ཆབ་སྲིད་བཅོས་བསྒྱུར་གྱི་དུས་ལ་བབས་ཡོད།

ཉིན་འདི་འགར་༧གོང་ས་མཆོག་གིས་ཉི་ཧོང་དུ་ཆོས་ཕྱོགས་ཀྱི་མཛད་འཕྲིན་ཁག་སྐྱོང་བཞིན་པ་ལྟར། ཟླ་འདིའི་ཕྱི་ཚེས་༤ཉིན་༧གོང་ས་མཆོག་ཡུལ་དེའི་སཱན་ཌའི་(SENDAI)གྲོང་ཁྱེར་དུ་ཆིབས་བསྒྱུར་བསྐྱངས་ཏེ། ད་ལོར་ས་ཡོམ་གོད་ཆག་ཁྲོད་རྐྱེན་འདས་སུ་ཕྱིན་པ་ཚོར་བསྔོ་བ་སྨོན་ལམ་གསུངས་རྗེས། ཁུལ་དེའི་གསར་འགོད་ལྷན་ཚོགས་གི་སྟེང་ཕེབས་ཏེ། ཉེ་ཆར་བོད་ནང་རང་ལུས་མེར་བསྲེགས་བཏང་པའི་གནས་སྟངས་ཐོག་གསར་འགོད་པའི་དྲི་བར་བཀའ་ལན་བསྩལ་ཡོད་ཅིང་། སྐབས་དེར་༧གོང་ས་མཆོག་གིས་ “ བོད་མི་ཚོས་རང་ལུས་མེར་བསྲེགས་བྱེད་པ་དེ་ཨུ་ཐུག་ཐབས་ཟད་ཀྱི་གནས་སྟངས་ཤིག་ཆགས་ཡོད་སྟབས། རྒྱ་ནག་དཔོན་རིགས་ཚོས་རང་ལུས་མེར་བསྲེགས་བཏང་བའི་རྒྱུ་རྐྱེན་ལ་འཚོལ་ཞིབ་བྱ་དགོས་པ་རེད། ༢༠༠༩ ལོར་རྒྱ་ནག་ཀོང་ཏུང་ (Guangdong)ཞིང་ཆེན་དམར་ཤོག་མགོ་ཁྲིད་ཅིག་གིས། ཏང་གིས་གྲངས་ཉུང་མི་རིགས་ཐོག་འཛིན་པའི་སྲིད་བྱུས་ལ་བསྐྱར་ཞིབ་དགོས་ཀྱི་འདུག་ཅེས་བཤད་ཡོད་ལ། སྲིད་བློན་ཝུན་ཅཱ་པའོ་ཡིས་ཀྱང་རྒྱ་ནག་ཆབ་སྲིད་ལ་བཅོས་བསྒྱུར་གཏོང་དགོས་སྐོར་བརྗོད་ཡོད་སྟབས། རྒྱ་ནག་མགོ་ཁྲིད་ཚོས་གནད་དོན་དེའི་ཐོིག་ངེས་པར་དུ་བསམ་བློ་གཏོང་དགོས་པ་རེད། འདས་པའི་མི་ལོ་ ༦༠ རིང་རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་བྱ་རྒྱུའི་དུས་ལ་བབས་ཡོད་ཅེས ” གསུངས་འདུག

ཉིན་དེའི་ཕྱི་དྲོར་༧གོང་ས་མཆོག་གིས་ཀོ་ཡཱ་སིན་(KOYASAN) གཙུག་ལག་སློབ་གྲྭའི་ཚོགས་ཁང་དུ། ཉི་ཧོང་གྲགས་ཅན་དངོས་ཁམས་རིག་པ་ཧཱ་རོ་སཱ་ལགས་གཙོས་པའི་ཀླད་ཁམས་ཚན་རིག་པ་དང་། གློག་ཀླད་འཕྲུལ་ཆས་ཉམས་ཞིབ་པ། དེ་བཞིན་ཉི་ཧོང་གསང་སྔགས་ཉམས་ལེན་པ་ཁག་ཅིག་དང་ལྷན་དུ། ནང་ཆོས་ལས་གསུངས་པའི་ཡེ་ཤེས་ཆོས་སྐུའི་རྣམ་གཞག་དང་རིགས་རྒྱུན་གྱི་རྫས་ཕྲ་མོའི་བར་བཀའ་བསྡུར་གནང་ཡོད་འདུག་ལ། དེའི་རྗེས་མཐོ་སློབ་དེའི་དགེ་ལས་སློབ་ཕྲུག་ཚོར་ཉི་ཧོང་པས་བོད་ཀྱི་ནང་ཆོས་ལ་དོ་སྣང་ཆེན་པོ་བྱེད་བཞིན་པར་བསྔགས་བརྗོད་དང་འབྲེལ། མ་འོངས་པར་ཉི་ཧོང་དང་བོད་ཀྱི་ནང་ཆོས་ཟུང་འབྲེལ་ཐོག་སློབ་སྦྱོང་གནང་ཐུབ་ན་དགེ་མཚན་ཆེ་སྐོར་དང་། ལས་གཞི་དེར་རྒྱ་གར་ནས་བོད་ཀྱི་མཁས་དབང་ཁག་གདན་ཞུས་ཀྱིས་བགྲོ་གླེང་གནང་དགོས་པའི་ལམ་སྟོན་བཅས་གནང་ཡོད་འདུག