ཨེ་མོ་རིར་བོད་དོན་ལས་འགུལ།

ཨེ་མོ་རི་གཙུག་ལག་སློབ་གཉེར་ཁང་གི་བོད་རང་དབང་སློབ་ཕྲུག་ཚོགས་པའི་གོ་སྒྲིག་འོག  འབྲས་སྤུངས་བློ་གསལ་གླིང་གྲྭ་ཚང་གི་ཆོས་ཚོགས་དང་། ས་གནས་བོད་རིགས། བོད་དོན་རྒྱབ་སྐྱོར་བ་བཅས་ཀྱིས་བོད་ནང་གི་ཛ་དྲག་གི་གནས་བབ་དང་། རང་ལུས་མཆོད་མེར་སྒྲོན་པའི་རྒྱལ་གཅེས་དཔའ་བོ་དག་གི་ཆེད་དུ་མར་མེ་ཁྲོམ་སྐོར་གྱི་ལས་འགུལ་སྤེལ་སོང་།

དེ་རིང་ཕྱི་ཟླ་ ༡༡ ཚེས་ ༢ དང་། རེས་གཟའ་ལྷག་པའི་ཉིན་གྱི་ཕྱི་དྲོའི་ཆུ་ཚོད་དྲུག་དང་ཕྱེད་ཀའི་ཐོག ཨ་རིིའི་མངའ་སྡེ་ཇོར་རྗི་ཡའི་གྲོང་ཁྱེར་ཨེ་ཋི་ལན་ཌར་ཡོད་པའི་ཨེ་མོ་རི་གཙུག་ལག་སློབ་གཉེར་ཁང་དུ། བོད་རང་དབང་སློབ་ཕྲུག་ཚོགས་པའི་གོ་སྒྲིག་འོག  འབྲས་སྤུངས་བློ་གསལ་གླིང་གྲྭ་ཚང་གི་ཆོས་ཚོགས་དང་།  ས་གནས་བོད་རིགས་དང་བོད་དོན་རྒྱབ་སྐྱོར་བཅས་མི་གྲངས་བརྒྱ་ལ་ཉེ་བ་ཞིག་གིས་མར་མེ་ཁྲོམ་སྐོར་གནང་སོང་།

དེ་བཞིན། ཨེ་མོ་རིའི་གཙུག་ལག་སློབ་གཉེར་ཁང་གི་འགྲེམས་སྟོན་ཁང་དང་། སྲིད་འཛིན་ལས་ཁུངས་ཀྱི་མདུན་ཐང་དུ་འབྲས་སྤུངས་བློ་གསལ་གླིང་གི་དགེ་འདུན་པ་དང་། བོད་རང་དབང་སློབ་ཕྲུག་ཚོགས་པའི་ཚོགས་མི། ས་གནས་བོད་རིགས་དང་བོད་དོན་རྒྱབ་སྐྱོར་བ་བཅས་མི་གྲངས་བརྒྱ་ལ་ཉེ་བ་ཙམ་གྱིས་བདེན་ཚིག་སྨོན་ལམ་བཏོན་པ་དང་། བོད་ནང་འདས་གྲོངས་སུ་གྱུར་བའི་རྒྱལ་གཅེས་དཔའ་བོ་དཔའ་མོ་དག་གི་ཆེད་དུ་ངག་བཅད་གུས་འདུད་སྐར་མ་གཅིག་རིང་བྱས་རྗེས།  ལག་ཏུ་མར་མེ་བཟུང་ཞིང་། ངག་ནས་མ་ཎི་ཡི་གེ་དྲུག་མ་དང་། བྱང་ཆུབ་སེམས་མཆོག་མ་བཅས་འདོན་བཞིན་སློབ་གྲྭའི་ཁྱོན་དུ་ཞི་བའི་གོམ་བགྲོད་གནང་ཡོད་ལ། དུས་ཡུན་ཆུ་ཚོད་གཅིག་གི་རྗེས་སུ་མི་མང་འདུ་འཛོམས་ཆེ་སའི་སུམ་མདོ་ཞིག་ནས་ལས་འགུལ་མཇུག་བསྒྲིལ་སོང་ལ། བློ་གསལ་གླིང་ཆོས་ཚོགས་ཀྱི་ངོས་ནས་ཐེངས་འདིའི་ལས་འགུལ་གོ་སྒྲིག་གནང་མཁན་བོད་རང་དབང་སློབ་ཕྲུག་ཚོགས་པ་དང་། བོད་དོན་རྒྱབ་སྐྱོར་བ་ཡོངས་ལ་བོད་ཀྱི་དྲང་བདེན་གྱི་འཐབ་རྩོད་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་སོང་།

བོད་རང་དབང་སློབ་ཕྲུག་ཚོགས་པའི་ཚོགས་གཞོན་པྲི་གཡང་གཱ་(Prianka Kandhal)ལགས་ཀྱིས་གསར་འགོད་པར་འགྲེལ་བརྗོད་གནང་བ་ལྟར་ན། ཁོང་ཚོར་ཚོགས་མི་བརྒྱ་ལྷག་ཙམ་ཡོད་ཅིང་། ཟླ་རེའི་ནང་དུ་ལྷག་དཀར་སྲུང་གཙི་ཞུ་བ་དང་། གཞན་ཡང་བོད་ནང་གི་སྐབས་བབ་ཀྱི་ཆབ་སྲིད་དང་འགྲོ་བ་མིའི་ཐོབ་ཐང་གནས་བབ། བོད་ཀྱི་རིག་གཞུང་ངོ་སྤྲོད་སོགས་ཀྱིས་མཚོན་པའི་ལས་འགུལ་སྣ་མང་ཞིག་སྤེལ་བཞིན་ཡོད་པ་རེད།

སློབ་གླིང་འདིར་རྒྱ་རིགས་སློབ་མ་བརྒྱ་ཕྲག་ཁ་ཤས་ཡོད་པས། ཁྱོད་ཚོའི་ལས་འགུལ་ལ་ཁོང་ཚོས་རྣམ་འགྱུར་མི་ལེགས་པ་དེ་འདྲ་སྟོན་མཁན་བྱུང་མིན་དྲིས་པར། “ སྤྱིའི་ཆ་ནས་དེ་འདྲའི་རིགས་བྱུང་མ་མྱོང་།  ང་ཚོས་ངོས་ནས་འདི་གའི་རྒྱ་རིགས་སློབ་མའི་མཐུན་ཚོགས་ལ་བོད་རང་བཙན་ལ་རྒྱབ་སྐྱོར་བྱེད་ཀྱིན་ཡོད་པས།  ཆབ་སྲིད་ཐད་ལྟ་ཚུལ་མི་མཐུན་པ་ཡོད་ན་ང་ཚོས་བགྲོ་གླེང་བྱས་ནས་ཕན་ཚུན་གོ་རྟོགས་སྤེལ་རེས་བྱེད་ཆོག་གི་རེད་ཟེར་ནས་མགྲོན་འབོད་ཐེངས་གཉིས་བྱས་ཀྱང་ཁོང་ཚོས་ཁས་ལེན་བྱེད་ཐུབ་མ་སོང་ ” ཟེར།

ཨེ་མོ་རི་གཙུག་ལག་སློབ་གཉེར་ཁང་ནི་ཨ་རིའི་ནང་བོད་དོན་དང་བོད་ཀྱི་རིག་གནས་ལ་དོ་སྣང་དང་ཞིབ་འཇུག་སོགས་བྱེད་མཁན་གྱི་སློབ་གྲྭ་མང་པོ་ཞིག་ཡོད་པའི་ཁྲོད་ཅུང་འབུར་ཏུ་ཐོན་པ་ཞིག་ཡིན་ལ། ༧གོང་ས་མཆོག་ལ་སློབ་གྲྭ་འདིའི་ཁྱད་འཕགས་གཙུག་ལག་སློབ་དཔོན་ཆེན་མོའི་མཚན་གནས་ཀྱང་ཕུལ་ཡོད།

ས་གནས་གསར་འགོད་པ། སངས་རྒྱས་བཀྲ་ཤིས།