གློག་བརྙན་འདིའི་འཁྲབ་ཁྲིད་པ་སུ་རེད།

དོན་འགྲུབ་བཀྲ་ཤིས།

ངས་འདི་ནས་གློག་བརྙན་རྩོམ་རིག་གི་ཁྱབ་ཁོངས་ཤིག་བཤད་ཀྱི་ཡོད་དུས། དྲ་བའི་རིག་གནས་ནང་རྩོམ་རིག་གི་བརྡ་ཆད་མི་མཛའ་གི་མ་དགོངས་ལ། རྒྱ་གར་བ་ཞིག་གི་ལོ་རྒྱུས་གླེང་གི་ཡོད་སྟབས། བོད་ཡིག་ནང་དབྱིན་ཚིག་མང་དྲགས་འདུག་ཀྱང་མ་གསུངས་རོགས།

གློག་བརྙན་ཡག་སྡུག་གང་ཞིག་ཡིན་རུང་དེའི་ནང་གི་འཁྲབ་སྟོན་པ་དག་གི་སྣང་བརྙན་དང་རྣམ་འགྱུར་གྱིས་འཁྲབ་སྟོན་པ་ཁོ་རང་གི་བསམ་བློའི་ཚབ་མཚོན་མི་ཐུབ་ཅིང༌། འཁྲབ་སྟོན་པའི་སྐད་ཆ་བཤད་སྟངས་དང་གྱོན་ཆས་གྱོན་ལུགས། ཐ་ན་ཁོར་ཡུག་མཛེས་སྤྲས་དང་རོལ་མོའི་རམ་འདེགས་ཚུན་དུ་ཡང་འཁྲབ་སྟོན་པ་སྒེར་གྱི་ལྟ་བ་ལངས་ཕྱོགས་དང་འབྲེལ་བ་གང་ཡང་མེད་པར། གློག་བརྙན་འཁྲབ་ཁྲིད་པ་གཙོ་བོའི་བཀོལ་བྱུས་འོག་འགྲོ་དགོས་པ་ཞིག་ཡིན། མཐར་གཏུག་ན་གློག་བརྙན་འཁྲབ་སྟོན་པ་དག་ནི་འཁྲབ་གཞུང་རྩོམ་པ་པོ་དང་འཁྲབ་ཁྲིད་པ་གཙོ་བོའི་འོག་གི་ཚོང་པ་ཙམ་ཡིན་ཞིང་། གློག་བརྙན་གང་དེའི་མགོ་མཇུག་བར་གསུམ་གྱི་སྤྲོས་པ་ཐ་དག་འཁྲབ་གཞུང་རྩོམ་པ་པོ་དང་འཁྲབ་ཁྲིད་པའི་བསམ་བློའི་འགྱུར་བག་ཧྲིལ་བོ་དེ་ཡིན།

དེ་རིང་གསར་དུ་དབུ་འབྱེད་བྱས་པའི་གླེང་རྙོག་ཅན་གྱི་གློག་བརྙན་ << Rockstar >>ཞེས་པ་འདི་ལ་མཚོན་ན་ཡང༌།  མི་མང་པོ་ཞིག་གིས་གློག་བརྙན་བརྙན་རིས་ངོས་ཀྱི་འཁྲབ་སྟོན་པའི་འགུལ་སྐྱོད་དང་། ཁོར་ཡུག་བཞེངས་སྐྲུན་གྱི་ཡུལ་གཟུགས་དག་ལ་ཅེར་ཏེ། ཧེ་རོ་Heroརཱམ་བྷེར་ཀ་པཱོར་ལགས་སུ་དང་བའི་དད་པ་སྐྱེ་བཞིན་ཡོད་པ་ཞིག་གང་སར་མཐོང་རྒྱུ་འདུག་ཀྱང་། དེ་ནི་ ” རི་བོང་འཛིན་པ་རྒྱུ་སྐར་ཕྲེང་བ་ཅན། །མཚན་མོ་མཁའ་རུ་རྒྱུ་བ་མ་མཐོང་ནས། །དྭངས་བའི་མཚོ་ནང་འདི་ན་ཟླ་བ་ཞེས། །གཟུགས་བརྙན་ཟླ་བར་འཛིན་པ་བྱིས་པའི་བློ ” ཞེས་པའི་དཔེ་ཟླའོ།།

ང་ཚོའི་རྩོད་བཞིན་པའི་གློག་བརྙན་འདིའི་འཁྲབ་ཁྲིད་པ་སྐུ་ཞབས་ཨེམ་ཊའེ་རྫ Imtiaz Ali ལགས་རེད་ལ། འཁྲབ་སྟོན་པ་སྐུ་ཞབས་རཱམ་བྷེར་ཀ་པཱོར་ Ranbir Kapoor ལགས་རེད། འཁྲབ་ཁྲིད་པ་ཨེམ་ཊའེ་རྫ་ལགས་ནི་རྒྱ་གར་ལྷོ་བའི་ལུགས་ཀྱི་ན་གཞོན་སྒྱུ་རྩལ་པ་གྲགས་ཆེན་ཞིག་ཡིན་ལ། ད་སྔ་ཁོའི་བྲིས་པའི་རྩོམ་ཡིག་དང་སྒྲུང་གཏམ། འཁྲབ་གཞུང་སོགས་མི་ཉུང་བ་ཞིག་ཡོད་པ་མ་ཟད། ཁོ་རང་གིས་འཁྲབ་ཁྲིད་བྱས་པ་དང༌། མི་སྣ་ཕལ་བ་འཁྲབ་སྟོན་བྱས་པའི་གློག་བརྙན་ཡང་ཁ་ཤས་ཡོད་པར་བཤད།

༢༠༠༥ ལོར་ཁོང་གིས་འཁྲབ་ཁྲིད་བྱས་པའི་གློག་བརྙན་ཐོག་མ་ << Socha Na Tha >> ཞེས་པ་ཕབ་སྐྲུན་བྱས་པ་རེད། འཁྲབ་སྟོན་མི་སྣ་གཙོ་བོར་ Abhay Deol དང་ Ayesha Takia གཉིས་བདམས་ཡོད། དེ་ནི་ཁོང་གི་གློག་བརྙན་ཐོག་མ་ཡིན་པའི་ངོས་ཐད་ནས་ལེགས་འགྲུབ་ཆེན་པོ་བྱུང་ཡོད་ཀྱང༌། དེང་གི་གློག་བརྙན་སྒྱུ་རྩལ་སྤྱིའི་ཚད་ཐིག་སྟེང་དུ་འཁྲབ་ཁྲིད་པའི་ཉམས་མྱོང་ཐོག་ཞན་ཆ་མི་ཉུང་བ་ཞིག་ཤོར་ཡོད་རབ་གླེང༌།  

༢༠༠༧ ལོར་ཁོང་གིས་ཁྲབ་འཁྲིད་བྱས་པའི་གློག་བརྙན་གཉིས་པ་ << When We Met >> ཞེས་པ་ཕབ་སྐྲུན་བྱས་ཡོད། འཁྲབ་སྟོན་མི་སྣ་གཙོ་བོར་ Shahid Kapoor དང་ Kareena Kapoor གཉིས་བདམས་ཡོད། གློག་བརྙན་དེར་ནི་བརྩེ་དུང་གི་བསླུ་བྲིད་ཐེབས་པའི་འཆར་ཡན་གྱི་སྒྲུང་འབྲིང་ཞིག་ཡིན། གློག་བརྙན་དེའི་ནང་དུ་བོད་པའི་རིག་གཞུང་མཚོན་པའི་ཧི་མ་ལ་ཡའི་རི་རྒྱུད་ཀྱི་ཆ་ལུགས་དང་ལ་དྭགས་ཁུལ་གྱི་འཁྲབ་གཞས་སོགས་ཡོད།

༢༠༠༩ ལོར་ཁོང་གིས་འཁྲབ་ཁྲིད་བྱས་པའི་གློག་བརྙན་གསུམ་པ་ << Love These Days >> ཞེས་པ་ཕབ་སྐྲུན་བྱས་ཏེ་རྒྱ་གར་ནང་སྐད་གྲགས་ཆེན་པོ་ཕྱིན་ཡོད། འཁྲབ་སྟོན་མི་སྣ་གཙོ་བོར་ Saif Ali Khan དང་ Deepika Padukone གཉིས་བདམས་ཡོད། འདི་ལ་ཞིབ་ཚགས་ཀྱིས་ལྟ་མྱོང་མེད་མོད། ཧ་ཅང་བག་ཡོད་ཀྱི་ཕོ་མོའི་བརྩེ་དུང་གི་སྐོར་ཞིག་ཡིན་རབ་ཐོས།

༢༠༡༡ ལོར་ཐེངས་འདིའི་གློག་བརྙན་ << Rockstar >> ཞེས་པ་འཁྲབ་ཁྲིད་བྱས་ཏེ། འཁྲབ་སྟོན་མི་སྣ་གཙོ་བོར་ Ranbir Kapoor བདམས་ཡོད། ནང་དོན་གཙོ་བོ་གཞས་པ་གྲགས་ཆེན་ཞིག་གི་མི་ཚེའི་ཤུལ་ལམ་ཡིན་ཞིང༌། གློག་བརྙན་ནང་སླར་ཡང་བོད་པའི་རྒྱལ་དར་དང་བོད་དོན་བརྗོད་ཚིག་འཁོད་པའི་འཕྲེད་དར་འཕྱར་ཡོད་ལ། བོད་མི་མང་པོ་འདུ་འཛོམས་ཀྱིས་ཞབས་བྲོ་འཁྲབ་པ་དང་དགའ་འབོད་བྱེད་བཞིན་པའི་བརྙན་རིས་ཀྱང་གང་འཚམ་ཡོད།

ཡང་སྙིང་དེ་རིང་གི་གློག་བརྙན་འདི་ཐོག་མ་ཕབ་སྐྲུན་བྱེད་སྐབས་“བོད་རང་བཙན”ཞེས་པའི་དབྱིན་ཚིག་ཅིག་ཡོད་དམ། ཕྱི་ཚེས་ ༦ ཉིན་རྒྱ་གར་གློག་བརྙན་ཞིབ་བཤེར་ཚན་པའི་ཐག་གཅོད་དེ་འདྲ་ཞིག་སུ་ལ་འབྱོར་ཡོད་དམ། གློག་བརྙན་འདིའི་ནང་གི་བོད་རང་བཙན་བཅད་གཏུབ་བྱས་པ་དངོས་འབྲེལ་ཡིན་ན། ངན་ཁག་ཕར་གཡུག་ཚུར་གཡུག་ཇི་ལྟར་བྱས་ཀྱང་། དཀའ་ངལ་དང་གནོན་ཤུགས་ལྡོག་མེད་ཅིག་གི་ཐག་གཅོད་ཡིན་པ་ལས། འཁྲབ་ཁྲིད་པ་སྐུ་ཞབས་ཨེམ་ཊེ་རྫ་ཨ་ལཱེ་ལགས་ཀྱི་ནག་ཉེས་ཤིག་ལ་ངོས་འཛིན་བྱེད་ས་ཡེ་ནས་མེད།  

སྐུ་ཞབས་ཨེམ་ཊའེ་རྫ་ལགས་ཀྱིས་འཁྲབ་ཁྲིད་བྱས་པའི་གློག་བརྙན་དག་ལ་རྒྱ་གར་ནང་སྐད་གྲགས་ཆེན་པོ་ཡོད་ལ། ལྷག་པར་དུ་སྐུ་ཞབས་རཱམ་བྷེར་ཀ་པཱོར་ལགས་ཀྱིས་འཁྲབ་སྟོན་བྱས་པའི་གློག་བརྙན་དག་ལ་གཅིག་ལས་གཅིག་ལྷག་གི་སྙན་གྲགས་རྒྱས་བཞིན་ཡོད་སྟབས། ཐེངས་འདིའི་གློག་བརྙན་ནང་མངོན་གསལ་དོད་པོས་བོད་ཀྱི་རྒྱལ་དར་འཕྱར་གྱི་ཡོད་པ་འདི་དག་ལ་དགའ་ཞིང་མགུ་ནས་ཡོད། ཐུགས་རྗེ་ཆེ་ཟེར་རྒྱུ་ཡིན། 

འཁྲབ་སྟོན་པ་སྐུ་ཞབས་རཱམ་བྷེར་ཀ་པཱོར་ལགས་ཀྱིས་གློག་བརྙན་འདིའི་ནང་དུ་ཆབ་སྲིད་ཀྱི་གནད་དོད་ཡོད་མེད་ལ་མ་འཛེམ་པར་དང་ལེན་བྱས་པ་འདིར་ཐུགས་རྗེ་ལེགས་འབུལ་ཙམ་ཞུ་རྒྱུ་ལས། བྱེ་བྲག་གིས་ཁོང་བོད་པར་དགའ་མོས་ཡོད་མེད་བཤད་དཀའ་ལ། བོད་པའི་ཆབ་སྲིད་ཐོག་རྒྱབ་སྐྱོར་ཡོད་མེད་དེ་བས་ཀྱང་ལྐོག་གྱུར་ཞིག་ཡིན། འཁྲབ་ཁྲིད་པ་སྐུ་ཞབས་ཨེམ་ཊའེ་རྫ་ལགས་ཀྱི་འདས་པའི་ཤུལ་རྗེས་དང་ད་ལན་གྱི་གློག་བརྙན་འདིའི་ཟུར་ངོས་དག་ལས་མཐོང་ཐུབ་པ་ནི། ཁོང་གིས་གཏིང་ཟབ་ས་ཞིག་དང་རྒྱ་ཆེ་ས་ཞིག་ན་བོད་དོན་ལ་རྒྱབ་སྐྱོར་གྱི་སྟ་གོན་བྱས་མེད་དམ་སྙམ་ལ། མ་མཐར་ཡང་བོད་པར་དོ་སྣང་དང་དགའ་མོས་ཡོད་མཁན་ཞིག་ཡིན་པ་ངས་འདི་ནས་ཁ་ཚོན་བཅད་དེ་སྨྲ་སྤོབས།  །