ཉེ་ཆར་བོད་ནས་གསར་དུ་འབྱོར་ཞིང་ད་ལྟ་བཞུགས་སྒར་དབུས་སྣེ་ལེན་ཁང་དུ་ཡོད་པའི་བྱམས་པ་ཐོགས་མེད་ལགས་ཀྱིས་འདི་གར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་འདས་པའི་ལོ་དུ་མའི་ཡར་སྔོན་ནས་ཡུན་ནན་བདེ་ཆེན་བོད་རིགས་རང་སྐྱོང་ཁུལ་བདེ་ཆེན་རྫོང་གཡག་རྭ་ཞིང་བུ་བསྟན་དགོན་པའི་ཉེ་འདབས་ཀྱི་ལེ་གྲོང་ཚོའི་ནང་གཏེར་ཁ་སྔོག་འདོན་རུ་ཁག་བཏང་སྟེ། ཕྱི་ལོ་ ༢༠༠༡ ལོ་ནས་མགོ་བཙུགས་ཏེ་འདས་པའི་ལོ་ ༨ ལྷག་གི་རིང་དགོན་གྲོང་གཉིས་ཀྱི་མི་མང་ལ་མོས་མཐུན་ཡོད་མིན་ལ་མ་ལྟོས་པར་བཙན་ཤུགས་ཀྱིས་གསེར་དངུལ་ཟངས་ལྕགས་གཙོས། རང་བྱུང་གཏེར་ཁ་འདྲ་མིན་རྒྱ་ནག་ནང་དབོར་འདྲེན་བྱས་དང་བྱས་ཡོད་པར་མ་ཟད། ༢༠༠༩ ལོར་ཡང་བསྐྱར་རྟོགས་ཞིབ་ཚོགས་ཆུང་ཞིག་གིས་བྱམས་བསྟན་དགོན་པའི་ཉེ་འདབས་ཀྱི་གཉེ་སྨད་གྲོང་ཚོའི་གནས་རི་རྫི་རིང་དུ་གཏེར་ཁ་གསར་བ་ཞིག་རྙེད་སོན་བྱུང་ཡོད་ཚུལ་བརྗོད་དེ། ཁུལ་དང་རྫོང་། ས་གནས་ཞིང་བཅས་ཀྱི་དཔོན་རིགས་ཚོ་དཔུང་སྦྲེལ་ཐོག་སྔོག་འདོན་བྱ་འཆར་བྱས་ཡོད་ཀྱང་། སྐབས་དེར་དགོན་པའི་དགེ་འདུན་པ་དང་ས་གནས་མང་ཚོགས་ཀྱིས་ངོ་རྒོལ་བྱས་སྟབས་བསྔོག་ཐུབ་མེད་པ་རེད། ཡིན་ནའང་། ད་ལྟའི་ཆར་རྒྱ་གཞུང་གིས་ས་གནས་མི་མང་ལ་དངུལ་འབོར་ཆེན་སྤྲོད་པ་སོགས་ཞི་དྲག་གཉིས་ཀྱི་ཐོག་ནས་གཏེར་ཁ་སྔོག་འདོན་བྱ་ཐབས་ལ་འབད་བརྩོན་བྱེད་བཞིན་ཡོད་འདུག
གནས་ཚུལ་མཁོ་སྤྲོད་པས་བརྗོད་དོན་ལྟར་ན། ད་ལྟའི་བར་རྒྱ་ནག་གཞུང་གིས་ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་ས་གནས་མང་པོའི་ནང་བཙན་ཤུགས་ཀྱིས་གཏེར་ཁ་སྔོག་འདོན་གྱི་ལས་གཞི་སྣ་ཚོགས་ལག་བསྟར་བྱས་ཏེ། བདེ་ཆེན་རྫོང་གཡག་རྭ་ཞིང་ལེ་གྲོང་ཚོ་དང་གཉེ་སྨད་གྲོང་ཚོ་གཙོས་པའི་ས་ཁུལ་ཁག་ནང་གཏེར་ཁ་སྔོག་འདོན་ལ་བཀག་འགོག་བྱེད་མཁན་བོད་མི་མང་པོ་འཇུ་བཟུང་བྱེད་བཞིན་པའི་གནས་ཚུལ་བྱུང་ཡོད་འདུག གནས་སྟངས་འདིའི་ཐད་ས་གནས་བོད་རིགས་མང་ཚོགས་ཀྱིས་རྒྱ་གཞུང་ལ་སྙན་ཞུ་ཐེངས་མང་ཕུལ་ཏེ་གཏེར་ཁ་སྔོག་འདོན་མཚམས་འཇོག་དགོས་པའི་འབོད་སྐུལ་བྱས་ཡོད་ནའང་། རྒྱ་གཞུང་གིས་མང་ཚོགས་ཀྱི་རེ་སྐུལ་དང་ལེན་མ་བྱས་པའི་ཁར་ས་རྒྱལ་ཁབ་ཀྱི་ས་ཡིན་ཚུལ་དང་། མི་མང་གིས་གཏེར་ཁ་སྔོག་འདོན་གྱི་ལས་གཞིར་ངོ་རྒོལ་རིགས་བྱས་ཚེ་འཛིན་བཟུང་བཙོན་འཇུག་བྱ་རྒྱུ་ཚུལ་འཇིགས་སྐུལ་བྱས་པར་བརྟེན། ད་ལྟའི་ཆར་དགོན་གྲོང་གཉིས་ཀ་ཐབས་ཟད་འུ་ཐུག་གི་གནས་སུ་ལྷག་ཡོད་འདུག
ཡུན་ནན་བདེ་ཆེན་བོད་རིགས་རང་སྐྱོང་ཁུལ་བདེ་ཆེན་རྫོང་གཡག་རྭ་ཞིང་ནི། བོད་རང་སྐྱོང་ལྗོངས་དང་ཡུན་ནན་གྱི་ས་མཚམས་སུ་ཡོད་པ་དང་། ད་ལྟའི་ཆར་ཞིང་དེའི་ཁོངས་སུ་བོད་རིགས་གྲོང་ཚོ་ ༣ ལྷག་ཡོད་འདུག དགོན་པའི་ཆོས་ལུགས་ཀྱི་བྱེད་སྒོ་དང་མི་མང་འདུ་འཛོམས་སྐབས་ཡུན་ནན་མཐའ་མཚམས་སུ་ཡོད་པའི་བོད་རང་སྐྱོང་ལྗོངས་ཁོངས་ཀྱི་བོད་མི་དག་ཀྱང་མཉམ་ཞུགས་བྱེད་ཀྱིན་ཡོད་འདུག
བོད་ཀྱི་ས་དང་མི་དང་བཅས་པ་དབང་དུ་བསྒྱུར་ཚར་བས་ང་ཚོར་རང་ལུས་སྲུང་དབང་མེད་པར་རང་ས་སྲུང་དབང་ཞིག་གང་ན་ཡོད་མོད། ད་དུང་ཡང་གཞུང་གི་སྐྱོན་མཚང་ཐེར་འདོན་གྱིས་མི་མང་གིས་ངོ་རྒོལ་མུ་མཐུད་བྱེད་ཐུབ་ན་བཟང། དེ་བཞིན་ས་ཆ་གཞན་དག་ལ་ཡང་རང་སྲུང་ཅི་ནུས་བྱེད་དགོས། མ་མཐར་ཡང་རྒྱ་ནག་རང་གི་རང་བྱུང་ཁོར་ཡུག་སྲུང་སྐྱོབ་ཀྱི་་ཁྲིམས་དོན་ཁེ་དབང་སྲུང་ཅི་ཐུབ་བྱེད་དགོས།