སོག་ཡུལ་ལ་བྱུས་གཏོགས་བྱེད་མི་དགོས།

ཐེངས་འདིར་སོག་པོ་གཞུང་གིས་༧གོང་ས་མཆོག་ལ་ཐོངས་མཆན་ཕུལ་ཡོད་པ་དེར། རྒྱ་ནག་གཞུང་ཁོང་ཁྲོ་ཆེན་པོ་ལངས་ཡོད་པ་མ་ཟད། ༸གོང་ས་ཆོག་གི་ཆིབས་བསྒྱུར་འདིའི་ཐོག་ནས་ཡུལ་གཉིས་ཀྱི་འབྲེལ་ལམ་ཐོག་ཤུགས་རྐྱེན་ཐེབས་སྲིད་པའི་ཉེན་བརྡ་སོགས་བཏང་ཡོད་ཀྱང་། དེའི་ཐད་སོག་ཡུལ་དགའ་ལྡན་དགོན་པའི་མཁན་པོ་ཆོས་ཀྱི་རྒྱ་མཚོ་ལགས་ཀྱིས་གསར་འགོད་པའི་དྲི་བར་ལན་འདེབས་སྐབས། “ སོག་ཡུལ་ནི་ང་ཚོའི་ས་ཆ་ཆགས་ཡོད་སྟབས། ཏཱ་ལའི་བླ་མ་མཆོག་སོག་ཡུལ་དུ་ཕེབས་པ་དེར་མི་གཞན་གྱིས་བྱུས་གཏོགས་གང་ཡང་བྱེད་དགོས་དོན་མེད ” ཅེས་བརྗོད་ཡོད་འདུག 

 སོག་པོའི་རྒྱལ་ས་ཨཱ་ལན་བྷ་ཐིའི་རུ་ཡོད་པའི་སོག་པོ་རྒྱལ་ཡོངས་སློབ་གྲྭ་ཆེན་མོའི་རྒྱལ་སྤྱིའི་ལས་དོན་ཉམས་ཞིབ་པ་གྷན་ནཱ་ལགས་ཀྱིས་གསར་ལམ་ཁག་ཏུ། ༸གོང་ས་མཆོག་སོག་པོའི་ནང་ཕེབས་པར་སོག་པོ་མི་མང་གི་ངོས་ནས་དགའ་བསུ་ཡོད་པའི་སྐོར་བརྗོད་དོན། “ངའི་བསམ་ཚུལ་ལྟར་ན། ཏཱ་ལའི་བླ་མ་མཆོག་སོག་ཡུལ་དུ་ཕེབས་པར་ང་ཚོ་སོག་པོ་བ་ཚང་མས་དགའ་བསུ་ཡོད་པ་རེད། སོག་པོ་མི་མང་ཁྲོད་ནང་ཆོས་ལ་དད་མཁན་ཕོན་ཆེན་པོ་ཡོད་པ་རེད། མ་འོངས་པར་ཡང་ཏཱ་ལའི་བླ་མ་མཆོག་སོག་པོ་རྒྱལ་ཁབ་ནང་ཡང་བསྐྱར་ཆིབས་བསྒྱུར་བསྐྱངས་ཏེ་གསུང་ཆོས་གནང་རྒྱུར་དགའ་བསུ་ཡོད། ” ཅེས་བརྗོད་ཡོད་པ་རེད།  

ད་ཆར་རྒྱ་ནག་ནི་སོག་ཡུལ་གྱི་ཚོང་གྲོགས་ཆེ་ཤོས་ཀྱི་རྒྱལ་ཁབ་དེ་ཆགས་ཡོད་པ་དང་། འདི་ལོའི་ཕྱི་ཟླ་ ༦ པའི་ནང་རྒྱ་ནག་གི་སྲིད་བློན་ཝུན་ཇ་པའོ་སོག་པོ་རྒྱལ་ཁབ་ནང་ཡོང་སྟེ་རྒྱལ་ཁབ་གཉིས་བར་ཚོང་ལས་མཉམ་འབྲེལ་གྲོས་ཆོད་བཞག་ཡོད་འདུག