ཟླ་འདིའི་ཕྱི་ཚེས་ ༣ ཉིན་ཁམས་རྟའུ་བཙུན་དགོན་བྲག་དཀར་དགའ་ལྡན་ཆོས་གླིང་གི་བཙུན་མ་དཔལ་ལྡན་ཆོས་མཚོ་ལགས་ཀྱིས་ཁམས་རྟའུ་རྫོང་གི་པཱེན་ཧོ་གཞུང་ལམ་སྟེང་། “བོད་ལ་རང་དབང་དགོས། ༸གོང་ས་མཆོག་ཁྲི་ལོར་བརྟན་པར་ཤོག ༸གོང་ས་མཆོག་བོད་ལ་གདན་ཞུ་དགོས” ཞེས་འབོད་ཚིག་སྒྲོག་བཞིན་རང་ལུས་མེར་བསྲེག་བཏང་སྟེ་འདས་གྲོངས་སུ་ཕྱིན་ཡོད་པ་ལྟར། ཟླ་འདིའི་ཕྱི་ཚེས་ ༦ ཉིན་གྱི་ཞོགས་པའི་ཆུ་ཚོད་ ༥ དང་ཕྱེད་ཀ་ཡས་མས་སུ་བྲག་དཀར་དགའ་ལྡན་ཆོས་གླིང་དགོན་གཙོས་པའི་ཉེ་འཁོར་གྱི་གྲྭ་བཙུན་དང་མི་མང་སྟོང་ཕྲག་བརྒལ་བ་འདུ་འཛོམས་ཀྱིས། ཉེ་ཆར་རང་ལུས་མེར་བསྲེག་གིས་འདས་གྲོངས་སུ་ཕྱིན་པའི་རྟའུ་ཉ་མཚོ་དགོན་པའི་གྲྭ་ཚེ་དབང་ནོར་བུ་ལགས་ཀྱི་སྐུ་ཕུང་ཞུགས་འབུལ་བྱེད་སའི་ས་གནས་རང་དུ་སྐུ་ཕུང་ལ་ཁ་བཏགས་སྒྲོན་པ་དང་མཆོད་འབུལ་སྨོན་ལམ་སོགས་བྱས་ཏེ་སྐུ་ཕུང་ཞུགས་འབུལ་བྱས་ཡོད་འདུག
གནས་ཚུལ་འདི་བརྒྱུད་ཡུལ་དེའི་ས་གནས་བོད་མི་རྣམས་ཀྱིས། “ ཕྱི་སྡོད་བོད་མི་ཚོས་བོད་ནང་གི་གནས་སྟངས་རྒྱལ་སྤྱིར་ཁྱབ་བསྒྲགས་བྱས་པར་ཐུགས་རྗེ་ཆེ་ཞེས་དང་། མ་འོངས་པར་ཡང་ཕྱི་སྡོད་བོད་མི་ཚོས་རང་དབང་ལྡན་པའི་རྒྱལ་ཁབ་ཁག་ལ་འབོད་སྐུལ་གྱིས་བོད་ནང་གི་དཀའ་ངལ་སེལ་ཆེད་རྒྱ་ནག་གཞུང་ལ་གནོན་ཤུགས་སྤྲོད་དགོས་པ་དང་། ཁོང་ཚོའི་ངོས་ནས་༸གོང་ས་མཆོག་བོད་ནང་ཕེབས་ཐུབ་པའི་བར་དུ་རང་ལུས་མེར་བསྲེག་ལས་ལྷག་པའི་ལས་འགུལ་རིམ་པར་སྤེལ་འཆར་ཡོད།” ཅེས་ཕྱི་སྡོད་བོད་མི་ཚོར་སྐད་བསྐུར་ཡོད་འདུག
ས་གནས་མང་ཚོགས་ཀྱིས་བརྗོད་པ་ལྟར་ན། བཙུན་མ་དཔལ་ལྡན་ཆོས་མཚོ་ལགས་ཀྱིས་རང་ལུས་མེར་བསྲེག་བཏང་བའི་རྗེས། ཁོང་མོའི་དབུ་ཞྭའི་སྟེང་༸གོང་ས་མཆོག་དང་རྒྱལ་བ་ཀརྨ་པ་རྣམ་གཉིས་ཀྱི་སྐུ་པར་ཞིག་ཀྱང་ཉར་ཡོད་པ་མཐོང་འདུག
(པར་མཁོ་གཏོང་པ་ཀུན་བཟང་བསྟན་འཛིན།)
གསར་འགོད་པ། དོན་གོ
རྒྱལ་ཁབ་དང་མི་རིགས་བསྟན་དོན་གྱི་ཆེད་དུ་གཅེས་པའི་རང་སྲོག་ཀྱང་མེ་ལ་སྒྲོན་ནུས་པའི་སེམས་མ་མཆོག་ལ་སྙིང་ཐག་པ་ནས་མྱ་ངན་དང་གུས་འདུད་ཞུས།
གངས་ཅན་ཞིང་དུ་ལྟེ་ཁྲག་འཐོར་ཏེ་ཨ་མའི་མངའ་ནས་ཐེམ་པ་རྒལ། །
ལས་དབང་བཟང་པོས་སྐལ་ལྡན་དམ་པའི་ཆོས་སྒོར་བཞུགས། །
དམ་ཆོས་སྙིང་པོ་རང་སེམས་ཆོས་ཀྱི་ཕྱོགས་སུ་བསྒྱུར། །
གཞན་ཕན་རྒྱལ་སྲས་མཛད་སྤྱོད་འདི་ལ་ངོ་འཚར་ཆེ། །
རྒྱལ་གཅེས་དཔའ་མོའི་སྐུ་ཞུགས་འབུལ་སྐབས་ཆོལ་གསུམ་བོད་མི་ཚང་མ་ཡོད་ན་ཅི་མ་རུང་།
ལུས་སྲོག་གཞན་དོན་ཆེད་དུ་བསྔོས་པ་ཡི། བདེན་པའི་མཐུ་ཡིས་བདེ་འགྲོར་སྐྱེ་བར་སྨོན། ཚེ་རབས་ཀུན་ཏུ་ཚེ་དཔག་མེད་པ་ཡིས། ཚེ་ཡི་བར་ཆད་ཐམས་ཅད་སེལ་བར་སྨོན།
སྐུ་ཕུང་ཞུགས་འབུལ་ཞེས་གསར་འགོད་པས་ནོར་བ་འདྲ། སྐུ་ཕུང་ཞུགས་འབུལ་ཟེར་ན་སྐུ་བཞུགས་འབུལ་བའི་དོན་ཡིན། ཞེ་སའི་མིང་ཚིག་སྐབས་སུ་སྐུ་ཕུང་ཞུན་འབུལ་ཞེས་མེ་རུ་བསྒྲོན་སྤོར་བའི་ཚིག་ལ་ཞུན་འབུལ་ཞེས་བརྗོད་ཀྱིན་ཡོད་པ་འདྲ།
རྒྱལ་གཅེས་དཔའ་མོ་མཆོག་ལ་མྱ་ངན་དང་གུས་འདུད་གྲངས་ཞུ།
རང་སྲོག་ལ་རྒྱའི་ཆེད་དུ་གཏོང་ཐུབ་པའི་དཔལ་བོ་དཔལ་མོ་རྣམས་ལ་སྙིང་ཐག་པ་ནས་ཡིད་རང་ཞུ
ང་ཚོས་བོད་རང་དབང་རང་བཙན་གྱི་ཆེད་དུ། <<ང་ཚོ་བོད་པའི་དཀའ་ངལ་སེལ་བ་ལ་ཁྱེད་ཚོས་རྒྱབ་སྐྱོར་གནང་རོགས། ང་ཚོས་ཁྱེད་ཀྱི་འཁོར་ཡུག་ལ་བཙང་སྦྲ་བྱེད་ཡོངས།>>ལྟ་བུའི་སྐད་ངག་གཅིག་དང་འབོད་སྦྲ་གཅིག་གིས་འཁོར་ཡུག་གཙང་སྦྲའི་ལས་འགུལ་ཞིག་བོད་རིགས་དང་བོད་དོན་རྒྱབ་བསྐྱོར་བ་ཚང་མས། འཛམ་གླིང་ཡུལ་གྲུ་གང་ས་ནས་ཉིན་གཅིག་དུས་གཅིག་ལ་སྤེལ་ཐུབ་ན། འཛམ་གླིང་ཡུལ་མི་རྣམས་ལ་དམིགས་བསལ་གྱི་ཚོར་སྣང་ཞིག་སྤྲོད་ཐུབ་ཀྱི་རེད་སྙམ། དེང་སང་འཛམ་གླིང་ཡུལ་གྲུ་མང་པོ་ནས་ལས་འགུལ་དང་ངོ་རྒོལ་རིགས་སྤེལ་དུས་འཁོར་ཡུག་དང་དཔལ་འབྱོར་ལ་གཏོར་སྐྱོན་གྱོང་གུད་ཚབ་ཆེན་བཏང་བཞིན་ཡོད་པ་མ་ཚད། ཡུལ་མིའི་སེམས་ཁམས་ལ་འཇིགས་སྐྲག་དང་ཕོག་ཐུག་ཚབ་ཆེན་བཏང་བཞིན་ཡོད་པས། འཁོར་ཡུག་བཙང་སྦྲ་ནི་དེ་ལས་བཟློག་ཏེ་ཡུལ་མི་རྣམས་ཀྱི་ལུས་སེམས་ཀྱི་འཕྲོད་བརྟེན་ཡིན་པར་མ་ཟད། དཔལ་འབྱོར་ལ་གྱོང་གུད་མེད་པ། ཡུལ་མི་རྣམས་ལ་འཇིགས་སྐྲག་དང་ཕོག་ཐུག་མི་འགྲོ་བ། ཡུལ་མི་སོ་སོར་ལ་འཁོར་ཡུག་བཙང་སྦྲ་བྱེད་རྒྱུའི་ཡར་བསྐུལ་བྱེད་ཐུབ་པ། བོད་རིགས་དང་ཡུལ་མི་རྣམས་ཀྱི་མཐུན་འབྲེལ་གོང་འཕེལ་ཡོངས་བ་ལ་ཕན་པ། ལས་འགུལ་ནང་ཞུགས་མཁན་ཡུལ་མི་མང་དུ་འགྲོ་སྲིད་པ། འཁོར་ཡུག་བཙང་སྦྲ་ནི་ནང་ཆོས་དང་ཡོངས་སུ་མཐུན་པ། མི་རིགས་སུས་མཐོང་ཐོས་སུ་གྱུར་ན་སེམས་ལ་མི་བདེ་བ་མེད་པ། བོད་དོན་རྒྱབ་བསྐྱོར་བྱེད་མཁན་ཇེ་མང་དུ་འགྲོ་སྲིད་པ། བོད་རིགས་ཀྱི་བསམ་སྤྱོད་བཟང་པོས་རླབས་ཆེན་གྱི་བྱས་རྒྱས་འཇོག་ཐུབ་སོགས་དགེ་མཚན་མང་པོ་ལྡན། མི་རིགས་དང་ཆོས་ལུགས་གི་དབྱེ་བ་མེད་པར་ཚང་མས་འཁོར་ཡུག་གཙང་སྦྲ་ནི་རྩ་ཆེན་ཞིག་ལ་བརྩི་བཞིན་ཡོད་པས་ང་ཚོ་ལ་རྒྱབ་བསྐྱོར་བྱེད་མཁན་ཡང་མང་ནས་མང་དུ་འགྲོ་བ་ཐེ་ཚོམ་མེད་པ་རེད། གཅིག་བྱས་ན་འཛམ་གླིང་གི་ལས་འགུལ་དང་ངོ་རྒོལ་རིགས་སྤེལ་མཁན་རྣམས་ཀྱིས་འཁོར་ཡུག་དང་དཔལ་འབྱོར་ལ་གཏོར་སྐྱོན་དང་གྱོང་གུད་མི་ཕོག་པ། ཡུལ་མིའི་སེམས་ཁམས་ལ་འཇིགས་སྐྲག་དང་ཕོག་ཐུག་མི་འགྲོ་བའི་ལས་འགུལ་རིགས་སྤེལ་རྒྱུའི་ཀུན་སློང་བཟང་པོ་སྐྱེ་བ་དང་ང་ཚོའི་ལས་འགུལ་དེ་སྔོན་འགྲོ་རུ་འགྱུར་སྲིད་པ་ཞིག་ཀྱང་རེད།
རྒྱལ་ཞེན་དང་སྙིང་སྟོབས་ཀྱི་བདག་མོ་དཔལ་ལྡན་ཆོས་མཚོ་ལགས་ཀྱི་བྱས་རྗེས་ལ་བསྔགས་བརྗོད་དང་། ནང་མི་ལྷན་རྒྱས་དང་ཤུལ་ལུས་མི་མང་ལ་ལྷག་བསམ་དག་པའི་མྱ་ངན་དང་གུས་འདུད་ཞུ།