༧གོང་ས་མཆོག་གིས་ཉི་ཧོང་དུ་མི་མང་ ༥༠༠༠ བརྒལ་བར་༼ཤེས་རབ་སྙིང་པོ་༽བཀའ་ཁྲིད་གནང་ཡོད་པ་མ་ཟད། ད་ལྟའི་བོད་ནང་གི་གནས་སྟངས་དང་རྒྱལ་བའི་ཡང་སྲིད། ལོ་རྗེས་མའི་རྒྱ་ནག་གི་སྲིད་འཛིན་བཅས་ཀྱི་སྐོར་ལ་གསར་འགོད་པའི་དྲི་བར་ལན་འདེབས་བཅས་གནང་ཡོད།
ཉི་ཧོང་ནང་པའི་དགོན་པ་ཞིག་གི་གདན་ཞུ་ལྟར། ཟླ་འདིའི་ཕྱི་ཚེས་ ༢༩ ཉིན་༧གོང་ས་མཆོག་ཉི་ཧོང་བོད་གཞུང་སྐུ་ཚབ་དོན་གཅོད་དང་། བོད་དོན་རྒྱབ་སྐྱོར་པའི་ཕེབས་བསུའི་ཁྲོད་རྒྱལ་ས་ཊོག་ཀྱོའི་གནམ་ཐང་དུ་འབྱོར་ཡོད་ཅིང་། གནམ་ཐང་དུ་གསར་འགོད་པས་༧གོང་ས་མཆོག་ལ་ཉེ་ཆར་བོད་ནང་བོད་མི་ ༡༠ ཙམ་གྱིས་རང་ལུས་མེར་བསྲེགས་གཏོང་དགོས་དོན་དང་། ལོ་རྗེས་མའི་རྒྱ་ནག་གི་སྲིད་འཛིན། དེ་བཞིན་༧ཏཱ་ལའི་བླ་མའི་ཡང་སྲིད་བཅས་ཀྱི་ཐོག་བཅར་འདྲི་ཞུས་པར་༧གོང་ས་མཆོག་གིས་ “ བོད་ནང་གི་དགེ་འདུན་པ་ཚོས་རང་ལུས་མེར་བསྲེགས་བཏང་བའི་དོན་རྐྱེན་དེར་ཆོས་དང་ཆབ་སྲིད། ལྟ་གྲུབ་རྣམ་གཞག་གསུམ་གྱི་ཐོག་བལྟ་དགོས་ཀྱི་འདུག བོད་མི་ཚོས་རང་ལུས་མེར་བསྲེགས་བཏང་བ་འུ་ཐུག་གི་གནས་སྟངས་ཤིག་ཡིན་ནའང་། རྒྱ་ནག་དཔོན་རིགས་ཚོས་བོད་མིའི་དཀའ་ངལ་སེལ་རྒྱུའི་ཚབ་ཏུ། ཡ་ང་སྙིང་རྗེ་མེད་པའི་བྱ་སྤྱོད་ལག་བསྟར་བྱེད་པ་རང་གཞན་གཉིས་ལ་མི་དགོས་པ་ཞིག་ཡིན་ ” ཞེས་གསུངས་ཡོད།
ལོ་རྗེས་མའི་རྒྱ་ནག་སྲིད་འཛིན་སྐོར་ལ་༧གོང་ས་མཆོག་གིས་ད་ལྟ་ཁོང་བོད་མིའི་ཆབ་སྲིད་མགོ་ཁྲིད་ལས་རྒན་ཡོལ་ཆ་ཚང་ཞུས་ཡོད་སྐོར་གསུངས་ཏེ། “ སྲིད་འཛིན་ཧུའུ་ཅིན་ཐའོ་རྒྱ་ནག་སྲིད་འཛིན་དུ་ཐོག་མར་བསླེབས་སྐབས། མི་མང་པོ་ཞིག་གིས་རྒྱ་ནག་ལ་བཟང་ཕྱོགས་ཀྱི་འགྱུར་བ་ཡོང་རྒྱུའི་རེ་བ་བརྒྱབ་པ་རེད། འདས་པའི་ལོ་བཅུའི་ནང་འཆམ་མཐུན་གྱི་ལས་དོན་གང་ཡང་བསྒྲུབས་ཐུབ་མེད་པ་མ་ཟད། ༢༠༠༨ ལོར་བོད་ནང་དུ་དོན་རྐྱེན་བྱུང་བ་དང་། ༢༠༠༩ ལོར་ཤིང་ཅང་དུ་དོན་རྐྱེན། ༢༠༡༡ ལོར་ནང་སོག་ཏུ་དོན་རྐྱེན་རིམ་པར་བྱུང་སྟེ་སྤྱི་ཚོགས་འཆམ་མཐུན་བྱུང་མེད། དོན་དམ་གྱི་འཆམ་མཐུན་འཇིགས་སྣང་འོག་ཡོང་ཐུབ་ཀྱི་མེད་པར་ཡིད་ཆེས་ཁོ་ནའི་སྟེང་ཡོང་དགོས་པ་ཞིག་རེད་ ” བཅས་གསུངས་འདུག
མཐར་༧གོང་ས་མཆོག་གིས་ཁོང་གི་ཡང་སྲིད་སྐོར་ལ་ “ རྒྱ་ནག་གུང་ཁྲན་ཏང་གིས་ཆོས་ཁས་ལེན་གྱི་མེད་ལ། སྐྱེ་བ་ཕྱི་མ་ཡང་ཁས་ལེན་གྱི་མེད་དུས། དེར་ཡང་སྲིད་ཟེར་བ་ཡང་ཁས་ལེན་ཤེས་ཀྱི་མེད་ཀྱང་། ཁོང་ཚོར་ཏཱ་ལའི་བླ་མའི་ཡང་སྲིད་ལ་ཐེ་བྱུས་བྱ་འདོད་ཡོད་པ་རེད། ཡིན་ནའང་། ད་ཆར་ཏཱ་ལའི་བླ་མ་ཆབ་སྲིད་གནད་དོན་དང་འབྲེལ་བ་གང་ཡང་ཡོད་པ་མ་རེད། རྒྱ་ནག་དཔོན་རིགས་ཚོར་ཏཱ་ལའི་བླ་མའི་ཡང་སྲིད་ཐོག་དངོས་གནས་སེམས་འཚབ་ཡོད་ན་ཐོག་མར་ཆོས་ཁས་ལེན་དགོས། དེ་ནས་མའོ་ཙེ་ཏུང་དང་ཏིན་ཞའོ་ཕིན་གྱི་ཡང་སྲིད་འཚོལ་རྒྱུའི་བསམ་བློ་བཏང་ན་རྒྱུ་མཚན་ལྡན་པ་ཞིག་ཆགས་ཡོད་ ” ཅེས་གསུངས་ཡོད།
ཕྱི་ཚེས་ ༣༠ ཉིན་༧གོང་ས་མཆོག་གིས་ཨོ་སཱ་ཀ་ (Osaka) ཞེས་པའི་གྲོང་ཁྱེར་གྱི་མཱ་ཡེ་ནི་ཤི་ཚོགས་ཁང་ (Mainishi Arena) ཆེན་མོའི་ནང་། ཉི་ཧོང་དད་ལྡན་ཆོས་ཞུ་བ་ ༥༠༠༠ ཙམ་དང་། ཀོ་རི་ཡ་ནས་ཆེད་དུ་བཅར་བའི་ཆོས་ཞུ་བ་ ༤༠༠ ལྷག་ལ་༼ཤེས་རབ་སྙིང་པོ་༽ཆོས་འབྲེལ་གནང་ཡོད་འདུག་ལ། གསུང་ཆོས་ཀྱི་ཐོག་མར་༧གོང་ས་མཆོག་གིས་མང་ཚོགས་ལ་བཀའ་སློབ་བསྩལ་ཏེ། དུས་རབས་ཉི་ཤུ་པ་དེ་དམག་འཁྲུག་གི་དུས་རབས་ཤིག་ཆགས་ཡོད་པ་དང་། ད་ལྟའི་དུས་རབས་འདི་ཞི་བདེ་ལྡན་པ་ཞིག་བསྐྲུན་རྒྱུར་སེམས་ཀྱི་ཞི་བདེ་དགོས་ནའང་། སེམས་ཀྱི་ཞི་བདེ་ནི་བྱམས་བརྩེ་དང་གཞན་ཕན་གྱི་ཀུན་སློང་ལས་ཡོང་དགོས་སྐོར་བཅས་གསུངས་འདུག་ལ། “ འཛམ་གླིང་ཆོས་ལུགས་ཁག་ཚང་མས་བྱམས་དང་བརྩེ་བ། བཟོད་པ་བཅས་ཉམས་ལེན་གནང་གི་ཡོད་སྟབས། ཚང་མར་སེམས་ལ་ཞི་བདེ་བསྐྲུན་རྒྱུའི་ནུས་པ་གཅིག་མཚུངས་ཡོད་པས། སོ་སོའི་ཕ་མེས་ཀྱི་ཆོས་ལུགས་ལ་བདག་པོ་རྒྱག་རྒྱུ་གལ་ཆེན་རེད་ ” ཅེས་གསུངས་ཡོད་འདུག
དེ་བཞིན། གོང་ཚེས་ཉིན་༧གོང་ས་མཆོག་ཨོ་ས་ཀའི་ཀོ་ཡཱ་སན་གཙུག་ལག་སློབ་གྲྭ་བཙུགས་ཏེ། མི་ལོ་ ༡༢༥ འཁོར་བའི་དུས་དྲན་མཛད་སྒོར་ཕེབས་ཏེ་མང་ཚོགས་ལ་བཟང་སྤྱོད་ཡར་རྒྱས་སྐོར་བཀའ་སློབ་བསྩལ་དོན། “ བྱམས་དང་བརྩེ་བ་ནི་འཇིག་རྟེན་ཀུན་ལ་ཁྱབ་པ་ཞིག་ཡིན་སྟབས། བཟང་སྤྱོད་དེའི་ཐོག་སྤྱི་ཚོགས་ནང་འགྱུར་བ་གཏོང་དགོས་ཀྱི་འདུག ཉི་ཧོང་ཤེས་ཡོན་ཅན་ཚོས་བྱམས་དང་བརྩེ་བ། བཟོད་བསྲན་རྣམས་ཆོས་དང་མ་འདྲེས་པར་སློབ་སྦྱོང་བྱ་རྒྱུའི་ཤེས་ཡོན་སྡེ་ཚན་ཞིག་འཛུགས་པ་རེད། ཉི་ཧོང་ནང་ཕྱིའི་དངོས་པོ་ཡར་རྒྱས་ཆེན་པོ་ཕྱིན་ཡོད་ཀྱང་། སེམས་ཀྱི་རྣམ་གཞག་དང་འབྲེལ་བའི་བཟང་སྤྱོད་ལ་སློབ་སློབ་བྱས་ཏེ། ཡས་རྒྱས་ཀྱི་གོམ་པ་གཉིས་པ་ཞིག་ལ་སྤོ་དགོས། འབྱུང་འགྱུར་ཉི་ཧོང་དུ་༼ སེམས་དང་སྲོག་གི་བགྲོ་གླེང་༽ཞིག་གང་མགྱོགས་འཛུགས་ཐུབ་ན་དགེ་མཚན་ཆེན་པོ་འདུག་ ” ཅེས་གསུངས་ཡོད།
ཟླ་འདིའི་ཕྱི་ཚེས་ ༦ ཉིན་༧གོང་ས་མཆོག་ཕྱིར་རྒྱ་གར་དུ་ཆིབས་བསྒྱུར་བསྐྱངས་རྒྱུ་ཡིན་འདུག
གསར་འགོད་པ། དཔལ་ལྡན།
རྒྱ་གཞུང་གི་ཏཱ་ལ་བླ་མའི་ནང་བསྟན་ལ་གནོད་སྐྱོན་གྱི་ཟེར་དེ་འདྲ་ཡིན་ན་བོད་རྒྱུད་ནང་གྱི་དགོན་སྡེ་སྟོང་ཕྲག་མང་པོ་གཏོར་བཤིགས་གཏོང་པ་དང་གྭ་བཙུན་ཁྲི་ཕྲག་མང་པོ་དམར་གསོད་གཏོང་མཁན་དེ་ཀྲུང་དབྱང་སྲིདགཞུང་མ་རེད་པས
བོད་ཀྱི་བླ་ན་མེད་པའི་དབུ་འཁྲིད་དང་། འཛམ་གླིང་ཞི་བདེའི་དེད་དཔོན་ཆེན་པོ། འགྲོ་བ་ལྷ་དང་བཅས་པའི་སྐྱབས་གནས་དམ་པ་༸ གོང་ས་ཡིད་བཞིན་ནོར་བུས་བཀའ་བསྩལ་བ་ལྟར། ཐོག་མར་རྒྱ་ནག་གཞུང་གིས་མའོ་དང་ཏིང་གཉིས་ཀྱི་ཡང་སྲིད་བཙལ། དེ་ནས་སྐྱབས་མགོན་ཏྰ་ལའི་བླ་མའི་ཡང་སྲིད་ལ་ཐེ་ཇུས་བྱས་ན་དེ་ནི་རྒྱ་མིས་བཤད་པ་ལྟར་ཚན་རིག་དང་མཐུན་པའི་ལས་དོན་ཞིག་ཆགས་སྲིད།
ད་ཆ་༸གོང་ས་མཆོག་ནི་བོད་ཀྱི་སྐྱབས་མགོན་ཙམ་མ་ཡིན་པར་འཛམ་གླིང་རྒྱལ་སྤྱིའི་སྟེང་འགྲོ་བ་མིའི་རིགས་ཀུན་གྱི་ཡིད་བརྟན་ཚད་མར་འཕེར་བའི་ཚེ་རབས་འདི་ཕྱི་གཏན་གྱི་སྐྱབས་གནས་དམ་པ་ཞིག་ཡིན་ལ་ལྷག་པར་རྒྱ་ནག་མི་དམངས་དུང་ཕྱུར་ ༡༣ ལྷག་གི་རེ་བ་དང་ཡིད་ཆེས་བྱ་འོས་པའི་སྐྱབས་གནད་མཐར་ཐུག་ཞིག་ཡིན།
ཆེས་བླ་ན་མེད་པའི་འཛམ་གླིང་གི་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་སྐུ་ཁམས་བཟང་ཞིང་སྐུ་ཚེ་རིང་ལ་ཐུགས་འདུན་ལྷུན་གྱི་འགྲུབ་པའི་སྨོན་འདུན་ཞུ།།
རྒྱལ་བའི་སྲས་ཀྱི་སྤྱོད་པ་རྒྱལ་གྱུར་ཅིག གནམ་འོག་འདི་ནས།
“མཉེས་གཤིས་བྱམས་བརྩེས་འགྲོགས་ཐབས་འཚེ་མེད་ལམ། །མཐའ་གཉིས་སྤངས་པ་གཉིས་སྨན་དབུ་མའི་ལམ། །འཇིགས་རུང་དྲག་མཚོན་མ་མཆིས་ཞི་བདེའི་ཡུལ། །བསྐྲུན་པའི་ཐབས་ཚུལ་འགྲུབ་པའི་མཐུ་དཔུང་སྐྱེད། །”
“བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་དེ་འབྱོར་ཤོག །”