཞུགས་མ་བཅུག་པ་ཡིན་ན། མ་འོངས་པར་རིམ་གྱིས་འཛིན་གྲྭ་རྒྱུན་ཆད་རྒྱུར་ཉེན་ཁ་ཆེན་པོ་འདུག” ཅེས་བརྗོད་བྱུང་།

བོད་པའི་སྨྲ་ལྕེ་གཅོད་ཀྱིན་འདུག

དེང་སྐབས་རྒྱ་གཞུང་གི་བོད་ཁུལ་གྱི་གཞི་རིམ་ཞིང་བ་དང་འབྲོག་པ་མང་པོ་རྒྱ་གྲོང་ལ་ཕབས་ཏེ་བོད་མིའི་རང་རྐྱ་འཕེར་བའི་འཚོ་བའི་སྒྲོམ་གཞི་མེད་པ་བཟོ་བ་དང་། བོད་མིའི་ཡུལ་སྲོལ་གོམས་གཤིས་མཐའ་དག་རྒྱ་སྒྱུར་གྱི་སྲིད་ཇུས་སྤེལ་བཞིན་པ་ལྟར།  གྲྭ་བསྟན་འཛིན་ལགས་ཀྱིས་སོ་སོའི་ཡུལ་ཕྱོགས་ཀྱི་དངོས་མཐོང་གནས་སྟངས་བརྗོད་པ་ལྟར་ན། རྨ་ཆུ་དང་ཀླུ་ཆུ། མཛོ་དགེ་སོགས་སུ་དེང་སྐབས་འབྲོག་པ་མང་པོ་རྫོང་གྲོང་དུ་ཕབ་བཞིན་པ་དེས། བོད་མི་ཚོས་ཡུལ་སྲོལ་གོམས་གཤིས་དང་སྐད་ཡིག་ལ་གཏོར་སྐྱོན་ཆེན་པོ་ཐེབས་ཡོད་པ་དང་། ཉེ་བའི་ལོ་འགའི་ནང་བོད་རིགས་གཞོན་སྐྱེས་ཤེས་ལྡན་པ་དག་གིས་སོ་སོའི་དབྱར་དགུན་གུང་གསེང་གི་དུས་ཚོད་སྤྱད་དེ།  དང་བླངས་ཐོག་སོ་སོའི་སྐད་ཡིག་སྲུང་སྐྱོབ་ཀྱི་ཟབ་སྦྱོང་འཛིན་གྲྭ་འཛུགས་ཀྱི་ཡོད་པ་དེ་དག་ཀྱང་ལོ་སྔོན་མ་ནས་རྒྱ་གཞུང་གིས་བཀག་སྡོམ་བྱས་ཡོད་འདུག་ལ། སློབ་གྲྭ་ཆུང་འབྲིང་གི་བོད་རིགས་སློབ་མ་མང་པོ་སྡེབས་གཅིག་ཏུ་རྒྱ་ནག་ལ་གཏོང་རྒྱུ་ཤུགས་ཆེ་རུ་བཏང་ཡོད་འདུག གྲྭ་བསྟན་འཛིན་ལགས་ཀྱིས་དཔེ་མཚོན་ཞིག་བརྗོད་དོན། “ འདས་པའི་ལོ་གཅིག་གི་ཡར་སྔོན་གྱི་དགུན་ཁའི་སློབ་གསེང་གི་དུས་སྐབས་ཤིག་ལ།  རྒྱ་ནག་ཞི་ཨན་དུ་བཏང་ཡོད་པའི་སློབ་གྲྭ་ཆུང་འབྲིང་གི་བོད་རིགས་སློབ་མ་ ༤༠ ལྷག་འགྲུལ་སྐྱེལ་རླངས་འཁོར་ཆེ་བ་ཞིག་གིས་རྨ་ཆུ་རྫོང་ཐོག་ཏུ་བསྐྱལ་སོང་། བྱིས་པ་དེ་དག་གི་བྱ་སྤྱོད་འཁྱེར་སྟངས་ཚང་མ་རྒྱའི་ཤུགས་རྐྱེན་ཐེབས་ཏེ། རྒྱ་མི་དང་གཅིག་པ་ཆགས་འདུག་ལ། ཐ་ན་སོ་སོའི་བོད་སྐད་ཀྱང་བརྗེད་དེ་ཕ་མ་དང་བྱིས་པའི་བར་བོད་སྐད་ཐོག་གོ་བརྡ་མི་འཕྲོད་པ་ཆགས་འདུག” ཅེས་བརྗོད་བྱུང་།

གསར་འགོད་པ། ཚེ་རིང་རྒྱལ།