ཐེ་བོ་ཤེས་རབ་རྒྱ་མཚོ།
ཉེ་ཆར་ནས་བོད་ནང་ལོགས་ཀྱི་རང་ལུས་མེ་སྲེག་གི་ལས་འགུལ་རབས་དང་རིམ་པ་བྱུང་དང་འབྱུང་བཞིན་པ་འདིས། ཉིས་སྟོང་བརྒྱད་ཀྱི་རྗེས་བོད་ལ་ཡང་བསྐྱར་འཛམ་གླིང་གི་དོ་སྣང་གསར་པ་ཞིག་ བསྐྱར་འདྲེན་བྱས་ཡོད་པ་དང་། དེའི་རྐྱེན་ཀྱིས་རྒྱལ་སྤྱིའི་སྟེང་ནས་ཆབ་སྲིད་མི་སྣ་མང་པོས་རང་ལུས་མེ་སྲེག་གི་ལས་འགུལ་འདི་མཚམས་འཇོག་བྱ་རྒྱུར་འབོད་སྐུལ་བྱས་ཡོད་པ་དང་། ྋ དཔལ་རྒྱལ་བ་ཀརྨ་པ་མཆོག་གི་གཙོས་བཙན་བྱོལ་ནང་གི་བོད་མི་རེ་ཟུང་གིས་ཀྱང་དེ་ ལྟར་ལས་འགུལ་འདི་མཚམས་འཇོག་བྱ་རྒྱུར་འབོད་སྐུལ་བྱས་ཡོད། ཁོང་ཚོས་དེ་ལྟར་འབོད་སྐུལ་བྱེད་པའི་རྒྱ་མཚན་ནི། ཚང་མས་ཁ་གཅིག་གྲག་གིས་ལས་འགུལ་འདི། དེ་འདྲའི་ཐབས་ལམ་ཡག་ཤོས་ཤིག་མིན་པའི་ངོས་འཛིན་བྱས་པས་ཡིན།
ཨ་ཅང་ཅང་། ངས་ཀྱང་རང་ལུས་མེ་སྲེག་གི་ལས་འགུལ་འདི་ཐབས་ལམ་ཡག་ཤོས་ཤིག་ཏུ་མཐོང་གི་མེད། འོན་ཀྱང་། སྐབས་འདིར་ང་ཚོ་ཚང་མས་ངེས་པར་དུ་ག་རེ་གསལ་པོ་ཤེས་དགོས་ཀྱི་འདུག་ཟེར་ན། རང་ལུས་མེ་སྲེག་གི་ལས་འགུལ་འདི་ནི་བོད་ནང་ལོགས་ཀྱི་བོད་མི་སུ་ལའང་གདམ་ཀ་ མེད་པའི་གདམ་ཀ་ཞིག་ཡིན་པ་དེ་གསལ་པོ་བྱས་ནས་ཤེས་དགོས་ཀྱི་འདུག
ངས་ དེ་རིང་འདིར་འདས་པའི་མི་ལོ་བཅུ་ལྷག་རིང་གི་བོད་མིའི་ཐོག་ལ་གནས་ཚུལ་སྡུག་པོ་ ག་རེ་བྱུང་ཡོད་མེད་སྐོར་ལ་མ་གཏོགས། མི་ལོ་ལྔ་བཅུ་ལྷག་གི་རིང་ལ་བོད་མི་ཚོས་རྒྱ་གཞུང་གི་གདུག་རྩུབ་འོག་སྡུག་སྲན་ བྱས་པ་དེའི་སྟེང་ཕྱིར་ཤིག་བརྒྱབ་ནས་སྐད་ཆ་བཤད་རྒྱུ་དེ་གནས་སྐབས་རིང་ལོགས་ སུ་བཞག་ནས་བཤད་རྩིས་མིན།
བློ་ བཟང་སེངྒེའི་བཀའ་ཤག་གི་ཡར་སྔོན་ཏེ། ཟམ་གདོང་རིན་པོ་ཆེའི་བཀའ་ཤག་གིས་བོད་རྒྱའི་བར་གྱི་གནད་དོན་ཐག་གཅོད་སླད་གུ་ བཤང་ཆེན་པོ་བྱས་པ་དེར་བོད་ཕྱི་ནང་གི་བོད་མི་རྩོམ་པ་པོ་དང་དགེ་རྒན་བཅས་སྤྱི་ ཚོགས་ཁྲོད་ཀྱི་ལས་རིགས་སྣ་ཚོགས་སྟེང་ཡོད་པའི་གནད་ཡོད་མི་སྣ་མང་པོས་ བརྒྱུད་ལམ་ཁག་ནས་བཀའ་ཤག་གིས་རྒྱ་ནག་གཞུང་ལ་གུ་བཤང་བྱས་དྲགས་པའི་རྣམ་འགྱུར་ བསྟན་ནས་ཟམ་གདོང་རིན་པོ་ཆེའི་བཀའ་ཤག་ལ་སྐྱོན་བརྗོད་ཤུགས་ཆེན་བྱས་ཡོད་པ་དང་། ཡང་ཕྱོགས་གཞན་ཞིག་བཤད་ན། ཁོང་ཚོས་མཚོན་པའི་བོད་མི་མང་པོས་སེམས་ཀྱི་ཟུར་ན་རེ་བ་ཆུང་ཆུང་ཞིག་ཀྱང་བཟུང་ ཡོད་པ་རེད།
ཡིན་ ཡང་བློ་ཕམ་པའི་གནས་ཚུལ་ཞིག་ནི་རྒྱ་ནག་གཞུང་ཕྱོགས་ནས་བོད་རྒྱའི་བར་གྱི་གནད་ དོན་ངོ་མ་གང་ཡིན་གྱི་སྐོར་ལ་དངོས་ཐོག་བདེན་འཚོལ་གྱིས་ཐག་གཅོད་བྱེད་རྒྱུ་ལས་ ལྡོག་སྟེ། ཨོ་ལིམ་ཕིག་རྩེད་འགྲན་མཇུག་རྫོགས་རྗེས་རྒྱལ་སྤྱིའི་སྟེང་ལ་ “རང་དོན་འགྲུབ་ན་ཆ་ལུགས་བཙོག་ཀྱང་བཙོག་” པའི་རྣམ་འགྱུར་བསྟན་ནས་རེ་བ་ཆུང་ཆུང་ཙམ་ལས་མེད་པའི་བོད་མི་རྣམས་འུ་ཐུག་ཐབས་ཟད་ཀྱི་གནས་སུ་གྱར་དུ་བཅུག་ཡོད།
ང་ ཚོ་ཧ་ཅང་ཐག་རིང་དུ་འགྲོ་མི་དགོས་པར་འགྲམ་པ་ལག་པས་སྐྱོར་ཏེ་ལོ་བཅུའི་ཡར་ སྔོན་གྱི་ཟམ་གདོང་རིན་པོ་ཆེའི་བཀའ་ཤག་སྐབས་སུ་རྒྱ་ནག་གཞུང་ལ་གུ་བཤང་བྱས་ པའི་གནས་ཚུལ་དེའི་ཐོག་ལ་བསྐྱར་དུ་བསམ་གཞིག་གིས་ཕྱིར་དྲན་ཞིག་བྱོས་དང་། ད་ང་ཚོ་ལ་ད་དུང་བྱ་རྒྱུ་ཅི་ཞིག་ལྷག་འདུག་གམ། དྲི་བ་འདི་ནི་རང་བཞིན་གྱིས་འཁོར་ཡོང་བ་ཞིག་སྟེ། འདི་ལ་ངས་གཅིག་གཅིག་གཉིས་གཉིས་ཀྱིས་ལན་གདབ་མི་དགོས་པར་ཁྱེད་ཀྱིས་མིག་གཉིས་ བཙུམས་ནས་བལྟས་ཀྱང་ལན་དེ་ཧ་ཅང་གསལ་གསལ་ཐིང་ཐིང་མཐོང་ཐུབ་པ་ཞིག་ཡིན་ལ། དེ་ནི་ད་ལྟ་བོད་ཕྱི་ནང་གཉིས་སུ་བྱུང་དང་འབྱུང་མུས་ཀྱི་རང་ལུས་མེ་སྲེག་གི་ ལས་འགུལ་གསར་པ་འདི་ཡིན་པ་སྨོས་ཅི་དགོས།
དེར་ བརྟེན་ངས་ཀྱང་དེ་རིང་འདི་ནས་རང་ལུས་མེ་སྲེག་གི་ལས་འགུལ་འདི་མཚམས་འཇོག་བྱ་ རྒྱུའི་འབོད་སྐུལ་གནང་མཁན་དག་ལའང་ལྡོག་འབོད་གཅིག་རང་གཅིག་བྱེད་འདོད་བྱུང་ སོང་། ཐུགས་རྗེ་གཟིགས། ཁྱེད་རྣམ་པར་རང་ལུས་མེ་སྲེག་གི་འབྱུང་རྐྱེན་ངོ་མ་དེ་བཀག་སྡོམ་བྱ་རྒྱུའི་ ནུས་སྟོབས་མེད་ཚེ། རང་ལུས་མེ་སྲེག་གི་ལས་འགུལ་འདི་མཚམས་འཇོག་བྱ་རྒྱུའི་འབོད་སྐུལ་མ་གནང་རོགས། ལས་འགུལ་འདིའི་འབྱུང་རྐྱེན་དང་འགན་ཆ་ཚང་རྒྱ་ནག་གཞུང་ལ་ཁོ་ན་ཡོད་པ་མ་གཏོགས། ང་ཚོའི་ཕྱོགས་སུ་གཏན་ནས་མེད། ཡང་གཅིག་བཤད་ན། མི་སུ་ལའང་སོ་སོའི་སེམས་ཁོང་གི་མངོན་འདོད་ངོ་མ་དེ་གཞན་གྱི་ཚེ་སྲོག་དང་འཚོ་ བ་ལ་གནོད་འཚེ་མེད་པའི་ཐོག་ནས་གསལ་བཏོན་བྱེད་རྒྱུའི་ཐོབ་ཐང་ཆ་ཚང་ཡོད་པ་རྒྱལ་ སྤྱིའི་ཁྲིམས་སུ་བཅས་ཡོད་པ་ཞིག་ཡིན།
མ་གཞི་རྒྱུ་འབྲས་ཀྱི་ཐོག་ནས་བཤད་ན་འདི་རྒྱུ་མ་ཡིན་པར་འབྲས་བུ་ཡིན་པས། རྒྱུ་འགོག་ཐབས་མ་བྱས་ཚེ་འབྲས་བུ་བཀག་ཅིང་མི་ཁོག་པ་ནི་ཆོས་ཉིད་ཡིན་པ་དང་། འདི་ཙམ་ནི་རྒྱུན་ཤེས་ཕྲན་བུ་ཞིག་ཡིན་པས་སུ་ལའང་གསལ་བཤད་ཞུ་ག་ལ་དགོས།
ཟམ་གདོང་རིན་པོ་ཆེའི་བཀའ་ཤག་གིས་ལོ་བཅུའི་ཡར་སྔོན་གངས་ཅན་སྐྱིད་གཤོང་ནས་མ་ འོངས་པ་ན་དེ་རིང་གི་འདི་ལྟ་བུའི་གནས་སྟངས་སྐྱི་གཡའ་འཇིགས་རུང་ཞིག་ཆགས་སྲིད་ པ་དང་། སྐབས་དེར་ཐོན་ན་དེའི་འགན་ཚང་མ་རྒྱ་ནག་གཞུང་ལ་ཡོད་པའི་ཉེན་བརྡ་ཧ་ཅང་གསལ་པོ་ བྱས་ནས་བརྒྱབ་ཡོད་པ་རེད།
ཡིན་ ཡང་། རྒྱ་ནག་གཞུང་ངོས་ནས་ད་དུང་མུ་མཐུད་དངོས་ཐོག་བདེན་འཚོལ་མི་བྱེད་པར་ཀླད་རྙིང་ མཁྲེགས་བཟུང་གིསདཔུང་ངོམ་ཁོ་ནས་གནས་བབ་སྡུག་པོ་འདི་ད་མུས་སུ་བཞག་སྟེ་བོད་ རྒྱའི་བར་གྱི་གནད་དོན་ཐག་གཅོད་བྱེད་རྒྱུར་བཟང་ཕྱོགས་ཀྱི་རྣམ་འགྱུར་ཞིག་གཏན་ ནས་མ་བསྟན་པའམ་འགྱུར་བ་ཞིག་མ་བཏང་ཚེ། དེའི་རྐྱེན་ཀྱིས་འབྱུང་འགྱུར། སྤྱི་ལེ་གྲུ་བཞི་མ་ས་ཡ་གཉིས་དང་འབུམ་ལྔ་ཡོད་པའི་བོད་ཀྱི་ས་གཞི་ཆེན་པོ་ འདིའི་ཐོག་ལ། དེ་རིང་གི་དཀྱིལ་ཤར་ཡུལ་གྲུའི་ནང་ལ་ག་རེ་འབྱུང་གི་ཡོད་པ་དེ་འབྱུང་རྒྱུ་ཡིན་ པ་བདག་གིས་ཁ་མཚོན་བཅད་ནས་བཤད་ཐུབ་ཅིང་། གནས་བབ་དེ་འདྲ་ཞིག་འགོ་བརྩམས་པའི་ཉིན་མོ་དེ་ནི་ྋགོང་ས་མཆོག་སྐུ་མྱ་ངན་ལས་ འདས་པའི་ཕྱིར་ཉིན་དེ་རང་ལ་ཡིན་སྲིད་པའང་བདག་གིས་གཏན་འཁེལ་ནས་བཤད་ཐུབ། དེར་བརྟེན་ད་ལྟ་ང་ཚོས་ཕྱོགས་སྣ་སྒོར་མོ་ནས་བསམ་གཞིག་ཞིབ་མོ་བྱས་བལྟས་ན་ལྟད་ མོ་ཚ་བོ་དེ་ད་དུང་མཇུག་ན་ལྟ་ཆོག་ཆོག་དང་ཡོང་ཆོག་ཆོག་གིས་བསྒུགས་ནས་བསྡད་ ཡོད་པ་དང་། རྒྱ་ནག་གཞུང་གི་བྱེད་སྟངས་འདི་ནི་ལྟད་མོ་ཚ་བོ་དེའི་མཇུག་བསྡུས་པ་མ་ཡིན་པར་ འགོ་བརྩམས་པ་ཙམ་ཡིན་པས། དེའི་མཐོ་རླབས་ཞེ་འདར་དགོས་པ་དང་དང་མཐའ་འབྲས་འཇིགས་སུ་རུང་བ་ངོ་མ་དེ་འདིའི་ རྗེས་ན་ཡོད།
ཨ་ ཅང་ཅང་། སྐབས་དེར་ཐོན་ན་དེའི་འགན་དེ་ཡང་རྒྱ་ནག་གཞུང་ལ་ཁོ་ན་ཡོད་པ་བཤད་ཅི་དགོས། ང་ལ་དེ་རིང་འདི་ལྟའི་ཧམ་སེམས་ཀྱིས་ཚོད་དཔག་ཆེན་པོ་ཞིག་བྱེད་པའི་སྙིང་སྟོབས་ དང་རྒྱུ་མཚན་འདང་ངེས་ཡོད་ལ། དེ་ནི་མོ་པ་ངན་པ་ཞིག་གིས་མོ་བརྒྱབ་པ་ལྟར་མ་ཡིན་པར་ད་བར་ངས་རྒྱ་ནག་གཞུང་གིས་ བོད་ཀྱི་གནད་དོན་ཐོག་ལ་བསམ་གཞིག་གཏན་ནས་མ་བྱས་ཚེ་དེའི་རྐྱེན་གྱིས་བོད་མི་ ཚོའི་ངོས་ནས་ཅི་ཞིག་བྱེད་སྲིད་པ་རེད་སྙམ་པ་དེ་ཚོ་ཚང་མ་ཁོ་ཚོས་ད་བར་དེ་ག་རང་ བྱས་སོང་། དེར་བརྟེན་དེ་རིང་ངས་ཡང་བསྐྱར་འདས་མ་ད་གསུམ་གྱི་བོད་རྒྱའི་བར་གྱི་གནད་དོན་ ལ་ཁྱུག་ཙམ་བལྟས་ནས་ཕྱོགས་ཕན་ཚུན་གཉིས་ཆར་ཕན་ཐོགས་ཡོད་པའི་སྐད་ཆ་ཞིག་བཤད་པ་ ཙམ་ཡིན་ལ། འདི་ནི་ང་རང་ཉིད་འགྲོ་བ་མི་ཞིག་དང་ལྷག་པར་དུ་བོད་མི་ཞིག་ཡིན་པའི་རྒྱུ་མཚན་ གྱིས་འབྱུང་འགྱུར་བོད་རྒྱའི་བར་གྱི་མཛའ་འབྲེལ་ལ་འགན་ཞིག་འཁུར་བ་ཙམ་ལས་གཞན་ ཅང་མིན།
སྐྱེས་ཚུལ་ཚང་མ་འདྲ་ན་ཡང། འཆི་ཚུལ་ཁྱད་པར་ཆེ་བ་སྟེ།
དཔའ་བོ་དཔའ་བོའི་ལམ་དུ་སྐྱོད། ཤི་བ་གཟི་བརྗིད་ལྡན་པར་བྱེད།
རང་གི་སྲོག་གིས་བདེན་བདར་བ། འདི་ལས་ལྷག་པའི་དཔང་རྟགས་མེད།
ཐོས་དང་བཤད་པ་བརྒྱ་སྟོང་ལས། འདི་འདྲ་རེ་རེས་ཀུན་སེམས་གཡོ།
གཉེན་གྱིས་མཆི་མ་ལྷུང་བྱེད་ཅིང། དགྲས་ཀྱང་ལྟ་བར་མི་བཟོད་པ།
བདེན་དོན་ཞི་བའི་རྒོལ་ཚུལ་འདིས། བདེན་པ་ཉིད་ནི་རྒྱལ་བར་འགྱུར།
ཐེ་ཤེར་ལགས་ཀྱིས་བཤད་པ་རྒྱུ་མཚན་དང་ལྡན་པ་ཞིག་རེད། བོད་མི་ཚོས་རང་ལུས་རྩ་ཆེན་ཡིན་པ་དང་གྲངས་ཉུང་མི་རིགས་ཡིན་པ་མ་ཤེས་པར་དེ་འདྲ་བྱས་པ་མ་རེད་དྲན་སོང་གང་ཡིན་ཟེར་ན། རྒྱ་ནག་དམར་གཞུང་གིས་བོད་ཐོག་དྲག་གནོན་ཚོད་མེད་བྱས་འབྲས་ལས་བྱུང་བ་ཞིག་ཡིན་པ་ལས་བོད་མི་ཚོ་སྣང་བ་མཐོ་དྲག་ནས་འདུག་མ་བཟོད་པར་བྱས་པ་ཞིག་མ་རེད། དུས་ནམ་ཡང་རྒྱ་ནག་དམར་གཞུང་གིས་དྲན་བདེན་གྱི་ལམ་དུ་མ་སྐྱོད་པར་བོད་མིའི་ཞི་བའི་ངོ་རྒོལ་འཚམས་འཇོག་བྱེད་མི་སྲིད་ལ་བྱེད་ཐབས་ཡང་ཡོད་པ་མ་རེད།
གསེར་མིག་འབྲུག་གྲགས་ལགས་ཀྱིས་དགོངས་ཚུལ་གསུང་བར་དགའ་བསུ་ཞུ། འོན་ཀྱང་འདིར་གསལ་བཤད་ཞུ་དགོས་པ་ཞིག་ལ། མ་གཞི་ངས་ངའི་རྩོམ་ཡིག་འདི་ཐོག་དང་པོ་འབྲི་ནས་ཁུངས་བཙན་པ་དང་མི་རྣམས་ངས་གང་བྲིས་པར་ཡིད་ཆེས་འཕེར་བའི་ཕྱིར་འབད་བརྩོན་དང་བསམ་གཞིག་ཅི་ཡང་བྱས་མེད། ངས་ལོ་འདི་ཚོའི་རིང་རྣ་བ་དང་མིག་གཉིས་སྤྱད་ནས་གང་མཐོང་ཞིང་ཐོས་པ་དག་འདིར་བྲིས་པ་ཙམ་ཡིན། ང་ཚོ་ཚང་མ་ཆབ་སྲིད་སྐྱབས་བཅོལ་བ་རེད། དེར་བརྟེན་ཉིན་རེ་བཞིན་བརྒྱུད་ལམ་ཁག་ནས་ཚོར་བ་རྣོ་བའི་ཆབ་སྲིད་ཀྱི་སྐད་ཆ་མང་པོ་ཞིག་རྣ་བ་དང་མིག་ནང་ལ་འཛུལ་ཡོང་གི་རེད། རྣམ་ཤེས་གཏད་ནས་བསྡད་ན་ཧ་ཅང་གསལ་པོ་ཤེས་ཀི་རེད། བོད་ནང་ནས་བཀའ་ཤག་གིས་གུ་བཤང་དང་བསྟུན་ཐབས་བྱས་དྲགས་འདུག་ཟེར་ནས་སྐྱོན་བརྗོད་བྱེད་མཁན་དེ་ཚོ་ངས་འདི་ནས་ཀན་དང་ཁོ་རེད་ཟེར་ནས་གཤིན་རྗེ་ལས་མཁན་མངོན་སུམ་དུ་བྱོན་པ་ལྟ་བུའི་རྒྱ་ལག་ཏུ་འཇོག་མི་ཕོད་ཀི ཕྱི་ལོགས་ནས་བཀའ་བློན་ཁྲི་ཟུར་དང་། བོད་དོན་རྒྱབ་སྐྱོར་ཚོགས་པ་ཁག རྩོམ་པ་པོ་དང་། གསར་འགོད་པ་སོགས་གནད་ཡོད་མི་སྣ་མང་པོས་སྐྱོན་བརྗོད་བྱས་ཡོད་པ་ང་ཚོ་ཚང་མས་མཐོང་གསལ་རེད། དེ་ཚོས་སྐད་ཆ་ཅི་བཤད་རེ་རེ་བཞིན་འདིར་འབྲི་དགོས་དོན་མི་འདུག གལ་སྲིད་རང་ལ་ཤེས་འདོད་ཡོད་ན། གྷོའུ་གྷལ་དྲ་ཐོག་ནས་འཚོལ་དང་རིག་རྒྱུ་མང་ནི་རེད། དེ་ཙམ་ཡིན།
ཁྱེད་རང་གི་བསམ་ཚུལ་ལ་རྒྱབ་སྐྱོར་ཡོད། གཞིས་བྱེས་གཉིས་ནས་ལས་འགུལ་རེ་བརྩམས་སྐབས་ཁ་ཤས་ཞིག་གིས་ཞེ་དྲག་བསམ་བློ་གཏོང་ཤེས་མདོག་དང་བྱང་སེམས་ཆེ་མདོག་གིས་བཀག་འགོག་གནང་བ་ཁྱོན་ནས་ཡག་པོ་མི་འདུག། དངོས་ནས་བྱེད་བསམ་ན་འཛམ་གླིང་ཕྱི་ནང་དང་རྒྱ་མི་རིགས་སོགས་ལ་གསལ་བཤད་དང་། འབོད་སྐུལ། ངོ་རྒོལ་སོགས་བྱེད་ཐབས་ཡོད་ཚད་གནང་ནས་རྒྱ་ནག་གཞུང་གི་བྱ་སྤྱོད་ལ་ངོ་རྒོལ་བྱེད་ན་ད་བཟོད་ང་ཚོ་སྤུན་ཟླ་ཚོའི་ཚེ་སྲོག་སྐྱོབ་ཐུབ། དེ་མིན་གནས་སྐབས་རེ་བཀག་འགོག་རེ་གནང་བསྡད་ན་མཐའ་མ་ཉེན་ཁ་ཆེན་པོ་ཡོང་རྒྱུ་དང་ཉེན་ཁ་ཆེན་པོ་ཞིག་བཟོས་པ་དང་གཅིག་མཚུངས་རེད།
སྤྱིའི་ཆ་ནས་བསམ་ཚུལ་ཡག་པོ་འདུག་ ཡིན་ཡང་ཕྱོགས་ཁ་ཤས་ཤིག་ལ་ཁྱེད་ཀྱི་
ཟམ་གདོང་རིན་པོ་ཆེའི་བཀའ་ཤག་སྐབས་རྒྱ་ནག་ལ་གུ་བཤང་ཆེ་དྲགས་འདུག་ཟེར་སྐབས་ཕྱོགས་གང་འདྲ་ཞིག་ནས་རྒྱ་ནག་ལ་གུ་བཤང་ཆེ་དྲགས་སྟངས་དྲགས་ལུགས་གང་འདྲ་རེད། དེར་མ་ཟད་གལ་ཏེ་ཁྱེད་ཀྱི་བརྗོད་པ་བཞིན་ “བོད་ཕྱི་ནང་གི་བོད་མི་རྩོམ་པ་པོ་དང་དགེ་རྒན་བཅས་སྤྱི་ ཚོགས་ཁྲོད་ཀྱི་ལས་རིགས་སྣ་ཚོགས་སྟེང་ཡོད་པའི་གནད་ཡོད་མི་སྣ་མང་པོས་ བརྒྱུད་ལམ་ཁག་ནས་བཀའ་ཤག་གིས་རྒྱ་ནག་གཞུང་ལ་གུ་བཤང་བྱས་དྲགས་པའི་རྣམ་འགྱུར་ བསྟན་ནས་ཟམ་གདོང་རིན་པོ་ཆེའི་བཀའ་ཤག་ལ་སྐྱོན་བརྗོད་ཤུགས་ཆེན་བྱས་ཡོད་” ཅེས་པར་བརྒྱུད་ལམ་གང་ནང་སྤྱི་ཚོགས་ཁྲོད་ཀྱི་གནད་ཡོད་མི་སྣ་དང་རྩོམ་པ་པོ་དེ་བཞིན་དགེ་རྒན་སོགས་མི་སྣ་སུ་ཞིག་སྐྱོན་བརྗོད་གང་ཞིག་བྱས་ཡོད་དམ། དཔེ་མཚོན་ཙམ་ཞིག་གསུང་རྒྱུ་ཡོད་ན་རྩོམ་གྱི་ཁུངས་བཙན་པ་དང་ཀློག་མཁན་ཚོ་ཡང་ཁྱེད་ཀྱི་གང་བཤད་པར་ཡིད་ཆེས་འཕེལ་བ་ཡོང་ངེས་ཡིན།
ཚོད་དཔག་མ་རེད་ལ། ལུང་བསྟན་ཡང་མ་རེད།
རྒྱུ་སྔོན་སོང་གི་འབྲས་བུ་རྗེས་སུ་སྨིན་རྒྱུ་ཡིན་པའི་ཆོས་ཉིད་ཅིག་བསྟན་འདུག
གང་དུ་བཙན་དབང་གི་རྒྱུ་ཡོད་ན་དེར་ངོ་ལོག་གི་འབྲས་བུ་ཡོད་ཡོད་པ་རེད།
ཚོད་དཔག་མིན་ལ། ལུང་བསྟན་ཡང་མིན།
བོད་རྒྱ་ཞི་འགྲིག་ཡོང་བར་རེ་བ་ཇེ་ཕྲ་ནས་ཇེ་ཕྲར་འགྱུར་ངེས་ལ།
བོད་མི་ཚོའི་སེམས་ཀྱི་རྨ་ཁ་ཇེ་ཆེ་ནས་ཇེ་ཆེར་འགྱུར་ངེས།།