བོད་མི་མང་ལ་སེམས་གསོ་བྱ་རྒྱུ་ཡིན།
སེར་སྨད་བློ་དགའ།
གཞུང་འབྲེལ་ལས་འགུལ་གྱི་སྔ་རྗེས་དྲན་དྲན་དུ་ཡོད་ཐོག ཚེས་ ༢༩ ཉིན་གཞི་ནས་སེ་ར་ཆོས་སྒར་དུ་འབྱོར་ཏེ་དེ་མ་ཐག་རྩིས་འཕྲུལ་ལ་ལག་པ་འཆང་བ་ཡིན། གཞུང་འབྲེལ་ལས་འགུལ་འདིའི་རྒྱབ་མདུན་གླེང་བ་ནི་རི་རབ་སྟོང་གིས་གནོན་མི་ཐུབ་པའི་ཚོར་སྣང་དང་གཏམ་ཚོགས་ཤིག་གདའ། སྤྱིའི་ཆ་ནས་ད་རེས་བཀའ་སྤྱི་མཉམ་རུབ་ཀྱི་གཞུང་འབྲེལ་ལས་འགུལ་དེ་ཧ་ལས་པའི་ཡག་པོ་བྱུང་ཡང་། སྐབས་དེར་ལཱི་བྷི་ཡཱ་རྒྱལ་ཁབ་ཀྱི་མགོ་གཙོ་དྲག་གཉེར་བ་གྷ་ཌཱ་ཧྤི་བསད་པའི་རོ་ལམ་དེ་ནས་བོད་ཀྱི་གསར་འགྱུར་ལ་བར་ཆད་ཕོག་པ་རེད། འོན་ཀྱང་བསམ་ཐོག་ཏུ་འབྱོར་བ་དང་གནད་དུ་འཁེལ་བ། ལྷིང་འཇགས་ལྡན་པ་སྟེ། བསམ་གནད་ལྷིང་གསུམ་གྱི་གཞུང་འབྲེལ་བོད་དོན་ལས་འགུལ་ཆེན་མོར། བོད་པའི་ཁྱིམ་ཚང་ནས་འཚར་བསྐྱེད་བྱུང་བའི་སྤྱི་འཐུས་བདུན་གྱི་སྣང་ཆུང་བཏང་བའི་སྐོར་བོད་མི་མང་ལ་སེམས་གསོ་བྱ་རྒྱུ་ཡིན། རྣོ་པོ་དང་ཐིག་པོ། གཟིར་བ་སྟེ། རྣོ་ཐིག་གཟིར་གསུམ་ལྡན་པའི་སྲིད་བྱུས་ཀྱི་མཚོན་ཁ་ནང་དུ་བསྐོར་ཏེ་གྲིབ་མའི་འོག་ནས་ཉི་དྲོད་རག་ཐབས་བྱས་པའི་སྤྱི་འཐུས་རྣམས་ངེས་པར་དུ་ངོ་ཤེས་དགོས་ལ། ཁོང་ཚོས་རྐུབ་སྟེགས་སྲུང་ཆེད་དུ་མགྲིན་པ་ཡན་ཆད་ཀྱི་སྐད་ཆ་ལ་ངེས་པར་དུ་དོ་སྣང་དང་དོགས་ཟོན་བྱ་དགོས། ཁྲམ་པ་དེ་དག་གིས་བསླུ་བྲིད་དང་རྣམ་འགྱུར། གྲུ་མོ་ཡན་ཆད་ཀྱི་ལག་གཡུག་བྱེད་སྲིད་ཀྱང་ནམ་ཡང་མགོ་བོ་འཁོར་མི་རུང་། ཕ་མ་ཤི་ཡང་མྱ་ངན་མེད་པའི་བུ་རྒྱུད་ནི་གཉེན་ཉེ་ཙམ་མ་ཟད། སྡེ་མི་སེར་གྱིས་ཀྱང་མཐོང་འདོད་ཡོད་པ་མ་རེད། མི་རིགས་དང་དཔའ་བོར་དུངས་སེམས་མེད་པའི་སྤྱི་འཐུས་ལ་བོད་མི་རྒན་གཞོན་བར་གསུམ་གྱི་སེམས་ཐག་རིང་པོ་ཡོད་པ་སྨྲོས་མེད་དང་། གནས་ཚུལ་ལ་བརྟེན་ནས་ཡག་ཉེས་འགྲེལ་བཤད་བྱེད་པ་མ་གཏོགས་གདོང་རིས་ལ་བརྟེན་ནས་ལྕི་ཡང་འབྱེད་པ་ནི་སྔ་ས་ནས་ཞེན་པ་ལོག་ཟིན་པ་ཡིན། དེར་བརྟེན་རྒོལ་འཐབ་ར་བའི་རྩ་འཛུགས་འདིའང་འཆར་གཞིའི་སྐྱ་ཐིག་མ་དེད་པར་བསམ་གནད་ལྷིང་གསུམ་གྱི་གདུང་སེམས་མཉམ་སྐྱེད་ལ་གཡོལ་ཐབས་བྱས་པ་འདི་ཁོ་ནའི་གནད་དོན་ལ་ཐུག་ཡོད།
སྐབས་དེའི་སྤྱི་འཐུས་ཀྱི་ལས་བགོས་ཁག་ལ་གཟིགས་དང་། སྡེ་ཚན་དང་པོ། ཚོགས་གཙོ་སྦྲེལ་པོས་སྣེ་ཁྲིད་པའི་གཞུང་ཚབ་དང་རྒྱ་གར་དཔོན་རིགས་ཁག་ལ་མཇལ་འཕྲད་གནང་མཁན་ཀ་སྡེའི་ཚོགས་ཆུང་ནང་། ཚོགས་གཙོ་སྤེན་པ་ཚེ་རིང་མཆོག་གིས་དབུ་ཁྲིད་པའི་སྤྱི་འཐུས་སྒྲོལ་མ་ཚེ་རིང་དང་། སྤྱི་འཐུས་ཟླ་བ་ཕུན་སྐྱིད། སྤྱི་འཐུས་མཁྱེན་རབ་རྒྱ་མཚོ། སྤྱི་འཐུས་སྨོན་ལམ་མཐར་ཕྱིན། ཁ་སྡེའི་ཚོགས་ཆུང་ནང་། ཚོགས་གཞོན་བསོད་ནམས་བསྟན་འཕེལ་མཆོག་གིས་དབུ་ཁྲིད་པའི་སྤྱི་འཐུས་ཀརྨ་ཆོས་འཕེལ་དང་། སྤྱི་འཐུས་ཨ་ཀྲུག་ཚེ་བརྟན། སྤྱི་འཐུས་དབྱངས་ཅན་སྒྲོན་དཀར། སྡེ་ཚན་གཉིས་པ། རྒྱ་གར་དཔོན་རིགས་ཁག་ལ་མཇལ་བཅར་གོ་སྒྲིག་ཚོགས་ཆུང་། འགན་འཁུར་བ་སྤྱི་འཐུས་ཡེ་ཤེས་ཕུན་ཚོགས་དང་། སྤྱི་འཐུས་ཡེ་ཤེས་སྒྲོལ་མ། སྤྱི་འཐུས་བསོད་ནམས་རྒྱལ་མཚན། སྡེ་ཚན་གསུམ་པ། ལས་འགུལ་སྤེལ་ཡུལ་དང་འབྲེལ་བའི་གོ་སྒྲི་ཚོགས་ཆུང་། འགན་འཁུར་བ་སྤྱི་འཐུས་ཆོས་སྐྱོང་དབང་ཕྱུག་དང་། སྤྱི་འཐུས་ཚུལ་ཁྲིམས་བསྟན་འཛིན། སྤྱི་འཐུས་རྒྱ་རི་བུ་ཕྲུག། སྤྱི་འཐུས་རོང་པོ་བློ་བཟང་སྙན་གྲགས། སྤྱི་འཐུས་ཆོས་གྲགས་རྒྱ་མཚོ། སྤྱི་འཐུས་བསྟན་འཛིན་ཟླ་སྒྲོན། སྤྱི་འཐུས་སྒྲོལ་དཀར་སྐྱབས། སྤྱི་འཐུས་འཇམ་དབྱངས་བཟོད་པ། སྡེ་ཚན་བཞི་པ། དངུལ་རྩིས་བདག་གཉེར་དང་བཞུགས་གནས་ཞལ་ལག་བཅས་ཀྱི་གོ་སྒྲིག་ཚོགས་ཆུང་། འགན་འཁུར་བ་སྤྱི་འཐུས་ཀརྨ་ཡེ་ཤེས་དང་། སྤྱི་འཐུས་ཟླ་བ་ཚེ་རིང་། སྤྱི་འཐུས་སྒྲོན་དཀར་ལྷ་མོ། སྤྱི་འཐུས་རྒྱ་རིགས་ཐར། སྤྱི་འཐུས་སྐལ་བཟང་དགྲ་འདུལ། སྤྱི་འཐུས་ཚེ་རིང་གཡུ་སྒྲོན། སྤྱི་འཐུས་འཇིགས་མེད་འབྱུང་གནས། སྡེ་ཚན་ལྔ་པ། གསར་འགོད་འབྲེལ་མཐུད་ཚོགས་ཆུང་། འགན་འཁུར་བ་སྤྱི་འཐུས་དབུ་དཀར་གཡུ་སྒྲོན། སྤྱི་འཐུས་ཐུབ་བསྟན་ལུང་རིགས། སྤྱི་འཐུས་སྐལ་བཟང་རྒྱལ་མཚན། སྤྱི་འཐུས་བུ་མོ་ཚེ་རིང་། སྡེ་ཚན་དྲུག་པ། གནས་ཚུལ་མཁོ་སྒྲུབ་ཚོགས་ཆུང་། འགན་འཁུར་བ་སྤྱི་འཐུས་རྨོག་རུ་བསྟན་པ། སྤྱི་འཐུས་གསེར་རྟ་ཚུལ་ཁྲིམས། སྡེ་ཚན་བདུན་པ། ཡིག་ཆ་དང་འཕྲེད་དར་གོ་སྒྲིག་ཚོགས་ཆུང་། འགན་འཁུར་བ་སྤྱི་འཐུས་པདྨ་འབྱུང་གནས། སྤྱི་འཐུས་ནོར་བུ་ཚེ་རིང་བཅས་དངོས་སུ་ལས་བགོས་བརྒྱབ་པའི་ནང་སྤྱི་འཐུས་སུམ་ཅུ་སོ་ལྔ་ཡོད་ཀྱང་དེའི་ནང་ནས། དགེ་ལུགས་སྤྱི་འཐུས་རོང་པོ་བློ་བཟང་སྙན་གྲགས་དང་། མདོ་སྟོད་སྤྱི་འཐུས་ཚུལ་ཁྲིམས་བསྟན་འཛིན་གཉིས་ལྡི་ལིར་གདུང་སེམས་མཉམ་བསྐྱེད་ཀྱི་ལས་འགུལ་ནང་ཡོང་མེད་པ་རེད།
ཡུ་རོབ་སོགས་ཕྱི་རྒྱལ་ཁག་གི་སྤྱི་འཐུས་རྣམས་ཕྱོགས་སོ་སོར་འགན་འཁུར་ལེན་རྒྱུ་ལས་དངོས་སུ་ལྡི་ལིར་ཕེབས་མི་དགོས་པའི་བཀའ་མོལ་སྤྱི་འཐུས་ལྷན་ཚོགས་སུ་སྔ་ས་ནས་བྱུང་ཡོད་འདུག་ལ། ཡུ་རོབ་སོགས་ཀྱི་སྤྱི་འཐུས་བཞི་ཕུད། མདོ་སྟོད་སྤྱི་འཐུས་གཡུང་དྲུང་རྒྱལ་མཚན་དང་། མདོ་སྟོད་སྤྱི་འཐུས་དཀོན་མཆོག་ཆོས་སྒྲོན། བཀའ་བརྒྱུད་སྤྱི་འཐུས་བསྟན་པ་ཡར་འཕེལ། མདོ་སྟོད་སྤྱི་འཐུས་གངས་ལྷ་མོ། བོན་པོའི་སྤྱི་འཐུས་རྣམ་དག་ཙུག་ཕུད། བཅས་སྤྱི་འཐུས་ལྔ་གཞུང་འབྲེལ་ལས་འགུལ་གྱི་སྤྱི་འཐུས་ལས་བགོས་ནང་ཚུད་མེད་པ་མ་ཟད། ལྡི་ལིར་གདུང་སེམས་མཉམ་སྐྱེད་ཀྱི་མི་མང་ལས་འགུལ་ནང་དུའང་ཞུགས་མེད། དབུང་གཙང་སྤྱི་འཐུས་སྒྲོལ་མ་ཚེ་རིང་གིས་ལྡི་ལིར་ཚོགས་གཙོ་སྤེན་པ་ཚེ་རིང་མཆོག་ལ་དགོངས་པ་ཞུས་པའི་ལན་དུ། ད་ཐེངས་དགོངས་པ་ཞུ་ངེས་ཀྱིས་ཞུ་ཆོག་ཆོག་དང་གནང་ངེས་ཀྱིས་གནང་ཆོག་ཆོག་ཡོད་མ་རེད། ཅེས་གསུང་ལན་སྐྱོན་སྟངས་ལ་གཞིགས་ན། སྐབས་འདིའི་གཞུང་འབྲེལ་ལས་འགུལ་ལ་དགོངས་ཞུ་གཏོང་ས་མེད་པ་འདྲ། དེས་ན་གོང་ཞུའི་སྤྱི་འཐུས་ལྔ་པོ་སྤྱི་འཐུས་ལས་བགོས་རེའུ་མིག་ནང་ག་རེ་བྱས་ནས་མ་ཚུད་པ་རེད། ཅེས་པའི་དྲི་བ་དེ་རང་བཞིན་གྱིས་སླེབས་སོང་། ཕྱོགས་བཞུགས་སྤྱི་འཐུས་རྣམས། ལས་འགུལ་ནང་དུས་ཐོག་མཉམ་ཞུགས་དགོས་པའི་བརྡ་ཐོ་བཏང་ཡང། ང་རྩ་བ་ནས་ཡོང་ཐུབ་ས་མ་རེད་ཅེས་ཐད་ཀར་ལན་འདེབས་བྱེད་མཁན་གྱི་སྤྱི་འཐུས་རེ་གཉིས་ཡོད་པ་ཚོགས་གཙོ་སྦྲེལ་པོས་མ་མཁྱེན་པ་ཡོང་མི་ཤེས། ལས་བགོས་ཀྱི་རེའུ་མིག་ནང་ཚུད་མིན་ལ་མ་ལྟོས་པར། སྒེར་གྱི་ལས་དོན་ཆེ་རུང་ཆུང་རུང་། སྒོ་འགྲམ་གྱི་ལས་འགུལ་དུ་མཉམ་ཞུགས་བྱས་མིན་ཇི་ལྟར་ཡང། ལས་འགུལ་ནང་འདུག་ཟེར་བ་ཙམ་གྱིས་གཞུང་འབྲེལ་གྱི་ཛ་དྲག་གདུང་སེམས་མཉམ་སྐྱེད་ལ་ཁུར་མཉམ་ལེན་མ་བྱས་པའི་ནག་ཉེས་བསུབ་མི་ཐུབ། སྒོ་འགྲམ་གྱི་ལས་འགུལ་ནང་མཉམ་ཞུགས་བྱས་པར་ཐུགས་རྗེ་ཆེ་ཞུ་མི་ཐུབ་ཀྱང་གདོང་པ་བཀབ་ནས་བསྡད་པའི་སྤྱི་འཐུས་གསུམ་དང་གཏན་ནས་མི་འདྲ། དཔེར་ན། མདོ་སྟོད་སྤྱི་འཐུས་གངས་ལྷ་མོ་ལྟབུ་རྐང་པ་ཆག་ནས་རང་རྐྱང་གིས་འགྲོ་མི་ཐུབ་པར་གྱུར་ཡོད་ཀྱང་འཁར་རྒྱུག་ཐོགས་ཏེ་བཞུགས་སྒར་གྱི་གཞུང་འབྲེལ་ཟས་བཅད་ལས་འགུལ་ནང་མཉམ་ཞུགས་གནང་སྟེ། གཞུང་སྒེར་གཉིས་ཀའི་མང་ཚོགས་ཀྱིས་ཡིད་མོས་ཆེན་པོ་བྱས་ཡོད་པ་རེད། མདོ་སྟོད་སྤྱི་འཐུས་དཀོན་མཆོག་ཆོས་སྒྲོན་དང་། མདོ་སྟོད་སྤྱི་འཐུས་ཚུལ་ཁྲིམས་བསྟན་འཛིན། མདོ་སྟོད་སྤྱི་འཐུས་གཡུང་དྲུང་རྒྱལ་མཚན། དགེ་ལུགས་སྤྱི་འཐུས་རོང་པོ་བློ་བཟང་སྙན་གྲགས། བཀའ་བརྒྱུད་སྤྱི་འཐུས་བསྟན་པ་ཡར་འཕེལ། མདོ་སྟོད་སྤྱི་འཐུས་གངས་ལྷ་མོ། བོན་པོའི་སྤྱི་འཐུས་རྣམ་དག་ཙུག་ཕུད་བཅས་ཀྱི་སྤྱི་འཐུས་བདུན། བཀའ་སྤྱིའི་ཐོག་མའི་འཆར་གཞི་ལྟར་ལྡི་ལིར་གཞུང་འབྲེལ་གདུང་སེམས་མཉམ་བསྐྱེད་ཀྱི་ལས་འགུལ་ནང་མཉམ་ཞུགས་བྱས་མེད་པ་མ་ཟད། དེའི་ཁྲོད་ནས་སྤྱི་འཐུས་མང་པོ་ཞིག་གིས་ཕྱོགས་སོ་སོའི་ལས་འགུལ་ནང་། མཉམ་ཞུགས་བྱས་མ་སོང་ཞེས་ཁ་བརྡུང་མ་ཕོག་པའི་ཐབས་ཤེས་འཐེན་རུང་། དེའི་ནང་ནས་མདོ་སྟོད་སྤྱི་འཐུས་དཀོན་མཆོག་ཆོས་སྒྲོན་དང་། མདོ་སྟོད་སྤྱི་འཐུས་གཡུང་དྲུང་རྒྱལ་མཚན། བཀའ་བརྒྱུད་སྤྱི་འཐུས་བསྟན་པ་ཡར་འཕེལ་གསུམ་གྱིས་བོད་ཀྱི་རྒྱལ་གཅེས་དཔའ་བོའི་རླབས་ཆེན་གྱི་སྡོང་པོ་མང་པོ་ས་འགྱེལ་ཡང་འགྱོད་པ་བྱས་པའི་མངོན་རྟགས་གསལ་པོ་མེད་པས་མ་ཚད། གདོང་བཀབ་ནས་གཡོལ་ཐབས་བྱས་པ་རེད།
ནག་ཉེས་ཅན་གྱི་སྤྱི་འཐུས་འདི་དག་གི་ནང་མདོ་སྟོད་སྤྱི་འཐུས་ཀྱིས་བརྒྱ་ཆ་མཐོ་པོ་ཟིན་པ་དང་ཕྲན་རང་ཉིད་ཀྱང་མདོ་སྟོད་པ་ཞིག་ཡིན་པའི་ཆ་ནས་སྐད་ཆ་འདི་བཤད་ན་འཚམས་པོ་འདུག་ལ། མདོ་སྟོད་མང་ཚོགས་ཀྱིས་ཁ་གྲག་རན་པ་རེད། བོད་ནང་གི་མདོ་སྟོད་སྨད་ཀྱི་རྒྱལ་གཅེས་དཔའ་བོ་ཚོའི་མཛད་རྗེས་ལ་མདོ་སྟོད་སྨད་ཀྱི་སྤྱི་འཐུས་ཚོས་འགན་འཁུར་ཇི་ཙམ་ཡོད་མེད་ཀྱི་དྲི་བ་དེའང་ཉིན་རེ་ནས་ཉིན་རེར་ཁ་གྲངས་ཇེ་མང་དང་རྣམ་པ་ཇེ་ཆེར་གྱུར་ཡོད། གནད་དོན་འདི་རྗེས་མའི་གྲོགས་ཚོགས་ནང་གླེང་སློང་ངེས་པར་དུ་བྱེད་དགོས་པ་དང་། གལ་སྲིད་སྣང་མེད་དུ་བཞག་ན་མ་འོངས་པར་སྤྱོད་ངན་ངོམ་འཕྱར་བྱེད་པའི་ནག་རིས་ཁྱི་ལ་འཛུམ་དྲུག་རྒྱས་སྲིད་དེ། འབྱུང་འགྱུར་བོད་ཀྱི་གཞུང་འབྲེལ་ལས་འགུལ་གྱི་འགག་རྡོ་ཆེན་པོ་ཞིག་ཏུ་འགྱུར་ཉེན་ཆེ་བས། དེ་ཡང་དགྲ་དགའ་གཉེན་སྡུག་གི་ལས་ཀ་གཉིས་པ་ཞིག་མ་རེད་པས། ཁོང་ཚོས་གྲོས་ཚོགས་ཀྱི་ཞབས་བཀྱག་ཐོག་ནས་བོད་མི་མང་གི་མིག་ཆུ་ལ་ཆར་པ་ཆུ་གྲོགས་ལྟབུ་བྱས་པ་ནི། སོས་ཐབས་མེད་པའི་རྨ་ཁ་ཞིག་དང་འཇགས་ཐབས་མེད་པའི་སྙིང་ནད་ཅིག་ཅི་ལ་མིན། ལྷག་པར་ད་རེས་ཀྱི་ཁོ་ཚོས་བྱེད་སྟངས་འདིས་སྐབས་བཅུ་བཞི་པའི་སྤྱི་འཐུས་ལོ་ལྔའི་རིང་གི་ངོ་དོན་མི་མཚུངས་པའི་ལས་ཀ་དེ་ཚོ། སྐབས་བཅོ་ལྔ་པའི་སྤྱི་འཐུས་ཀྱི་རྐུབ་བཀྱག་མིག་ལམ་དུ་འཁོར་བའི་ལས་ཀ་རྐྱང་རྐྱང་ཡིན་པ་དང་། སྐབས་འདིའི་སྤྱི་འཐུས་ཀྱི་འོས་བསྡུའི་ལས་རིམ་ཁྲོད་ནས་ཀྱང་ཁྱབ་ཁོངས་མི་མང་རྣམས་དངུལ་དང་ཀླད་པ་གཉིས་ཀས་བསླུ་ཁྲིད་བྱས་ཡོད་པའི་རྟགས་མཚན་གསལ་པོ་བསྟན་པ་རེད། མི་མང་གི་ངོས་ནས་བརྒྱ་བདམས་སྟོང་བསྒྲུགས་བྱས་པ་དང་། དགྲ་ཡིས་བརྩམས་པའི་བྱུས་ངན་གྱི་རྩ་བ་གཉེན་ལ་ཐུག་པའི་དབང་དུ་བཏང་ཡང་ཧ་ལས་ཧོན་འཐོར་བ་དང་། རྦད་དེ་སེམས་ཤུགས་ཆགས་དགོས་པའི་གནས་ལུགས་ཤིག་ཡིན་མི་སྲིད། ཅི་སྟེ་སྟག་དམར་ཡག་འདྲ་བའི་སྣེ་འཛིན་པ་ཞིག་ཡིན་པའི་འགྲེལ་བཤད་བརྒྱབ་ཀྱང་། ངོ་གདོང་ལ་ཁྱི་སྤུ་ཟུག་པའི་རྣམ་བཤད་གཉིས་ནམ་ཡང་དོ་མི་མཉམ། གང་ལྟར་གནད་དོན་འདི་བརྒྱལ་བའི་སྒང་ལ་རྡོག་བརྫིས་དང་མུ་གེའི་ཐོག་ཏུ་ཟླ་ལྷག་ཅིག་ཆགས་པ་ནི་གསལ་པོ་བཟོ་མི་དགོས་པའི་གནས་སྟངས་ཤིག་ཡིན།
སྤྱི་འཐུས་འགའ་ཞིག་གིས་ལྡི་ལིར་གཞུང་འབྲེལ་ལས་འགུལ་ནང་མཉམ་ཞུགས་བྱས་པ་ཡིན་ན། སོ་སོའི་རྣམ་དཔྱོད་སྟོན་སའི་གོ་སྐབས་མི་རག་གི་ཟེར། ཕྱོགས་སོ་སོར་ཨུ་ཚུགས་ཀྱིས་ཕེབས་ཏེ་ལས་འགུལ་ནང་མཉམ་ཞུགས་ཀྱི་རྣམ་པ་ཙམ་བསྟན་པ་ནི། སྐབས་རྗེས་མའི་སྤྱི་འཐུས་ཀྱི་སྡིངས་ཆར་གོམ་གང་ཉེ་རུ་གཏོང་བའི་དམིགས་ཡུལ་བཅངས་པ་ཁོ་ན་ལས་མ་འདས། ཟེར་བའི་སྐད་ཆ་ཞིག་སྤྱི་ཚོགས་ནང་ཁྱབ་བཞིན་ཡོད་པ་རེད། བློ་ཉེ་སྤྱི་འཐུས་ཤིག་གིས། ཞེ་ཐག་པ་ནས་སྣང་བ་འགྲོ་ཡི་ཡོད་མེད་གང་ལྟར་མི་མང་ས་ལ་རྣམ་འགྱུར་དང་འབྲེལ་བ་ཡག་པོ་འཇོག་དགོས་པ་དེ་ཧ་ལས་པའི་གལ་ཆེན་པོ་རེད། ལྟོས་དང་དཔེ་ལྟ་ས་མང་པོ་ཡོད་པ་རེད་ཅེས་ནན་ཏན་བྱས་ནས་བཤད་མྱོང་། ད་རེས་ཀྱི་ལས་འགུལ་སྐབས་ཚིག་དུམ་དེའི་ནང་དོན་གཞི་ནས་བསམ་བློའི་ནང་ལྷང་ངེར་བུད་སོང་།
དངོས་སུ་ལས་འགུལ་ནང་མཉམ་ཞུགས་གནང་བའི་སྤྱི་འཐུས་སུམ་ཅུ་སོ་གསུམ་གྱིས། སྐབས་དེའི་སྤྱི་དོན་མཛད་འཕྲིན་དང་མཛད་ཁུར་ལ་མང་ཚོགས་ཀྱི་སྙིང་ནས་བསྔགས་བརྗོད་དང་ཡི་རངས་ཐོབ་ཡོད། ཁོང་ཚོས་འགན་འཁུར་ཇི་ཙམ་བླངས་པ་ང་ཚོ་དང་ལས་འགུལ་ནང་མཉམ་ཞུགས་བྱས་པའི་གཞི་རིམ་མང་ཚོགས་ཡན་ཆད་ཀྱིས་གསལ་པོ་མཐོང་ཡོད་པ་རེད། ལྷག་པར་དུ་མདོ་སྟོད་སྤྱི་འཐུས་ཆོས་སྐྱོང་དབང་ཕྱུག་ལགས་དང་དབུས་གཙང་སྤྱི་འཐུས་ཡེ་ཤེས་ཕུན་ཚོགས་ལགས་རྣམ་གཉིས་ཀྱིས་བོད་སྐད་དང་དབྱིན་སྐད། ཧིན་སྐད་གསུམ་གྱི་ཐོག་དམིགས་བསལ་ཁྱད་ཆོས་དང་རྣམ་དཔྱོད་བསྟན་ནས། གཏམ་བཤད་སྡིངས་ཆའི་ཐོག་མི་རབས་གསར་རྙིང་གཉིས་ཀྱི་གཟི་བརྗིད་རྒྱལ་སྤྱིའི་སྟེང་ངོམ་ཐུབ་པ་བྱུང་ཡོད། ད་ཐེངས་ཀྱི་ལས་འགུལ་ནང་ལོ་རྒན་བརྒྱད་ཅུ་བརྒལ་བའི་བགྲེས་སོང་དང་ན་ཚོད་མ་ཟིན་པའི་བྱིས་པ་ལོ་དྲུག་ཡན་ཆད་ཀྱང་ས་ཐག་རིང་མིན་ལ་མ་ལྟོས་པར་མཉམ་ཞུགས་ཐུབ་སོང་། རེ་འགས། ཉིས་སྟོང་བདུན་ལོར་མི་མང་བཞི་ཁྲི་བརྒལ་བ་མཉམ་ཞུགས་ཀྱི་ཞི་རྒོལ་ཆེན་མོའི་སྣེ་ཁྲིད་པ་སྒོ་དྲུག་སྐལ་བཟང་བླ་ཆད་མྱོང་བ་ལྟར། ཐེངས་འདིའི་བཀའ་བློན་ཁྲི་པའང་ཉྭ་ཁུམ་སོང་བ་མ་རེད་དམ། ཟེར་བའི་སྐད་ཆའི་རྒྱབ་ལྗོངས་ཀྱི་ཁུངས་གསལ་པོ་མི་ཤེས་མོད། མི་མང་ལས་འགུལ་འདི་གལ་ཆེའི་དོན་ཆེན་ལ་སོང་། བཀའ་བློན་ཁྲི་པ་ཚེས་༡༩ ཉིན་གནམ་གྲུའི་དཀའ་ངལ་གྱིས་ལྡི་ལིར་ཕེབས་མ་ཐུབ་པའི་དབང་དུ་བཏང་ཡང་། ཚེས་༢༠ ཉིན་ལྡི་ལིའི་གཞུང་འབྲེལ་ལས་འགུལ་ལས་རྡོ་རྗེ་གླིང་སློབ་གྲཱའི་མཛད་སྒོ་གལ་ཆེན་བརྩིས་པ་དང་། རྡོ་རྗེ་གླིང་དུ་ཕེབས་ཐུབ་པ་ལ་ལྡི་ལིར་ཕེབས་མ་ཐུབ་པའི་གནས་ཚུལ་དེ་འགྲེལ་བཤད་རྒྱག་ཁག་པོ་ཆགས་ཡོད་པ་རེད།
སྐབས་དེའི་ཆོས་རིག་བཀའ་བློན་གྱི་གསུང་བཤད་དེ་གོ་རྒྱུ་ཚོར་རྒྱུ་ཡོད་མེད་ཇི་ལྟར་ཡང་སྤྱི་འཐུས་ཚོགས་གཞོན་གྱི་གསུང་བཤད་དེའང་ཡུལ་སྐད་ཀྱིས་དབང་གིས། གསུང་བཤད་ཀྱི་ནང་དོན་ཆ་ཚང་པ་ཞིག་གོ་མཁན་མང་མཐར་ཡང་མི་སུམ་ཅུ་བཞི་བཅུ་ལས་བྱུང་མེད་པ་འདྲ། སྤྱི་འཐུས་ཚོགས་གཙོ་མཆོག་གི་གསུང་བཤད་དང་སྒྲོབ་གཟུགས་ཀྱི་རྣམ་འགྱུར་དེ་དག་གིས། ལས་འགུལ་བ་འགོ་འཇུག་བར་གསུམ་ནས་འཛུམ་དམུལ་དམུལ་ངང་ངོ་གདོང་གི་རྔུལ་ནག་ཕྱི་བཞིན་འདུག་ལ། རྒྱ་གར་གྱི་ཡུལ་མི་དང་རྒྱ་གར་གྱི་ཆེས་མཐོའི་གཏམ་བཤད་པ་རྣམ་པས་ཀྱང་ཡ་མཚན་མཚན་དང་འདྲོགས་རིས་རིས་གནང་སོང་། མི་རྣམས་སེམས་ཤུགས་འཕར་བཞིན་པ་དང་ལྷག་པར་དུ་ལྡི་ལིའི་གཞུང་འབྲེལ་ལས་འགུལ་འདི། སྐབས་དེའི་གཞུང་འབྲེལ་ལས་འགུལ་གྱི་ལྟེ་བ་ཡིན་དུས། ཁྱབ་བསྒྲགས་དང་དོ་སྣང་། རྒྱ་ནག་དང་རྒྱལ་སྤྱི་སོགས་གང་ཅིའི་ཐད་ནས། བཀའ་བློན་ཁྲི་པ་དངོས་སུ་ཕེབས་ཏེ་གསུང་བཤད་དང་སྣེ་ཁྲིད་གནང་བ་ཡིན་ན། གཞན་དང་མི་འདྲ་བའི་ནུས་ཤུགས་ཐོན་རྒྱུ་མ་ཟད། རྡ་སའི་ལུང་ཁུག་དང་མི་འདྲ་བར་ལས་འགུལ་བ་སུམ་སྟོང་ལྷག་ཕྱོགས་སོ་སོར་ཕེབས་ཚེ་སྐབས་དེའི་མྱོང་ཚོར་དང་འགྲེལ་བཤད་རྣམས་རང་བཞིན་གྱིས་མི་འདྲ་བ་ཆགས་པ་དང་། མ་འོངས་པར་ཡང་ལས་འགུལ་འདིའི་རིགས་སྤེལ་སྐབས་མི་མང་བསྡུ་སྐོང་སོགས་ལས་འགུལ་གྱི་སྤུས་ཚད་ལ་ཁྱད་པར་ཆེན་པོ་འགྲོ་ངེས་ཡིན་པ་རེད། ཡང་གཅིག་ཐལ་སོང་སྟེ། ཚེས་༢༢ ཉིན་གྲོས་ཚོགས་ཀྱི་འཐུས་མི་སུམ་ཅུ་ལྷག་དུས་གཅིག་ཏུ་ལྡི་ལི་མ་ཇཱུ་ཏྲི་ལིའི་ཁྲོམ་གཞུང་དུ་སྤུངས་སོང་ལ། མངར་ཇ་ཤེལ་ཕོར་ཕྱེད་ཀ་རེ་ཕྱག་ཏུ་བསྣམས་བཞིན་ཡར་ཕེབས་མར་ཕེབས་དང་འཛུམ་ཡལ་ཡལ། ཧ་ཆ་རེ་བརྒྱབ་པ་ནི་སྐུ་ངོ་ཞིག་གི་གསུང་དང་འདྲ་ཐབས་མི་འདུག མ་ཇཱུ་ཏྲི་ལའི་ཁྲོམ་གཞུང་མཐོ་གང་པོ་དེ་རྦད་དེ་འགྱུར་ལྡོག་ཕྱིན་པ་དང་ཆབས་ཅིག ཉིས་སྟོང་དགུ་ལོའི་རྡ་སའི་ལུང་ཁུག་གི་གྲོས་ཚོགས་ཀྱི་ཟིང་ཆ་དང་། ཉིས་སྟོང་བཅུ་ལོའི་ཞབས་སྟེགས་འཕྲོག་རེས་ཀྱི་འཐབ་རྩོད་སོགས་རྣམ་རྟོག་སྣ་ཚོགས་པའི་ས་རྡུལ་དྲག་ཆར་བབས་ཀྱང་སྣང་བ་དཀར་པོ་དཀར་རྐྱང་ལ་དྲི་མས་མ་གོས་པའི་ཐབས་ཤེས་མང་དུ་བཏང་བ་ཡིན། གྲིབ་མའི་འོག་ནས་ཉི་མ་འདས་ཐབས་བྱས་པའི་ངན་བྱུས་རིམ་པ་དང་པོ་ངོ་སྤྲོད་དང་ས་བོན་ཙམ་ལས་མུ་མཐུད་དེ་ཆར་པར་རེ་བབ་ན། སྟོན་འབྲས་བདག་གཟུང་ལ་གྲ་སྒྲིག་འཐུས་ཚང་ལྡན་ཡོད།
![This satellite image shows Hurricane Melissa southeast of Jamaica at 12:10 GMT on October 27, 2025 [AFP]](https://tibettimes.net/wp-content/uploads/2025/10/Screenshot-2025-10-28-at-5.13.58-PM-360x180.png)
སྤྱིར་སེར་སྨད་བློ་དགའ་ཟེར་བའི་མི་འདི་ནམ་རྒྱུན་ནས་སྦེལ་ཀོབ་ནང་དུ་ཡོངས་གྲགས་སུ་ཡར་རྒྱུག་མར་རྒྱུག་བྱེད་མཁན་ཞིག་རེད། སྤྱི་ཚོགས་དང་བོད་མི་མཐུན་སྒྲིལ་ལ་ཕན་པའི་ལས་ཀ་བྱེད་མཁན་ཞིག་ཡིན་མིན་མི་ཤེས། འོན་ཀྱང་སྤྱི་ཚོགས་ནང་དུ་འགྲིག་མེད་རབས་རྐྱང་རྐྱང་བཤད་མཁན་ཞིག་རེད། འགྲིག་མེད་རབས་ཁོ་ན་བཤད་པའི་ཁྲོད་ནས་འགྲིག་པ་ཞིག་ཀྱང་ཐོན་སྲིད་པས་གོང་གི་རྩོམ་འདིའི་ནང་དུ་འགྲིག་པ་ཡང་ཕྱོགས་མང་པོ་འདུག་ཅེས་ཞུ་རྒྱུ་ཡིན།
མ་སུ་རི་སློབ་ཕྲུག་འགས་མདུན་ལམ་བཙལ་བ་དེ་བདེན་པ་རེད། འོན་ཀྱང་བྱས་ཉེས་ཅན་གྱི་སློབ་ཕྲུག་དེ་དག་གི་མིང་འདོན་མ་བྱེད་པ་འདིས་རང་བཞིན་གྱིས་དྲི་བ་ཞིག་སླེབས་པ་ནི་ཁོང་ཚོ་ནང་དུ་ཁོའི་ཕ་ཡུལ་གཅིག་པ་འགའ་ཡོད་ངེས་རེད་ཟེར་བ་འདི་རེད། སྤྱིར་ཁོང་ནི་མི་གཤིས་ཞེན་ཁོག་ཆེན་པོ་དེ་འདྲ་རེད་ཟེར་བ་ནི་ཡོངས་གྲགས་རེད། སྤྱི་མཐུས་ཁག་གཅིག་ལས་འགུལ་ནང་ལ་མ་ཞུགས་པའི་རིགས་མིང་ཐེར་འདོན་བྱེད་ཐུབ་པ་ཞིག་ལ་སློབ་མ་དེ་དག་གི་མིང་ཐེར་འདོན་བྱེད་མ་ཐུབ་པ་ནི་ངོ་མ་ཡ་མཚན་རེད། ད་དུང་ཁོང་གིས་བློ་སེང་བཀའ་ཁྲི་འོས་བསྡུ་ཐོབ་ཆེད་ཡར་རྒྱུག་གི་དྲང་བདེན་མིན་པའི་སྲང་ལམ་གྱི་གླེང་གཞི་རིགས་མང་པོ་བཟོས་པ་སོགས་ལས་འཕྲོས་ནས་སྐད་ཆ་མང་དག་གཅིག་ཡོད་ཀྱང་འདས་ཟིན་པའི་སྐད་ཆ་ཞིག་ལ་ཆ་ཞོག ད་དུང་འོས་བསྡུས་གསང་བ་ཕྱིར་བསྒྲགས་སོགས་ལས་འཕྲོས་ནས་་་་་་་་་་་་
ཡ་ཡ། ཁོང་རེད་འདུག་ག དེ་སྔོན་མ་སུརིར་སློབ་ཕྲུག་འགའ་ ཞིག་གིས་མི་ཚེ་མདུན་ལམ་བསྐྲུན་མཁན་དེ་ཡིན་པ། ཡག་པོ་འདུག ཡིན་ན་ཡང་གཞན་ལ་སྐྱོན་བརྗོད་བྱེད་པ་དེ་འདུལ་བ་ལས་མགལ་ཟིན། དེ་འདྲ་ཡིན་དུས་ད་ནས་རྒན་ཁྱེད་དགེ་སློང་ཡིན་ནམ། དེ་བཞིན་རྩོམ་ཡིག་འདི་ནང་ཆོལ་ཁ་གིས་སྐད་ཆ་མང་པོ།
སེར་སྨད་བློ་དགའ་ལགས་ལ། ཐུགས་རྗེ་ཆེ་ཞུ། བོད་ཀྱི་སྤྱི་ཚོགས་ནང་འདི་ལྟར་རྩོམ་པ་པོ་དྲང་ཚུགས་ཅན་རེ་ཡོད་ན། ད་གཟོད་ང་ཚོས་རང་གི་རྒྱལ་ཁབ་འདི་འཇིགས་ཉན་ལས་སྐྱོབ་ཐུབ། ཁྱེད་ཀྱིས་བདེན་པ་ཞིག་བཤད་ཚེ་མི་བདེན་པ་རྣམས་ཅལ་འདྲོགས་ལངས་ནས་ཅལ་ཅོལ་སྨྲ་རྒྱུ་ནི་ཆོས་ཉིད་ཡིན། ཤོད་དགོས། ང་ཚོས་མུ་མཐུད་བཤད་ནས་ནམ་ཞིག་གི་དུས་བོད་ཀྱི་སྤྱི་ཚོགས་ཚང་བདེན་པ་མ་གཏོགས་གནས་ས་མེད་ཞིག་བྱ་དགོས། དེ་ང་ཚོ་ཆོས་འཇིག་རྟེན་གཉིས་ཀར་དགོས་རྒྱུ་དེ་ཡིན།
བཀྲ་ཤིས་བདེ་ལེགས། དྲྭ་མི་ལ་དྲྭ་འབུ་ཞུགས་ནས་འབུ་སྐད་བརྒྱབ་སོང་ཡང་བློ་བདེ། སྤྱིར་བཏང་ངའི་རྩོམ་ཐུང་འདི། ལན་འདེབས་ཀྱི་ཆེད་དུ་མིན་པ་བང་ཆེན་ཟིན་བྲིས་སུ་ཞུས་པ་ཡིན། འདི་ཡང་ལན་འདེབས་མིན། རེ་བ་བྱས་ནས་བྲིས་པ་ཡིན་ཡང་སྟ་རེ་རྡོ་ལ་ཕོག་སྟེ། རྡོ་སྐད་བརྒྱབ་སོང་། རྡོ་ནི་རྡོ་རང་རེད། ཁྱོད་རྡོ་ཡིན་པ་བདེན་མོད་ངའི་ལྕགས་ཀྱི་ངོ་བོའང་འགྱུར་མི་སྲིད། ང་ནི་ལྟོས་གྲུབ་སྟེ་ཁྱོད་ར་ཡིན་ན་ང་ཡང་ཁྱི་ཡིན། ཁྱོད་ཁྱི་ཡིནའང་ང་གཟིག་ཡིན། ཁྱི་ལ་གཟས་པའི་འུར་རྡོ་དེས་ད་རེས་གོ་ཆོད་སོང་། ཁྱི་སྐད་ཀྱི་ལ་ལུང་གང་སོང་་་་་་ཧ་་་་ཧ་་་་ཧཧ་་་་ཀི་ཧི་ཧི་་་་་་་་་་
སེར་སྨད་བློ་དགའ་ལགས་ཀྱིས་གསུངས་པ་ལ་མོས་མཐུན་ཡོད། ཤ་ཚ་བའི་གཏམ་དེ་སྙན་པོ་མེད་ཅེས་བཤད་སྲོལ་ཡོད་པ་ལྟར། སེ་རྭ་སྨད་པའི་གྲྭ་རྐྱང་འདི་ནི་རྣམ་ཀུན་ནས་རང་རེའི་སྤྱི་ཚོགས་ནང་གླེང་རིན་ཡོད་པའི་སྐྱོན་ནད་དང་། ངན་མཚང་ཐེར་འདོན་བྱེད་མཁན་གྱི་འགན་ཁུར་ཡོད་པའི་རྩོམ་པ་པོ་ཞིག་རེད་འདུག
རེད། ང་ཚོར་༸གོང་ས་ཆེན་པོས་མང་གཙོ་གསོལ་རས་གནང་ནས་དུས་ཡུན་རིང་པོ་མ་སོང་བས་ཡིན་ནམ། ང་ཚོའི་གཞི་རིམ་མང་ཚོགས་ཀྱི་ཤེས་ཡོན་གནས་ཚད་སྐྱོ་དྲགས་པས་རེད། སྐྱོན་བརྗོད་ཏིག་ཙམ་རེ་དོན་པ་དང་ཐེར་འདོན་གནང་མཁན་དེར་བློ་ངོ་མི་ཤོང་བ་ལྟ་བུའི་སྐྱོན་བརྗོད་བྱེད་པའི་སྲོལ་ངན་དང་ནད་ངན་ཞིག་འདུག རང་རེ་གནས་ཡུལ་རྒྱ་གར་གཙོས་པའི་དམངས་གཙོའི་ལུང་པ་རྣམས་ཀྱི་ཚགས་ཤོག་དང་དྲ་བར་གཅིག་ལྟོས་དང་། སྐྱོན་བརྗོད་འདི་ལྟ་བུ་ནི་རྒྱུན་ལྡན་རེད་འདུག་ལ། ཡོད་ཀྱང་དགོས་ངེས་རེད། གསར་འགྱུར་བརྒྱུད་ལམ་འདི་དམངས་གཙོའི་ཀ་བ་བཞི་པར་བཞག་དགོས་པའི་རྒྱུ་མཚན་ཡང་འདི་འདྲ་བ་ལ་ཐུག་ཡོད།
གང་ལྟར་ཡང་། བློ་དགའ་ལགས། མུད་བསྟུད་དེ་སྔར་ལྟར་བྲིས་དང་། ཁྱེད་ཀྱི་བསམ་ཚུལ་ལ་སྐྱོན་བརྗོད་བྱེད་མཁན་ཡང་ཡོང་གི་རེད་ལ། ཡོད་ཀྱང་དགོས་ངེས་རེད། དེ་བཞིན་དུ་མངོན་པར་གསལ་མ་གསལ་ཅི་རིགས་ཀྱིས་རྒྱབ་སྐྱོར་བྱེད་མཁན་ཡང་ཇི་སྙེད་ཅིག་ཡོང་ངེས་རེད། དེ་ནི་ང་ཚོའི་མང་གཙོ་འདིའི་ན་ཚོད་ཅུང་སྨིན་ཡོང་གི་ཡོད་པའི་རྟགས་ཀྱང་རེད། བསྐྱང་བྱའི་གཉེན་དང་། བསྡང་བྱའི་དགྲ་བོ་གང་ཡང་མེད་པའི་གྲྭ་བཙུན་འུ་ཅག་ལ་འཁྲི་པའི་འགན་རེད།
རྒན་བློ་དགའ་ལག་ནས་བསམ་
པོད་བཤད་ཕོད་རེད་འདུག
ཡ་ཡ་སྐུ་ཞབས་བློ་དགའ་ལགས་སུ་འཚམས་འདྲི་ཞུས་པ་དང་སྦྲགས། ཁྱེད་རང་མདོ་ཁམས་རྒྱ་ཆེ་མི་མང་གི་སྤྱི་འཐུས་སུ་འོས་ཤོག་མ་འཕེན་པའི་རྒྱུ་མཚན་གྱིས་མདོ་སྟོད་སྤྱི་འཐུས་གཙོར་བཟུང་གི་སྤྱི་འཐུས་རྣམ་པར་ཁ་བརྡུང་བཏང་ཁུལ་ནི་ངོ་ཚ་བའི་གནས་སོ། ལར་ནི་ཁྱོད་ལྟ་བུའི་མི་རང་ཚུགས་མེད་ལ་ཤེས་ཡོན་མེད། མགོ་བདེ་དྲན་འཕྲུལ་ཅན་གྱི་མི་བུ་དག་མདོ་ཁམས་རྒྱ་ཆེ་མི་མང་ལ་ནམ་ཡང་མཁོ་མི་སྲིད་ལ། གཞན་ངོ་སྲུང་བའི་ཕྱིར་དུ་རང་ཉིད་འཚོང་མཁན་དང་རང་ཚུགས་ཡེ་ནས་བོར་བའི་མི་བུ་ཁྱོད་ལྟ་བུ་སུ་ལའང་མི་མཁོ་བའི་དུས་ཤིག་ཤར་ངེས་རེད། དེ་དུས་ཁྱོད་ཁ་འདྲ་གཏོང་ནས་སྡོད་ཅིག་ལོ།
རྒན་བློ་དགའ་ལག་གི་སྐད་ཆ་བདེན་པ་རེད་བསམ་ཕོད་དང་བཤད་ཕོད་པ་ཡག་པོ་འདུག
རྒན་བློ་དགའ་ལག་གི་སྐད་ཆ་ལ་བདེན་པ་འདུག་བསམ་
ཕོད་པ་དང་བཤད་ཕོད་པ་ལྷག་བསམ་རྣམ་དག་ཡག་པོ་འདུག་རྒྱབ་སྐྱོར་ཡོད།།
སྐད་ཆ་དྲང་མོ་བཤད་ན་སེར་སྨད་བློ་དགའ་ལགས་ཀྱི་གཏམ་བཤད་འདི་འདས་ཟིན་པའི་བོད་གཞུང་གི་ལས་སྣེ་དག་གི་བྱེད་སྟངས་འདྲ་པོ་འདུག། བཙན་བྱོལ་གཞུང་ཆགས་ནས་ལོ་རྒྱུས་ལ་ཕྱི་མོག་ཅིག་བལྟས་ན་ནང་ཁུལ་འཐབ་འཛིང་འོག་རང་དོན་གལ་ཆེ་འཛིན་པའི་ལམ་ལུགས་འཇུག་སྒྲིག་མ་པའི་སྔོན་དུ་རྙོག་ཁྲ་ཇི་ཙམ་ཡོད་པ་པ་དེ་ནི་བློ་དགའ་ཁྱེད་རང་གི་བཤད་སྟངས་འདི་ལྟར་བུའི་འོག་བྱུང་བ་ཞིག་རེད་། ད་དུང་དེ་རིང་ཁྱེད་རང་གི་ཆོལ་ཁའི་མིང་དང་བཀུར་འོས་སྤྱི་མཐུས་རྣམས་ཀྱི་མཚན་སྨོས་ནས་ཁ་བརྡུང་བཏང་བ་ནི་ཆིལ་སྒྲིག་ལ་གནོད་པའི་བྱ་བ་ཐབས་སྡུག་ཞིག་ལས་དགོས་པ་དང་རྒྱུ་མཚན་གང་ཞིག་མེད་པ་ཟུར་གནས་བློ་གྲོས་དང་ལྡན་པ་རྣམས་ཀྱི་མཁྱིན་གསལ་རེད་།
སེར་སྨད་བློ་དགའ་ཁོང་གིས་རྒྱུ་མཚན་ཞིབ་གཤེར་བྱས་ནས་དཔྱད་རྩོམ་བཀོད་པ་འདི་ལ་རྗེས་སུ་ཡི་རངས་ཞུ་རྒྱུ་ཡིན།
མདོ་སྟོད་སྨད་ཀྱི་ཚིག་རེ་ཟུང་འདུག་པས་འདི་བཤད་མི་དགོས་པ་ཞིག་ཏུ་སྣང་ངོ་།
འོན་ཀྱང་དྲང་བདེན་གྱི་ལྷག་བསམ་བཟོད་མེད་ངང་གསུངས་པ་འདི་ལ་མངོན་པར་བསྟོད་དོ།
རྩོམ་གྱི་ཁ་བྱང་ལ་རྒྱུ་དག་མེད་པའི་སྤྱི་འཐུས་ཞེས་བརྗོད་པ་ལས་རྒྱུ་དག་མེད་པའི་སྤྱི་འཐུས་གསུམ་ཞེས་བཀོད་ན་ལན་པོ་ཡོང་བ་འདུག
སེར་སྨད་བློ་དགའི་དཔྱད་རྩོམ་དང་འབྲེལ་བ་མེད་པའི་མཆན་འདི་རིགས་བསུབ་རོགས་དྲྭ་བདག་ལགས།
སྐྱོན་བརྗོད་བྱེད་རྒྱུ་གལ་ཆེ་ཡང་དོན་ལ་གནས་རྒྱུ་དེ་བས་གལ་ཆེ།
སེར་སྨད་བློ་དགའ་ལགས་ཀྱིས་བསམ་ཚུལ་དེར་མོས་མཐུན་མེད། རྒྱུ་མཚན་བརྟག་དཔྱད་གཅིག་ཀྱང་བྱས་མི་འདུག ལས་འགུལ་སྤེལ་དུ་ཡིན་གཅིག་མིན་གཉིས་ལྡི་ལིར་སླེབས་དགོས་དོན་མེད། དེ་བས་ད་ཐེངས་དགོངས་པ་ཞུ་པ་ཙམ་གྱིས་བོད་དོན་ལ་འགན་ཁུར་མེད་པ་དེ་བས་མིན། དབྱེ་ཞིབ་ཅིག་བྱེད་དགོས་པ་རེད། དངོས་གནས་འགན་མ་ཁུར་པར་མ་ཡོང་བ་རེད་འདུག་གམ། ཡང་ན་དོན་དག་གཞན་རེད། སྐྱོན་བརྗོད་བྱེད་རྒྱུ་གལ་ཆེ་ཡང་དོན་ལ་གནས་རྒྱུ་དེ་བས་གལ་ཆེ།
དེ་ནས་དུས་བབ་ཚང་ལ་འབོད་སྐུལ་ཞིག་ཡོད། ཁྱེད་རྣམ་པས་ལས་དོན་བྱས་པ་ལ་རྒྱབ་སྐྱོར་དང་རྗེས་སུ་ཡི་རངས་ཡོད་ཀྱང་། སྐབས་རེར་རྩོམ་ཡིག་དང་གནས་ཚུལ་བདེན་པ་ཡིན་མིན་ཞིབ་འཇུག་མ་བྱས་པར་མི་ཁག་ཅིག་ལ་ག་དུས་སྐྱོན་བརྗོད་ཡོད་ཀྱང་གཏོང་རྐྱང་དང་། ཁག་ཅིག་ལ་བསྟོད་པ་མ་གཏོགས་སྐྱོན་བརྗོད་བཀག་རྐྱང་བྱེད་ཀྱི་ཡོད་པ་ལྟ་བུ་མཚམས་རེར་མཐོང་གི་འདུག ལྷོད་གཡང་ཤོར་བ་ཡིན་ན་ཡིད་གཟབ་གནང་རོགས། རྩོམ་སྒྲིག་པར་འགན་ཆེན་པོ་ཡོད། མི་ཞིག་གིས་རྩོམ་ཡིག་ཅིག་བྲིས་ན་དེ་བདེན་པ་ཡིན་པ་དང་། ནོར་ཡོད་མེད་ལ་བརྟག་དཔྱད་དབྱེ་ཞིབ་བྱེད་དགོས།
ཐུགས་རྗེ་ཆེ། དུས་བབ་ཀློག་པ་པོ་ཞིག་ཡིན་པས་ཆ་ནས་བཤད་པ་ཡིན་པ་དྲ་ཐོག་ཏུ་གཏོང་རོགས།
སེར་སྨད་བློ་དགའ་མང་གཙོ་ཚོགས་པ་ནང་དུ་ཡོད་པ་དེ་གནས་ཚུལ་ཡག་པོ་ཞིག་རེད། དེ་ལས་ཆུ་བཞི་སྒང་དྲུག་གསར་རྙིང་གི་རྙོག་དྲའི་ནང་དུ་ཞུགས་པ་ལས་ཡག་པ་རེད། ད་དུང་བཀའ་ཁྲི་བློ་སེང་གིས་ཤར་ཁུག་ཕུད་པ་ལྟར་སེར་སྨད་ལ་གང་ཡང་བྱེད་ཐུབ་ཀྱི་མ་རེད། བྱེད་སའང་ཡོད་མ་རེད། བཀའ་ཁྲི་ནི་བཀའ་ཁྲི་རང་རེད། གཞུང་ཞབས་པ་ཚོའི་མགོ་ན་དབང་ཡོད་ཀྱང་མང་ཚོགས་ཀྱི་ལག་གི་འཇུག་རྡེའུ་ཞིག་རེད།་
སེར་སྨད་བློ་དགའ་ལགས་ལ་མཚམས་འདྲི་དང་བཅས་རྗེས་སུ་ཡི་རེངས་ཞུ་རྒྱུ་ཡིན། རྒན་ཆབ་བྲག་གི་གསུངས་བ་ལྟར་གོང་རིམ་གྱི་འོག་རིམ་ལ་ལྟ་བ་དང་འོག་རིམ་གྱི་གོང་རིམ་མཐོང་བ་ཟེར་བ་དེར་གོ་རྒྱུ་ཆེན་པོ་འདུག་ལ། ཁྱེད་རང་འོག་རིམ་ནས་གོང་རིམ་མཐོང་མཁན་ཞིག་རེད། ཡིིན་ནའང་ཆོལ་ཁའི་དབྱེ་བ་དེས་རྩོམ་ཡིག་ཧྲིལ་པོར་སྐྱོན་ཅུང་ཙམ་བྱུང་ཡོད། ལར་ནས་དེ་ལྟར་དབྱེ་བ་མ་ཕྱེ་ནའང་ངས་བལྟས་ན་ཕལ་ཆེར་མི་གང་ལ་གང་འཚམ་ཞིག་གིས་དེ་ལྟར་ལྟ་རྒྱུ་རེད། བྱས་ཙང་ཐ་གཅིག་ཏུ་ཁྱེད་རང་གི་དབྱེ་བ་དེ་མ་འགྲིག་པར་བརྗོད་ཐུབ་ཀྱི་མི་འདུག འོག་ནས་གོང་རིམ་མ་མཐོང་བའི་མཆན་འདེབས་མཁན་ཞིག་གིས་ཚོར་བ་དྲག་པོས་རྩོམ་ཡིག་འདི་བྲིས་ཤག་ཟེར་ནས་སྐྱོན་བརྗོད་པ་ནི་དོན་དག་གང་ཡང་མེད་པ་ཞིག་དོན་དག་ཅན་ཞིག་ཏུ་བཤད་པ་རང་རེད། ཚོར་བ་དྲག་པོ་མེད་པར་རྩོམ་འདི་འདྲ་ཞིག་འབྲི་ཐུབ་བམ། མཁས་མདོག་མ་སྟོན། རྩོམ་པ་པོ་ཞིག་གིས་རྒྱུ་མཚན་གཞའ་མ་རྐྱང་རྐྱང་གིས་རྩོམ་འབྲི་ཐུབ་བམ། རེད། ཁོང་གི་རྩོམ་ཡིག་འདིས་བདེན་རྫུན་གསལ་པོར་བསྟན་པ་མ་ཟད། ཀློག་པ་པོར་གསལ་འདེབས་ཡང་ཡག་པོ་བསྟན་ཡོད་རེད། ཅི་ཞིག་ནི་ཚོར་བའི་དབང་གིས་རྣམ་དཔྱོད་ཡལ་བ་ཟེར་བ་རེད། བཙན་པོའི་བུས་རྩོམ་ཡིག་འདི་ལས་ལྷག་པའི་རྣམ་དཔྱོད་ཀྱི་རྩོམ་ཞིག་བྲིས་བ་མཐོང་མ་སོང་ལགས། ལར་ནས་སྤྱི་འཐུས་གངས་ལྷ་མོ་ལ་དམིགས་བསལ་ཡོད་ཆོག་གི་རེད། དེ་ལས་གཞན་རྣམས་ལ་རྒྱུ་མཚན་ག་རེ་ཡོད་དམ། ཚུལ་ཁྲིམས་བསྟན་འཛིན་ཟེར་བ་དེས་ལར་ནས་མི་ལྕོག་ལྕོག་གཞུ་འདྲ་ཞིག་ཡིན། སེམས་ཅན་ཡར་ལ་འགྲོ་སྐབས་ཁོ་མར་ལ་འགྲོ་མཁན་ཞིག་རེད།
སེར་སྨད་བློ་དགར་རྒྱབ་སྐྱོར་ཡོད། མི་འདི་པ་རྒྱལ་ཞེན་ཅན་ཞིག་དང་ཆོལ་ཁོངས་སུ་མི་ཕྱོགས་པ་ཞིག་ཡིན་པ་དེ་སྔོན་ནས་ཚོར་སོང་། སྐབས་འདིར་མདོ་སྟོད་སྤྱི་འཐུས་སུ་སླེབས་པ་དགའ་འོང་། ལྷག་དོན་ཁོ་པས་སྔོན་ལོ་སློབ་ཕྲུག་མང་པོའི་ཆེད་དུ་བལ་ཡུལ་དང་གངས་སྐྱིད་སོགས་སུ་ཡར་རྒྱུགས་མར་རྒྱུགས་ཀྱིས་འབྲས་བུ་བཟང་པོ་སྟོན་སོང་།
དྲ་འབུ་འགའ་ཞིག་གིས་ཁོ་པས་སྐྱོན་བརྗོད་པ་ནི། དོན་རྒྱལ་དང་འབྲེལ་ནས་ཡིན་པར་སྙམ། དེ་སྔོན་ཁོ་པས་དོལ་རྒྱལ་སྟེན་མཁན་ཚོ་དང་འཐབ་རྩོད་བྱས་རབས་མང་པོ་འདུག ད་རེས་ཀྱང་ཁོ་པས་གནས་ཚུལ་དངོས་བྱུང་བཤད་པ་རེད།
སེར་སྨད་བློ་དགར་རྩ་ཚང་འདུག་པ་མ་ཟད། གདོང་དམར་བོད་ཀྱི་སླད་མེད་པའི་རྩ་དེ་ཚང་འདུག ང་ཚོས་བཤད་དགོས་སར་བཤད་དགོས་ལ་དམོད་དགོས་སར་དམོད་དགོས། ལྷག་པར་དུ་སྤྱི་དོན་ཁ་ལ་ཁྱེར་མཁས་པ་དང་༸གོང་ས་ཆེན་པོར་སྤྲེལ་ལད་འཁྲབ་མཁས་པའི་དཔོན་ངན་རེ་ཟུང་གི་རང་ཐོག་ལ་བབ་ན། འགྲོ་དགོས་སར་འགྲོ་མ་ཐུབ་པ་དང་། བཤད་དགོས་སར་བཤད་མ་ཐུབ་པའི་རྣམ་པ་འདི་ནི་དོན་དངོས་ཐོག་ཁོ་བ་ཚོ་བོད་བསྟན་སྲིད་ཀྱི་དོན་ལ་ཅི་ཙམ་གྱིས་ཤ་ཚ་བྱེད་ཀྱིན་ཡོད་མེད་ཀྱི་ཁོ་བ་ཚོའི་རང་གཟུགས་ངན་པ་དེ་ཕྱི་རུ་མངོན་པ་རེད། ལས་འགུལ་འདི་དང་མཛད་སྒོ་དེ་གཉིས་ལས་མཛད་སྒོ་གལ་ཆེན་དོན་ཆེན་ལ་བརྩི་མཁན་འདིས་ཀྱང་དོན་དངོས་སུ་ཁོང་གི་ནང་སྙིང་རུས་པའི་སྟེང་ན་ཅི་ཞིག་ཡོད་མེད་གསལ་སྟོན་བྱས་འདུག
༼ རེ་འགས། ཉིས་སྟོང་བདུན་ལོར་མི་མང་བཞི་ཁྲི་བརྒལ་བ་མཉམ་ཞུགས་ཀྱི་ཞི་རྒོལ་ཆེན་མོའི་སྣེ་ཁྲིད་པ་སྒོ་དྲུག་སྐལ་བཟང་བླ་ཆད་མྱོང་བ་ལྟར། ཐེངས་འདིའི་བཀའ་བློན་ཁྲི་པའང་ཉྭ་ཁུམ་སོང་བ་མ་རེད་དམ། ཟེར་བའི་སྐད་ཆའི་རྒྱབ་ལྗོངས་ཀྱི་ཁུངས་གསལ་པོ་མི་ཤེས་མོད། མི་མང་ལས་འགུལ་འདི་གལ་ཆེའི་དོན་ཆེན་ལ་སོང་། བཀའ་བློན་ཁྲི་པ་ཚེས་༡༩ ཉིན་གནམ་གྲུའི་དཀའ་ངལ་གྱིས་ལྡི་ལིར་ཕེབས་མ་ཐུབ་པའི་དབང་དུ་བཏང་ཡང་། ཚེས་༢༠ ཉིན་ལྡི་ལིའི་གཞུང་འབྲེལ་ལས་འགུལ་ལས་རྡོ་རྗེ་གླིང་སློབ་གྲཱའི་མཛད་སྒོ་གལ་ཆེན་བརྩིས་པ་དང་། རྡོ་རྗེ་གླིང་དུ་ཕེབས་ཐུབ་པ་ལ་ལྡི་ལིར་ཕེབས་མ་ཐུབ་པའི་གནས་ཚུལ་དེ་འགྲེལ་བཤད་རྒྱག་ཁག་པོ་ཆགས་ཡོད་པ་རེད།
སྐབས་དེའི་ཆོས་རིག་བཀའ་བློན་གྱི་གསུང་བཤད་དེ་གོ་རྒྱུ་ཚོར་རྒྱུ་ཡོད་མེད་ཇི་ལྟར་ཡང་སྤྱི་འཐུས་ཚོགས་གཞོན་གྱི་གསུང་བཤད་དེའང་ཡུལ་སྐད་ཀྱིས་དབང་གིས། གསུང་བཤད་ཀྱི་ནང་དོན་ཆ་ཚང་པ་ཞིག་གོ་མཁན་མང་མཐར་ཡང་མི་སུམ་ཅུ་བཞི་བཅུ་ལས་བྱུང་མེད་པ་འདྲ། སྤྱི་འཐུས་ཚོགས་གཙོ་མཆོག་གི་གསུང་བཤད་དང་སྒྲོབ་གཟུགས་ཀྱི་རྣམ་འགྱུར་དེ་དག་གིས། ལས་འགུལ་བ་འགོ་འཇུག་བར་གསུམ་ནས་འཛུམ་དམུལ་དམུལ་ངང་ངོ་གདོང་གི་རྔུལ་ནག་ཕྱི་བཞིན་འདུག་ལ། རྒྱ་གར་གྱི་ཡུལ་མི་དང་རྒྱ་གར་གྱི་ཆེས་མཐོའི་གཏམ་བཤད་པ་རྣམ་པས་ཀྱང་ཡ་མཚན་མཚན་དང་འདྲོགས་རིས་རིས་གནང་སོང་། མི་རྣམས་སེམས་ཤུགས་འཕར་བཞིན་པ་དང་ལྷག་པར་དུ་ལྡི་ལིའི་གཞུང་འབྲེལ་ལས་འགུལ་འདི། སྐབས་དེའི་གཞུང་འབྲེལ་ལས་འགུལ་གྱི་ལྟེ་བ་ཡིན་དུས། ཁྱབ་བསྒྲགས་དང་དོ་སྣང་། རྒྱ་ནག་དང་རྒྱལ་སྤྱི་སོགས་གང་ཅིའི་ཐད་ནས། བཀའ་བློན་ཁྲི་པ་དངོས་སུ་ཕེབས་ཏེ་གསུང་བཤད་དང་སྣེ་ཁྲིད་གནང་བ་ཡིན་ན། གཞན་དང་མི་འདྲ་བའི་ནུས་ཤུགས་ཐོན་རྒྱུ་མ་ཟད། རྡ་སའི་ལུང་ཁུག་དང་མི་འདྲ་བར་ལས་འགུལ་བ་སུམ་སྟོང་ལྷག་ཕྱོགས་སོ་སོར་ཕེབས་ཚེ་སྐབས་དེའི་མྱོང་ཚོར་དང་འགྲེལ་བཤད་རྣམས་རང་བཞིན་གྱིས་མི་འདྲ་བ་ཆགས་པ་དང་། མ་འོངས་པར་ཡང་ལས་འགུལ་འདིའི་རིགས་སྤེལ་སྐབས་མི་མང་བསྡུ་སྐོང་སོགས་ལས་འགུལ་གྱི་སྤུས་ཚད་ལ་ཁྱད་པར་ཆེན་པོ་འགྲོ་ངེས་ཡིན་པ་རེད། ༽
སྦེལ་ཀོབ་ས་གནས་མང་གཙོ་ཚོགས་པའི་ཚོགས་གཙོ་སེར་སྨད་བློ་དགའ་དང་དངོས་མིང་བློབཟང་ཆོས་གྲུབ་ཟེར་ཁོང་ད་ལོར་མདོ་སྟོད་སྤྱི་འཐུས་ཀྱི་འོས་ནངལངས་པ་རེད།ཁོའི་བྱེད་བབ་དང་ལྷག་པར་དུ་མི་ཡང་པོ་།སློབ་སྦྱོང་གང་ཡང་མེད་མཁན་།སྤྱི་ཚོགས་ཐོག་རྩ་མེད་བརྩི་བའི་མི་ཞིག་ཡིན་པའི་ངོས་ནས་སྤྱི་འཐུས་དེ་ཁོང་ལ་ཐོབ་མེད།
དེ་ནས་ཁོས་རང་ཉིད་ཆོལ་ཁའི་ཁོངས་རྐུབ་སྟེགས་ཤིག་མི་རག་པར་མཐོང་ནས་ད་ཐེངས་དྲང་པོ་བདེན་པ་ཡིན་མདོག་གིས་རང་དང་ཉེ་བའི་མི་འམ།རང་གི་ཆོལ་ཁོངས་ཀྱི་གནད་ཡོད་སྤྱི་འཐུས་ཁ་ཤས་ལ་སྐྱོན་འདོགས་པ་དེའི་དམིགས་ཡུལ་ནས་མ་འོངས་པར་མང་གཙོ་ཚོགས་པ་མཚོན་པའི་ཆོལ་ཁ་ཆོས་ལུགས་ཀྱི་རིས་བཅད་མེད་པའི་ཚོགས་པ་དག་ན་རྐུབ་སྟེགས་རག་པའི་སླད་དུ་རེད། མ་གཏོགས་བདེན་དང་དྲང་པོ་གནས་ལུགས་གཞི་བཅོས་པའི་སྐད་ཆ་མ་རེད།
དེས་ན་མི་ཚང་མས་ད་ནས་ཁོ་ལ་དོགས་ཟོན་གྱིས་་་་་་་་་་་་་་་་་་་་་་་
སེར་སྨད་བློ་དགའ་ལགས་ཀྱི་བསམ་ཚུལ་ཚང་མར་ཀློག་པ་ཡིན། ས་ཆ་དེ་ནས་ང་ལ་ཡང་སེམས་ཚོལ་འདྲ་མིན་ཞིག་གི་སེམས་ལྷོད་ལ་འབབ་མ་ཐུབ་པ་ཞིག་བྱུང་། གང་ལྟར་ང་ནི་དྲངས་བདེན་ལ་དད་པ་ཡོད་ལ་དྲངས་གཏམ་བཤད་དེ་བས་དགའ། ཕར་ཆེར་ཚོགས་གཞོན་ཡིན་པ་ཡོད། ཁོང་གིས་ད་ཐང་མཉམ་ཞུགས་འདི་ལ་སྤྱི་མཐུས་ཕར་ཆེར་འདིར་ཕེབས་ཡོད་ཀྱང་འགའ་ཞིག་ཕེབས་མ་ཐུབ་པ་དང་འགའ་ཞིག་གི་ཕྱོགས་གཞན་ནས་སྣེ་ཁྲིད་བྱེད་བཞིན་ཡོད་ཁྱེད་ཅག་གི་སེམས་བདེ་མོ་བྱས་ཆོག་ང་ཚོ་སྤྱི་མཐུས་ཚོ་འདིར་ཚང་མཛོམ་མ་ཐུབ་ཅིང་མཐུན་ཐག་ཆོད་ཡོད་གསུངས་པ་ལས། རྒྱུ་སྐྱེན་གང་གིས་ཕེབས་མ་ཐུབ་པ་སོགས་གསལ་བཤད་མི་འདུག། ངའི་སེམས་ལ་ཡང་བློ་དགའ་ལ་བྱུང་བའི་དྲི་བ། ཕེབས་མ་ཐུབ་པའི་སྤྱི་མཐུས་ཚོ་ཅེས་ཕྱིར? གང་ལྟར་གོང་གི་གསུང་ཐུང་ངུ་དེས་ཕེབས་མ་ཐུབ་པའི་མཐུས་མི་ཚོ་བཀབ་སོང་བའི་ཚོར་སྣང་བྱུང་།
འགའ་ཞིག་གིས་བློ་དགའི་སྐྱོན་བརྗོད་བཞིན་འདུག་གསུང་བ་དང་འགའ་ཞིག་གིས་ཆོ་མེད་པས་སྡུག་ར་བྱེད་པ་སོགས་ངོ་མ་དགོད་བྱེད་རེད །
སེར་སྨད་བློ་དགའི་ངོས་ནས་བདེན་གཏམ་ལས་སྐྱོན་བརྗོད་བྱས་པ་མིན། སྐྱོན་ཅན་རང་ངོས་ནས་བཤད་ན་སྐྱོན་ལ་འཛུབ་མོ་བཙུག་པ་རེད། མ་ཤེས་མ་དག་གི་འདི་ལྟར་དབྱེ་བ་འབྱེད་དགོས་པ་ཤེས་ན་རེད
བློ་དགའ་ཟེར་བ་དེ་རྩ་མི་ཚང་བ་ཚང་མས་མཁྱེན་རྟོགས་ཐུབ་ཀྱི་རེད་བསམ། ཤར་ཁུག་གིས་བློ་སེང་ལ་ཁ་བཏང་ནས་གཡུག་པ་ལྟར་འདི་ཡང་ཁྲིམས་དང་འགལ་ཡོད་པས་བློ་སེང་ལ་ཆད་པ་གཅོད་དུ་འཇུག་རོགས། གལ་སྲིད་བློ་སེང་གིས་འདི་ལ་ཇུས་གཏོགས་མ་བྱས་ན་བློ་སེང་ལ་ཆོལ་ཁའི་ཕྱོགས་རིས་ཡོད་པར་ངོས་འཛིན་མི་བྱེད་ཐབས་མེད་ཆགས་པ་རེད། ཚང་མས་འདི་ངེས་པ་བྱེད་དགོས།
་སེར་སྨད་བློ་དགའ་ལགས་ཀྱིས་ཞིབ་འཇུག་ཡག་པོ་གནང་འདུག་པ་མ་ཟད་རྩོམ་གཤིས་ཀྱང་ཡར་རྒྱས་ཆེན་པོ་སོང་འདུག་ལགས། སྤྱིར་བཏང་བྱས་ན་སྤྱི་འཐུས་ཚོ་ད་རེབ་སྤྱི་འཐུས་ཚོགས་ཁང་གི་རྐུབ་སྟེགས་སྟེང་བོད་མི་ནང་ཁུལ་མགོར་རྫིག་ཉམས་སྟོན་པ་བཞིན་ད་རེབ་མི་མང་གི་ལས་འགུལ་དབུ་འཁྲིད་དེ་རྒྱ་དམར་གཞུང་ལ་རྫིག་ཉམས་སྟོན་དགོས་ཀྱང་། ཐབས་སྐྱོ་པ་ཞིག་ལ་མདོ་སྟོད་སྤྱི་འཐུས་དཀོན་མཆོག་ཆོས་སྒྲོན་དང་། མདོ་སྟོད་སྤྱི་འཐུས་གཡུང་དྲུང་རྒྱལ་མཚན་སོགས་གོ་མེད་ཚོར་མེད་རེད་འདུག་ག
གྲ་མིང་སེར་སྨད་བློ་དགའ་ཟེར་བ་རྒྱ་ཞེན་ཆེ་འདོག་གི་རྩམ་ཡིག་ནང་། བོད་མིའི་བླ་ན་མེད་གཞུང་གི་འཛད་གཙོ་སྤྱི་འཐུས་རྣམ་པ་ཁག་ཅིག་སྐྱོན་བརྗོད་དེ་ལ་དུས་ནམ་ཡང་ངོས་ལེན་མེད། གང་ཡིན་ཟེར་ན་གྲ་ཁྱེད་རང་ད་བར་བོད་སྤྱི་པའི་ཐོག་ལས་དོན་ག་རེ་བསྒྲུབས་ཡོད་། བོད་ནས་རྒྱ་གར་ནང་ག་རེ་ཆེད་དུ་ཡོང་བ། སེར་སྨད་ནང་དུ་ག་རེ་བྱས་ནས་སྡོད་ཡོད་། ག་རེ་སྦྱང་གི་ཡོད། ལུས་ལ་གྲ་ཆས་ཞིག་གྱོན་ནས་སྤྱི་ཚོགས་ནང་དཀྲུག་གཞི་བཞག་པ་དེ་ངོས་ལེན་མེད། ཁྱེད་རང་དེ་འདྲ་རྒྱ་ཞེན་ཡོད་ན་ད་བར་དུ་སྤྱི་འཐུས་ག་རེ་བྱེད་ནས་མ་ཐོབ་པ་རེད། ལས་དགོས་རྒྱབ་ནས་མ་ཡོང་པ་དེ་ཚོ་རྒྱུ་མཚན་ཅི་ཡིན་དང། གྲོས་ཚོགས་སུ་བཅར་མ་ཐུབ་པ་རྣམ་མ་བཅར་རེད་དམ་བཅར་མ་ཐུབ་པ་རེད། དེ་ཚོ་ལ་རེ་རེར་བཞིན་རྒྱུ་མཚན་འབྲི་ན་ཡག་པོ་འདུག རྒྱ་ཆེའི་མི་མངས་ནས་གཟིགས་ཀྱི་རེད། དེ་མིན་ཁྱེད་རང་གི་རྒྱ་ཞེན་ཁ་ལ་ཁུར་ནས་རྒྱ་མི་སྲིད་ཇུས་ཀྱི་ལས་ཀ་བྱེད་པ་དེ་ལ་ངོས་ལེན་མེད། ང་ཚོས་སྤྱི་ཚོགས་དེ་ཁྱེད་རང་འདྲ་པོ་ཞིག་གི་གཏོར་ཐུབ་ཀྱི་མ་རེད། དེ་ལས་ཁྱེད་རང་དོ་རྒྱལ་ཚང་དུ་ཕར་འགྲོ་ན་ཡག་གི་རེད།
ཆོལ་ཁ་ཆོས་ལུགས་ཀྱི་ཞེན་ཁོག་གང་ཡང་མིན་མོད། ང་དང་ང་ལྟ་བུ་མི་དམངས་དཀྱུས་མ་ཚོས་ངེས་པར་དུ་ཤེས་འདོད་ལ་ཤེས་དགོས་པ། ཤེས་མ་ཐུབ་པ་དེ་གོང་གསལ་སྤྱི་འཐུས་དེ་དག་མཉམ་ཞུགས་མ་ཐུབ་པ་དེ་གཞུང་དོན་དང་སྒེར་དོན་གང་ཡིན་དང་། ཁ་ཅིག་ལས་བགོས་ནང་ཚུད་ཀྱང་ཕེབས་མི་འདུག་པ་དང་ཁ་ཅིག་ལས་བགོས་ནང་ཚུད་ཀྱང་མེད་ལ་ཕེབས་ཀྱང་མེད་པ་དེའི་རྒྱུ་རྐྱེན་གང་ཡིན་པ་དེ་རེད།
ཁོང་ཚོ་ནི་ད་བར་བོད་པའི་སྤྱི་ཚོགས་ནང་དུ་བྱས་རྗེས་འཇོག་མཁན་དང་གུས་བཀུར་བྱེད་འོས་པ་རྐྱང་རྐྱང་རེད། ཁྱེད་རང་ལ་བལྟས་ན་བྱས་རྗེས་ག་རེ་ཡོད། ད་བོད་པའི་སྤྱི་འཚོགས་དང་གྲྭ་ཚང་ནང་དུ་དཀྲོགས་གཏམ་སྤེལ་རྒྱུ་མ་གཏོགས་ལས་ཀ་གཞན་ག་རེ་བྱས་པ་ཡོད། ཁྱོད་ཀྱི་བྱས་ ༢༠༡༠ ལོར་འོས་ཐོབ་ལ་རེ་བ་བྱས་ཏེ་བལ་ཡུལ་སོང་ནས་ཕྲུ་གུ་སྒྲིག་འགལ་རྣམས་ཚུར་ཁྲིད་ནས་ཁཡaོད་ཀྱི་ཁྲིད་ཡོད་ཚུལ་དང་འོས་ཐོབ་རེ་བའི་ཆེད་གསལ་བསྒྲགས་འདྲ་སྤེལ་བྱས་ཀྱང་མི་མང་མགོ་གཏོང་ཐུབ་ཀྱི་མ་རེད། ག་ཞི་རྩ་ཁྱོད་རང་མི་གཞི་མ་རབ་ཏ་ཤལ་ཞིག་ཡོད་པ་ཕལ་ཆེ་བས་ངོས་འཛིན་བྱེད་ཀྱི་ཡོད་པ་ཁྱོད་རང་ཤེས་མི་འདུག་བ།
གོང་དུ་མཐོང་ཚུལ་མང་པོ་གསུང་འདུག་པ་དེ་དག་གཅིག་བྱས་ན་ཡིན་སྲིད་པ་ཞིག་རེད། གཅིག་བྱས་ན་སྤྱི་འཐུས་ལྷན་ཁང་ནས་གོང་དུ་བཀོད་སྒྲིག་མ་གནང་བ་དང་བཅར་མ་ཐུབ་པ་དེ་དག་ལ་རྒྱུ་མཚན་ཡོད་ངེས་རེད། ལམ་སེང་ཁྱི་སྨྱོན་པས་སོ་བརྒྱབ་པ་ལྟ་བུས་གནམ་མཆོངས་ས་མཆོངས་བྱས་ན་ད་གཟོད་གོང་དུ་གསུངས་པའི་(བོད་མི་མང་ལ་སེམས་གསོ་བྱད་རྒྱུ་ཡིན)ཟེར་བ་དེ་ཆེད་དུ་གཉེར་ནས་སེམས་ཕམ་བཟོས་པ་ཞིག་ཅི་ལ་མིན། མ་གཞི་ཁྱེད་རང་རྟག་པར་བཀྲ་ཤིས་པའི་གསས་མཁར་བརྩེགས་ས་ལ། ཐན་ངན་པའི་ཀུ་ཅོ་འདེབས་དོན་ཅི་ཡིན། ཁྱེད་རང་སྤྱི་འཐུས་ཀྱི་རྐུབ་སྟེགས་མ་རགས་པ་དེ་ཁོ་ཚོས་བཟོས་པ་མ་རེད། ཁྱེད་རང་སྙིང་ནད་ཀན་སེལ་ན་བ་དེ་ཁོ་ཚོའི་སྟེང་དུ་སྤུངས་ན་ག་ལ་འགྲིགས། སྤྱི་འཐུས་བྱེད་འདོད་ཡོད་མི་མང་ནང་དུ་བྱས་རྗེས་གང་ལ་གང་འཚམས་བཞག་ན་ཐུབ་སྲིད་པ་རེད། དེའི་ནང་ནས་མདོ་སྟོད་སྤྱི་འཐུས་དེ་ཚོར་སྡང་སྨོད་བྱས་པ་དེ་ཀྱོད་ཀྱི་རྐུབ་སྟེགས་འཕྲོག་མཁན་དེ་ཁོ་ཚོ་ཡིན་པའི་བཟོ་འདྲ་ཞིག་བྱས་འདུག
རྩ་བའི་ཆ་ནས་ཁྱེད་ཀྱིས་རྩོམ་ཡིག་ཡག་པོ་ཞིག་བྲིས་འདུག་པས་དགའ་བསུ་ཡོད། འོན་ཀྱང་ཁྱེད་ཀྱི་རྩོམ་གཤིས་ལ་བལྟས་ཚེ་ཁྱེད་རང་གིས་རྩོམ་འདི་འབྲི་བའི་སྐབས་ཚོར་ཤུགས་དྲག་པོ་ཞིག་གི་འོག་ནས་བྲིས་པ་ལྟ་བུ་ཞིག་འདུག དེ་ལྟར་རང་ཉིད་ཀྱི་ཚོར་ཤེས་ཚོར་བ་རང་བ་ཞིག་གི་འོག་ཏུ་ཤོར་ཚེ་རྟོགས་དཔྱོད་ཀྱི་ནུས་པ་ཉམ་འགྲོ་གི་ཡོད། དེས་རྐྱེན་པས་བདེན་རྫུན་བརྡར་གཅོད་ཀྱི་རྣམ་དཔྱོད་དེ་ཡལ་གྱི་ཡོད། ད་རེས་ཀྱི་ཁྱེད་ཀྱི་རྩོམ་འདི་ལའང་ཚོར་འདུ་དེའི་འོག་ཏུ་ཤོར་འདུག་སྟབས་གནད་དོན་མི་ཉུང་བ་ཞིག་རང་ཐག་ར྄ང་བཅད་གནང་བ་ལས་རྟོགས་དཔྱོད་ཀྱི་ཞག་རྩི་མི་འདུག གང་ཡིན་ཞུས་ན་གོང་ཞུས་སྤྱི་འཐུས་དེ་མིགས་ཡོང་མ་ཐུབ་པའམ་ཡང་ན་ཆེད་དུ་མ་ཡོངས་པའི་གནས་ཚུལ་མཁོ་འདོན་གནང་མི་འདུག དེར་བརྟེན་དེ་མུར་བསྡོམས་ཚིག་འཇོག་རྒྱུ་དེ་ཆུང་སྔ་དྲག་པ་མིན་འགྲོ དེ་ནི་བདག་གི་བསམ་འཆར་ཙམ་ཡིན།
ཟིན་བྲིས་པ་ཚང་མ་ཁྱེད་རང་ནང་བཞིན་ཡིན་ན་ཅི་མ་རུང་། ང་དྲང་བདེན་ལ་ཞེ་དྲག་དགའ།
བསྐྱར་ཞིབ་གནང་བ་ཡག་པོ་རེད། གོང་རིམ་གྱིས་འོག་རིམ་གཟིགས་ཐུབ་པ་དང་འོག་རིམ་གྱིས་ཀྱང་གོང་རིམ་མཐོང་ཐུབ་རྒྱུ་དེ་ནི་གལ་ཆེན་པོ་རེད། འོན་ཀྱང་རྩོམ་ཡིག་སྤེལ་མཁན་རང་ཉིད་ཆོལ་ཁོངས་གང་དུ་གཏོགས་ཀྱང་དོན་གནད་ལ་ལ་ཞིག་ལ་ཆོལ་ཁའི་དབྱེ་བ་འབྱེད་མི་འོས། ལྷག་པར་གོང་རིམ་དབུ་ཁྲིད་རྣམ་པ་སུ་ཞིག་ཡིན་རུང་དེ་ལ་ཆོལ་ཁོངས་དང་སྦྱར་ནས་འགྲེལ་བརྗོད་མ་གནང་ན་ཡག
དེའི་རྒྱུ་མཚན་གཙོ་བོ་ནི་སྐད་ཆ་དེ་རིགས་ལ་ཆེད་དུ་འཇུས་ནས་ཆོལ་ཁའི་བཟང་ངན་གླེང་སློང་བྱེད་རྒྱུའི་ཉེན་ཁ་ཞིག་ཚོར་གི་འདུག
མཉམ་ཞུགས་གནང་མ་ཐུབ་པ་དེ་དག་ལ་ཡང་སོ་སོར་རྒྱུ་རྐྱེན་གལ་ཆེན་རེ་ཡོད་ཀྱང་སྲིད་དེ་དག་སྐོར་ལ་རྩད་གཅོད་བྱེད་དགོས་ཚེ་དོ་བདག་སོ་སོར་ཡང་བཅར་འདྲི་བྱ་རྒྱུ་གལ་ཆེ་སྙམ།