ཉེ་ལམ་བཀའ་ཁྲི་བློ་བཟང་སེང་གེ་མཆོག་དང་སྐྱབས་རྗེ་ཀིརྟི་རིན་པོ་ཆེ་རྣམ་གཉིས། ཨ་རིའི་རྒྱལ་ས་ཝ་ཨིན་ཊོན་དུ་ཚོགས་པའི་བོད་དོན་ཉན་ཞིབ་ཚོགས་འདུར་ཕེབས་ཏེ། བོད་ནང་གི་གནས་སྟངས་སྐོར་གསལ་བཤད་གནང་འདུག
ཟླ་འདིའི་ཕྱི་ཚེས་ ༣ ཉིན་དབུས་བོད་མིའི་སྒྲིག་འཛུགས་བཀའ་བློན་ཁྲི་པ་བློ་བཟང་སེང་གེ་མཆོག་དང་སྐྱབས་རྗེ་ཀིརྟི་རིན་པོ་ཆེ་རྣམ་གཉིས། ཨ་རིའི་རྒྱལ་ས་ཝ་ཤིན་ཊོན་དུ་ཚོགས་པའི་ཊོམ་ལེན་ཊོ་སི་འགྲོ་བ་མིའི་ཐོབ་ཐང་ཚོགས་པའི་ (Tom Lantos Human Rights Commission)ཉན་ཞིབ་ཚོགས་འདུར་ཕེབས་ཏེ། ད་ལྟའི་བོད་ནང་གི་ཛ་དྲག་གནས་སྟངས་སྐོར་གསལ་བཤད་གནང་ཡོད་པ་དང་། ཚོགས་འདུའི་སྟེང་བཀའ་ཁྲི་མཆོག་གིས་འགྲོ་བ་མིའི་ཐོབ་ཐང་ཚོགས་པ་དེའི་འགན་འཛིན་དམ་པ་སྐུ་ཞབས་ཊོམ་ལེན་ཊོ་ལགས་བོད་དོན་ལ་མཐའ་གཅིག་ཏུ་རོགས་རམ་གནང་མཁན་ཞིག་ཡིན་སྐོར་གསུངས་ཏེ། མདོ་སྨད་རྔ་པ་གཙོས་པའི་ཁམས་རྟའུ་དང་དཀར་མཛེས་ཁུལ་གྱི་གནས་སྟངས་སྤྱི་དང་། ལྷག་པར་དུ་རྒྱ་གཞུང་གིས་བོད་ཀྱི་དགོན་སྡེ་ཁག་ཏུ་ཆོས་དད་རང་དབང་ལ་དམ་དྲག་ཆེན་པོ་བྱེད་བཞིན་པ་དང་། དམ་དྲག་གི་སྲིད་བྱུས་དེའི་འོག་བོད་མི་ཚོས་ཨུ་ཐུག་ཐབས་ཟད་ཀྱིས་རང་ལུས་མེར་བསྲེགས་གཏོང་གི་ཡོད་སྐོར་བཅས་གསལ་བཤད་གནང་འདུག བཀའ་ཟུར་ཀིརྟི་རིན་པོ་ཆེ་མཆོག་གིས་ཕྱི་ལོ་ ༡༩༣༥ ལོ་ནས་ ༡༩༩༨ ལོའི་བར་རྒྱ་གཞུང་གིས་བོད་མདོ་སྨད་རྔ་པ་ཁུལ་དུ་བཙན་གནོན་ཆེན་པོ་ཐེངས་གསུམ་བྱས་པའི་ལོ་རྒྱུས་ཞིབ་ཕྲ་ངོ་སྤྲོད་དང་འབྲེལ། ད་བར་རྒྱ་གཞུང་གིས་རྔ་པ་ཁུལ་དུ་བཙན་འཛུལ་བྱས་པའི་གནས་སྟངས་འོག ཁུལ་དེའི་དགོན་སྡེ་ཁག་ལ་གཏོར་བཤིག་ཚབས་ཆེན་ཐེབས་ཡོད་པ་མ་ཟད། བོད་མི་བརྒྱ་ཕྲག་ལྷག་དམར་གསོད་དང་བཀྲེས་ལྟོགས་ཀྱིས་མནར་ཏེ་གྲོངས་ཡོད་སྐོར་དང་། ད་ལོར་བོད་ནང་བོད་མི་ ༡༡ ཙམ་གྱིས་རང་ལུས་མེར་བསྲེགས་བཏང་བ་དེ་དག་ཀྱང་རྒྱ་ནག་གི་དྲག་པོའི་སྲིད་བྱུས་འོག་སྡོད་མ་ཐུབ་པར་ཨུ་ཐུག་གི་བྱ་སྤྱོད་ཅིག་ཡིན་སྐོར་གསལ་བཤད་གནང་ཡོད་འདུག
གསར་འགོད་པ། དཔལ་ལྡན།
གོ་སྐབས་དམ་འཛིན་གནང་བ་ལེགས། གསུང་བཤད་ཆ་ཚང་འདིར་འགོད་ཐུབ་བམ།