བྱང་ཨ་རི་ཁུལ་གྱི་བོད་པའི་སློབ་གྲྭ་ཆུང་ཆུང་ཞིག

བྱང་ཨ་རིའི་ཁེལི་ཧྥོར་ནྱིའི་གྲོང་ཁྱེར་སན་ཧྥིརན་སིཀོ་བོད་རིགས་སྤྱི་མཐུན་ཚོགས་པའི་ངོས་ནས་ས་གནས་ཀྱི་བོད་རིགས་བྱིས་པ་ཚོར་དམིགས་ཏེ། འདས་པའི་ལོ་འགའི་གོང་ནས་གཟའ་མཇུག་གི་སློབ་གྲྭ་གསར་འཛུགས་ཀྱིས་བོད་རིགས་བྱིས་པ་ ༡༥༠ ཙམ་ལ་བོད་ཀྱི་སྐད་ཡིག་རིག་གཞུང་ངོ་སྤྲོད་བྱེད་ཀྱིན་ཡོད་སྟབས། གསར་འགོད་པ་ཆེད་སྐྱོད་ཀྱིས་གཟའ་མཇུག་གི་འཛིན་གྲྭ་དང་བསྟུན་ཏེ་སློབ་གྲྭའི་འདས་པའི་བྱུང་རབས་དང་། ད་ལྟའི་གནས་བབ། མ་འོངས་པའི་དམིགས་ཡུལ་བཅས་ཀྱི་སྐོར་ལ་ས་གནས་བོད་རིགས་སྤྱི་མཐུན་ཚོགས་པའི་ཕྱི་འབྲེལ་དང་དྲིལ་བསྒྲགས་འགན་འཛིན་ཐེ་པོ་སྤྲུལ་སྐུ་ལགས་དང་། དེ་གའི་སློབ་ཕྲུག་སྐོར་ཞིག་ལ་གླེང་མོལ་གྱི་ཚུལ་དུ་བཅར་འདྲི་ཞུས་པ་ཡིན།  

ཐོག་མར་གསར་འགོད་པ་ཐེ་པོ་སྤྲུལ་སྐུ་ལགས་ལ་ཐུག་འཕྲད་ཀྱིས་སློབ་གྲྭ་དེའི་ཐོག་མའི་བྱུང་རིམ་སྐོར་ལ་གླེང་མོ་བྱས་སྐབས། ཁོང་གིས “ འདི་ལྟར་ངོ་སྤྲོད་གནང་བྱུང་། སློབ་གྲྭ་འདི་ ༡༩༩༤ ལོར་ཐོག་མར་གསར་འཛུགས་བྱས་པ་རེད། སྐབས་དེར་ང་རང་སྤྱི་མཐུན་ཚོགས་པའི་ཚོགས་གཙོ་ཡིན། དུས་ཚོད་དེར་རྒྱ་གར་ནས་བོད་མི་སྐྱབས་བཅོལ་བ་ ༡༠༠༠ ཙམ་ཨ་རིར་ལེན་འཆར་ཡོད་པ་དང་། ཁོང་ཅག་དང་མཉམ་དུ་ནང་མི་བུ་ཕྲུག་བཅས་ཡོད་པ་རེད། ཕྲུ་གུ་མང་ཆེ་བ་བོད་གཞུང་སློབ་གྲྭ་ཁག་ནས་སློབ་སྦྱོང་བྱེད་མཁན་ཆགས་ཡོད་སྟབས། ཁོང་ཚོའི་བོད་ཡིག་སློབ་སྦྱོང་ལ་འཐུས་ཤོར་མི་འགྲོ་བ་ཞིག་ལ་བསམ་བློ་གཏོང་ཁུལ་བྱས་པ་རེད།     

ཐོག་མ་འཛིན་ཁང་དང་དགེ་རྒན་ཡོད་པ་མ་རེད། ང་ཚོས་ (Barkley First Unitarian Church)ཟེར་བའི་ཡེ་ཤུའི་ལྷ་ཁང་ཞིག་ཏུ་འཛིན་གྲྭ་གོ་སྒྲིག་གིས་མི་གསུམ་གྱིས་དང་བླངས་ཐོག་བོད་ཡིག་བསླབ་རྒྱུ་བྱས་པ་རེད། འོན་ཀྱང་སློབ་ཕྲུག་ ༡༥ ཙམ་ལས་མ་བྱུང་སྟབས་དགེ་རྒན་གཅིག་གིས་འགན་བླངས་ཤིང་། བོད་རིགས་ཆིག་སྟོང་ཨ་རིར་འབྱོར་བའི་ཁྲོད་ནས་མི་ ༦༥ ས་གནས་འདིར་བཏང་སྟེ། ས་གནས་བོད་རིགས་སྤྱི་མཐུན་ཚོགས་པར་མི་གྲངས་ ༡༠༠༠ ལས་བརྒལ་བ་རེད། སྐབས་དེ་ནས་སློབ་ཕྲུག་ཇེ་མང་དུ་སོང་ཞིང་དགེ་རྒན་ཡང་མང་དུ་གཏོང་དགོས་བྱུང་བ་དང་། འཛིན་ཁང་ལ་དཀའ་ངལ་འཕྲད་དེ་འཛིན་གྲྭ་རེ་ཟུང་སྤང་ཐོག་ཏུ་ཚོགས་པ་རེད། རྗེས་སུ་རིམ་པས་ (Barkley Adults School)ཞེས་པའི་སློབ་གྲྭའི་འཛིན་ཁང་བཞི་ལྔ་ཞིག་ལ་ཁང་གླ་སྤྲད་དེ་གཟའ་མཇུག་གི་འཛིན་གྲྭ་ཚང་མ་འདིར་ཚོགས་བཞིན་ཡོད། ད་ཆ་སློབ་གྲྭ་འདིར་བོད་ཡིག་དགེ་རྒན་ ༦ དང་། ཟློས་གར་དགེ་རྒན་ ༢ ། དགེ་ཆེ་གཅིག་བཅས་ལ་གསོལ་ཕོགས་ཀྱང་སྤྲོད་མུས་ཡིན” ཞེས་ངོ་སྤྲོད་གནང་བྱུང་།

ཡང་ཁོང་ལ་སློབ་གྲྭའི་འགྲོ་སོང་སུ་ཞིག་གིས་གཏོང་གི་ཡོད་མེད་དང་། སློབ་དེབ་དང་དགེ་རྒན་ཇི་ལྟར་འདེམས་སྒྲིག་བྱེད་ཀྱི་ཡོད་མེད་དྲིས་པར། “ ས་གནས་མངའ་སྡེའི་ངོས་ནས་ལོ་རེར་ཁ་གསབ་སྒོར་ ༤༠༠༠༠ སྤྲོད་ཀྱི་ཡོད་པ་དང་། དེ་ནས་ཕ་མ་རྣམས་ཀྱིས་ལོ་རེར་སློབ་ཡོན་ལྟ་བུའི་དོད་དུ་བུ་ཕྲུག་རེར་སྒོར་ ༡༥༠ ཙམ་སྤྲོད་ཀྱི་ཡོད། དེ་ལས་གཞན་ཚང་མ་ས་གནས་བོད་རིགས་སྤྱི་མཐུན་ཚོགས་པའི་ངོས་ནས་ཐབས་ཤེས་བྱེད་ཀྱི་ཡོད།

ད་ལྟའི་ཆར་སློབ་དེབ་གཏན་འབེབ་ཡོད་པ་མ་རེད། དགེ་རྒན་ཚོས་བོད་གཞུང་གི་སློབ་དེབ་ལ་གཞི་བཞག་སྟེ་སློབ་དེབ་ཅིག་གྲ་སྒྲིག་ཞུ་རྒྱུའི་འཆར་གཞི་ཞིག་ཡོད་པ་རེད། དགེ་རྒན་རྣམ་པ་རྒྱ་གར་ནང་དགེ་རྒན་བྱས་མྱོང་མཁན་ཤ་སྟག་ཆགས་ཡོད།  སློབ་ཕྲུག་གི་ཤེས་ཚད་ཀྱི་ཐོག་ནས་ང་ཚོས་ཐོག་མ་རེ་བ་བརྒྱབ་པ་ལྟ་བུ་ཞིག་ཡོང་དཀའ་ཡང་། སློབ་གྲྭ་འདི་འཛུགས་ཐུབ་པ་ཙམ་གྱིས་རྒྱལ་ཁ་ཆེན་པོ་ཞིག་ལ་རྩི་བཞིན་ཡོད ” ཅེས་བརྗོད་བྱུང་།

ཡང་གསར་འགོད་པས་ཁོང་ལ་སྤྱིར་ཕྱི་རྒྱལ་ཁག་ཏུ་ཡོད་པའི་བོད་ཕྲུག་ཚོར་བོད་སྐད་བོད་ཡིག་ཡར་རྒྱས་གཏོང་རྒྱུར་ཐབས་ལམ་གང་འདྲ་གཟིགས་ཀྱི་ཡོད་མེད་དང་། སློབ་གྲྭ་འདིར་མཚོན་ན་མངའ་སྡེ་གཞུང་གིས་རྒྱབ་སྐྱོར་དང་ངོས་ལེན་གྱི་ལམ་ཁ་དེ་འདྲ་ཡོད་མེད་དྲིས་པར། ཁོང་གིས “ གཙོ་བོ་ཕ་མ་ཚོའི་ངོས་ནས་ཉིན་རྒྱུན་སོ་སོའི་བུ་ཕྲུག་ཚོར་རང་རང་གི་ཁྱིམ་ཚང་གི་ལོ་རྒྱུས་དང་། ས་གནས་སོ་སོའི་ལོ་རྒྱུས། དེ་ནས་རང་གི་ཤེས་ཚད་ལ་དཔག་པའི་བོད་སྤྱིའི་ལོ་རྒྱུས་སོགས་སྒྲུང་གི་ཚུལ་དུ་བཤད་པ་ཡིན་ན་ཕན་ཐོགས་ཆེན་པོ་ཡོང་གི་རེད། བྱང་ཨ་རིའི་ས་གནས་འདིར་མཚོན་ན་ཡང་ང་ཚོ་རྒྱུན་ལས་ཚོའི་ངོས་ནས་ཞིབ་འཇུག་རབ་དང་རིམ་པ་བྱེད་ཀྱི་ཡོད། མ་འོངས་པར་བོད་ཕྲུག་ཚོ་དང་ཕ་མ་བཅས་མཉམ་འཛོམས་ཐོག་ནས་ང་ཚོའི་སྤྱི་ཁང་ནང་དུ་འཛོམས་ནས། བོད་སྐད་བཤད་པ་དང་། བོད་གཞས་གཏོང་བ་སོགས་ཀྱི་ལས་འགུལ་ཞིག་གོ་སྒྲིག་ཞུ་འཆར་ཡོད། དེ་བཞིན། བོད་སྤྱིའི་ས་ཁྲ་ཁ་གསལ་བོ་དེ་འདྲ་ཕ་མ་ཚོར་སྤྲད་དེ་ཕ་མ་ཚོའི་ངོས་ནས་བུ་ཕྲུག་ལ་ས་ཁྲའི་ཐོག་ནས་བོད་ངོ་སྤྲོད་བྱ་རྒྱུ་དེ་འདྲ་ཡང་ཡོད། ཕྲུ་གུ་ཚོས་སོ་སོའི་ཕ་མའི་གམ་ནས་རང་རང་གི་ལོ་རྒྱུས་ཕྲན་བུ་རེ་ཤེས་ཡོད་ན། རྨང་གཞི་དེའི་ཐོག་ལ་སློབ་གྲྭ་ནས་བོད་སྤྱིའི་ལོ་རྒྱུས་སློབ་ཁྲིད་བྱས་ན་བློ་སྒོ་ཕྱེ་ཡོང་གི་རེད་སྙམ།  

སློབ་གྲྭ་འདི་མངའ་སྡེ་གཞུང་གིས་ངོས་ལེན་ཡོང་མིན་ཐད། སྤྱིར་མི་འབོར་ལ་གཞིགས་ན་རེ་བ་མེད་པ་ཞིག་མ་རེད། ས་གནས་འདིའི་ཀོ་རི་ཡ་དང་། ཝེ་ཊི་ནམ། རྒྱ་རིགས་སོགས་ལ་མིག་དཔེ་བལྟ་ས་ཡོད་པ་རེད། ཁོང་ཚོར་མི་རིགས་རང་རང་གི་བྱིས་གསོ་ཁང་དང་སློབ་ཆུང་། སློབ་འབྲིང་བར་དུ་ཡོད་པ་རེད། ལས་དོན་འདིར་ས་གནས་བོད་པ་ཚང་མས་མཉམ་རུབ་ཀྱི་ནུས་པ་འདོན་དགོས་པ་རེད། བོད་པ་ཚོས་དངུལ་ཏོག་ཙམ་རེ་བསགས་མ་ཐག ལམ་སེང་བོད་ནང་དང་རྒྱ་གར་ལ་བསྐུར་ཏེ་སོ་སོའི་ནང་མི་གཉེན་ཉེ་ཚོའི་སྟེང་ལ་སྤུངས་པ་ལས་སྤྱི་བར་བསམ་བློ་གཏོང་མཁན་མི་འདུག མི་རིགས་གཞན་པ་ཚོས་སོ་སོའི་ཁོར་ཡུག་ལ་མ་རྩ་བཙུགས་ཏེ་སྤྱི་ཚོགས་རྒྱ་སྐྱེད་ཀྱི་ཡོད་པ་རེད། ང་ཚོས་ཀྱང་ཕུགས་ལ་བསམ་བློ་བཏང་སྟེ་སྤྱི་ཚོགས་དང་ཁྲོམ་རྭ། སློབ་གྲྭ་སོགས་འཛུགས་རྒྱུར་ཤུགས་བརྒྱབ་ན་ཡག་པོ་ཡོང་གི་རེད ” ཅེས་ཧ་ཅང་དོ་སྣང་ཆེན་པོས་བརྗོད་བྱུང་།

སློབ་བུ་ངག་དབང་ངམ། དབྱིན་མིང་ལ་(Skyler)ཞུ་བ་ཁོང་ནི་ཕྱེད་བོད་རིགས་དང་ད་ལྟ་རང་ལོ་ ༧ རེད། གསར་འགོད་པས་ཁོང་ལ། ཅིའི་ཕྱིར་བོད་ཡིག་སྦྱོང་གི་ཡོད་པ་དང་། བོད་ཡིག་ལ་དགའ་སྣང་ཡོད་མེད་དྲིས་པར། “ བོད་ཡིག་ནི་ཧ་ཅང་མགོ་རྙོག་པོ་འདུག ང་རང་བོད་ཡིག་སྦྱོང་རྒྱུར་དགའ་བོ་མི་འདུག ཡིན་ན་ཡང་། ཨ་མ་ལགས་བོད་ཡིན་པས། མོ་རང་གིས་ཨུ་ཚུགས་བསྐྱོན་ཏེ་ང་ལ་བོད་ཡིག་བསླབ་ཏུ་བཅག་པ་རེད། མོས་བཤད་ན་བོད་སྐད་ཤེས་ན་རྗེས་མ་བོད་རིགས་ཚོ་དང་ཐུག་དུས་དཀའ་ངལ་འཕྲད་ཀྱི་མ་རེད་ལབ་སོང” ཟེར།   ཡང་ཁོ་ལ་དུས་རྒྱུན་ནང་ན་བོད་སྐད་བཤད་ཀྱི་ཡོད་མེད་དྲིས་པར། “ ཨ་མས་ནམ་རྒྱུན་ནས་ང་ལ་བོད་སྐད་རྐྱང་རྐྱང་བཤད་ཀྱི་འདུག  ཡིན་ན་ཡང་ངས་ཧ་མ་གོ་དུས་མོས་དབྱིན་སྐད་བཤད་ཀྱི་འདུག ” ཟེར།  སློབ་བུ་ངག་དབང་ལགས་ནི་འཛིན་གྲྭ་འདིར་ཞུགས་ཏེ་ཉིན་ ༥ ལས་ཕྱིན་མི་འདུག་ལ། དེ་སྔོན་བོད་ཡིག་སྦྱོང་སའི་འཛིན་གྲྭ་གཞན་ཞིག་ལ་སོང་མྱོང་རབས་བཤད།

རང་ལོ་ ༩ ཡིན་པའི་སློབ་བུ་བསྟན་འཛིན་བསམ་གཏན་ནི་རྒྱ་གར་དུ་སྐྱེས་ཤིང་ལོ་བཞི་ཙམ་ནས་ཕ་མ་གཉིས་དང་མཉམ་དུ་ཨ་རིར་གནས་སྤོར་བྱས་པ་ཞིག་ཡིན་འདུག གསར་འགོད་པས་ཁྱེད་རང་རྒྱ་གར་གྱི་ས་ཁུལ་གང་དུ་སྐྱེས་སྐོར་དྲིས་བར་ཁོས་མགོ་གཡུག་གཡུག་གིས་ཤེས་ཀྱི་མེད་ཟེར། ཁོ་རང་ལའང་བོད་ཡིག་བོད་སྐད་སྦྱོང་འདོད་ཆེན་པོ་མི་འདུག་ཀྱང་། ཕ་མས་ཨུ་ཚུགས་ཀྱིས་བོད་ཡིག་སྦྱོང་བར་བཏང་སོང་ཟེར། གསར་འགོད་པས་དུས་རྒྱུན་ནང་དུ་བོད་སྐད་བཤད་ཀྱི་ཡོད་མེད་དྲིས་པར། “ ངའི་ཕ་མ་གཉིས་ཀྱིས་དབྱིན་སྐད་ཡག་པོ་ཤེས་ཀྱི་ཡོད་པ་མ་རེད། དུས་རྒྱུན་བོད་སྐད་རྐྱང་རྐྱང་བཤད་ཀྱི་འདུག ང་ལ་བཤད་སྐབས་གོ་བརྡ་མ་འཕྲོད་ན་དབྱིན་སྐད་བཤད་ཀྱི་འདུག” ཟེར། 

རང་ལོ་ ༡༡ ཡིན་པའི་སློབ་བུ་ཀུན་དགའ་གཡང་འཛོམས་ནི། རྒྱ་གར་དུ་སྐྱེས་ཤིང་འཛིན་རིམ་གསུམ་པ་ཐོན་རྗེས་ཕ་མ་དང་མཉམ་དུ་ཨ་རིར་གནས་སྤོར་བྱས་ཏེ། ད་ལྟ་སློབ་གྲྭ་འདིའི་འཛིན་གྲྭ་གསུམ་པར་སློབ་སྦྱོང་བྱེད་ཀྱིན་འདུག  མོས་བཤད་ན་ “ བོད་ཡིག་དང་བོད་སྐད་སྦྱང་རྒྱུར་ང་རང་ཧ་ཅང་དགའ་བོ་འདུག ངས་བོད་ཀྱི་རོལ་མོ་སོགས་ལ་ཡང་སློབ་སྦྱོང་བྱེད་ཀྱི་ཡོད” ཟེར།  གསར་འགོད་པས་ཅིའི་ཕྱིར་བོད་ཡིག་སྦྱོང་གི་ཡོད་མེད་དྲིས་པར “ ང་རང་བོད་མི་ཞིག་ཡིན་པའི་ཆ་ནས་བོད་སྐད་བོད་ཡིག་སྦྱང་རྒྱུ་རང་གི་འགན་འཁྲི་རེད་དྲན་གྱི་ཡོད། མ་ཟད། མ་འོངས་པར་ང་རང་གིས་ཁྲིམས་ལུགས་སློབ་སྦྱོང་བྱས་ཏེ། ཁྲིམས་ལུགས་ཀྱི་ཐོག་ནས་བོད་དོན་འཐབ་རྩོད་བྱ་རྒྱུ་ཡིན། ཁྲིམས་ཐོག་ནས་འཐབ་རྩོད་བྱེད་པར་མི་རིགས་རང་གི་རིག་གཞུང་ཟེར་བ་ཞིག་སྟོན་རྒྱུ་ཡོད་དགོས་པ་རེད། བྱས་ཙང་ང་རང་གི་ངོས་ནས་བོད་ཡིག་དང་། བོད་ཀྱི་རོལ་མོ་ལ་སློབ་སྦྱོང་བྱེད་ཀྱི་ཡོད།” ཟེར། 

སློབ་ཕྲུག་གི་ཕ་མ་དང་ས་གནས་འདིར་གཞིས་ཆགས་སུ་སྡོད་པའི་འཇམ་དབྱངས་ལགས་ཀྱིས་བརྗོད་ན། “ ང་རང་གི་བྱིས་པ་གཉིས་སློབ་གྲྭ་འདིར་གཏོང་གི་ཡོད། དེ་ནི་རང་ཉིད་བོད་པ་ཞིག་ཡིན་སྟབས་བྱིས་པ་ཚོར་ཡང་བོད་སྐད་བོད་ཡིག་བསླབ་ཐུབ་ན་བསམ་གྱི་ཡོད། དེ་བཞིན། ས་གནས་རྒྱུན་ལས་ཀྱི་ངོས་ནས་ལས་དོན་བཟང་པོ་འདི་འདྲ་ཞིག་སྒྲུབ་ཀྱི་ཡོད་པར་རྒྱབ་སྐྱོར་གྱི་རྣམ་པ་མཚོན་ཆེད་ཡང་ཡིན། བྱིས་པ་ཚོ་འདིར་བསྐྱལ་བ་ཡིན་ན་བོད་ཡིག་བོད་སྐད་ཕྲན་བུ་རེ་ཤེས་འགྲོ་བ་མ་ཟད། ཞོར་དུ་བོད་ཕྲུག་མང་པོ་འཛོམས་ཏེ་རྩེད་མོ་རྩེས་པ་དང་། སྐད་ཆ་བཤད་པ་སོགས་བྱས་ཏེ་ཕན་ཚུན་འདྲིས་པོ་ཆགས་ཡོང་གི་རེད། དེ་བཞིན་ཕ་མ་ཚོ་ཡང་མཉམ་དུ་འཛོམས་རྒྱུའི་དུས་ཚོད་ཅིག་ཡོད་པ་རེད” ཟེར།

གཟའ་ཉི་མའི་ཉིན་གྱི་ཞོགས་པའི་ཆུ་ཚོད་དགུ་པ་ནས་ཕྱི་དྲོིའི་ཆུ་ཚོད་དང་པོའི་བར་དུ་བོད་ཡིག་འཛིན་གྲྭ་གསུམ་དང་། རོལ་མོ་དང་ཞབས་བྲོའི་འཛིན་གྲྭ་བཅས་ཉིན་རེར་འཛིན་གྲྭ་བཞི་ལྔ་ཞིག་འཚོགས་བཞིན་འདུག་ལ། བོད་ཡིག་འཛིན་གྲྭར་གནས་རིམ་མི་འདྲ་བ་གསུམ་ཡོད་པ་ལས་གཅིག་ནི་བྱིས་པ་ཆུང་ཆུང་ཚོའི་ཆེད་དུ་ཡིན་པ་དང་། འཛིན་གྲྭ་འདིར་གཙོ་བོ་རྩེད་རིགས་སྣ་ཚོགས་དང་འབྲེལ་ནས་དགེ་རྒན་དང་ཕ་མ་ཚང་མ་མཉམ་རུབ་ཀྱིས་བྱིས་པ་ཚོར་བོད་སྐད་བཤད་པ་དང་བོད་གཞས་གཏོང་བ་སོགས་བྱེད་ཀྱིན་འདུག འཛིན་གྲྭ་གཉིས་པའི་ནང་དུ་དབྱངས་གསལ་ངོ་སྤྲོད་དང་ཚིག་སྒྲུབ་བཟོ་སྟངས་སློབ་ཀྱི་འདུག་ལ། འཛིན་རིམ་གསུམ་པར་བོད་ཀྱི་སྐད་ཡིག་བྱུང་འཕེལ་གྱི་ལོ་རྒྱུས་དང་སྦྲགས་ནས་སློབ་ཁྲིད་བྱེད་ཀྱི་འདུག

༼ བོད་ཀྱི་དུས་བབ་ཚགས་ཤོག་ལས་འདིར་བསྐྱར་འགོད་བྱས། ༽

ས་གནས་གསར་འགོད་པ། སངས་རྒྱས་བཀྲ་ཤིས།